ဝၢႆးသေပုၼ်ႈၽွၼ်းၼမ်မႃး ၵၢၼ်တႅမ်ႈလိၵ်ႈၶႃႈၵေႃႈလႆႈၵိုတ်းၵႂႃႇလႄႈ ၶႃႈႁဵတ်းၵၢၼ်ၵေႃႈဢမ်ႇသိူဝ်းၵျေႃႇမိူၼ်ၵူႈပွၵ်ႈယဝ်ႉ။ ၵူႈဝၼ်းဝၼ်း ဢၼ်ၼင်ႈယူႇၼႃႈၶွမ်းၼၼ်ႉ ၼႂ်းတၢင်းဝူၼ်ႉၶႃႈ မီးၶေႃႈလဵဝ်ၵူၺ်းဝႃႈ “ၵဝ်ယူႇႁဵတ်းသင်လႃႇတီႈၼႆႈ” ၵူႈဝၼ်းၵူႈဝၼ်း ထိုင်တီႈၶႃႈသမ်ႉပေႃးလႆႈလၢတ်ႈဢွၵ်ႇမႃးဝႃႈ ၶႃႈတေဢွၵ်ႇၵၢၼ်ယဝ်ႉ။
ၵူႈလွင်ႈမၼ်းတိပ်ႇတၼ် ဢမ်ႇႁၼ်တၢင်းဢွၵ်ႇ ဢမ်ႇႁူႉတေႁဵတ်းၸိူင်ႉႁိုဝ် ၸဵမ်မိူဝ်ႈၶႃႈမႃးႁဵတ်းၵၢၼ် တီႈႁိူၼ်းၵေႃႈၶႃႈလႆႈလုတ်ႈၵႂႃႇတင်းၼမ်ၼၼ်ႉယဝ်ႉ၊ ထိုင်ဝၼ်းမိူဝ်ႈၼႆႉၵေႃႈ ၶႃႈတင်းဢမ်ႇၸွႆႈသင်ၶဝ်လႆႈသေလွင်ႈ လႄႈ ၶႃႈၵေႃႈႁဵတ်းၵၢၼ်ဢမ်ႇလႆႈလွင်ႈထႅင်ႈ တေႁဵတ်းၵၢၼ်သင်လႆႈ ၶႃႈလိူၵ်ႈမၼ်းမႃး ဝူၼ်ႉဝႃႈမၼ်းတေမီးဢၼႃႇၵၢတ်ႈဢၼ်ၵႂႃႇၵႆလႆႈ ၵူၺ်းၵႃႈယိင်ႈယူႇ ၶႃႈယိင်ႈၶႅၼ်းၸူမ်ၵႂႃႇတိၵ်းတိၵ်း တၼ်တိၵ်းၼိၵ်း၊ တႃႇၶႃႈတေၸႂ်ႉၸၢတ်ႈပၢၼ်ထႅင်ႈတၢင်းၼႃႈၼၼ်ႉ ၶႃႈဢမ်ႇႁၼ်တၢင်းဢွၵ်ႇမၼ်းယဝ်ႉလႄႈ ႁႂ်ႈၶႃႈလၢႆႈၵၢၼ်ၵႂႃႇႁဵတ်းထႅင်ႈတၢင်ႇတီႈၵေႃႈ တေလႆႈၶိုၼ်းတႄႇမႂ်ႇလႄႈ ၶႃႈဢမ်ႇယုမ်ႇယမ်လႆႈဝႃႈ ၶႃႈတေႁဵတ်းမၼ်းလႆႈ။
ၼႂ်းဢွၵ်းဢေႃၼႆႉ မၼ်းသုၵ်ႉသၵ်ႉထိုင်တီႈၶႃႈဢမ်ႇႁူႉတူဝ်ဝႃႈၶႃႈပဵၼ်သင်ၵႂႃႇ မၼ်းတင်းတုၵ်ႉၸႂ် မီးလွင်ႈၵပ်ႉၵိၼ်းၶမ်ဝႆႉယူႇၼႂ်းၸႂ်ၼႆႉ တေလႆႈႁဵတ်းႁိုဝ်၊ ၶႆႈဢမ်ႇလႆႈလၢတ်ႈဢမ်ႇၸၢင်ႈ မၢင်ပွၵ်ႈၵေႃႈဢိုမ်တိုမ်း မိူၼ်တေႁွင်ႉႁႆႈဢွၵ်ႇမႃး ၵူၺ်းၵႃႈဢမ်ႇၶႂ်ႈႁႆႈ၊ မီးၵူၼ်းလၢတ်ႈဝႃႈ ဢမ်ႇပဵၼ်သင်လေႃႇၼႃႈ သူႁဵတ်းလႆႈလီယဝ်ႉၼႆၵေႃႈ မိူၼ်ထွမ်ႇသေပၼ်မၼ်းၽၢၼ်ႇႁူၵႂႃႇၵူၺ်း၊ လိၵ်ႈဢၼ်ပၼ်ႁႅင်းၸႂ်ၸိူဝ်းၼၼ်ႉၵေႃႈ ဢမ်ႇၸွႆႈပူၵ်းတိုၼ်ႇႁႂ်ႈၶႃႈၸိုၼ်ႇလုၵ်ႉမႃးလႆႈ။
ဝၼ်းဝၼ်းဢမ်ႇႁဵတ်းသင်ၵေႃႈ ႁိူဝ်ႉတေႉယဝ်ႉ ဢမ်ႇမီးႁႅင်းသေဢိတ်း ၶႂ်ႈၼွၼ်းယူႇႁဵတ်းၼၼ်ၵူၺ်း မိူဝ်ႈလႂ်တိုၼ်ႇမႃးၵေႃႈ ၵဝ်မီးၸၢတ်ႈပၢၼ်တႃႇသင်လႃႇ သေလႄႈ ဝူၼ်ႉၸိူင်ႉၼၼ်ယူႇတၢင်းဝၼ်း ၶႃႈဢမ်ႇယူႇလႆႈယဝ်ႉ။ မိူဝ်ႈၵပ်ႉၵိၼ်းၸႂ်ယူႇၸိူင်ႉၼၼ် ၸူႉၵဝ်ႇၶႃႈၼၼ်ႉၵေႃႈ ၵပ်းသိုပ်ႇၶႃႈမႃးၶိုၼ်း သမ်ႉဝႃႈၼႂ်းၸႂ်လိုၵ်ႉလိုၵ်ႉၶႂ်ႈႁႂ်ႈမၼ်းလီယူႇ ၵူၺ်းၵႃႈ မၼ်းဝႃႈမၼ်းတေတေႇၼႃႈႁိူၼ်းယဝ်ႉ ၼႂ်းၵႄႈၵၢင်ႁႃးၼၼ်ႉတႄႉ သုတ်းသဵင်ႈၵႂႃႇတင်းမူတ်းယဝ်ႉ။ သမ်ႉဝႃႈၶႃႈၶႂ်ႈႁွင်ႉႁႆႈဢွၵ်ႇမႃးၵေႃႈႁႆႈဢမ်ႇဢွၵ်ႇ ဢမ်ႇႁူႉပဵၼ်သင်လႄႈ ၼႂ်းၸႂ်ၼၼ်ႉမၼ်းပေႉမႃးတိပ်ႇတၼ်ယူႇႁဵတ်းၼၼ် တၢင်းၽိတ်းယူႇတီႈၶႃႈၵူႈလွင်ႈၵူၺ်း။
ဢမ်ႇထၢင်ႇ ပီႈၶိူဝ်းၵေႃႈၶိုၼ်းမႃးႁဵတ်းၵၢၼ်သေ ၶႃႈၸင်ႇတေယွၼ်းလိုဝ်ႈၸူဝ်ႈၶၢဝ်းလႄႈ လႆႈမိူဝ်းယူႇတီႈႁိူၼ်း ဢၼ်ၶႃႈပွႆႇၽႃႈမၼ်းမႃးႁိုင်ၼၼ်ႉ၊ မၼ်းၵေႃႈလႆႈပဵၼ်တီႈယႃၸႂ်တွၼ်ႈတႃႇၶႃႈ၊ ၶႃႈဢမ်ႇဝူၼ်ႉလွင်ႈၵၢၼ် ၶႃႈဢမ်ႇဝူၼ်ႉလွင်ႈသင် ၵူႈဝၼ်းဝၼ်း ၵိၼ်ၼွၼ်းႁဵတ်းၼၼ် ႁိုင်ယူႇမွၵ်ႈ ပၢတ်ႈၼႆႉ ၶႃႈဢိမ်ႇမႃးသေ ဢမ်ႇမေႃယူႇမႃးလႄႈ ၸင်ႇၶိုၼ်းမႄးထူၵ်းပပ်ႉလိၵ်ႈ ဢၼ်ၶႃႈသိမ်းဝႆႉၸိူဝ်းၼၼ်ႉ လႆႈၶိုၼ်းႁၼ် ၵမ်ပွတ်းဢၼ်ၶႃႈသေလၢႆသေၵဵပ်းမၼ်းဝႆႉယူႇၼၼ်ႉလႄႈ ႁဵတ်းႁႂ်ႈၶႃႈလႆႈႁွင်ႉႁႆႈဢွၵ်ႇမႃးယဝ်ႉ။
မၼ်းယွင်ႇၼႃႇဢမ်ႇၸႂ်ႈၶႃႈႁႃႉ ဢၼ်ၼင်ႈသေႁွင်ႉႁႆႈတေႃႇၵမ်ယူႇၸိူင်ႉၼၼ်၊ လုၵ်ႉတီႈဢၼ်ၶႃႈယၢမ်ႈသိူဝ်းၸွမ်းမၼ်း တၢင်းသိူဝ်းဢၼ်ၶႃႈမီးမႃးၸွမ်းမၼ်းၸိူဝ်းၼၼ်ႉ မၼ်းလႆႈႁၢႆၵႂႃႇဢမ်ႇတၼ်းႁူႉတူဝ်လႄႈ မိူဝ်ႈလႆႈၶိုၼ်းႁၼ်မၼ်းၼၼ်ႉ ႁဵတ်းႁႂ်ႈၶႃႈႁူႉဝႃႈ ၶႃႈတုၵ်ႉမွၵ်ႈၵႃႈႁိုဝ် တၢင်းတုၵ်ႉဢၼ်ၶႃႈမီးယူႇၼၼ်ႉ ၶႃႈဢမ်ႇႁူႉတေပူတ်းပွႆႇပၼ်ၽႂ် တေပူတ်းပွႆႇတီႈလႂ်လႄႈ ဢဝ်မၼ်းပဵၼ်ဢူၺ်းၵေႃႉသေ ပူတ်းပွတ်းပၼ်မၼ်းၵႂႃႇဢေႃႈ “ၶႃႈဢမ်ႇမီးတၢင်းသိူဝ်းသေဢိတ်း”။
မိူၼ်မၼ်းတေယႃၸႂ်ၵႂႃႇၸူဝ်ႈၵႅပ်ႉယူႇ ၵူၺ်းၵႃႈ ဢမ်ႇၸႂ်ႈၶႃႈၼႃ မၼ်းၵေႃႈၶိုၼ်းမိူၼ်ၵဝ်ႇ၊ သမ်ႉဝႃႈၶႃႈၶိုၼ်းယိပ်းၵမ်ၶိုၼ်းၵေႃႈ ပၢႆၵမ်ၶႃႈၼၼ်ႉ ဢမ်ႇၸၢင်ႈၶိုၼ်းတႅမ်ႈၶိတ်ႇၶဵၼ်လႆႈမိူၼ်မိူဝ်ႈဢွၼ်တၢင်းယဝ်ႉလႄႈ တၢင်းဝူၼ်ႉဢၼ်မီးယူႇၼႂ်းဢွၵ်းၼၼ်ႉၵေႃႈ ဢမ်ႇမိူၼ်ၵူႈပွၵ်ႈယဝ်ႉသေ ဝူၼ်ႉသင်ဢမ်ႇပွင်ႇ တႅမ်ႈၵႂႃႇတႅမ်ႈမႃးဢမ်ႇႁူႉလွင်ႈႁူႉတၢင်း မၢင်ၸေႈၼၼ်ႉၵေႃႈ လႆႈသိၵ်ႇယွႆႈၵႂႃႇယဝ်ႉ။
မိူၼ်ၶႃႈႁူႉတူဝ်ယူႇဝႃႈၶႃႈပဵၼ် ၵူၺ်းၵႃႈၶႃႈဢမ်ႇႁူႉဝႃႈၶႃႈပဵၼ်သင်လႄႈ ၶႃႈဢမ်ႇႁူႉဝႃႈၶႃႈတေႁဵတ်းႁိုဝ်ၵႄႈၶႆမၼ်းၵႂႃႇ၊ ၶႃႈၶႂ်ႈႁႂ်ႈၶၢဝ်းယၢမ်းၼၼ်ႉပူၼ်ႉၵႂႃႇဝႆးဝႆးတေႉယဝ်ႉ၊ သမ်ႉဝႃႈၶႃႈတေလူပပ်ႉယူႇၵေႃႈ ၵႃႈၶၼ်ၼမ်ႉၵႂၢမ်းဢၼ်မီးယူႇၼၼ်ႉ မိူၼ်မၼ်းတူၵ်းလူင်းၵႂႃႇၸွမ်းၸႂ်ၶႃႈယဝ်ႉႁိုဝ်ဢမ်ႇႁူႉ၊ သမ်ႉဝႃႈပဵၼ်ၽၵ်းဝၢၼ်ယူႇၵေႃႈ ဢမ်ႇႁူႉဢရသႃႇဝႃႈမၼ်းဝၢၼ်၊ ဢွင်ႈတီႈဢၼ်ႁၢင်ႈလီ သၽႃႇဝဢၼ်ၵတ်းယဵၼ်လီ မၼ်းတဵတ်ႇယဵၼ်ထိုင်တီႈဢမ်ႇၶႂ်ႈငိၼ်းသဵင်ႁူဝ်ၸႂ်ၸဝ်ႈၵဝ်ႇၵႂႃႇယဝ်ႉ။
တေႃႈၼင်ႇတႅမ်ႈလိၵ်ႈၵူၺ်းၵေႃႈ ၶႃႈယင်းဢမ်ႇမီးႁႅင်းတႅမ်ႈ ၶႃႈတေဢဝ်သင်ပဵၼ်ႁႅင်းႁဵတ်းၵၢၼ် ၶႃႈဢမ်ႇမီးယိူင်းဢၢၼ်းသင်ယဝ်ႉ ၶႃႈသမ်ႉတေသိုပ်ႇၵႂႃႇလႆႈၸိူင်ႉႁိုဝ်၊ တႅမ်ႈလိၵ်ႈၵေႃႈတႅမ်ႈလႆႈသေတႃႉ ၶႃႈဢမ်ႇမီးယိူင်းမၢႆဝႃႈ တေၵႂႃႇႁႂ်ႈမၼ်းထိုင်လႂ် ဢမ်ႇႁူႉတေတႅမ်ႈႁဵတ်းသင် မိူဝ်ႈဝႃႈတႅမ်ႈၵႂႃႇၵေႃႈ ဢမ်ႇမီးၵူၼ်းလူမၼ်းယူႇယဝ်ႉ။
ပၢႆၵမ်ၶႃႈလႆႈသုတ်းၵႂႃႇတီႈၼၼ်ႈသေ ၶႃႈၵေႃႈဢမ်ႇၶိုၼ်းသိုပ်ႇၵႂႃႇႁဵတ်းၵၢၼ်ၶိုၼ်းယဝ်ႉ။
ၶႃႈယၢမ်ႈဝူၼ်ႉဝႃႈဢူႈမႄႈႁဝ်းႁဵတ်းၵၢၼ်ႁႆႈၵၢၼ်သူၼ် ၵႂႃႇၸဝ်ႉမႃးၶမ်ႈ ပဵၼ်ၵၢၼ်ဢၼ်ႁိူဝ်ႉလႄႈ မၼ်းတုၵ်ႉၶၼႃႇ ၵူၺ်းၵႃႈ ၽိူဝ်ႇလႆႈမႃးႁဵတ်းတူၺ်း မၼ်းၵေႃႈလီမိူၼ်ၵၼ် ဢမ်ႇလႆႈဝူၼ်ႉသင် ၵၢင်ၼႂ်လူဝ်ႇၵႂႃႇႁူတ်းၼမ်ႉၽၵ်းၵေႃႈႁူတ်းသေ၊ လိၼ်ႁူၵ်ႉၵေႃႈၸွၼ်ႉသေ၊ လူဝ်ႇၽုၵ်ႇၽၵ်းၵေႃႈၽုၵ်ႇသေ ဢမ်ႇမီးၽုၼ်ႇၵေႃႈဢဝ်မႃးသႂ်ႇသေ ၶမ်ႈယဝ်ႉၵေႃႈ ဢၢပ်ႇၼမ်ႉယဝ်ႉၼွၼ်း။ တိူၵ်ႈတီႈၸၢတ်ႈပၢၼ်ႁဝ်း မၼ်းၵေႃႈ မီး 24 ၸူဝ်ႈမူင်း တေႃႇၼိုင်ႈဝၼ်းၵူၺ်း တေလူဝ်ႇသင်ထႅင်ႈ။
ၵူၺ်းၵႃႈ မၢင်ပွၵ်ႈငိုၼ်းဢၼ်ဝႃႈၼၼ်ႉၵေႃႈ သမ်ႉၸမ်ပဵၼ်ယူႇလႄႈ ဢမ်ႇမီးၵေႃႈဢမ်ႇလႆႈ ႁႃးဢူႈႁဝ်းၵေႃႈလႆႈဢွၼ်ၵၼ်ၵႂႃႇႁႃယႃထိူၼ်ႇယႃၶိူဝ်း တီႈၼႂ်းဝူဝ်ႇႁူၺ်ႈဝူဝ်ႇလွႆၼၼ်ႉယဝ်ႉ၊ ပေႃးပဵၼ်ယႃလီၼႆႉ မၼ်းဢမ်ႇတွၼ်ႉဢွၵ်ႇတီႈလီလီသေပွၵ်ႈ ၶဝ်ႈယုမ်းၶဝ်ႈယွမ်ႇလူင်ၵႂႃႇတိၵ်းတိၵ်း တႃႇတေၵႂႃႇၺႃးၵေႃႈဢမ်ႇငၢႆႈ လႆႈၵၢၼ်းၶိုၼ်ႈလွႆလူင်ၵႂႃႇ တၢင်းၵေႃႈဢမ်ႇမီး ဢူႈႁဝ်းၵေႃႈၵႂႃႇတၢင်းၼႃႈ ၶႃႈၵေႃႈၸွမ်းလင်မၼ်းၵႂႃႇ။
ဢၼ်ႁဝ်းၵႂႃႇႁႃတႄႉ ပဵၼ်ယႃႈၵႄႈႁၢင်ၸၢင်ႉ တူၼ်ႈမၼ်းတႄႉပဵၼ်ၶိူဝ်း မၼ်းတေဢွၵ်ႇၸွမ်းၼႂ်းထိူၼ်ႇတီႈဢၼ်မိုၵ်းဢိတ်းဢိတ်းလႄႈ ၸွမ်းၸိူဝ်းႁွင်ႈၼမ်ႉ ၸွမ်းတၢပ်ႈဢၼ်ဢမ်ႇပေႃးၵႆၼမ်ႉ လႄႈ မိူဝ်ႈၵေႃႉလဵၵ်ႉ ၶႃႈၵေႃႈတေၵႆႉၵႆႉလႆႈႁႃၸွမ်းဢူႈႁဝ်းတႃႇသေႇ ယႃၸိူင်ႉၼႆ ပေႃးဢမ်ႇတူၺ်းလီလီၵႆႉၺႃးဢၼ်ပွမ်မၼ်းၼမ်ၼႃႇ ပိူၼ်ႈဢဝ်ႁဵတ်းယႃတူမ်ႈဢၢပ်ႇ၊ ၵႄႈၵွင်ႉၵႄႈလူမ်းမႆႈ၊ တွင်ႉပိၵ်ႉတွင်ႉပုၵ်ႈတွင်ႉပွင်းၸိူဝ်းၼႆႉၵေႃႈလႆႈ၊ မိူဝ်ႈလဵဝ် ပိူၼ်ႈယႃႉထိူၼ်ႇယႃႉၶိူဝ်းၼမ်ၼႃႇယဝ်ႉလႄႈ မၼ်းၶႂ်ႈႁႃယၢပ်ႇလိူဝ်သေၵူႈပွၵ်ႈယဝ်ႉ။
မိူဝ်ႈႁႃးတိုၵ်ႉဢဝ်ယႃသေပွၵ်ႈၶိုၼ်းႁိူၼ်းၼၼ်ႉ ၶႃႈသမ်ႉလူင်းလွႆၵႂႃႇဢွၼ်တၢင်းလႄႈ တိၼ်ပလၢတ်ႈသေ ထူလူင်လူင်းၵႂႃႇ တေႃႇပေႃးႁွတ်ႈထိုင်ၵူၼ်ႈႁူၺ်ႈယဝ်ႉ၊ လီယူႇမၼ်းဢမ်ႇၸႂ်ႈႁႃႉႁိုၵ်း ပဵၼ်လွႆၵူၺ်း ဢမ်ႇထိုင်တၢႆသေတႃႉ တူဝ်ၵူၼ်းတႄႉဢမ်ႇၶႂ်ႈတူင်ႉလႆႈယဝ်ႉ ၸဵပ်းၵႂႃႇတင်းတူဝ်ယဝ်ႉၼႃႇ။
ဢူႈႁဝ်းၵေႃႈမႆႈၸႂ်ယဝ်ႉ ၵူၺ်းသမ်ႉထူလူင်လူင်းမႃးၸွမ်းႁွႆးၶႃႈၼၼ်ႉၶိုၼ်းသေ ၶႃႈၵေႃႈၼင်ႈတူၺ်းႁေၶူဝ်ယူႇယဝ်ႉလေႃႇ၊ ပေႃးမႃးဝူၼ်ႉတူၺ်း ပဵၼ်သဵင်ၶူဝ်ဢၼ်ၶႃႈလႆႈၶူဝ်တေႉတေႉ ဢမ်ႇလႆႈႁဵတ်းၵႅင်ႈသင်ၼၼ်ႉယဝ်ႉ၊ ဢမ်ႇႁူႉၽႂ်တေၸွႆႈၽႂ်ယဝ်ႉ ႁႃးၵေႃႈ ၵၢၼ်ႉၵုၵ်ႈၵၢၼ်ႉၵၢၵ်ႉမိူဝ်းၵႂႃႇၸွမ်းၵၼ်ၵူၺ်း၊ မိူဝ်ႈၶၢမ်ႈၶူဝ်ႁွင်ႈၼမ်ႉၼၼ်ႉ မၼ်းၵႂႃႇယၢပ်ႇၼႆလႄႈ ဢူႈႁဝ်းၵေႃႈ ဢဝ်မိုဝ်းမၼ်းမႃးယိုၼ်ႈပၼ်ၶႃႈယိပ်း ၶႃႈၵေႃႈယိပ်းဢဝ်ၼိဝ်ႉၼိုင်ႈ မိူၼ်ၼင်ႇလုၵ်ႈဢွၼ်ႇလဵၵ်ႉၼၼ်ႉ ၶႃႈဢမ်ႇႁူႉဝႃႈၶႃႈတၼ်းယိပ်းမိုဝ်းဢူႈႁဝ်းပွၵ်ႈလိုၼ်းသုတ်းမိူဝ်ႈလႂ် ၵူၺ်းၵႃႈမိူဝ်ႈၼႆႉၶႃႈလႆႈႁူႉဝႃႈမၼ်းဢုၼ်ႇႁွတ်ႈထိုင်တီႈၼႂ်းၸႂ်ၼႆႉယဝ်ႉ။
ပေႃးမႃးဝူၼ်ႉတူၺ်း ၶႃႈၵေႃႈပဵၼ်ၵူၼ်းယူႇၸွမ်းထိူၼ်ႇၸွမ်းၶိူဝ်း ယူႇၸွမ်းႁူၺ်ႈၸွမ်းလွႆမႃးၵူၺ်း ၶႃႈတေၶႂ်ႈၵႂႃႇယူႇၼႂ်းဝဵင်းၸိူင်ႉၼင်ႇပိူၼ်ႈ တေၵႂႃႇယူႇမိူၼ်ပိူၼ်ႈ မၼ်းဢမ်ႇလႅပ်ႈၶႃႈလေႃႇ၊ ၶႃႈယူႇတီႈႁိူၼ်းသေ ယူႇၸွမ်းၵူၼ်းၼႂ်းၼႃႈႁိူၼ်း မွၵ်ႈၼႆႉၵူၺ်းၵေႃႈလႆႈယဝ်ႉ။
လႆႈၵိၼ်ဢိမ်ႇ၊ ၼွၼ်းလပ်း၊ သုတ်ႇလူမ်းၵတ်းလူမ်းယဵၼ်လီလီ၊ မီးၼမ်ႉဢၢပ်ႇ၊ မီးႁိူၼ်းယူႇ မီးတီႈၼွၼ်းလႄႈ မီးသူၼ်ၽၵ်းဢၼ်ဢမ်ႇလႆႈသိုဝ်ႉၵိၼ် ၽၵ်းသၽႃႇဝဢမ်ႇမီးၵွင်ႉမီးႁႅၼ်ႇ ယဝ်ႉသမ်ႉတေလူဝ်ႇသင်ထႅင်ႈ ၶႃႈဢမ်ႇၶႂ်ႈလႆႈသင်ထႅင်ႈယဝ်ႉ။
သမ်ႉဝႃႈဝၢၼ်ႈမိူင်းၶိုတ်းၵၢပ်ႈယဝ်ႉသေတႃႉ တီႈႁိူၼ်းတႄႉ ဢမ်ႇၸႂ်ႈႁိူၼ်းဢၼ်ၶိုတ်းၵၢပ်ႈလႄႈ ၾႆးၾႃႉၵေႃႈဢမ်ႇႁွတ်ႈ၊ ၾႆးလႅတ်ႇၵေႃႈဢမ်ႇယႂ်ႇ တေႃႉတႄႉသႂၢင်းႁႅင်းၾူၼ်းလႆႈလႄႈတႆႈၾႆးလႆႈၵူၺ်း၊ ယင်းတိုၵ်ႉၸႂ်ႉၾႆးၽိုၼ်းႁုင်ၶဝ်ႈမိုဝ်ႉၽၵ်းယူႇၵူၺ်း၊ သင်ဝႃႈလွင်ႈၶိုတ်းၵၢပ်ႈၼၼ်ႉ တေလႆႈလႅၵ်ႈဢဝ်လွင်ႈဢုၼ်ႇၸႂ်ၵႂႃႇ ၶႃႈတေဢမ်ႇၶႂ်ႈၶိုတ်းၵၢပ်ႈယဝ်ႉ ယူႇၸိူင်ႉၼႆၵေႃႈလီမိူၼ်ၵၼ်။
ၾႆးလႅတ်ႇၵေႃႈ ပေႃးတႆႈႁိုင်မၼ်းမေႃဝွႆးလႄႈ ၶႃႈၵေႃႈလႆႈၶိုၼ်းၸပ်းၾႆးတဵၼ်းသေ ဢၢႆတဵၼ်းၼၼ်ႉ ပူၵ်းတိုၼ်ႇႁႂ်ႈၶႃႈလႆႈၶိုၼ်းသိုပ်ႇတႅမ်ႈလိၵ်ႈမႃးလႄႈ ၸင်ႇလႆႈမီးလိၵ်ႈႁူဝ်ၼႆႉမႃးယဝ်ႉ။
လွင်ႈဢၼ်ၶႃႈၵျိူၵ်ႈႁဵတ်း ဢမ်ႇၸႂ်ႈဝႃႈပိူၼ်ႈတေၵျိူၵ်ႈၸွမ်းၶႃႈလႄႈ ဢၼ်ၶႃႈႁဵတ်းယူႇၼၼ်ႉ ဢမ်ႇၸႂ်ႈဝႃႈၽႂ်ၵေႃႈတေႁၼ်လီၸွမ်း၊ သမ်ႉဝႃႈလိၵ်ႈဢၼ်ၶႃႈတႅမ်ႈၼၼ်ႉ ဢမ်ႇမီးၽႂ်လူၵေႃႈယဝ်ႉ ယွၼ်ႉပိူဝ်ႈၶႃႈၵျိူၵ်ႈမၼ်းလႄႈၶႃႈၸင်ႇႁဵတ်း ၶႃႈဢမ်ႇလႆႈႁဵတ်းတွၼ်ႈတႃႇၽႂ်မႃးၵျိူၵ်ႈ။
ၸၢတ်ႈပၢၼ်မၼ်းတိုၵ်ႉၵိုတ်းထႅင်ႈၵႆၼႆသေတႃႉ ႁဝ်းၵေႃႈဢမ်ႇႁူႉလႆႈဝၼ်းတၢႆမိူၼ်ၵၼ် လႄႈ ဢမ်ႇႁူႉလႆႈဝႃႈတၢင်းၼႃႈၶႃႈတေလႆႈထူပ်းလွင်ႈသင်ထႅင်ႈလႄႈ တေပဵၼ်ၸိူင်ႉႁိုဝ် ဢၼ်ၶႃႈပဵၼ်ယူႇမိူဝ်ႈလဵဝ်ၼႆႉၵေႃႈ လီယူႇယဝ်ႉ။
သုတ်းယဝ်ႉ
သမ်ႉဝႃႈမီးၵူၼ်းပၼ်ႁႅင်းၸႂ်ႁဝ်းတင်းၼမ်ၵေႃႈ ႁဝ်းတေဢမ်ႇမီးႁႅင်းလုၵ်ႉမႃးလႆႈ မိူဝ်ႈႁဝ်းယင်းတိုၵ်ႉၸူမ်ယူႇၸွမ်းလွင်ႈလပ်းသိင်ႇယူႇၼၼ်ႉ၊ ပဵၼ်တူဝ်ႁဝ်းၵူၺ်း ၵေႃႉဢၼ်ၸွႆႈႁဝ်းလႆႈ၊ သင်ဝႃႈၵေႃႉမႃးလူလိၵ်ႈႁူဝ်ၼႆႉ မီးယူႇၼႂ်းလပ်းသိင်ႇၼႆ ၶႃႈဢမ်ႇၸၢင်ႈလၢတ်ႈဝႃႈလုၵ်ႉၶိုၼ်ႈမႃးလႄႈဢမ်ႇပဵၼ်သင်လေႃႇ ယွၼ်ႉပိူဝ်ႈၶေႃႈၵႂၢမ်းၸိူဝ်းၼၼ်ႉ မၼ်းတေဢမ်ႇၸွႆႈသင်လႆႈ။
တေယူႇၼႂ်းလပ်းသိင်ႇၼၼ်ႉၵေႃႈဢမ်ႇပဵၼ်သင်ၼႃ မၢင်ပွၵ်ႈမၼ်းယင်းတဵတ်ႇယဵၼ်ၵွၼ်ႇ၊ သဵင်ၼႂ်းၸႂ်သူၼၼ်ႉဢမ်ႇမီးၽႂ်ႁူႉငိၼ်းလႆႈ လိူဝ်သေတူဝ်သူ၊ ယႃႇလိုမ်းဝႃႈႁဝ်းမီးၼမ်ႉတႃဢိူဝ်ႈ တေႁွင်ႉႁႆႈၵေႃႈၸၢင်ႈတေပဵၼ်သင် သဵင်ႁွင်ႉႁႆႈသူၼၼ်ႉဢမ်ႇမီးၽႂ်တၼ်းထွမ်ႇမၼ်းလေႃႇ ၊ တၢင်းယုမ်ႉသူသဵင်ၶူဝ်သူၼၼ်ႉ ႁဵတ်းႁႂ်ႈသူၵႅၼ်ႇၶႅင်တေႉယူႇႁႃႉ ၼႂ်းသၢႆတႃဢၼ်မွင်ယူႇၼၼ်ႉ ဢမ်ႇမီးၽႂ်တူၺ်းႁၼ်မၼ်းၼႃ။ သမ်ႉဝႃႈမိူဝ်ႈၼႆႉသူဢမ်ႇလႆႈယဝ်ႉသေတႃႉၵေႃႈ ဢမ်ႇပဵၼ်သင် ႁဝ်းယင်းတိုၵ်ႉမီးၶၢဝ်းယၢမ်းထႅင်ႈတင်းၼမ်ယူႇလူး။
ဢၼ်ၸွႆႈလႆႈလိူဝ်ပိူၼ်ႈၵေႃႈ ယွမ်းႁပ်ႉမၼ်းသေ ပွႆႇဝၢင်းၵႂႃႇလႄႈ ၵူႈလွင်ႈၼၼ်ႉဢမ်ႇၸႂ်ႈၶွင်ႁဝ်းၸဵမ်တေႇမၼ်းယူႇယဝ်ႉ ဢမ်ႇၸႂ်ၸပ်းၸွမ်းမၼ်းသေ “တိူင်းမၼ်းလႃႈ” ၵႂၢမ်းၶေႃႈၼႆႉ ပၼ်ႁႅင်းၸႂ်ၶႃႈလိူဝ်သေပိူၼ်ႈယဝ်ႉ။
ပၢႆၵမ် – သႅၼ်ငဝ်း
တႅမ်ႈမိူဝ်ႈ 22-23/09/2025
