တီႈသူၼ်ၼႆႉသမ်ႉ ၸၢႆးသၢႆၶိူဝ်းမႃးၵိုတ်းၵႃးသေ “မူၸိူဝ်းၼႆႉ ယဵၼ်လီၵျႃႉလႃႇၶမ်ႈၼႆႉ” မႃးငွၵ်ႈတူၺ်းယူႇ “ႁဵတ်းသင်မူၸိူဝ်းၼႆႉ ၼွၼ်းမိူၼ်ၼႆဝႆႉလႃႇ ဢႃႉတၢႆယဝ်ႉလူးၼႆႉ တၢႆသဵင်ႈယဝ်ႉလႃႇ” မၼ်း ၸၢႆးတူၵ်းၸႂ်သေၶဝ်ႈမႃးတူၺ်းလီလီယဝ်ႉ မၢင်တူဝ်ယင်းပႆႇတၢႆလီ မၢင် တူဝ်ႁူဝ်ပေႃးလႅဝ် မၢင်တူဝ်သမ်ႉ ပေႃးပဵၼ်သွင်ပွတ်းၵေႃႈမီးယဝ်ႉ တင်း သေလၢႆ တင်းလီဢီးလူမူမၼ်းသေဝူၼ်ႉယူႇဝႃႈ “ၸူဝ်ႈၵဝ်ပဵၼ်ၵူၼ်း မႃးၼႆႉ ၵဝ်ဢမ်ႇတွၼ်ႉယၢမ်ႈႁဵတ်းႁႂ်ႈပိူၼ်ႈလႆႈ လိူတ်ႇမႆႈယွၼ်ႉၵဝ် သေ ပွၵ်ႈ ၵႂၢမ်းဢၼ်တေၶတ်းႁူပိူၼ်ႈ ၵႂၢမ်းပူၼ်ႉပႅၼ်ပိူၼ်ႈၵေႃႈ ၵဝ်ဢမ်ႇ တွၼ်ႉလၢတ်ႈသေပွၵ်ႈ ယင်းတိုၵ်ႉမီးၵူၼ်းၸင်းၵဝ်ယူႇႁႃႉၼႆႉ”
ၶမ်ႈၶိုၼ်းၼႆႉတႄႉ ပဵၼ်ၶိုၼ်းဢၼ်ယၢဝ်းလိူဝ်ပိူၼ်ႈ တွၼ်ႈတႃႇ ၸၢႆးသၢႆၶိူဝ်းယဝ်ႉ။ မိူင်းလႅင်းမႃး မၼ်းၸၢႆးလႄႇႁႃ ၽိတ်ႈမွၵ်ႇၽူႈယႂ်ႇ ၵူၼ်းလူင် ၵူႈၽၢႆႇၽၢႆႇ ႁႂ်ႈၶဝ်ၸဝ်ႈလႆႈမႃးႁူႉႁၼ် ႁူမ်ႈႁူႉႁူမ်ႈႁၼ်ၸွမ်း လွင်ႈဢၼ်ပဵၼ်တေႉမီးတေႉၼၼ်ႉၼႆလႄႈ ႁေႃႈၵႃးဢွၵ်ႇၵႂႃႇၸဵမ်ၸဝ်ႉ ယဝ်ႉ။
ၼၢင်းၸၢမ်ၶမ်းၵေႃႈ ၶဝ်ႈမႃးၵိုတ်းၵႃးသေ လူင်းၵႃးမႃးယဝ်ႉ ဢဝ်သၢႆတႃမၼ်းၼၢင်းသွၵ်ႈႁႃ ၵႃးၸၢႆးသၢႆၶိူဝ်းယူႇၵေႃႈဢမ်ႇႁၼ် သဵင် မူၵေႃႈဢမ်ႇငိၼ်းမိူၼ်ၵူႈဝၼ်းလႃႇၼႆႉ မႃးငွၵ်ႈတူၺ်းၼႂ်းၶွၵ်ႈမူၼႆႉယူႇ။
“ႁိူဝ်ႇ မူပီႈသၢႆၶိူဝ်းတၢႆသဵင်ႈယဝ်ႉလူးၼႆႉ”
မၢင်တူဝ်ၺႃးၽၼ်းတၢႆ မၢင်တူဝ်ၺႃးပေႃႉတၢႆလႄႈ မၼ်းၼၢင်းပဵၼ်ၸႂ် ဢမ်ႇလီၸွမ်းသေ ပႆဢွၵ်ႇမႃးယဝ်ႉၵဵပ်းလႆႈလိၵ်ႈဢွၼ်ႇပွတ်းၼိုင်ႈလႄႈ ယိပ်းၶိုၼ်ႈမႃးဢၢၼ်ႇတူၺ်းယူႇ။ လိၵ်ႈၼၼ်ႉတႅမ်ႈဝႆႉဝႃႈ “ပေႃးမႂ်းယင်း တိုၵ်ႉယုင်ႈၵဵဝ်ႇၸွမ်းၸၢမ်ၶမ်းယူႇၼႆတႄႉ ၵမ်းလိုၼ်းမႃးတေၼႃႇလိူဝ် ၼႆႉၼႃႉ ပွၵ်ႈၼႆႉတႄႉ တိုၵ်ႉပဵၼ်ဢၼ်ၸႅၵ်ႈမၼ်းၵူၺ်းဢိူဝ်ႈ”
“ဢေႃ ဢၢႆႈထူးဢွင်ႇဢိူဝ်ႈၼႆႉ”
မၼ်းၼၢင်းယိပ်းတင်းလိၵ်ႈၼၼ်ႉသေ ဢၢင်ႈၵႂႃႇၶိုၼ်ႈၵႃးယူႇ ၸၢႆးသၢႆ ၶိူဝ်းလႄႈ ၽူႈယႂ်ႇၵူၼ်းလူင်ၶဝ်ၽႅဝ်မႃးသေ ဢွၼ်ၵၼ်လေႇတူၺ်းယူႇ ၸၢႆးသၢႆၶိူဝ်းၸင်ႇဝႃႈ
“ၶႃႈႁဝ်းယွမ်းၼွမ်းထိုင်ၽူႈယႂ်ႇၵူၼ်းလူင်ႁဝ်းၵူႈၵေႃႉꧦယူႇၶႃႈ ဢၼ်ၶႃႈ ႁဝ်းလႆႈၽိတ်ႈမွၵ်ႇသူၸဝ်ႈမႃးၼႆႉ ဢမ်ႇၸႂ်ႈဝႃႈ ၶႃႈႁဝ်းမီးလွင်ႈထၢင်ႇ ထိူမ်ထၢင်ႇၽိတ်းၼိူဝ်ၵေႃႉလႂ်ၵေႃႉၼိုင်ႈ လုၵ်ႈဝၢၼ်ႈ လုၵ်ႈသူၼ်သူ ၸဝ်ႈၶႃႈၼႃ ၶႃႈႁဝ်းၶႂ်ႈႁႂ်ႈသူၸဝ်ႈလႆႈမႃးႁၼ် တၢင်းႁဵတ်းၵူၼ်းၸၼ်ႉ တႅမ်ႇ ဢၼ်ဢမ်ႇတၢၼ်ႇပဵၼ်လႄႈပဵၼ် ဢၼ်ဢမ်ႇၵိုင်ႇမီးလႄႈမီး ၼၼ်ႉၵူၺ်းၶႃႈ။ တီႈတႄႉမၼ်းသူၸဝ်ႈဢမ်ႇၵိုင်ႇလီလႆႈမႃးယၢပ်ႇၸွမ်း ၶႃႈႁဝ်းၵေႃႉဢၼ်ႁဵတ်း ပုၼ်ႈသုၼ်ႇတူဝ်ၼႆႉသေဢိတ်းၼႆ ၶႃႈပွင်ႇၸႂ် ယူႇၶႃႈ။ ၵူၺ်းၵႃႈမိူဝ်ႈလဵဝ် ၶႃႈႁဝ်းလႆႈထူပ်းၽေးမိူၵ်ႈမႂ်ႈလူင်ၸိူဝ်းၼႆႉ သေယဝ်ႉ လိူဝ်သေ ဝၢႆႇၼႃႈၸူးသူၸဝ်ႉၸိူဝ်းၼႆႉၵေႃႈ ၶႃႈႁဝ်းဢမ်ႇ ၸၢင်ႈဝၢႆႇၼႃႈၸူးၽႂ်ယဝ်ႉၶႃႈ။ ၵွပ်ႈၼၼ်လႄႈ သူၸဝ်ႈၵူႈၵေႃႉၵေႃႈ ယွၼ်းႁႂ်ႈပွင်ႇၸႂ်သေဝၢင်းၶႂၢင်းပၼ်ၶႃႈႁဝ်းယႂ်ႇၼမ်သေၵမ်းၶႃႈ”
“ဢမ်ႇပဵၼ်သင်ၶႃႈ ပီႈသၢႆၶိူဝ်း ႁဝ်းၶႃႈပွင်ႇၸႂ်ယူႇၶႃႈ ၵွပ်ႈဝႃႈမၼ်းပဵၼ် လွင်ယႂ်ႇသုမ်းၼမ်ႉတႄႉတႄႉလႄႈ ႁဝ်းၶႃႈ ငိၼ်းမွင်ၸႂ်ၸွမ်းတႄႉꧦ ဢေႃႈ။ လွင်ႈၸိူင်ႉၼႆၼႆႉ တူၵ်းၺႃးၽႂ်ၵေႃႉလႂ်ၵေႃႈဢမ်ႇလီ တိုၼ်းၵႂင် ၸႂ်ၵူႈၵေႃႉယဝ်ႉ”
ထႅင်ႈၵေႃႉၼိုင်ႈၸင်ႇဝႃႈ “ၵႃႈပူၼ်ႉမႃး ၸွင်ႇပီႈသၢႆၶိူဝ်းမီးလွင်ႈ ၽိတ်းမေႃးၵၼ်တင်းၵူၼ်းသေၵေႃႉၵေႃႉယူႇၶႃႈႁႃႉ”
“ဢမ်ႇမီးၽႂ်ၵေႃႉလႂ်သေပွၵ်ႈၶႃႈ”
ယၢမ်းၼၼ်ႉ ၼၢင်းၸၢမ်ၶမ်း ယၵ်ႉတူၺ်းလိၵ်ႈပွတ်းဢွၼ်ႇ ၼၼ်ႉသေ ဝူၼ်ႉယူႇဝႃႈ “ပေႃးဢမ်ႇဢဝ်လိၵ်ႈၼႆႉၼေပိူၼ်ႈ သမ်ႉပေႉ ဢီးလူပီႈသၢႆၶိူဝ်း ပေႃးတေၼေၵေႃႈ ပီႈသၢႆၶိူဝ်းသမ်ႉၸၢင်ႈၸႂ်ပိူင်ႈၼိူဝ် ၵဝ်ႁိုဝ် ၵူၺ်းၵႃႈ ပေႃးဢဝ်လိၵ်ႈၼႆႉၼေပိူၼ်ႈတႄႉ ပိူၼ်ႈၸၢင်ႈၺွပ်း လႆႈၵူၼ်းဢၼ်ႁဵတ်းၽိတ်းဢိူဝ်ႈၼႆႉ။ ပေႃးဢမ်ႇဢဝ်ၼေတႄႉမၼ်း တေၸၢင်ႈႁဵတ်းႁၢႆႉႁင်းပီႈသၢႆၶိူဝ်းထႅင်ႈ” ၼႆလႄႈ မၼ်းၼၢင်းၸင်ႇပႆ မႃးၸူးၸၢႆးသၢႆၶိူဝ်းၼႆႉယဝ်ႉ။
“ပီႈသၢႆၶိူဝ်းၶႃႈ ၼႆႉပဵၼ်လိၵ်ႈ ဢၼ်ၵူၼ်းႁၢႆႉတႅမ်ႈဝႆႉဢေႃႈ”
ၸၢႆးသၢႆၶိူဝ်းၵေႃႈဢၢၼ်ႇတူၺ်းသေ သိုပ်ႇယိုၼ်ႈပၼ် ႁၢၼ်ၵေႃႉၼိုင်ႈ ယူႇ။ ႁၢၼ်ၶဝ်သၢမ်ၵေႃႉ ဢုပ်ႇၵၼ်ဝႃႈ “ပေႃၼၼ်ၵူၼ်းႁၢႆႉၼႆႉမီးသွင် မဵဝ်း တႃႇမဵဝ်းၼိုင်ႈၼႆႉပဵၼ်ပီႈၼွင်ႉၼၢင်းၸၢမ်ၶမ်း။ ထႅင်ႈလွင်ႈၼိုင်ႈ သမ်ႉပဵၼ်ၸူႉ ဢမ်ႇၼၼ် ၵေႃႉဢၼ်လၵ်ႉႁၵ်ႉ ၼၢင်းၸၢမ်ၶမ်းလႄႈ ၶႂ်ႈၶႅၼ်ၼၢင်းၸၢမ်ၶမ်းဢိူဝ်ႈၼႆႉ ပေႃးၼၼ်ၼၢင်းၸၢမ်ၶမ်း ပဵၼ်ၵၢၵ်ႇ သေႃးလူင်တႃႇတေၺွပ်းလႆႈတူဝ်ၵူၼ်းႁၢႆႉငၢႆႈငၢႆႈၼၼ်ႉယဝ်ႉ” ဝၢႆႇမႃးၸူးၼၢင်းၸၢမ်ၶမ်းသေ
“ဢၼ်ၼွင်ႉၸၢမ်ၶမ်းၵႂႃႇၵႂႃႇပႆပႆ ၸွမ်းၸၢႆးသၢႆၶိူဝ်းယူႇၼႆႉ ၸွင်ႇမီးပီႈ ၼွင်ႉၵေႃႉလႂ် ဢမ်ႇႁၼ်လီသေၵေႃႉႁၢမ်ႈဝႆႉယူႇၶႃႈႁႃႉ”
“ဢမ်ႇမီးၶႃႈ ယိင်းမီးပေႃႈၵူၺ်းၶႃႈ ၵူၺ်းၵႃႈပေႃႈဢမ်ႇတွၼ်ႉႁၢမ်ႈသေ ပွၵ်ႈၶႃႈ”
“ဢေႃႈၶႃႈ ပေႃးၸိူင်ႉၼၼ် ၵႃႈပူၼ်ႉမႃး ၼွင်ႉၸၢမ်ၶမ်းယၢမ်ႈဝႆႉၸူႉယူႇ ႁႃႉ လၢတ်ႈမၢၼ်ႇမၢၼ်ႇၶႃႈၼႃး လွင်ႈၼႆႉတႄႉ ဢမ်ႇၸႂ်ႈပဵၼ်ၵၢၼ်ယဝ်ႉ ယွၵ်ႇၶႃႈၼႃ”
“ယၢမ်ႈမီးဢေႃႈ ပဵၼ်တူဝ်လိၵ်ႈမၼ်းၶႃႈဢေႃႈ”
“ၸိုဝ်ႈမၼ်းဝႃႈႁိုဝ် မၼ်းယူႇတီႈလႂ်ၶႃႈ”
“ၸိုဝ်ႈဝႃႈ ဢၢႆႈထူးဢွင်ႇယူႇဝၢၼ်ႈ..ဢေႃႈ”
“ႁၢၼ်ၶဝ်ၵေႃႈ တႅမ်ႈမၢႆဢဝ်ၸွမ်းၼင်ႇဢၼ် ၸၢမ်ၶမ်းလၢတ်ႈမႃးၸိူဝ်း ၼၼ်ႉသဵင်ႈꧦသေ ႁၢၼ်ၶဝ်သၢမ်ၵေႃႉဢုပ်ႇယူႇ။ ၵေႃႉၼိုင်ႈဝၢႆႇမႃးၼၢင်း ၸၢမ်ၶမ်းသေ “ၸွင်ႇၼွင်ႉၸၢမ်ၶမ်းမီးဝႆႉၶႅပ်းႁၢင်ႈ ၵေႃႉၸိုဝ်ႈထူးဢွင်ႇ ၼႆႉၶႃႈႁႃႉ”
“ဢမ်ႇမီးၶႃႈ ၸီႉၼေႉတူဝ်မၼ်းတႄႉလႆႈဢေႃႈ”
“ဢေႃႈၶႃႈ ပေႃးၸိူင်ႉၼၼ်ႁဝ်းၶႃႈ တေပွၵ်ႈမိူဝ်းၵွၼ်ႇဢေႃႈပီႈသၢႆၶိူဝ်း ဢမူႉဢၼ်ၼႆႉၶႃႈႁဝ်းလႄႈ ၸုမ်းႁၢၼ်ႁဝ်းတေၶဝ်ႈၸႂ်ၸွႆႈထႅမ်ႁႂ်ႈၸဵဝ်း ယဝ်ႉတူဝ်ႈယူႇၶႃႈ”
“ဢေႃႈၶႃႈ ငိၼ်းၸူမ်းတႄႉတႄႉၶႃႈဢေႃႈ”
ၵူၼ်းလူင်ၵေႃႈၸင်ႇဝႃႈ “ပေႃးၸိူင်ႉၼၼ်တႄႉ လႆႈဝႃႈပဵၼ်ၵွပ်ႈထၢင်ႇ ၽိတ်းၵၼ်ၵူၺ်းလူးၼႆႉ။ တၢင်းႁဵတ်းမၼ်းၼႆႉလႆႈဝႃႈၸၼ်ႉတႅမ်ႇတႄႉ ယဝ်ႉၼႆႉ ပီႈၸၢႆးသၢႆၶိူဝ်းတေႁဵတ်းႁိုဝ်ပႅတ်ႈ တေပႅတ်ႈတီႈလႂ်လႃႇမူ ဢၼ်တၢႆၸိူဝ်းၼႆႉ”
“ဢႃႉ! ၶႃႈဝႃႈတႄႉလူဝ်ႇလႆႈၽင်ပႅတ်ႈၵူၺ်းၶႃႈယူဝ်ႉၼေႃ ၵမ်ႉၶႃႈၸင်ႇ ႁႃၵူၼ်းမႃးၸွႆႈလုမ်းလႃးၶႃႈၵႂႃႈ တေတွင်ႉမႆႈၶဝ်ႈၵၼ်ယဝ်ႉၶႃႈယူဝ်ႉၼႆႉ ၸၢမ်ၶမ်းၼွင်ႉၵေႃႉၵႂႃႇသိုဝ်ႉမႃးလႄႈပေႃးၼၼ်” ၼၢင်းၸၢမ်ၶမ်းၼပ်ႉတူၺ်း ၽူႈယႂ်ႇၵူၼ်းလူင်ၶဝ်ယူႇ ၸၢႆးသၢႆၶိူဝ်းဢဝ် ငိုၼ်းပၼ်သေ
“ယေႃႈၼွင်ႉသိုဝ်ႉမႃးပႃးတႃႇလိူဝ်မၼ်းၽွင်ႈလႄႈၼႃႉ သိုဝ်းမႃးပႃးမၢၵ်ႇ မႆႉၽွင်ႈလႄႈ ဢေႃႈၼွင်ႉယႃႇလိုမ်းသိုဝ်ႉပႃးၼမ်ႉၼႃႉ” မၼ်းၼၢင်းငွၵ်း ႁူဝ်ၼႄသေ ဢွၵ်ႇၵႂႃႇယဝ်ႉ ၸၢႆးသၢႆၶိူဝ်းၸင်ႇဝႃႈ
“ဢွၼ်ၵၼ်ၶဝ်ႈမႃးလိုဝ်ႈထႃႈၼႂ်းသုမ်ႉၼႆႉၵွၼ်ႇၶႃႈလႄႈ ၵဵင်ၸႂ်တေႉၶႃႈ ဢေႃႈၼေႃႈ။ တီႈယူႇတီႈသဝ်းၵေႃႈ ပႆႇပဵၼ်တီႈပဵၼ်တၢင်းဢီႈသင်ၵေႃႈ ပႆႇလီလွမ်လီတူၺ်းသေဢိတ်းၶႃႈၼႆႉ”
“ဢူး..မွၵ်ႈၼႆႉၵေႃႈလႆႈဝႃႈၵျႃႉၼႃႇယဝ်ႉၶႃႈလူးၼႆႉ ဢမ်ႇလႆႈဝႃႈသုမ်ႉ ယဝ်ႉၶႃႈလေႃႇ လႆႈဝႃႈပဵၼ်ႁိူၼ်းယဝ်ႉဢေႃႈၼႆႉ ပီႈသၢႆၶိူဝ်းၶႂ်ႈမေႃလိူၵ်ႈ တီႈမၼ်းဝႆႉလူးၼႆႉ”
“ၼႆႉပဵၼ်သူၼ်မႄႈသိုဝ်ႉပၼ်ဢေႃႈၼႆႉ ၶႃႈဝူၼ်ႉဝႃႈဝၢႆးၼႆႉ ၶႃႈဢၢင်ႈ ၶုတ်းပႃးၼွင်ႁႂ်ႈမီးၼမ်ႉၸႂ်ႉ တႃႇသေႇၶႃႈဝႃႈၼႆ”
ၼၢင်းၸၢမ်ၶမ်းပွၵ်ႈမႃးသေ မၼ်းၸၢႆးမႃးၸွႆႈတေႃႉႁေႃႇၶဝ်ႈယဝ်ႉၶိုၼ်း မႃးဢဝ်ၼမ်ႉသေ
“ဢွၼ်ၵၼ်မေးတႃႇၶဝ်ႈၶႃႈလႄႈ ယေႃႈၶႃႈ ဢဝ်သူင်ႇၶဝ်ႈၵႂႃႇတၢင်းၼႂ်း ၶႃႈလႄႈ ၵိၼ်ဝၢၼ်ဝၢၼ်ၵိၼ်လွႆးလွႆးၶႃႈၼႃ ယႃႇၵဵင်ၸႂ်ၶႃႈၼႃႉ မီးၼမ်ႉ မႆႈၵူၺ်းဢေႃႈၼေႃႈ ဢမ်ႇလႆႈလဵင်ႉၵၼ် ၶွင်ပဵၼ်ၶူဝ်းႁိူၼ်းၵေႃႈပႆႇလႆႈ ဢဝ်မႃးသင်သေမဵဝ်းၶႃႈလူင်ၼႆႉ”
“ဢမ်ႇပဵၼ်သင်ၶႃႈ”ၼႆသေ ဢွၼ်ၵၼ်ၵိၼ်ၶဝ်ႈယူႇႁင်းၽႂ်ႁင်းမၼ်း လႄႈ ၵူၼ်းလူင်ၵေႃႉၼိုင်ႈၸင်ႇဝႃႈ
“ၵမ်ႉမႃးၶႃႈတေမိူဝ်းတူၺ်းတီႈႁိူၼ်း သင်ဝႃႈဢၢႆႈႁဝ်းပႆႇၵႂႃႇတၢင်းလႂ် ၼႆၵေႃႈ ၶႃႈတေႁႂ်ႈမၼ်းဢဝ်မႅၵ်ႉၶူဝ်း မႃးၶုတ်းပၼ်လုၵ်းတႃႇပီႈသၢႆၶိူဝ်း တေ ပႅတ်ႈမူၼၼ်ႉၶႃႈၼႃ ၶႃႈတေႉၵေႃႈဢမ်ႇမေႃႁေႃႈလူင်”
“ယိၼ်းၸူမ်းတေႉၶႃႈဢေႃႈပေႃးၼၼ် လီတေႉၶႃႈဢေႃႈၼၼ်ႉ”
“ဝႃႈလႃးၵေႃႈမၼ်းၵႂႃႇလႄႇယဝ်ႉႁိုဝ်ၵေႃႈဢမ်ႇႁူႉယဝ်ႈ”
“ဢေႃႈ သင်ဝႃႈၵူၼ်းႁေႃႈမၼ်းဢမ်ႇတၼ်းၼႆၵေႃႈ ၶႃႈႁေႃႈလႆႈယူႇ ဢေႃႈ”
“ဢေႃႈ ပေႃးၸိူင်ႉၼၼ်ၵေႃႈ မိူဝ်းဢဝ်ၶႃႈလႄႈၼႃႉ”
“ဢႃႉ ၶႂ်ႈမႅၼ်ႈၵၼ်ယူႇတႄႉဢေႃႈၼၼ်ႉ တင်းၶႃႈဝႃႈၶႃႈၶႂ်ႈၶုတ်းၼွင် ၼႆႉတႄႉ ၼိုင်ႈၸူဝ်ႈမွင်းၵႃႈႁိုဝ်ၶႃႈၼၼ်ႉ”
“ႁၼ်မၼ်းလေႇၶုတ်းပၼ်ပိူၼ်ႈတႄႉ သၢမ်မိုၼ်ႇႁႃႈၼႆဝႃႈၼၼ်ႉ”
“ဢေႃႈလီယဝ်ႉၶႃႈ ပေႃးၼၼ် ဝၢႆးၼႆႉၸင်ႇဝႃႈၵၼ်ၶႃႈၼေႃႈ”
“ဢေႃႈ ပေႃၼၼ်ႁဝ်းၶႃႈတေမိူဝ်းၵွၼ်ႇၶႃႈၼႃႉ သင်ဝႃႈလူဝ်ႇလွင်ႈၸွႆႈ ထႅမ်တၢင်ႇၸိူဝ်ႉတၢင်ႇလွင်ႈၵေႃႈ လၢတ်ႈဢိူဝ်ႈၼႃႉ ဢမ်ႇတၢပ်ႈလူဝ်ႇ ၵဵင်ၸႂ်ၵၼ်ၵူၺ်ႉၼႃႉ ဢၼ်ႁဝ်းဢမ်ႇႁူႉဢမ်ႇမေႃၼႆၵေႃႈ ႁဝ်းတေပိုင်ႈ သူဢိူဝ်ႈ”
“ဢေႃႈၶႃႈယိၼ်းၸူမ်းယဝ်ႉၶႃႈၼႃႉၵူႈၵေႃႉ”
“ဢေႃႈၶႃႈ ဢေႃႈၶႃႈ” ဢွၼ်ၵၼ်ပွၵ်ႈမိူဝ်းယဝ်ႉ။
သိပ်ႇလူထႅင်ႈတွၼ်ႈတေမႃးၶႃႈ။
