ၸၢႆးသၢႆၶိူဝ်းၵေႃႈ လႄႇတူၺ်းတီႈၼမ်ႉၸၢင်ၼႆႉတီႈၼိုင်ႈယဝ်ႉ တီႈၼိုင်ႈသေ မီးသၢမ်ဝၼ်းယဝ်ႉ သိုဝ်ႉၵႃးလႆႈယဝ်ႉ မိူဝ်ႈၼႆႉတႄႉၶိုၼ်း မႃးယဝ်ႉ။ မၼ်းမႃးၶိုင်မိုင်ႉယူႇသူၼ်ၽၵ်းလႄႈၶွၵ်ႈမူမၼ်းၼၼ်ႉၵူၺ်းယဝ်ႉ။ ၼႂ်ၼႆႉၵေႃႈ ၸၢႆးသၢႆၶိူဝ်းလုၵ်ႉၸဵမ်ၸဝ်ႉသေ ၵႂႃႇတၢင်ႇဢဝ်ၶီႈဝူဝ်း တီႈ ဝၢၼ်ႈၵုင်းၵၢတ်ႇပုၼ်ႉယဝ်ႉ။ ၼၢင်းၸၢမ်ၶမ်းၶဝ်ႈဝႅင်းမႃး လႆႈႁၼ်ၽၵ်း တူပိုတ်ႇၵႂၢင်ႈဝႆႉ ၵႃးၵေႃႈဢမ်ႇႁၼ်ယဝ်ႉၼႆသေ
“ပီႈၸေႃးယဵၼ်ႇၶႃႈ ပီႈသၢႆၶိူဝ်းၵႂႃႇလႂ်ယဝ်ႉၶႃႈလႃႇ”
“ဢမ်ႇႁူႉၵူၺ်ႉၼႃ မၼ်းဢွၵ်ႇၵႂႃႇၵေႃႈပီႈဢမ်ႇတၼ်းႁၼ် ထၢမ်တူၺ်း ပႃႈလႃႈ”
“လႆႈယဝ်ႉၶႃႈ ၼႆသေၶိုၼ်းပႆဢွၵ်ႇဝႅင်းမႃးယူႇ” ယၢမ်းၼၼ်ႉၵႃးၸၢႆးသၢႆ ၶိူဝ်းၶိုၼ်းလေႉၶဝ်ႈဝႅင်းမႃးလႄႈ “ၸၢမ်ၶမ်းၼွင်ႉတေၵႂႃႇလႂ် မိူဝ်းယဝ်ႉ ႁႃႉ မႃးလႄႇပီႈၵမ်ႉၵွၼ်ႇလႄႈ”
“ပီႈသၢႆၶိူဝ်းၵူၺ်းဢေႃႈ ၵႂႃႇလႂ်ၵေႃႈဢမ်ႇလၢတ်ႈဢမ်ႇၸူဝ်းၼွင်ႉ ၸူဝ်ႈ ပိူၼ်ႈမီးၵႃးၼႆႉ ပိူၼ်ႈသမ်ႇတေႉယဝ်ႉဝႃႈ”
“ဢမ်ႇၸႂ်ႈၸိူင်ႉၼၼ်ၼႃ ၸၢမ်ၶမ်းၼႆႉၵေႃႈ ပီႈၵႂႃႇဢဝ်ၶီႈဝူဝ်း ပဵၼ်ၵုင်း ၵၢတ်ႇပုၼ်ႉၼေႈ”
“ဢေႃ ၵုင်းၵၢတ်ႇၵေႃႈၼွင်ႉၵႂႃႇလႆႈယူႇၶႃႈလူး ပေႃးႁွင်ႉတႄႉ”
“ပီႈၵိုတ်းထၢင်ႇဝႃႈၸၢမ်ၶမ်းၶဝ် ပႆႇတိုၼ်ႇၼႆၵႂႃႈ”
“ႁႃႉ..ႁူႉ..ၶႂ်ႈၶူဝ်ၼႃႇ ၸူဝ်ႈပီႈသၢႆၶိူဝ်းဢမ်ႇယူႇလၢႆဝၼ်းမႃးၼႆႉ ၼွင်ႉ ဢမ်ႇၸႂ်ႈၸၢမ်ၶမ်းၵေႃႉၵဝ်ႇ ဢမ်ႇၸႂ်ႈၸၢမ်ၶမ်းၵေႃႉဢၼ်ၵႆႉလုၵ်ႉလႃႈ ၼၼ်ႉယဝ်ႉၶႃႈၼႃ”
“ၺႃတေႉၵေႃႈယဵဝ်ႈသႂ်ႇၽႃႈလႄႈ လုၵ်ႉၸဝ်ႉၵႂႃႈၼေႃႈ”
“ယဵဝ်ႈသႂ်ႇၽႃႈၼႆႁႃႉ ႁိုဝ်! ၸွင်ႇတေဝႃႈထႅင်ႈႁႃ” မႃးလိမ်ႇဝၢၼ်ႁူမၼ်း ၸၢႆးယူႇ။
“ဢႃႉလႃႉ ဢႃႉလႃႉ ဢမ်ႇဝႃႈယဝ်ႉၶႃႈ ဢမ်ႇဝႃႈယဝ်ႉၶႃႈ ဝႃႈတေႉၵေႃႈ ဝႃႈတေႉၵေႃႈၼႂ်ၵႆႈပီႈၵႂႃႇၸဝ်ႉၼႃႇလႄႈ ပီႈၸင်ႇဢမ်ႇႁွင်ႉၼွင်ႉဢိူဝ်ႈ”
“ၸဝ်ႉၵႃႈႁိုဝ်ၵေႃႈ ၼွင်ႉၵႂႃႇလႆႈယူႇၶႃႈၼႃႇ”
“ဢႃႉၼေႃ ၸၢမ်ၶမ်းၼႆႉၵေႃႈ ၼွင်ႉယွင်ႇယဝ်ႉႁႃႉ ၵူၼ်းၸၢႆးၵူၼ်းယိင်း ဢမ်ႇၸႂ်ႈသင်ၵၼ် ၵႂႃႇၸွမ်းၵၼ်ၵၢင်ၶမ်ႈၵၢင်ၶိုၼ်းၼႆႉ ပဵၼ်ၽႂ်ၵေႃႈ ပိူၼ်ႈတိုၼ်းဢမ်ႇဝႃႈလီယဝ်ႉလေႃႇ ၸၢမ်ၶမ်းဢိူၺ်ႉ တွင်းဝႆႉလႄႈပီႈ ၼႄႈ ၵမ်ႉပေႃးၵိၼ်ၶဝ်ႈယဝ်ႉယဝ်ႉၼႆ ပီႈတေၵႂႃႇပုင်ႇၵိူဝ် ၸၢမ်ၶမ်းတေ လႆႈၵႂႃႇၸွမ်းပီႈၼႃႈ”
“ပေႃးၼွင်ႉဢမ်ႇၵႂႃႇၶႃႈလူး”
“ဢမ်ႇၵႂႃႇၵေႃႈ..” သမ်ႉတိုၵ်ႉယွင်ႈထူင်ၶီႈဝူဝ်းလႆႈပႆႇတၼ်းလၢတ်ႈသုတ်း
“ပေႃးၼွင်ႉဢမ်ႇၵႂႃႇ ပီႈသၢႆၶိူဝ်းတေႁဵတ်းႁိုဝ်”
“ပေႃးဢမ်ႇၵႂႃႇၵေႃႈဢမ်ႇၵႂႃႇသေၵေႃႉယဝ်ႉၼႆဢိူဝ်ႈ”
“ဢေႃ ၸႂ်ႈၵႂႃႈ ပေႃးၼၼ်ၵေႃႈမိူဝ်းၵိၼ်ၶဝ်ႈၵမ်ႉၵွၼ်ႇၶႃႈၼႃႉ”
“ဢမ်ႇႁွင်ႉပီႈမိူဝ်းၵိၼ်ၸွမ်းယဝ်ႉႁႃႉဢေႉ”
“ႁွင်ႉဢေႃႈ ပေႃးၶႂ်ႈၵိၼ်တေႉတႄႉ ၼႂ်ၼႆႉၵေႃႈ ၼွင်ႉၵေႃႉႁုင်ၽၵ်း ဢေႃႈ”
“တေႉႁႃႉၸၢမ်ၶမ်း!”
“ဢိုဝ်း” ငွၵ်းႁူဝ်ၼႄယူႇ။
“ၼွင်ႉႁုင်ၽၵ်းႁင်လႃႇ”
“ၽၵ်းသဵဝ်ႈၽၵ်းႁႃႈၵႅင်ဢေႃႈ ဝၢၼ်ၵျႃႉၶႃႈၼေႈ ပေႃးပီႈသၢႆၶိူဝ်းလႆႈ ၵိၼ်တႄႉ တိုၼ်းၸွႆးၵမ်းလဵဝ်ယဝ်ႉဝႃႈ”
“တႃႉၶႂ်ႈၵိၼ်လႃႈ ပီႈပေႃးတွင်ႉမႆႈၵမ်းလဵဝ်ယဝ်ႉၼႆႉ ၼႂ်ၼႆႉ ၸၢမ်ၶမ်း ႁဵတ်းၶႅၵ်ႇပီႈဢွၼ်တၢင်းလႄႈ ၵၢင်ဝၼ်းမႃးပီႈၸင်ႇမိူဝ်းၵိၼ်ၸွမ်းၸၢမ် ၶမ်း”
“လႆႈဢေႃႈ”
ၵိၼ်ၶဝ်ႈၼႂ်ယဝ်ႉသေ ၸၢႆးသၢႆၶိူဝ်းႁေႃႈၵႃးမၼ်းဢွၵ်ႇဝႅင်းမႃးယဝ်ႉ။
“ပီႈသၢႆၶိူဝ်းတေၽုၵ်ႇၽၵ်းမဵဝ်းလႂ်ၶႃႈလႃႇၼၼ်ႉ”
“ၽၵ်းၵၢတ်ႇ ၽၵ်းၶၢမ်း ၽၵ်းပိုၵ်ႉၸိူဝ်းၼႆႉၵႂႃႈ”
“ၼွင်ႉၵေႃႈ တႃႉၶႂ်ႈၽုၵ်ႇၽၵ်းၸိူင်ႉၼင်ႇပီႈသၢႆၶိူဝ်းလႃႈ”
“ၽုၵ်ႇၵိၼ်ႁင်းၵူၺ်းႁဝ်းၼႆႉ လီဢိူဝ်ႈၸၢမ်ၶမ်း ပေႃးႁဝ်းသိုဝ်ႉၵိၼ် ပိူၼ်ႈၼႆႉ ငိုၼ်းႁဝ်းၵေႃႈသဵင်ႈ ၽွၼ်းၽႃႉမၼ်းၵေႃႈၼမ်ၼႃႇ ၽုၵ်ႇၵိၼ် ႁင်းၵူၺ်းၼႆႉလီလိူဝ်ပိူၼ်ႈယဝ်ႉဝႃႈ ၼွင်ႉၵေႃႈၽုၵ်ႇလႆႈယူႇတေႉဢိူဝ်ႈ ၼၼ်ႉ ဝႅင်းၵေႃႈၵႂၢင်ႈယူႇလူး”
“ၵူၺ်းၼႃႇ ၼွင်ႉပႆႇယၢမ်ႈႁဵတ်းသေပွၵ်ႈၶႃႈၼႃ ၶုတ်းၵေႃႈၼွင်ႉဢမ်ႇ မေႃၶုတ်း”
“ပေႃးၼွင်ႉတေႁဵတ်းၵေႃႈ ပီႈတေၵေႃႉၶုတ်းပၼ်ငိူၼ်ႈပၼ်လွၼ်မၼ်းသႂ်ႇပၼ်ၽုၼ်ႇမၼ်းၵူၺ်း”
“ပီႈသၢႆၶိူဝ်းဝႃႈတေႉတေႉၶႃႈႁႃႉ”
“ပီႈဝႃႈတေႉဢိူဝ်ႈ ၸၢမ်ၶမ်း ၼွင်ႉယႃႇမႆႈၸႂ် တေႃႈႁႂ်ႈၼွင်ႉပဵၼ်လႆႈ လႃႈ”
“ပီႈသၢႆၶိူဝ်းၼႆႉ လီႁၵ်ႉတေႉယဝ်ႉဝႃႈ” တီႈႁိူၼ်းၼႆႉသမ်ႉလုင်း သၢင်ႇ မွင်ႇလုၵ်ႉမႃးသေ
“ၶမ်းလိုၼ်းႁႅၼ်းၶဝ်ႈၽၵ်းလူး ဢႃသၢင်ႇမီးတၢင်းၵႂႃႇဢိူဝ်ႈ”
“ဢေႃႈၶႃႈ” ၼၢင်းၶမ်းလိုၼ်းၶဝ်ႈၵႂႃႇၼႂ်းႁွင်ႈမိုဝ်ႉသေ “ၸၢမ်ၶမ်းပေႃး ႁဵၼ်းဝႆႉယဝ်ႉၶႃႈဢေႃႈ ဢႃသၢင်ႇ”
“မၼ်းၵႂႃႇလႂ်ယဝ်ႉလႃႇဢေးႁၢႆႉၼႆႉ”
“ၵႂႃႇပုင်ႇၵိူဝ် ၸွမ်းပီႈသၢႆၶိူဝ်းယဝ်ႉၶႃႈဢေႃႈ ၶဝ်ႈၽၵ်းၵေႃႈမၼ်းၵေႃႉ ႁုင်ၶႃႈဢေႃႈၼၼ်ႉၼႂ်ၼႆႉ လီဢၢမ်းၵျႃႉၶႃႈၼႃ ဢႃသၢင်ႇၶႂ်ႈႁူႉ ၸၢမ်ၶမ်း ၼႆႉ မိူဝ်ႈလဵဝ်လႅၵ်ႈလၢႆႈမႃးၼမ်ၵျႃႉၶႃႈၼေႈ။ ၵၢၼ်ၼႃႈႁိူၼ်းၼႆႉမၼ်း ၶတ်းၸႂ်ၼႃႇၶႃႈၼႃ။ ၵၢင်ၼႂ်ၵေႃႈပေႃးၶႃႈလုၵ်ႉၵေႃႈ မၼ်းၵေႃႈလုၵ်ႉ ၶႃႈ ဝႃႈ မိူဝ်ႈလဵဝ်ႁၼ်ပီႈသၢႆၶိူဝ်းႁဵတ်းသူၼ်ၽၵ်းသေယဝ်ႉ သမ်ႉဝႃႈၶႂ်ႈႁဵတ်း သူၼ်မိူၼ်ပီႈသၢႆၶိူဝ်းၼႆၶႃႈဝႃႈၼၼ်ႉ”
လုင်းသၢင်ႇမွင်ႇယုမ်ႉယုမ်ႉသေ “ၵေႃႈယဝ်ႉမၼ်းလႄႈ ၶႂ်ႈႁဵတ်း ၵေႃႈပၼ်မၼ်းႁဵတ်းတူၺ်းဢိူဝ်ႈ ၵူၺ်းၵႃႈ ပေႃးပဵၼ်လႆႈတႄႉၽၵ်းၼႆႉ ၽုၵ်ႇၵိၼ်ၵူၺ်းၼႆႉတႄႉ လီၼင်ႇၵဝ်ႇဢိူဝ်ႈ ဢၢႆႈသၢင်ႇၼၼ်ႉၵေႃႈသမ်ႉ မေႃၸႂ်ယၢဝ်းဝႆႉမၼ်း ၸၢမ်ၶမ်းႁၢႆႉတေႃႇမၼ်းႁဵတ်းၸဝ်ႈမၼ်းယူႇၵေႃႈ ယင်းတိုၵ်ႉၸွမ်းၸႂ်ၸၢမ်ၶမ်းလႆႈယူႇ ဢႃသၢင်ႇၵေႃႈဢၢမ်းၵျႃႉၼႆႉ”
ၸၢႆးသၢႆၶိူဝ်းၶဝ်ၵေႃႈ မႃးတၢင်ႇဢဝ်ၶႃး တီႈဝၢၼ်ႈပုင်ႇၵိူဝ်ၼႆႉ ယဝ်ႉ မႃးတၢင်ႇဢဝ်ၶီႈဝူဝ်းတီႈဝၢၼ်ႈၵုင်းၵၢတ်ႇၼႆႉသေ ၶိုၼ်းၶဝ်ႈဝႅင်း မႃးၶိုၼ်းယဝ်ႉ။
“လူင်းပိုတ်ႇၽၵ်းတူလႄႈၼွင်ႉ”
ၸၢမ်ၶမ်းဢမ်ႇပႆႇပွင်ႇၸႂ် ၵွပ်ႈသင်လႄႈၸၢႆးသၢႆၶိူဝ်း တေဢဝ်ၵႃးၶဝ်ႈ မႃးၼႂ်းဝႅင်းၶဝ် မၼ်းၼၢင်းတိုၵ်ႉဝူၼ်ႉၵႂင်ယူႇ ၸၢႆးသၢႆၶိူဝ်းၵေႃႈ မႃးၵိုတ်း ၵႃးသေ ယွင်ႈထူင်ၶီႈဝူဝ်းလူင်းတမ်းဝႆႉယဝ်ႉ မႃးယိပ်းဢဝ်တဝ်ႈၼမ်ႉ ၼႂ်းၵႃးမၼ်းဢိုၵ်ႉၵိၼ်ယဝ်ႉ ႁေႃႈၵႃးမၼ်းဢၢင်ႈဢွၵ်ႇမႃးယူႇ။
“ၵိၼ်ၶဝ်ႈယဝ်ႉၸွင်ႇၵွႆႈမိူဝ်းၶႃႈလေႃႇပီႈသၢႆၶိူဝ်း ပေႃးမီးၼိုင်ႈမွင်းယဝ်ႉ ၼွင်ႉတႄႉတွင်ႉမႆႈၼႃႇယဝ်ႉၼႆႉ”
“မိူဝ်းဝႆႉၵႃးၵမ်ႉၵႂႃႈ”
“ထူင်သင်လႃႇၼၼ်ႉၸၢမ်ၶမ်း” ၼၢင်းၶမ်းလိုၼ်းမႃးငွၵ်ႈတူၺ်းသေထၢမ်
“ထူင်ၽုၼ်ႇဢေႃႈပီႈၶမ်းလိုၼ်း”
“ၼွင်ႉတေႁဵတ်းသူၼ်ၽၵ်းတေႉႁႃႉၼႆႉ” ၸၢမ်ၶမ်းငွၵ်းႁူဝ်ၼႄ “ႁူႉ.. ပေႃးၸႂ်ႉပီႈၶုတ်းတႄႉပီႈၶၢၼ်ႉ”
“ပီႈသၢႆၶိူဝ်းတေၶုတ်းပၼ်ၼွင်ႉၼႆၼၼ်ႉ”
“ဢေႃႈ ၸၢၵ်ႈထႆၵေႃႈမီးလူး ၸၢမ်ၶမ်းႁႂ်ႈပီႈသၢႆၶိူဝ်းဢဝ်ၸၢၵ်ႈထႆဢဝ် လေႃႇ”
“တေႉၼေႃႈ ၵမ်ႉၼွင်ႉၸင်ႇလၢတ်ႈတူၺ်း မၼ်းဝႃႈတေမႃးၵိၼ်ၶဝ်ႈ တီႈၼႆႈဝႃႇ ယင်းပႆႇမႃးၼႆႉ ၵုမ်ႇမိုင်ႉႁဵတ်းသင်ယူႇၵေႃႈဢမ်ႇႁူႉ မႃးၼွင်ႉ မိူဝ်းၶႆႈတူၺ်း”
“ပီႈသၢႆၶိူဝ်းၶႃႈ”
“ဢေႃႈၶႃႈဝႃႈႁိုဝ်ၶႃႈ”
“ဝႃႈႁိုဝ်ၶႃႈ ဝႃႈႁိုဝ်ၶႃႈယူႇ ၵိၼ်ၶဝ်ႈဢေႃႈ”
ၸၢႆးသၢႆၶိူဝ်းႁူႉလီယူႇဝႃႈ ၸၢမ်ၶမ်းၸႂ်ပိတ်းၼႆၵေႃႈ မၼ်းၸၢႆးၸင်ႇဝႃႈ “ၵိၼ်လႃႈပီႈဢမ်ႇတွင်ႉမႆႈယဝ်ႉဝႃႈ”
မၼ်းၼၢင်းပႆမႃးၸူးၸၢႆးသၢႆၶိူဝ်းယဝ်ႉ “ပီႈသၢႆၶိူဝ်းတေၵိၼ်ႁႃႉဢမ်ႇၵိၼ်”
“ပီႈ…ပီႈပေႃးတွင်ႉမႆႈၼႃႇယဝ်ႉၼႆဢိူဝ်ႈ”
“မိူဝ်ႈၵႆႈပီႈသၢႆၶိူဝ်းဝႃႈ ဢမ်ႇၵိၼ်ဢမ်ႇတွင်ႉမႆႈယဝ်ႉၼႆဢမ်ႇၸႂ်ႈႁႃႉ မိူဝ်း ၵမ်းလဵဝ်လႃႈ ၼွင်ႉပေႃးမႃးၵိၼ် ႁဵတ်းၵေႃႉပီႈယဝ်ႉၶႃးလူးၼႂ်ၵႆႈ ပေႃး လႅၼ်ၼွင်ႉတႄႉၼွင်ႉတေႁဵတ်းၼႆၼႄႈ”
ယိုၼ်းလိမ်ႇၸၼ်ဝၢၼ်ႁူမၼ်းၸၢႆးယူႇ။
“ဢႃးလႃးလႃး ၸၢမ်ၶမ်းဢမ်ႇဢီးလူပီႈသေဢိတ်းၼေႃ ၸဵပ်းၼႃႇယဝ်ႉ ၵမ်းၼႆႉ”
တီႈႁူၸၢႆးသၢႆၶိူဝ်းၼၼ်ႉသမ်ႉ မိူဝ်ႈၵႆႈၶႃးဝၢတ်ႇဝႆႉဢိတ်ႉၼိုင်ႈ မၼ်း ၸင်ႇႁႃႁႅင်ႈၵူၺ်းလႄႈ ၽိူဝ်ႇၸၢမ်ၶမ်းလိမ်ႇၸိူင်ႉၼႆ လိူတ်ႈသမ်ႉၶိုၼ်း ဢွၵ်ႇမႃးထႅင်ႈ မၼ်းၼၢင်းဢမ်ႇႁူႉသေ ႁႃယႃႈယႃမႃးတႃးယူႇ ၼႃႈမၼ်း ၼၢင်းဢမ်ႇလီသေဢိတ်း ၸၢႆးသၢႆၶိူဝ်းၸင်ႇဝႃႈ
“ၵေႃႈယဝ်ႉလႃႈၸၢမ်ၶမ်းဢိူၺ်ႉ ဢမ်ႇတၢပ်ႈယႃၵေႃႈလႆႈယဝ်ႉ ၵူၼ်း ဢမ်ႇမီးဢူႈမီးမႄႈလူင် ယူႇၵႂႃႇၵေႃႈလႆႈတၢင်းၼၵ်းလိၼ်မိူင်းၵူၺ်းယဝ်ႉ ပွႆႇမၼ်းတၢႆႁေလႃႈ တႃႉတေၸဵဝ်းပူၼ်ႉဝူတ်ႈမၼ်း” ၼႆသေ ၼၢင်း ၸၢမ်ၶမ်းၵေႃႉၼိုင်ႈတႄႉ ပဵၼ်ဢၼ်ၸႂ်လဵၵ်ႉၵႂႃႇတႄႉတႄႉ ၸၢႆးသၢႆၶိူဝ်း ႁၼ်ဝႃႈမၼ်းၼၢင်းၸႂ်ဢမ်ႇလီလႄႈ ယိၼ်းဢီးလူၶိုၼ်းသေ
“ဝႃႈတေႉၵေႃႈ ပီႈယွၵ်ႇလဵၼ်ႈၵူၺ်းၼေႈၸၢမ်ၶမ်း”
“ယွၵ်ႇလဵၼ်ႈတီႈလႂ် လိူတ်ႈသမ်ႉပေႃးၵူဝ်ႈမိုဝ်းၼွင်ႉၼႆႉ”
ၸၢမ်ၶမ်းၼႄမိုဝ်းမၼ်းယူႇ။
“ပီႈတေႃႉၶႃးလႄႈၶႃးမၢတ်ႇဝႆႉမိူဝ်ႈၵႆႈဢိူဝ်ႈၼၼ်ႉ”
“ယေႃႈတႃးဢဝ်ႁင်းၵူၺ်းလႄႈ ပေႃးမေႃလႅၼ်ၸိူင်ႉၼၼ်ၵေႃႈ”
“ၶႂ်ႈပဵၼ်သင်ပဵၼ်ယဝ်ႉလႃႈၼႆၼၼ်ၼေႃႈ ပေႃးမၼ်းၸပ်းယဵၼ်းယဝ်ႉ ၼဝ်ႈသေပုတ်းၵႂႃႇၼႆၵေႃႈ ပီႈတေလၢတ်ႈၼႄပိူၼ်ႈဝႃႈ ၸၢမ်ၶမ်းလိမ်ႇ လႄႈပုတ်းၼႆၵူၺ်းၼင်ႇၵဝ်ႇ”
“ၼၼ်ႉၼႃႇသမ်ႉဝႃႈၼၼ်ၼင်ႇၵဝ်ႇဝႃႈ လႂ်မႃးလႄႈၼွင်ႉတႃးပၼ် ႁိုဝ်ႈ ၵမ်းၼႆႉ ႁႂ်ႈမၼ်းပုတ်းႁေလႃႈ ပေႃးမေႃလၢတ်ႈၼႃႇၸိူင်ႉၼၼ်ၵေႃႈ ၸွင်ႇပီႈသၢႆၶိူဝ်းမေႃထႆသူၼ်ၶႃႈ”
“ဢမ်ႇမေႃ ၶွင်တင်းလၢင်းၶိူဝ်း ပိူၼ်ႈဢမ်ႇၸႂ်ႉၵူၼ်းထႆႁေပွၵ်ႈလႄႇ ပိူၼ်ႈၸႂ်ႉဝူဝ်း ၸႂ်ႉၵႂၢႆး ၸႂ်ႉၸၢၵ်ႈၸိူဝ်းၼႆႉထႆလၢႆလၢႆၵူၺ်းလူး ၵူၼ်းတႄႉ ဢမ်ႇယၢမ်ႈႁၼ်ပိူၼ်ႈၸႂ်ႉသေပွၵ်ႈ”
“ၼၼ်ႉၼႃႇ ပေႃးႁႃလၢတ်ႈမႃးၵေႃႈ ၸွင်ႇမၼ်းဢမ်ႇၶတ်းလူမ်းဝႆႉႁိုဝ် လႃႇၼၼ်ႉ ၸႂ်ႉၸၢၵ်ႈၼၼ်ႉယဝ်ႉဝႃႈၼွင်ႉဝႃႈၼႆႉ”
“ဢေႃႈ ပေႃးၸႂ်ႉၸၢၵ်ႈတႄႉၵေႃႈတေႃႉတႄႉမေႃယူႇၵႂႃႈ”
“ပေႃးၶုတ်းဢဝ်ၼႆယူဝ်ပီႈသၢႆၶိူဝ်းႁိူဝ်ႉၼႆၵႂႃႈ ၸၢၵ်ႈၵေႃႈမီးယူႇၼွင်ႉဝႃႈ ၼႆ”
“ဢိူဝ်ႈ..ပေႃးမီးၸၢၵ်ႈတႄႉထႆဢဝ်ဢိူဝ်ႈဝႆး ႁဝ်းတႄႉၶွင်ဢမ်ႇမီးၸၢၵ်ႈ လႄႇ ၶုတ်းမိုဝ်းပေႃးပွင်းဢိူဝ်ႈလေႃႇ ၸွၵ်ႇမီးမၢၵ်ႈထႆမူၼ်းႁႃႉၼၼ်ႉ”
“မီးဢေႃႈ”
“ဢိူဝ်ႈ ၵမ်ႉၵေႃႈထႆဝႆႉႁေၵမ်းလဵဝ်ယဝ်ႉၼႃႇ ပေႃးၼၼ်ၵေႃႈ”
ၸၢႆးသၢႆၶိူဝ်းၵေႃႈၵိၼ်ၶဝ်ႈယဝ်ႉသေ မႃးထႆၸၢၵ်ႈၼႆႉ ၸႅတ်ႈတူၺ်းၼမ်ႉ မၼ်းၶိူင်ႈၼမ်ႉမၼ်း သႂ်ႇၼမ်ႉလိပ်းမၼ်းယဝ်ႉ ထႆထႆမေးမေးယူႇၵူၺ်း မၼ်း မွၵ်ႈ 20 မိၼိတ်ႉၼႆႉ ၵူၺ်းၵေႃႈ ပေႃးတၼ်းယဝ်ႉယဝ်ႉ မၼ်းၸၢႆး ဝႆႉၸၢၵ်ႈသေၶဝ်ႈမႃးၼႂ်းႁွင်ႈမိုဝ်ႉၼႆႉယဝ်ႉ။
“ပီႈသၢႆၶိူဝ်းပေႃးတၼ်းထႆယဝ်ႉယဝ်ႉၶႃႈႁႃႉ”
ၼၢင်းၶမ်းလိုၼ်းထၢမ် တိုၵ်ႉၺႃးမိူဝ်ႈၸၢႆးသၢႆၶိူဝ်းၵိၼ်ၼမ်ႉယူႇပႆႇၸၢင်ႈ တွပ်ႇလႄႈ ငွၵ်းႁူဝ်ၼႄယူႇ ၵိၼ်ၼမ်ႉဝႆႉၵွၵ်းမၼ်းသေ “ယဝ်ႉယဝ်ႉဝႃႈ ၵူၺ်းၵႃႈ တေလႆႈတၢၵ်ႇဝႆႉဢိတ်ႉၼိုင်ႈဢိူဝ်ႈ ၸင်ႇတေၶူၼ်ႉလႆႈ မွၵ်ႈ ဝၼ်းသွင်ဝၼ်းၼႆႉၵႂႃႈ ပီႈတေမိူဝ်းသႂ်ႇၽုၼ်ႇဢိူဝ်ႈၸၢမ်ၶမ်း ၼွင်ႉမိူဝ်း ၸွႆႈပီႈလႄႈ”
“ဢူး..ၼွင်ႉၶၢၼ်ႉ ၼွင်ႉလီႁင်ႈၶီႈဝူဝ်း”
“ႁႂ်း..ၶီႈဝူဝ်းဝႃႈလီႁင်ႈ မၼ်းၵိၼ်ယိူဝ်ႈၵူၺ်းလူး ၸၢမ်ၶမ်း ယဝ်ႉၵေႃႈ ၼွင်ႉဝႃႈ တေႁဵတ်းသူၼ်ၽၵ်းၼႆ ပေႃးၼွင်ႉလီႁင်ႈၶီႈဝူဝ်းၵေႃႈ ၶိုၵ်ႉ ယဝ်ႉဝႃႈ”
မၼ်းၼၢင်းတင်းဢမ်ႇၶႂ်ႈယွမ်းမႃႇၼသေ “ၼွင်ႉဝႃႈလဵၼ်ႈၵူၺ်းၶႃႈ လႆႈ ၼႃႇၶႃႈ”
ၼၢင်းၶမ်းလိုၼ်းယုမ်ႉယုမ်ႉသေ ထွမ်ႇၶဝ်ဢုပ်ႇၵၼ် ဝႃႈႁင်းၵၼ်သေ လၵ်ႉဢၢမ်း မၢၵ်ႇႁႅင်းၸွမ်းဢူၵ်းၸွမ်းၶႅၼ်ၸၢႆးသၢႆၶိူဝ်းၸိူဝ်းၼၼ်ႉလႄႈ ႁိူဝ်ႇဢွၵ်ႇပေႃးယမ်းတူဝ်ႈတင်းတူဝ်ၼၼ်ႉသေဝႃႈ “ပီႈသၢႆၶိူဝ်းၼႆႉ ၵိုင်ႇ တၢင်းပေႃးဝႃႈ ၵေႃႉၸၢႆးယူႇတေႉၼေႃ ၼၢင်းယိင်းၵေႃႉလႂ်လႆႈမၼ်းမႃး ပဵၼ်ပေႃႈၸဝ်ႈႁိူၼ်းၵေႃႈ ၵၢမ်ႇလီတေႉယဝ်ႉၼႆႉ ႁၢင်ႈၽၢင်ၵေႃႈၶႅမ်ႉ လႅပ်ႈ လၢတ်ႈၵႂၢမ်းၵေႃႈၸိုဝ်ႈၸႂ်ႈ ဢူၼ်ႈဢွၼ်ႇၸႂ်ယၢဝ်း ၼမ်ႉၸႂ်ၵေႃႈ လီ ပၢႆလိူဝ်ၵႆႉ သမ်ႉမေႃၵူႈမဵဝ်း တၢင်းၵိၼ်ၵေႃႈဢမ်ႇၵိၼ်ၸေး ဢမ်ႇမၵ်ႉ ၸေးမိူၼ်ပိူၼ်ႈ ၼၢင်းယိင်းၸိူဝ်းဢၼ်ယင်းပႆႇမီးၸဝ်ႈၽူဝ်ၸိူဝ်းၼၼ်ႉ ပေႃးဢမ်ႇႁၼ်မႅၼ်ႈမၼ်းၼေႃ ပေႃးလၢတ်ႈတႄႉဝႃႈ ၼၢင်းယိင်းႁဝ်းၵူႈ ၵေႃႉၼႆႉ လိူၵ်ႈႁႃၵူၼ်းၸၢႆးတႃႇတေမႃးပဵၼ်ပေႃႈၸဝ်ႈႁိူၼ်းႁူမ်ႈၸၢတ်ႈ ပၢၼ်ၵၼ်ၵႂႃႇၼႆၼၼ်ႉ ဢွၼ်ၵၼ်မုင်ႈမွင်း ၵူၼ်းၸိူင်ႉၼႆယဝ်ႉဢမ်ႇ ၸႂ်ႈႁႃႉ။ ၵွပ်ႈသင်လႄႈၼၢင်းယိင်းၵေႃႉလႂ် ပေႃးဢမ်ႇမီးမႅတ်ႉတႃႇၼိူဝ် မၼ်းလႃႇ ဝႃႈလႃးၵေႃႈ ၵဵဝ်ႇလူၺ်ႈၼမ်ႉယၢတ်ႇဢၼ်ဝႃႈႁႃႉတေႃႈ ဝႃႈ လႃးၵေႃႈ ပီႈသၢႆၶိူဝ်းတိုၼ်းထၢင်ႇယႂ်ႇ ၶိုၼ်းႁၢင်ႈၽၢင်တၢင်းႁူႉတူဝ်ၵဝ်ႇ သေ ဝႆႉမၢၼ်ႇယႂ်ႇၸႂ်သုင်သေ တိုၼ်းၶတ်းၵႃႈၶတ်းၶၼ်မၼ်းႁႃႉတေႃႈ ဝႃႈလႃးၵေႃႈ မီးတီႈယူပ်ႈယွမ်းယူႇႁိုဝ် သင်ၽဵင်ႇၵဝ်တူၺ်းတႄႉ ပႆႇႁၼ် တီႈလီသေႉၼေးသင်ၼင်ႇၵဝ်ႇလူးၼႆႉ။ ဢႃႉၵဝ်ၼႆႉၵေႃႈ ဝူၼ်ႉသင်ယူႇ ၵေႃႈဢမ်ႇႁူႉယဝ်ႉဝႃႈ ယွင်ႇယဝ်ႉယူဝ်ႉ” ၼႆယူႇႁင်းမၼ်းယဝ်ႉ။
သိုပ်ႇလူထႅင်ႈတွၼ်ႈတေမႃးၶႃႈ။
