တႅမ်ႈ – ဢွၼ်သႂ်လႅင်း
ပေႃးထိုင် လိူၼ်သိပ်းသွင်လွင်ႈ ဢွၼ်ႇမႃးၼႆႉ ၸၢဝ်းၶိူဝ်းတႆး ၸဵမ်ၼွၵ်ႈမိူင်းၼႂ်းမိူင်း ဢွၼ်ၵၼ်ႁၢင်ႈႁႅၼ်းတႃႇတေႁဵတ်းပွႆးႁပ်ႉၸဵင် ဢမ်ႇၼၼ် ပွႆးႁပ်ႉတွၼ်ႈ ပီမႂ်ႇတႆးၼႆယူႇၵူႈတီႈတီႈယဝ်ႉ။
ၸိူဝ်းပဵၼ်မၢဝ်ႇသၢဝ်ၶဝ်ၵေႃႈ တေလႄႇတီႈၼၼ်ႈ တီႈၼႆႈၼႆ သေ ႁႃသိုဝ်ႉသိူဝ်ႈၶူဝ်းတႆးမဵဝ်းၼၼ်ႉမဵဝ်းၼႆႉၼႆ ပေႃးပၼ်းၵႂႃႇသဵင်ႈ ယဝ်ႉ။ ၶမ်ႈလိူၼ်သိပ်းသွင်လပ်းၼၼ်ႉသမ်ႉ ဢွၼ်ၵၼ်ႁဵတ်းၶဝ်ႈတူမ်ႈ လႅမ်၊ ၶဝ်ႈတမ်ငႃးသေ ပေႃးထိုင်မႃး 12:00 မူင်း တဵင်ႈၶိုၼ်း ၸွမ်းၼင်ႇ ၶၢဝ်းယၢမ်းမိူင်းလႂ်မိူင်းၼၼ်ႉလႄႈ ဢွၼ်ၵၼ်ၵိၼ်ၶဝ်ႈတူမ်ႈလႅမ် ၶဝ်ႈ တမ်ငႃး ႁႂ်ႈယူႇလီမီးမင်ႇၵလႃႇၼႆသေ ႁပ်ႉၸဵင်ၵႂႃႇမူၼ်ႈမူၼ်ႈသိူဝ်း သိူဝ်းယူႇယဝ်ႉ။
ၸၢႆးသၢႆၶိူဝ်းၵေႃႉၼိုင်ႈၵေႃႈ ပီၼႆႉၶဝ်ႈပွႆးပီမႂ်ႇတႆး တီႈဝဵင်းလူင် မိူင်းၵွၵ်ႇ ၼႂ်းၸိုင်ႈထႆးၼႆသေ ၶႂ်ႈပွၵ်ႈမိူဝ်းမိူင်းတႆးယဝ်ႉၼႆလႄႈ သိုပ်ႇ ၶၢဝ်းတၢင်း ပူၼ်ႉမႃးဝဵင်းၼိုင်ႈယဝ်ႉဝဵင်းၼိုင်ႈယူႇ။
မိူဝ်ႈၼႆႉတႄႉယၢမ်း 17:00 မူင်းပၢႆပၢႆဢွၼ်ႇၼၼ်ႉ မီးၵႃးဢၼ် လုၵ်ႉတၢင်းႁူဝ်မိူင်းမႃး ၽႅဝ်တီႈတႃႈၵႃးလၢင်းၶိူဝ်းၼႆယဝ်ႉ။ မၼ်းၸၢႆး လူင်းၵႃးမႃး ပိူဝ်ႉတင်းထူင်ၶူဝ်းယိပ်းတင်း တိင်ႇဢွၼ်ႇမၼ်းသေပႆမႃး ၽၢႆႇၼႃႈၵျွင်းတေႃႇၼႆႉယဝ်ႉ။ ယၵ်ႉႁၼ်ၶဵင်ႇပၢင်မူၼ်ႈသိူဝ်းၼၼ်ႉလႄႈ တႅမ်ႈၼႂ်းမၼ်းဝႆႉဝႃႈ ႁူမ်ၸူမ်းႁပ်ႉတွၼ်ႈပီမႂ်ႇတႆး ထုင်ႉဝဵင်းလၢင်းၶိူဝ်း ၼႆၼၼ်ႉ တိုၵ်ႉၼႄတၢင်းႁၢင်ႈလီၵိုၵ်းဝဵင်းလၢင်းၶိူဝ်းယူႇလႄႈ မၼ်း ၸၢႆးၵိုတ်းတူၺ်းသေ ဝူၼ်ႉယူႇဝႃႈ
“ဢေႃ တီႈၼႆႈၵေႃႈ ပဵၼ်ပွႆးႁပ်ႉၸဵင်ၼင်ႇၵဝ်ႇလူးၼႆႉ” ဢၢမ်းယူႇႁင်း မၼ်းယဝ်ႉ။
ၸၢႆးသၢႆၶိူဝ်းၼႆႉ ပႅၵ်ႉသမ်ႉဝႃႈ ၵိူတ်ႇလၢင်းၶိူဝ်း ၸႃႇတီႉလၢင်း ၶိူဝ်းၼႆသေတႃႉၵေႃႈ ၵွပ်ႈဝႃႈမၼ်းၸၢႆး ၽၢတ်ႇယၢၼ်ဝဵင်းလၢင်းၶိူဝ်းၵႂႃႇ ၸဵမ်မိူဝ်ႈလဵၵ်ႉလဵၵ်ႉၼၼ်ႉလႄႈ မိူဝ်ႈလဵဝ်လႆႈမႃးၽႅဝ်ၶိုၼ်း ဝၢၼ်ႈဝဵင်း တူဝ်ၵဝ်ႇယဝ်ႉၼႆသေတႃႉၵေႃႈ ၵေႃႉဢၼ်ႁူႉၸၵ်းမၼ်း ၵေႃႉဢၼ် မၼ်းႁူႉၸၵ်းၵေႃႈ ဢမ်ႇမီးၽႂ်ယဝ်ႉ မၼ်းၸၢႆးတူၺ်းဝဵင်းလၢင်းၶိူဝ်းၼႆႉ ၵေႃႈ တွင်းလႆႈပဵၼ်တီႈ ပဵၼ်တီႈဢွၼ်ႇၵူၺ်းသေ တႃႇတေသိုပ်ႇၶၢဝ်း တၢင်းၶိုၼ်းမိူဝ်းဝၢၼ်ႈၼမ်ႉၼေႃႇ ၼၼ်ႉတႄႉ ၵွပ်ႈဝႃႈၶႂ်ႈၶမ်ႈ ၸမ်လပ်း သိင်ႇယဝ်ႉလႄႈ ပႆႇၸၢင်ႈပူၼ်ႉၶိုၼ်းမိူဝ်း မၼ်းၸၢႆးၵေႃႈလႆႈႁႃႁူင်းသဝ်း သေၵိုတ်းလိုဝ်ႈၼႂ်းဝဵင်းၼႆႉၵွၼ်ႇယဝ်ႉ။
မိူင်းလႅင်းမႃးၼႂ်ၼႆႉ မၼ်းၸၢႆးၶဝ်ႈၵၢတ်ႇၵႂႃႇႁႃသိုဝ်ႉသင်သိင်ဢိတ်းဢွတ်းသေယဝ်ႉ သိုပ်ႇၶၢဝ်းတၢင်းၵႂႃႇထႅင်ႈယဝ်ႉ။
ယၢမ်းသိပ်းမူင်းပၢႆပၢႆဢွၼ်ႇၼၼ်ႉ
“ပီႈသၢင်ႇ တေဢၢင်ႈၵႂႃႇတၢင်းလႂ်ၶႃႈလႃႇၼၼ်ႉ”
“မိူဝ်းႁိူၼ်းႁဝ်းၶႃႈဢေႃႈ ဢမ်ႇတွင်းၶႃႈယဝ်ႉၶႃႈႁႃႉ ၶႃႈပဵၼ်သၢႆၶိူဝ်း ဢေႃႈ”
“ဢေႃႈ ၸႂ်ႈၵႂႃႈပေႃးၼၼ် ဢိူဝ်ႈႉႉႉ ဢိူဝ်ႈ ဢႃႉ ဢသၢင်းဢလၢင်းလီတေႉ မႂ်းၼေႃ ႁိုဝ်ႉ! ၵူၼ်းႁဝ်းၼႆႉ ဢမ်ႇတၢႆဢမ်ႇႁၢႆၵေႃႈၸၢင်ႈမႃးၶိုၼ်းၼင်ႇ ၵဝ်ႇတေႉၼေႃ ဢိူဝ်ႈဢိူဝ်ႈ မိူဝ်းလႄႈပေႃးၼၼ်ႉၵေႃႈ ၵူၺ်းၵႃႈႁိူၼ်းသူ တႄႉဢမ်ႇမီးယဝ်ႉ မိူဝ်ႈလဵဝ်ပဵၼ်ၼႃႉသၢင်ႇသူဢိူဝ်ႈမႃးယူႇဝႆႉၼႂ်း ဝႅင်း သူၼၼ်ႉ ဝၢႆးပေႃႈလႄႈမႄႈသူလူႉယဝ်ႉ ပီႈၼၢင်းသူၵေႃႈလူႉထႅင်ႈႁေ ၼွင်ႉမႂ်းၵေႃႈ ဢွၼ်ၵၼ်ၵႂႃႇမိူင်းထႆးသဵင်ႈယဝ်ႉလူး ဢမ်ႇႁၼ်ၵၼ်ၵၼ် ၼႄႇတင်းၼွင်ႉမႂ်း”
ပီႈသၢင်ႇသူႉ တင်းဢၢမ်းတင်းလၢတ်ႈယူႇၵေႃႉလဵဝ် ၸၢႆးသၢႆၶိူဝ်းၵေႃႈ ပေႃး ဢမ်ႇၸၢင်ႈၸိမ်လၢတ်ႈသေၶေႃႈယဝ်ႉ။
“ဢေႃႈ.. ႁဝ်းၶႃႈဢမ်ႇၺႃးၵၼ်ၶႃႈၵူၺ်ႉ ပေႃးၼၼ်ၶႃႈတေပူၼ်ႉမိူဝ်း ၵွၼ်ႇၶႃႈၼႃႉ တၢင်ႇပွၵ်ႈၸင်ႇမႃးလႄႇၶိုၼ်း”
“ဢိူဝ်ႈဢိူဝ်ႈ..”
ၼႆသေ ဢမ်ႇပေႃးႁိုင်မၼ်းၸၢႆးၽႅဝ်မႃးတီႈဝႅင်းၵဝ်ႇၶဝ်ၼႆႉယဝ်ႉ ယၢမ်း ၼၼ်ႉၼႃႉသၢင်ႇၶဝ် တိုၵ်ႉၼင်ႈသၢၼ်ၵူၺ်သေ ယၵ်ႉတူၺ်းမၼ်းၸၢႆး ဢၼ်တိုၵ်ႉပႆ ၶဝ်ႈမႃးယူႇၼၼ်ႉလႄႈ ၸင်ႇထၢမ်ၸူးဝႃႈ “တေၵႂႃႇလႂ်ၶႃႈ လႃႇ တင်းၶူဝ်းတင်းလဵင်းႁေ မႃးၶျႃးတင်းၼႂ်းၼႆႉၶႃႈလႄႈ”
“ၶႃႈပဵၼ်သၢႆၶိူဝ်းဢေႃႈ.. ၼႃႉသၢင်ႇဢမ်ႇတွင်းၶႃႈယဝ်ႉႁႃႉ”
“ႁႃ! ဢေႃႈ..တေႁိုဝ်တွင်းယဝ်ႉလႃႇမႂ်းၵေႃႈ မႂ်းၵႂႃႇၼႆႉႁိုင်ၼႃႇတေႃႇ တေႃႇယဝ်ႉလူး ၵဝ်ၶၢႆႉမႃးယူႇတီႈၼႆႈ ပေႃးမီးၸဵတ်းပီပႅတ်ႇပီယဝ်ႉယူဝ်ႉ ၼႆႉ”
ပီႈၼွင်ႉၼႂ်းဝၢၼ်ႈၵေႃႈ မိူဝ်ႈႁူႉဝႃႈၸၢႆးသၢႆၶိူဝ်း ပွၵ်ႈမႃးယဝ်ႉၼႆၼၼ်ႉ ဢွၼ်ၵၼ်မႃးၸူမ်းမႃးတၵ်ႉမၼ်း မဵဝ်းၼိုင်ႈယဝ်ႉမဵဝ်းၼိုင်ႈယူႇ မၼ်း ၸၢႆးတႄႉဢုပ်ႇပိူၼ်ႈယူႇၵေႃႈ ၼႃႈဢမ်ႇပေႃးၵီႈ ၸႂ်ဢမ်ႇသိူဝ်းလႆႈ သေ တႃႉၵေႃႈ ၵႃႈလႆႈတူင်ႉတၵ်ႉ ၸိူဝ်းပီႈၼွင်ႉဢၼ်မႃးလႄႇမႃးၸူမ်းၼၼ်ႉ ၶိုၼ်းယူႇယဝ်ႉ။
ဢၼ်မၼ်းၸၢႆး ဢၢင်ႈဢၢၼ်းမႃးတႄႉ ၵဝ်တေပဵၼ်လုၵ်ႈလီ ၵေႃႉဢၼ်ပေႃႈမႄႈၸႂ်ယႂ်ႇလႆႈသေ တေဢၢၼ်းမႃးယူႇတႂ်ႈႁူမ်ႈငဝ်းမႅတ်ႉ တႃႇပေႃႈတင်းမႄႈလႄႈ တွပ်ႇပၼ်ၶိုၼ်းၵုင်ႇမုၼ်ပေႃႈမႄႈသေ လုမ်း လႃး ပေႃႈမႄႈတဵမ်တဵမ်ထူၼ်ႈထူၼ်ႈၼႆသေတႃႉၵေႃႈ တေႃႈလဵဝ်တႄႉ တူၵ်းလိုၼ်းယဝ်ႉ၊ မီးငိုၼ်းၶမ်းၼမ်တၢၼ်ႇလႂ်ၵေႃႈ ပေႃႈမႄႈၼႆႉသိုဝ်ႉ ဢဝ်ဢမ်ႇလႆႈယဝ်ႉ။ လုၵ်ႈလၢင်းမၢင်ၵေႃႉၼႆႉ ၵႆႉၵႆႉပၼ်တၢင်းမႆႈပေႃႈ မႄႈႁဵတ်းႁႂ်ႈပေႃႈမႄႈလႆႈသုၵ်ႉမႆႈၸႂ်ၸွမ်းယူႇတႃႇသေႇၵေႃႈၵႆႉၵႆႉမီးယူႇ။ ၵေႃႉဢၼ်ပဵၼ်ပေႃႈပဵၼ်မႄႈတႄႉ လုၵ်ႈလၢင်းၼၼ်ႉ ၼူၵ်ႇၼႃႇတိုဝ် ၼႃႇတၢၼ်ႇလႂ်ၵေႃႈ ၶဝ်တိုၼ်းဝႃႈ ပဵၼ်ႁိုဝ်မႃးၵေႃႈ ၵွပ်ႈၶဝ်ပဵၼ်လုၵ်ႈ ၼႆၼႃႇ တေၸၢင်ႈႁဵတ်းႁိုဝ် ပေႃးသူမီးလုၵ်ႈမႃးသူၸင်ႇတေႁူႉၼေႈ ၼႆ ႁင်းပိူၼ်ႈတႃႇသေႇယဝ်ႉ။
ၸၢႆးသၢႆၶိူဝ်းၵေႃႈ ၼင်ႈငဝ်သေဢဝ်ၼမ်ႉတႃ လုၵ်ႈၽၢၼ်ပေႃႈ ၽၢၼ်မႄႈဢွၼ်ႇမၼ်း ယိုင်ႈတဵမ်ႁူၺ်ႇယဝ်ႉ ဝူၼ်ႉယူႇႁင်းမၼ်းယဝ်ႉ။
“ဢေႃး..ၵဝ်ၼႆႉပဵၼ်ၵူၼ်းမႃးၸၢတ်ႈၼႆႉ ၵၢမ်ႇႁၢႆႉတေႉယဝ်ႉၼေႃ”
ၼွင်ႉယိင်းၼွင်ႉၸၢႆးႁဝ်းၶဝ်ၵေႃႈ ဝႆႉဝႃႈၶႃႈႁဝ်း ၸၢႆးသၢႆၶိူဝ်းၼႆႉပဵၼ် တွၼ်ႈသွၼ်ၼႆသေ ဢွၼ်ၵၼ်ၶတ်းၸႂ် ႁဵတ်းၸွမ်းဝတ်ႈတြႃးလုၵ်ႈ လၢင်းႁႃႈယိူင်ႈၼၼ်ႉ ႁႂ်ႈတဵမ်တဵမ်ထူၼ်ႈထူၼ်ႈ ယႃႇႁႂ်ႈလႆႈတူၵ်းလိုၼ်း မိူၼ်ၶႃႈႁဝ်းၸၢႆးသၢႆၶိူဝ်းၼႆႉၼႃ။
ႁဵတ်းၼၼ်သေ ၸၢႆးသၢႆၶိူဝ်းၼႆႉ မေႃၵိၼ်လဝ်ႈမေႃမၵ်ႉလဝ်ႈမႃးယဝ်ႉ မၼ်းၸၢႆးမႃးထိုင်ႁိူၼ်း မီးသွင်သၢမ်လိူၼ်ယဝ်ႉ ၼႂ်ၼႆႉမၼ်းၸၢႆးၼင်ႈ ငဝ်မိူၼ် ယၵ်ႉတူၺ်းၵႂႃႇတီႈၵႆၵႆ လႅပ်ႈတေဝူၼ်ႉသေလွင်ႈလွင်ႈယူႇၼႆ လႄႈ ၼႃႉသၢင်ႇၶဝ်ၸင်ႇလၢတ်ႈတေႃႇမၼ်းဝႃႈ
“မႂ်းဝူၼ်ႉသင်ယူႇ သၢႆၶိူဝ်း မိူဝ်ႈလဵဝ်လဝ်ႈၵေႃႈမႂ်းၵိၼ်ၼႃႇ မိူဝ်ႈယူႇမိူင်း ထႆးၵေႃႈ တိုၼ်းၵိၼ်ၸိူင်ႉၼႆႁႃႉတေႃႈ”
“ၵိၼ်တႄႉၵိၼ်ယူႇဢေႃႈ ၵူၺ်းၵႃႈၶႃႈဢမ်ႇၵိၼ်ၼမ်ၸိူင်ႉၼႆၶႃႈ တေႃႈလဵဝ်တႄႉၶႃႈဝူၼ်ႉၸွမ်းလွင်ႈၸၢတ်ႈပၢၼ်ၶႃႈတႃႇမိူဝ်းၼႃႈၼၼ်ႉ ပေႃးဢမ်ႇပွင်ႇလႆႈယဝ်ႉၶႃႈၼႃႉသၢင်ႇဢိူၺ်ႉ”
“ဢိူဝ်ႈလွင်ႈတီႈၽုၵ်ႇတီႈသွမ်ႈတႄႉ မႂ်းယႃႇမႆႈၸႂ်ၵဝ်တေပၼ်ၵႂႃႈ တေႃႈ ႁႂ်ႈမႂ်းပဵၼ်လႆႈလႃႈ လွင်ႈဝႃႈပေႃႈမႄႈၼၼ်ႉတႄႉၵေႃႈ ၵွပ်ႈလွင်ႈၵိူတ်ႇ ထဝ်ႈပဵၼ်တၢႆၼၼ်ႉလႄႈ တေၸၢင်ႈႁဵတ်းႁိုဝ်လႃႇမႂ်းၵေႃႈ သေလၢႆတႄႉ ၵေႃႈႁူႉဝႃႈသေလၢႆၵၼ်ယူႇဢိူဝ်ႈ.. ပေႃးထၢၼ်ႈဝႃႈသုၵ်ႉၸႂ်မႆႈၸႂ်ၼႆသေ မင်လဝ်ႈယူႇတိၵ်းတိၵ်းတႄႉ ၸၢင်ႈတုမ်ႉတိူဝ်ႉပၢႆးယူႇလီသေ ဝၢႆးမႃး ၸိုဝ်ႈသဵင်ၵေႃႈၸၢင်ႈလူႉဢိူဝ်ႈမႂ်း လွင်ႈတီႈယူႇတီႈသဝ်းတႄႉ ယူႇတီႈ ႁိူၼ်းၼႆႉၵေႃႈၸၢင်ႈပဵၼ်သင် ဝႆႉမိူၼ်ၼင်ႇႁိူၼ်းသူၼၼ်ႉဢိူဝ်ႈ ၵူၼ်း ၵေႃႈဢမ်ႇယႂ်ႇဢမ်ႇၼမ်သင်လူး မီးႁႃးၼႃႉပႂ်ႉသူသွင်ထဝ်ႈဢွၼ်ႇၵူၺ်း ၼႆႉ”
ၼႃႉသၢင်ႇၶဝ်ၵေႃႈ ယုၵ်ႉဢဝ်ၵွၵ်းၼမ်ႉၼဵင်ႈမၼ်းသူတ်ႉၵမ်းၼိုင်ႈသေ ၶိုၼ်းဝၢင်းဝႆႉယဝ်ႉ ယိပ်းဢဝ်လႅၼ်းယႃႈတွင်မၼ်း မႃးၸပ်းၾႆးယဝ်ႉ လုတ်ႇသေယၵ်ႉတူၺ်းၵႂႃႇတီႈၵႆၵႆသေ
“ပဵၼ်ၵူၼ်းၼိုင်ႈၵေႃႉၼႆႉယႃႇႁႂ်ႈၸိုဝ်ႈလႆႈလူႉဢိူဝ်ႈမေႃႉ”
ၸၢႆးသၢႆၶိူဝ်းၵေႃႈ ပွင်ႇၸႂ်သေတႄႇဢဝ်ၼၼ်ႉမႃး ဢမ်ႇၵိၼ်လဝ်ႈယဝ်ႉ ၸွမ်းၼင်ႇၶၢဝ်းယၢမ်းဢၼ်ဢမ်ႇၸၢင်ႈဢဝ်ၵိုတ်းဝႆႉလႆႈၼၼ်ႉ ပူၼ်ႉၵႂႃႇ ဝၼ်းယဝ်ႉဝူင်ႈ ဝူင်ႈယဝ်ႉလိူၼ် လိူၼ်ယဝ်ႉပီၼႆယူႇတိၵ်းတိၵ်းလႄႈ မၼ်းၸၢႆးမႃးပေႃးမီးပီပၢႆ ၸမ်သွင်ပီယဝ်ႉ ၼႃႈၵၢၼ်တႄႉၵွပ်ႈဝႃႈတိုၼ်း ပဵၼ်လုၵ်ႈပေႃႈႁႆႈမႄႈၼႃးမႃး ၸဵမ်လဵၵ်ႉယဝ်ႉလႄႈ ၵၢၼ်ဢၼ်ၼႆႉ မဵဝ်း ၼႆႉမၼ်းၸၢႆးဢမ်ႇမေႃၼႆတႄႉ ဢမ်ႇမီး။ ၵွပ်ႈၼၼ်လႄႈ ပီၼႆႉတႄႉ ၼႃႉသၢင်ႇၶဝ်ၵေႃႈ ဢမ်ႇပေႃးလႆႈယၢပ်ႇဢမ်ႇလႆႈတုၵ်ႉၶ ဢမ်ႇလႆႈသုၵ်ႉ ၸႂ်မႆႈၸႂ်ၸွမ်းၼႃႈၵၢၼ်ၵႃႈႁိုဝ် ပႅၵ်ႉသမ်ႉဝႃႈပဵၼ်ၼႃႉသၢင်ႇၼႃႉပႂ်ႉၵူၺ်း ဢမ်ႇၸႂ်ႈပေႃႈမႄႈၼႆသေတႃႉၵေႃႈ ၸၢႆးသၢႆၶိူဝ်းၼႆႉ တိုၼ်းႁဵတ်းၸွမ်း ဝတ်ႈတြႃး လုၵ်ႈလႃးႁႃႈယိူင်ႈၼၼ်ႉတဵမ်ꧦထူၼ်ႈꧦၼၼ်ႉယဝ်ႉ။
သိုပ်ႇလူထႅင်ႈတွၼ်ႈတေမႃးၶႃႈ
