ၸၢမ်ၶမ်းဢၢင်ႈမႃးဢုမ်ႈဢဝ်ၼႆ ဢမ်ႇပေႉလႆႈလႄႈ တေႃႉတေႉ ယွင်ႈဝႆႉႁူဝ်ၸၢႆးသၢႆၶိူဝ်းသေ ႁွင်ႉႁႅင်းႁႅင်း “မေႃယႃၶႃႈမေႃယႃ”
မေႃယႃၶဝ်တူၵ်းၸႂ်သေ ၼႅတ်ႈမႃးၸွႆႈၵၼ်ယွင်ႈၶိုၼ်ႈၵႂႃႇယဝ်ႉ၊ မႄးပူၵ်ႉ ပၼ်ၶိုၼ်းသမ်းပၼ်ၶဵမ်မၼ်းယူႇ “ၵူၼ်းၸဵပ်းၼႆႉတဵၼ်ႈၶႃႈႁႃႉ”
“ၸႂ်ႈဢေႃႈ”
“ၽႅၼ်ႇၸိူဝ်းၼႆႉ ႁဵတ်းႁိုဝ်ပေႃးလူႉလႅဝ်ၵႂႃႇသဵင်ႈလႃႇ”
“မၼ်းဝႃႈ ယႃႇပေယႃၵဝ်ယဝ်ႉလႃႈ ၸၼ်ပႅတ်ႈႁင်းၵူၺ်းတိၵ်းတိၵ်း ဢေႃႈ”
“ဢေႃႈပေႃးၼၼ်မၼ်းတိူဝ်ႉၸႂ်သေလွင်ႈလွင်ႈလႄႈတင်ႈၸႂ်ႁဵတ်းႁႂ်ႈမီးလွင်ႈၸဵပ်းသႅပ်ႇဢေႃႈၼႆႉ ၼွင်ႉယိင်းပဵၼ်မေးၵူၼ်းၸဵပ်းၼႆႉၸွင်ႇ ၸႂ်ႈ”
“ၸႂ်ႈဢေႃႈ”
“ဢိူဝ်ႈသူလူဝ်ႇလႆႈပၼ်ႁႅင်းၸႂ် ပၼ်တၢင်းဢုၼ်ႇၸႂ်မၼ်း ၼမ်ၼမ် ဢိူဝ်ႈၼႃႉ ႁႅင်းမၼ်းၵေႃႈယွမ်းၼမ်ၼႃႇ” မေႃၶဝ်ဢွၵ်ႇၵႂႃႇယဝ်ႉ ၼၢင်း ၶမ်းလိုၼ်းၶႃၼၢင်းၸေႃးယဵၼ်ႇႁွတ်ႈမႃးသေ ပီႈသၢႆၶိူဝ်းပဵၼ်ႁိုဝ်မႃးလႃႇ ၼွင်ႉ ၼၢင်းၶမ်းလိုၼ်းထၢမ်။
“မိူဝ်ႈၵႆႈတဵၼ်ႈမႃးၵမ်းၼိုင်ႈယဝ်ႉဢေႃႈ ၵူၺ်းၵႃႈ မၼ်းဢမ်ႇႁူႉၸၵ်း ၼွင်ႉယဝ်ႉၶႃႈပီႈၶမ်းလိုၼ်း”
“မၼ်းဝႃႈႁိုဝ်ႁင်းၼွင်ႉလႃႇ”
“ယႃႇပေယႃၶႃႈယဝ်ႉလႃႈ ပွႆႇၶႃႈတၢႆႁေလႃႈၼႆဝႃႇ ယဝ်ႉၵေႃႈၸၼ်ပႅတ်ႈ သၢႆၶဵမ်ၸၼ်ၽႅၼ်ႇပူၵ်ႉၸဵပ်းမၼ်းၸိူဝ်းၼၼ်ႉသေ ပွႆႇတူဝ်မၼ်းၵိင်ႈ တူၵ်းၵူႇသေလိုမ်းတူဝ်ၵႂႃႇထႅင်ႈဢေႃႈ”
“ႁဵတ်းႁိုဝ်တူဝ်ၼွင်ႉပဵၼ်လိူတ်ႈပဵၼ်ယၢင်ၵႂႃႇသဵင်ႈလႃႇ”
“လိူတ်ႈမၼ်းဢွၵ်ႇၼမ်ၼႃႇလႄႈ ၼွင်ႉဢုမ်ႈမၼ်းဝႆႉဢေႃႈ”
“မိူဝ်ႈပူၼ်ႉမႃးႁႃႈႁူၵ်းဝၼ်းၼႆႉ သူမေႃးၵၼ်ႁဵတ်းသင်လႃႇၼွင်ႉ”
ၼၢင်းၸေႃးယဵၼ်ႇထၢမ်ထႅင်ႈ ၸၢမ်ၶမ်းၵေႃႈပေႃးတေဝႃႈဢမ်ႇလႆႈမေႃးသင်ၵၼ်ၼႆလိူင်ႈမၼ်းသမ်ႉယၢဝ်းၼႆလႄႈ။
“ၼွင်ႉၶႂ်ႈၸႃႉမၼ်းႁင်းၵူၺ်းၼွင်ႉသေ မၼ်းႁွင်ႉၼွင်ႉၵႂႃႇၸွမ်းၵေႃႈ ၼွင်ႉဢမ်ႇၵႂႃႇၸိူင်ႉၼၼ်ၵူၺ်းဢေႃႈ”
“မၼ်းတေဝႃႈ ပေႃးဢမ်ႇမီးၸၢမ်ၶမ်းယဝ်ႉၵေႃႈ ၵဝ်ၼႆႉတေယူႇပိူဝ်ႈ သင်ယဝ်ႉလႃႇၼႆဢိူဝ်ႈၼၼ်ႉ။ မၼ်းၸင်ႇဝႃႈ ယႃႇပေမႃးယႃၶႃႈယဝ်ႉ လႃႈၼႆၼၼ်ႉ ယဝ်ႉၵေႃႈပေႃးထွမ်ႇတူၺ်းလိၵ်ႈဢၼ်မၼ်းတႅမ်ႈဝႆႉတီႈ ႁိူၼ်းၼၼ်ႉတႄႉ မၼ်းဢၢၼ်းၵႂႃႇႁဵတ်းႁၢႆႉ ႁင်းတူဝ်ၸဝ်ႈၵဝ်ႇၶိုၼ်း ၼၼ်ႉယဝ်ႉ”
“မၼ်းတႅမ်ႈဝႆႉဝႃႈႁိုဝ်ၶႃႈလႃႇ ပီႈၸေႃးယဵၼ်ႇ”
“ဢၼ်မၼ်းတႅမ်ႈဝႆႉပၼ်ၼွင်ႉၼၼ်ႉတႄႉ ပီႈဢမ်ႇလႆႈဢၢၼ်ႇတူၺ်း ဢၼ်ၵေႃႉတႅမ်ႈဝႆႉ တႃႇပီႈၼၼ်ႉတႄႉဝႃႈ ၼၢင်းၸေႃးယဵၼ်ႇဢိူၺ်း မိူဝ်ႈၼႆႉၶႃႈ ယွၼ်းဢဝ်လူတ်ႉၶိူင်ႈၵႂႃႇၶႃႈၼႃႉ ၶႃႈဢမ်ႇဢဝ်သင်ယဝ်ႉ ၼၢင်းၸေႃးယဵၼ်ႇယႃႇပွႆႇပႅတ်ႈမႄႈလႃးလႃးၼႃႉ ၶႃႈႁဝ်းသၢႆၶိူဝ်းၼႆဝႃႈ ”
“မိူဝ်းဢၢပ်ႇၼမ်ႉလၢႆႈၶူဝ်းၼွင်ႉလႄႈ မႃးပီႈၸေႃးယဵၼ်ႇမိူဝ်းသူင်ႇ ၶမ်း လိုၼ်းသူပႂ်ႉဝႆႉလႄႈၼႃႉ ႁဝ်းတေမိူဝ်းသူင်ႇၸၢမ်ၶမ်းၵမ်ႉ”
ၼၢင်းၸေႃးယဵၼ်ႇၶဝ်ႈႁိူၼ်းမႃးယဝ်ႉ
“ပဵၼ်ႁိုဝ်လႃႇလုၵ်ႈ ၸွင်ႇမၼ်းၸဵပ်းႁႅင်းၼႃႇႁိုဝ်”
“ဢမ်ႇပေႃးၵႃႈႁိုဝ်ၶႃႈပႃႈ ၵူၺ်းၼႃႇႁႅင်းမၼ်းယွမ်းၼမ်ၼႃႇလႄႈမိူဝ်ႈ လဵဝ်တႄႉတိုၵ်ႉလပ်းယူႇၶႃႈၼႄႈ”
“ဢိုဝ်ႈ ၶွင်မၼ်းဢမ်ႇၵိၼ်ၶဝ်ႈပဵၼ်လၢႆဝၼ်းယဝ်ႉလူးမႂ်းၵေႃႈ”
ၼၢင်းၸၢမ်ၶမ်းၼႅတ်ႈမႃးဢၢပ်ႇၼမ်ႉလၢႆႈၶူဝ်းယဝ်ႉသေ “မႃးႁဝ်းၵႂႃႇၶိုၼ်းပီႈၸေႃးယဵၼ်ႇ”
“ဢိူဝ်ႈ ၵႂႃႇၵေႃႈၵႂႃႇလႄႈ”
“ဢေႃ ပီႈၸေႃးယဵၼ်ႇ ၼွင်ႉၶႂ်ႈႁၼ်လိၵ်ႈဢၼ်ပီႈသၢႆၶိူဝ်းတႅမ်ႈဝႆႉ ၼၼ်ႉဢေႃႈပီႈၸေႃးယဵၼ်ႇ မိူဝ်းဢဝ်ပၼ်ၼွင်ႉလူး”
“ၼွင်ႉၶဝ်ႈမိူဝ်းဢဝ်ႁင်းၵူၺ်းလႄႈ ၸၢင်ႈပဵၼ်သင်”
ၼၢင်းၸၢမ်ၶမ်းၵေႃႈၶိုၼ်ႈႁိူၼ်းမိူဝ်းယဝ်ႉ ပူၼ်ႉၶဝ်ႈလုၵ်းၼွၼ်းၸၢႆးသၢႆ ၶိူဝ်းၵႂႃႇသေ ႁၼ်ၶႅပ်းႁၢင်ႈမၼ်းၼၢင်းမီးဝႆႉၼိူဝ်ၽႃႈႁူမ်ႇၽၢႆႇတၢင်းၶၢင်ႈ တီႈၼွၼ်းၸၢႆးသၢႆၶိူဝ်းၼၼ်ႉလႄႈ လိၵ်ႈၼၼ်ႉသမ်ႉဝၢင်းဝႆႉယူႇႁိမ်း ၶႅပ်းႁၢင်ႈမၼ်းၼၢင်းသေ ယိပ်းဢဝ်ယၵ်ႉဢွၵ်ႇမႃးၶိုၼ်းယဝ်ႉ။
“ၵႂႃႇ ပီႈၸေႃးယဵၼ်ႇ ပီႈၸေႃးယဵၼ်ႇၵေႃႉႁေႃႈလူတ်ႉၶႃႈလႄႈ”
ၼၢင်းၸေႃးယဵၼ်ႇၵေႃႈႁူႉယူႇဝႃႈ ၼၢင်းၸၢမ်ၶမ်း လူဝ်ႇဢၢၼ်ႇလိၵ်ႈ လႄႈ ၸင်ႇၸႂ်ႉမၼ်းႁေႃႈလူတ်ႉၼႆသေ ယုမ်ႉယုမ်ႉယူႇဢမ်ႇတၵ်းသဵင် သင်ပႃးၵၼ်မႃးၶိုၼ်းတီႈႁူင်းယႃၼႆႉယဝ်ႉ။
ၵၢင်ဝၼ်းၵေႃႈၶႂ်ႈၶမ်ႈမႃးယဝ်ႉလႄႈ ၼၢင်းၶမ်းလိုၼ်းၸင်ႇဝႃႈ
“ပေႃးၸိူင်ႉၼၼ်ၵေႃႈ ၸၢမ်ၶမ်းၼွင်ႉၵေႃႉပႂ်ႉဝႆႉလႄႈၼႃႉ”
“ပီႈသၢႆၶိူဝ်းပႆႇႁူႉတူဝ်မႃးၶိုၼ်းသေၵမ်းၶႃႈႁႃႉၼႆႉ ပီႈၶမ်းလိုၼ်း”
“ဢိုဝ်ႈ ပႆႇ ၵိၼ်ၶဝ်ႈၼွင်ႉၵွၼ်ႇလႄႈ”
“ၼွင်ႉဢမ်ႇတွင်ႉမႆႈၶႃႈ”
“ဢမ်ႇတွင်ႉမႆႈၵေႃႈၵိၼ်ပၼ်ဢိတ်ႉၼိုင်ႈဢိူဝ်ႈၼွင်ႉ တင်းဝၼ်းၼွင်ႉ ယင်းပႆႇၵိၼ်သင်ဢမ်ႇၸႂ်ႈႁႃႉ ပေႃးဢမ်ႇၶႂ်ႈၵိၼ်ၶဝ်ႈၵေႃႈ ၵိၼ်ၼူမ်း ထူဝ်ႇၼႆႉလႄႈ” ၼၢင်းၸေႃးယဵၼ်ႇဢဝ်ၼူမ်းထူဝ်ႇယိုၼ်ႈပၼ်ယူႇ။
မၼ်းၼၢင်းႁပ်ႉဢဝ်သေဝၢင်းဝႆႉၶိုၼ်းယဝ်ႉ “ၼွင်ႉဢမ်ႇၵိၼ်ၶႃႈလေႃႇ တေႃႈၼင်ႇပီႈသၢႆၶိူဝ်းဢမ်ႇလႆႈၵိၼ်သင်ပဵၼ်ႁႃႈႁူၵ်းဝၼ်းယဝ်ႉ”
ၼၢင်းၸေႃးယဵၼ်ႇၶႃၼၢင်းၶမ်းလိုၼ်းမိူဝ်းၵႂႃႇယဝ်ႉ ၼၢင်းၸၢမ်ၶမ်းၶုၵ်း ၸႂ်လႆႈလိၵ်ႈၼႂ်းထွင်းမၼ်းလႄႈ ဢဝ်ဢွၵ်ႇမႃးဢၢၼ်ႇတူၺ်းယူႇ။
သိုပ်ႇလူထႅင်ႈတွၼ်ႈတေမႃးၶႃႈ။
