တွၼ်ႈသၢဝ်းဢဵတ်း
ယၢမ်းၵၢင်ၼႂ် သၢႆလႅင်းလႅတ်ႇထွင်ႇပိူင်းၶဝ်ႈၼႂ်းႁူးလႅင်းမႃး ၸိုၼ်ႈၶိူဝ်းဢၼ်တိုၵ်ႉၼွၼ်းလပ်းဝၢၼ်ယူႇၼၼ်ႉၵေႃႈ မီးသဵင်ၽူင်းလင်ႁွင်ႉမေႃးယူႇႁိမ်းႁူၼၼ်ႉယဝ်ႉ။ ဢဝ်မိုဝ်းလၢမ်းလၢမ်းယိပ်းမႃးသႂ်ႇႁူသေ ဝၢႆးသေႁပ်ႉၽူင်းယဝ်ႉၵေႃႈ တႃၼွၼ်းၼၼ်ႉသမ်ႉပေႃးၸိုၼ်ႈမႃးၵမ်းလဵဝ် ႁိပ်ႈၼႅတ်ႈလုၵ်ႉလႅၼ်ႈဢွၵ်ႇႁွင်ႈၵႂႃႇဝႆးဝႆးယူႇ။
လိုၼ်းၼုမ်ႇဢၼ်လႆႈႁၼ်ၸိုၼ်ႈၶိူဝ်းဢွၵ်ႇႁွင်ႈမႃး ယင်းတိုၵ်ႉသႂ်ႇၶူဝ်းၼုင်ႈၼွၼ်းယူႇၼၼ်ႉ ပဵၼ်ဢၼ်ပႅၵ်ႇႁူပႅၵ်ႇတႃႇၼႃႇသေ
“တေၵႂႃႇတၢင်းလႂ်ၶႃႈ!”
“ႁဝ်းတေၵႂႃႇႁူင်းယႃ!” တင်းႁိပ်ႈႁိပ်ႈၼႅတ်ႈၼႅတ်ႈလူင်ၵႂႃႇ ဢမ်ႇသူၼ်ၸႂ်ဝႃႈတူဝ်ၸဝ်ႈၵဝ်ႇပဵၼ်ၸိူင်ႉႁိုဝ်ယဝ်ႉ။
ယူႇဢမ်ႇႁိုင် သၢႆလႅင်းၵေႃႈႁွတ်ႈမႃးသေ မႃးႁပ်ႉဢဝ်လႅင်းဢွၼ်ႇ ၵႂႃႇသူင်ႇႁူင်းႁဵၼ်းယဝ်ႉ၊ လိုၼ်းၼုမ်ႇၼၼ်ႉၵေႃႈ ထၢမ်လွင်ႈထၢမ်တၢင်းတီႈသၢႆလႅင်းယဝ်ႉ လႆႈႁူႉဝႃႈ ပူႇၸိုၼ်ႈၶိူဝ်းၼၼ်ႉ ဢမ်ႇယူႇလီပဵၼ်ႁႅင်းၼႃႇယဝ်ႉ ၼႆယူႇ။
တီႈၼႂ်းႁူင်းယႃလူင်ၼၼ်ႉ ၸဵမ်လုၵ်ႈၸဵမ်လၢၼ်လုင်းၸိုၼ်ႈလႅင်း ဢွၼ်ၵၼ်ပႂ်ႉယူႇၼႃႈႁွင်ႈၵူၼ်းပဵၼ် သမ်ႉပေႃးတဵမ်လူင်ဝႆႉယူႇ။ ၸိုၼ်ႈၶိူဝ်းၼၼ်ႉၵေႃႈ ၽႃႇၽုင်ၵူၼ်းၸိူဝ်းၼၼ်ႉသေ လႅၼ်ႈၶဝ်ႈၵႂႃႇၸူးပူႇမၼ်းၼၼ်ႉၵမ်းလဵဝ် ပူႇမၼ်းၼၼ်ႉၵေႃႈ မိုၼ်းတႃမႃးတူၺ်းမၼ်းသေယဝ်ႉ လုပ်ႈဢဝ်ႁူဝ်မၼ်းလွႆးလွႆးယူႇ။
ၸိုၼ်ႈၶိူဝ်းၼၼ်ႉၵေႃႈ ဢမ်ႇၸၢင်ႈလၢတ်ႈသင်လႆႈ လိူဝ်သေႁွင်ႉႁႆႈဢွၵ်ႇမႃး မိူၼ်ၼင်ႇလုၵ်ႈဢွၼ်ႇၼၼ်ႉတေႃႇၼႃႈပူႇၶဝ်ၵူၺ်း။ ပူႇၵေႃႈ ၸွမ်းၼင်ႇႁႅင်းတိုၵ်ႉမီးၼၼ်ႉ ဢဝ်ဢွၵ်ႇၶိူင်ႈထူၺ်ႈၸႂ်သေယဝ်ႉ လၢတ်ႈၸူး။
“လၢၼ်ပူႇ..ၵေႃႉယႂ်ႇယဝ်ႉ..တေႁွင်ႉႁႆႈၸိူင်ႉၼႆဢမ်ႇလႆႈ..”
“ပူႇတေၵႂႃႇပႅတ်ႈၶႃႈၸိူင်ႉၼႆဢမ်ႇလႆႈ..ဢမ်ႇမီးပူႇယဝ်ႉၶႃႈတေႁဵတ်းႁိုဝ်”
“ဢမ်ႇမီးပူႇယဝ်ႉ..ယႃႇယူႇၵေႃႉလဵဝ်လႄႈၼႃႈ..ထိင်းသိမ်းဝႆႉ ဢၼ်မီးယူႇၼၼ်ႉ..လီလီလႄႈ”
ပူႇၼၼ်ႉမိူၼ်ႁိူဝ်ႉၼႃႇယဝ်ႉလႄႈ မႄးသႂ်ႇၶိူင်ႈထူၺ်ႈၸႂ်ၼၼ်ႉသေ ၼွၼ်းလပ်းၵႂႃႇယဝ်ႉ။
ယၢမ်းဢၼ်ၸိုၼ်ႈၶိူဝ်း တိုၵ်ႉပႂ်ႉပူႇမၼ်းယူႇၼၼ်ႉ ၸင်ႇမီးၽူႈယိင်းၵေႃႉၼိုင်ႈ ၶဝ်ႈမႃးႁႃမၼ်းသေ လၢတ်ႈဢွၵ်ႇမႃးၼင်ႇမႆႈၸႂ်ၼၼ်ႉဝႃႈ
“ပူႇ! ပဵၼ်ၸိူင်ႉႁိုဝ်လႃႇ!”
ၸိုၼ်ႈၶိူဝ်းဝၢႆႇတူၺ်းၽူႈယိင်းၵေႃႉၼၼ်ႉယဝ်ႉ။
“မွၼ်းသႅင်!..”
မွၼ်းသႅင်လႄႈၸိုၼ်ႈၶိူဝ်းၼၼ်ႉ ပဵၼ်ဢူၺ်းၵေႃႉၵၼ်မႃး ၸဵမ်မိူဝ်ႈၵေႃႉလဵၵ်ႉလဵၵ်ႉယဝ်ႉ။ ဢမ်ႇဝႃႈမီးလွင်ႈသင်၊ ပဵၼ်သင်၊ ႁဵတ်းသင်၊ မီးပၼ်ႁႃသင်ၼႆၵေႃႈ ပိုင်ႈဢိင်ၸွႆႈထႅမ်ၵၼ်ယူႇတႃႇသေႇ။ မိူဝ်ႈဢွၼ်တၢင်းၼၼ်ႉ တူဝ်ၵႆႉတိတ်းၵၼ်ၼႃႇလႄႈ ထိုင်တီႈပိူၼ်ႈပေႃးထၢင်ႇဝႃႈၶႃပဵၼ်ၵေႃႉႁၵ်ႉၵၼ်ယဝ်ႉ။ လိူၵ်ႈလိူၵ်ႈၸိုၼ်ႈၶိူဝ်းၼၼ်ႉ ၵိုင်ႉၵၢင်ႉတေႇၼႃႈႁိူၼ်းၵႂႃႇၼႆၵေႃႈ ၵမ်ႈၽွင်ႈယင်းထၢင်ႇဝႃႈ ပဵၼ်မွၼ်းသႅင်လူးၵွၼ်ႇ။ ဝၢႆးသေၸိုၼ်ႈၶိူဝ်းတေႇၼႃႈႁိူၼ်းယဝ်ႉ မွၼ်းသႅင်ၵေႃႈ ၵႂႃႇႁဵတ်းၵၢၼ်ၼွၵ်ႈမိူင်းသေ ၸင်ႇၶိုၼ်းပွၵ်ႈမႃးယၢမ်းၼႆႉၵူၺ်း ၼၼ်ႉယဝ်ႉ။
သမ်ႉဝႃႈမွၼ်းသႅင်ၼၼ်ႉ တေယူႇၵႆသေတႃႉ သွင်ၶႃၵေႃႈ ယင်းၵပ်းသိုပ်ႇတိတ်းတေႃႇဢုပ်ႇၵၼ်တႃႇသေႇ ဢမ်ႇဝႃႈလွင်ႈသင်ၵေႃႈယဝ်ႉ သင်မီးလွင်ႈလူဝ်ႇၸွႆႈၼႆၵေႃႈ ၸွႆႈထႅမ်ၵၼ်ယူႇတႃႇသေႇယဝ်ႉ။
လိုၼ်းၼုမ်ႇဢၼ်ၸွမ်းၸိုၼ်ႈၶိူဝ်းမႃး ႁွတ်ႈထိုင်ႁူင်းယႃၼၼ်ႉ လိူၵ်ႈလိူၵ်ႈသမ်ႉ လႆႈႁၼ်ၸိုၼ်ႈၶိူဝ်း ဢမ်ႇလႆႈသႂ်ႇဝႆႉသိူဝ်ႈၶူဝ်းၼုင်ႈၼွၼ်းယဝ်ႉလႄႈ ပႆဢွၵ်ႇႁူင်းယႃမႃးတင်းၽူႈယိင်းၵေႃႉၼိုင်ႈ ဢၼ်ဢမ်ႇၸမ်ဢမ်ႇၵႆၵၼ်ၼၼ်ႉသေ မိူဝ်ႈလႆႈႁၼ်ၼင်ႇၼၼ်ၵေႃႈ ႁူၼ်လင်ပႅပ်ႉလူတ်ႉဝႆႉၶိုၼ်းယူႇ။ သၢႆလႅင်းဢၼ်မႃးသူင်ႇလိုၼ်းၼုမ်ႇၼၼ်ႉ ဢမ်ႇလႆႈႁၼ်မၼ်း ၵႂႃႇၸူးၸိုၼ်ႈၶိူဝ်းလႄႈ
“ပဵၼ်သင်လႄႈဢမ်ႇၵႂႃႇၶႃႈလႃႇ..”
မၼ်းၵေႃႈ ၶိုၼ်းတူၺ်းထူင်ၶူဝ်းဢၼ်မၼ်းႁၢင်ႈႁႅၼ်းမႃးပၼ်ၶဝ်ၼၼ်ႉသေ
“မိူၼ်ဝႃႈၶဝ်တေဢမ်ႇလူဝ်ႇမၼ်းယဝ်ႉ..”
“သူ..တေၸိူင်ႉႁိုဝ်..ၸွင်ႇတေပွၵ်ႈမိူဝ်းၶိုၼ်းႁိုဝ်”
လိုၼ်းၼုမ်ႇမိုင်ဝူၼ်ႉၵႂႃႇၵႅပ်ႉၼိုင်ႈ “ပူႇပဵၼ်ၸိူင်ႉႁိုဝ်ဝႆႉၶႃႈ..”
“တေလႆႈဝႃႈႁိုဝ်လႃႇ ႁဝ်းၵေႃႈဢမ်ႇၶႂ်ႈမေႃလၢတ်ႈယဝ်ႉ မိူၼ်ဝႃႈ..ပႂ်ႉတူၺ်းၶၢဝ်းယၢမ်းမၼ်းၵူၺ်းၼၼ်ႉယဝ်ႉ”
လိုၼ်းၼုမ်ႇဢၼ်လႆႈငိၼ်းၸိူင်ႉၼၼ်ၵေႃႈ ၸႂ်ႁိုဝ်တေလီလႃႇ။ မိူဝ်ႈယင်းတိုၵ်ႉမိူၼ်ႇမိုင်ယူႇၼၼ်ႉ သဵင်ၾူင်းၵေႃႈလင်မေႃးသေ ၼၼ်ႉတႄႉပဵၼ်ၵူၼ်းၸမ်တူဝ်ပူႇၸိုၼ်ႈၶိူဝ်းၼၼ်ႉယဝ်ႉ မိူၼ်ဝႃႈပူႇၶႂ်ႈထူပ်းလိုၼ်းၼုမ်ႇၼႆယူႇ။
သၢႆလႅင်းၼၼ်ႉၵေႃႈ ဢွၼ်ဢဝ်လိုၼ်းၼုမ်ႇၵႂႃႇထူပ်းလုင်းၸိုၼ်ႈလႅင်းသေ ဢွၼ်တၢင်းတေၽႃႇၶဝ်ႈၽၵ်းတူလႆႈၼၼ်ႉၵေႃႈ သၢႆတႃၵူၼ်းတင်းၼမ်တင်းလၢႆ ယၵ်ႉဝၢႆႇတူၺ်းၸူးမႃးတီႈမၼ်း သမ်ႉပေႃးဢမ်ႇငိူင်ႉဝႄႈလႆႈၼၼ်ႉယဝ်ႉ။
လိုၼ်းၼုမ်ႇၵေႃႈ ၶဝ်ႈၵႂႃႇၼင်ႈတူၺ်း ၵူၼ်းထဝ်ႈဢၼ်ၼွၼ်းယူႇၼၼ်ႉ မိူၼ်ႁၼ်ႁၢင်ႈပေႃႈမၼ်း မႃးယူႇၼႂ်းတႃၼၼ်ႉပဵၼ်ၵမ်းယဝ်ႉ။ မၼ်းၵေႃႈ ၵႂႃႇၼင်ႈယူႇႁိမ်းပူႇၼၼ်ႉသေ။
ပူႇၵေႃႈ ၸွမ်းၼင်ႇႁႅင်းမီးၼၼ်ႉ
“မိူဝ်ႈပူႇဢမ်ႇယူႇယဝ်ႉ..ယိင်းၸွႆႈႁဵတ်းႁႂ်ႈၶဝ်..လႆႈၸႂ်ႉၸၢတ်ႈပၢၼ်..ဢၼ်မီးတၢင်းသိူဝ်းၽွင်ႈၼႃႈ”
မိူဝ်ႈဢၼ်ပူႇလၢတ်ႈမႃးၸိူင်ႉၼၼ်ၼၼ်ႉ ႁဵတ်းႁႂ်ႈမၼ်းဝူၼ်ႉထိုင်ၶိုၼ်း ၶေႃႈၵႂၢမ်းပေႃႈမၼ်းလၢတ်ႈၼၼ်ႉသေ
“ၵဝ်တေတၢႆပႅတ်ႈမႂ်းယဝ်ႉ..မီးသၢႆၸႂ်ယူႇၵေႃႈ..ႁႂ်ႈမီးတၢင်းသိူဝ်းတႃႉ”
လိုၼ်းၼုမ်ႇၼၼ်ႉၵေႃႈ ယုမ်ႉလေႃးၼမ်ႉတႃသေတွပ်ႇၸူးၵႂႃႇ ၼင်ႇတဵမ်ၸႂ်ဝႃႈ
“ဢေႃႈၶႃႈ..”
မွင်းလိုၼ်းၼုမ်ႇပၼ်ၶေႃႈတွပ်ႇၵူၺ်း ပူႇၼၼ်ႉၵေႃႈ ႁႂ်ႈမေႃၶဝ် ဢဝ်ၶိူင်ႈထူၺ်ႈၸႂ်ၸိူဝ်းၼၼ်ႉဢွၵ်ႇယဝ်ႉ ပၼ်ႁႂ်ႈလႆႈပူတ်းသၢႆၸႂ်ၵႂႃႇ လီလီငၢမ်းငၢမ်းယူႇ။ ၵႃႈပဵၼ်ပီႈၼွင်ႉတင်းလၢႆၼၼ်ႉ ဢွၼ်ၵၼ်ႁွင်ႉႁွင်ႉႁႆႈႁႆႈ ယူႇယဝ်ႉ။ ၸိုၼ်ႈၶိူဝ်းဢၼ်ၸုၵ်းယူႇႁိမ်းသႅင်မွၼ်းၼၼ်ႉၵေႃႈ ဢမ်ႇၸၢင်ႈႁဵတ်းႁိုဝ် ၵႃႈလႆႈပွႆႇႁႂ်ႈပူႇမၼ်း ၽၢတ်ႇယၢၼ်ၵႂႃႇၵူၺ်း။ မိူဝ်ႈယူႇၼႂ်းငဝ်းလၢႆးၸိူင်ႉၼၼ် သႅင်မွၼ်းၵေႃႈၵွတ်ႇပၼ်ႁႅင်းၸႂ်မၼ်းၵႂႃႇ။ လိုၼ်းၼုမ်ႇ ဢၼ်ယူႇတၢင်းလင်ၶဝ်ၼၼ်ႉ ႁၼ်ၸွမ်းယူႇၵူႈလွင်ႈယဝ်ႉ။
ၵူၼ်းၼႂ်းၼႃႈႁိူၼ်းလဵဝ်ၵၼ် ဢၼ်တူၺ်းထိုင်လုမ်းလႃးၸိုၼ်ႈၶိူဝ်းမႃးၼၼ်ႉ လိူဝ်သေမႄႈမၼ်းယဝ်ႉ ပူႇမၼ်းၵူၺ်း ဢၼ်လုမ်းလႃးလႄႈသႂ်ႇၸႂ်မၼ်းတႄႉတႄႉ။ သမ်ႉဝႃႈ မီးပေႃႈယူႇၵေႃႈ ပေႃႈၼၼ်ႉ ၵုမ်ႇမိုင်ႉႁဵတ်းၵၢၼ်ၵူၺ်းလႄႈ ဢမ်ႇတၼ်းတူၺ်းထိုင်လုမ်းလႃးသင် ဝၢႆးသေမႄႈမၼ်းလူႉသဵင်ႈတၢႆၵႂႃႇၵူၺ်း ပေႃႈၶဝ်ၵေႃႈလႆႈတေႇၼႃႈႁိူၼ်းမႂ်ႇထႅင်ႈလႄႈ မၼ်းၵေႃႈပဵၼ်ဢၼ်ဢမ်ႇႁၢၼ်ႉၸႂ်တႄႉတႄႉယဝ်ႉ။
လိူဝ်သေၼၼ်ႉ မေးမႂ်ႇပေႃႈၶဝ်ၼၼ်ႉသမ်ႉ ပႃးလုၵ်ႈၸၢႆးမႃးၸွမ်းၵေႃႉၼိုင်ႈ ဢၼ်ပဵၼ်ပီႈၸၢႆးမၼ်း တိုၼ်းမိူင်း ၼၼ်ႉယဝ်ႉ။ ဝၢႆးသေၼၼ်ႉ ပေႃႈၵေႃႈဢမ်ႇပေႃးသႂ်ႇၸႂ်မၼ်းၵႃႈႁိုဝ်လႄႈ မႄႈမႂ်ႇၶဝ်ၼၼ်ႉၵေႃႈ ဢမ်ႇလႆႈသူၼ်ၸႂ်မၼ်းသင်သေဢိတ်း မၼ်းၵေႃႈ ဢမ်ႇပေႃးၵႃႈႁိုဝ်တင်းၼႃႈႁိူၼ်းၼၼ်ႉယဝ်ႉ ၵမ်ႈၼမ်ၵေႃႈ တေယူႇၸွမ်းပူႇၵူၺ်း။ ဝၢႆးသေ တႄႇၼႃႈႁိူၼ်းယဝ်ႉ မေးမၼ်းလူႉသဵင်ႈတၢႆၵႂႃႇပႅတ်ႈၼၼ်ႉ မိူၼ်တေမီးလွင်ႈၵွင်ႉၵၢႆႇၵၼ်တင်း ၵူၼ်းႁိူၼ်းၼၼ်ႉယူႇလႄႈ မၼ်းလႆႈတတ်းၶၢတ်ႇ လွင်ႈၵပ်းသိုပ်ႇၵၼ်ၵႂႃႇပႅတ်ႈယူႇ။
တီႈပၢင်မႃႇသႃႇ ဢၼ်မီးၵူၼ်းမႃးၶဝ်ႈႁူမ်ႈတင်းၼမ်တင်းလၢႆၼၼ်ႉ လိုၼ်းၼုမ်ႇၵေႃႈ ၸွမ်းၼင်ႇတူဝ်ယၢမ်ႈထူပ်းမႃးလႄႈ လွင်ႈဢၼ်တေၸွႆႈလႆႈၼႆၵေႃႈ ၸွႆႈၵႂႃႇတဵမ်တဵမ်ထူၼ်ႈထူၼ်ႈယူႇယဝ်ႉ။ ၸိုၼ်ႈၶိူဝ်းၼၼ်ႉတႄႉ ႁိုဝ်တေပဵၼ်တူဝ်လႆႈယဝ်ႉ ၵုမ်ႇမိုင်ႉၼင်ႈငဝ်ယူႇၵူၺ်း မွၼ်းသႅင်ၼၼ်ႉၵေႃႈ ယူႇႁိမ်းၶၢင်ႈမၼ်း ၸွႆႈပၼ်ႁႅင်းၸႂ်မၼ်းၵႂႃႇယဝ်ႉ။ လိုၼ်းၼုမ်ႇဢၼ်ႁၼ်မွၼ်းသႅင် မီးယူႇႁိမ်းမၼ်းယဝ်ႉၼႆၵေႃႈ ဢမ်ႇလႆႈၵႂႃႇၸူး၊ တေႃႈၼင်ႇၶဝ်ႈၽၵ်းမၼ်းၼၼ်ႉ ႁၢင်ႈႁႅၼ်းပၼ်ႁႂ်ႈသၢႆလႅင်း ဢဝ်ၵႂႃႇပၼ်တီႈမွၼ်းသႅင်ၵူၺ်းယူႇ။
ယၢမ်းၵၢင်ၶိုၼ်းလိုၵ်းယဝ်ႉၼၼ်ႉ ဢမ်ႇပေႃးမီးၵူၼ်းၵႃႈႁိုဝ်ယဝ်ႉလႄႈ လိုၼ်းၼုမ်ႇဢၼ်ၸွႆႈႁဵတ်းၸွႆႈသၢင်ႈ မႃးတင်းဝၼ်းၼၼ်ႉ မိူၼ်တေႁိူဝ်ႉမႃးယဝ်ႉသေ ဢၢၼ်းတေၵႂႃႇလိုဝ်ႈယူႇ။ ၵူၺ်းၵႃႈ လႆႈႁၼ်ၸိုၼ်ႈၶိူဝ်း ၼင်ႈၵိၼ်လဝ်ႈယူႇႁင်းၵူၺ်းမၼ်းလႄႈ မိူၼ်ဝႃႈမွၼ်းသႅင်ၼၼ်ႉၵေႃႈ တေၵႂႃႇလိုဝ်ႈႁိူဝ်ႉမၼ်းယဝ်ႉမိူၼ်ၵၼ်။ လိုၼ်းၼုမ်ႇၸင်ႇၵႂႃႇၼင်ႈၸွမ်းယဝ်ႉ မႄးယိပ်းဢဝ်ၶူတ်ႇလဝ်ႈ ႁိုဝ်ႈသႂ်ႇပၼ်ထႅင်ႈ ၸိုၼ်ႈၶိူဝ်းဢၼ်ႁၼ် မီးၵူၼ်းမႃးၼင်ႈၸွမ်းမၼ်းၼၼ်ႉၵေႃႈ
“သူၵေႃႈတေၵိၼ်ႁႃႉ..”
“ႁဝ်းၵေႃႈၶႂ်ႈၵိၼ်ယူႇ သင်ၸိူဝ်ႉဝႃႈ..မၼ်းလႅၵ်ႈလၢႆႈၵူႈလွင်ႈလႆႈ သင်ၸိူဝ်ႉဝႃႈ..တိုၼ်ႇမႃးယဝ်ႉ လွင်ႈဢၼ်ၵိူတ်ႇၶိုၼ်ႈမႃးၼႆႉ မၼ်းပဵၼ်လွင်ႈၼွၼ်းၾၼ်ၵူၺ်း သမ်ႉဝႃႈႁဝ်းဢမ်ႇမၵ်ႉႁိုဝ် မၼ်းတေမဝ်းပေႃးဢမ်ႇႁူႉႁူဝ်ႁူႉႁၢင်ၵေႃႈ ႁဝ်းၵေႃႈတေၵိၼ်မၼ်းၼၼ်ႉယဝ်ႉ”
“လေႃႇၵွၵ်းၵၼ်” ယုၵ်ႉၵွၵ်းမၼ်းၸူးလိုၼ်းၼုမ်ႇသေယဝ်ႉ ဢိုၵ်ႉၵိၼ်ၵႂႃႇယူႇ။ လိုၼ်းၼုမ်ႇၼၼ်ႉၵေႃႈ ၼင်ႈပႂ်ႉတူၺ်းၶဝ်ၵိၼ်ယူႇႁဵတ်းၼၼ် တေႃႇၶဝ်ပေႃးမဝ်းသေ ၼွၼ်းလူင်းၵႂႃႇၵူၺ်းယဝ်ႉ။ ၽဵဝ်ႈသိမ်းပၼ်ၽိူၼ်လဝ်ႈၶဝ်ယဝ်ႉၵေႃႈ မႄးဢဝ်ၽႃႈႁူမ်ႇပၼ်ၶဝ်သေ မၼ်းၸင်ႇတေလိုဝ်ႈလႆႈယူႇ။
ၼွၼ်းလိုဝ်ႈပႆႇတၼ်းလပ်း သၢႆလႅင်းပေႃးမႃးႁွင်ႉမၼ်း ၵႂႃႇၸွႆႈၵၢၼ်ယဝ်ႉ။ ၵၢင်ၼႂ်ၸဝ်ႉမိူင်းပႆႇလႅင်းၵေႃႈ သမ်ႉပေႃးလႆႈလုၵ်ႉယဝ်ႉလူး။ လိူဝ်သေၵၢၼ်တီႈမႃႇသႃႇယဝ်ႉ တႃႇလႅင်းဢွၼ်ႇတေၵႂႃႇႁူင်းႁဵၼ်းၼၼ်ႉၼႆၵေႃႈ လႆႈႁဵတ်းပၼ်ထႅင်ႈ။ ယင်းလီ ဢၼ်မီးသၢႆလႅင်းႁဵတ်းၸွႆႈမၼ်းလႄႈ ၸွႆႈႁပ်ႉၸွႆႈသူင်ႇပၼ်၊ ပေႃးယဝ်ႉၵေႃႈ မႃးၶိုၼ်းတီႈမႃႇသႃႇသေ ၸွႆႈႁဵတ်းၸွႆႈသၢင်ႈၵႂႃႇ ပေႃးထိုင်ၵၢင်ၶမ်ႈၵၢင်ၶိုၼ်း ၶႅၵ်ႇမိူဝ်းယဝ်ႉၵေႃႈ ၵိုတ်းၵူၼ်းပႂ်ႉဢိတ်းဢွတ်းၵူၺ်း။ ၸိုၼ်ႈၶိူဝ်းၼၼ်ႉၵေႃႈ တေၼင်ႈၵိၼ်လဝ်ႈၵႂႃႇယဝ်ႉ မိူဝ်ႈတႄႇတႄႉၵိၼ်ၵုမ်းပိူၼ်ႈယူႇ ဝၢႆးမႃးၼင်ႇဝႃႈ ၵိုတ်းမၼ်းၵေႃႉလဵဝ်ၵူၺ်းၼၼ်ႉယဝ်ႉ။ လိုၼ်းၼုမ်ႇဢၼ်ပႂ်ႉတူၺ်းၸိုၼ်ႈၶိူဝ်းယူႇၼၼ်ႉၵေႃႈ ႁိုဝ်တေၼွၼ်းလပ်းတႃလႆႈ မႆႈၸႂ်ၶဝ်သေၼင်ႈပႂ်ႉတူၺ်းၶဝ်ၼွၼ်းၵွၼ်ႇယဝ်ႉ မၼ်းၸင်ႇတေၵႂႃႇႁႃၼွၼ်းယူႇ။
ဝၼ်းယဝ်ႉဝၼ်းလိုၼ်းၼုမ်ႇၼၼ်ႉတႄႉ ႁိုဝ်တေလႆႈလိုဝ်ႈ တေႃႇထိုင်ပၢင်မႃႇသႃႇပေႃးယဝ်ႉတူဝ်ႈၵႂႃႇလီငၢမ်း မၼ်းၸင်ႇတေလႆႈလိုဝ်ႈႁိူဝ်ႉလိုဝ်ႈၸႂ်ၵႂႃႇလီလီ။
မိူဝ်ႈၽွင်းဢၼ်တိုၵ်ႉဢၢင်ႈတေလိုဝ်ႈယူႇၼၼ်ႉ ပႃႈဢွင်ႇၵေႃႈ မႃးထၢမ်ထိုင်ၸိုၼ်ႈၶိူဝ်းတီႈလိုၼ်းၼုမ်ႇယူႇ။ လိုၼ်းၼုမ်ႇၼၼ်ႉၵေႃႈ ႁိုဝ်တေၼွၼ်းလႆႈလႃႇမိူဝ်ႈႁူႉၸိူင်ႉၼၼ်
“ဢမ်ႇၸႂ်ႈဝႃႈၶဝ်ယူႇၸွမ်းမွၼ်းသႅင်ၶႃႈႁႃႉ”
“မွၼ်းသႅင်ဢမ်ႇလႆႈႁၼ်ၶဝ်လႄႈ လႆႈမႃးထၢမ်သူၼၼ်ႉယဝ်ႉ”
“ၶဝ်ႁႃၸွတ်ႇယဝ်ႉၶႃႈႁႃႉ..”
“မိူၼ်ဝႃႈၶဝ်တေႁႃတူၺ်းၸွတ်ႇယဝ်ႉ..ၸွင်ႇသူႁူႉႁိုဝ်ဝႃႈၶဝ်လႅပ်ႈတေယူႇတီႈလႂ်”
“ဢမ်ႇႁူႉၶႃႈ..ပေႃးၼၼ်ၶႃႈတေၸွႆႈၵႂႃႇႁႃထႅင်ႈႁႅင်းၼိုင်ႈၶႃႈ..ပႃႈၸွႆႈတူၺ်းပၼ်လႅင်းဢွၼ်ႇၽွင်ႈ”
ႁိပ်ႈႁိပ်ႈၼႅတ်ႈၼႅတ်ႈဢွၵ်ႇၵႂႃႇယူႇ။ ၽွင်းၼၼ်ႉသမ်ႉ မိူၼ်ဝႃႈ ၾႃႉၵုမ်ႈသုမ်ႇလမ်မႃးယူႇ လိုၼ်းၼုမ်ႇၼၼ်ႉၵေႃႈ တင်းသိုပ်ႇၾူင်းႁႃၸိုၼ်ႈၶိူဝ်း တင်းႁႃၵူၼ်းဢၼ်လႅပ်ႈယၢမ်ႈႁူႉၸၵ်း ၸိုၼ်ႈၶိူဝ်းၼၼ်ႉသေထၢမ်တူၺ်း ၶဝ်လႅပ်ႈတေၵႂႃႇတီႈလႂ်ၽွင်ႈၼႆယူႇ။ ၵေႃႉဢၼ်မၼ်းႁူႉလီလိူဝ်ပိူၼ်ႈၼၼ်ႉတႄႉ ပဵၼ်သၢႆလႅင်းၼၼ်ႉယဝ်ႉ သၢႆလႅင်းၼၼ်ႉၵေႃႈ မိူဝ်ႈငိၼ်းၸိူင်ႉၼၼ် ၼႅတ်ႈမႃးႁပ်ႉလိုၼ်းၼုမ်ႇၵႂႃႇႁႃၸွမ်းၵၼ် ယူႇယဝ်ႉ။
သၢႆလႅင်းၼၼ်ႉၵေႃႈ ဢွၼ်လိုၼ်းၼုမ်ႇၵႂႃႇႁႃပေႃးၸွတ်ႇၵူႈတီႈၵေႃႈဢမ်ႇႁၼ် ၸွမ်းႁႃမိူင်းသမ်ႉပေႃးၶမ်ႈၵႂႃႇယဝ်ႉ။ ၽူၼ်ၵေႃႈသမ်ႉတူၵ်းထႅင်ႈႁေ သွင်ၶႃၵေႃႈ လႆႈဢွၼ်ၵၼ်ပွၵ်ႈမိူဝ်းႁိူၼ်းယူႇယဝ်ႉ။ မိူဝ်ႈၵင်ႈၸွင်ႈပႆႁၢင်ႇဢွၵ်ႇလူတ်ႉၵႂႃႇလၢႆယၢင်ႈၵူၺ်း သၢႆလႅင်းယင်းဢမ်ႇပႆႇတၼ်းဝၢႆႇႁူဝ်လူတ်ႉၼၼ်ႉ ၸွင်ႈဢၼ်မၼ်းယိပ်းၼၼ်ႉၵေႃႈ လူၼ်ႇႁူင်ႈတူၵ်းလိၼ်ၵႂႃႇသေ တူဝ်မၼ်းၼၼ်ႉၵေႃႈ ၼွၼ်းလူမ်ႉလူင်းၵႂႃႇ ၼႂ်းၵႄႈသၢႆၾူၼ်ၼၼ်ႉ ယူႇယဝ်ႉ။
သၢႆလႅင်းဢၼ်ႁၼ်ၼၼ်ႉၵေႃႈ ၼႅတ်ႈႁွပ်ႇဢုမ်ႈဢဝ်လိုၼ်းၼုမ်ႇၶဝ်ႈၼႂ်းႁိူၼ်းယဝ်ႉ သိုပ်ႇၾူင်းႁွင်ႉမေႃယႃတူၺ်းထိုင်ၵူၼ်းၼႂ်းၼႃႈႁိူၼ်းၸိုၼ်ႈၶိူဝ်းၼၼ်ႉ မႃးတူၺ်းပၼ်လိုၼ်းၼုမ်ႇယူႇ။
ယွၼ်ႉႁႅင်းဢေႇၵူၺ်းၼႆလႄႈ မေႃၵေႃႈထႅမ်ပၼ်ယႃႁႅင်းသေ ႁႂ်ႈလိုၼ်းၼုမ်ႇ လိုဝ်ႈႁိူဝ်ႉၼမ်ၼမ်ၼႆၵေႃႈ ပွၵ်ႈမိူဝ်းၵႂႃႇယဝ်ႉ။
မွၼ်းသႅင်ၼၼ်ႉၵေႃႈ ၸွမ်းႁႃၸိုၼ်ႈၶိူဝ်း သမ်ႉပေႃးဢမ်ႇႁူႉဝႃႈ တေလႆႈႁႃတီႈလႂ်ယဝ်ႉ။ သၢႆလႅင်းၼၼ်ႉ သမ်ႉဝႃႈၶတ်းၸႂ်ၵပ်းသိုပ်ႇၸိုၼ်ႈၶိူဝ်းယူႇၵေႃႈဢမ်ႇလႆႈ လၢတ်ႈဝႃႈလိုၼ်းၼုမ်ႇဢမ်ႇယူႇလီၼႆၵေႃႈ ယင်းဢမ်ႇတူၺ်းထႅင်ႈလူးၵွၼ်ႇ။ လိုၼ်းၼုမ်ႇဢၼ်ၼွၼ်းယူႇၼၼ်ႉ တိုၼ်ႇမႃးယဝ်ႉၵေႃႈ ထၢမ်ႁႃၸိုၼ်ႈၶိူဝ်းၵမ်းလဵဝ်။ မိူဝ်ႈဝႃႈႁႃပႆႇထူပ်းၼႆၵေႃႈ ၼႅတ်ႈလုၵ်ႉၵမ်းလဵဝ်ယဝ်ႉ ၵူၺ်းၵႃႈ သၢႆလႅင်းႁၢမ်ႈဝႆႉလႄႈ မၼ်းၸင်ႇတေသိုပ်ႇလိုဝ်ႈၵႂႃႇထႅင်ႈယူႇ။
သမ်ႉဝႃႈမၼ်းတေၵႂႃႇၸွမ်းႁႃၸိုၼ်ႈၶိူဝ်းၼႆသေတႃႉ ဢမ်ႇႁူႉဝႃႈမၼ်းတေလႆႈၵႂႃႇႁႃတီႈလႂ်လူးၵွၼ်ႇ ပေႃးဝူၼ်ႉတူၺ်းယဝ်ႉ မၼ်းယင်းဢမ်ႇႁူႉလွင်ႈၸိုၼ်ႈၶိူဝ်းၼၼ်ႉသေဢိတ်းလူး။
သၢႆလႅင်းၼၼ်ႉၵေႃႈ ၶတ်းၸႂ်ၸွမ်းႁႃၸိုၼ်ႈၶိူဝ်းၼၼ်ႉ ပေႃးမီးၵႂႃႇသၢမ်ဝၼ်းယဝ်ႉ တီႈဢၼ်ထၢင်ႇပိူင်ႈဝႃႈၶဝ်လႅပ်ႈတေယူႇၼၼ်ႉၵေႃႈဢမ်ႇႁၼ်။ မၼ်းၵေႃႈလၢတ်ႈၼႄတီႈလိုၼ်းၼုမ်ႇၵႂႃႇသေ လိုၼ်းၼုမ်ႇၼၼ်ႉၵေႃႈ မိူၼ်ဝူၼ်ႉသေလွင်ႈလွင်ႈမႃးလႆႈလႄႈ
“ၶဝ်ယၢမ်ႈမီးတီႈမၢႆတွင်းၸွမ်းပူႇၶဝ်တီႈလႂ်ၽွင်ႈ ၸွင်ႇသူလႅပ်ႈတေႁူႉႁိုဝ် မိူဝ်ႈၵေႃႉလဵၵ်ႉလဵၵ်ႉၸိူဝ်းၼႆႉၵေႃႈလီ”
သၢႆလႅင်းမိုင်ဝူၼ်ႉၵႂႃႇၵႅပ်ႉၼိုင်ႈ မိူၼ်တေဝူၼ်ႉလႆႈမႃးသေယဝ်ႉ “ဢေႃႈ မိူဝ်ႈၵေႃႉလဵၵ်ႉၶဝ်လႄႈတင်းမႄႈၶဝ် ၵႆႉဢွၼ်ၵၼ်ၵႂႃႇလႄႇ ပူႇလႄႈတင်းၼၢႆးတီႈဝၢၼ်ႈၼွၵ်ႈၼၼ်ႉ..”
“ၵႂႃႇလႃႈ ၵႂႃႇတူၺ်းတီႈၼၼ်ႈလႃႇ!” လိုၼ်းၼုမ်ႇၵေႃႈ ႁိပ်ႈၼႅတ်ႈလူင်းၵူႇႁၢင်ႈႁႅၼ်းတူဝ် တႃႇၵႂႃႇၸွမ်းသၢႆလႅင်းၼၼ်ႉၵမ်းလဵဝ်ယဝ်ႉ။
“တီႈၼၼ်ႈမၼ်းၵႆဢေႃႈ..ၵႂႃႇၵၢင်ဝၼ်းၸိူင်ႉၼႆ တေႁွတ်ႈၵေႃႈမွၵ်ႈႁူဝ်ၶမ်ႈၼႆႉၵႂႃႈ တၢင်းၵေႃႈၶႂ်ႈယၢပ်ႇဝႆႉဢိတ်းၼိုင်ႈ”
“ဢမ်ႇပဵၼ်ႁင် ႁဝ်းၵႂႃႇလႆႈယူႇ”
သွင်ၶႃၵေႃႈ လႆႈဢွၼ်ၵၼ်ၵႂႃႇယူႇယဝ်ႉ။ မိူဝ်ႈဢၼ်ႁွတ်ႈၵႂႃႇတီႈၼႂ်းဝၢင်းႁိူၼ်း လင်ၼိုင်ႈၼၼ်ႉ ၵၢင်ၶမ်ႈလပ်းသိင်ႇၸွမ်ႉႁွမ်ႉ ၾႆးလႅင်းဝွႆးဝွႆးယူႇၼႂ်းႁိူၼ်းၼၼ်ႉ ၸူဝ်းၵၼ်ၶဝ်ႈၼႂ်းႁိူၼ်းၵႂႃႇတူၺ်းယဝ်ႉ။ ယၢမ်းၼၼ်ႉၵေႃႈ လႆႈႁၼ်ၸိုၼ်ႈၶိူဝ်း ၼင်ႈႁေၵိၼ်လဝ်ႈယူႇႁင်းၵူၺ်းမၼ်း။ ၼႂ်းႁိူၼ်းၼၼ်ႉၵေႃႈ တဝ်ႈလဝ်ႈသမ်ႉပေႃးတဵမ်လူင်ၵႂႃႇမူတ်း။
ယၢမ်းၵၢင်ၼႂ်ၸဝ်ႉ လူမ်းထူဝ်းထွင်းၶဝ်ႈမႃးယူႇၼႂ်းႁူးလႅင်း သၢႆလႅတ်ႇဢုၼ်ႇဢုၼ်ႇဢွၼ်ႇ ထွင်ႇၶဝ်ႈၽတ်ႉတႃ ၸိုၼ်ႈၶိူဝ်းတိုၼ်ႇမႃးယဝ်ႉၵေႃႈ ၼင်ႇႁၢင်ႈပေႃးၸိုၼ်ႈပၢင်ႇလူင်မႃးယူႇ ယွၼ်ႉပိူဝ်ႈၼႂ်းႁိူၼ်းဢၼ်ဝၢၵ်ႇဝိူဝ်လူင်ၼၼ်ႉၵေႃႈ သမ်ႉပေႃးၸိုၼ်ႈၸၢင်ႇမူတ်းသႂ်လီၼႃႇယဝ်ႉ။ မွင်းလုၵ်ႉၸုၵ်းမႃးၵူၺ်း သဵင်ဢၼ်မိုတ်ႈႁူၼၼ်ႉၵေႃႉ ႁွင်ႉၸူးမၼ်းၵႂႃႇ
“တိုၼ်ႇယဝ်ႉၶႃႈႁႃႉ..”
လွမ်ႁႃတူၺ်းတၢင်းမႃးသဵင်ၼၼ်ႉ မိူၼ်တေမေႃးမႃးတၢင်းသွင်ႇၾႆးလႄႈ မၼ်းၵေႃႈပႆၵႂႃႇတူၺ်းယဝ်ႉ လႆႈႁၼ်လိုၼ်းၼုမ်ႇႁုင်မိုဝ်ႉဝႆႉယူႇသေ
“မႃးတီႈၼႆႈလႆႈၸိူင်ႉႁိုဝ်..”
“သၢႆလႅင်းမႃးသူင်ႇ..”
“ဝႃႈယဝ်ႉႁူႉၵူႈလွင်ႈတေႉလူး..ၵႂႃႇတၢင်းလႂ်ယဝ်ႉလႃႇ”
“ပွၵ်ႈမိူဝ်းၸဵမ်ၸဝ်ႉယဝ်ႉ..ယွၼ်ႉပိူဝ်ႈပေႃႈလဵင်ႉၶဝ်ဢမ်ႇယူႇလႄႈ မိူၼ်တေၼႅတ်ႈမိူဝ်းႁဵတ်းၵၢၼ်ၼၼ်ႉယဝ်ႉ”
“သူမႃးၼွၼ်းတီႈၼႆႈႁႃႉ!”
“ဢိုမ်ႈ!!”
“တင်းသၢႆလႅင်းႁေၼႃ ၼွၼ်းတီႈလႂ် ပဵၼ်သင်လႄႈဢမ်ႇႁူႉလႃႇ ႁဵတ်းႁိုဝ်ၼွၼ်းၵၼ်လႃႇ ႁိူၼ်းၵေႃႈဢမ်ႇလႆႈယႂ်ႇသင်လူး ႁဝ်းယင်းဢမ်ႇႁၼ် ဢမ်ႇၸႂ်ႈဝႃႈ..” သၢႆတႃယၵ်ႉတူၺ်းၵႂႃႇၼႂ်းႁွင်ႈၼွၼ်း ဢၼ်မီးႁွင်ႈလဵဝ်ၵူၺ်းၼၼ်ႉယူႇ။
လိုၼ်းၼုမ်ႇယၵ်ႉတူၺ်းၼႃႈမၼ်းသေယဝ်ႉ
“လိူဝ်သေၵူၼ်းမဝ်းလဝ်ႈ ၽႂ်သမ်ႉတေၼွၼ်းလႆႈလႃႇတၢင်းၼွၵ်ႈႁိူၼ်းၸိူင်ႉၼႆ”
ႁႅၼ်းၽိုၼ်ၶဝ်ႈဝႆႉသေယဝ်ႉႁွင်ႉမၼ်းမႃးၵိၼ်ၶဝ်ႈၵႂႃႇယူႇ။
“သူလႄႈတင်းၶဝ် ၼင်ႈၵိၼ်လဝ်ႈၸွမ်းၵၼ်တင်းၶိုၼ်းယဝ်ႉ ဢမ်ႇတွင်းၵွၼ်ႇႁႃႉ..”
“ဢမ်ႇတွင်းသင်လႆႈတေႉဢိူဝ်ႈ..”
“ၸွင်ႇတေၵိၼ်ထႅင်ႈႁႃႉ ႁဝ်းတေၵႂႃႇႁႃသိုဝ်ႉမႃးပၼ်..ယူဝ်တေၸၢင်ႈလိုမ်းပႃးႁဝ်းၵေႃႈပဵၼ်လႆႈ”
“ပဵၼ်သင်လၢတ်ႈၸိူင်ႉၼၼ်လႃႇ..သူၼၼ်ႉ..ႁဝ်းတေလိုမ်းမၼ်းလႆႈၸိူင်ႉႁိုဝ်”
“ယႃႇမႃးႁႃလၢတ်ႈလဵၼ်ႈယူႇလႃႈ ပေႃးႁဝ်းဢမ်ႇမႃးသူၵေႃႈတေလိုမ်းႁဝ်းၵႂႃႇယဝ်ႉၸွင်ႇၸႂ်ႈ”
ၸိုၼ်ႈၶိူဝ်းၼၼ်ႉ မိုင်ယၵ်ႉတူၺ်းၼႃႈလိုၼ်းၼုမ်ႇသေ “လီႁၵ်ႉတေႉယဝ်ႉ..”
“ႁႃ!..” ႁဵတ်းမိူၼ်ဢမ်ႇပေႃးလႆႈငိၼ်းလီသေၶႂ်ႈထၢမ်ၶဝ်ထႅင်ႈၼၼ်ႉယဝ်ႉ။
“ဢမ်ႇငိၼ်းၵေႃႈ တိူင်းမၼ်းလႃႈ”
တွၼ်ႈသၢဝ်းဢဵတ်းသုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈသၢဝ်းသွင်ၶႃႈ။
ႁပ်ႉထွမ်ႇပၼ်ႁႅင်းလူၺ်ႈသဵင်တၢင်း YouTube ၵေႃႈလႆႈၶႃႈ။
