ၼႂ်းဝၼ်းႁဵတ်းၵၢၼ် ၵူၼ်းၵေႃႈဢွၼ်ၵၼ်မႃးၸေးယဝ်ႉလႄႈ မိူဝ်ႈၽွင်းၼင်ႈၵိၼ်ၶဝ်ႈဝၼ်းႁူမ်ႈမူႇၵၼ်ယူႇၼၼ်ႉ လၢဝ်မိူင်းၵေႃႈတူၺ်းၼႃႈၶႃႈသေ
“မိူဝ်ႈၶမ်ႈပီမႂ်ႇ ပီႈၶမ်းၸိုၼ်ႈႁွင်ႉၵႂၢမ်းဝၢၼ်ၼႃႇမေႃႉ”
“တေႉႁႃႉ ႁၢင်ႈၶႃႈဢမ်ႇလႆႈငိၼ်းလႃႇ”
“မႂ်းယႃႇလၢတ်ႈတိၵ်းတိၵ်းလူး..” ၼႃႈမၼ်းသမ်ႉပေႃးလႅင်ဝၢၼ်းဝၢၼ်းယဝ်ႉ။
ၶဝ်ၸိူဝ်းၼၼ်ႉၵေႃႈ တူၺ်းၼႃႈမၼ်းသေယုမ်ႉယူႇၸုတ်းၵုတ်း မီးၶႃႈၵူၺ်းဢမ်ႇႁူႉလွင်ႈပိူၼ်ႈ ၶႃႈတမ်ႉဢမ်ႇႁူႉဝႃႈၶႃႈတၼ်းမဝ်းၵႂႃႇမိူဝ်ႈလႂ် တၼ်းထိုင်တီႈၼွၼ်းၸိူင်ႉႁိုဝ် တေႃႇထိုင်မိူဝ်ႈလဵဝ်ၵေႃႈယင်းဢမ်ႇတွင်းၵွၼ်ႇယဝ်ႉ။
ထိုင်မႃးထႅင်ႈဝၼ်း ၶႃႈၶဝ်ႈလုမ်းမႃး မီးပီႈလၢဝ်မိူင်းလႄႈၶမ်းၸိုၼ်ႈၵူၺ်း တီႈၼႂ်းလုမ်းၼၼ်ႉၵေႃႈ ပီႈလၢဝ်မိူင်းပိုတ်ႇၽုၺ်ႇၵႂၢမ်းၵျေႃႇၵျေႃႇယူႇႁင်းမၼ်း။
“ၵျေႃႇၵျႃႉလႃႇပီႈ မီးၶၢဝ်ႇလီသင်လႃႇမိူဝ်ႈၼႆႉ တိူဝ်ႉထီႇႁႃႉ”
“လူမ်းလီၵူၺ်း လီလိူဝ်သေတိူဝ်ႉထီႇယဝ်ႉ”
ယၢမ်းၼၼ်ႉ မၼ်းၵေႃႈၵႂႃႇတဵၵ်းၽဵင်းၵႂၢမ်းၼိူဝ် YouTube ဢၼ်မီးၸၢႆးဢွင်ႇထီးၶမ်းႁွင်ႉဝႆႉဝႃႈ “ၼွင်ႉၸၢမ်ႁွမ်” ၼႆလႄႈ သၢႆတႃမၼ်းၵေႃႈယၵ်ႉတူၺ်းပီႈၶမ်းၸိုၼ်ႈယူႇ၊ ပီႈၶမ်းၸိုၼ်ႈၼၼ်ႉၵေႃႈ ဝၢႆႇတူၺ်းမၼ်းမႃးလူၺ်ႈသီၼႃႈဢမ်ႇႁၢၼ်ႉၸႂ်သေ ဢမ်ႇလႆႈတူၺ်းၼႃႈၶႃႈသေဢိတ်း မိူၼ်ၶႃႈၵေႃႈလႆႈဢၢႆမၼ်းယူႇၽွင်ႈ၊ မိူၼ်တွင်းလႆႈမႃးဢိတ်းၼိုင်ႈ ငိၼ်းသဵင်ၵူၼ်းႁွင်ႉၵႂၢမ်းႁူဝ်ၼႆႉယူႇ မိူဝ်ႈၶမ်ႈပီမႂ်ႇၼၼ်ႉ။
ၶႃႈၵေႃႈႁဵတ်းမိူၼ်ဢမ်ႇသူၼ်ၸႂ်သေ လၢတ်ႈယွၵ်ႇပီႈလၢဝ်မိူင်း “ပီႈယွၼ်းႁၵ်ႉၶႃႈယူႇႁႃႉၼႆႉ”
ပီႈလၢဝ်မိူင်းယုမ်ႉယုမ်ႉသေ “ပေႃးယွၼ်းႁၵ်ႉၸွင်ႇသမ်ႉတေႁပ်ႉတၢင်းႁၵ်ႉပီႈၼႄႇ”
“ပေႃးႁပ်ႉသမ်ႉတေဝႃႈပဵၼ်ၸူႉၵၼ်ၼႆႁေယဝ်ႉၶႃႈယူဝ်ႉ”
“ၸႂ်ႈၽႅဝ်လေႃႇ..”
သီၼႃႈပီႈၶမ်းၸိုၼ်ႈၼၼ်ႉတႄႉ ဢမ်ႇၵီႈဢမ်ႇသိူဝ်းသေဢိတ်းယဝ်ႉ။
“ပီႈဢဝ်ၵႂႃႇၶိုၼ်းသေလႄႈ ၶႃႈမီးၵေႃႉႁၵ်ႉယဝ်ႉ”
“ၵေႃႈယဝ်ႉလႄႈ..ၼွင်ႉဢမ်ႇယၢမ်ႈငိၼ်းႁႃႉ ႁၵ်ႉတေႉဢမ်ႇပေႉၵေႃႉယူႇၸမ်ၼႆ”
“ၼၼ်ႉပဵၼ်တွၼ်ႈတႃႇၵူၼ်းဢမ်ႇမီးသႅတ်ႉၸႃႇတေႃႇၵေႃႉႁၵ်ႉၶဝ်ၵူၺ်းဢေႃႈ”
“မိူၼ်ၺႃးလႃႇဝႆႉၸိူင်ႉႁိုဝ်ဢမ်ႇႁူႉ ၵွႆႈယူႇၵွႆႈလၢတ်ႈၼမ်မႃးတိၵ်းတိၵ်းယဝ်ႉၸၢမ်ႁွမ်ၼႆႉ”
“ၶႃႈၵေႃႈလႆႈမႃးလဵပ်ႈႁဵၼ်းတီႈပီႈၶဝ်ၵူၺ်း”
“ၸႂ်ႈဢိူဝ်ႈၼေႃႈ မိူဝ်ႈတႄႇမႃးတမ်ႉပေႃးဢမ်ႇႁတ်းလၢတ်ႈတေႃႇၽႂ်တေႉလူင်”
ပီဢွၼ်တၢင်းသုတ်း ပဵၼ်ပီဢၼ်ၶႃႈလႆႈႁဵတ်းၵၢၼ်ၵျေႃႇလိူဝ်ပိူၼ်ႈၵေႃႈဝႃႈလႆႈယဝ်ႉ၊ မီးၽူႈဢွၼ်ႁူဝ်လီ ၵူၼ်းႁဵတ်းၵၢၼ်ၵေႃႈၶဝ်ႈတိၼ်ၶဝ်ႈမိုဝ်းၵၼ် မေႃၸွႆႈမေႃထႅမ်ၵၼ်လႄႈ ၶႃႈၵေႃႈဢမ်ႇထၢင်ႇဝႃႈ ၶႃႈတေမီးဝၼ်းလႆႈထူပ်းႁၼ်သဵၼ်ႈတၢင်း ၵၢၼ်ပိုၼ်ၽႄႈလိၵ်ႈလၢႆးလႆႈ မိူဝ်ႈမီး TN ၸိူင်းတႆး ၵပ်းသိုပ်ႇၶဝ်ႈမႃးလႄႈ လႆႈပဵၼ်သုၼ်ႇၼိုင်ႈ တွၼ်ႈတႃႇဝႅပ်ႉသၢႆႉ tainovel.com ၵႂႃႇ၊ မၼ်းပဵၼ်ႁႅင်းဢီးလႄႈ မၼ်းပဵၼ်ဢွင်ႈတီႈဢၼ်ၶႃႈတေပိုတ်ႇၼႄလႆႈတၢင်းသူင်ၶႃႈ ဢၼ်မီးယူႇ လွင်ႈဢၼ်ၶႃႈၶႂ်ႈႁဵတ်းၶႂ်ႈပဵၼ်ၼၼ်ႉယဝ်ႉ။
ၵူၺ်းၵႃႈမိူဝ်ႈၶဝ်ႈမႃးၼႂ်းပီထီႉသွင် ပီႈသႅင်ၼူၼ်းၵေႃႈ ဢမ်ႇယူႇယဝ်ႉလႄႈ တေႇၼႃႈႁိူၼ်းသေဢွၵ်ႇၵႂႃႇပႅတ်ႈယဝ်ႉ၊ ပီႈၶိူဝ်းလိုဝ်ႈဝႆႉၸူဝ်ႈၶၢဝ်း၊ တီႈၶႃႈႁဵတ်းၵၢၼ်ၼႆႉ သမ်ႉဝႃႈမီးငိုၼ်းလိူၼ်သေတႃႉ မၼ်းဢမ်ႇလႆႈၵုမ်ႇထူၼ်ႈပဵင်းပေႃး တႃႇလဵင်ႉၼႃႈႁိူၼ်းလႆႈလႄႈ ပေႃးယူႇလႆႈမွၵ်ႈတႃႇတူဝ်ၸဝ်ႈၵဝ်ႇၼၼ်ႉၵူၺ်း။
ဢမ်ႇမီးပီႈသႅင်ၼူၼ်းယဝ်ႉ ပီႈၶမ်းၸိုၼ်ႈၵုမ်းႁဝ်းဝႆႉထႃႈ လႄႈ မီးၽူႈၸတ်းၵၢၼ်ႁဝ်းတူၺ်းထိုင်ၵႂႃႇ၊ ၼႂ်းပီၼႆႉၵေႃႈ မီးၵူၼ်းမႂ်ႇၶဝ်ႈမႃးထႅင်ႈသွင်ၵေႃႉ ၵေႃႉၼိုင်ႈၵေႃႈၸွႆႈတီႈပီႈၶမ်းၶွင်ႇ၊ ၵေႃႉၼိုင်ႈသမ်ႉၸွႆႈတီႈပီႈလၢဝ် ၵူၺ်းၵႃႈ ၵူၼ်းတႅမ်ႈၶၢဝ်ႇႁဝ်းႁၢႆၵႂႃႇၵေႃႉၼိုင်ႈ ယင်းဢမ်ႇပႆႇမီးၽႂ်မႃးတႅၼ်း ၶၢဝ်ႇၼွၵ်ႈမိူင်းဢၼ်ပီႈၶိူဝ်းတႅမ်ႈတႃႇသေႇၼၼ်ႉၵေႃႈ လႆႈႁၢႆၵႂႃႇၼႂ်းသိုဝ်ႇၶၢဝ်ႇႁဝ်းယဝ်ႉ။
ထိုင်မႃးၵၢင်ပီ ပီႈပၢင်ႇၶမ်း ဢၼ်ပဵၼ်ၵူၼ်းယိပ်းၵွင်ႈထႆႇလႄႈ ၵူၼ်းတႅမ်ႈၶၢဝ်ႇၼၼ်ႉၵေႃႈ သမ်ႉမႃးဢမ်ႇယူႇလီသေ လႆႈၶိုၼ်ႈႁူင်းယႃထႅင်ႈ။ ပဵၼ်ၽွင်းဢၼ်သိုဝ်ႇၶၢဝ်ႇႁဝ်းသုတ်ႉထွႆၵႂႃႇႁႅင်းတႄႉတႄႉ ပဵၼ်ၽွင်းငဝ်းလၢႆးဝၢၼ်ႈမိူင်းသုၵ်ႉသၵ်ႉလႄႈ လႅင်ႇၶၢဝ်ႇဢၼ်မီးယူႇၼႂ်းပိုၼ်ႉတီႈ ငဝ်းလၢႆးသုၵ်ႉသၵ်ႉၸိူဝ်းၼၼ်ႉၵေႃႈ ဢမ်ႇႁတ်းသူင်ႇၶေႃႈမုၼ်းသေ ၵမ်ႈၽွင်ႈၵေႃႈႁၢႆၵႂႃႇပႅတ်ႈထႅင်ႈ၊ လိူဝ်သေၼၼ်ႉ ၵၢၼ်ၵပ်းသိုပ်ႇၵေႃႈသမ်ႉဢမ်ႇလီမိူၼ်ၼင်ႇၵူႈပွၵ်ႈပွၵ်ႈယဝ်ႉ။
ၶႃႈဝူၼ်ႉဝႃႈ ႁဵတ်းၵၢၼ်ၵေႃႈဢမ်ႇမိူၼ်ၼင်ႇၵူႈပွၵ်ႈယဝ်ႉလႄႈ ၵူႈဝၼ်းၵူႈဝၼ်း ယူႇၸွမ်းၶၢဝ်ႇ လွင်ႈဢၼ်ဢမ်ႇလီ၊ ၶၢဝ်ႇလွင်ႈဢၼ်လီလီၼႆႉ ဢမ်ႇပေႃးသူမီး သင်ဢမ်ႇၸႂ်ႈလွင်ႈပွႆးလွင်ႈလၢမ်း။ ၶႃႈၵေႃႈ ပေႃးဢမ်ႇၸႂ်ႈၵၢၼ်ၶႃႈ ပုၼ်ႈၽွၼ်းၶႃႈ ၶႃႈဢမ်ႇသုၵ်ႉၸွမ်းယဝ်ႉလႄႈ သုတ်ႉထွႆဢွၵ်ႇႁၢင်ႇၵၢၼ်ၶၢဝ်ႇၵႂႃႇသေ ဢမ်ႇတိတ်းတၢမ်း ဢမ်ႇသူၼ်ၸႂ်မၼ်းယဝ်ႉလႄႈ ပေႃးမီးၶၢဝ်းယၢမ်းၵေႃႈ ၶႃႈတေသူၼ်ၸႂ်လွင်ႈၵၢၼ်တႅမ်ႈလိၵ်ႈၶႃႈၵူၺ်းယဝ်ႉ။
ဝၼ်းမၼ်းႁိုင်မႃး ဢၼ်ႁဝ်းႁွင်ႉဝႃႈၵၢၼ်ၶၢဝ်ႇယူႇၼႆႉၵေႃႈ မၼ်းဢမ်ႇပဵၼ်တူဝ်လႆႈယဝ်ႉ။
ထိုင်မႃးပီထီႉသၢမ် ပီႈၶမ်းၶွင်ႇလႄႈ ပီႈၶမ်းၸိုၼ်ႈၵေႃႈ တေႇၼႃႈႁိူၼ်းၵၼ်သေ မီးလုၵ်ႈမႃးယဝ်ႉလႄႈ တွၼ်ႈတႃႇၼႃႈႁိူၼ်းၶႃၼၼ်ႉၵေႃႈ ၵေႃႉၼိုင်ႈသမ်ႉလူဝ်ႇႁႃလဵင်ႉၼႃႈႁိူၼ်း ထႅင်ႈၵေႃႉၼိုင်ႈၵေႃႈလူဝ်ႇလဵင်ႉလုၵ်ႈၼႆလႄႈ ဢမ်ႇၸၢင်ႈႁဵတ်းၵၢၼ်ယဝ်ႉ။
ၶႃႁဵတ်းႁိုဝ်တႄႇၼႃႈႁိူၼ်းၵၼ်ၼႆၼၼ်ႉၵေႃႈ ၶႃႈၼွၼ်းႁွင်ႈလဵဝ်ၵၼ်တင်းပီႈၶမ်းၶွင်ႇလႄႈ လႆႈႁူႉဝႃႈပီႈၶမ်းၶွင်ႇလၵ်ႉၵျိူၵ်ႈပီႈၶမ်းၸိုၼ်ႈမႃးႁိုင်ၼႃႇယဝ်ႉသေ ၶႃႈတင်းပီႈလၢဝ်မိူင်းၵေႃႈ ၵႆႉယဝ်ႉၵႆႉသူၼ်းၾႆးမၼ်းတိၵ်းတိၵ်းလႄႈ ၵူၼ်းၼႂ်းလုမ်းႁဝ်းၵေႃႈၵမ်ႉထႅမ်ၵၼ်သေ ဢဝ်ပဵၼ်ၸူႉၵၼ်ၵႂႃႇ တေႃႇပေႃးပဵၼ်ႁိူၼ်းႁူမ်ႈလဵဝ်ၵၼ်မႃးၼၼ်ႉယဝ်ႉ။
ဝၢႆးသေသွင်ၶႃဢမ်ႇယူႇယဝ်ႉ ၼႂ်းႁွင်ႈပၢင်ၵုမ် မီးၵူၼ်းလုမ်းႁဝ်းၶွၼ်ႈတုမ်ၵၼ် ဢမ်ႇပူၼ်ႉသေမွၵ်ႈ 7 ၵေႃႉ မီးၶႃႈ၊ ပီႈလၢဝ်မိူင်း၊ ပီႈလၢဝ် ၊ ပီႈပၢင်ႇၶမ်း၊ ၼွင်ႉသၢႆလႅတ်ႇ၊ ၼွင်ႉဢိင်ႇ လႄႈ ၽူႈၸတ်းၵၢၼ်ႁဝ်း ဢုပ်ႇၵၼ်လွင်ႈသိုဝ်ႇႁဝ်း တေသိုပ်ႇၵႂႃႇတၢင်းၼႃႈၸိူင်ႉႁိုဝ် ဢမ်ႇၼၼ်ၵေႃႈတေပေႃးမွၵ်ႈၼႆႉၵူၺ်းယဝ်ႉ။
ဝၢႆးသေၶၢဝ်ႇႁဝ်းတူၵ်းၵႂႃႇယဝ်ႉၼႆ ငိုၼ်းလိူၼ်ႁဝ်းၵေႃႈ ဢမ်ႇလႆႈမိူၼ်ၵဝ်ႇယဝ်ႉလႄႈၵႆႉၵႆႉၶၢတ်ႇမႃးလၢႆလိူၼ်ၼႃႇသေ ယွၼ်ႉပိူဝ်ႈႁဝ်းယင်းတိုၵ်ႉမီးတီႈယူႇ ယွၼ်ႉပိူဝ်ႈႁဝ်းယင်းပႆႇဢိုပ်းၶဝ်ႈ တိုၵ်ႉယူႇလႆႈယူႇလႄႈ ႁႅင်းၸႂ်ဢၼ်ဝႃႈႁဝ်းသူႈၵႂႃႇၸွမ်းၵၼ် ထိင်းသိမ်းမၼ်းဝႆႉၵူၺ်း၊ ဝၼ်းမိူဝ်ႈၼႆႉတႄႉ ၽႂ်ၵေႃႈတေႃႈဢမ်ႇၶႂ်ႈသိုပ်ႇသူႈယဝ်ႉႁိုဝ် ၼႃႈတႃၽႂ်ၵေႃႈဢမ်ႇလီသေၵေႃႉယဝ်ႉ။
ၼႂ်းလုမ်းႁဝ်း ၵူၼ်းတႅမ်ႈၶၢဝ်ႇတေႉတေႉ မီးၶႃႈလႄႈတင်း ပီႈပၢင်ႇၶမ်း ဢၼ်ပၢႆးယူႇလီဢမ်ႇပေႃးၶႅမ်ႉၼၼ်ႉသေ မၢင်ပွၵ်ႈပေႃးမၼ်းတူၺ်းလိၵ်ႈၼမ်ၼႃႇ ႁူဝ်မၼ်းသမ်ႉၵႆႉၶႆႈၼႃႇသေ ဢမ်ႇႁဵတ်းလႆႈတေႉတေႉ ဝႆႉၸႂ်ၵၼ်ဝႃႈ ႁဵတ်းၵၢၼ်ႁူမ်ႈၵၼ်မႃးႁိုင်ယဝ်ႉၼႆသေ ပၼ်မၼ်းလိုဝ်ႈၽွင်ႈၸွႆႈၽွင်ႈၼၼ်ႉယဝ်ႉ။ ၵူၺ်းၵႃႈ ၵူၼ်းတတ်းတေႃႇလႄႈ ၵူၼ်းလၢတ်ႈၶၢဝ်ႇတႄႉၵေႃႈမီးယူႇသွင်ၵေႃႉသွင်ၵေႃႉယဝ်ႉ၊ မၢင်ပွၵ်ႈ ပေႃးမီးၵၢၼ်ၵေႃႈ ၵႃႈလႆႈႁႂ်ႈၶဝ်ၸွႆႈၵႂႃႇယူႇ။
ၼႂ်းၸႂ်တႄႉဝူၼ်ႉယူႇဝႃႈ ၶႃႈတေလႆႈႁႃၵၢၼ်မႂ်ႇယဝ်ႉႁိုဝ်။ ၵူၺ်းၵႃႈ ဝၼ်းမိူဝ်ႈၼႆႉၵေႃႈ ၽူႈၸတ်းၵၢၼ်ႁဝ်းတေထွၼ်တူဝ်သေ တေမီးၽူႈၸတ်းၵၢၼ်မႂ်ႇမႃးတႅၼ်းၵႂႃႇလႄႈ ဢၼ်ၶၢဝ်ႇႁၢႆႉလိူဝ်ပိူၼ်ႈၵေႃႈ ၵၢၼ်ၶၢဝ်ႇၼႆႉႁႂ်ႈၶႃႈၵေႃႉဢဝ်ပုၼ်ႈၽွၼ်းၼႆထႅင်ႈ။
တႄႇဢဝ်ဝၼ်းၼၼ်ႉမႃး ၵၢၼ်ၶႃႈၵေႃႈၼမ်မႃးလႄႈ ၶၢဝ်းယၢမ်းတႅမ်ႈလိၵ်ႈၵေႃႈယွမ်းလူင်းႁႅင်းတႄႉတႄႉ ဢဝ်ၶႃႈဢမ်ႇလႆႈတႅမ်ႈမၼ်းမႃး ႁိုင်ပဵၼ်လၢႆလိူၼ်ယဝ်ႉ၊ ၸဵမ်မိူဝ်ႈၽူႈၸတ်းၵၢၼ်ၵေႃႉမႂ်ႇမႃးၵေႃႈ ၼွင်ႉသွင်ၵေႃႉဢၼ်ၶဝ်ႈမႃးမႂ်ႇၼၼ်ႉ လႆႈဢွၵ်ႇၵႂႃႇပႅတ်ႈယဝ်ႉ၊ ၵိုတ်းၵႅၼ်ႇႁဝ်းၵူၼ်းၵဝ်ႇၼၼ်ႉၵူၺ်း။
မၢင်ပွၵ်ႈၵေႃႈဝူၼ်ႉယူႇဝႃႈ ၵွပ်ႈသင်လႄႈၶႃႈယင်းတိုၵ်ႉယူႇလႃႇ ၵွပ်ႈသင်လႄႈၶႃႈဢမ်ႇဢွၵ်ႇၵႂႃႇႁေ ၶႃႈၵျိူၵ်ႈမၼ်းယူႇတေႉႁႃႉ ၶႃႈၵေႃႈဢမ်ႇလႆႈၵျိူၵ်ႈမၼ်းသေၵႃႈႁိုဝ်လူး ၶႃႈယင်းတိုၵ်ႉသေလၢႆမၼ်းယူႇႁႃႉ၊ ၽူႈၸတ်းၵၢၼ်ၵေႃႉၼႆႉၵေႃႈ ဢမ်ႇမိူၼ်ၵေႃႉၵဝ်ႇၼၼ်ႉသေဢိတ်း မၼ်းပဵၼ်ၽူႈၸတ်းၵၢၼ်ႁဝ်းႁႃႉ မၼ်းပဵၼ်ၽူႈၵိူဝ်းၵုမ်ႁဝ်းႁႃႉ ႁဝ်းမီးပၼ်ႁႃသင်ၵေႃႈ ၸွႆႈသင်ဢမ်ႇလႆႈ၊ ႁဵတ်းသင်ပၼ်ႁဝ်းဢမ်ႇလႆႈ မၼ်းမႃးႁဵတ်းသင်လႃႇ ၶႃႈဝႃႈၶႃႈတေဢွၵ်ႇယဝ်ႉ။
မိူဝ်ႈယၢမ်းသုၵ်ႉသၵ်ႉယူႇၸိူင်ႉၼႆ ၵေႃႉႁၵ်ႉၶႃႈ ဢၼ်ပဵၼ်ၸူႉၵၼ်မႃးၶၢဝ်းတၢင်းသီႇပီပၢႆၼၼ်ႉၵေႃႈ ယွၼ်းၽႄတၢင်းထႅင်ႈ မၼ်းပဵၼ်ၽွင်းၵဵဝ်ႇဢူၼ်ႈဢၼ်ဝႃႈႁႃႉတေႃႈ လွင်ႈတၢင်းဢၼ်ႁဝ်းၽႄတၢင်းၵၼ်ၵႂႃႇ ၸွင်ႇႁူႉၶႃႈႁိုဝ် မၼ်းဝႃႈ တႃႇႁႃးသွင်ၵေႃႉတေၵႂႃႇၸွမ်းၵၼ်ၼၼ်ႉ ဢမ်ႇပဵၼ်လႆႈယဝ်ႉလႄႈ သဵၼ်ႈတၢင်းႁဝ်း မၼ်းသုတ်းတိူၵ်ႈၵႂႃႇတီႈဝႃႈ မၼ်းၶႂ်ႈတေႇၼႃႈႁိူၼ်းယဝ်ႉ ၶႃႈၼၼ်ႉဢမ်ႇမီးပၼ်ၶၢဝ်းယၢမ်းမၼ်း လႄႈ ၶႃႈၵေႃႈဢမ်ႇမီးဢၼႃႇၵၢတ်ႈ ၵုမ်ႇႁဵတ်းၵၢၼ်ဢၼ်ဢမ်ႇလႆႈငိုၼ်းလႆႈတွင်းသင်၊ ၵုမ်ႇတႅမ်ႈလိၵ်ႈဢၼ်ဢမ်ႇမီးၵူၼ်းတူၺ်းၵူၼ်းပၼ်ႁႅင်းသင်သေ သမ်ႉဢမ်ႇလႆႈငိုၼ်းလႆႈတွင်းသင်ထႅင်ႈ။
ဢၼ်မၼ်းဝႃႈမႃးၵေႃႈ ၸႂ်ႈယူႇၵူႈၶေႃႈယဝ်ႉ တွၼ်ႈတႃႇၸၢတ်ႈပၢၼ်မၼ်းတေလီ ၶႃႈၵေႃႈဢမ်ႇထဵင်လႄႈ ယိၼ်းၸူမ်းၶၢဝ်းယၢမ်းၸိူဝ်းပူၼ်ႉမႃး ဢၼ်မၼ်းယဵၼ်ႉၵၼ်ႈသေယူႇၸွမ်းၶႃႈမႃး။ မၼ်းဢမ်ႇလႆႈပွႆႇၽႃႈၶႃႈၵႂႃႇ ပဵၼ်ၶႃႈၵေႃႉဢၼ်ဢမ်ႇမေႃထိင်းသိမ်းမၼ်းဝႆႉလႄႈ ၶႃႈပွႆႇႁႂ်ႈမၼ်းဢွၵ်ႇၵႂႃႇၵူၺ်း သမ်ႉဝႃႈတိူဝ်ႉၸႂ်ယူႇၵေႃႈ ယင်းဢမ်ႇတၼ်းႁွင်ႉႁႆႈၵွၼ်ႇယဝ်ႉ။ ဝၼ်းၼၼ်ႉ ႁဝ်းၵူၼ်းတီႈလုမ်းၵေႃႈ ၸူဝ်းၵၼ်ဢွၵ်ႇၶၢဝ်းတၢင်း ၵႂႃႇတူၺ်းဢွင်ႈတီႈပိူၼ်ႈတေႁဵတ်းပီမႂ်ႇတႆးလႄႈ ၽိတ်ႈမွၵ်ႇႁႂ်ႈၸုမ်းႁဝ်းၵႂႃႇၸွႆႈၶဝ်ၼႆယဝ်ႉ၊ ၵူၼ်းၵေႃႈဢမ်ႇၼမ် ၵူၺ်းၵႃႈ ၵၢၼ်ပိူၼ်ႈၵေႃႈပဵၼ် တႃႇၵၢၼ်ႁဝ်းတေႁဵတ်းၶၢဝ်ႇလႆႈၼႆလႄႈ ဢွၼ်ၵၼ်ၵႂႃႇၸွမ်းၵၼ်မူတ်းယဝ်ႉ။
ထိုင်မႃးဝၼ်းပွႆးတေႉတေႉယဝ်ႉၼၼ်ႉ လႆႈဝႃႈပဵၼ်ဝၼ်းဢၼ်ၶႃႈလႆႈဢွၵ်ႇႁဵတ်းၵၢၼ်တၢင်းၼွၵ်ႈ ပဵၼ်ပွၵ်ႈဢွၼ်တၢင်းသုတ်းလႄႈ ၶႃႈၵေႃႈပေႃးဢမ်ႇႁူႉယဝ်ႉ တေတႄႇတီႈလႂ် တေႁဵတ်းၸိူင်ႉႁိုဝ် ႁဵတ်းၽိတ်းႁဵတ်းၽူၼ်ၵႂႃႇမူတ်း ၸႂ်ၵေႃႈဢမ်ႇၸပ်းတူဝ်မႃးယဝ်ႉ လိူၵ်ႈလိူၵ်ႈသမ်ႉႁၼ်မႅၼ်ႈၺႃးၸူႉႁၵ်ႉၵဝ်ႇၶႃႈ ဢၼ်တိုၵ်ႉၶၢတ်ႇၵၼ်ၵႂႃႇမိူဝ်ႈဝႃးၵူၺ်းၼၼ်ႉ တွႆးသၢဝ်မႃးယူႇတီႈၼႂ်းပွႆးၼၼ်ႉထႅင်ႈ သမ်ႉဝႃႈပဵၼ်ၸိူင်ႉၼၼ်ၵေႃႈ ၼႂ်းၸႂ်ၼႆႉဢိုၵ်ႉၼိုၵ်ႉမႃးယူႇၵူၺ်း။
ၶႃႈၵေႃႈႁဵတ်းမိူၼ်ဢမ်ႇႁၼ်သေ တူၺ်းၶၢမ်ႈပူၼ်ႉၵႂႃႇ သိုပ်ႇႁဵတ်းၵၢၼ်ၶႃႈၵႂႃႇ၊ ၶႃႈၵႂႃႇႁဵတ်းၶၢဝ်ႇၼႆၸႂ်ႈယူႇႁႃႉ ၵူၺ်းၵႃႈၶႃႈတၢင်ႇၶၢဝ်ႇ လိုမ်းတၢင်ႇပႃးလိၵ်ႈမၼ်း ထိုင်တီႈၽူႈၸတ်းၵၢၼ်ပေႃးလႆႈသိုပ်ႇၾူၼ်းပွင်ႉမႃးၼၼ်ႉၼႃႇ။
ဝၼ်းမႃးႁဵတ်းၵၢၼ်ၵေႃႈ တင်းတိုၵ်ႉမႃးပွင်ႉၶႃႈထႅင်ႈယူႇ ႁဵတ်းၽိတ်းပွၵ်ႈၼိုင်ႈ လၢၵ်ႈယၢဝ်းပဵၼ်လိူၼ် ပေႃးတေၵႂႃႇႁဵတ်းၵၢၼ်ထႅင်ႈၵေႃႈ တိုၵ်ႉတူၵ်ႇသမ်ႉထႅင်ႈယူႇ။
သိုပ်ႇလူတွၼ်ႈတေမႃးၶႃႈ
