ႁဝ်းဢမ်ႇလႆႈလိူၵ်ႈသဵၼ်ႈတၢင်းမၢၵ်ႈမီး ဢမ်ႇလႆႈလိူၵ်ႈပႆသဵၼ်ႈတၢင်းပိူၼ်ႈၵျိူၵ်ႈ တိူၵ်ႈတီႈဝႃႈဢမ်ႇမီးၽႂ်ပၼ်ႁႅင်းၵေႃႈ ယင်းတိုၵ်ႉသိုပ်ႇၵႂႃႇယူႇ။
သမ်ႉဝႃႈတီႈႁိူၼ်းဢမ်ႇမီးၾႆးၾႃႉၵေႃႈ မီးၾႆးတဵၼ်းယူႇ သၢႆလႅင်းၾႆးတဵၼ်းႁိူဝ်ႈထွင်ႇဝဝ်းလွႆးလွႆးသေတႃႉၵေႃႈ သဵင်ၵမ်တႅမ်ႈၶိတ်ႇၶဵၼ်လူင်းသႂ်ႇၼိူဝ်မၢင်ၸေႈၼၼ်ႉ ၸိုင်ပေႉမႃးမူၼ်ႈၸႂ်၊ တီႈလႂ်ၽိတ်းၵေႃႈမႄးဢဝ်ၵွၼ်ႈမွတ်ႇထူထွတ်ႇတီႈၽိတ်းဢွၵ်ႇ ၶႆးပေႃးထူၵ်းပဵၼ်ၵဵၼ်ပဵၼ်ၵဵၼ်၊ ၵမ်ႁႅင်ႈလႅမ်ႈယၢဝ်းဢမ်ႇတၼ်းႁူႉ ပေႃးသုတ်းသဵင်ႈပဵၼ်လႅမ်ႈ ၵိုတ်းတၢၼ်ႇသလိၵ်ႉပွတ်းၵူၺ်းၸင်ႇတေပႅတ်ႈမၼ်းလႆႈ။ ပပ်ႉပဝ်ႇလႄႈၵမ်ႁႅင်ႈၼၼ်ႉတႄႉ ပဵၼ်ၶူဝ်းၶွင်ဢၼ်မီးၵႃႈၶၼ်လိူဝ်ပိူၼ်ႈယဝ်ႉ။
ဢၢႆတဵၼ်းၼႂ်းဝၼ်းၼၼ်ႉ ယင်းတိုၵ်ႉၽိုၼ်ႉၶိုၼ်းမၢႆတွင်းလႆႈလီယူႇ မၢင်ပွၵ်ႈလူမ်းထူဝ်းထွင်းၶဝ်ႈႁူးၽႃ သမ်ႉပေႃးမွတ်ႇႁၢႆၵႂႃႇပဵၼ်ၵမ်း မၢင်ပွၵ်ႈဢမ်ႇတၼ်းၾၢင်ႉ ၸေႈၸပ်းမႆႈၸွမ်းၵႂႃႇ။
ယၢမ်းၶိင်ႇၶၢဝ်းပိူၼ်ႈၼွၼ်းယဵၼ် ပဵၼ်ၶိင်ႇၶၢဝ်းဢၼ်သဵင်ၵမ်ႁဝ်းဢၢၼ်ႇမေႃးၶဵၼ်၊ တၢင်းဝူၼ်ႉဢၼ်မီးယူႇၼႂ်းႁူဝ် ႁၢင်ႈငဝ်းဢၼ်မႃးယူႇၼႂ်းတႃၼၼ်ႉ လႆႈသူႇယူႇႁွတ်ႈထိုင်ၼႂ်းမၢင်ၸေႈမီးလွင်ႈမီးတၢင်းမႃး ၽိုၼ်ၼိုင်ႈယဝ်ႉၽိုၼ်ၼိုင်ႈ ထိုင်ၶိင်ႇၶၢဝ်းၵႆႇၶၼ်ၸင်ႇတူၺ်းႁၼ်ယၢမ်းမူင်းဝႃႈမၼ်းလိုၵ်းၼႃႇယဝ်ႉၼႆ။
ၵူၺ်းၵႃႈမိူဝ်ႈလဵဝ်တႄႉ ၶႃႈဢမ်ႇလႆႈတႅမ်ႈမၼ်းမိူၼ်ၼင်ႇၵူႈပွၵ်ႈယဝ်ႉလႄႈ လႆႈၸႂ်ႉၶွမ်းပေႃႉတႅမ်ႈဢဝ်ယဝ်ႉ။ တႃႇတေလႆႈပေႃႉၶွမ်းလႆႈၼႆၵေႃႈ လႆႈဢဝ်ငိုၼ်းဢူႈတင်းမႄႈဢၼ်ၵဵပ်းမႃးဝႆႉၼၼ်ႉသိုဝ်ႉပၼ်ယဝ်ႉ၊ မိူဝ်ႈၶႂ်ႈလႆႈတႄႉ ဝူၼ်ႉဝႃႈမၼ်းတေၸၢင်ႈႁႃငိုၼ်းလႆႈၵွပ်ႈမၼ်းယူႇလႄႈ ပေႃးမီးၶွမ်းပေႃႉလိၵ်ႈလႆႈၵေႃႈ ၸၢင်ႈဢိတ်ႇပဵၼ်ပပ်ႉသေၶၢႆလႆႈယူႇ ၵူၺ်းၵႃႈ ၶႃႈလိုမ်းဝူၼ်ႉဝႃႈ တႃႇဢိတ်ႇပပ်ႉၵေႃႈတေႃႈလူဝ်ႇငိုၼ်းမိူၼ်ၵၼ်၊ ၵူၼ်းဢမ်ႇမီးသင်ၸိူင်ႉၼင်ႇႁဝ်းၼႆႉ ဢမ်ႇၸၢင်ႈႁဵတ်းႁိုဝ် တေႃႇထိုင်မိူဝ်ႈလဵဝ် ၵႃႈၶွမ်းဢၼ်ယိမ်မႄႈႁဝ်းၶဝ်မႃးၼၼ်ႉ ယင်းပႆႇၸၢင်ႈဢဝ်တီႈလႂ်သၢႆႈတႅၼ်းမၼ်းလႃႈ။
သမ်ႉဝႃႈၸိူင်ႉၼၼ် ၶႃႈၵေႃႈယင်းတိုၵ်ႉလိူၵ်ႈတၢင်းသဵၼ်ႈၼႆႉယူႇလႄႈ လိူၵ်ႈမၼ်းမႃးတႃႇသေႇ၊ သမ်ႉဝႃႈဢမ်ႇလႆႈငိၼ်းၵမ်တႅမ်ႈယဝ်ႉသေတႃႉ သဵင်ၵီးပွတ်ႇၼၼ်ႉပဵၼ်သဵင်ဢၼ်လီထွမ်ႇမူၼ်ႈႁူဝႆႉယူႇ။
ၶႃႈလႆႈလိူၵ်ႈသဵၼ်ႈတၢင်းဢၼ်ပိူၼ်ႈဝႃႈ ဢမ်ႇမီးသင်၊ သဵၼ်ႈတၢင်းဢၼ်ဢမ်ႇမီးငိုၼ်းလိူၼ်ယႂ်ႇ၊ ဢမ်ႇမီးၸၢတ်ႈပၢၼ်ဢၼ်လီ၊ ဢမ်ႇလိူၵ်ႈၸွမ်းသဵၼ်ႈတၢင်းဢၼ်ဢူႈမႄႈၶႂ်ႈႁႂ်ႈပဵၼ် လိူၵ်ႈၸွမ်းသဵၼ်ႈတၢင်းဢၼ်လမ်တိုဝ်လမ်တၼ်သေတႅပ်းတတ်း လူၺ်ႈဝႃႈ ဢွင်ႈတီႈၼၼ်ႈ မီးပိုၼ်ႉတီႈပုၼ်ႈတႃႇၶႃႈလႆႈတႅမ်ႈလိၵ်ႈယူႇၼႆလႄႈ ၶႃႈၵေႃႈလႆႈလိူၵ်ႈႁဵတ်းၵၢၼ်တီႈသိုဝ်ႇၶၢဝ်ႇဢၼ်ၼိုင်ႈယဝ်ႉ။
တီႈၼႂ်းလုမ်း ၼိူဝ်ၽိူၼ်မီးၶွမ်းတင်ႈတူဝ်ႉ တမ်းဝႆႉသိုဝ်ႈၽႂ်တီႈမၼ်း ၵၢၼ်ၽႂ်ၵၢၼ်မၼ်းႁဵတ်းၵႂႃႇ ၵမ်ႈၽွင်ႈၵေႃႈ သွၵ်ႈႁႃၶေႃႈမုၼ်း၊ ၵမ်ႈၽွင်ႈၵေႃႈ ၵပ်းသိုပ်ႇတွင်ႈထၢမ်ၵူၼ်းၸိူဝ်းတူင်ႉၼိုင်ၼႂ်းပိုၼ်ႉတီႈ၊ ၵမ်ႈၽွင်ႈၵေႃႈ ဢုပ်ႇဢူဝ်းလွင်ႈပိူၼ်ႈတွင်ႈထၢမ်၊ ၵမ်ႈၽွင်ႈၵေႃႈ ၶူၼ်ႉႁႃပိုၼ်ႉႁူႉပိၼ်ႇတႅမ်ႈ၊ ၵမ်ႈၽွင်ႈၵေႃႈႁၢင်ႈၶိူင်ႈႁဵတ်းၽၢင် လၢတ်ႈဢၢၼ်ႇၶၢဝ်ႇ တႃႇဢွၵ်ႇလၢတ်ႈငဝ်းႁၢင်ႈသဵင်၊ ၵမ်ႈၽွင်ႈၵေႃႈၼင်ႈတတ်းတေႃႇၶၢဝ်ႇယူႇ ၵၢၼ်ၽႂ်ၵၢၼ်မၼ်းၽႂ်ပေႃးဢမ်ႇတၼ်းတူၺ်းၽႂ် ၶႃႈၵေႃႈမႃးၼင်ႈတီႈၼင်ႈပဝ်ႇႁူင်ႁူင် ဢၼ်ဢမ်ႇမီးၽႂ်သူၼ်ၸႂ်လႄႈ ၼင်ႈတူၺ်းၶဝ်ယူႇႁဵတ်းၼၼ်ၵူၺ်း။
“ၼွင်ႉၵူၼ်းႁဵတ်းၵၢၼ်မႂ်ႇႁႃႉ” ပီႈၼၢင်းဢၼ်လႅပ်ႈပဵၼ်ႁူဝ်ၼႃႈၼၼ်ႉ ၶဝ်ႈမႃးတူင်ႉတၵ်ႉၸူး။
“ၸႂ်ႈဢေႃႈ”
ပီႈၼၢင်းၵေႃႈယူႇတီႈၼင်ႈမၼ်းသေ ထၢမ်ၸူးပီႈၼၢင်းၵေႃႉၼိုင်ႈ “ၶမ်းၸိုၼ်ႈၵႂႃႇလႂ်ယဝ်ႉ ၶမ်းၶွင်ႇ”
“ပီႈၶမ်းၸိုၼ်ႈ! ပီႈသႅင်ၼူၼ်းႁွင်ႉ”
ၵမ်းၼၼ်ႉ ပီႈဢၢႆႈဢၼ်ၸိုဝ်ႈႁွင်ႉၶမ်းၸိုၼ်ႈၼၼ်ႉၵေႃႈ ပႆမႃးတီႈဢၼ်ႁဝ်းယူႇၼၼ်ႉသေ “ဢေႃႈ မီးၸိူင်ႉႁိုဝ်”
“ႁႃတီႈၼင်ႈပၼ်ဢေးၼွင်ႉ” ယၵ်ႉတူၺ်းၶႃႈယဝ်ႉ “ဢေးၼွင်ႉၸိုဝ်ႈသင်လႃႇ”
“ၸၢမ်ႁွမ်ၶႃႈ”
ယၵ်ႉတူၺ်းပီႈၶမ်းၸိုၼ်ႈယဝ်ႉ “ၼွင်ႉၸွႆႈသွၼ်ပၼ်ၵၢၼ်သေလႄႈ ၸွႆႈတူၺ်းပႃးၽွင်ႈၼႃႈ”
ပီႈၶမ်းၸိုၼ်ႈ ပဵၼ်ၵူၼ်းတႅမ်ႈၶၢဝ်ႇၽၢႆႇတႆးလႄႈ တေတႅမ်ႈၶၢဝ်ႇၵဵဝ်ႇလူၺ်ႈလွင်ႈ ပၢင်တိုၵ်း လွင်ႈပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်းၸိူဝ်းၼႆႉသေ ႁႃၶေႃႈမုၼ်းၶၢဝ်ႇၸွမ်းလႅင်ႇၶၢဝ်ႇၸိူဝ်းၼႆႉယဝ်ႉ။ လႆႈဝႃႈ မၼ်းၼႆႉပဵၼ်ၵူၼ်းဢၼ်လႆႈႁဵတ်းၵၢၼ်ၼမ်လိူဝ်ပိူၼ်ႈၵေႃႈဝႃႈ။
သမ်ႉဝႃႈၶႃႈပဵၼ်ၵူၼ်းၵျိူၵ်ႈတႅမ်ႈလိၵ်ႈၵေႃႈ ဢမ်ႇၸႂ်ႈဝႃႈၶႃႈသူၼ်ၸႂ်ၶၢဝ်ႇလႄႈ ၶႃႈၵေႃႈဢမ်ႇလႆႈတိတ်းတၢမ်းၵၢၼ်ၶၢဝ်ႇသင်၊ လႄႈၶႃႈၵေႃႈဢမ်ႇႁူႉဝႃႈၶႃႈတႅပ်းတတ်းသေမႃးယူႇလႆႈၸိူင်ႉႁိုဝ် ယွၼ်ႉပိူဝ်ႈမီးၵူၼ်းၼႄႉၼမ်းႁႂ်ႈၶႃႈမႃးလႄႈ ၶႃႈသမ်ႉလူဝ်ႇၵၢၼ် ၶဝ်သမ်ႉလူဝ်ႇၵူၼ်းသေ ဢဝ်မႃးႁဵတ်းယူႇတီႈၼႆႈယဝ်ႉ။
ၶႃႈဢမ်ႇတွၼ်ႉႁူႉဝႃႈ သိုဝ်ႇၶၢဝ်ႇၼႆႉ ၵၢၼ်မၼ်းတေမီးၼမ်ပဵၼ်တၢၼ်ႇၼႆႉ တေႃႇထိုင်ပီႈၶမ်းၸိုၼ်ႈ ႁႂ်ႈၶႃႈၵႂႃႇၸွမ်းတိတ်းတၢမ်းသိုဝ်ႇၶၢဝ်ႇ ဢၼ်မီးယူႇတီႈၼိူဝ်ဢွၼ်ႇလၢႆးၼၼ်ႉသေ၊ ႁႂ်ႈၶႃႈၶဝ်ႈပဵၼ် admin သေယဝ်ႉ ၵပ်းသိုပ်ႇတွင်ႈထၢမ်လႅင်ႇၶၢဝ်ႇ ၼႂ်းပိုၼ်ႉတီႈဢၼ်မီးဝႆႉၼၼ်ႉလႄႈ ဢဝ်ၶၢဝ်ႇၸိူဝ်းဢၼ်ႁၼ်ယူႇၸိူဝ်းၼၼ်ႉ သိုပ်ႇႁႃၽိူမ်ႉထႅမ်ၶေႃႈမုၼ်းမၼ်းၵႂႃႇထႅင်ႈ။ လၢတ်ႈတေႃႇၵူၼ်းၼႆႉႁိူဝ်ႉတေႉယဝ်ႉ ၽိူဝ်လိူဝ်ၶႃႈသမ်ႉပဵၼ်ၵူၼ်းဢမ်ႇမေႃလၢတ်ႈသေၵႃႈႁိုဝ် ပေႃးမၼ်းလၢတ်ႈမႃးၼိုင်ႈၶေႃႈ ၶႃႈပေႃးဢမ်ႇႁူႉဝႃႈတေသိုပ်ႇတွပ်ႇၵႂႃႇၸိူင်ႉႁိုဝ်ယဝ်ႉလႄႈ။ ပိူၼ်ႈႁႂ်ႈထၢမ်ၸိူင်ႉႁိုဝ်ၼႆၵေႃႈ ထၢမ်ၵႂႃႇၸိူင်ႉၼၼ် ပေႃးပိူၼ်ႈတွပ်ႇမႃးယဝ်ႉ ၼႆၵေႃႈ ဢမ်ႇထၢမ်ထႅင်ႈသေ သိုပ်ႇသူင်ႇၶေႃႈမုၼ်းမၼ်းပၼ် ပီႈၶမ်းၸိုၼ်ႈၵႂႃႇယဝ်ႉ။ ၶေႃႈမုၼ်းဢမ်ႇၸေးလႄႈ ပီႈၶမ်းၸိုၼ်ႈၵေႃႈ သမ်ႉပေႃးလႆႈသိုပ်ႇထၢမ်ၵႂႃႇထႅင်ႈ။ ႁဵတ်းၼႆယူႇတင်းပၢတ်ႈ ဢမ်ႇမိူၼ်ၼင်ႇဢၼ်ၶႃႈဝူၼ်ႉဝႆႉသေဢိတ်း ဝၼ်းဝၼ်းၼင်ႈယူႇၼႃႈၶွမ်းသေ ပႂ်ႉတွပ်ႇၶေႃႈၵႂၢမ်းပိူၼ်ႈၸိူင်ႉၼၼ် ၶၢဝ်းယၢမ်းတႅမ်ႈလိၵ်ႈၶႃႈၵူၺ်းၵေႃႈသမ်ႉပေႃးလိုမ်းမၼ်းၵႂႃႇပႅတ်ႈယဝ်ႉ။
ၶႃႈလႆႈၵဵပ်းၶေႃႈမုၼ်းၶၢဝ်ႇႁိုင်ယူႇပဵၼ်လိူၼ် ဝၼ်းလိုဝ်ႈဢၼ်ဝႃႈၼၼ်ႉၵေႃႈ ၼင်ႇႁၢင်ႈၶႃႈပေႃးလိုမ်းမၼ်းၵႂႃႇယဝ်ႉ၊ ဢမ်ႇမီးဝၼ်းလိုဝ်ႈ ပေႃးလိုမ်းၼပ်ႉလိူၼ်ၼပ်ႉဝၼ်းယဝ်ႉ။ ပေႃးဢမ်ႇမီးဢၼ်ပိူၼ်ႈသူင်ႇမႃးသမ်ႉ လႆႈႁႃႁႂ်ႈပေႃးမီး ထၢမ်တီႈၼိုင်ႈတၢင်းၼိုင်ႈ တေႁႂ်ႈယူႇလၢႆလၢႆၵေႃႈသမ်ႉဢမ်ႇလႆႈ ဢမ်ႇမီးၵၢၼ်ၵေႃႈၵႃႈလႆႈႁဵတ်းၵၢၼ်ယဝ်ႉ။ ပေႃးဝႃႈထိုင်ၶိင်ႇလိုဝ်ႈသမ်ႉ မီးၵူၼ်းသူင်ႇၶေႃႈမုၼ်းၶၢဝ်ႇမႃးယဝ်ႉ မၢင်ပွၵ်ႈပေႃးမၼ်းဢမ်ႇၼမ်ၼႃႇၽႅဝ်ၼႆ ပီႈၶမ်းၸိုၼ်ႈၵေႃႈတေဢမ်ႇႁွင်ႉၶႃႈလႄႈ မၼ်းတေႁဵတ်းၵူၺ်းမၼ်းသေ တေတႅမ်ႈႁင်းၵူၺ်းမၼ်းၵႂႃႇယဝ်ႉ။
ၵၢၼ်တီႈသိုဝ်ႇၶၢဝ်ႇၼႆႉ ဢမ်ႇမီးၶၢဝ်းယၢမ်းလိုဝ်ႈပိူင်တၢႆလႄႈ တေဝႃႈဢမ်ႇလိုဝ်ႈသမ်ႉၵေႃႈလႆႈလိုဝ်ႈယူႇ ၵူၺ်းၵႃႈဢမ်ႇလႆႈလိုဝ်ႈႁဵတ်းၵၢၼ်တၢင်ႇမဵဝ်းလႆႈၼၼ်ႉယဝ်ႉ။ ပေႃးဝႃႈတႅမ်ႈလိၵ်ႈသမ်ႉ လူဝ်ႇမီးသမ်ႇမႃႇထိသေတႅမ်ႈ မၼ်းၸင်ႇတေဝူၼ်ႉလႆႈလူး၊ ၶႃႈမႃးယူႇလႆႈၶၢဝ်းတၢင်းၼိုင်ႈလိူၼ် ၶၢဝ်ႇႁူဝ်ၼိုင်ႈၵေႃႈပႆႇလႆႈတႅမ်ႈ။
ၵူၼ်းၵေႃႉဢူႈၵေႃႉမႄႈ ၵူၼ်းၵေႃႉတီႈၵေႃႉတၢင်း မႃးယူႇႁူမ်ႈႁွမ်းၵၼ် တေႁႂ်ႈမၼ်းမိူၼ်ၼင်ႇၸႂ် မၼ်းၵေႃႈႁူႉတိုၼ်းတေဢမ်ႇမိူၼ်လႆႈ၊ တေႃႈၼင်ႇၵူၼ်းႁိူၼ်းလဵဝ်ၵၼ်ၵူၺ်း တင်းၸႂ်ဢမ်ႇမိူၼ်ၵၼ် ဝႆႉၸႂ်ၸိူင်ႉၼႆသေယူႇၵႂႃႇ။
ၵူၺ်းၵႃႈ ပဵၼ်သင်ၵေႃႈဢမ်ႇႁူႉ ႁဵတ်းၽိတ်းၼိုင်ႈဢိတ်းၼိုင်ႈဢွတ်းၵူၺ်းၵေႃႈ ပီႈၶမ်းၸိုၼ်ႈၼၼ်ႉတႄႉ ၸွမ်းလၢတ်ႈၸွမ်းတၵ်ႉယူႇတိၵ်းတိၵ်း သမ်ႉပေႃးၶႂ်ႈၶၢၼ်ႉႁၼ်ယဝ်ႉ၊ မၢင်ပွၵ်ႈၶႃႈၵေႃႈဝူၼ်ႉယူႇဝႃႈ တေႁဵတ်းၵၢၼ်ၵႂႃႇၸွမ်းမၼ်းလႆႈယူႇႁႃႉ။
ပေႃးဝႃႈမႃးႁဵတ်းၵၢၼ်မိူဝ်ႈလႂ် တေလႆႈထူၺ်ႈၸႂ်လူင်သေၵမ်းၼိုင်ႈယဝ်ႉ ၸင်ႇတေၶဝ်ႈႁွင်ႈမႃး တီႈၼင်ႈသမ်ႉၼင်ႈႁိမ်းၵၼ်သေ ဢမ်ႇၶႂ်ႈႁၼ်ၵေႃႈၵႃႈလႆႈတူၺ်းယဝ်ႉ၊ လႆႈၼိုင်ႈလိူၼ်ယဝ်ႉၵေႃႈ မၼ်းႁႂ်ႈၶႃႈၽိုၵ်းတႅမ်ႈၶၢဝ်ႇယဝ်ႉ ပေႃးဝႃႈတႅမ်ႈၶၢဝ်ႇၼႆၵေႃႈ ဢမ်ႇမိူၼ်ဢၼ်ႁဝ်းတႅမ်ႈ ပွင်ႈၵႂၢမ်း လွၼ်ႉမွၼ်းၵႂၢမ်း ဢၼ်ႁဝ်းၶႂ်ႈတႅမ်ႈၼင်ႇၵၢင်ၸႂ်ႁဝ်းၼၼ်ႉလႆႈ မၼ်းတေလႆႈတႅမ်ႈၸွမ်းၼင်ႇၶေႃႈမုၼ်းဢၼ်မီးလႄႈ ပိူင်ပဵၼ်ဢၼ်ပဵၼ်တေႉ ၽိူမ်ႉထႅမ်ၼမ်ႉၵႂၢမ်းမၼ်းလႆႈယူႇ ၵူၺ်းၵႃႈဢမ်ႇယႃႉၶေႃႈၵႂၢမ်းဢၼ်ႁဝ်းၶႂ်ႈသိုဝ်ႇလႄႈ ပိူင်တႅမ်ႈလိၵ်ႈသိုဝ်ႇလႂ်သိုဝ်ႇၼၼ်ႉၵေႃႈဢမ်ႇမိူၼ်ၵၼ် တေလႆႈၸွမ်းပိူင်တႅမ်ႈၶၢဝ်ႇဢၼ်မီးဝႆႉလႄႈ လွင်ႈၵၢင်ၸႂ်ဢၼ်မီးဢၼ်ၶႂ်ႈသိုဝ်ႇဢွၵ်ႇမွၵ်ႇၼႄၼၼ်ႉၵေႃႈ ဢမ်ႇၸၢင်ႈသႂ်ႇၸွမ်းလႆႈ ယွၼ်ႉပဵၼ်သိုဝ်ႇတၢင်ၵူၼ်းတင်းၼမ်တေလႆႈလူဢၢၼ်ႇ တေလႆႈႁူႉလွင်ႈပိူင်ပဵၼ်တေႉမီးတေႉမၼ်းယူႇၼၼ်ႉယဝ်ႉ။
ၵွမ်ႉၶၢဝ်ႇဢွၼ်ႇမွၵ်ႈ သွင်သၢမ်ပႅၵ်ႈၵူၺ်းၼၼ်ႉ ၶႃႈလႆႈတႅမ်ႈတင်းဝၼ်း လႄႈ ႁူဝ်သမ်ႉပေႃးၶႆႈယူႇယဝ်ႉ၊ ဢမ်ႇႁူႉတေလႆႈတႄႇသိုပ်ႇၵႂၢမ်းမၼ်းၸိူင်ႉႁိုဝ် တင်းမႆႈတင်းလိူတ်ႇ တွင်ႉၶႃႈပေႃးၶူၼ်ႉတူၼ်ႉႁၢၵ်ႈဢွၵ်ႇမႃးယဝ်ႉၼႃႇ။
သိုပ်ႇလူထႅင်ႈတွၼ်ႈတေမႃးၶႃႈ
