တွၼ်ႈသၢဝ်းသၢမ်
ယၢမ်းၵၢင်ၼႂ်လႃႈ လိုၼ်းၼုမ်ႇတိုၼ်ႇမႃးယဝ်ႉၵေႃႈ ဢွၵ်ႇႁွင်ႈၼွၼ်းမႃးသေ တီႈႁိူၼ်းလူင်ၼၼ်ႉ ဢမ်ႇလႆႈႁၼ်ၽႂ်လႄႈ သမ်ႉပေႃးယဵၼ်လူင်ဝႆႉယဝ်ႉ။ မိူၼ်ၵူႈဝၼ်း ပေႃးဝႃႈလႅင်းဢွၼ်ႇၵႂႃႇႁူင်းႁဵၼ်း ၸိုၼ်ႈၶိူဝ်းၵႂႃႇႁဵတ်းၵၢၼ်ၵေႃႈ မီးမၼ်းၵေႃႉလဵဝ်ၵူၺ်း ယူႇတီႈႁိူၼ်း။ မိူၼ်ဝႃႈ မွၼ်းသႅင်ၵေႃႈ တေဢွၵ်ႇႁိူၼ်းၵႂႃႇၸွမ်းၸိုၼ်ႈၶိူဝ်း ၼၼ်ႉယဝ်ႉ။
ဝၼ်းယဝ်ႉဝၼ်း မွၼ်းသႅင်လႄႈၸိုၼ်ႈၶိူဝ်းၼၼ်ႉ ယူႇၸွမ်းၵၼ်တႃႇသေႇ၊ ဢမ်ႇဝႃႈၵႂႃႇတၢင်းလႂ် ၵႂႃႇႁဵတ်းၵၢၼ်ၵေႃႈ ၸွႆႈႁဵတ်းၸွႆႈသၢင်ႈၸွမ်းၵၼ်၊ ပေႃးဝႃႈသွင်ၶႃယူႇၸွမ်းၵၼ်ၼႆ လိုၼ်းၼုမ်ႇၼၼ်ႉ ဢမ်ႇပေႃးၶႂ်ႈၶဝ်ႈသုၵ်ႉယုင်ႈသင်ၸွမ်းၵႃႈႁိုဝ်။ တေဝႃႈႁိုဝ်ၵေႃႈ ၶဝ်ပဵၼ်ၵူၼ်းမိုတ်ႈၵိုဝ်းၵၼ်မႃး ပဵၼ်သိပ်းသိပ်းပီႊယဝ်ႉလူး။
မွၼ်းသႅင် ဢၼ်ပဵၼ်ၵူၼ်းယဵၼ်ႇငႄႈ ႁၢင်ႈလီမေႃဢုပ်ႇလၢတ်ႈ ႁဵတ်းၵၢၼ်ၵေႃႈၶႅၼ်ႇ လႄႈ လႅင်းဢွၼ်ႇၼၼ်ႉၵေႃႈ လႆႈၸႂ်ယူႇၸွမ်းမၼ်းမိူၼ်ၵၼ်ယဝ်ႉ။ ပေႃးဝႃႈၶဝ်သၢမ်ၵေႃႉယူႇၸွမ်းၵၼ်ၼႆ လိုၼ်းၼုမ်ႇၼၼ်ႉၵေႃႈ ၶတ်းၸႂ်သုတ်ႉဢွၵ်ႇႁၢင်ႇၶဝ်ၵႂႃႇ ဢမ်ႇၶဝ်ႈယႃႉၵဝ်းၸွမ်းသင် သမ်ႉဝႃႈတေၸႂ်လဵၵ်ႉ၊ တေတိူဝ်ႉၸႂ်ယူႇၵေႃႈယဝ်ႉ ဢမ်ႇႁတ်းလၢတ်ႈဢွၵ်ႇ လႄႈ ယူႇယဵၼ်ယဵၼ်ၵႂႃႇႁဵတ်းၼၼ်ၵူၺ်း။
မိူဝ်ႈပဵၼ်ၸိူင်ႉၼၼ် လွင်ႈထုၵ်ႇပွႆႇၽႃႈဢၼ်ဝႃႈၼၼ်ႉ လႆႈႁူပ်ႉမၼ်းယဝ်ႉ၊ ယိူင်းဢၢၼ်းဢၼ်မႃးတီႈၼႆႈၵေႃႈ ၸမ်တေဢွင်ႇမၢၼ်ယဝ်ႉ။ တႅၼ်းတီႈတေၸွမ်းၶႅၼ်သီး ၸွမ်းႁႄႉႁၢမ်ႈ ၵူၼ်းဢၼ်ဢမ်ႇမီးသုၼ်ႇ ဢမ်ႇၸႂ်ႈသင်ၵၼ်ၼၼ်ႉၵေႃႈ ႁူႉၵႃႈတေလႆႈႁူၼ်လင်ၵႂႃႇတိၵ်းတိၵ်းၵူၺ်း။ သမ်ႉဝႃႈ ၶဝ်ယူႇၸွမ်းၵၼ် ႁၼ်မီးတၢင်းသိူဝ်း မီးလွင်ႈဢုၼ်ႇၸႂ်ပၼ်ၵၼ် မၼ်းၼၼ်ႉတႄႉ ၵႂႃႇလၵ်ႉႁႆႈယူႇႁင်းၵူၺ်းယဝ်ႉ။
မၢင်ပွၵ်ႈ သၢႆလႅင်းဢၼ်မႃးႁဵတ်းၵၢၼ်တီႈႁိူၼ်းၼၼ်ႉ ႁၼ်မၼ်းယူႇၵေႃႉလဵဝ်ၼႆၵေႃႈ မႃးၼင်ႈပဵၼ်ၵေႃႉသေ ဢုပ်ႇၵၼ်ၵႂႃႇ၊ လိုၼ်းၼုမ်ႇ ဢၼ်မီးလွင်ႈၶမ်ဢူၵ်းၶမ်ၸႂ် ဢမ်ႇမီးၽႂ်ႁပ်ႉထွမ်ႇၼၼ်ႉ မၢင်လွင်ႈမၢင်ဢၼ်ၵေႃႈ ဢုပ်ႇလၢတ်ႈၸူးသၢႆလႅင်းၵႂႃႇယူႇ။ သွင်ၶႃၼၼ်ႉၵေႃႈ ၼင်ႇဝႃႈ ပဵၼ်ဢူၺ်းၵေႃႉလီၵၼ်ၵႂႃႇ ယူႇယဝ်ႉ။
ယၢမ်းႁူဝ်ၶမ်ႈလပ်းသိင်ႇၸွမ်ႉႁွမ်ႉ ၼႂ်းႁွင်ႈႁဵၼ်းဢၼ်ပဝ်ႇလူင်ဝႆႉၼၼ်ႉ လိုၼ်းၼုမ်ႇလႄႈ ပီႈၶမ်း လႆႈမႃးႁူပ်ႉထူပ်းၵၼ်ယူႇ။
“ဝၼ်းၼၼ်ႉ..လွင်ႈဢၼ်ၶႃႈထၢမ်ၼၼ်ႉ ပီႈႁူႉယူႇၸွင်ႇၸႂ်ႈ”
“ဢိုမ်ႈ!..”
“ပီႈယူႇၸွမ်းၵူၼ်းႁိူၼ်းၼၼ်ႉမႃးတင်းႁိုင် ၶဝ်ပဵၼ်ၵူၼ်းၸိူင်ႉႁိုဝ်လႃႇ ၶႃႈဢမ်ႇၵတ်းယဵၼ်ၸႂ်သေဢိတ်း ဢၼ်လႆႈဢဝ်လႅင်းဢွၼ်ႇမႃးယူႇတီႈၸိူင်ႉၼၼ်”
“လႆႈငိၼ်းသင်မႃးၸွင်ႇၸႂ်ႈႁိုဝ်..”
လိုၼ်းၼုမ်ႇဝူၼ်ႉထိုင်ၶိုၼ်း တီႈပၢင်မႃႇသႃႇ ဢၼ်မၼ်းလႆႈငိၼ်း ၵေႃႉပဵၼ်မႄႈသိုပ်ႇၸိုၼ်ႈၶိူဝ်းၼၼ်ႉ လၢတ်ႈၾူင်းၸူးၽႂ်သေၵေႃႉၼိုင်ႈ မိူၼ်တေငိၼ်းၸူမ်းတေႉၸူမ်းဝႃႈ လွင်ႈဢၼ်ပူႇၸိုၼ်ႈၶိူဝ်းတၢႆပႅတ်ႈလႄႈ
“ပႂ်ႉမႃးၶၢဝ်းတၢင်း 15 ပီႊ ဝၼ်းမိူဝ်ႈၼႆႉၵေႃႈမႃးထိုင်၊ ၵိုတ်းၶဝ်ၵေႃႉလဵဝ်ၵူၺ်း ႁဝ်းၸတ်းၵၢၼ်ငၢႆႈယူႇယဝ်ႉ ဢမ်ႇမိူၼ်ၶိင်းထဝ်ႈၼၼ်ႉ..လုၵ်ႈၸၢႆးၶဝ်ၵေႃႉၼၼ်ႉႁႃႉ ဢမ်ႇလႆႈသူၼ်ၸႂ်ၼႃႈၵၢၼ်တႃငၢၼ်းတီႈႁိူၼ်းၶဝ်ယူႇယဝ်ႉ လိုၼ်းသုတ်းမႃးၵေႃႈ တေပဵၼ်ၶွင်ႁဝ်းၵူၺ်း တမ်းၸႂ်လႆႈယူႇၼႃႈ” တင်းလၢတ်ႈတင်းယုမ်ႉ မိူၼ်ဢမ်ႇၸႂ်ႈပၢင်မႃႇသႃႇသေဢိတ်းၼၼ်ႉယဝ်ႉ။ လိုၼ်းၼုမ်ႇၵေႃႈ ဢဝ်လွင်ႈၼႆႉ လၢတ်ႈၼႄပီႈၶမ်းၵႂႃႇယဝ်ႉ။
“ဢမ်ႇဝႃႈႁဝ်းတေၵႂႃႇတၢင်းလႂ် တေႁဵတ်းသင် တေလၢတ်ႈတေႃႇၽႂ် ၶဝ်ၵေႃႈ..သူင်ႇၵူၼ်းၸွမ်းႁဝ်းတႃႇသေႇၼၼ်ႉယဝ်ႉ”
“ပဵၼ်သင်လႃႇ..”
“ႁဝ်းမိူၼ်ပဵၼ်ၽူႈၶဵၼ်လႄႈ ပဵၼ်ၵူၼ်းဢၼ်ၶဝ် ၾၢင်ႉယူႇတႃႇသေႇၼၼ်ႉယဝ်ႈ”
လိုၼ်းၼုမ်ႇငွၵ်ႈတူၺ်းၸွၵ်ႉတူၺ်းၸဵင်ႇႁေ
“မိူဝ်ႈလဵဝ်ၵေႃႈမီးယူႇႁႃႉ”
“တေဢမ်ႇမႃးၸွမ်းလႆႈယဝ်ႉၼင်ႇၵဝ်ႇ ယွၼ်ႉပိူဝ်ႈႁဝ်းလၵ်ႉလၢႆႈသဵၼ်ႈတၢင်းပႅတ်ႈ”
“ပဵၼ်သင်လႄႈ ၶဝ်တေလႆႈႁဵတ်းၸိူင်ႉၼၼ်လႃႇ”
“ၶဝ်ပဵၼ်ၵူၼ်းႁႅမ်ၼွင်ႉၸၢႆးႁဝ်းယဝ်ႉ.. ၵူဝ်ဝႃႈ..ႁဝ်းတေပဵၼ်ၽူႈၶဵၼ်ၶဝ်ႁေ ႁၵ်းလင်ၶဝ်ၶိုၼ်းၼၼ်ႉၼႃႇ ထႅင်ႈလွင်ႈၼိုင်ႈၵေႃႈ ႁဝ်းႁူႉႁဝ်းႁၼ်ၸွမ်း လွင်ႈဢမ်ႇလီဢၼ်ၶဝ်ႁဵတ်းလႄႈ ႁဵတ်းလွင်ႈဢမ်ႇလီပၼ်ၶဝ်ၼၼ်ႉယဝ်ႉ ပေႃးပဵၼ်သင်သေလွင်ႈလွင်ႈမႃးၵေႃႈ ႁဝ်းၵေႃႉတေပဵၼ် ၵူၼ်းၵေႃႉလႆႈၶၢမ်ႇတႅၼ်းတၢင်ၶဝ်ၼၼ်ႉၼႃႇ ၶဝ်ၼၼ်ႉ ႁဵတ်းလွင်ႈဢမ်ႇလီတင်းၼမ် ႁူမ်ႈပႃးလွင်ႈလႅင်းဢွၼ်ႇ လႄႈ မႄႈလႅင်းဢွၼ်ႇ ဢၼ်လႆႈလူႉသဵင်ႈတၢႆၵႂႃႇၼၼ်ႉယဝ်ႉ” သိုပ်ႇလၢတ်ႈထႅင်ႈ
“လွင်ႈဢၼ်ၸၢႆးၸွမ်လႆႈလူႉတၢႆၵႂႃႇၼၼ်ႉၵေႃႈ ယွၼ်ႉပဵၼ်ၽူႈႁူမ်ႈႁူႉႁၼ်ၸွမ်း လွင်ႈလႅင်းဢွၼ်ႇၼၼ်ႉယဝ်ႉ ၶဝ်ယဵၼ်ႉၸႂ်ဢမ်ႇလႆႈသေ ဢမ်ႇၶႂ်ႈယူႇႁိူၼ်းလင်ၼၼ်ႉလႄႈ လႆႈပၢႆႈၵႂႃႇ တေႃႇထိုင်ပိူၼ်ႈၺွပ်းၶဝ်လႆႈ ႁဝ်းၸင်ႇတေႁူႉဝႃႈၶဝ်တိုၵ်ႉမီးသၢႆၸႂ်ယူႇ မိူဝ်ႈႁဝ်းဢၢင်ႈတေၵႂႃႇၸႂ်းၶဝ် ႁဝ်းၵေႃႈ ထုၵ်ႇႁၢမ်ႈဝႆႉလႄႈ ၽိူဝ်ႇႁဝ်းလႆႈၶႂၢင်ႉၵေႃႈ..ၶဝ်ပေႃးဢမ်ႇမီးၸႂ်ယဝ်ႉ”
“ၶႂ်ႈဝႃႈ..ပီႈဢမ်ႇလႆႈၵႂႃႇၸႂ်းၶဝ်ႁႃႉ..ၶႃႈငိၼ်းဝႃႈပီႈၵေႃႈၵႂႃႇၸႂ်းၶဝ်ယူႇဢမ်ႇၸႂ်ႈႁိုဝ်”
“ၶဝ်ဢၢင်ႈၸိုဝ်ႈႁဝ်းသေၶဝ်ႈၵႂႃႇၸႂ်း.. ၵွပ်ႈဝႃႈ သင်ၼွင်ႉႁဝ်းလႆႈတၢႆၵႂႃႇ ၶဝ်ၵေႃႈတေလွတ်ႈပူၼ်ႉတၢင်းၽိတ်းၼၼ်ႉၼႃႇ ယွၼ်ႉႁဝ်းပဵၼ်ပီႈၶဝ်လႄႈ တေဢမ်ႇမီးဝၼ်းႁဵတ်းႁၢႆႉၶဝ် ပိူၼ်ႈၵေႃႈတေဢမ်ႇထၢင်ႇပိူင်ႈသင်မႃးၼၼ်ႉယဝ်ႉ ”
“လွင်ႈလႅင်းဢွၼ်ႇၼၼ်ႉလူး ပဵၼ်မႃးၸိူင်ႉႁိုဝ်လႃႇ”
“ဝၢႆးသေၸိုၼ်ႈၶိူဝ်းတေႇၼႃႈႁိူၼ်း မၼ်းၵေႃႈႁဵတ်းၵၢၼ်ၸွႆႈတီႈ ၶွမ်ႇပၼီႇၼႃႈႁိူၼ်းၼၼ်ႉယဝ်ႉ ၵၢၼ်ငၢၼ်းမၼ်းႁဵတ်းလႆႈလီလိူဝ်သေ မိူင်းလၢဝ် ဢၼ်ၶတ်းၸႂ်ႁဵတ်းၵၢၼ်တေႉတေႉဝႃႈဝႃႈၼၼ်ႉယူႇ။ မိူၼ်ဝႃႈလွင်ႈလႆႈလီလႆႈပဵၼ် ၸိုၼ်ႈၶိူဝ်းၼၼ်ႉ ဢမ်ႇပေႃးထုၵ်ႇႁူထုၵ်ႇတႃၶဝ်ၵႃႈႁိုဝ်လႄႈ မူၺ်ၶၢဝ် ဢၼ်ယူႇတီႈႁိူၼ်းၼၼ်ႉၵေႃႈ ထုၵ်ႇမႄႈၸဝ်ႈ ႁဵတ်းႁၢႆႉယူႇလၢႆပွၵ်ႈ ဢၢင်ႈတေတူၵ်းလုၵ်ႈယူႇလၢႆၵမ်း မၼ်းၵေႃႈယဵၼ်ႉၵၼ်ႈၵႂႃႇ လူၺ်ႈတီႈဢမ်ႇလႆႈလၢတ်ႈၸိုၼ်ႈၶိူဝ်း လုၵ်ႈဢွၼ်ႇဢၼ်ၵိူတ်ႇမႃးပဵၼ်လႅင်းဢွၼ်ႇၼၼ်ႉ လိူၼ်ယင်းပႆႇတဵမ်ၵေႃႈ ပေႃးလႆႈၵိူတ်ႇမႃးယဝ်ႉၵွၼ်ႇ ၽွင်းၼၼ်ႉ ၸိုၼ်ႈၶိူဝ်းၵေႃႈၵုမ်ႇမိုင်ႉႁဵတ်းၵၢၼ်ၵူၺ်း ဢမ်ႇတၼ်းၾၢင်ႉမႅၼ်ႈလႄႈ ဢမ်ႇႁူႉလွင်ႈၼၼ်ႉမိူၼ်ၵၼ်”
သိုပ်ႇလၢတ်ႈၵႂႃႇထႅင်ႈ
“ဝၢႆးသေလုၵ်ႈဢွၼ်ႇၵိူတ်ႇဢွၵ်ႇမႃးပႆႇႁိုင် မူၺ်ၶဝ်ၵေႃႈ တၼ်းလႆႈႁၼ်ၼႃႈလုၵ်ႈၵႅပ်ႉၼိုင်ႈၵူၺ်း လူႉသဵင်ႈတၢႆၵႂႃႇပႅတ်ႈယူႇ.. ၸိုၼ်ႈၶိူဝ်းၼၼ်ႉ ယင်းဢမ်ႇတၼ်းလႆႈႁၼ်ၼႃႈလုၵ်ႈမၼ်းလူးၵွၼ်ႇ”
ပီႈၶမ်းၼၼ်ႉၵေႃႈထူၺ်ႈၸႂ်လူင်မႃးသေ။ လိုၼ်းၼုမ်ႇၸင်ႇထၢမ်ၸူး
“ၵူၼ်းၵေႃႉဢၼ်ဢဝ်လႅင်းဢွၼ်ႇ ၽၢတ်ႇယၢၼ်ပေႃႈၶဝ်ၼၼ်ႉၵေႃႈ ပဵၼ်ပီႈၸွင်ႇၸႂ်ႈ”
“ႁဝ်းႁဵတ်းၸွမ်းၵႂၢမ်းသင်ႇၵူၺ်း ဢမ်ႇမီးတၢင်းလိူၵ်ႈမိူၼ်ၵၼ် ယဝ်ႉ..ႁဝ်းၵေႃႈလႆႈဢဝ်ၶဝ်ၵႂႃႇပၼ်တီႈ ၸၢႆးၸွမ် ႁႂ်ႈဢဝ်ၶဝ်ၵႂႃႇပႅတ်ႈႁႂ်ႈၵႆၵႆၼႆယူႇ ဢမ်ႇထၢင်ႇဝႃႈ ၶဝ်တေဢဝ်မိူဝ်းတီႈဝၢၼ်ႈသေ သူတေပဵၼ်ၵူၼ်းၵဵပ်းလဵင်ႉၼၼ်ႉၼႃႇ… လွင်ႈဢၼ်လႆႈႁၼ်သူ လႄႈ လႅင်းဢွၼ်ႇ ယူႇၸွမ်းၸိုၼ်ႈၶိူဝ်းၼၼ်ႉၵေႃႈ ႁဵတ်းႁႂ်ႈႁဝ်းၸႂ်ဢမ်ႇလီတႄႉယဝ်ႉ သမ်ႉဝႃႈ..ၶဝ်ဢမ်ႇလႆႈသင်ႇႁႂ်ႈဢဝ်လုၵ်ႈဢွၼ်ႇၼၼ်ႉ ၵႂႃႇႁဵတ်းသင်သေတႃႉ ၶဝ်ၵေႃႈလၢတ်ႈဝႃႈ ဢမ်ႇၶႂ်ႈႁႂ်ႈလုၵ်ႈဢွၼ်ႇပွၵ်ႈမႃးၶိုၼ်းတီႈႁိူၼ်းၼၼ်ႉယဝ်ႉ ပေႃးႁူႉဝႃႈလႅင်းဢွၼ်ႇ ပဵၼ်လုၵ်ႈမူၺ်ၶၢဝ်ၼႆၵေႃႈ ၶဝ်တေဢမ်ႇလွတ်ႈၽေးယဝ်ႉ”
“ၶႃႈတေလႆႈႁဵတ်းၸိူင်ႉႁိုဝ်လႃႇ ပေႃးၼၼ်..”
“ယူႇၸွမ်းၶဝ်ၵႂႃႇ လူၺ်ႈပဵၼ်မႄႈတေႉတေႉၶဝ်ၼၼ်ႉၵူၺ်းလႄႈ သူၸင်ႇတေလွတ်ႈ ပေႃးၶဝ်ႁူႉလွင်ႈတေႉမၼ်းမႃး သူလႄႈတင်းလႅင်းဢွၼ်ႇၵေႃႈ တိုၼ်းတေထူပ်းၽေးဢမ်ႇႁၢင်ႉယဝ်ႉ.. ႁဝ်းၵေႃႈ ဢမ်ႇႁူႉဝႃႈ ႁဝ်းတေမီးသၢႆၸႂ်ယူႇၵႂႃႇလႆႈထိုင်မိူဝ်ႈလႂ် ႁဝ်းဢွၵ်ႇမႃးလူၺ်ႈ ၶဝ်ဢမ်ႇႁူႉၸိူင်ႉၼႆၵေႃႈ မိူၼ်ႁႃတၢင်းတၢႆယဝ်ႉ” ထူၺ်ႈၸႂ်လူင်မႃးသေ “မီးသၢႆၸႂ်ယူႇၵေႃႈ ဢမ်ႇပိူင်ႈသင်ၵၼ်တင်းတၢႆယူႇယဝ်ႉ”
ဢဝ်သေလွင်ႈလွင်ႈယိုၼ်ႈပၼ်လိုၼ်းၼုမ်ႇၵႂႃႇသေ ဢွၵ်ႇႁွင်ႈၼၼ်ႉၵႂႃႇပႅတ်ႈယူႇယဝ်ႉ။
လိုၼ်းၼုမ်ႇဢၼ်လႆႈႁူႉလႆႈငိၼ်းၸိူင်ႉၼၼ်ယဝ်ႉၵေႃႈ ၼင်ႇဝႃႈတူဝ်ၸႂ်ၼၼ်ႉ ႁိုဝ်တေၵတ်းယဵၼ်လႆႈယဝ်ႉလႃႇ။ ယၢမ်းၼၼ်ႉ ၸိုၼ်ႈၶိူဝ်းၸင်ႇသိုပ်ႇၾူင်းၸူးသေ
“သူမီးယူႇတီႈလႂ်..”
“မီးယူႇတီႈႁူင်းႁဵၼ်း..သူၸွႆႈမႃးႁပ်ႉႁဝ်းဢိတ်ႉၼိုင်ႈၸွင်ႇလႆႈ”
“ဢိုမ်ႈ! ႁူင်းႁဵၼ်းတီႈလႂ်..”
“ႁူင်းႁဵၼ်းၵဝ်ႇလႅင်းဢွၼ်ႇ!!..”
ၸိုၼ်ႈၶိူဝ်းဢၼ်လႆႈငိၼ်းၸိူင်ႉၼၼ်ၵေႃႈ ၼႅတ်ႈႁေႃႈလူတ်ႉမၼ်း ဢွၵ်ႇႁိူၼ်းမႃးၵမ်းလဵဝ်။ မိူဝ်ႈႁွတ်ႈထိုင်ယဝ်ႉၵေႃႈ လႆႈႁၼ်လိုၼ်းၼုမ်ႇ မီးယူႇၼႂ်းႁွင်ႈႁဵၼ်းၼၼ်ႉသေ လႅၼ်ႈၶဝ်ႈၵွတ်ႇသႂ်ႇလိုၼ်းၼုမ်ႇ ၼင်ႇမႆႈၸႂ်မႆႈၶေႃး ၼၼ်ႉယဝ်ႉ။
“သူႁူႉယဝ်ႉၸွင်ႇၸႂ်ႈ..” လိုၼ်းၼုမ်ႇလၢတ်ႈလူၺ်ႈသဵင်ၶႅင်။
လိုၼ်းၼုမ်ႇဢၼ်လၢတ်ႈႁႂ်ႈ ၸိုၼ်ႈၶိူဝ်းမႃးတီႈၼႆႈၵေႃႈ တႃႇလၢတ်ႈၼႄၸိုၼ်ႈၶိူဝ်းႁႂ်ႈႁူႉဝႃႈ မၼ်းၼၼ်ႉ ဢမ်ႇၸႂ်ႈမေးၸိုၼ်ႈၶိူဝ်း ၼၼ်ႉယဝ်ႉ။ လိုၼ်းၼုမ်ႇလၢတ်ႈၸူးမၼ်းၵႂႃႇထႅင်ႈ
“ႁဝ်းဢမ်ႇၸႂ်ႈမေးသူ..သူၵေႃႈ..ထုၵ်ႇလီပွႆႇႁဝ်းလႆႈယဝ်ႉ”
ၸိုၼ်ႈၶိူဝ်းၵေႃႈ ပွႆႇတူဝ်ဢွၵ်ႇႁၢင်ႇလိုၼ်းၼုမ်ႇၵႂႃႇ မွၵ်ႈသွၵ်ႇၼိုင်ႈသေ တူၺ်းၼႃႈလိုၼ်းၼုမ်ႇၼၼ်ႉလီလီယဝ်ႉ။
“ႁဝ်းႁူႉယူႇယဝ်ႉ” ႁဵတ်းႁႂ်ႈလိုၼ်းၼုမ်ႇတူၵ်းၸႂ် လၢတ်ႈၵႂၢမ်းပေႃးဢမ်ႇဢွၵ်ႇယဝ်ႉ။
“ႁဝ်းၵေႃႈလႅၼ်သူမိူၼ်ၵၼ် ယွၼ်ႉႁဝ်းၼၼ်ႉ ပဵၼ်ပေႃႈဢမ်ႇလႆႈလွင်ႈ.. ႁဝ်းဢမ်ႇႁူႉဝႃႈတေလႆႈႁဵတ်းႁိုဝ်လဵင်ႉလူၶဝ် တေႁဵတ်းႁိုဝ် ႁႂ်ႈၶဝ်ပေႃးၶႂ်ႈယူႇၸွမ်းႁဝ်း သူပဵၼ်ၵူၼ်းၵေႃႉဢၼ်လဵင်ႉလူၶဝ်မႃး သမ်ႉဝႃႈ..သူဢမ်ႇလႆႈၵိူတ်ႇၶဝ်မႃးၵေႃႈ ၶဝ်ၼၼ်ႉယင်းတိုၵ်ႉႁွင်ႉသူဝႃႈမႄႈယူႇ ၶဝ်ၼၼ်ႉ..ပဵၼ်ၼိူဝ်ႉလိူတ်ႈသၢႆၶိူဝ်းႁဝ်းသေတႃႉ ၶဝ်ယင်းဢမ်ႇၶႂ်ႈမီးလူးၵွၼ်ႇ သင်တေဢဝ်သူၽၢတ်ႇယၢၼ်ၶဝ်ၵႂႃႇ” မိုင်ၵႂႃႇၵႅပ်ႉၼိုင်ႈသေ ၶိုၼ်းသိုပ်ႇလၢတ်ႈထႅင်ႈ
“ႁႂ်ႈသူမႃးယူႇၸွမ်း ပဵၼ်မႄႈၶဝ်ၸွမ်းလူၺ်ႈပဵၼ်မေးႁဝ်း တူၺ်းမိူၼ်ႁဝ်းတေႁဵတ်းတွၼ်ႈတႃႇၶဝ် သင်ၶဝ်မီးသူယူႇႁိမ်းၸမ် ၶဝ်ၵေႃႈတေဢမ်ႇၶႂ်ႈၵႂႃႇတၢင်းလႂ်ယဝ်ႉ ဢၼ်ႁဝ်းႁဵတ်းၵူႈလွင်ႈ မၼ်းပဵၼ်တွၼ်ႈတႃႇတူဝ်ၸဝ်ႈၵဝ်ႇၵူၺ်း ႁဝ်းၵူဝ်ၶဝ်တေၽၢတ်ႇယၢၼ်ႁဝ်းၵႂႃႇ တေၵႂႃႇပႅတ်ႈႁဝ်းလႄႈ ၸင်ႇႁႂ်ႈသူမႃးယူႇၸွမ်းၼၼ်ႉယဝ်ႉ သမ်ႉဝႃႈသူဢမ်ႇၸႂ်ႈမေးႁဝ်း သမ်ႉဝႃႈႁဝ်းႁူႉလွင်ႈဢၼ် သူဢမ်ႇလႆႈလိုမ်းလွင်ႈဝၼ်းလင်ၵေႃႈယဝ်ႉ ႁဝ်းၵေႃႈ..ယင်းတိုၵ်ႉႁဵတ်းၸိူင်ႉၼၼ်ယူႇ ယင်းၶႂ်ႈႁႂ်ႈသူယူႇၸွမ်းႁဝ်းၵႂႃႇ ပဵၼ်မႄႈၶဝ်ၵႂႃႇလႄႈ ယူႇႁိမ်းၶၢင်ႈႁဝ်းၵႂႃႇထႅင်ႈၼၼ်ႉယဝ်ႉ..”
လိုၼ်းၼုမ်ႇၼၼ်ႉ မိုင်ယဵၼ်ၵႂႃႇသေ ထူၺ်ႈၸႂ်ၶဝ်ႈလိုၵ်ႉလိုၵ်ႉယဝ်ႉ လပ်းတႃၵႂႃႇၵႅပ်ႉၼိုင်ႈ လၢတ်ႈဢွၵ်ႇၸူးၸိုၼ်ႈၶိူဝ်းၵႂႃႇ လူၺ်ႈတၢင်းႁတ်း ဢၼ်မၼ်းႁွမ်မႃးလႆႈၼၼ်ႉသေဝႃႈ−
“သူဢဝ်လႅင်းဢွၼ်ႇ ပၼ်ႁဝ်းလဵင်ႉၶိုၼ်းဢမ်ႇလႆႈႁႃႉ ႁႂ်ႈႁဝ်းပဵၼ်မႄႈတေႉတေႉၶဝ်ၵႂႃႇ ဢမ်ႇလီႁိုဝ် သူၵေႃႈဢမ်ႇမီးၶၢဝ်းယၢမ်းတူၺ်းထိုင်ၶဝ်ယူႇယဝ်ႉ”
လၢတ်ႈၵႂႃႇလူၺ်ႈ ဢမ်ႇမီးတၢင်းၵူဝ်တၢင်းဢၢႆသင်သေဢိတ်း၊ ၸိုၼ်ႈၶိူဝ်းၼၼ်ႉၵေႃႈ သီၼႃႈမၼ်းလႅၵ်ႈလၢႆႈမႃးမိူၼ်ၵၼ် ပဵၼ်ဢၼ်ဢမ်ႇႁၢၼ်ႉၸႂ်မႃးယဝ်ႉ မိူဝ်ႈလိုၼ်းၼုမ်ႇလၢတ်ႈၸိူင်ႉၼၼ်ၼႆၵေႃႈ
“ပဵၼ်သင်လႄႈလၢတ်ႈၸိူင်ႉၼႆလႃႇ ၶဝ်ပဵၼ်လုၵ်ႈႁဝ်းဢိူဝ်ႈ” ၶိုၼ်ႈသဵင်သႂ်ႇလိုၼ်းၼုမ်ႇယူႇယဝ်ႉ။
လိုၼ်းၼုမ်ႇၼၼ်ႉၵေႃႈ ၶိုၼ်ႈသဵင်သႂ်ႇၸူးၶိုၼ်းသေ “ၸႂ်ႈယဝ်ႉ ၶဝ်ပဵၼ်လုၵ်ႈသူ သူၵေႃႉလၢတ်ႈၵူၺ်း သူလဵင်ႉလူၶဝ်ဢမ်ႇလႆႈပေႃးဢမ်ႇမီးႁဝ်း ၵူၺ်းၵႃႈ ႁဝ်းဢမ်ႇမီးသူ ႁဝ်းၵေႃႈလဵင်ႉလူၶဝ်လႆႈယူႇယဝ်ႉ ပေႃးသူႁၼ်ထိုင်ၵၢင်ၸႂ်ၶဝ် သူၵေႃႈ ဢဝ်ၶဝ်မႃးပၼ်ႁဝ်းၶိုၼ်းလႄႈ!.. ၶဝ်ၵိူတ်ႇမႃး.. သူယင်းဢမ်ႇလႆႈႁၼ်ၼႃႈၶဝ်လူးၵွၼ်ႇ..ဢမ်ႇၸႂ်ႈႁိုဝ်”
“ႁဝ်းပဵၼ်ပေႃႈၶဝ်ဢိူဝ်ႈ ပဵၼ်ၼိူဝ်ႉလိူတ်ႈၸိူဝ်ႉၶိူဝ်းႁဝ်း ဢမ်ႇဝႃႈၸိူင်ႉႁိုဝ် ၶဝ်ၵေႃႈပဵၼ်လုၵ်ႈႁဝ်းၼၼ်ႉယဝ်ႉ သူမီးသုၼ်ႇသင်သေလၢတ်ႈၸိူင်ႉၼႆလႃႇ ပေႃးဢမ်ႇႁူႉလွင်ႈသင်ၵေႃႈ ယႃႇပေလၢတ်ႈယဝ်ႉ”
ၸိုၼ်ႈၶိူဝ်းၼၼ်ႉၵေႃႈႁိုဝ်တေယွမ်းသဵင်လႆႈ ၶိုၼ်ႈသဵင်ၸူးလိုၼ်းၼုမ်ႇ ၼင်ႇၵႃႈၶိုၼ်ႈလႆႈၼၼ်ႉယဝ်ႉ။
“ယဝ်ႉမၼ်းပဵၼ်သင်လႃႇ ပဵၼ်ပေႃႈၶဝ်ယဝ်ႉမၼ်းလႅၵ်ႈလၢႆႈသင်လႆႈ ၶဝ်ယွမ်းႁပ်ႉသူယူႇႁႃႉဝႃႈ..သူပဵၼ်ပေႃႈၶဝ် တၢင်းႁၵ်ႉပေႃႈမီးတေႃႇလုၵ်ႈၼၼ်ႉ ပဵၼ်ၸိူင်ႉႁိုဝ် သူႁပ်ႉႁူႉမၼ်းလႆႈယူႇႁႃႉ သူၵေႃႈပဵၼ်ပေႃႈဢၼ် ႁဵတ်းႁႂ်ႈၶဝ်ၵိူတ်ႇဢွၵ်ႇမႃးမွၵ်ႈၼၼ်ႉၵူၺ်း မၼ်းပႅၵ်ႇပိူင်ႈတီႈလႂ် လွင်ႈၸမ်ၸႂ်ပေႃႈလုၵ်ႈၼၼ်ႉ မၼ်းလမ်ႇလွင်ႈတီႈလႂ်လႃႇ သူၵေႃႈပဵၼ်တူဝ်ယၢင်ႇၼႄယူႇယဝ်ႉလူး ” လၢတ်ႈဢဝ်ၸိုၼ်ႈၶိူဝ်းၸႂ်လမ် ထိင်းၸႂ်ပေႃးဢမ်ႇလႆႈ ၼႃႈလိူတ်ႇၼႃႈမႆႈ ၵမ်တႃမိုဝ်းဝႆႉသမ်ႉပေႃးၵႅၼ်ႇၵႅၵ်းၵႅၵ်းယူႇ။
“မိူဝ်ႈၸႂ်ယဵၼ်ယဝ်ႉ ၸင်ႇၵွႆႈမႃးဢုပ်ႇၵၼ်လႄႈ” ဢွၵ်ႇႁွင်ႈၼၼ်ႉၵႂႃႇယဝ်ႉ။
ဝၢႆးသေၸိုၼ်ႈၶိူဝ်းဢွၵ်ႇႁွင်ႈၵႂႃႇ လိုၼ်းၼုမ်ႇၼၼ်ႉၵေႃႈ တူဝ်ပေႃးဢူၼ်ႈပေႃးဢွၼ်ႇၵႂႃႇမူတ်း ၼင်ႈလူမ်ႉလူင်းၵႂႃႇၼိူဝ်ပိုၼ်ႉၼၼ်ႉၵမ်းလဵဝ်။ လိုၼ်းၼုမ်ႇၼၼ်ႉၵေႃႈ ဢမ်ႇႁူႉဝႃႈတေၵႂႃႇတၢင်းလႂ်ယဝ်ႉလႄႈ ၼင်ႈယူႇတီႈၼႃႈႁိူၼ်း သႅင်ႁိူၼ်းၼုမ်ႇသေ ယႃႉထူင်မၢၵ်ႇဢူမ် ဢၼ်ပီႈၶမ်းပၼ်မၼ်းၼၼ်ႉယူႇ ၵူၺ်းၼႂ်းၼၼ်ႉသမ်ႉ ဢမ်ႇၸႂ်ႈမၢၵ်ႇဢူမ် ပဵၼ် SD ၵၢတ်ႉ ဢွၼ်ႇဢၼ်ၼိုင်ႈ ၼၼ်ႉယဝ်ႉ။ လိုၼ်းၼုမ်ႇၼၼ်ႉၵေႃႈ
“သႅင်ႁိူၼ်း! ယွၼ်းၸႂ်ႉၶွမ်းၽွင်ႈ”
“ဢိူဝ်ႈဢဝ်လႄႈ!..”
မၼ်းၸင်ႇဢဝ်ၵၢတ်ႉၼၼ်ႉ သဵပ်ႇၶဝ်ႈတူၺ်းၼႂ်းၶွမ်းသႅင်ႁိူၼ်းၼုမ်ႇသေ လႆႈႁူႉလႆႈႁၼ် ဢၼ်လီတူၵ်းဢူၵ်းတူၵ်းၸႂ်တင်းၼမ် တူၺ်းတၢင်းၶိုၼ်း ထိုင်တီႈပေႃးဢမ်ႇလႆႈၼွၼ်းယဝ်ႉ။
ၵၢင်ၼႂ်မိူင်းလႅင်း သႅင်ႁိူၼ်းၼုမ်ႇတိုၼ်ႇမႃး ယင်းတိုၵ်ႉလႆႈႁၼ်လိုၼ်းၼုမ်ႇ ၶွပ်ႇတႃလမ်လမ်ယူႇၼႃႈၶွမ်းၼၼ်ႉလႄႈ
“ဢမ်ႇၼွၼ်းတၢင်းၶိုၼ်းႁႃႉၼႆႉ..”
“ဢိုမ်ႈ!..”
“သမ်ႉပေႉႁဵတ်းသင်လႃႇ”
“တူၺ်းၸိူင်းၵူၺ်း…သုတ်းယဝ်ႉၵဝ်ႇဝႃႈ..ႁဝ်းယွၼ်းၼွၼ်းၵွၼ်ႇၼႃႈ..ၶႂ်ႈၼွၼ်းတေႉယဝ်ႉ”
“ၼွၼ်းၼမ်ၼမ်လႄႈ ၵူၼ်းဢမ်ႇမီးၵၢၼ်ၶဝ်!”
“ဢေႃႈၶႃႈ! တေၼွၼ်းႁႂ်ႈပေႃးလိုမ်းတိုၼ်ႇလူႉဝႃႈ”
လိုၼ်းၼုမ်ႇၼွၼ်းယင်းပႆႇတၼ်းလပ်း မီးသဵင်ၾူင်းမေႃးမႃးသေယဝ်ႉ သႅင်ႁိူၼ်းၼုမ်ႇၵေႃႈႁွင်ႉလၢတ်ႈၵႂႃႇ
“ၾူင်းသူမႃး..”
“ၽႂ်လႃႇ” ၼွၼ်းယူႇၼႂ်းၽႃႈၼၼ်ႉသေထၢမ်ၶိုၼ်း။
“ပီႈၶမ်း!”
ၼႅတ်ႈၶုၼ်ႇလုၵ်ႉမႃးၸၵ်ႉဢဝ်ၾူင်းၼၼ်ႉၵမ်းလဵဝ်ယူႇ ၵူၺ်းၵႃႈ ဢၼ်မၼ်းလႆႈငိၼ်းၼၼ်ႉတႄႉ ဢမ်ႇၸႂ်ႈသဵင်ပီႈၶမ်း သမ်ႉပဵၼ်သဵင်ၵူၼ်းတီႈလႂ်ဢမ်ႇႁူႉ ပွင်ႇလႅင်းလၢတ်ႈၼႄမၼ်းၵႂႃႇ−
“ပီႈၶမ်းထူပ်းၽေးၵိုင်ႉၵၢင်ႉ လူတ်ႉၽႃႇသေလႆႈလူႉသဵင်ႈတၢႆၵႂႃႇယဝ်ႉ”
လိုၼ်းၼုမ်ႇဢၼ်ငိၼ်းၸိူင်ႉၼၼ်ၵေႃႈ ၼႅတ်ႈၽုၼ်ႇၽၢၼ်ႇ ၸၵ်ႉဢဝ်ထူင်မၼ်းသေ ဢွၵ်ႇၵႂႃႇၵမ်းလဵဝ်ယဝ်ႉ။
“ၵႂႃႇတၢင်းလႂ်ထႅင်ႈယဝ်ႉလႃႇ” သႅင်ႁိူၼ်းၼုမ်ႇၸွမ်းထၢမ်။
ဢမ်ႇတၼ်းသင်ႇတၼ်းလၢတ်ႈသင်သေ ဢွၵ်ႇၵႂႃႇႁဵတ်းၼၼ်ႉယူႇယဝ်ႉ။ လိုၼ်းၼုမ်ႇဢၼ်ၵႂႃႇႁွတ်ႈထိုင်တီႈႁူင်းယႃၼၼ်ႉၵေႃႈ ၸင်ႇလႆႈႁူႉဝႃႈ ပီႈၶမ်းၼၼ်ႉ ၺႃးလူတ်ႉၽႃႇၸဵမ်ၶမ်ႈဝႃးလႄႈ ႁၢႆႉႁႅင်းၼႃႇယူတ်းယႃဢမ်ႇလႆႈသေ လႆႈသဵင်ႈတၢႆၵႂႃႇမိူဝ်ႈၵၢင်ၼႂ်ၼႆႉၼႆယဝ်ႉ။ တီႈႁိမ်းၶၢပ်ႈတူဝ်ပီႈၶမ်းၼၼ်ႉတႄႉ မီးၵူၼ်းၵေႃႉဢၼ်ၸွမ်းပီႈၶမ်းယူႇတႃႇသေႇၼၼ်ႉ ပႂ်ႉဝႆႉလႄႈ ပဵၼ်ၵေႃႉဢၼ်လိုၼ်းၼုမ်ႇ ႁၼ်ၼႂ်းဝၼ်းႁူပ်ႉထူပ်းၵၼ် တီႈလၢၼ်ႉၼၼ်ႉယဝ်ႉ။ လႄႈၶဝ်ၼၼ်ႉၵေႃႈ လႅပ်ႈတေပဵၼ်ၵေႃႉသိုပ်ႇၾူင်းၸူးမၼ်းမႃးၼၼ်ႉယူႇ။ ၸင်ႇႁွင်ႉလိုၼ်းၼုမ်ႇၵႂႃႇဢုပ်ႇတီႈတဵတ်ႇယဵၼ်သေ
“သူပဵၼ်ၵူၼ်းမိုတ်ႈၵၼ်တင်းၼၢင်းၶမ်းၸွင်ႇၸႂ်ႈ..”
“ၸႂ်ႈဢေႃႈ..”
“ၶမ်ႈဝႃးၸွင်ႇၶဝ်လႆႈၵႂႃႇႁႃသူႁႃႉ..”
မိူဝ်ႈယူႇၼႂ်းငဝ်းလၢႆးၸိူင်ႉၼၼ် လိုၼ်းၼုမ်ႇၵေႃႈဢမ်ႇႁူႉဝႃႈ တေႁဵတ်းၸိူင်ႉႁိုဝ်ယဝ်ႉလႄႈ ၵႃႈလႆႈလၢတ်ႈၵႂႃႇ။
“ဢေႃႈ.. ၶဝ်မႃးႁႃၶႃႈ.. ၶဝ်ဝႃႈၶႂ်ႈမိူဝ်းယူႇၶိုၼ်းတီႈႁိူၼ်း မႃးၸူဝ်းၶႃႈမိူဝ်းၸွမ်းၵၼ်သေ..ဢမ်ႇထၢင်ႇဝႃႈ ၶဝ်တေမႃးပဵၼ်ၸိူင်ႉၼႆ” လိုၼ်းၼုမ်ႇၼၼ်ႉၵေႃႈ ႁွင်ႉႁႆႈဢွၵ်ႇမႃးတေႃႇၼႃႈ ၵူၼ်းၵေႃႉၼၼ်ႉယူႇယဝ်ႉ။
“ၶဝ်လီဢီးလူတေႉၶႃႈယဝ်ႉ ပေႃႈမႄႈပီႈၼွင်ႉၵေႃႈဢမ်ႇၵိုတ်းၽႂ်ယဝ်ႉ ၶဝ်ၵေႃႈၸွႆႈႁဵတ်းၵၢၼ် ပၼ်တီႈႁိူၼ်းၼၼ်ႉမႃးတင်းႁိုင် ၸွႆႈလုမ်းလႃးၶၢပ်ႈတူဝ်ၶဝ်လီလီဢိတ်းၼိုင်ႈၸွင်ႇလႆႈၶႃႈ ႁႂ်ႈၵိုင်ႇတၢင်း ပဵၼ်ၵူၼ်းႁဵတ်းၵၢၼ် တီႈႁိူၼ်းၵူၼ်းသထေးဢိတ်းၼိုင်ႈၼႆ” ယွၼ်းတၢင်းၸွႆႈထႅမ်တီႈလုင်းၵေႃႉၼၼ်ႉၵႂႃႇယူႇ။
“လွင်ႈၸိူဝ်းၼႆႉ ႁဝ်းတေၸတ်းၵၢၼ်ၵႂႃႇၵူၺ်း ၵူၺ်းၵႃႈ ဢွၼ်တၢင်းမၼ်းတေၵႂႃႇၸွင်ႇမၼ်းလႆႈၽၢၵ်ႇၶွင်သင်ဝႆႉႁႃႉ”
“ဢမ်ႇၶႃႈ! ”
“ၸိူင်ႉၼၼ်ႁႃႉ!..”
လိုၼ်းၼုမ်ႇၼၼ်ႉၵေႃႈ ဢွၵ်ႇႁူင်းယႃမႃးယဝ်ႉ ႁိုဝ်တေၵတ်းယဵၼ်ၸႂ်လႆႈလႃႇ ပႆတၢင်းယူႇၵေႃႈမိူၼ်တူဝ်ဢမ်ႇၸပ်းၸႂ်ၼၼ်ႉယဝ်ႉ လိူဝ်သေၼွၼ်းဢမ်ႇလပ်း သမ်ႉပၢႆႁွင်ႉႁႆႈထႅင်ႈႁေ တူဝ်ၶိင်းၵေႃႈပေႃးဢမ်ႇမီးႁႅင်းသေဢိတ်းယဝ်ႉ။ မိူဝ်ႈဢၼ်တိုၵ်ႉၵိုတ်းလိုဝ်ႈယူႇတီႈ တၢင်းၼႃႈႁူင်းယႃၼၼ်ႉ ၸင်ႇမီးၽူႈယိင်းၵေႃႉၼိုင်ႈ ၶုၼ်ႇၸၵ်ႉဢဝ်ထူင်မၼ်းသေလႅၼ်ႈၵႂႃႇလႄႈ မၼ်းၵေႃႈ ၼႅတ်ႈလႅၼ်ႈလမ်းၵႂႃႇၸွမ်းယဝ်ႉ။
သွင်ၶႃလမ်းၵၼ်လူင်ၵႂႃႇ ၸွမ်းသၢႆသဵၼ်ႈတၢင်းဢၼ်ယၢဝ်းၵႆ လိုၼ်းၼုမ်ႇၵေႃႈ ၸွမ်းၼင်ႇႁႅင်းမီးၼၼ်ႉ လမ်းလူင်ၵႂႃႇတိၵ်းတိၵ်း ဢမ်ႇႁူႉဝႃႈၵႂႃႇႁွတ်ႈတၢင်းလႂ်တၢင်းလီယဝ်ႉ ယူႇယူႇၵေႃႈႁွတ်ႈၵႂႃႇတီႈ သဵၼ်ႈတၢင်းယႅၵ်ႈလူင်ၼၼ်ႉသေ လမ်းၵၼ်ၵႂႃႇ သမ်ႉပေႃးဢမ်ႇတၼ်း တူၺ်းလူတ်ႉတူၺ်းၵႃးသေဢိတ်းယဝ်ႉ ၽွင်းၼၼ်ႉ သမ်ႉမႅၼ်ႈမိူဝ်ႈ လူတ်ႉတၢင်ႇၵုၼ်ႇလူင်မၢၵ်ႇသၢဝ်းသီႇလေႃႉၼၼ်ႉ လေႃႈမႃးဝႆးဝႆး ၽႃႇသႂ်ႇႁႅင်းႁႅင်း လိူတ်ႈလႅင်သဵၼ်ဝူင်သႂ်ႇၼႃႈလူတ်ႉၼၼ်ႉလႄႈ လူတ်ႉလူင်ၼၼ်ႉၵေႃႈၵိုတ်းၵႂႃႇသေ လူတ်ႉထႅင်ႈလမ်းၼိုင်ႈ ဢၼ်ၶပ်းဝႆးၼႃႇ ဢမ်ႇတၼ်းတူၺ်းတၢင်းၼၼ်ႉၵေႃႈ မႃးၽႃႇသႂ်ႇပၼ်လူတ်ႉလူင်ၼၼ်ႉႁႅင်းႁႅင်း ဢမ်ႇႁိုင်သင် လူတ်ႉသွင်လမ်းၼၼ်ႉၵေႃႈ တႅၵ်ႇလင်ၽူင်ႉပဵၼ်ပဵဝ်ၾႆးလူင်ၵႂႃႇယဝ်ႉ။ ၵူၼ်းဢၼ်ယူႇႁိမ်းႁွမ်းၼၼ်ႉၵေႃႈ သမ်ႉပေႃးဢွၼ်ၵၼ်တိုၼ်ႇသၢၼ်ႈၵူဝ် ပေႃးသၼ်ႇသၼ်ႇသၢႆသၢႆလူင်ၵႂႃႇမူတ်း။
တွၼ်ႈသၢဝ်းသၢမ်သုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈသၢဝ်းသီႇၶႃႈ။
ႁပ်ႉထွမ်ႇပၼ်ႁႅင်းလူၺ်ႈသဵင်တၢင်း YouTube ၵေႃႈလႆႈၶႃႈ။
