တွၼ်ႈသၢဝ်းႁႃႈ
“ၽူႈၸၢႆးၵေႃႉဢၼ်မႄႈၵႆႉလၢတ်ႈၼၼ်ႉဢမ်ႇၸႂ်ႈႁႃႉ! ၸၢႆး” လုၵ်ႈဢွၼ်ႇၽူႈယိင်း ၵေႃႉပဵၼ်ပီႈၼၢင်းၸၢႆးဢွၼ်ႇၼၼ်ႉ ၵေႃႉလၢတ်ႈ။
“ၸႂ်ႈယဝ်ႉ! ၵေႃႉၼႆႉယဝ်ႉ မိူၼ်ၵၼ်လီလီ”
သွင်ၵေႃႉပီႈၼွင်ႉ လႅၼ်ႈၶဝ်ႈၸူးၸိုၼ်ႈၶိူဝ်းၼၼ်ႉၵမ်းလဵဝ်ယူႇ။ မိူဝ်ႈပဵၼ်ၸိူင်ႉၼၼ် တေသိူင်ႇသိမ်းၵေႃႈဢမ်ႇလႆႈယဝ်ႉလူး သၢႆလႅင်းၼၼ်ႉၵေႃႈ ႁိုဝ်တေၸၢင်ႈၵႄႈတူဝ်လႆႈယဝ်ႉ။
“ပဵၼ်သူတေႉတေႉလူးလိုၼ်းၼုမ်ႇ!”
လိုၼ်းၼုမ်ႇၵေႃႈ ႁႂ်ႈလုၵ်ႈဢွၼ်ႇသွင်ၵေႃႉၶဝ်ႈႁိူၼ်းၵႂႃႇသေ သၢႆလႅင်းၼၼ်ႉၵေႃႈ ပွၵ်ႈမိူဝ်းႁိူၼ်းၵႂႃႇႁင်းၵူၺ်းမၼ်း ယူႇယဝ်ႉ။
“ပဵၼ်သင်လႄႈ..ပွၵ်ႈမႃးၵေႃႉလဵဝ်ၵူၺ်းလႃႇ ၸိုၼ်ႈၶိူဝ်းလူး” မႄႈသၢႆလႅင်းထၢမ်။
“ဢေႃႈ!..ၶဝ်လႆႈထူပ်းၵၼ်ယဝ်ႉ”
“ၶႂ်ႈဝႃႈၸိူင်ႉႁိုဝ်လႃႇ!”
“ၶဝ်ဢမ်ႇၸႂ်ႈၽူႈယိင်းၶႃႈၼႃ..ၶဝ်ၵေႃႈ..မိူၼ်ၼွင်ႉယိင်းၶႃႈၵေႃႉၼိုင်ႈၵူၺ်း”
“ဢၢႆႈလုၵ်ႈၵေႃႉၼႆႉ..မၼ်းလၢတ်ႈသင်လႃႇ”
ဝၢႆႇၼႃႈထၢမ်ပီႈၼၢင်းသၢႆလႅင်းၼၼ်ႉသေ။
“တူၺ်းမိူၼ်တေပဵၼ်ၽူႈယိင်းၸိုၼ်ႈၶိူဝ်းၼၼ်ႉယဝ်ႉၶႃႈမႄႈ”
“ယႃႇပေလၢတ်ႈဝႃႈ…လၵ်ႉၽူႈယိင်းၶဝ်မႃး..”
“ၵူၼ်းၸိူင်ႉၼင်ႇသၢႆလႅင်းၼႆႉ တေႁတ်းလၵ်ႉၽူႈယိင်းၸိုၼ်ႈၶိူဝ်းလႆႈၸိူင်ႉႁိုဝ် တေႃႇၼင်ႇလုမ်းလႃးမႃးပဵၼ်သၢမ်ပီႊယင်းပၼ်ၶဝ်လႆႈယူႇ”
“ဢိူဝ်ႈၼေႃႈ..ၵဝ်ဝႃႈၸၢတ်ႈၼႆႉ မၼ်းဢမ်ႇလႆႈမေးယဝ်ႉဝႃႈ” သွင်ၵေႃႉမႄႈလုၵ်ႈၵေႃႈ ပၢႆႈၼႃႈမၼ်းၵႂႃႇပႅတ်ႈယူႇ။
ၸိုၼ်ႈၶိူဝ်းၼၼ်ႉၵေႃႈ ႁၢမ်ႈၸႂ်ဢမ်ႇလႆႈသေ ၶဝ်ႈၵွတ်ႇဢဝ်လိုၼ်းၼုမ်ႇဝႆႉ သမ်ႉပေႃးမၼ်ႈတဵင်ႈတဵင်ႈယူႇ။
“သူယင်းတိုၵ်ႉမီးသၢႆၸႂ်ယူႇ..ႁဝ်းဢမ်ႇလႆႈတူၺ်းၽိတ်းၸွင်ႇၸႂ်ႈႁိုဝ်”
မိူၼ်ၼမ်ႉတႃမၼ်းၸိုမ်ႉယမ်းမႃးယူႇတီႈလၢႆႇတႃမၼ်းၼၼ်ႉယဝ်ႉ။
“ဢိုမ်ႈ!”
“ႁဝ်းၸႂ်ထိုင်သူတေႉယဝ်ႉ ႁႂ်ႈႁဝ်းၵွတ်ႇသူၸိူင်ႉၼႆသေၵႅပ်ႉၼိုင်ႈလႄႈ..ႁိုင်ဢိတ်ႉၼိုင်ႈၵေႃႈလီ”
လိုၼ်းၼုမ်ႇဝႆႉၸႂ်ယဵၼ်ယဵၼ်သေ
“ႁဝ်းၼၼ်ႉ… ပဵၼ်ၵူၼ်းၵေႃႉဢၼ်သူ..ဢမ်ႇထုၵ်ႇလီၶႂၢင်းပၼ်လႆႈယူႇယဝ်ႉ တင်းလႅၼ်သူ တင်းပၢႆႈသူ ႁၼ်ပုၼ်ႈသုၼ်ႇတူဝ်ပေႃးတၢၼ်ႇၼႆႉ သူယင်းတိုၵ်ႉၵွတ်ႇလႆႈယူႇႁႃႉ”
“ပဵၼ်သူၵူၺ်းၵေႃႈပေႃးယဝ်ႉ ဢမ်ႇဝႃႈသူတေပဵၼ်ၵူၼ်းၶီႈပႅတ်ႉၶီႈလႅၼ် ႁၼ်ပုၼ်ႈသုၼ်ႇတူဝ်တၢၼ်ႇႁိုဝ်ၵေႃႈ ႁဝ်းတေၵွတ်ႇသူဝႆႉ တေဢမ်ႇပၼ်ႁႂ်ႈသူ..ပၢႆႈၵႂႃႇတၢင်းလႂ်ထႅင်ႈၼၼ်ႉယဝ်ႉ”
လိုၼ်းၼုမ်ႇၼၼ်ႉၵေႃႈ ၵွတ်ႇႁပ်ႉမၼ်းၶိုၼ်းသေ
“ႁဝ်းၵေႃႈၸႂ်ထိုင်သူ” ႁွင်ႉႁႆႈဢွၵ်ႇမႃးယူႇၼႂ်းဢွင်ႈၵွတ်ႇၸိုၼ်ႈၶိူဝ်းၼၼ်ႉယူႇ။
သွင်ၶႃၵေႃႈ ၸင်ႇၶိုၼ်းၼင်ႈဢုပ်ႇၵၼ်ယူႇ တၢင်းၼႃႈႁိူၼ်းၼၼ်ႉလီလီသေ
“ႁဝ်း..ဢမ်ႇၶႂ်ႈယူႇတီႈဢၼ်ဢမ်ႇမီးသူ မၼ်းႁဵတ်းႁႂ်ႈႁဝ်းၸႂ်ထိုင်..တုၵ်ႉၸႂ်..ၶႂ်ႈႁွင်ႉႁႆႈ မိူၼ်ၵူၼ်းယွင်ႇ လႄႈႁဝ်းၵေႃႈ..တေပဵၼ်ၵူၼ်းယွင်ႇၵႂႃႇယဝ်ႉ ”
လိုၼ်းၼုမ်ႇဢၼ်ႁၼ်ႁူၺ်ႇတႃလႅင်လႅင် ၼမ်ႉတႃၸုမ်ႉယမ်းယူႇတီႈလၢႆႇတႃၸိုၼ်ႈၶိူဝ်းၼၼ်ႉၵေႃႈ ဢဝ်မိုဝ်းဢွၼ်ႇမၼ်းၼၼ်ႉ ၸဵတ်ႉပၼ်သေယဝ်ႉ လၢတ်ႈၸူးၵႂႃႇၶိုၼ်း။
“ႁဝ်းၼၼ်ႉ ႁဵတ်းၽိတ်းတေႃႇသူတေႉယဝ်ႉ ဝူၼ်ႉဝႃႈ..သူတေၸႂ်ႉၸၢတ်ႈပၢၼ်မီးတၢင်းသိူဝ်းယူႇ မိူၼ်တေပဵၼ်ႁဝ်းၵူၺ်း..ဢၼ်မီးတၢင်းသိူဝ်းယူႇၽၢႆႇလဵဝ် ၶႂၢင်းပၼ်ႁဝ်းၽွင်ႈ သမ်ႉဝႃႈမၼ်းပဵၼ်ၶေႃႈၵႂၢမ်းယွမ်းၼွမ်း ဢၼ်ပဵၼ်ၶေႃႈၵႄႈတူဝ်ၵူၺ်းၵေႃႈယဝ်ႉ လွင်ႈႁဵတ်းသၢင်ႈႁဝ်းၼၼ်ႉ ဢမ်ႇလီမိူၼ်ၵၼ် ဢမ်ႇၵိုင်ႇတၢင်းတေႁႂ်ႈသူၶႂၢင်းပၼ်ႁဝ်းလႆႈလူးၵွၼ်ႇ”
“ႁဝ်းၵေႃႈ ပဵၼ်ၵူၼ်းဢမ်ႇလႆႈလွင်ႈမိူၼ်ၵၼ်ယဝ်ႉ”
“ပဵၼ်သင်လႄႈလၢတ်ႈၸိူင်ႉၼၼ်လႃႇ”
“ပေႃးဢမ်ႇၼၼ်သူတေပၢႆႈႁဝ်းယူႇႁႃႉ ႁဝ်းၵေႃႈႁဵတ်းၽိတ်းတေႃႇသူမိူၼ်ၵၼ်ယဝ်ႉ”
“သူႁဵတ်းၽိတ်းလွင်ႈသင်လႃႇ ပဵၼ်ႁဝ်းၵူၺ်းဢၼ်ပၢႆႈသူ မိူဝ်ႈလႂ်ယူႇၸွမ်းသူ ႁဵတ်းႁႂ်ႈႁူဝ်ၸႂ်ႁဝ်းတဵၼ်ႈႁႅင်း ထိုင်တီႈထိင်းပေႃးဢမ်ႇလႆႈ ႁဵတ်းႁႂ်ႈႁဝ်းဢမ်ႇမီးသတိ ႁဝ်းၵူဝ်.. ႁဵတ်းတေႃႇသူ ဢၼ်ဢမ်ႇထုၵ်ႇလီႁဵတ်း ၵူဝ်ဝႃႈမၼ်းတေလၢမ်းၵႂႃႇတိၵ်းတိၵ်းၼၼ်ႉယဝ်ႉ”
“ပဵၼ်သင်လႄႈတေလႆႈၵူဝ်လႃႇ ပွႆႇႁႂ်ႈမၼ်းလၢမ်းၵႂႃႇတိၵ်းတိၵ်းဢမ်ႇလီႁိုဝ် ”
“ပေႃးဢမ်ႇတူၵ်းလိုၼ်း ႁဝ်းၵေႃႈဝူၼ်ႉဝႃႈတေႁဵတ်းၸိူင်ႉၼၼ်ယူႇ”
“တႄႇႁဵတ်းၵႂႃႇယၢမ်းၼႆႉ..မိူဝ်ႈလဵဝ်ၼႆႉၵေႃႈလႆႈယူႇၼႃႇ”
“ၵူၺ်းၵႃႈ ႁူဝ်ၸႂ်ႁဝ်းၼၼ်ႉ ဢမ်ႇလႆႈတဵၼ်ႈႁႅင်း ထိုင်တီႈထိင်းပေႃးဢမ်ႇလႆႈ မိူၼ်မိူဝ်ႈဢွၼ်တၢင်းယဝ်ႉၼႃ”
ၸိုၼ်ႈၶိူဝ်းၼၼ်ႉၵေႃႈ ၵိုင်ႉၵၢင်ႉၶဝ်ႈၸုပ်းသႂ်ႇ ၵႅမ်ႈလိုၼ်းၼုမ်ႇၼၼ်ႉလွႆးလွႆးၵမ်းၼိုင်ႈ လိုၼ်းၼုမ်ႇတမ်ႉ ဢမ်ႇတၼ်းႁူႉတူဝ်ၵွၼ်ႇလႃႈ။
“ၵမ်းၼႆႉလူး!..”
“သမ်ႉဝႃႈႁဝ်းၶႂ်ႈႁဵတ်းၵေႃႈ ႁဝ်းတေႁဵတ်းဢမ်ႇလႆႈယဝ်ႉ ႁဝ်းတေယူႇႁိမ်းၶၢင်ႈသူဢမ်ႇလႆႈ ႁဝ်းမီးၼႃႈႁိူၼ်း မီးလုၵ်ႈဢွၼ်ႇ ဢၼ်ႁဝ်းတေလႆႈဢဝ်ပုၼ်ႈၽွၼ်းၸၢတ်ႈပၼ်ၶဝ်ယူႇယဝ်ႉ..”
“လဵင်ႉလုၵ်ႈၵေႃႉလဵဝ်..သူၵေႃႈတေႁိူဝ်ႉမိူၼ်ၵၼ် တႅၼ်းတီႈတေႁဵတ်းၸိူင်ႉၼၼ် ႁဝ်းလဵင်ႉလုၵ်ႈႁူမ်ႈၵၼ်ဢမ်ႇလီႁိုဝ် ႁဝ်းတေဢမ်ႇယွၼ်းႁႂ်ႈ..သူမႃးယူႇႁိမ်းၶၢင်ႈႁဝ်းယဝ်ႉ ႁဝ်းတေပဵၼ်ၽၢႆႇမႃးယူႇႁိမ်းၶၢင်ႈသူၵူၺ်း”
“တေႁပ်ႉလႆႈယူႇႁႃႉ ႁဝ်းမီးလုၵ်ႈပဵၼ်သွင်ၵေႃႉဢိူဝ်ႈၼႃႈ”
“လႆႈယူႇယဝ်ႉ ႁဝ်းမီးလုၵ်ႈႁူမ်ႈၵၼ်ထႅင်ႈႁေ..သီႇၵေႃႉႁႃႈၵေႃႉၵေႃႈယင်းလႆႈ”
သွင်ၶႃၵေႃႈ ဢုပ်ႇယဝ်ႉၵဝ်းၵၼ်ၼင်ႇမူၼ်ႈမူၼ်ႈသိူဝ်းသိူဝ်းယူႇယဝ်ႉ။
ယၢမ်းၵၢင်ၶိုၼ်းလိုၵ်း ၸိုၼ်ႈၶိူဝ်းဢၼ်ၼွၼ်းလိုဝ်ႈတီႈႁိူၼ်းသၢႆလႅင်းၼၼ်ႉ ၼွၼ်းဢမ်ႇလပ်းသေ ၵႂႃႇတွႆႇၽၵ်းတူႁွင်ႈသၢႆလႅင်းၼၼ်ႉယူႇ။
“သၢႆလႅင်း! လပ်းယဝ်ႉႁႃႉ”
သၢႆလႅင်းၵေႃႈၼွၼ်းဢမ်ႇလပ်းမိူၼ်ၵၼ်လႄႈ ဢွၵ်ႇမႃးၸူးမၼ်းသေယဝ်ႉ သွင်ၶႃၵေႃႈ ဢမ်ႇႁူႉဝႃႈတေဢုပ်ႇလွင်ႈသင် သၢႆလႅင်းၼၼ်ႉၵေႃႈ ၸင်ႇလႆႈၶႆႈၼႄၶိုၼ်း လွင်ႈဢၼ်လိုၼ်းၼုမ်ႇ မႃးယူႇတီႈၼႆႈၼၼ်ႉ ၼႆယဝ်ႉ။
မိူဝ်ႈလိုၼ်းၼုမ်ႇတေဢွၵ်ႇႁူင်းယႃမႃးၼၼ်ႉ မိူၼ်မီးသေလွင်ႈလွင်ႈ တႃႇလၢတ်ႈတီႈသၢႆလႅင်းၼႆလႄႈ ႁွင်ႉထူပ်းသၢႆလႅင်းယူႇတီႈၼႃႈႁူင်းယႃ ၼၼ်ႉယဝ်ႉ။ မိူဝ်ႈတိုၵ်ႉပႂ်ႉယူႇၼၼ်ႉ မီးၽူႈယိင်းၵေႃႉၼိုင်ႈ မႃးဢဝ်ထူင်မၼ်းၵႂႃႇ မၼ်းလႆႈလမ်းၸွမ်းၽူႈယိင်းၵေႃႉၼၼ်ႉသေ သမ်ႉမႅၼ်ႈၽွင်းဢၼ်သၢႆလႅင်း ႁွတ်ႈမႃးဢဝ်လီလီ၊ သၢႆလႅင်းၼၼ်ႉၵေႃႈ လႆႈလႅၼ်ႈလမ်းၵႂႃႇၸွမ်းပႃႈလင်ယဝ်ႉ။ မိူဝ်ႈဢၼ်လိုၼ်းၼုမ်ႇၶၢမ်ႈတၢင်း လမ်းၸွမ်းၵူၼ်းၵေႃႉၼၼ်ႉယူႇၼၼ်ႉ သၢႆလႅင်းၼႅတ်ႈၶုၼ်ႇႁၢဝ်ႉဢဝ်မၼ်းႁူၼ်ပွၵ်ႈၶိုၼ်းလႄႈ ၽွင်းၼၼ်ႉၵေႃႈ ၵူၼ်းၵေႃႉၼၼ်ႉထုၵ်ႇၵႃးလူင်ၽႃႇၵမ်းလဵဝ်သေ ထူင်ဢၼ်ယိပ်းဝႆႉၼၼ်ႉၵေႃႈ ပိဝ်လူင်ဢွၵ်ႇၼွၵ်ႈတၢင်းၵႂႃႇလႄႈ ၵႃးထႅင်ႈလမ်းၼိုင်ႈၵေႃႈ သမ်ႉမႃးၽႃႇသႂ်ႇၵႃးလူင်ၼၼ်ႉယဝ်ႉ။ ၵႃးသွင်လမ်းလႆႈတႅၵ်ႇၽူင်ႉလုၵ်ႉပဵၼ်ၾႆးၵႂႃႇ ၵူၼ်းၵေႃႉၼၼ်ႉၵေႃႈ မႆႈၵႂႃႇၸွမ်းၾႆးယဝ်ႉ ၽႂ်ၵေႃႈဢမ်ႇႁူႉဝႃႈ ၵူၼ်းၵေႃႉၼၼ်ႉပဵၼ်ၽႂ် လႄႈ ဝူၼ်ႉဝႃႈထူင်ၼၼ်ႉ ပဵၼ်ၶွင်ၵူၼ်းတၢႆၵူၺ်းၼႆယဝ်ႉ။
လိုၼ်းၼုမ်ႇဢၼ်လႆႈႁၼ်ပိူင်ပဵၼ်တင်းသဵင်ႈၼၼ်ႉ ပဵၼ်ဢၼ်တူၵ်းဢူၵ်းတူၵ်းၸႂ် ၼႃႇသေ ၼင်ႈယေႃႈလူင်လူင်းၵႂႃႇၵမ်းလဵဝ်။ သၢႆလႅင်းၵေႃႈ လႆႈဢဝ်တူဝ်လိုၼ်းၼုမ်ႇၼၼ်ႉ ၵွင်လင်ဝၢႆႇပႅတ်ႈလွင်ႈဢၼ်ပဵၼ်ၼၼ်ႉသေ ၵွတ်ႇဝႆႉ ယူႇယဝ်ႉ။ လႆႈဝႃႈၽွင်းၼၼ်ႉ လိုၼ်းၼုမ်ႇၵေႃႈ ပဵၼ်ဢၼ်မိုင်ငိူဝ်ႈဝႆႉယူႇၵႅပ်ႉၼိုင်ႈ။ သၢႆလႅင်းဢၼ်ႁၼ်မၼ်း ပဵၼ်ၸိူင်ႉၼၼ်ၵေႃႈ ဢမ်ႇၸၢင်ႈႁဵတ်းႁိုဝ် ၵႃႈလႆႈဢွၼ်မၼ်းၶိုၼ်ႈလူတ်ႉ ဢွၵ်ႇၵႂႃႇယူႇတီႈၵတ်းတီႈယဵၼ် ႁႂ်ႈၸႂ်ပေႃးၼိမ်ယဵၼ်မႃးၼႆလႄႈ ၽွင်းၼၼ်ႉသမ်ႉ ၸိုၼ်ႈၶိူဝ်း ပဵၼ်ၽၢႆႇၵေႃႉလၢတ်ႈမႃးဝႃႈ လိုၼ်းၼုမ်ႇတၢႆၵႂႃႇယဝ်ႉ ၼႆသေ မိူဝ်ႈၸိုၼ်ႈၶိူဝ်းလၢတ်ႈၸိူင်ႉၼၼ်ၵေႃႈ ဢဝ်မၼ်းလၢတ်ႈသင် ပေႃးဢမ်ႇဢွၵ်ႇ ယဝ်ႉ။
“ထတ်းသၢင်တူၺ်းလီယဝ်ႉၶႃႈႁႃႉ ဝႃႈပဵၼ်ၶဝ်”
“ဢိုမ်ႈ! မီးထူင်ၶဝ်တူၵ်းယူႇႁိမ်းၼၼ်ႉ ၽူႈမီးပုၼ်ႈၽွၼ်း ဢၼ်ၵူတ်ႇထတ်းၼႂ်းပိုၼ်ႉတီႈၼၼ်ႉၵေႃႈ လၢတ်ႈဝႃႈပဵၼ်ၶဝ်”
“ၶဝ်ဢမ်ႇပႆႇ…” မိူဝ်ႈဢၢင်ႈလၢတ်ႈၼႄၼၼ်ႉ သမ်ႉငိၼ်းသႅင်မွၼ်းႁွင်ႉမေႃးၼႂ်းၾူင်းၼၼ်ႉမႃး
“ၸိုၼ်ႈၶိူဝ်း! ဢမ်ႇပဵၼ်သင်ၸွင်ႇၸႂ်ႈ”
လိုၼ်းၼုမ်ႇ ဢၼ်လႆႈငိၼ်းၸွမ်းသၢႆလႅင်း ၶေႃႈၵႂၢမ်းၸိုၼ်ႈၶိူဝ်း လၢတ်ႈၵူႈၶေႃႈၼၼ်ႉၵေႃႈ ႁႂ်ႈသၢႆလႅင်းဝၢင်းၽူင်းယဝ်ႉ။
“ႁႂ်ႈႁဝ်းတၢႆၵႂႃႇသေလႄႈ ၽၢတ်ႇတၢႆၼၼ်ႉ လီလိူဝ်သေၽၢတ်ႇလိပ်းယဝ်ႉ ၶဝ်တေဢမ်ႇလႆႈၼွင်ႇႁွႆႈၸႂ်တိတ်းၸွမ်းႁဝ်းၵႂႃႇထႅင်ႈ သူၵေႃႈလၢတ်ႈႁႂ်ႈၶဝ်ပွႆႇႁဝ်းၵႂႃႇလႄႈၼႃႈ”
“ၶဝ်တေတိူဝ်ႉၸႂ်တၢၼ်ႇႁိုဝ်လႃႇ ပေႃးဝႃႈသူထႅင်ႈၵေႃႉၼိုင်ႈ လႆႈတၢႆၵႂႃႇ ၶဝ်တေယူႇၸိူင်ႉႁိုဝ်”
“ၶဝ်ယူႇလႆႈယူႇယဝ်ႉ ဢမ်ႇမီးႁဝ်းၵေႃႈ ၶဝ်မီးၵူၼ်းတူၺ်းထိုင်လုမ်းလႃးၶဝ်ယူႇယဝ်ႉ ႁိမ်းၶၢင်ႈၶဝ်ၼၼ်ႉ ယင်းမီးလႅင်းဢွၼ်ႇ၊ မီးမွၼ်းသႅင် ယဝ်ႉၵေႃႈသူ ၶဝ်တေဢမ်ႇမိူၼ်မိူဝ်ႈပူၼ်ႉမႃးၼၼ်ႉလႆႈယဝ်ႉ ယဝ်ႉၵေႃႈ ႁဝ်း ဢမ်ႇလႆႈလမ်ႇလွင်ႈတွၼ်ႈတႃႇၶဝ်ထိုင်တၢၼ်ႇၼၼ်ႉ..”
“ယဝ်ႉသူလူး..သူတေႁဵတ်းၸိူင်ႉႁိုဝ်လႃႇ”
“ဢွၵ်ႇၵႂႃႇႁႂ်ႈပူၼ်ႉတီႈၼႆႈ ဢွၵ်ႇၵႂႃႇႁႂ်ႈၵႆၵႆ ဢမ်ႇႁႂ်ႈလႆႈထူပ်းၵၼ်ထႅင်ႈ”
“ဢူၺ်းၵေႃႉသူၸိူဝ်းၼၼ်ႉလူး တေႁဵတ်းႁိုဝ်လႃႇ”
“ႁဝ်းၵေႃႈတေပဵၼ်သုၼ်ႇၼိုင်ႈ ဢၼ်လႆႈၸႂ်ႉၸၢတ်ႈပၢၼ်ႁူမ်ႈၵၼ်ၵႂႃႇ ပေႃးၸႂ်ထိုင်ၵေႃႈ တူၺ်းၶႅပ်းႁၢင်ႈဢဝ်ၵေႃႈလႆႈယူႇလူး ပၢၼ်မိူဝ်ႈလဵဝ် ၶိုတ်းၵၢပ်ႈပေႃးတၢၼ်ႇသင်” ယုမ်ႉၸူးသၢႆလႅင်းၵႂႃႇ မိူၼ်လၢတ်ႈဝႃႈဢမ်ႇပဵၼ်သင်ၼႆ ၼၼ်ႉယဝ်ႉ။
“ၶႂ်ႈႁႆႈၵေႃႈႁႆႈလႄႈ..ဝႆႉဝႃႈႁဝ်းပဵၼ်တေႃလွၵ်ႇ ၵူၺ်းၵေႃႈလႆႈ”
ၼမ်ႉတႃဢၼ်ယိုင်ႈႁူၺ်ႇဝႆႉၼၼ်ႉၵေႃႈ လႆၸုမ်ႉလူင်းၼႃႈပေႃးယမ်း သဵင်ဢိုတ်ႇႁႆႈလင်မေႃးယူႇႁိမ်း သၢႆလႅင်းၼၼ်ႉ တင်းႁိုင်ယူႇ။
သၢႆလႅင်းၼၼ်ႉၵေႃႈဢမ်ႇႁူႉဝႃႈ တေဢွၼ်ဢဝ်လိုၼ်းၼုမ်ႇၵႂႃႇတၢင်းလႂ်လႄႈ လိုၼ်းၼုမ်ႇၵေႃႈ ဢမ်ႇႁူႉတေၵႂႃႇလႂ်၊ သၢႆလႅင်းၸင်ႇဢွၼ်မိူဝ်းတီႈႁိူၼ်းၶဝ် ဢၼ်ၵႆဝဵင်းလူင်တၢၼ်ႇတၢၼ်ႇၼၼ်ႉသေ မိူဝ်ႈဢၼ်မိူဝ်းလိုဝ်ႈသဝ်း တီႈႁိူၼ်းသၢႆလႅင်းၼၼ်ႉသမ်ႉ ငိၼ်းၶၢဝ်ႇဝႃႈ မီးလုၵ်ႈဢွၼ်ႇသွင်ၵေႃႉ ၼႂ်းဝၢၼ်ႈၼၼ်ႉ ပေႃႈမႄႈၶဝ်ထုၵ်ႇလူတ်ႉၽႃႇလႄႈ လႆႈလူႉသဵင်ႈတၢႆၵႂႃႇပႅတ်ႈ လၢတ်ႈႁႂ်ႈပီႈၼွင်ႉၶဝ်မႃးဢဝ်မိူဝ်းလဵင်ႉလူၼႆ ၵူၺ်းသမ်ႉဢမ်ႇမႃးဢဝ်လႄႈ ၵူၼ်းၼႂ်းဝၢၼ်ႈၶဝ်ၵေႃႈ လႆႈဢုပ်ႇၵၼ် ထိုင်လွင်ႈလုၵ်ႈဢွၼ်ႇၼႆႉသေ လိုၼ်းၼုမ်ႇဢၼ်လႆႈငိၼ်းမႅၼ်ႈၵေႃႈ ၸင်ႇလႆႈၵႂႃႇႁူပ်ႉလုၵ်ႈဢွၼ်ႇသွင်ၵေႃႉၼၼ်ႉယူႇ မိူၼ်ဝႃႈမၼ်းတေလႆႈၸႂ် လုၵ်ႈဢွၼ်ႇသွင်ၵေႃႉၼႆႉမႃးလႄႈ လႆႈယွၼ်းၵဵပ်းလဵင်ႉၶႃၵႂႃႇယဝ်ႉ။
ၵူၼ်းဝၢၼ်ႈၶဝ်ဢၼ်မႆႈၸႂ် ၵူၼ်းလဵင်ႉလူလုၵ်ႈဢွၼ်ႇသွင်ၵေႃႉၼႆႉၼၼ်ႉၵေႃႈ မိူဝ်ႈမီးၵူၼ်းမႃးဢဝ်ပုၼ်ႈၽွၼ်းၼႆ ယိၼ်းလီပၼ်တၢင်းၸွႆႈထႅမ်ၵူႈလွင်ႈယူႇ မၼ်းလႄႈတင်း ၵူၼ်းၼႂ်းဝၢၼ်ႈၼၼ်ႉၵေႃႈ ပဵၼ်ဢၼ်လီတေႃႇၵၼ်သေ ယိုင်ႈယူႇယိုင်ႈမိုတ်ႈပိုၼ်ႉတီႈၼၼ်ႈ မႃးတိၵ်းတိၵ်းယဝ်ႉလႄႈ မၼ်းၵေႃႈလႆႈပူၵ်းတင်ႈၸၢတ်ႈပၢၼ်မၼ်းၵႂႃႇ တီႈဝၢၼ်ႈၼၼ်ႉ ယူႇယဝ်ႉ။
ၸိုၼ်ႈၶိူဝ်းဢၼ်ႁူႉလွင်ႈတၢင်းမၼ်းၼၼ်ႉၵေႃႈ ယဵၼ်လူင်ၵႂႃႇယဝ်ႉ
“ပဵၼ်သင်လႄႈ..ၶဝ်ဝူၼ်ႉဝႃႈႁဝ်းၼၼ်ႉ ဢမ်ႇလႆႈသူၼ်ၸႂ်ၶဝ်လႃႇ လွင်ႈဢၼ်ႁဝ်းႁဵတ်းတေႃႇၶဝ်ၵူႈလွင်ႈၼၼ်ႉ ဝူၼ်ႉဝႃႈၶဝ်တေပွင်ႇၸႂ်ယူႇ”
“ပဵၼ်ၶႃႈၵေႃႈ ဢမ်ႇပွင်ႇၸႂ်မိူၼ်ၵၼ်”
“ပဵၼ်သင်လႄႈဝႃႈၼၼ်လႃႇ”
“ၶဝ်ႁၵ်ႉသူတေႉတေႉယဝ်ႉ ၵူၺ်းၵႃႈယိုင်ႈႁၵ်ႉသူ ယိုင်ႈမိူၼ်တေတိူဝ်ႉၸႂ်ႁႅင်းၵႃႈၼၼ်ႉယဝ်ႉ၊ ဝၢႆးသေပၢင်သွမ်းပူႇမႃး သူၵေႃႈဢမ်ႇပေႃးသူၼ်ၸႂ်ၼိူဝ်ၶဝ်လႄႈ မီးၶၢဝ်းယၢမ်းၵမ်ႈၼမ်ၵေႃႈ ၵႆႉယူႇၸွမ်းမွၼ်းသႅင်ၵူၺ်း၊ ၶဝ်ငဝ်တၢၼ်ႇႁိုဝ်ၼႆ ၽွင်းၼၼ်ႉ သူယင်းတေဢမ်ႇတၼ်းၾၢင်ႉမႅၼ်ႈလူးၵွၼ်ႇ ၶဝ်ယၢမ်ႈလၢတ်ႈၶႃႈဝႃႈ..ၶဝ်ဢမ်ႇၶႂ်ႈယူႇယဝ်ႉ၊ မၢင်ပွၵ်ႈၵေႃႈ..မႃးႁႆႈတေႃႇၶႃႈ မိူၼ်ၶဝ်တေၼၵ်းၸႂ်တေႉတေႉယဝ်ႉ”
သိုပ်ႇလၢတ်ႈထႅင်ႈ “ၶဝ်ၼၼ်ႉပဵၼ်ၵူၼ်းလီ လီတေႃႇသူတေႉတေႉၼၼ်ႉယဝ်ႉ မိူဝ်ႈပၢင်မႃႇသႃႇပူႇၼၼ်ႉ ၶဝ်တင်းႁဵတ်းၵၢၼ်ယၢမ်းၵၢင်ဝၼ်းလႄႈ လုမ်းလႃးသူပႃးၵၢင်ၶိုၼ်း တူၺ်းထိုင်လႅင်းဢွၼ်ႇပႃးထႅင်ႈ မိူဝ်ႈႁူႉဝႃႈသူဢမ်ႇယူႇႁိူၼ်းၵေႃႈ ၸွမ်းၶႆႈႁႃသူ ထိုင်တီႈပေႃးဢမ်ႇယူႇလီ၊ တႅၼ်းတီႈတေၼွၼ်းလိုဝ်ႈႁိူဝ်ႉ ဢမ်ႇပႆႇၶႅၼ်းသမ်ႉပေႃးၸွမ်းၶႆႈသူယဝ်ႉ ပွၵ်ႈမႃးႁိူၼ်းၶိုၼ်းသမ်ႉ ဢမ်ႇသူၼ်ၸႂ်ၶဝ်ထႅင်ႈႁေ ႁဵတ်းႁႂ်ႈၶဝ်တိူဝ်ႉၸႂ်ထႅင်ႈ ဢၼ်ႁဝ်းႁဵတ်းၼႆႉ ဝူၼ်ႉဝႃႈမၼ်းထုၵ်ႇမႅၼ်ႈယဝ်ႉ”
“မၼ်းၵေႃႈပဵၼ်တၢမ်ႇ..ဢၼ်ႁဝ်းၵိုင်ႇလီလႆႈႁပ်ႉမၼ်းယူႇၵူၺ်း”
ၽုၼ်ႇၽၢၼ်ႇလုၵ်ႉဢွၵ်ႇႁိူၼ်းသေ မိူဝ်းတၢင်းႁိူၼ်းလိုၼ်းၼုမ်ႇၼၼ်ႉၶိုၼ်းယူႇ။ လိုၼ်းၼုမ်ႇဢၼ်တိုၵ်ႉၼွၼ်းယူႇၼၼ်ႉ ၸင်ႇသမ်ႉမီးသဵင်တွႆႇၽၵ်းတူမေႃးမႃးလႄႈ
“လိုၼ်းၼုမ်ႇ!! ၼွၼ်းယဝ်ႉႁႃႉ”
လိုၼ်းၼုမ်ႇဢၼ်လႆႈငိၼ်းၼၼ်ႉၵေႃႈ ႁူႉဝႃႈပဵၼ်သဵင်ၸိုၼ်ႈၶိူဝ်းၼႆသေ ၼႅတ်ႈလုၵ်ႉဢွၵ်ႇမႃးယဝ်ႉ
“သူမီးလွင်ႈသင်ၶႃႈ…”
“ႁဝ်းၼွၼ်းဢမ်ႇလပ်း!.. ႁဝ်းတေတိူဝ်ႉၸႂ်တေႉၼၼ်ႉယဝ်ႉ သင်ဢမ်ႇလႆႈလၢတ်ႈယၢမ်းလဵဝ် ႁဝ်းၵူဝ်တေဢမ်ႇတၼ်းလႆႈလၢတ်ႈ”
“မီးလွင်ႈသင်ၶႃႈ လၢတ်ႈမႃးၶႃႈလႄႈ” တုမ်ႉတွပ်ႇၸူးၶိုၼ်းၼင်ႇယဵၼ်ႇငႄႈဢူၼ်ႈဢွၼ်ႇဝၢၼ်ႁူ။
“မိူၼ်ႁဝ်းၼၼ်ႉ တေထုၵ်ႇၸႂ်သူ ၸဵမ်မိူဝ်ႈထူပ်းႁၼ်ပွၵ်ႈဢွၼ်တၢင်းသုတ်းၼၼ်ႉၵေႃႈပဵၼ်လႆႈ ႁဝ်းၵေႃႈတေႁႃၶေႃႈဢၢင်ႈ ဢၼ်ပုၼ်ႉဢၼ်ၼႆႉယူႇတႃႇသေႇ တႃႇႁႂ်ႈလႆႈႁၼ်သူ လႆႈယူႇၸွမ်းသူ လူၺ်ႈတီႈဢမ်ႇယွမ်းႁပ်ႉဝႃႈ တူဝ်ၸဝ်ႈၵဝ်ႇၼၼ်ႉ လႆႈၸႂ်သူလႄႈ လႆႈႁၵ်ႉမႅၼ်ႈသူၵႂႃႇယဝ်ႉ ဝူၼ်ႉဝႃႈလႆႈယူႇၸွမ်းသူ လႆႈႁၼ်သူၵေႃႈပေႃးယဝ်ႉ ဢမ်ႇၸမ်ပဵၼ်လူဝ်ႇလႆႈသပ်းလႅင်းၼႄသင်ၵေႃႈ ပွင်ႇၸႂ်ယဝ်ႉ ၵူၺ်းၵႃႈ ႁဝ်းၵေႃႈ ဝူၼ်ႉၽၢႆႇႁဝ်း..ၽၢႆႇလဵဝ်ၵူၺ်း ႁဝ်းသေလၢႆလိူဝ်ပိူၼ်ႈၵေႃႈ ႁဝ်းၼၼ်ႉဢမ်ႇတၼ်းလႆႈလၢတ်ႈဝႃႈ ႁဝ်းႁၵ်ႉသူ.. ႁဝ်းႁၵ်ႉသူတေႉယဝ်ႉ”
“ဢမ်ႇလၢတ်ႈၵေႃႈ တူၺ်းသၢႆတႃသူၵူၺ်း ႁဝ်းႁူႉယဝ်ႉၶႃႈ”
“ယဝ်ႉၵေႃႈထႅင်ႈလွင်ႈၼိုင်ႈ ႁႂ်ႈႁဝ်းပဵၼ်ပေႃႈလုၵ်ႈသူလႄႈၼႃႈ ၸွင်ႇတေလႆႈႁိုဝ် ပေႃးဢမ်ႇလႆႈႁဝ်းၵေႃႈ တေဢၢၼ်းႁဵတ်းႁႂ်ႈလႆႈၼၼ်ႉယဝ်ႉ”
“သင်ထဵင်ၶိုၼ်း သူၵေႃႈပေႃးတေဢၢၼ်းႁဵတ်းႁႂ်ႈလႆႈယူႇယဝ်ႉ”
“ဢမ်ႇၼၼ်ၵေႃႈ တေဢၢၼ်းထဵင်ႁႃႉ”
“ဢမ်ႇယဝ်ႉ ႁဵတ်းၵေႃႈႁဵတ်းလႄႈ..”
ၸိုၼ်ႈၶိူဝ်းၵေႃႈ ယုမ်ႉၸူးၼင်ႇမီးၽႅၼ်သေ “ပေႃးၼၼ် ႁဝ်းပဵၼ်ပေႃႈလုၵ်ႈသူၵေႃႈ ပဵၼ်ၸဝ်ႈၽူဝ်သူယဝ်ႉၼႃႈ သူလႄႈတင်းႁဝ်းၼၼ်ႉ ပဵၼ်ၵူၼ်းၼႃႈႁိူၼ်းလဵဝ်ၵၼ်ယဝ်ႉ ”
“လွၵ်းလိင်ႉၼမ်တေႉယဝ်ႉ..”
“ႁႂ်ႈသူႁူႉဝႆႉဝႃႈ ၸၢတ်ႈပၢၼ်ႁဝ်းၼၼ်ႉ ၶၢတ်ႇသူဢမ်ႇလႆႈလႄႈ ဢမ်ႇၶႂ်ႈယူႇလူၺ်ႈဢမ်ႇမီးသူ”
“ႁဝ်းၵေႃႈမိူၼ်ၵၼ်”
ၼႂ်းဝၼ်းဢၼ်တွင်ႉၾႃႉၸိုၼ်ႈပၢင်ႇသႂ် တီႈလၢၼ်ႉၶဝ်ႈသွႆးၼၼ်ႉ လႆႈပိၵ်ႉဢိုတ်းဝႆႉယူႇ ယွၼ်ႉတေမီးၶႅၵ်ႇလွင်ႈယႂ်ႇမႃး ၼၼ်ႉယဝ်ႉ။ လိုၼ်းၼုမ်ႇၼၼ်ႉၵေႃႈ တင်ႈၸႂ်ႁၢင်ႈႁႅၼ်းဝႆႉ တွၼ်ႈတႃႇၶႅၵ်ႇၶဝ်တေႁွတ်ႈမႃးယူႇ။ ၶႅၵ်ႇဢၼ်ႁွတ်ႈမႃးထိုင်ဢွၼ်တၢင်းသုတ်းၼၼ်ႉတႄႉ ပဵၼ်သၢႆလႅင်းယဝ်ႉ လႆႈမႃးၸွႆႈႁဵတ်းၸွႆႈသၢင်ႈလိုၼ်းၼုမ်ႇၵႂႃႇ။ ဢမ်ႇႁိုင်သင်ၵေႃႈ မီးလူတ်ႉၵႃးဢၼ်လုၵ်ႉမႃးၼႂ်းဝဵင်းလူင်ၼၼ်ႉ ၵိုတ်းၸႅၼ်ႇၵၼ်ယူႇတီႈၼႃႈလၢၼ်ႉၼၼ်ႉယူႇ သွင်လမ်း။ တိုၼ်းႁၢၼ်လႄႈသႅင်ႁိူၼ်းၼုမ်ႇ ဢိၵ်ႇတင်းလုၵ်ႈယိင်းဢွၼ်ႇမၼ်းၼၼ်ႉ ၸုင်ၶႅၼ်ၵၼ်သေၶဝ်ႈလၢၼ်ႉမႃးယဝ်ႉ၊ သိုပ်ႇသေၼၼ်ႉၵေႃႈ မီးမူၺ်ႁွမ်လႄႈပိုၼ်းမိူင်းၸွမ်းလင်မႃးယူႇ။ ဢမ်ႇႁိုင် ပီႈၸိင်ႇလႄႈလိူၼ်သႂ်ႁွတ်ႈမႃးသေ ၶဝ်ၵေႃႈ တင်းၸူမ်းတင်းႁႆႈ ဢၼ်လႆႈႁၼ်လိုၼ်းၼုမ်ႇတိုၵ်ႉမီးသၢႆၸႂ်ယူႇ ၼၼ်ႉယဝ်ႉ။
မိူဝ်ႈတိုၵ်ႉဢုပ်ႇၸူမ်းၵၼ်ယူႇၼၼ်ႉ ၸိုၼ်ႈၶိူဝ်းလႄႈလႅင်းဢွၼ်ႇၵေႃႈ ၶဝ်ႈလၢၼ်ႉမႃးသေ လိုၼ်းၼုမ်ႇလႆႈႁၼ်လႅင်းဢွၼ်ႇၼၼ်ႉ ပေႃးၵေႃႉယႂ်ႇၼႃႇယဝ်ႉ၊ လႅင်းဢွၼ်ႇဢၼ်လႆႈႁၼ်လိုၼ်းၼုမ်ႇၼၼ်ႉၵေႃႈ တင်းႁွင်ႉမႄႈ တင်းလႅၼ်ႈၵွတ်ႇသႂ်ႇမၼ်း မိူၼ်မိူဝ်ႈယင်းၵေႃႉလဵၵ်ႉလဵၵ်ႉၼၼ်ႉယူႇ။ ယၢမ်းၼၼ်ႉလုၵ်ႈဢွၼ်ႇသွင်ၵေႃႉၵေႃႈ ႁွင်ႉလိုၼ်းၼုမ်ႇသေ လႅၼ်ႈၵွတ်ႇသႂ်ႇမၼ်းမိူၼ်ၵၼ်ယဝ်ႉ။
“သွင်ၵေႃႉပီႈၼွင်ႉ ပဵၼ်သင်ၵၼ်ၵႂႃႇယဝ်ႉလႃႇ ယူႇယူႇၵေႃႈ..မႃးလႅၼ်ႈၵွတ်ႇမႄႈၸိူင်ႉၼႆ”
“ၶႂ်ႈၵွတ်ႇမိူၼ်ၶဝ်ၽွင်ႈ!! ႁႃးၵေႃႈပဵၼ်လုၵ်ႈမႄႈမိူၼ်ၵၼ်လူး ဢမ်ႇလႆႈႁဵတ်းၸိူင်ႉၶဝ်ႁေပွၵ်ႈ ႁဵတ်းလႆႈယူႇၸွင်ႇၸႂ်ႈႁိုဝ်”
“ဢေႃႈႁဵတ်းလႆႈဢေႃႈ”
လႅင်းဢွၼ်ႇဢၼ်ႁၼ်လုၵ်ႈဢွၼ်ႇသွင်ၵေႃႉၼၼ်ႉၵေႃႈ “ၶဝ်သွင်ၵေႃႉပဵၼ်ၽႂ်လႃႇ!”
“ပဵၼ်လုၵ်ႈမႄႈၼၼ်ႉယဝ်ႉ!”
“ပေႃးၶဝ်ပဵၼ်လုၵ်ႈမႄႈ ယဝ်ႉၸၢႆးလူးဢမ်ႇၸႂ်ႈလုၵ်ႈမႄႈယဝ်ႉႁႃႉ”
“ၸႂ်ႈဢေႃႈ ပဵၼ်လုၵ်ႈမႄႈမိူၼ်ၵၼ်ၼၼ်ႉယဝ်ႉ”
လႅင်းဢွၼ်ႇၸင်ႇထၢမ်ၵႂႃႇ “ယဝ်ႉပေႃႈၶဝ်လူးပဵၼ်ၽႂ်!”
ၸိုၼ်ႈၶိူဝ်းၸင်ႇမႃးၸူးၶဝ်သေ “ပဵၼ်ပေႃႈၼႆႉယဝ်ႉ..ၶဝ်သွင်ၵေႃႉၵေႃႈပဵၼ်ၼွင်ႉလုၵ်ႈၼၼ်ႉၼႃႇ”
တိုၼ်းႁၢၼ်ဢၼ်လႆႈႁၼ်လုၵ်ႈၸိုၼ်ႈၶိူဝ်းၼၼ်ႉယဝ်ႉၵေႃႈ
“ပဵၼ်သင်လႄႈလုၵ်ႈၶႃသွင်ၵေႃႉပေႉၼမ်လႃႇ ပေႃးဢမ်ႇၵဵင်ၸႂ်ၵူၼ်းမီးၼႃႈႁိူၼ်းၶဝ်သေဢိတ်းလူင် သင်တေႇၼႃႈႁိူၼ်းၵေႃႈယင်းဝႃႈ”
သၢႆလႅင်းၼၼ်ႉၵေႃႈလၢတ်ႈၸူးၵႂႃႇၶိုၼ်း “ၶတ်းၸႂ်လႄႈ!”
သႅင်ႁိူၼ်းၼုမ်ႇၼၼ်ႉတႄႉယုမ်ႇယူႇႁဵတ်းၼၼ်ၵူၺ်း။
ၶဝ်ၵေႃႈဢွၼ်ၵၼ်ၵိၼ်ၶဝ်ႈႁူမ်ႈမူႇၵၼ်ၵႂႃႇၼင်ႇမူၼ်ႈမူၼ်ႈသိူဝ်းသိူဝ်းၼၼ်ႉယဝ်ႉ။
ယၢမ်းၵၢင်ၶိုၼ်းလိုၵ်း တီႈၼႂ်းႁိူၼ်းလိုၼ်းၼုမ်ႇၼၼ်ႉ မီးၵူၼ်းၼွၼ်းႁဵတ်းၶႅၵ်ႇတဵမ်လူင်ဝႆႉယဝ်ႉ မူၺ်ႁွမ်ၵေႃႈ ၸင်ႇၸူဝ်းႁွင်ႉဢဝ်လိုၼ်းၼုမ်ႇၼၼ်ႉ ဢွၵ်ႇမႃးဢုပ်ႇၵၼ်တၢင်းၼွၵ်ႈႁိူၼ်းယူႇ။
“လိုၼ်း!..သူၼၼ်ႉ ပဵၼ်ၽူႈယိင်းဢၼ်ၵတ်ႉၶႅၼ်ႇတေႉယဝ်ႉ”
“ယူႇယူႇမႃးလၢတ်ႈၸိူင်ႉၼႆ မီးလွင်ႈသင်လႃႇ”
“ၵေႃႈႁဝ်းၶႂ်ႈလၢတ်ႈၼၼ်ႉၼႃႇ ပေႃးဢမ်ႇလၢတ်ႈမိူဝ်ႈၼႆႉတေႁႂ်ႈလၢတ်ႈမိူဝ်ႈလႂ်”
“ပေႃးမႃးဝူၼ်ႉၶိုၼ်းၵေႃႈ ဢမ်ႇငၢႆႈငၢႆႈမိူၼ်ၵၼ်တႃႇတေမႃးထိုင်လႆႈဝၼ်းမိူဝ်ႈၼႆႉ”
“ႁဝ်းယင်းတွင်းလႆႈယူႇ..လွင်ႈၼွၼ်းၾၼ်သူ ဢၼ်ဝႃႈ ၶႂ်ႈပဵၼ်ၸဝ်ႈၶွင်လၢၼ်ႉၶဝ်ႈသွႆးၼႆ သူႁဵတ်းလႆႈယဝ်ႉၼႃ မၼ်းၵေႃႈဝၢၼ်မိူၼ်ၼင်ႇဢၼ်ဢူႈသူႁဵတ်းၼၼ်ႉလီလီယဝ်ႉ”
“ၸႂ်ႈႁႃႉ..ယင်းတိုၵ်ႉမီးသူယူႇလူးၼေႃႈ ဢၼ်ယၢမ်ႈလႆႈၵိၼ်လၢၼ်ႉၶဝ်ႈသွႆးဢူႈႁဝ်းၼၼ်ႉ”
“ၸႂ်ႈယဝ်ႉ..ႁဝ်းဢမ်ႇတွၼ်ႉလိုမ်းဢရသႃႇမၼ်းလႆႈသေပွၵ်ႈ”
“သမ်ႉဝႃႈလၢၼ်ႉၶဝ်ႈသွႆး ပဵၼ်လွင်ႈၼွၼ်းၾၼ် ဢၼ်ႁဝ်းၶႂ်ႈပဵၼ်လိူဝ်သေပိူၼ်ႈသေတႃႉ ဝၢႆးသေႁဝ်းမီးလႅင်းဢွၼ်ႇမႃး လွင်ႈၼၼ်ႉၵေႃႈလႆႈႁၢႆၵႂႃႇမူတ်းယဝ်ႉ ၵူႈလွင်ႈဢၼ်ၶဝ်ႈမႃးၼႂ်းၸၢတ်ႈပၢၼ် မၼ်းသုၵ်ႉယုင်ႈလႄႈ ဢမ်ႇႁူႉဝႃႈတေႁဵတ်းသင် ႁဝ်းယင်းဢမ်ႇႁူႉၵွၼ်ႇယဝ်ႉဝႃႈ တေမႃးမီးလၢၼ်ႉၶဝ်ႈသွႆး ၸွမ်းၼင်ႇဢၼ်ႁဝ်းမုင်ႈမွင်းဝႆႉဝၼ်းၼၼ်ႉ ၸိူင်ႉၼႆလႆႈၵွၼ်ႇလႃႈ ”
“မၼ်းၵေႃႈႁူႉတိုၼ်းတေပဵၼ်မႃးယူႇယဝ်ႉ သူတင်ႈၸႂ်ၶႂ်ႈႁႂ်ႈမၼ်းပဵၼ်ယဝ်ႉလူး လွင်ႈဢၼ်မုင်ႈမွင်းႁႂ်ႈမၼ်းပဵၼ်ၼၼ်ႉ ဢမ်ႇဝႃႈၸဵဝ်းႁိုဝ်ၼၢၼ်း ပေႃးဢၢၼ်းႁႂ်ႈပဵၼ် မၼ်းၵေႃႈတိုၼ်းပဵၼ်မႃးယူႇယဝ်ႉ”
“ၵေႃႈတေၸႂ်ႈယူႇ မိူၼ်ၼင်ႇယွၼ်းလုၵ်ႈသူ သမ်ႉလႆႈလႅင်းဢွၼ်ႇမႃးလဵင်ႉၼၼ်ႉၼႃႇ”
“လိူဝ်သေလႆႈလုၵ်ႈဢွၼ်ႇယဝ်ႉ သမ်ႉပၢႆလႆႈပႃးပေႃႈမၼ်းထႅင်ႈႁေၵွၼ်ႇႁိုဝ်လႃႇ မိူဝ်ႈလဵဝ်ၵေႃႈ မီးလုၵ်ႈႁူမ်ႈၵၼ်ၵႂႃႇသၢမ်ၵေႃႉယဝ်ႉ ဢမ်ႇဝႆးလိူဝ်ႁဝ်းၼႃႇပူၼ်ႉတီႈႁႃႉ”
“သူၵေႃႈ..ၸဵဝ်းဢဝ်ဢိတ်းၼိုင်ႈလႄႈ.. ၵမ်ႉလုၵ်ႈသူတေလႆႈႁွင်ႉလုၵ်ႈႁဝ်းဝႃႈပႃႈယဝ်ႉ”
“သူၵေႃႈယင်းပႆႇလႆႈတေႇၼႃႈႁိူၼ်းၵၼ်ၼင်ႇၵဝ်ႇ ႁဝ်းတွင်းယူႇၼႃ သူလၢတ်ႈဝႃႈ ပေႃးတေႇၼႃႈႁိူၼ်းယဝ်ႉ တေမီးလုၵ်ႈႁူမ်ႈၵၼ်ထႅင်ႈႁေသွင်ၵေႃႉၼၼ်ႉၼႆ”
“သူၵေႃႈယႃႇပေမီးလုၵ်ႈသေယဝ်ႉ လဵင်ႉၸွႆႈႁဝ်းၵူၺ်းယဝ်ႉလႄႈပေႃးၼၼ်”
“ဢဝ်ၸိူင်ႉၼၼ်ႁႃႉ လီယူႇၼႃ”
ၸၢတ်ႈပၢၼ်လိုၼ်းၼုမ်ႇ ပဵၼ်မႃးၸိူင်ႉႁိုဝ်ၼႆၼၼ်ႉ ယုမ်ႇဝႃႈလႆႈႁူႉၵၼ်မႃးတေႃႇထိုင်တီႈၼႆႈယူႇ မိူဝ်းၼႃႈမႃး ဢမ်ႇဝႃႈတေပဵၼ်လွင်ႈလီႁိုဝ်လွင်ႈၸႃႉႁိုဝ် လိုၼ်းၼုမ်ႇၼၼ်ႉၵေႃႈ မီးလုၵ်ႈလုၵ်ႈပဵၼ်ႁႅင်းၸႂ် တိုၼ်းတေမီးၸိုၼ်ႈၶိူဝ်းယူႇႁိမ်းၶၢင်ႈသေ မီးဢူၺ်းၵေႃႉဢူၺ်းသႄႈ ပၼ်လွင်ႈမူၼ်ႈၸႂ်ဝႆႉယူႇယဝ်ႉ။
သုတ်းယဝ်ႉ။
တွၼ်ႈတႃႇၽူႈတႅမ်ႈလိၵ်ႈၵေႃႈ တေႃႈတေမီးၽူႈပၼ်ႁႅင်းယူႇမိူၼ်ၵၼ်။
ၸွမ်းလူၺ်ႈ ၽူႈတႅမ်ႈလိၵ်ႈၵေႃႈ ဢမ်ႇၸႂ်ႈၽူႈလူင်ႉလႅၼ်ႇ ၽူႈၶႅၼ်ႇပၢႆးႁူႉ ၽူႈႁူႉႁၼ်ၵႂၢင်ႈ တူဝ်ထူပ်းယင်းတိုၵ်ႉၵေႇဢေႇမၢင် လႄႈ ယင်းတိုၵ်ႉမီးတီႈၽိတ်းတီႈပိူင်ႈထႅင်ႈတင်းၼမ် သင်ၸႂ်ႉထွႆႈၵႂၢမ်းဢမ်ႇထုၵ်ႇ၊ ၼမ်ႉၵႂၢမ်းဢမ်ႇၶႅမ်ႉ တူဝ်လိၵ်ႈၽိတ်းပိူင်ႈၼႆၵေႃႈ ယွမ်းၼွမ်းယႂ်ႇယႂ်ႇၼမ်ၼမ်ယူႇဢေႃႈ။
ပၢႆၵမ်−ငဝ်မွင်မိုတ်းမူဝ်း
10 August 2022- 17 February 2023
ယိၼ်းၸူမ်း ဢၼ်ပၼ်ႁႅင်းလိၵ်ႈတႆး ၸိူင်းတႆး လႄႈ လူမႃးတေႃႇပေႃးသုတ်းၶႃႈ။
ႁပ်ႉထွမ်ႇပၼ်ႁႅင်းလူၺ်ႈသဵင်တၢင်း YouTube ၵေႃႈလႆႈၶႃႈ။
