ၸၢႆးသၢႆၶိူဝ်းၼႆႉ တိုၼ်းဢမ်ႇယူႇ ႁႂ်ႈသုမ်းၶၢဝ်းယၢမ်းလၢႆꧦသေ ပွၵ်ႈ။ တီႈၼႆႈၵေႃႈ မၼ်းဝူၼ်ႉဝႃႈဝႅင်းႁိူၼ်းၵေႃႈၵႂၢင်ႈ ၼမ်ႉၵေႃႈမီးၼႂ်း ဝႅင်း ႁဵတ်းသူၼ်ၽၵ်းလႆႈယူႇလူးၼႆသေ
“ပႃႈၶႃႈ လုၵ်ႈႁဵတ်းသူၼ်ၽၵ်းၶႃႈၼႃႉ တီႈသူၼ်ၵေႃႈၵႂၢင်ႈၼမ်ႉၵေႃႈမီး ယူႇၶႃႈလူး”
“ၸၢင်ႈပဵၼ်သင်လႃႇလုၵ်ႈ ပေႃးလုၵ်ႈၵႆႉၵေႃႈႁဵတ်းလႄႈမႄႈ”
ၸၢႆးသၢႆၶိူဝ်းၵေႃႈႁဵတ်းသူၼ်ၽၵ်းၼႆ ၶုတ်းꧦသၢႆႇꧦသူၼ်မၼ်းယူႇ ၼႂ်ၼႆႉ ၵေႃႈ လုၵ်ႉမႃးၸဵမ်ၸဝ်ႉသေ ၶဝ်ႈၵႂႃႇၼႂ်းသူၼ်ထႅင်ႈယဝ်ႉ ၼၢင်းၸၢမ် ၶမ်းၶဝ်ႈဝႅင်းမႃးသေ
“ပီႈသၢႆၶိူဝ်းၵႂႃႇလႂ်ယဝ်ႉၶႃႈလႃႇပႃႈ”
“မီးၼႂ်းသူၼ်တၢင်းလင်ႁိူၼ်းၼႄႈလုၵ်ႈ”
“ၸၢမ်ၶမ်းမႃးၸူဝ်းပီႈသၢႆၶိူဝ်းၵႂႃႇလႄႇဢေႃႈ” တင်းလၢတ်ႈတင်းဢွၵ်ႇႁိူၼ်းၵႂႃႇသေ ပူၼ်ႉၶဝ်ႈၵႂႃႇၼႂ်းသူၼ်ၽၢႆႇလင် ႁိူၼ်းၼၼ်ႉယဝ်ႉ။
ၸၢႆးသၢႆၶိူဝ်းတႄႉ ထွတ်ႇသိူဝ်သေ ၶုတ်းꧦသၢႆႇꧦသူၼ်မၼ်းယူႇ မၼ်းၸၢႆးၼႆႉဢမ်ႇပေႃးမၵ်ႉၸေး ဢမ်ႇပေႃးၵိၼ်ၸေးမိူၼ်ပိူၼ်ႈ ၵွပ်ႈ ၼၼ်လႄႈ ပၢႆးယူႇလီမၼ်းၵေႃႈ တိုၼ်းၶႅမ်ႉလႅပ်ႈယူႇတႃႇသေႇၼၼ်ႉ ယဝ်ႉ။
မၢၵ်ႇႁႅင်းတီႈၶႅၼ် ၸွမ်းဢူၵ်းမၼ်းၸိူဝ်းၼႆႉ ပဵၼ်ၵွၼ်ႈပဵၼ် မၢၵ်ႇလူင်ဝႆႉလႄႈ ႁိူဝ်ႇဢွၵ်ႇယမ်းတင်းတူဝ်သေ ၶုတ်းလိၼ်ယူႇပိုၵ်ႈꧦ ၵေႃႈ ဢမ်ႇလႅပ်ႈႁိူဝ်ႉသေဢိတ်းၵွၼ်ႇ။ ၼၢင်းၸၢမ်ၶမ်းမႃးၸုၵ်းသေ တူၺ်းမၼ်းယူႇတင်းႁိုင်ၵေႃႈ မၼ်းၸၢႆးပႆႇႁၼ် ၸၢမ်ၶမ်းၸင်ႇ
“ဢႁႅမ်ႉ!”
မၼ်းၸၢႆးၸင်ႇဝိၼ်ႇဝၢႆႇတူၺ်းသေ “ဢေႃႈၸၢမ်ၶမ်းမႃး ဢမ်ႇတၵ်းသဵင် လႃႇ ပေႃးႁူႉဝႃႈၸၢမ်ၶမ်းမႃးမီးႁိမ်းပီႈၼႆတႄႉ ႁိူဝ်ႉပီႈပေႃးတၢၼ်ႇလီႁၢႆ ၸဵမ်ၵႆႈယဝ်ႉဢိူဝ်ႈၼႆႉ”
“ဢမ်ႇပဵၼ်တၢၼ်ႇၼၼ်ႉၼင်ႇၵဝ်ႇၶႃႈယူဝ်ႉ”
“တေႉလေႃႇ မိူဝ်ႈပႆႇလႆႈႁၼ်ၸၢမ်ၶမ်းတႄႉ ထူၺ်ႈၸႂ်ပေႃးဢမ်ႇၶိုတ်း ၵၼ်လႆႈၵွၼ်ႇဢိူဝ်ႈ မိူဝ်ႈလဵဝ်တႄႉဢမ်ႇပဵၼ်ယဝ်ႉၼင်ႇၵဝ်ႇ”
“ႁိုဝ်ႉ! မေႃလၢတ်ႈတႄႉၼေႃ တႃႉသေဝႃႈပိူၼ်ႈပဵၼ်ၸဝ်ႈၼမ်ႉဢွႆႈ ၼေႃႈ ၸၢမ်ၶမ်းမႃးၸူဝ်းပီႈသၢႆၶိူဝ်းၵႂႃႇလႄႇဢေႃႈၼႆႉ”
“ၵူဝ်ၺႃးၼမ်ႉၼေႈ.. ၸၢမ်ၶမ်းသမ်ႉတေၶႂ်ႈလႄႇတီႈလႂ် ပိူၼ်ႈၵႆႉလဵၼ်ႈ တီႈလႂ်လႃႇ မိူင်းပၼ်ႇၼႆႉၼမ်ႉၵိၼ်းၼႃႇလူး ဢမ်ႇမီးတီႈလဵၼ်ႈယူဝ်ႉ”
“ၼမ်ႉၵိၼ်းၼမ်ႉၵိၼ်းယူႇလႄႈ ၵမ်ႉ ၸၢမ်ၶမ်းတေၵႂႃႇဢဝ်ၼမ်ႉမႃး ဢၢပ်ႇပၼ်ပီႈသၢႆၶိူဝ်းႁေယဝ်ႉဝႃႈ”
“တႄႉဢိူဝ်ႈၸၢမ်ၶမ်း ၵူႈပီပိူၼ်ႈၵႆႉလဵၼ်ႈတီႈလႂ်လႃႇ”
“လဵၼ်ႈယူႇၸွမ်းတၢင်း ၸိူဝ်းၼၼ်ႉၵူၺ်းၶႃႈၼေႈ ၸၢမ်းတၢင်းလူင် တႄႉၶႂ်ႈမီးၵူႈတီႈယဝ်ႉဝႃႈ ၼွင်ႉၵေႃႈဢမ်ႇၶႂ်ႈၵႂႃႇလဵၼ်ႈၼင်ႇၵဝ်ႇ” ယၵ်ႉ တူၺ်းသၢႆၶိူဝ်းသေ “ပေႃးလႃႈ ဢၢပ်ႇၼမ်ႉလၢႆႈၶူဝ်းလႃႈ ၼွင်ႉတေဢွၼ် လႄႇၵူၺ်း ပေႃးပီႈသၢႆၶိူဝ်းတၼ်းယဝ်ႉၵေႃႈ ႁွင်ႉၼွင်ႉလႄႈၼႃႉ”
“ဢိူဝ်ႈဢိူဝ်ႈ တေထၢမ်ပႃႈတူၺ်းၵွၼ်ႇ ၸွင်ႇပႃႈတေပၼ်ၵႂႃႇႁိုဝ်ဢမ်ႇ ႁူႉ”
“ပၼ်ၵႂႃႇၼႃႇၶႃႈ ၼွင်ႉတေၵေႃႉထၢမ်လႆ ဢၢပ်ႇၼမ်ႉႁဵတ်းတေႉလႃႈ” ပႆမႃးၼႂ်းႁိူၼ်းၼႆႉသေ “ ပႃႈၶႃႈၸၢမ်ၶမ်းတေၸူဝ်းပီႈသၢႆၶိူဝ်းၵႂႃႇလႄႇ ၶႃႈၼႃႉ”
“ဢိူဝ်ႈၵႂႃႇလႄႈမႄႈၸၢင်ႈပဵၼ်သင်”
ၸၢႆးသၢႆၶိူဝ်းဢၢပ်ႇၼမ်ႉလၢႆႈၶူဝ်းသေ မႃးၼင်ႈၵိၼ်ၶဝ်ႈ တိုၵ်ႉၸင်ႇႁႃ လႆႈၵိၼ်သွင်သၢမ်ၵမ်းၵူၺ်း
“ပီႈသၢႆၶိူဝ်းပႆႇတၼ်းၶႃႈႁႃႉပႃႈ”
“မၼ်းတိုၵ်ႉၵိၼ်ၶဝ်ႈယူဝ်ႉလုၵ်ႈ ၶဝ်ႈၵႂႃႇတူၺ်းလူး”
မၼ်းၼၢင်းၶဝ်ႈမႃးသေ “မႃးလႄႈၸၢမ်ၶမ်း ၵိၼ်ၶဝ်ႈၸွမ်းပီႈၵေႃႈ”
“ဢႃ ပေႃးလႄႈ ၼွင်ႉလူဝ်ႇၵႂႃႇၵိၼ်ၶဝ်ႈမၼ်းၵႆႇ ၵမ်ႉမႃးၼွင်ႉတေဢမ်ႇ မီးၵေႃႉႁေယဝ်ႉဢေႃႈ” မၼ်းၼၢင်းတင်းလၢတ်ႈတင်းဢဝ်သုမ်ႇမႃးႁူမ်ႇၽိူၼ်ၶဝ်ႈပႅတ်ႈၸၢႆးသၢႆၶိူဝ်းသေ မၼ်းၸၢႆးၵေႃႈဢမ်ႇၸၢင်ႈသိုပ်ႇၵိၼ်ယဝ်ႉ
“မႃးလႃႈ လုၵ်ႉၵမ်းလဵဝ်လေႃႇ”
ၸၢႆးသၢႆၶိူဝ်းၵေႃႈ လုၵ်ႉပႆဢွၵ်ႇမႃးၸွမ်းမၼ်းသေ
“ပႃႈၶႃႈ လုၵ်ႈတေၵႂႃႇလႄႇၸွမ်းၸၢမ်ၶမ်းၶႃႈၼႃႉ”
“ဢိူဝ်ႈဢိူဝ်ႈ ၵႂႃႇလႄႈမႄႈ ၸွင်ႇလုၵ်ႈမီးငိုၼ်းႁိုဝ်လႃႇၼၼ်ႉ”
“မီးယူႇၶႃႈ” ၼႆသေ မႃးၼႂ်းဝႅင်းႁိူၼ်းၸၢမ်ၶမ်းၶဝ်ၼႆႉယဝ်ႉ။
“ယေႃႈ ပီႈသၢႆၶိူဝ်းၵေႃႉႁေႃႈလႄႈ ပႂ်ႉၵမ်ႉၵွၼ်ႇၶႃႈၼႃႉ”
ယိုၼ်ႈသေႃးၵႃးပၼ်ၸၢႆးသၢႆၶိူဝ်းယဝ်ႉ လႅၼ်ႈၶိုၼ်ႈႁိူၼ်းမိူဝ်းယဝ်ႉ။
ၸၢႆးသၢႆၶိူဝ်းမႃးပိုတ်ႇၽၵ်းတူၵႃးယဝ်ႉ ယိပ်းဢဝ်တဝ်ႈၼမ်ႉၸိုၼ်ႈသႂ် မႃးၵိၼ်သေ ၼူဝ်းၵႃးဝႆႉယူႇ။ ၼိူဝ်ႁိူၼ်းၼႆႉသမ်ႉ
“ပေႃႈၶႃႈ လုၵ်ႈတေၵႂႃႇလႄႇၶႃႈၼႃႉ”
“ဢိူဝ်ႈၵႂႃႇလႄႈ ႁေႃႈလွႆးလွႆး ၾၢင်ႉသေႁေႃႈဢိူဝ်ႈၼႃႉလုၵ်ႈယိင်း လူတ်ႉၼမ်ၵႃးၼမ် ၵူၼ်းမဝ်းလဝ်ႈၵေႃႈၼမ်ဢိူဝ်ႈ ၶၢဝ်းသွၼ်းၼမ်ႉ ၸိူင်ႉၼႆ”
“လုၵ်ႈယိင်းဢမ်ႇႁေႃႈၶႃႈပေႃႈ လုၵ်ႈယိင်းပၼ်ပီႈသၢႆၶိူဝ်းႁေႃႈၶႃႈဢေႃႈ ”
“မီးလႂ်သၢႆၶိူဝ်း ဢေႃႈ ၵေႃႉၼႆႉႁႃႉဢၼ်လုၵ်ႈယိင်းဝႃႈ မၼ်းၵေႃႉႁေႃႈ ၵႃးလုၵ်ႈယိင်းမႃးၼႆၼၼ်ႉ” လုင်းသၢင်ႇမွင်ႇမႃးငွၵ်ႈတူၺ်း လႆႈႁၼ် မႅၼ်ႈမိူဝ်ႈ ၸၢႆးသၢႆၶိူဝ်းတိုၵ်ႉပိုတ်ႇႁူဝ်ၵႃး ၸႅတ်ႈတူၺ်းၼမ်ႉလိပ်းၼႂ်း ဢုမ်ၼၼ်ႉယူႇလႄႈ
“ဢေႃႈ..မၼ်းယၢမ်ႈၸႂ်ႉၵႃးယူႇလူးၼႆႉ ႁွင်ႉမၼ်းမႃးထူပ်းပေႃႈၵမ်ႉလူးလုၵ်ႈယိင်း”
“ဢေႃႈၶႃႈ” ၼႆၸၢမ်ၶမ်းလူင်းႁိူၼ်းမႃးသေ
“ပီႈသၢႆၶိူဝ်းၶႃႈ မိူဝ်းၼိူဝ်ႁိူၼ်းၵမ်ႉၼႆၶႃႈဝႃႇ”
ၸၢႆးသၢႆၶိူဝ်းပိၵ်ႉၽႃႁူဝ်ၵႃးမၼ်းသေ ၵွပ်ႈမၼ်းပႆႇႁၼ်လုင်းသၢင်ႇမွင်ႇ လႄႈၸင်ႇဝႃႈ “ၸၢမ်ၶမ်းမိုင်ႉႁဵတ်းသင်ယူႇလႃႇ ၸႃႇဢဝ်မိူဝ်ႈၵႆႈသမ်ႉ မိူဝ်းၼႅတ်ႈပၼ်ပီႈ ၵိၼ်ၶဝ်ႈပေႃးဢမ်ႇတၼ်းလႆႈၵိၼ်ၼမ်ႉၼႆႉဢႃႉ” ပွင်ႉလူင်ၶိုၼ်ႈႁိူၼ်းသေ မႃးႁၼ်ၵူၼ်းၸၢႆးၶၢဝ်ႉၵေႃႉၼိုင်ႈလႄႈ ၸင်ႇ မိုင်ၵႂႃႇၵမ်းၼိုင်ႈသေယဝ်ႉ။
“ပီႈသၢႆၶိူဝ်းၶႃႈ ၼႆႉပဵၼ်ပေႃႈၸၢမ်ၶမ်းဢေႃႈ”
“ဢေႃႈ မႂ်ႇသုင်ၶႃႈ ႁဝ်းၶႃႈဢၢင်ႈၵႂႃႇလႄႇၼႆဢေႃႈ”
“ဢိူဝ်ႈၼင်ႈၵွၼ်ႇလႄႈ”
“ဢေႃႈၶႃႈငိၼ်းၸူမ်းၶႃႈဢေႃႈ”
“ဢၢႆႈသၢင်ႇၼႆႉ ပဵၼ်လၢၼ်ပီႈသူၺ်ႇၼူႉဢိူဝ်ႈၼႆႉၼေႃႈ”
“ဢေႃႈၶႃႈ ၸႂ်ႈၶႃႈဢေႃႈ”
“ၸိုင်ဢမ်ႇသူႈႁၼ်မႃးလႄႇၵၼ်သေပွၵ်ႈလႃႇ”
“ဢေႃႈ ဢမ်ႇလႆႈမႃးၶႃႈ ၶႃႈတႄႉမႃးၸဵမ်မိူဝ်ႈၵေႃႉလဵၵ်ႉပုၼ်ႉပွၵ်ႈသွင် ပွၵ်ႈၵူၺ်းၶႃႈယူဝ်ႉၼၼ်ႉ”
“မိူဝ်ႈလုင်းသူလူႉၼႆႉၵေႃႈဢမ်ႇလႆႈမႃးႁႃႉ”
“မိူဝ်ႈၼၼ်ႉၶႃႈတိုၵ်ႉမီးဝႆႉ တီႈမိူင်းထႆးၶႃႈဢေႃႈၼၼ်ႉ ၶႃႈၸင်ႇႁႃပွၵ်ႈ မႃးမီးပီပၢႆၸမ်သွင်ပီၼႆႉၵူၺ်းၶႃႈ”
“ဢေႃ ၸႂ်ႈၵႂႃႈပေႃးၼၼ်”
“ၵၼ်ႇတေႃးၶႃႈၼေႃႈ ပေႃႈလုင်းၶဝ်သမ်ႉမီးၵူၼ်းႁိူၼ်းလၢႆၵေႃႉၶႃႈၼႆႉ”
“မီးႁဝ်းပေႃႈလုၵ်ႈၼႆႉၵူၺ်းဢိူဝ်ႈ သမ်ႉထႅင်ႈလၢၼ်ၵေႃႉၼိုင်ႈ ယူႇၵၼ် သၢမ်ၵေႃႉပေႃႈလုၵ်ႈလုင်းလၢၼ်ၼႆႉၵူၺ်း”
“ဢေႃႈ မႄႈပႃႈႁဝ်းၶႃႈသမ်ႉၵႂႃႇလႂ်ယဝ်ႉၶႃႈလႃႇ”
“ပႃႈသူတႄႉလူႉယဝ်ႉဢိူဝ်ႈ လူႉၸဵမ်မိူဝ်ႈၸၢမ်ၶမ်းဢႃႇယုႁႃႈၶူပ်ႇပုၼ်ႉ ၼေႈ”
“ဢေႃ.. လီမွင်ၸႂ်တႄႉယဝ်ႉၶႃႈၼေႃ”
“ၵႂႃႇၶႃႈၼေႃႈပီႈသၢႆၶိူဝ်း ၼွင်ႉတၼ်းယဝ်ႉၶႃႈဝႃႈ”
ၸၢမ်ၶမ်းတင်းလၢတ်ႈတင်းမေးၸၼ်ၶႅၼ်သိူဝ်ႈမၼ်းသေ မႃးၸူးတီႈ ပေႃႈၶဝ်ၼႆယဝ်ႉ။
“လုၵ်ႈယိင်းတေၵႂႃႇၶႃႈယဝ်ႉပေႃႈ”
“ဢိူဝ်ႈဢိူဝ်ႈ”
လုင်းသၢင်ႇမွင်ႇၼႆႉ ႁၵ်ႉလုၵ်ႈယိင်းၸွမ်းၸႂ်လုၵ်ႈယိင်းမၼ်းတႃႇသေႇ လႄႈ မၼ်းဢၢင်ႈတေထၢမ်ထႅင်ႈယူႇလၢႆလၢႆလွင်ႈသေတႃႉၵေႃႈ ဢမ်ႇ တၼ်းလႆႈထၢမ်ယဝ်ႉ။
“ႁဝ်းၶႃႈတေယွၼ်းၵႂႃႇၵွၼ်ႇၶႃႈ ပေႃႈလုင်း”
“ဢိူဝ်ႈဢိူဝ်ႈ ၵႂႃႇလႄႈၵႂႃႇလႄႈ”
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ။
