တီႈႁိူၼ်းၸၢႆးသၢႆၶိူဝ်းၶဝ်ၼႆႉသမ်ႉ မၼ်းၸၢႆးမေးၶဵင်ႇသၢႆတိင်ႇမၼ်းသေ
Vi ဢမ်ႇထိူၵ်ႈၺႃးၵေႃႈ ၶႂ်ႈယွၼ်းဢိူမ်ႈၶၢင်းၸမ် သၢဝ်ဢွၼ်ႇၵိူတ်ႇ ပဵၼ်လုၵ်ႈယိင်းၶမ်းလဝ်းဢွၼ်ႇ ၵိုင်ႉၵၢင်ႉထူပ်းႁူပ်ႉမိုတ်ႈၵၼ်ၵေႃႈ ၶီႈၶႃႉ ပႅင်းႁၵ်ႉမႅၼ်ႈသူယဝ်ႉ မိူဝ်ႈၼွၼ်းၵေႃႈၸၢႆးလႆႈၾၼ် မိူဝ်ႈ လပ်းၵေႃႈၸၢႆးလႆႈႁၼ် ၼွင်ႉၶမ်းလႄႈၸၢႆးႁၵ်ႉၵၼ် ၾၼ်ဢွၼ်ႇ ၸႂ်သိူဝ်းမူၼ်ႈ
Cho ၵႂႃႇလႂ်ပႆလႂ်ၶႂ်ႈထူပ်းႁူပ်ႉႁၼ်ၶမ်းယဝ်ႉ ယူႇလႂ်ၵိၼ်လႂ်ၶႂ်ႈမီးႁိမ်းၸမ် ၶမ်းၼွင်ႉဢွၼ်ႇ ၽၢတ်ႇၵၼ်ယၢၼ်ၵၼ်ၸူဝ်ႈၵႅပ်ႉၼိုင်ႈၵူၺ်းၵေႃႈ ယၢပ်ႇမိူၼ်ၵႆၵၼ် ႁႃႈႁူၵ်းၸဵတ်းပီယဝ်ႉၶမ်းဢူၺ် ၸၢႆးလႆႈမဝ်း ယွၼ်ႉၶမ်းၼွင်ႉသၢဝ်
Vii ဢမ်ႇထိူၵ်ႈၺႃးၵေႃႈ ၶႂ်ႈယွၼ်းၼၢဝ်ႉႁၵ်းၼူမ် မွၵ်ႇလူင်ႇဢွၼ်ႇႁွမ် ၵီႈမိူင်းၶမ်းသဝ်းထင် မီးႁွႆးမိုဝ်းယၵ်းပိူၼ်ႈႁိုဝ်ၼေႃ တူၵ်းမီးၼႂ်းမိုဝ်း ပိူၼ်ႈႁိုဝ်ၼေႃး ၼိုင်ႈဝူၼ်ႉၼိုင်ႈမႃးယွၼ်ႈၸႂ် ၼိုင်ႈၶူၼ်ႉၼိုင်ႈမႃး မႆႈၸႂ် ႁႂ်ႈပူၼ်ႉလႆႈတၢင်းယၢၵ်ႈၸႂ် ၽႂ်လႃႇတေမႃးၸွႆႈ။
ႁွင်ႉၵႂၢမ်းယဝ်ႉၵႂႃႇသေ မၼ်းၸၢႆးၶိုၼ်းဝူၼ်ႉၶုၵ်းၸႂ်လႆႈ ၶွမ်း လႄႈတင်း ၵွင်ႈထႆႇမၼ်း ဢၼ်ၸၢမ်ၶမ်းယိပ်းဝႆႉၼၼ်ႉလႄႈ ၼႅတ်ႈၶျႃးတိင်ႇမၼ်း ယဝ်ႉ မႃးႁိူၼ်းၸၢမ်ၶမ်းၶဝ်ၼႆႉယဝ်ႉ
“ၸၢမ်ၶမ်း”
“ဢေႃႈ မႃးလႄႈပီႈသၢႆၶိူဝ်းၵိၼ်ၶဝ်ႈၸွမ်းၼွင်ႉၵေႃႈ”
“ႁႂ်း မႃးၺႃးယၢမ်းမၢၼ်တႄႉလူးၼႆႉ ၵိၼ်ၽၵ်းသင်လႃႇဝႃႈ လႅပ်ႈဝၢၼ် ၵျႃႉၼေႃ တႃႉၶႂ်ႈၵိၼ်တူၺ်းလႃႈ”
“ၼွင်ႉဢုပ်ႉထူဝ်ႇတင်းမၢၵ်ႇၶိူဝ်ဢေႃႈ ဝၢၼ်ၼႃႇၵူၺ်ႉ ၵိၼ်တူၺ်းလႄႈ ” ဢဝ်မႆႉထူႇယိုၼ်ႈပၼ်ယူႇ။
“လႆႈယဝ်ႉ ဢမ်ႇႁတ်းၵိၼ်ၵူဝ်ၸွႆး” ၼၢင်းၸၢမ်ၶမ်းၵေႃႈ “ႁိုဝ်ႉ!..” လပ်းတႃၸင်းတေႃႇမၼ်းယဝ်ႉပႆႇတၵ်းသဵင်
“ပေႃးၸွႆးၼမ်လိူဝ်ၼႆႉ ၵူဝ်ဢမ်ႇမီးယႃၵေႈမၼ်းၼေႇ”
“ႁိုဝ်ႉ..မိူဝ်ႈၵႆႈပီႈသၢႆၶိူဝ်းႁွင်ႉၵႂၢမ်း လီထွမ်ႇၵျႃႉၶႃႈၼေႃ မိူၼ်သဵင်ၶူးမူး လီလီယဝ်ႉဝႃႈ”
“မိူၼ်သဵင်ၶူးမူးႁၢၵ်ႈႁႃႉ ၸၢမ်ၶမ်း”
“ပီႈသၢႆၶိူဝ်းၼႆႉၼေႃ ၵမ်ႉၼွင်ႉတေဢမ်ႇၵိၼ်ၶဝ်ႈလႆႈယဝ်ႉ”
“ဢိူဝ်ႈဢိူဝ်ႈ ဢမ်ႇဝႃႈယဝ်ႉ ဢမ်ႇဝႃႈယဝ်ႉ ၵိၼ်လႄႈၽၵ်းၵေႃႈဝၢၼ်ယူႇ လူး ပီႈတေၼင်ႈပဵၼ်ၵေႃႉၸၢမ်ၶမ်းလႆ”
“ၸွင်ႇႁူႉၼႄႇ ၸူဝ်ႈပီႈသၢႆၶိူဝ်းဢမ်ႇယူႇလၢႆဝၼ်းၼႆႉ ၼွင်ႉၵိၼ်ၶဝ်ႈ သဵင်ႈဢိတ်းဢိတ်းၵူၺ်းၼေႈ။ မီးၶမ်ႈၼႆႉ ဝႃႈၼွင်ႉလႆႈထွမ်ႇၵႂၢမ်းယဝ်ႉ ၵိၼ်ဝၢၼ်ၵိၼ်ၼမ်ဢိတ်ႉၼိုင်ႈၼႆႉ”
“ၸႂ်ႈတေႉဢိူဝ်ႈ ၶွင်ၼွင်ႉဢုပ်ႉမၢၵ်ႇၶိူဝ်ၼႆႉ သႂ်ႇၼမ်ႉမၼ်းၼမ်ၼႃႇ လႄႇ ယႃႇပေပေႃးသႂ်ႇၼမ်ႉမၼ်းၼမ်လေႃႇ ၵမ်ႉမႃးၵူဝ်ပလၢတ်ႈလူမ်ႉ ၼေႈ”
“ၼွင်ႉလၢတ်ႈတေႉဢေႃႈၼႆႉ”
ပေႃးပဵၼ်တၢၼ်ႇၼၼ်ႉတေႉတႄႉပီႈၵႂႃႇလႂ်ၵေႃႈလူဝ်ႇလႆႈၵႂႃႇၸွမ်းဢိူဝ်ႈလေႃႇ”
“ၶွင်ၶႂ်ႈဢမ်ႇႁွင်ႉၼွင်ႉၶႃႈလူး ၼွင်ႉတေႁိုဝ်ၵႂႃႇ”
“ပီႈၵႂႃႇၵႆယဝ်ႉၵေႃႈၵႂႃႇႁိုင်လူး တေႁိုဝ်ၸၢင်ႈႁွင်ႉလႃႇ”
“ၸွင်ႇလႆႈၼႄႇပီႈသၢႆၶိူဝ်းၵႂႃႇသိုဝ်ႉမူ”
“လႆႈယူႇ ၵူၺ်းၵႃႈဢမ်ႇပေႃးလႆႈၼမ် လႆႈမႃးႁႃႈသိပ်းၵူၺ်း ၵူၺ်းၵႃႈလီ ယူႇ ပီႈတေႁဵတ်းပဵၼ်ၸုပ်ႈ ၼိုင်ႈၸုပ်ႈ ႁႃႈသိပ်း ႁႃႈသိပ်း ပၼ်ႇပုတ်ႈ ၵၼ်တိၵ်းတိၵ်း ဢမ်ႇပၼ်ၶၢတ်ႇၼႆဢိူဝ်ႈ ၸင်ႇၶၢႆတီႈၵုမ်ႇမၼီႇ CP လႆႈ”
“ပီႈသၢႆၶိူဝ်းတေလႆႈၵႂႃႇၼွၼ်း တီႈပုၼ်ႉၶႃႈယူဝ်ႉၼၼ်ႉ”
“ၸႂ်ႈယဝ်ႉ ၸူဝ်ႈပႆႇမီးၵူၼ်းပႂ်ႉၼႆႉတႄႉ တေလႆႈၼွၼ်းတီႈပုၼ်ႉဢိူဝ်ႈ”
“ပေႃးၼၼ်ၵေႃႈ ၵၢင်ၼႂ်မႃး ၼွင်ႉတေၵေႃႉဢဝ်ၶဝ်ႈၽၵ်းၵႂႃႇသူင်ႇၶႃႈ ၼႃ”
“တေႉႁႃႉ လီဢိူဝ်ႈ ၵူၺ်းၼႃႇ ပေႃးၵိၼ်ၵူႈဝၼ်းၵူႈဝၼ်းသမ်ႉ ဢဝ်ၸွႆး ပႅတ်ႈတေႉယူဝ်ႉ”
“ၵမ်းလႂ်ၵေႃႈဝႃႈ ၵူဝ်ၸွႆး ၵူဝ်ၸွႆးၼႆႉ တေပႂ်ႉမိူဝ်းၵိၼ်ထူဝ်ႇၽူးၼူၺ်း ဢၼ်ဝႃႈၼၼ်ႉယူဝ်ႉ လႆႈငိၼ်းဝႃႈ ၵႆႉမိူဝ်းဝေႉတီႈသႅင်ႇယူႇၼႆဢမ်ႇၸႂ်ႈ ႁႃႉ”
“ပီႈၸင်ႇႁႃမိူဝ်းဝေႉပွၵ်ႈလဵဝ်ၵူၺ်း ပီႈၵႂႃႇၼွင်လိူဝ်ႇမႃး တွင်ႉမႆႈၼမ်ႉ ၼႃႇလႄႈမႃးဝေႉသိုဝ်ႉၼမ်ႉၵူၺ်းၼေႈ ၸၢၵ်ႈၵႃးၵေႃႈ ဢမ်ႇၵိုတ်းလူး ၵွၼ်ႇလႃႈ”
“ၼၼ်ႉၼႃႇ ၼမ်ႉၵေႃႈသိုဝ်ႉပဵၼ်သွင်ၽႅၵ်ႉၼႆဢမ်ႇႁိုဝ်”
“ႁႂ်း ၵူၼ်းဢဝ်ၶၢဝ်ႇၵေႃႈ ၶႂ်ႈႁၢဝ်ႈဝႆႉၼေႃ ပေႃးၸိူင်ႉၼၼ်တႄႉ လူဝ်ႇလႆႈ ၾၢင်ႉတူဝ်ၼမ်ၼမ်ဢိူဝ်ႈၼႆႉၼေႃႈ”
“ဢမ်ႇလႆႈၶႃႈလေႃႇ မိူင်းပၼ်ႇၼႆႉ ၸုမ်းဢဝ်ၶၢဝ်ႇ RFA/VOA/BBC ၶဝ် ၼမ်ၼႃႇၶႃႈလူး”
“ၸွင်ႇၼွင်ႉပႃႈတူၺ်းယဝ်ႉႁိုဝ်ၼူတ်ႉပုၵ်ႉ Notebook ပီႈၶႂ်ႈပေႃႉလိၵ်ႈ ဢိတ်းဢွတ်းၼႆၵႂႃႈ”
“ဢူး..ပႆႇယဝ်ႉၶႃႈလေႃႇ ပေႃးလူဝ်ႇပေႃႉလိၵ်ႈၵူၺ်းတႄႉဢဝ်ၼူတ်ႉပုၵ်ႉ ၼွင်ႉမိူဝ်းၵေႃႈလႆႈယူႇၶႃႈၼႃႇ ပႂ်ႉၵမ်းၼိုင်ႈၶႃႈၼႃႉ” ၼႆသေမၼ်းၼၢင်း ၶိုၼ်ႈမိူဝ်းဢဝ်ၶွမ်းလူင်းမႃးသေ
“ၵေႃႉဢၼ်ႁွင်ႉၵႂၢမ်းၸွမ်း ပီႈသၢႆၶိူဝ်းတီႈမိူင်းၵွၵ်ႇၼၼ်ႉ ပဵၼ်ၽႂ်ၶႃႈ ၼၼ်ႉ”
“မိူဝ်ႈပီမႂ်ႇ မိူဝ်ႈပွႆးပီမႂ်ႇတီႈမိူင်းၵွၵ်ႇၼၼ်ႉႁႃႉ”
“ဢိုဝ်း” မၼ်းၼၢင်းငွၵ်းႁူဝ်ၼေ
“ၵႂၢမ်းပုၵ်ႈလႂ် ဝၢင်းပႅတ်ႈၸႂ်မႃႇၼႃႉၼၼ်ႉႁႃႉ ပဵၼ်ၵူၼ်းသႅၼ်ဝီဢိူဝ်ႈ ၼွင်ႉတူၺ်းၼႂ်းလႂ် တူၺ်းၼႂ်းၶွမ်းၼႄႇ ၵွင်ႈထႆႇ”
“ၼွင်ႉဢမ်ႇလႆႈတူၺ်းၼႂ်းၶွမ်း တူၺ်းၼႂ်းၵႅမ်ႇမႃႇလႃႇ(ၵွင်ႈထႆႇ)ၵူၺ်း လႅပ်ႈၵၼ်ၵျႃႉၶႃႈၼေႃ”
“ပိူၼ်ႈပေႃးဢဝ်ၽူဝ်ယဝ်ႉဝႃႈ လႅပ်ႈဢိူဝ်ႈ”
မၼ်းၼၢင်းဢဝ်ၶွမ်းယိုၼ်ႈပၼ်ၸၢႆးသၢႆၶိူဝ်းသေ “ယေႃႈ ၵူၺ်းၼႃႇ တႄႉ လႅမ်း Ram ၼွင်ႉဢမ်ႇပေႃးသုင်ပဵင်းလႅမ်းပီႈသၢႆၶိူဝ်းၵူၺ်းဢေႃႈ”
“ဢမ်ႇသုင်ၵေႃႈလႆႈယူႇ တေမိူဝ်းၵွၼ်ႇၼႃႈ ပီႈလူဝ်ႇၵႂႃႇတီႈသူၼ်”
“ဢေႃႈၶႃႈ ၵုတ်ႉၼၢႆႉသီးယူႇထူႇမူဝ်းလူဝ်ႇ”
“မိူၼ်ၵၼ် ၵူၺ်းၵႃႈပီႈတႄႉ တမ်ႉဢမ်ႇႁူႉတီႈပွင်ႇမၼ်းၵွၼ်ႇလႃႈ” ၼႆ သေယုမ်ႉယုမ်ႉဢွၵ်ႇမႃးယဝ်ႉ။ မၼ်းၼၢင်းၵေႃႈ ၶိုၼ်းယုမ်ႉယုမ်ႉသေ လပ်းတႃၸင်းသူင်ႇပၼ်ယူႇ။
သိုပ်ႇလူထႅင်ႈတွၼ်ႈတေမႃးၶႃႈ။
