ၼွၵ်ႈလိူဝ်သေၵၢၼ်ၼႃႈႁိူၼ်းၼၼ်ႉ မၼ်းၸၢႆးယင်းယၢမ်ႈပဵၼ် မေႃသွၼ်မႃးသေ ၵွပ်ႈၼၼ်မၼ်းၸၢႆး ပႃးၸႂ်ၽၢႆႇလိၵ်ႈလၢႆး ပၢႆးမွၼ်း လႄႈ ၶဝ်ႈၸႂ်ၼႂ်းၵၢၼ်ပဵၼ်မေႃသွၼ်ၼၼ်ႉတႄႉတႄႉ။ ၵူၼ်းၼုမ်ႇၶဝ် သမ်ႉမၼ်းသွၼ်ပၼ်တိင်ႇလႄႈ သွၼ်ႁွင်ႉၵႂၢမ်းၸိူဝ်းၼႆႉယဝ်ႉ။
ၶမ်ႈၼႆႉၵေႃႈ မၼ်းၸၢႆးမႃးတႅၵ်ႈပၼ်ၵႂၢမ်း တီႈလုၵ်ႈႁဵၼ်းၶဝ် မိူၼ်ၵူႈၶမ်ႈၼၼ်ႉယူႇ၊ ထႅင်ႈႁူၵ်းၸဵတ်းဝၼ်းၵူၺ်း သၢင်းၵျၢၼ်ႇပေႃး တေလူင်းသေ တေထိုင်ၶၢဝ်းသွၼ်းၼမ်ႉယဝ်ႉလႄႈ ပိူၼ်ႈပေႃးဢွၼ် ၵၼ်ႁႃမွၵ်ႇႁႃတွင်သေ ႁဵတ်းၶဝ်ႈမုၼ်းႁေႃႇႁႃသိုဝ်ႉၶူဝ်းလူႇၶူဝ်းတၢၼ်း သေ ၵျေႃႇၵျေႃႇသိူဝ်းသိူဝ်းပေႃးပၼ်းၵႂႃႇသဵင်ႈယဝ်ႉ။ ၸိူဝ်းဢၼ်ပိူၼ်ႈ ယင်းတိုၵ်ႉမီး ပေႃႈမီးမႄႈယူႇၸိူဝ်းၼၼ်ႉတႄႉ ဢွၼ်ၵၼ်ၸူမ်းသိူဝ်း ပႂ်ႉထႃႈတႃႇတေယုၵ်ႉၵွၵ်းမွၵ်ႇယႃႈၶဝ်ႈတႅၵ်ႇဢွၼ်ႇပိူၼ်ႈၸူးထိုင်ပေႃႈမႄႈယူႇႁင်းၽႂ်ႁင်းမၼ်းယဝ်ႉ။
ၸၢႆးသၢႆၶိူဝ်းၵေႃႉၼိုင်ႈတႄႉ ဝူၼ်ႉယူႇႁင်းမၼ်းဝႃႈ
“ဢေႃ..ၸိူဝ်းဢၼ်ပိူၼ်ႈယင်းတိုၵ်ႉမီး ပေႃႈမီးမႄႈတႄႉတေလႆႈၵၼ်ႇ တေႃးပေႃႈမႄႈယဝ်ႉၼေႃ ၵဝ်သမ်ႉမီးမွၵ်ႇယႃႈၶဝ်ႈတႅၵ်ႇ ၶူဝ်းလူႇၶူဝ်း တၢၼ်းယဝ်ႉၼႆသေတႃႉၵေႃႈ ဢမ်ႇမီးပေႃႈမႄႈသွင်ၸဝ်ႈမႃးပႂ်ႉႁပ်ႉဢဝ် တၢင်းလီလုၵ်ႈယဝ်ႉၶႃႈၼေႃ ပေႃႈဢူၺ်မႄႈဢူၺ်လုၵ်ႈၶွႆပိူၼ်ႈ လုၵ်ႈၸႂ် လဵၵ်ႉၼႃႇၶႃႈ လုၵ်ႈတူၵ်းလိုၼ်းယဝ်ႉၶႃႈဢေႃႈ မၼ်းၸၢႆးမႃးယိပ်းဢဝ် တိင်ႇမၼ်းသေ ႁွင်ႉၵႂၢမ်းယူႇ။
V1 မိူဝ်ႈယူႇႁူမ်ႈငဝ်းပိုင်ႈဢိင်သဝ်း ႁူမ်ႈပေႃႈမႄႈၸဝ်ႈၵေးၸူးလူင် ၸိုင် ပေႉမႃးၵတ်းယဵၼ်မူၼ်ႈသိူဝ်း ထိုင်ၶိင်ႇမိူဝ်ႈၼွၼ်းမွႆႈလပ်းတႃ ၸင်ႇ ၵွႆႈလႄႇႁႃပွၵ်ႈၶိုၼ်းႁိူၼ်း လုၵ်ႈၸၢႆးဢွၼ်ႇမႄႈႁဝ်း ပေႉဝႃႈယၢပ်ႇ။
V2 မႄႈသင်ႇသွၼ်ၵႂၢမ်းၵတ်းယဵၼ် ပဵင်းၶႂ်ႈႁႂ်ႈလုၵ်ႈၸၢႆးလၵ်းလႅမ် ထိုင် မိူဝ်ႈၼၼ်ႉတိုၼ်းဢမ်ႇဢဝ်ၵႂၢမ်းႁၢႆႉတေႃႇမႄႈႁဝ်းႁႂ်ႈတုၵ်းသိုဝ်ႉမႅင်ႇၵူၼ်းၵေႃႉဢွၼ်ႇႁၢင်ႈလဝ်းလဝ်း မႅတ်ႉၼမ်ႉတႃလေႃႈလူင်းၸွမ်း ၵႅမ်ႈယူႇ။
CHO: မိူဝ်ႈလဵဝ်လုၵ်ႈၸၢႆးႁူႉတူဝ်ၶိုၼ်းမႃး ဢၼ်ႁၢႆႉၼိူဝ်မႄႈႁဝ်းဝၼ်း ပူၼ်ႉလင် ႁႂ်ႈပွႆႇႁႂ်ႈဝၢင်းၶၢင်းလွတ်ႈပၼ်လုၵ်ႈၸၢႆးၵွၼ်ႇ မိုဝ်းဢွၼ်ႇ သွင်ၽၢႆႇ ၶုပ်ႉဝၢႆႇဝၢႆႈၸူးယူႇၵႂႃႈ ယၢမ်းယဝ်ႉဢၼ်လႆႈလုမ်းလႃးၼိူဝ် လုၵ်ႈၸၢႆးမႃးၼၼ်ႉ လုၵ်ႈတေတွပ်ႇတႅၼ်းထိုင်ၵေးၸူးမႄႈယူႇ။
ႁွင်ႉၵႂၢမ်း ၵႂၢမ်းသုတ်းယဝ်ႉသေၼင်ႈဢဝ်ၼမ်ႉတႃလုၵ်ႈ ၽၢၼ်ပေႃႈ ၽၢၼ်မႄႈဢွၼ်ႇမၼ်းၸၢႆးယိုင်ႈတဵမ်ႁူၺ်ႇဝႆႉယူႇယဝ်ႉ။
မိူင်းလႅင်းမႃထႅင်ႈၼႂ်ၼိုင်ႈ ၸၢႆးသၢႆၶိူဝ်းမႃးၼင်ႈႁိမ်းၼႃႉသၢင်ႇၶဝ်သေ ၸင်ႇယွၼ်းၶႂၢင်ႉဝႃႈ
“တႃႇတေသိုပ်ႇယူႇၵႂႃႇၼႂ်းဝၢၼ်ႈၼႆႉၵေႃႈ ၶႃႈဢမ်ႇၵျေႃႇၸႂ်လႆႈ ပေႃးဝႃႈ ၶႃႈလႆႈၵႂႃႇႁၼ်ၸိူဝ်းၶဝ် ပဵၼ်ပၢၼ်လဵဝ်ၵၼ်တင်း ပေႃႈမႄႈႁဝ်းၼၼ်ႉ ၶႃႈၶုၵ်းၸႂ်လႆႈပေႃႈႁဝ်းမႄႈႁဝ်းၼႃႇ ၵွပ်ႈၼၼ်လႄႈၶႃႈတေယွၼ်းၶႂၢင်ႉ ၵႂႃႇႁႃယူႇတီႈဢၼ်ပိူၼ်ႈဢမ်ႇႁူႉၸၵ်းႁဝ်း ႁဝ်းၵေႃႈဢမ်ႇႁူႉၸၵ်းပိူၼ်ႈ ၼၼ်ႉသေ ႁႃႁဵတ်းၵၢၼ်လုၵ်ႈလဵင်ႉလုၵ်ႈၸၢင်ႈပိူၼ်ႈ ၸိူင်ႉၼၼ်ဢဝ် ၶႃႈယဝ်ႉ”
ၵမ်းၼၼ်ႉၼႃႉသၢင်ႇၶဝ်ၵေႃႈယၵ်ႉတူၺ်းမၼ်း တႃပေႃးဢမ်ႇ ၽႅပ်ႉယုပ်း ၽႂ်ၵေႃႈပႆႇတၵ်းသဵင် ယူႇၸူဝ်ႈၼိုင်ႈ ၼႃႉသၢင်ႇၶဝ်ၸင်ႇ လၢတ်ႈလွႆးလွႆးဝႃႈ
“ဢႃႉ — ၵဝ်ဝႃႈတႄႉပေႃးလႃႈ ဝႃႈမႂ်းဢမ်ႇၶႂ်ႈယူႇၼႂ်းဝၢၼ်ႈၼႆႉၼႆၵေႃႈ တႃႉမႂ်းမိူဝ်းယူႇၸွမ်းမႄႈပႃႈသူ တီႈမိူင်းပၼ်ႇပုၼ်ႉလႃႈမႂ်း မႅၼ်ႈၵၼ် ယဝ်ႉတင်းမၼ်းၵေႃႈ ဢမ်ႇမီးၽႂ်လုမ်းလႃး ဢမ်ႇမီးၵူၼ်းႁဵတ်းၵၢၼ် ဝႃႈလႃးၵေႃႈ မႂ်းဢၢၼ်းၶိုၼ်းၶဝ်ႈၵႂႃႇတၢင်းမိူင်းထႆးၼႄႇတေႃႈ”
“မိူင်းထႆးတႄႉ ၶႃႈဢမ်ႇၵႂႃႇယဝ်ႉၶႃႈ ၶႃႈဝူၼ်ႉဝႃႈၶႃႈတေၵႂႃႇႁႃယူႇတီႈ ဢၼ်ဢမ်ႇမီးၵူၼ်းႁူႉၸၵ်းၶႃႈၼၼ်ႉၼႆဢေႃႈ”
“ဢိူဝ်ႈ ၽိူဝ်ႇၵႂႃႇႁႃႁဵတ်းလုၵ်ႉလဵင်ႉလုၵ်ႈၸၢင်ႈပိူၼ်ႈ ၼၼ်ႉတႄႉ မိူဝ်း ယူႇၸွမ်းဢၼ်ႁဝ်း ပဵၼ်ၼိူဝ်ႉလိူတ်ႈလဵဝ်ၵၼ်ၼႆႉဢိူဝ်ႈ ဝၢႆးပေႃႈလုင်း သူတၢႆပႅတ်ႈမၼ်းၼႆႉ မၼ်းယူႇၵေႃႉလဵဝ်ၵူၺ်းဢိူဝ်ႈၼၼ်ႉ ဝႆႉမိူၼ်ၼင်ႇ ပေႃႈမႄႈသေ တူၺ်းထိုင်လုမ်းလႃးမၼ်းၵႂႃႇဢိူဝ်ႈ”
“ဢေႃႈလႆႈယူႇၶႃႈ”
“ပေႃးမႂ်းမိူဝ်းၵေႃႈ ၵဝ်တႅမ်ႈလိၵ်ႈပၼ်မၼ်းသပ်းလႅင်းၼႄမၼ်းႁႂ်ႈပေႃး ႁူႉလွင်ႈႁူႉတၢင်းမၼ်းၼၼ်ႉၼႃႇ”
“ဢေႃႈၶႃႈ”
ၸၢႆးသၢႆၶိူဝ်းၵေႃႈ ၶီႇၵႃးလႅင်းလႅၼ်ႈၶိုၼ်ႈလွႆၽၢတ်ႇယၢၼ်ဝဵင်းလၢင်းၶိူဝ်း မႃး လွႆးလွႆးယဝ်ႉ ၽႅဝ်မႃးတီႈတူပ်ႉသွၵ်ႇၼႆႉယဝ်ႉ ဢမ်ႇမုင်ႈဢမ်ႇမွင်း သေ မီးၵႃး (Fortuner) သီၶၢဝ်လမ်းၼိုင်ႈသေ ၵိုတ်းၶမ်တၢင်းဝႆႉယူႇလႄႈ ၶဝ်ဢွၼ်ၵၼ်လူင်းတူၺ်း ၸဝ်ႈၵႃးၼၼ်ႉၸင်ႇထၢမ်ဝႃႈ
“ၵႃးသူပဵၼ်သင်လႃႇ ၸၢမ်ၶမ်း”
“ဢမ်ႇႁူႉၶႃႈ ယူႇယူႇၸၢၵ်ႈမၼ်းၵိုတ်းၵႂႃႇႁင်းၵူၺ်းမၼ်းၸိူင်ႉၼၼ်ၶႃႈ ဢေႃႈ”
ၸဝ်ႈၵႃးလႅင်းၼၼ်ႉၽုၺ်ႇတူၺ်းႁူဝ်ၵႃး လႆႈႁူႉဝႃႈၼမ်ႉလိပ်းမၼ်းႁႅင်ႈ ၼႆလႄႈ ယွၼ်းဢဝ်ၼမ်ႉၸိုၼ်ႈသႂ်ၶဝ်သႂ်ႇသေၶိုၼ်းၼူဝ်းတူၺ်းလႄႈ ၼူဝ်းလႆႈၶိုၼ်းလီလီသေ ၼၢင်းယိင်းၵေႃႉၸဝ်ႈၵႃးၼၼ်ႉၸင်ႇထၢမ်ဝႃႈ
“ပီႈၸၢႆးပီးၶႃႈ ၵူၼ်းဢၼ်မႃးၸွမ်းၵႃး ပီႈၸၢႆးပီးၼၼ်ႉၸွင်ႇမီးၽႂ်မေႃ ႁေႃႈၵႃးၶႃႈႁႃႉ ပေႃးမီးၵေႃႈၸွႆႈႁေႃႈၵႃးၼွင်ႉၼႆႉ မိူဝ်းပၼ်ဢိတ်ႉၼိုင်ႈ ၶႃႈလူး ၼွင်ႉဢမ်ႇပေႃးယၢမ်ႈႁေႃႉတၢင်းၵူတ်ႉႁႅင်းၼႃႇ”
ၸၢႆးပီးၸဝ်ႈၵႃးလႅင်းၼၼ်ႉ ဝၢႆႇတူၺ်း ၸၢႆးသၢႆၶိူဝ်းယဝ်ႉၵေႃႈ “ဢႃးၵူဝ်း ပီႈသၢင်ႇၸွႆႈႁေႃႈၵႃး(ၽေႃႇၸုၼ်ႇၼႃႇ) ၼႆႉမိူဝ်းလႆႈယူႇၶႃႈယူဝ်ႉ”
“ဢေႃႈၶႃႈ လႆႈယူႇၶႃႈ”
ၼႆလႄႈၸၢႆးသၢႆၶိူဝ်းၵေႃႈ ဢဝ်ထူင်လႄႈ တိင်ႇမၼ်းမႃးသႂ်ႇၽၢႆႇလင် ၼၼ်ႉသေ ႁေႃႈၶိုၼ်ႈလွႆၵႂႃႇလွႆးလွႆးယူႇ။
ၸုမ်းၶဝ်ၼၢင်းယိင်းၼႂ်းၵႃးၼၼ်ႉ ပႆႇတၵ်းသဵင်သင်လႄႈ မၼ်း ၸၢႆးယၵ်ႉတူၺ်းၼႂ်းမၢၼ်ႇယဝ်ႉ ၶိုၼ်းလႄႉတႃတူၺ်းၵေႃႉဢၼ်ၼင်ႈ ၽၢႆႇၼႃႈၸွမ်းမၼ်း ၼၼ်ႉသေ ၸင်ႇဢဝ်ပုၼ်ႈၽွၼ်းပဵၼ်ၵေႃႉတၵ်ႉ ၶဝ်ဢွၼ်တၢင်းဝႃႈ
“ၼွင်ႉၶဝ်ၵႂႃႇဢႅဝ်ႇတီႈလႂ်မႃးၼႆႉ”
“ႁဝ်းၶႃႈမႃးဢႅဝ်ႇတီႈလၢင်းၶိူဝ်းၼႆႉၵူၺ်းၶႃႈ ပီႈသၢင်ႇတေၵႂႃႇလႂ်ၶႃႈၼႆႉ ”
“ဢၢၼ်းမိူဝ်းလႄႇမႄႈပႃးႁဝ်း တီႈမိူင်းပၼ်ႇၵူၺ်း”
“မႄႈပႃႈပီႈသၢင်ႇၶဝ်သမ်ႉ ယူႇဝၢၼ်ႈလႂ်ၶႃႈၼၼ်ႉ”
“မီးၼႂ်းဝဵင်းပွၵ်ႉတူၵ်းဢိူဝ်ႈ”
“ႁိူဝ်ႇ! ၸိုဝ်ႈဝႃႈႁိုဝ်ၶႃႈလႃႇ ၼွင်ႉၶဝ်ၵေႃႈယူႇပွၵ်ႉတူၵ်းလၢႆလၢႆၶႃႈဢေႃႈ ၼႆႉ”
“ၸိုဝ်ႈဝႃႈပႃႈသူၺ်ႇၼူႉၼႆဢိူဝ်ႈ ၸွင်ႇႁူႉၸၵ်းႁႃႉ”
“ဢေႃႈ ႁူႉဢေႃႈမီးႁိမ်းၵၼ် ၸပ်းဝႅင်းၼွင်ႉၶဝ်ၵမ်းလဵဝ်ယဝ်ႉၶႃႈ ပဵၼ် သထေးလူင်ဢေႃႈၼၼ်ႉ ၸိုဝ်ႈပီႈသၢင်ႇႁွင်ႉဝႃႈႁိုဝ်ၶႃႈ”
“ၸိုဝ်ႈပီႈႁွင်ႉဝႃႈ သၢႆၶိူဝ်းၼႆဢိူဝ်ႈတွင်းဝႆႉလႄႈၼႃႉ”
“ဢေႃႈၶႃႈ”
“ၸိုဝ်ႈၼွင်ႉသမ်ႉႁွင်ႉဝႃႈႁိုဝ်လႃႇ”
“ၸိုဝ်ႈၼွင်ႉတႄႉဝႃႈ ၸၢမ်ၶမ်းၼႆၶႃႈဢေႃႈ”
“လီႁၵ်ႉတႄႉယဝ်ႉဝႃႈ ယိၼ်းၸူမ်းတႄႉတႄႉယဝ်ႉ တီႈလႆႈႁူႉၸၵ်း ၸၢမ်ၶမ်းၶဝ်”
“ၼွင်ႉၵေႃႈယိၼ်းၸူမ်းမိူၼ်ၵၼ်ဢေႃႈ တီႈလႆႈႁူႉၸၵ်းပီႈသၢႆၶိူဝ်းၸိူင်ႉ ၼႆ ၵူၺ်းၼႃႇတႄႉ လီၵဵင်ၸႂ်တေႉၶႃႈလႆၼေႃႈ ယင်းဢမ်ႇပႆႇယၢမ်ႈႁူႉ ၸၵ်းၵၼ်သေပွၵ်ႈ ၼွင်ႉၶဝ်ပေႃးၸႂ်ႉၵိၼ်ပီႈသၢႆၶိူဝ်းယဝ်ႉၸိူင်ႉၼႆၼႆႉ”
“ပိူၼ်ႈဢမ်ႇလႆႈဝႃႈ ၵူၼ်းၸႂ်ႉၵိၼ်ၵၼ်လေႃႇ ၵူၼ်းတူၵ်းတၢင်းၼင်ႇ ၵၼ်လူး ၵေႃႉဢၼ်လူမ်ၸႂ်ၼၼ်ႉ တိုၼ်းမီးပုၼ်ႈၽွၼ်းတိုတ်ႉၸၼ် ၵေႃႉဢၼ်တူၵ်းၵိၼ်းၼၼ်ႉယဝ်ႉဝႃႈ ၸဝ်ႈၵဝ်ႇပွင်ပဵၼ်လႆႈၵႃႈႁိုဝ်ၵေႃႈ တိုၼ်းလူဝ်ႇလႆႈၸွႆႈၼၼ်ႉယဝ်ႉဝႃႈ ၵူၺ်းၼႃႇပေႃးပဵၼ်ၼၢင်းယိင်းတႄႉ တႃႇတေၵိုတ်းသေ တၵ်ႉထၢမ်လွင်ႈလီလွင်ႈၸႃႉပိူၼ်ႈတီႈဢၼ်ၵႆၵူၼ်း ၼၼ်ႉတႄႉ ဢမ်ႇပေႃးသၢင်ႇထုၵ်ႇၼင်ႇၵဝ်ႇ ပေႃးဢမ်ႇၸႂ်ႈၵူၼ်းႁူႉ ၸၵ်းၵၼ်တႄႉ”
“ၸႂ်ႈယဝ်ႉၶႃႈ မႃးႁဝ်းထွမ်ႇၵႂၢမ်းၶႃႈၼေႃႈ ပီႈသၢႆၶိူဝ်း”
“ၶၢၼ်ႉဢုပ်ႇပီႈယဝ်ႉႁႃႉ ထွမ်ႇလႄႈၸၢင်ႈပဵၼ်သင်”
“ဢမ်ႇၸႂ်ႈၶႃႈ ဢမ်ႇၶၢၼ်ႉၶႃႈလေႃႇ ပီႈသၢႆၶိူဝ်းပဵၼ်ၵူၼ်းမေႃမိုတ်ႈ ပေႃး တၢၼ်ႇၼႆႉ ယူဝ်ဝႃႈႁေႃႈၵႃးၶၢၼ်ႉလႄႈ ၶႂ်ႈထွမ်ႇၵႂၢမ်းၼႆၵႂႃႈ”
“ဢမ်ႇၶၢၼ်ႉလေႃႇ ပေႃးမီးၵေႃႉၸိူင်ႉၼႆတႄႉ ပေႃးၵေႃႉလဵဝ်တႄႉဝႃႈ ၵႂႃႈ ၼွင်ႉၵေႃႈမေႃမိုတ်ႈယူႇလူး”
မၼ်းၸၢႆးယၵ်ႉတူၺ်းၼႂ်းမၢၼ်ႇၸမ်ႈသေယဝ်ႉ “ၼွင်ႉၶဝ်သၢမ်ၵေႃႉၼၼ်ႉတႄႉဢမ်ႇဢုပ်ႇသင်ၼေႃ ဢမ်ႇၶႂ်ႈမိုတ်ႈပီႈ ၵူဝ်ပီႈမိူဝ်းယွၼ်းၵိုတ်းလိုဝ်ႈတီႈႁိူၼ်းၼႆႁႃႉတေႃႈ” ဝႆႉၼႃႈယုမ်ႉယုမ်ႉယူႇ။
“ဢူး..ပၢင်းဢဝ်ၵေႃႈ ယူဝ်ပီႈသၢင်ႇပႆႇမိူဝ်းၶႃႈယူဝ်ႉ ပိူၼ်ႈပေႃးမီးမႄႈပႃႈ ပဵၼ်သထေးလူင်ၸိူင်ႉၼၼ် ဢမ်ႇၵိုင်ႇတၢၼ်ႇၵၼ်သေဢိတ်း တင်း ႁိူၼ်းႁဝ်းၶႃႈသမ်ႉ ယွၵ်းယွၵ်းဢွၼ်ႇသေ လီဢၢႆၼႃႇၶႃႈ”
“ၼၼ်ႉၼႃႇ ပေႃးလၢတ်ႈၵႂၢမ်းႁေႉဝႆႉထႃႈယူႇယဝ်ႉၼၼ်ႉႁိုဝ်ႉ”
ၼႆမၼ်းၼႃႈလီဢၢႆၵႂႃႇဢိတ်ႉၼိုင်ႈယဝ်ႉ။
ယၢမ်းၼၼ်ႉပီႈၸၢႆးပီးၼေၾႆးလႄႈ ၸၢႆးသၢႆၶိူဝ်းၸင်ႇဝႃႈ
“ပီႈၸၢႆးပီးၼေၾႆးႁဵတ်းသင်ၼႆႉ ”
ထိူင်းၵႃးမၼ်းဢိတ်းꧦယဝ်ႉဝႄႉတၢင်းပၼ်ယူႇ၊ ၸၢႆးပီးမႃးၵိုတ်း သေ
“ပီႈသၢင်ႇတေမိူဝ်းလူင်းတီႈလႂ်ၶႃႈၼၼ်ႉ ၶူဝ်းၸွင်ႇၵိုတ်းဝႆႉၼႂ်းၵႃးၶႃႈ ၼႆႉႁႃႉ”
ၸၢႆးသၢႆၶိူဝ်းပႆႇတၼ်းတွပ်ႇ ၼၢင်းၸၢမ်ၶမ်းၸင်ႇဝႃႈ
“မိူဝ်းလူင်းပွၵ်ႉတူၵ်းၼႆၶႃႈဝႃႇ”
“မိူဝ်းႁိူၼ်းၸၢမ်ၶမ်းၶဝ်ႁႃႉ ၶႂ်ႈၸႂ်ႈဝႆႉလႃႇ လီယဝ်ႉပေႃးၼၼ်ႉတေပူၼ်ႉ မိူဝ်းၵွၼ်ႇ”
“ထူင်ၼမ်ႉဢွႆႈၶႃႈတိုၵ်ႉၵိုတ်းဝႆႉ ၼႂ်းၵႃးပီႈၸၢႆးပီးဢေႃႈ”
“မိူဝ်းလႃႈပီႈၸၢႆးပီး ၵမ်ႉမႃးၸင်ႇၵွႆႈမႃးဢဝ်တီႈႁိူၼ်းၶႃႈၼႃႉ”
ၸၢႆးပီႈငွၵ်းႁူဝ်ၼႄသေပူၼ်ႉမိူဝ်းယဝ်ႉ ၸၢႆးသၢႆၶိူဝ်းၵေႃႈ ႁေႃႈၵႃးပူၼ်ႉ မႃးဝၢၼ်ႈၼိုင်ႈယဝ်ႉဝၢၼ်ႈၼိုင်ႈသေ ၽႅဝ်မႃးတီႈၵွင်းမူးလွႆဢၼ်တိုၵ်ႉ ႁဵတ်းဝႆႉမႂ်ႇမႂ်ႇၼၼ်ႉလႄႈ ၸၢမ်ၶမ်းၸင်ႇဝႃႈ
“ၵိုတ်းထွတ်ႇၶႅပ်းႁၢင်ႈတီႈၼႆႈၵမ်းၼိုင်ႈၶႃႈၼေႃႈ ပီႈသၢႆၶိူဝ်း”
“လႆႈဢိူဝ်ႈ ၸၢမ်ၶမ်း”
မၼ်းၸၢႆးၵိုတ်းၵႃးသေ ၶဝ်ၼၢင်းယိင်းတႄႉလူင်းၵႃးယဝ်ႉ မႄး သိူဝ်ႈၶူဝ်းၶဝ်သေထွတ်ႇၶႅပ်းႁၢင်ႈၶဝ်ယူႇ။
သိုပ်ႇလူထႅင်ႈတွၼ်ႈတေမႃးၶႃႈ
