မၼ်းမိူၼ်ၶႃႈလႆႈတႄႇမႂ်ႇမူတ်းယဝ်ႉ ၶႃႈဢမ်ႇႁူႉဝႃႈၶႃႈတေလႆႈႁဵတ်းၸိူင်ႉႁိုဝ် ၶႃႈႁဵတ်းလႆႈယူႇႁ၊ ၶႃႈႁိူဝ်ႉတေႉယဝ်ႉ ၶႃႈဢမ်ႇၶႂ်ႈႁဵတ်းယဝ်ႉ ၶႃႈဢွၵ်ႇၵၢၼ်ၵႂႃႇလီႁိုဝ် မိူဝ်ႈၼၼ်ႉၶႃႈဝူၼ်ႉၸိူင်ႉၼၼ်ယဝ်ႉ၊ ၽိူဝ်ႇၶႃႈမႃးၼင်ႈ
“မိူဝ်ႈၼႆႉလိုဝ်ႈသေလႄႈ” ပီႈၶမ်းၸိုၼ်ႈလၢတ်ႈတီႈၶႃႈ
ၶႃႈၸင်ႇတေယၵ်ႉတူၺ်းၼႃႈမၼ်းလီလီသေ ဝူၼ်ႉယူႇၼႂ်းၸႂ် “မၼ်းမီးၽႅၼ်သင်ဝႃႈ” ၶႃႈၵေႃႈဢမ်ႇႁတ်းလၢတ်ႈဢွၵ်ႇၼႂ်းသူပ်းၵွၼ်ႇ။
“ၶႃႈတေႁဵတ်းႁႂ်ႈမၼ်းယဝ်ႉယဝ်ႉၵွၼ်ႇၶႃႈ..”
“ၼွင်ႉ! ပီႈတေၵႂႃႇသိုဝ်ႉၼမ်ႉဝၢၼ် တေၵႂႃႇၸွမ်းၼႄႇ” ပီႈသႅင်ၼူၼ်းလၢတ်ႈၸူးၶႃႈ။
“ၵႂႃႇၸွမ်းပီႈသႅင်ၼူၼ်းလႄႈ” ပီႈၶမ်းၸိုၼ်ႈၵေႃႈ ဢဝ်ငိုၼ်းမၼ်းပၼ်ၶႃႈသေ ႁွင်ႉလၢတ်ႈၸူးၵူၼ်းၼႂ်းလုမ်းယဝ်ႉ “မိူဝ်ႈၼႆႉၶႃႈလဵင်ႉ ၽႂ်တေၵိၼ်ၼမ်ႉသင်ၵေႃႈလၢတ်ႈလႄႈၼႃႈ”
ၵူၼ်းၼႂ်းလုမ်းဢွၼ်ၵၼ်ယၵ်ႉတူၺ်းၼႃႈမၼ်းမူတ်းသေ ပီႈၶိူဝ်းၸင်ႇဝႃႈ
“ပၢၵ်ႇဝၼ်းႁဵင်ပီ ႁဵတ်းၵၢၼ်မႃးၸွမ်းၵၼ် ဢမ်ႇတွၼ်ႉလႆႈငိၼ်းၵႂမ်းၶေႃႈၼႆႉသေပွၵ်ႈ ၶီႈထီႇပေႃးတၢၼ်ႇမၼ်းၼၼ်ႉ ႁတ်းဢဝ်ငိုၼ်းဢွၵ်ႇလဵင်ႉပိူၼ်ႈသေႁႃႉ”
“ၶိင်းၼၼ်ႉမၼ်းၵိၼ်သင်ၽိတ်းလႃႇ” ပီႈၶမ်းၶွင်ႇလၢတ်ႈ။
“ၶႃႈၵူၺ်းဢိူဝ်ႈႁူႉ” လၢဝ်မိူင်း ယုမ်ႉယုမ်ႉသေယၵ်ႉတူၺ်းၼႃႈၶႃႈယူႇ။
“သိုဝ်ႉမႃးဢၼ်ၵႃႈၵႃႈမၼ်းၼၼ်ႉၼႃႈၼွင်ႉ” ပီႈၶိူဝ်းလၢတ်ႈတီႈၶႃႈ မိူၼ်လၢတ်ႈၶိတ်ႈပီႈၶမ်းၸိုၼ်ႈၼၼ်ႉယဝ်ႉ။
ၶႃႈၵေႃႈဢဝ်ငိုၼ်းသေၶီႇလူတ်ႉၵႂႃႇၸွမ်းပီႈသႅင်ၼူၼ်းယဝ်ႉ။
“ႁဵတ်းၵၢၼ်ပဵၼ်ႁိုဝ် ၸွင်ႇလႅပ်ႈႁဵတ်းလႆႈယူႇႁႃႉ ပေႃးဢမ်ႇလႆႈၵေႃႈ ပီႈတေၸွႆႈလၢတ်ႈပၼ်တီႈ ၶမ်းၸိုၼ်ႈဢိူဝ်ႈ”
“ၶႃႈဝႃႈတႅမ်ႈၶၢဝ်ႇမၼ်းယၢပ်ႇၼႃႇၶႃႈ”
“ၼွင်ႉတိုၵ်ႉတႅမ်ႈမိူဝ်ႈၼႆႉၵူၺ်းဢမ်ႇၸႂ်ႈႁႃႉ”
“ဢေႃႈ..”
“ပီႈၵေႃႈဝႃႈမၼ်းယၢပ်ႇမိူၼ်ၵၼ် မိူဝ်ႈပီႈတႄႇတႄႇတႅမ်ႈ ၶၢဝ်ႇႁူဝ်လဵဝ်ၵူၺ်း ပီႈတႅမ်ႈပဵၼ်သွင်ဝၼ်းၸင်ႇယဝ်ႉလႆႈယဝ်ႈ မိူဝ်ႈၼၼ်ႉ ပီႈတင်းဢမ်ႇပေႃးမေႃလိၵ်ႈတႆးလီလီလူးၵွၼ်ႇ တေႃႉတႄႉႁူႉပဵၼ်ၶေႃႈၵူၺ်း ပီႈပေႃးႁႆႈၵွၼ်ႇဢိူဝ်ႈ ပီႈပေႃးလႆႈလၢတ်ႈတီႈႁူဝ်ၼႃႈဝႃႈ ပီႈႁဵတ်းဢမ်ႇလႆႈ မၼ်းဝႃႈႁိုဝ်ႁင်းပီႈၸွင်ႇႁူႉၼႄႇ ၵဝ်ႁႂ်ႈမႂ်းမႃးတႃႇလၢတ်ႈဝႃႈၸိူင်ႉၼႆႁႃႉ မႃးယူႇတီႈၼႆႈသေလၢတ်ႈဝႃႈႁဵတ်းဢမ်ႇလႆႈၵေႃႈ ဢွၵ်ႇၵႂႃႇတီႈၼႆႈသေလႄႈ”
“ပီႈသမ်ႉႁဵတ်းႁိုဝ်ၶႃႈလႃႇ”
“ပီႈၵေႃႈဢွၵ်ႇၵႂႃႇတေႉဢိူဝ်ႈ..ၵူၺ်းၵႃႈ ၵူၼ်းတီႈႁဵတ်းၵၢၼ်ၶဝ်ႁွင်ႉပီႈဝႆႉၼၼ်ႉၼႃႇ”
“ပီႈၵေႃႈယူႇသေ”
“ဢိုမ်ႈ…ၶဝ်ၵေႃႈဝႃႈၶဝ်တေၸွႆႈပီႈၵူၺ်းၼႆၼၼ်ႉၼႃႇ ဢမ်ႇႁူႉဢၼ်လႂ်ၵေႃႈႁႂ်ႈထၢမ်ၶဝ် လႆႈဝႃႈၸွႆႈလႆႈၼမ်ယဝ်ႉ ၸွႆႈႁႂ်ႈပီႈတႅမ်ႈၶၢဝ်ႇယဝ်ႉဢမ်ႇၵႃး ၸွႆႈႁႂ်ႈပီႈမေႃႁတ်းယွၼ်းတၢင်းၸွႆႈထႅမ်ပိူၼ်ႈမႃးဢိူဝ်ႈ ၼွင်ႉဢမ်ႇမေႃၼႆၵေႃႈထၢမ်ပိူၼ်ႈလႆႈဢိူဝ်ႈၼႃႈ ဢမ်ႇၶႂ်ႈထၢမ်ၶမ်းၸိုၼ်ႈၵေႃႈ ထၢမ်ပီႈၵေႃႈလႆႈ၊ ထၢမ်ၽႂ်ၵေႃႈလႆႈတီႈၼႂ်းလုမ်းၼၼ်ႉ ဝႆႉမိူၼ်ပဵၼ်ပီႈပဵၼ်ၼွင်ႉၵၼ်ၵူၺ်း”
“ဢေႃႈ”
ပီႈသႅင်ၼူၼ်းၼႆႉ လႆႈဝႃႈပဵၼ်ပီႈၼၢင်းၶႃႈၵေႃႉၼိုင်ႈ ပဵၼ်ၵူၼ်းၵေႃႉဢၼ်ၶႃႈမိုတ်ႈဢွၼ်တၢင်းသုတ်း ၸဵမ်မိူဝ်ႈၶႃႈမႃးယူႇတီႈႁဵတ်းၵၢၼ်ၼႆႉယဝ်ႉ။
တီႈၼႂ်းလုမ်းၼၼ်ႉၵေႃႈ ပေႃးဝႃႈၵေႃႉလႂ်ဢမ်ႇပွင်ႇၸႂ်ၶေႃႈလႂ် ၽႂ်ႁူႉၸိူင်ႉႁိုဝ်ၼႆၵေႃႈ ၵႆႉၵႆႉႁွင်ႉထၢမ်ၵၼ်ယူႇတႃႇသေႇ၊ ဝၢႆးသေၶႃႈၵႂႃႇသိုဝ်ႉၼမ်ႉဝၢၼ်မႃးယဝ်ႉ တူၺ်းပိူၼ်ႈႁဵတ်းၵၢၼ်တေႉတေႉ ၸင်ႇတေႁၼ်ဝႃႈ ၽႂ်မီးတီႈဢမ်ႇပွင်ႇၸႂ်၊ တေၸႂ်ႉၶေႃႈၵႂၢမ်းၼႂ်းၶၢဝ်ႇၸိူင်ႉႁိုဝ် မီးၶေႃႈဢမ်ႇၸႅင်ႈလႅင်းၸိူဝ်းၼႆႉ တေၵႆႉၵႆႉႁွင်ႉထၢမ်ၵၼ်ယူႇတႃႇသေႇ။
ၶႃႈၵေႃႈဢမ်ႇႁူႉတေတႄႇတႅမ်ႈၸိူင်ႉႁိုဝ် မီးၶေႃႈမုၼ်းယဝ်ႉႁႂ်ႈပေႃးပဵၼ်ၶၢဝ်ႇမႃးၼၼ်ႉ တေလႆႈၶပ်ႉတၢမ်းၸိူင်ႉႁိုဝ်ၼႆ ၶႃႈဢမ်ႇႁူႉသေမဵဝ်းလႄႈ ၶႃႈၵေႃႈဢမ်ႇယၢမ်ႈလႆႈလဵပ်ႈႁဵၼ်းလွင်ႈၵၢၼ်တႅမ်ႈၶၢဝ်ႇ လွင်ႈဢၼ်ၶႃႈတႅမ်ႈလိၵ်ႈယူႇၼၼ်ႉၵေႃႈ ဢမ်ႇလႆႈႁူႉလၢႆးမၼ်းသေၵႃႈႁိုဝ် ႁူႉဝႃႈၶႂ်ႈတႅမ်ႈၸိူင်ႉႁိုဝ်ၵေႃႈတႅမ်ႈၵႂႃႇ ၼင်ႇၵၢင်ၸႂ်မီးၼၼ်ႉၵူၺ်း၊ ၶႃႈၵေႃႈတင်းၵူဝ်ပီႈၶမ်းၸိုၼ်ႈလႃႇသေ တင်းႁတ်းဢမ်ႇႁတ်း ၸင်ႇလႆႈထၢမ်မၼ်းၵႂႃႇ
“ပီႈ ပိူၼ်ႈတေလႆႈတႅမ်ႈၸိူင်ႉႁိုဝ်ၶႃႈ”
မၼ်းၵေႃႈယၵ်ႉတူၺ်းၶႃႈယဝ်ႉ “ၼွင်ႉလူတူၺ်းၶၢဝ်ႇႁဝ်းတူၺ်းလႄႈ မၼ်းမီးၸိူင်ႉႁိုဝ်ၼႆ”
တီႈၼႂ်းၶၢဝ်ႇၼၼ်ႉၵေႃႈ ဢွၼ်တၢင်းသုတ်းမၼ်းတေမီးႁူဝ်ၶေႃႈ ပႅၵ်ႈလိၵ်ႈပဵၼ်ၶေႃႈဢၼ်ယမ်မၼ်း 5W1H သိုပ်ႇလင်မၼ်းၵေႃႈ တေမီးႁူဝ်ယွႆႈၶေႃႈမုၼ်းယွႆႈမၼ်းသေ တၢမ်းလင်လင်ၵေႃႈ မီးၶေႃႈလူပ်းလင်လွင်ႈဢၼ်ယၢမ်ႈၵိူတ်ႇပဵၼ်မႃးၸိူဝ်းၼၼ်ႉ၊ မၢင်ႁူဝ်ၵေႃႈဢမ်ႇမီး တူၺ်းယဝ်ႉၵေႃႈမိူၼ်တေပွင်ႇၸႂ်ယူႇ ၶႃႈၵေႃႈ ၸၢမ်းဢဝ်ၶႃႈမုၼ်းဢၼ်ၶႃႈဝၢင်းဝႆႉယဝ်ႉ။ ပီႈၶိူဝ်းၵေႃႈမႃးတူၺ်းၸွမ်းသေ
“ၼွင်ႉတႅမ်ႈၶၢဝ်ႇလွင်ႈသင်လႃႇ”
“လွင်ႈၵူၼ်းမိူင်းပၢႆႈၽေးသိုၵ်း”
“ၵႂႃႇႁႃတူၺ်းၶၢဝ်ႇဢၼ် ၶမ်းၸိုၼ်ႈယၢမ်ႈတႅမ်ႈမႃးလွင်ႈၶၢဝ်ႇၼႆႉသေ ၼွင်ႉမႄးၽိူမ်ႉထႅမ်ၶေႃႈမုၼ်းမၼ်းၵႂႃႇၵူၺ်းၵေႃႈလႆႈယဝ်ႉၼၼ်ႉ”
ဝၢႆးသေႁဵတ်းၸိူင်ႉပီႈၶိူဝ်းလၢတ်ႈယဝ်ႉၵေႃႈ ဢဝ်မၼ်းငၢႆႈမႃးတင်းၼမ်ယဝ်ႉလႄႈ ၶႂ်ႈငၢႆးၼင်ႇဢၼ်ပီႈၶမ်ႈၸိုၼ်ႈတႅမ်ႈမႃးယဝ်ႉ။ ဢဝ်ၵႂႃႇၼႄမၼ်းထတ်းတူၺ်းၶိုၼ်းယူႇ မၼ်းၵေႃႈတူၺ်းၼႃႈၶႃႈသေ တူၺ်းၼႃႈပီႈၶိူဝ်းယဝ်ႉ။
“မေႃၼႃႇၼေႃသွၼ်လုၵ်ႈဢွၼ်ႇၼႆႉ”
“ႁႃးလၢတ်ႈၼႄၵူၺ်း ႁဵတ်းဢမ်ႇႁဵတ်းတႄႉယူႇတီႈၼွင်ႉၶဝ်ၵူၺ်းၼင် ၵူၺ်းၵႃႈမၼ်းၵေႃႈသမ်ႉၵဵပ်းဢဝ်ၶူးလၢႆးႁႃးၵႂႃႇၼၼ်ႉၼႃႇဢမ်ႇၸၢင်ႈႁဵတ်းႁိုဝ်”
ဝၼ်းမိူဝ်ႈၼႆႉ တီႈၼႆႈၵေႃႈႁဵတ်းႁႂ်ႈၶႃႈလႆႈႁပ်ႉႁူႉလွင်ႈဢုၼ်ႇၸႂ်မႃးလႄႈ ဢမ်ႇမီးၶႃႈၵေႃႉလဵဝ်ၵူၺ်းလႄႈ မီးပီႈပီႈၶဝ်ၸွႆႈၶႃႈယူႇ၊ ပဵၼ်ဝၼ်းဢွၼ်တၢင်းသုတ်းဢၼ်ၶႃႈမီးတၢင်းသိူဝ်းလိူဝ်ပိူၼ်ႈယဝ်ႉႁိုဝ် ၸူဝ်ႈၶႃႈမႃးႁဵတ်းၵၢၼ်ယူႇၼႆႉ။
ၶၢဝ်းတၢင်းသွင်လိူၼ် ၶႃႈၵေႃႈလႆႈႁဵတ်းၵၢၼ်ၶဝ်ႈတီႈၶဝ်ႈတၢင်းသေ ၶဝ်ၵေႃႈပၼ်ပုၼ်ႈၽွၼ်းၶႃႈတဵမ်တူဝ်ပဵၼ်ၵူၼ်းတႅမ်ႈၶၢဝ်ႇၵႂႃႇယဝ်ႉ။ ပေႃးဝႃႈမေႃမႃးယဝ်ႉ မၼ်းၵေႃႈဢမ်ႇၸႂ်ႈလွင်ႈယၢပ်ႇ ၵူၺ်းၵႃႈ ၵၢၼ်ၵပ်းသိုပ်ႇၸွမ်းလႅင်ႇၶၢဝ်ႇ ၵၢၼ်တွင်ႈထၢမ်ၶေႃႈမုၼ်းၸိူဝ်းၼႆႉ တွၼ်ႈတႃႇၶႃႈတႄႉယင်းတိုၵ်ႉပဵၼ်ယၢပ်ႇယူႇလႄႈ မိူဝ်ႈၶႃႈႁပ်ႉပုၼ်ႈၽွၼ်းတႅမ်ႈၶၢဝ်ႇယဝ်ႉၼၼ်ႉ ၶႃႈတေဢမ်ႇပေႃးလႆႈႁဵတ်း ၵမ်ႈၼမ်ၵေႃႈပဵၼ်ပီႈၶမ်းၸိုၼ်ႈၵေႃႉႁဵတ်းလႄႈ တေသူင်ႇၶေႃႈမုၼ်းမႃးပၼ်ၶႃႈႁႂ်ႈၶႃႈတႅမ်ႈၵူၺ်း ၶၢဝ်းယၢမ်းၶႃႈၵေႃႈ လႆႈဝႃႈမီးၼမ်မႃးလိူဝ်သေမိူဝ်ႈဢွၼ်တၢင်းယဝ်ႉ။
ၵၢၼ်ၶၢဝ်ႇဢၼ်ဝႃႈၼၼ်ႉ ဢမ်ႇၸႂ်ႈဝႃႈပဵၼ်လွင်ႈလီသေၵႃႈႁိုဝ် ၵူႈဝၼ်းၵူႈဝၼ်း ၶေႃႈမုၼ်းဢၼ်ႁၼ်ယူႇတႃႇသေႇၼၼ်ႉ ဢမ်ႇၸႂ်ႈလွင်ႈလီၼႃႇ ၶႅပ်းႁၢင်ႈမၢင်ဢၼ်မၼ်းပဵၼ်လိူတ်ႈပဵၼ်ယၢင် ၵူၼ်းလူႉၵူၼ်းတၢႆၸိူဝ်းၼႆႉ ပေႃးမၼ်းႁၼ်ၸႅင်ႈၼႃႇၶႃႈတင်းဢမ်ႇႁတ်းတူၺ်းၵွၼ်ႇ ၵူၺ်းၵႃႈ ဢမ်ႇၸၢင်ႈႁဵတ်းႁိုဝ် ပေႃးဢႃးလႃးၶႃႈႁဵတ်းဢမ်ႇလႆႈ ၶႃႈၵေႃႈတေႁႂ်ႈပီႈၶိူဝ်းၸွႆႈႁဵတ်းၶႅပ်းႁၢင်ႈပၼ်ၶႃႈသေ ၶႃႈၵေႃႈတႅမ်ႈၶၢဝ်ႇမၼ်းၵႂႃႇၵူၺ်းယဝ်ႉ။
မၢင်ၶၢဝ်ႇမၢင်ႁူဝ် မၼ်းတုမ်ႉတိူဝ်ႉၸႂ်ႁႅင်းၼႃႇ ထိုင်တီႈၼွၼ်းဢမ်ႇလပ်းၵွပ်ႈမၼ်းၵေႃႈမီးၵွၼ်ႇဢေႃႈ၊ ၵၢၼ်လူႉၵၢၼ်တၢႆၼႆႉ ႁၼ်မိူဝ်ႈလႂ်ၵေႃႈ ႁဵတ်းႁႂ်ႈၸႂ်ဢမ်ႇလီသေပွၵ်ႈ၊ ပေႃးပဵၼ်လွင်ႈၶႃႈႁႅမ်တၢႆၵၼ်ၸိူဝ်းၼႆႉ သင်ႁၼ်ငဝ်းတူင်ႉမၼ်းၸိုင် ၶႃႈသမ်ႉပေႃးတွင်ႉၶူၼ်ႉႁူဝ်မဝ်းလႆႈၵွၼ်ႇယဝ်ႉ။
ၵမ်ႈၼမ်ၵေႃႈဢၼ်ႁဝ်းယူႇတီႈလုမ်းၼႆႉ ပဵၼ်ၵူၼ်းႁပ်ႉၶေႃႈမုၼ်းလႄႈတႅမ်ႈႁဵတ်းၶၢဝ်ႇသေ တၢင်ႇၶိုၼ်ႈပိုၼ်ၽႄၵႂႃႇယဝ်ႉ။ ႁဝ်းတေဢမ်ႇပေႃးသူႈလႆႈၵႂႃႇတၢင်းလႂ် ပေႃးလူဝ်ႇသင်ၼႆၵေႃႈ ၵပ်းသိုပ်ႇႁႃၵူၼ်းႁဝ်းဢၼ်ၸိူဝ်းတူင်ႉၼိုင်ယူႇၼၼ်ႉၵူၺ်း။ ဢၼ်ၵႆႉလႆႈဢွၵ်ႇၵႂႃႇတၢင်းၼွၵ်ႈၼၼ်ႉၵေႃႈ ႁူဝ်ၼႃႈႁဝ်းပီႈသႅင်ၼူၼ်း မီးၵူၼ်းလၢတ်ႈၶၢဝ်ႇပီႈၶမ်းၶွင်ႇ ပီႈလၢဝ်မိူင်းလႄႈ ၵူၼ်းယိပ်းၵွင်ႈထႆႇ ပီႈပၢင်ႇၶမ်းၼႆႉၵူၺ်းလႄႈ ပေႃးလူဝ်ႇၸႂ်ႉၵွင်ႈထႆႇသွင်လုၵ်ႈၵေႃႈ ပီႈၶိူဝ်းၵႂႃႇ ပီႈၶမ်းၸိုၼ်ႈ၊ ပီႈလၢဝ် လႄႈ ၶႃႈတႄႉ ဢမ်ႇပေႃးၵႆႉလႆႈၵႂႃႇတၢင်းလႂ် ပီႈလၢဝ်တႄႉၵေႃႈ ပဵၼ်ၵူၼ်းတတ်းတေႃႇၼၼ်ႉယဝ်ႉ ပေႃးဝႃႈၶဝ်ၵႂႃႇထႆႇမႃးယဝ်ႉၼႆၵေႃႈ ပဵၼ်ၵၢၼ်မၼ်းယဝ်ႉ တေလႆႈတတ်း မၢင်ပွၵ်ႈႁဵတ်းၵၢၼ်ထိုင်ပေႃးလိုၵ်းယဝ်ႉ၊ ပီႈသႅင်ၼူၼ်းသမ်ႉပဵၼ်ၵူၼ်းထတ်းမၼ်းလႄႈ မၼ်းၵေႃႈလႆႈယူႇတေႃႇပေႃးၶမ်ႈၸွမ်း။
ယဝ်ႉထႅင်ႈၵၢၼ်ၶၢဝ်ႇၼႆႉ ပေႃးပဵၼ်ဝၼ်းလိုဝ်ႈၼႆ ယႃႇဝူၼ်ႉဝႃႈတေလႆႈလိုဝ်ႈ ဝၼ်းလိုဝ်ႈမိူဝ်ႈလႂ် ၵၢၼ်ယႂ်ႇၵၢၼ်လူင်မႃးတႃႇသေႇယဝ်ႉ။
သမ်ႉဝႃႈႁဵတ်းၵၢၼ်ၵူႈဝၼ်းၵေႃႈ ၵူၼ်းတီႈလုမ်းႁဝ်း ဢမ်ႇလိုမ်းတႃႇတေၵိၼ်လဵင်ႉႁပ်ႉတွၼ်ႈပီမႂ်ႇလုမ်ႈၾႃႉၵႂႃႇၸွမ်းၵၼ်။ ဝၼ်းၼၼ်ႉၵေႃႈ ပဵၼ်ဝၼ်းဢၼ်လႆႈလိုဝ်ႈၵၢၼ်လိုဝ်ႈငၢၼ်း ဢမ်ႇႁဵတ်းၵၢၼ်ၼႆယူႇ ၵူၺ်းၵႃႈ ဢွၼ်ၵၼ်ႁဵတ်းတႃႇၵိၼ်လဵင်ႉယူႇတၢင်းႁၢင်ႈယဝ်ႉ။ ၶမ်ႈမႃးယဝ်ႉၵေႃႈ ဢွၼ်ၼင်ႈဝႅင်းပၢင် ၵိၼ်ၵျေႃႇပျေႃႇမူၼ်ႈလေႃႇၵွၵ်း ႁွင်ႉၵႂၢမ်းၵၼ်ၵႂႃႇ ယိင်ႈလိုၵ်းယိင်ႈတႃၶႂ်ႈလၢႆးမႃး ယိင်ႈလိုၵ်းယိင်ႈဢမ်ႇၶႂ်ႈႁူႉတူဝ်ၵၼ်ယဝ်ႉၼႃႇ ၶႃႈၵေႃႈၺႃးပိူၼ်ႈတိုၵ်းၵိၼ် မဝ်းပေႃးဢမ်ႇႁူႉႁူဝ်ႁူႉႁၢင်သင်ယဝ်ႉ တိုၼ်ႇမႃးၵေႃႈ မီးယူႇတီႈၼွၼ်းယဝ်ႉၼႃႇ။
ၵူၼ်းတီႈႁဵတ်းၵၢၼ် ပေႃးဢမ်ႇမီးႁိူၼ်းၵေႃႈ မီးတီႈယူႇပၼ်သေလႆႈမႃးယူႇၸွမ်းၵၼ်ယဝ်ႉ၊ ၶႃႈၵေႃႈလႆႈယူႇႁွင်ႈလဵဝ်ၵၼ်တင်းပီႈၶမ်းၶွင်ႇ။ ဢၢင်ႈတေလုၵ်ႉၵေႃႈဢမ်ႇလုၵ်ႉလႆႈယဝ်ႉ ၸၢင်ႈတေႁဵတ်းႁိုဝ်ၶိုၼ်းသိုပ်ႇၼွၼ်းထႅင်ႈႁေၵူၺ်းယဝ်ႉလေႃႇ။
