တွၼ်ႈသၢဝ်းသွင်
ယၢမ်းဝၢႆးဝၼ်း တႃဝၼ်းၸၢႆႉၸိူၼ်းတူၵ်းႁူဝ်လွႆ လႅတ်ႇဢွၼ်ႇဢူၼ်ႈဢူၼ်ႈၼၼ်ႉ ၸိုၼ်ႈၶိူဝ်းၵေႃႈ ၸူဝ်းဢွၼ်ဢဝ်လိုၼ်းၼုမ်ႇ ၵႂႃႇလႄႇလဵၼ်ႈယူႇၼႂ်းထုင်ႉၼႃး ဢၼ်ၵႂၢင်ႈသုတ်းသၢႆတႃ မီးၼွင်မူဝ်ၵီႈၶွင်ႇၶၢဝ်ယူႇၼႂ်းၵၢင်တူင်ႈၼႃးၼၼ်ႉသေ လႆႈၵႂႃႇၼင်ႈယူႇတီႈသုမ်ႉ ဢၼ်မီးဝႆႉယူႇႁိမ်းၼွင်မူဝ်ၼၼ်ႉယဝ်ႉ။
“တီႈၼႆႈႁၢင်ႈလီတေႉယဝ်ႉ..”
ၸိုၼ်ႈၶိူဝ်းၵေႃႈ ယၵ်ႉတူၺ်းလိုၼ်းၼုမ်ႇဢၼ်ၼင်ႈယူႇႁိမ်းမၼ်းၼၼ်ႉသေယဝ်ႉ
“ဢိုမ်ႈ..ႁၢင်ႈလီတေႉဢိူဝ်ႈ”
လိုၼ်းၼုမ်ႇၼၼ်ႉၵေႃႈ ၼင်ႈသုတ်ႇလူမ်းၵတ်းလူမ်းယဵၼ်သေ ဝၢႆႇယၵ်ႉယဵမ်ႈတူၺ်း မွၵ်ႇမူဝ်ဢၼ်ၵီႈၶွင်ႇၶၢဝ်ယူႇၼႂ်းၼွင်ၼၼ်ႉယဝ်ႉၵေႃႈ ၼင်ႇႁၢင်ႈ ၸႂ်ပေႃးသိူဝ်းလူင်မႃးၵမ်းလဵဝ်ယဝ်ႉ။
“လီတေႉယဝ်ႉ..”
“မိူၼ်သူတေလႆႈၸႂ်တေႉယဝ်ႉ..”
“ဢိုမ်ႈ!..တၢင်းႁၢင်ႈလီသၽႃႇဝၸိူင်ႉၼႆ တေႁႃတူၺ်းလႆႈတီႈလႂ်လႃႇ လိူဝ်သေတီႈၼႆႈ”
“ၼၼ်ႉယဝ်ႉ လီတေႉယဝ်ႉ”
မိူၼ်ဝႃႈ ၸိုၼ်ႈၶိူဝ်းၼၼ်ႉတႄႉ ယၵ်ႉတူၺ်းၸွမ်းလိုၼ်းၼုမ်ႇ ပေႃးဢမ်ႇပၼ်ၽၢတ်ႇသၢႆတႃလႆႈ ၼၼ်ႉယဝ်ႉ။
လိုၼ်းၼုမ်ႇၼၼ်ႉၵေႃႈ ဝၢႆႇၸူးၸိုၼ်ႈၶိူဝ်းသေယဝ်ႉ လၢတ်ႈၵႂႃႇ
“သူတေမီးလွင်ႈမၢႆတွင်းလီလီ..ၸွမ်းတီႈၼႆႈ ၼမ်တေႉယဝ်ႉၸွင်ႇၸႂ်ႈ..”
“ဢိုမ်ႈ!..မိူဝ်ႈၵေႃႉလဵၵ်ႉႁဝ်းလႄႈတင်းမႄႈ တေမႃးလႄႇပူႇႁဝ်းတီႈၼႆႈတႃႇသေႇယဝ်ႉ ပူႇ.. ၶဝ်လႆႈၸႂ်ယူႇတီႈဝၢၼ်ႈၼႆႉတေႉတေႉယဝ်ႈ ၶဝ်လၢတ်ႈဝႃႈ သမ်ႉဝႃႈထိုင်တၢႆၵေႃႈ..တေဢမ်ႇဢၢၼ်းမိူဝ်း ယွၼ်ႉဝႃႈ တီႈၼႆႈမၼ်းၵတ်းယဵၼ်လီၼႆယူႇ ၵူၺ်းၵႃႈ ဝၢႆးသေမႄႈ လူႉသဵင်ႈတၢႆပႅတ်ႈႁဝ်းယဝ်ႉ ပူႇၵေႃႈလႆႈမိူဝ်းယူႇဝဵင်းၶိုၼ်းလႄႈ ဢမ်ႇလႆႈမႃးတီႈၼႆႈၶိုၼ်း တေႃႇၶဝ်ပေႃးလူႉသဵင်ႈတၢႆၵႂႃႇပႅတ်ႈၼၼ်ႉယဝ်ႉ”
ယၵ်ႉတူၺ်းၸူးၵႂႃႇ သၢႆၵၢင်ဝၼ်းဢၼ်ၸမ်ႁူင်ႈလူင်းလိၼ်လွႆးလွႆးၼၼ်ႉသေယဝ်ႉ
“ႁဝ်းလႄႈတင်းပူႇ မီးလွင်ႈမၢႆတွင်းလီလီၸွမ်းၵၼ်တင်းၼမ်ၼၼ်ႉယဝ်ႉ ၵူၺ်းၵႃႈ ႁဝ်းဢမ်ႇတွၼ်ႉၶုၵ်ႉၶူၼ်ႉဢွၵ်ႇမႃးဝူၼ်ႉၶိုၼ်း တေႃႇထိုင်ၶဝ်ပေႃးလူႉတၢႆၵႂႃႇ ႁဝ်းၸင်ႇတေဝူၼ်ႉလႆႈၶိုၼ်း လွင်ႈမၢႆတွင်းၸိူဝ်းၼၼ်ႉ လႄႈ ႁဝ်းၵေႃႈ ႁဵတ်းၸွမ်းၵႂၢမ်းမၼ်ႈဢၼ်ပၼ်ၶဝ်ဝႆႉဢမ်ႇလႆႈ ဝႃႈ..တေဢၢၼ်းဢွၼ်ၶဝ်ပွၵ်ႈမႃးယူႇတီႈၼႆႈၶိုၼ်းၼႆ ႁဝ်းလိုမ်းမၼ်းလႆႈၸိူင်ႉႁိုဝ်လႃႇ”
ၼမ်ႉတႃၸုမ်ႉယမ်းႁူၺ်ႇတႃမႃး ၵူမ်ႈၼႃႈလူင်းသေယဝ်ႉ လိုၼ်းၼုမ်ႇၼၼ်ႉၵေႃႈ ယိပ်းဢဝ်မိုဝ်းမၼ်းသေ
“ၶေႃႈၵႂၢမ်းလိုၼ်းသုတ်း ဢၼ်ပူႇလၢတ်ႈတီႈႁဝ်းဝႃႈႁိုဝ်ၼႆ ၸွင်ႇၶႂ်ႈႁူႉႁႃႉ”
“ပူႇတၼ်းသင်ႇလၢတ်ႈတီႈသူႁေႁႃႉ”
“ဢိုမ်ႈ! ၶဝ်ဝႃႈ..ႁႂ်ႈသူၸႂ်ႉၸၢတ်ႈပၢၼ်မီးတၢင်းသိူဝ်းၼႆဝႃႇ”
ၸိုၼ်ႈၶိူဝ်းၵေႃႈယဵၼ်လူင်ၵႂႃႇယဝ်ႉ။ လိုၼ်းၼုမ်ႇသိုပ်ႇလၢတ်ႈထႅင်ႈ
“ပဵၼ်သင်လႄႈ..ၵူၼ်းဢၼ်ၽၢတ်ႇယၢၼ်ၵႂႃႇယဝ်ႉၼၼ်ႉ တေလႆႈလၢတ်ႈႁႂ်ႈၵူၼ်းဢၼ်တိုၵ်ႉယူႇ မီးတၢင်းသိူဝ်းလႃႇ ၶဝ်ဢမ်ႇႁပ်ႉႁူႉလႆႈလူးၵွၼ်ႇဝႃႈ ၸၢတ်ႈပၢၼ်ဢၼ်ဢမ်ႇမီးၶဝ်ယူႇၼၼ်ႉ မၼ်းပဵၼ်ၸိူင်ႉႁိုဝ်၊ ၵူၼ်းဢၼ်ယူႇၵေႃႈ ႁပ်ႉၵႂၢမ်းၶဝ်ၵႂႃႇ လူၺ်ႈႁူႉယူႇဝႃႈ..ႁဵတ်းဢမ်ႇလႆႈ၊ ဝၢႆးသေၶဝ်ၽၢတ်ႇၵႂႃႇ မၼ်းယိုင်ႈၶႅၼ်းငဝ်၊ ၸႂ်ထိုင်ၶဝ် ထိုင်တီႈ ႁၢမ်ႈၼမ်ႉတႃပေႃးဢမ်ႇလႆႈ၊ ဢမ်ႇဝႃႈတေႁဵတ်းသင် တေႁၼ်သင်ၵေႃႈ ၶုၵ်းၸႂ်လႆႈၶဝ်ၵႂႃႇၵူႈလွင်ႈ၊ တၢင်းသိူဝ်းဢၼ်ဝႃႈၼၼ်ႉ မၼ်းပႃးၵႂႃႇၸွမ်းၶဝ်ယဝ်ႉႁိုဝ် တၢင်းတုၵ်ႉလူင်ၼၼ်ႉၵူၺ်းဢမ်ႇၸႂ်ႈႁႃႉ ဢၼ်ၶဝ်ၽၢၵ်ႇၽင်ဝႆႉ..”
မုင်ႈႁႅၼ်တူၺ်းသၢႆလႅင်းတႃဝၼ်း ဢၼ်ၸူမ်ႁၢႆၵႂႃႇယဝ်ႉၼၼ်ႉသေ သိုပ်ႇလၢတ်ႈထႅင်ႈ
“ၶဝ်ဢမ်ႇယူႇယဝ်ႉ.. ၶဝ်တၢႆၽၢတ်ႇၵႂႃႇယဝ်ႉ.. ဢမ်ႇၶိုၼ်းပွၵ်ႈမႃးယဝ်ႉ.. မၼ်းပဵၼ်ၶေႃႈၵႂၢမ်း ဢၼ်ႁဝ်းတေလႆႈယွမ်းႁပ်ႉမၼ်း ၵူၺ်းၵႃႈ မၼ်းၵေႃႈ..ပဵၼ်ၶေႃႈၵႂၢမ်း ဢၼ်ဢမ်ႇၶႂ်ႈငိၼ်းမၼ်းလႄႈ ငိူင်ႉဝႄႈမၼ်းတႃႇသေႇသေ လႅၼ်တူဝ်ၸဝ်ႈၵဝ်ႇဝႃႈ ၶဝ်ၵေႃႈမီးယူႇသေတီႈတီႈၵူၺ်းၼႆယူႇ ယွၼ်ႉလွင်ႈမၢႆတွင်းဢၼ်မီးၶဝ်ယူႇၼၼ်ႉ ဢမ်ႇမွတ်ႇႁၢႆၵႂႃႇလႄႈ ႁဵတ်းႁႂ်ႈႁပ်ႉႁူႉလႆႈဝႃႈ ၶဝ်တိုၵ်ႉမီးယူႇၵူၺ်း မိူဝ်ႈဝူၼ်ႉဝႃႈမီးၶဝ်ယူႇ ၸင်ႇတေသိုပ်ႇၸႂ်ႉၸၢတ်ႈပၢၼ် မီးတၢင်းသိူဝ်းလႆႈ”
ဝိၼ်ႇဝၢႆႇယၵ်ႉတူၺ်းၸိုၼ်ႈၶိူဝ်းသေယဝ်ႉ
“ပေႃးဝႃႈမၼ်းႁဵတ်းႁႂ်ႈသူတုၵ်ႉၸႂ်ၼႃႇၼႆ သူဢမ်ႇယွမ်းႁပ်ႉမၼ်းၵေႃႈလႆႈ ၸႂ်ႉၸၢတ်ႈပၢၼ်ယူႇလူၺ်ႈတိုၵ်ႉမီးၶဝ်ယူႇၵေႃႈဢမ်ႇပဵၼ်သင် သမ်ႉဝႃႈတေမိူၼ်..ၵူၼ်းယွင်ႇၵေႃႈယဝ်ႉ ၶၢဝ်းယၢမ်း..တေၸွႆႈယူတ်းယႃပၼ်သူလႆႈယူႇၵူၺ်း”
ၸိုၼ်ႈၶိူဝ်းၼၼ်ႉၵေႃႈ ၶဝ်ႈၵွတ်ႇဝႆႉလိုၼ်းၼုမ်ႇသေ ပွႆႇၼမ်ႉတႃမၼ်းလႆဢွၵ်ႇမႃးယူႇ။ လိုၼ်းၼုမ်ႇၼၼ်ႉၵေႃႈ ၵွတ်ႇမၼ်းၶိုၼ်းယဝ်ႉ ၼမ်ႉတႃၸိုမ်းယွတ်ႇယွႆႉယမ်းၵႅမ်ႈမၼ်းမႃးမိူၼ်ၵၼ်။
ၸိုၼ်ႈၶိူဝ်းၶႃၵေႃႈ မိူဝ်ႈဢွၼ်ၵၼ်မိူဝ်းႁွတ်ႈထိုင်ႁိူၼ်းၼၼ်ႉ လႆႈႁၼ်လူတ်ႉမွၼ်းသႅင် တမ်းယူႇၼႃႈႁိူၼ်းလႄႈ ၸဝ်ႈၶွင်မၼ်းၼၼ်ႉၵေႃႈ ၼင်ႈပႂ်ႉယူႇတၢင်းၼႃႈႁိူၼ်း ၼၼ်ႉယဝ်ႉ။
“သူ..ႁဵတ်းႁိုဝ်မႃးတီႈၼႆႈလႃႇ” ၸိုၼ်ႈၶိူဝ်းထၢမ်
“ႁဝ်းၸွမ်းႁႃသူ..ပေႃးၸွတ်ႇၵူႈတီႈယဝ်ႉ တီႈၼႆႈပဵၼ်တီႈဢၼ်ၵႆသုတ်းလႄႈ ပဵၼ်တီႈလိုၼ်းသုတ်း ဢၼ်ဝူၼ်ႉဝႃႈသူတေမႃး ဢမ်ႇထၢင်ႇဝႃႈ..သူတေမႃးယူႇတီႈၼႆႈတေႉတေႉ” ႁၼ်လိုၼ်းၼုမ်ႇယူႇၸွမ်းလႄႈ “ယဝ်ႉသူလူး..မႃးမိူဝ်ႈလႂ်လႃႇ ႁဵတ်းႁိုဝ်ႁူႉဝႃႈၶဝ်မႃးယူႇတီႈၼႆႈ”
“ဢေႃႈ..လၢမ်းမႃးတူၺ်းၵူၺ်းၶႃႈ”
“မိူၼ်ဝႃႈ..ႁဝ်းတေမႃးတူၵ်းလိုၼ်းယူႇၼၼ်ႉယဝ်ႉ”
လိုၼ်းၼုမ်ႇၼၼ်ႉ တင်းႁိူဝ်ႉတူဝ်ႁိူဝ်ႉၸႂ်ၼႃႇလႄႈ ၶမ်ႈယဝ်ႉၼႆၵေႃႈ ၼွၼ်းထႃႈဢွၼ်တၢင်းယဝ်ႉ။ ဝႆႉပၼ်ႁႂ်ႈသႅင်မွၼ်းလႄႈ ၸိုၼ်ႈၶိူဝ်း ဢုပ်ႇၵၼ်ယူႇတၢင်းၼွၵ်ႈႁိူၼ်း ၼင်ႈတူၺ်းလိူၼ်တူၺ်းလၢဝ်ၸွမ်းၵၼ်ၵႂႃႇယူႇ။ ၸွမ်းလူၺ်ႈ ၶႃသွင်ၵေႃႉၼၼ်ႉ ယၢမ်ႈမႃးတီႈၼႆႈၸွမ်းၵၼ်လႄႈ လႆႈဢုပ်ႇၶႆႈၶိုၼ်းလွင်ႈဝၼ်းလင်ၸိူဝ်းၼၼ်ႉသေ ယုမ်ႉၶူဝ်ၸွမ်းၵၼ်ယူႇယဝ်ႉ။ လိုၼ်းၼုမ်ႇၼၼ်ႉတႄႉ ႁိုဝ်ႁူႉႁိုဝ်ငိၼ်းသင် မွင်းဝၢင်းႁူဝ်ၼွၼ်းၵူၺ်း ႁွင်ႉပေႃးဢမ်ႇတိုၼ်ႇယဝ်ႉလူး။
ၵၢင်ၼႂ်ၸဵမ်ၸဝ်ႉ လိုၼ်းၼုမ်ႇဢၼ်တိုၼ်ႇမႃးၼၼ်ႉၵေႃႈ ပေႃးဢမ်ႇလႆႈႁၼ်ၽႂ်ယဝ်ႉ၊ မိူဝ်ႈဢၼ်ႁၢင်ႈႁႅၼ်းၶဝ်ႈၽၵ်းယူႇၼႂ်းသွင်ႇၾႆးၼၼ်ႉ လႆႈငိၼ်းသဵင်ဢုပ်ႇလၢတ်ႈ ၵူၼ်းသွင်ၵေႃႉဢမ်ႇၸမ်ဢမ်ႇၵႆ ယုမ်ႉငႅၼ်ႈၶူဝ်ဢုပ်ႇတေႃႇၵၼ်လူင်မႃး မၼ်းၵေႃႈလွမ်ငွၵ်ႈတူၺ်းသေ
“တူၺ်းမိူၼ်ၶဝ်တေလီၶိုၼ်ႈမႃးၶိုၼ်းယဝ်ႉ ဢုပ်ႇလႆႈၶူဝ်လႆႈပေႃးတၢၼ်ႇၼၼ်ႉတႄႉ” ယူႇယူႇၵေႃႈ ဝူၼ်ႉၶႆႈယူႇၼႂ်းၸႂ်မႃးဝႃႈ
“မိူဝ်ႈၶဝ်ယူႇၸွမ်းႁဝ်းၼၼ်ႉ ဢမ်ႇလႆႈႁၼ်ပဵၼ်ၸိူင်ႉၼႆၼေႃ ”
မိူဝ်ႈဢၼ်ၶႃႁွတ်ႈမႃးယဝ်ႉၼၼ်ႉၵေႃႈ လိုၼ်းၼုမ်ႇႁွင်ႉၵိၼ်ၶဝ်ႈၸွမ်းၵၼ်သေ
“ၵႂႃႇတၢင်းလႂ်ၵၼ်မႃးၶႃႈလႃႇ”
မွၼ်းသႅင်တွပ်ႇ “ၵႂႃႇလႄႇတူၺ်းၸွမ်းမူႇဝၢၼ်ႈၼႆႉ တီႈဢၼ်ႁဝ်းၵႆႉမႃးလႄႇလဵၼ်ႈၸွမ်းၵၼ်ယူႇတႃႇသေႇ မိူဝ်ႈၵေႃႉလဵၵ်ႉၼၼ်ႉၶႃႈ”
“လႅပ်ႈမီးတၢင်းသိူဝ်းတေႉယဝ်ႉ”
“ဢိုမ်ႈ!..မီးတၢင်းသိူဝ်းတေႉယဝ်ႉ တီႈၼႆႈပဵၼ်တီႈဢၼ်ႁဝ်း ဢမ်ႇမီးဝၼ်းလိုမ်းသေပွၵ်ႈၼၼ်ႉယဝ်ႉ” မွၼ်းသႅင်လၢတ်ႈ
လိုၼ်းၼုမ်ႇ ဢမ်ႇၸၢင်ႈလၢတ်ႈသင်ထႅင်ႈယဝ်ႉလႄႈ ယုမ်ႉႁႅင်ႈႁႅင်ႈၵႂႃႇၸူးၶိုၼ်းၵူၺ်း။
ၶဝ်သၢမ်ၵေႃႉၵေႃႈ ဢွၼ်ၵၼ်ပွၵ်ႈမိူဝ်းၶိုၼ်းသေ ၸိုၼ်ႈၶိူဝ်းၼၼ်ႉ ၼင်ႈတၢင်းၼႃႈၸွမ်းမွၼ်းသႅင် ဢၼ်ၵေႃႉႁေႃႈလူတ်ႉၼၼ်ႉယဝ်ႉ ဢုပ်ႇၵၼ်လူင်မိူဝ်းယူႇ။ လိုၼ်းၼုမ်ႇဢၼ်ဢမ်ႇႁူႉသင်ၸွမ်းၼၼ်ႉတႄႉ ၼင်ႈႁေထွမ်ႇၶႃဢုပ်ႇၵၼ်ၵႂႃႇၵူၺ်း။
ၶဝ်ပွၵ်ႈမိူဝ်းထိုင်ႁိူၼ်း သမ်ႉပေႃးမီးႁူဝ်ၶမ်ႈယဝ်ႉ။ ပႃႈဢွင်ႇဢၼ်ႁၼ်လူတ်ႉမႃးၼႆၵေႃႈ ၼႅတ်ႈမႃးႁပ်ႉၶဝ်ၵမ်းလဵဝ်သေ
“ၸၢႆးၶဝ်ႁွတ်ႈမႃးယဝ်ႉႁႃႉ” တူၺ်းၼႃႈၸိုၼ်ႈၶိူဝ်းယဝ်ႉၵေႃႈ “ပၢႆႈၵႂႃႇယူႇတၢင်းလႂ်လႃႇ ဢမ်ႇလႆႈၵိၼ်ၶဝ်ႈၵိၼ်ၼမ်ႉႁင်ယူဝ်ႉၼႆႉ သမ်ႉပေႃးယွမ်လူင်ဝႆႉ”
“ၶဝ်ၵႂႃႇတီႈဝၢၼ်ႈဢၼ်ပူႇယၢမ်ႈယူႇၼၼ်ႉၶႃႈ” မွၼ်းသႅင်လၢတ်ႈ
ပႃႈဢွင်ႇဢၼ်ႁၼ်မွၼ်းသႅင် လႄႈ ၸိုၼ်ႈၶိူဝ်း ႁွတ်ႈထိုင်ႁိူၼ်းမႃးၸွမ်းၵၼ်လီငၢမ်းၼၼ်ႉၵေႃႈ
“ႁွတ်ႈမႃးၸွမ်းၵၼ်ၵေႃႈလီယဝ်ႉ ဢွၼ်ၵၼ်ၶဝ်ႈၼႂ်းႁိူၼ်းၵွၼ်ႇလႄႈ တေႁိူဝ်ႉၵၼ်ယဝ်ႉ ပႃႈတေႁၢင်ႈႁႅၼ်းၶဝ်ႈၽၵ်းဝႆႉပၼ်”
သိုပ်ႇယၵ်ႉၼႃႈလၢတ်ႈၸူးၸိုၼ်ႈၶိူဝ်းသေဝႃႈ “မိူဝ်ႈၸၢႆးဢမ်ႇယူႇၼၼ်ႉ ပႃႈလၢတ်ႈႁႂ်ႈမွၼ်းသႅင်မႃးလိုဝ်ႈတီႈႁိူၼ်းၼႆႉဢိူဝ်ႈ သင်ဢမ်ႇသင်ၵေႃႈ ႁွင်ႈမီးပဵၼ်လၢႆႁွင်ႈ ပဵၼ်ႁဝ်းႁႃးၼင်ႇၵၼ်ၵူၺ်း မၼ်းတေဢမ်ႇလႆႈၵႂႃႇယူႇတၢင်ႇတီႈ မီးႁင်ၵေႃႈတေလႆႈတူၺ်းထိုင်ၵၢၼ်ငၢႆႈၼၼ်ႉၼႃႇ”
“ဢေႃႈ..ၵမ်ႈၸႂ်ပႃႈၵူၺ်းၶႃႈ”
လႅင်းဢွၼ်ႇၼၼ်ႉၵေႃႈ မိူဝ်ႈႁူႉဝႃႈၸိုၼ်ႈၶိူဝ်းၶဝ်မႃးယဝ်ႉၼႆ ၼႅတ်ႈဢွၵ်ႇမႃးႁပ်ႉၶဝ်မိူၼ်ၵၼ် မွၼ်းသႅင်ဢၼ်လႆႈႁၼ်လႅင်းဢွၼ်ႇၼႆၵေႃႈ ၼႅတ်ႈတူင်ႉတၵ်ႉၸူးၵမ်းလဵဝ် ၼႂ်းၶၢဝ်းတၢင်းဢၼ် လိုၼ်းၼုမ်ႇဢမ်ႇယူႇၼၼ်ႉ သွင်ၶႃ လႆႈလဵၼ်ႈၵေႃႉၵၼ်သေ ပဵၼ်ဢၼ်မိုတ်ႈၵၼ်မႃး ယူႇယဝ်ႉ။
“ဢႃမႃးၶိုၼ်းယဝ်ႉ..ၸႂ်ထိုင်လႅင်းဢွၼ်ႇၼႃႇယဝ်ႉဝႃႈ” ၶဝ်ႈၵွတ်ႇဢဝ်လႅင်းဢွၼ်ႇၼၼ်ႉၵမ်းလဵဝ်ယူႇ။
“တၼ်းမိုတ်ႈၵၼ်ၸဵမ်မိူဝ်ႈလႂ်လႃႇ”
“လွင်ႈၼႆႉလၢတ်ႈဢမ်ႇလႆႈၶႃႈ” လႅင်းဢွၼ်ႇယုမ်ႉယုမ်ႈယၢႆႈယၢႆႈသေလၢတ်ႈၸူး။
ဢၼ်ဝႃႈ ဢၢၼ်းမႃးႁႃမႄႈၼႆၼၼ်ႉၵေႃႈ သမ်ႉပေႃးလိုမ်းၵႂႃႇယဝ်ႉ။
“ပေႃးၼၼ်ပေႃႈယွၼ်းႁွပ်ႇဢိတ်ႉၼိုင်ႈလူး ၸႂ်ထိုင်လုၵ်ႈၸၢႆးတေႉတေႉယဝ်ႉ”
ၸိုၼ်ႈၶိူဝ်းၼၼ်ႉၵေႃႈ ႁွပ်ႇဢုမ်ႈဢဝ်လႅင်းဢွၼ်ႇၵႂႃႇယူႇ။ ပႃႈဢွင်ႇဢၼ်လႆႈႁၼ်ၼင်ႇၼၼ်ၵေႃႈ ၼင်ႇႁၢင်ႈယုမ်ႉဢွၵ်ႇမႃးၸွမ်းယဝ်ႉ တႅၼ်းတီႈတေပဵၼ်လိုၼ်းၼုမ်ႇ ဢမ်ႇႁူႉၸၵ်းဝႃႈပဵၼ်ၽႂ်ၼၼ်ႉ ၼႂ်းၵၢင်ၸႂ်မၼ်းၼၼ်ႉတႄႉ ပၼ်ႁႅင်းမွၼ်းသႅင်လႄႈၸိုၼ်ႈၶိူဝ်းဝႆႉ ယူႇယဝ်ႉ။
လိုၼ်းၼုမ်ႇၼၼ်ႉၵေႃႈ မီးၵူၼ်းႁွင်ႉထူပ်းၼႆလႄႈ မိူဝ်ႈၽွင်းၸိုၼ်ႈၶိူဝ်းၶဝ် တေၶဝ်ႈႁိူၼ်းၼၼ်ႉ မၼ်းလႆႈသင်ႇလၢတ်ႈတီႈပႃႈဢွင်ႇသေ ဢွၵ်ႇႁိူၼ်းၵႂႃႇပႅတ်ႈ ယူႇ။ တီႈၽိူၼ်မူႇၶဝ်ႈၼၼ်ႉၵေႃႈ ပႃႈဢွင်ႇလႆႈႁၢင်ႈႁႅၼ်းဝႆႉပၼ်တႃႇသၢမ်ၵေႃႉၵူၺ်း ၸိုၼ်ႈၶိူဝ်းၸင်ႇထၢမ်ပႃႈဢွင်ႇၵႂႃႇ
“ပဵၼ်သင်ႁႅၼ်းသၢမ်တီႈၵူၺ်းၶႃႈလႃႇ”
“ဢေႃ..လိုၼ်းၼုမ်ႇၶဝ်ဢွၵ်ႇၵႂႃႇတၢင်းၼွၵ်ႈယဝ်ႉ”
“ၶဝ်ၵႂႃႇလႂ်ၶႃႈ..”
“ၶဝ်ၵေႃႈဢမ်ႇလႆႈလၢတ်ႈတီႈပႃႈ”
ၸိုၼ်ႈၶိူဝ်းဢၼ်ႁူႉၸိူင်ႉၼၼ်ၵေႃႈ ၸႂ်ဢမ်ႇလီမႃးသေ သိုပ်ႇၾူင်းၸူးၵမ်းလဵဝ်။
“သူမီးယူႇတီႈလႂ်..”
“ႁဝ်းမီးၵၢၼ်ဢိတ်ႉၼိုင်ႈ ၵမ်ႉၵေႃႈတေပွၵ်ႈမိူဝ်းယဝ်ႉ” ဝၢင်းၽူင်းၵႂႃႇပႅတ်ႈမၼ်းယူႇ။
ၵူၼ်းၵေႃႉဢၼ်လိုၼ်းၼုမ်ႇၵႂႃႇထူပ်းၼၼ်ႉတႄႉ ပဵၼ်ပီႈၶမ်းယဝ်ႉ။
“ႁွင်ႉႁဝ်းမႃးမီးလွင်ႈသင်ဢမ်ႇႁူႉ..!”
“ႁဝ်းလႆႈႁၼ်သူတီႈပၢင်မႃႇသႃႇယူႇ ၵူၺ်းဢမ်ႇႁတ်းတၵ်ႉ ပဵၼ်သူၵူၺ်းလူး ၽူႈယိင်းဢၼ်ၸိုၼ်ႈၶိူဝ်းႁွင်ႉမႃး”
“ဢေႃႈ..ၸႂ်ႈယဝ်ႉ”
“ၵူၼ်းၸိူင်ႉၼင်ႇၶဝ်..ဢမ်ႇပႆႇလိုမ်းမေးၵဝ်ႇလႆႈငၢႆႈငၢႆႈလေႃႇ ဢမ်ႇၸႂ်ႈဝႃႈႁွင်ႉသူမႃးၼၼ်ႉ မီးလွင်ႈတၢင်းတၢင်ႇလွင်ႈယူႇၽၢႆႇလင်ႁႃႉ”
“လွင်ႈသင်ၶႃႈလႃႇ..ပီႈႁူႉယူႇယဝ်ႉဢမ်ႇၸႂ်ႈၶႃႈႁိုဝ် ပဵၼ်သင်လႄႈယင်းတိုၵ်ႉတေမႃးထၢမ်ယူႇ” သၢႆတႃလိုၼ်းၼုမ်ႇယၵ်ႉတူၺ်းၸူးပီႈၶမ်းၼင်ႇဢမ်ႇပေႃးၸႂ်ၵႃႈႁိုဝ်။
“ႁဝ်းတေႁူႉလွင်ႈသင် ပေႃးသူဢမ်ႇလၢတ်ႈတေႁဵတ်းႁိုဝ်ႁူႉလႃႇ”
“ၵူၼ်းႁဝ်း..တေယူႇၸွမ်းၵၼ်ၵေႃႈ မိူဝ်ႈတင်းသွင်ၽၢႆႇ..ၽွမ်ႉၸႂ်ၵၼ်ၵူၺ်းဢမ်ႇၸႂ်ႈႁိုဝ်လႃႇ” လိုၼ်းၼုမ်ႇသိုပ်ႇထၢမ်ၸူးပီႈၶမ်းၵႂႃႇထႅင်ႈ
“ၵူၺ်းၵႃႈ..ပီႈႁူႉယူႇၸွင်ႇၸႂ်ႈ လွင်ႈလႅင်းဢွၼ်ႇၼၼ်ႉမၼ်းပဵၼ်မႃးၸိူင်ႉႁိုဝ်”
“လွင်ႈသင်လႃႇ ႁဝ်းဢမ်ႇႁူႉလွင်ႈသင်”
သၢႆတႃပီႈၶမ်း ယၵ်ႉတူၺ်းၵႂႃႇတၢင်းၼိုင်ႈယဝ်ႉတၢင်းၼိုင်ႈ ႁၼ်ၵူၼ်းၵေႃႉၼိုင်ႈ ၼင်ႈယူႇၸွမ်းၸိူဝ်းၼၼ်ႉလႄႈ မိူၼ်ၶႂ်ႈၵူဝ်ၵူဝ်ဝႆႉယူႇ။ ပီႈၶမ်းၵေႃႈ ဢဝ်ၼမ်ႉတႅမ်ႈလိၵ်ႈ သႂ်ႇၼိူဝ်ၽိူၼ်ၼၼ်ႉ ပၼ်လိုၼ်းၼုမ်ႇတူၺ်းယဝ်ႉ လိုၼ်းၼုမ်ႇၵေႃႈ မိူၼ်ႁူႉလွင်ႈတၢင်းမႃးသေ လၢတ်ႈၸူးၵႂႃႇ
“ၶူးတီႈႁူင်းႁဵၼ်းလႅင်းဢွၼ်ႇမိူဝ်ႈဢွၼ်တၢင်းၼၼ်ႉ ၶႂ်ႈထူပ်းပီႈဝႃႇ ပေႃးတၼ်းတၼ်းၵေႃႈ ၵႂႃႇလႄႇၶဝ်ၽွင်ႈလႄႈ”
“ဢိုမ်ႈ!”
သွင်ၶႃၵေႃႈ သူင်ႇသင်ႇၵၼ်ပွၵ်ႈမိူဝ်းၵႂႃႇယူႇယဝ်ႉ။ လိုၼ်းၼုမ်ႇၼၼ်ႉၵေႃႈ မိူဝ်ႈဢၼ်လႆႈႁၼ်လွင်ႈႁဵတ်းသၢင်ႈ ၽၢႆႇမႄႈသိုပ်ႇၸိုၼ်ႈၶိူဝ်း မိူဝ်ႈပၢင်မႃႇသႃႇၼၼ်ႉ ဢမ်ႇဝႃႈ ပီႈၸၢႆး၊ ပီႈပႂ်ႉလႄႈ လုၵ်ႈၶဝ် ႁဵတ်းႁႂ်ႈမၼ်းမႆႈၸႂ်ၼိူဝ်လႅင်းဢွၼ်ႇမႃးတေႉတေႉယူႇ။
လိုၼ်းၼုမ်ႇဢၼ်မီးလွင်ႈၶမ်ၸႂ် ဢမ်ႇၸၢင်ႈလၢတ်ႈတေႃႇၽႂ်ၼၼ်ႉၵေႃႈ သိုပ်ႇၽူင်းၸူးသႅင်ႁိူၼ်းၼုမ်ႇ ဢၼ်ယၢမ်ႈဢုပ်ႇၵၼ်လႆႈၵူႈလွင်ႈၼၼ်ႉ ဢၢင်ႈတေဢုပ်ႇၵၼ်လီလီ ၵူၺ်းသမ်ႉမီးတိုၼ်းႁၢၼ်မႃးၵဝ်း ဢဝ်ဢမ်ႇၸၢင်ႈလၢတ်ႈသင်လႆႈယူႇ။ ၽၢႆႇတၢင်းမူၺ်ႁွမ်လႄႈ ပိုၼ်းမိူင်းၼၼ်ႉတႄႉ ယၢမ်းႁူဝ်ၶမ်ႈၸိူင်ႉၼႆ ပဵၼ်ၶၢဝ်းဢၼ်ၵၢၼ်သုၵ်ႉတႄႉတႄႉ ၼၼ်ႉယဝ်ႉ။
ၵိုတ်းၵူၼ်းထႅင်ႈၵေႃႉၼိုင်ႈ ဢၼ်မၼ်းႁူႉၸၵ်းလိူဝ်ပိူၼ်ႈ ၸဵမ်မိူဝ်ႈမႃးယူႇၸွမ်းၸိုၼ်ႈၶိူဝ်း ၼၼ်ႉတႄႉပဵၼ်သၢႆလႅင်းယဝ်ႉ။ မွင်းသိုပ်ႇၽူင်းၵူၺ်း လၢတ်ႈတီႈယူႇၼႆၵေႃႈ သၢႆလႅင်းၼၼ်ႉ ပေႃးပေႃႇၼႃႈမႃးၼႄ ယူႇယဝ်ႉ။
တီႈလၢၼ်ႉၼိူဝ်ႉယၢင်ႈၼၼ်ႉ သၢႆလႅင်းၵေႃႈ မႃးၸူးလိုၼ်းၼုမ်ႇ ဢၼ်ၼင်ႈပႂ်ႉမၼ်းဝႆႉယူႇယဝ်ႉသေ
“ႁွင်ႉမႃးမီးလွင်ႈသင်ၶႃႈလႃႇ..”
“ပဵၼ်သင်..မႃးဝႆးထိုင်တၢၼ်ႇၼႆႉလႃႇ ဢမ်ႇႁဵတ်းမိူၼ်ပဵၼ်ၵၢၼ်လမ်ႇလွင်ႈၼႃႇၵေႃႈလႆႈ”
“ပီႈဢၢႆႈႁဝ်း..လၢတ်ႈဝႃႈ ႁႂ်ႈလုမ်းလႃးတူၺ်းထိုင်..ပီႈလူဝ်းႁဝ်းလီလီၼႆၼႃႇ တေၸၢင်ႈႁဵတ်းႁိုဝ်”
“ႁဝ်းဢမ်ႇလႆႈႁွင်ႉမႃး..ၸွမ်းလူၺ်ႈပဵၼ်ပီႈၼွင်ႉၵၼ်တင်းသူၼႃ ႁဝ်းၵေႃႈၶႂ်ႈမီးဢူၺ်းၵေႃႉ..ဢိုမ်ႈ..မွၵ်ႈၼႆႉၵူၺ်း”
သၢႆလႅင်းတူၺ်းသီၼႃႈ လိုၼ်းၼုမ်ႇၼၼ်ႉ ဢမ်ႇပေႃးလီၵႃႈႁိုဝ်လႄႈ
“ပဵၼ်သင်ထႅင်ႈယဝ်ႉလႃႇ..ယင်းပႆႇၶႅၼ်းလီၵွၼ်ႇႁႃႉ”
“ဢမ်ႇၼႃ! ႁဝ်းၶႅၼ်းလီယဝ်ႉ မီးလွင်ႈသုၵ်ႉယုင်ႈၸႂ်ဢိတ်းၼိုင်ႈၵူၺ်း”
“မီးလွင်ႈသင်ၵေႃႈ..လၢတ်ႈၼႄၼွင်ႉၸၢႆးၵေႃႉၼႆႉလႆႈယူႇၼႃ”
“ဢႃႇယုယႂ်ႇလိူဝ်ႁဝ်းပဵၼ်လၢႆပီႊ ပဵၼ်သင်လႄႈ..တေလႆႈႁွင်ႉတူဝ်ၸဝ်ႈၵဝ်ႇဝႃႈၼွင်ႉၸၢႆးလႃႇ ပဵၼ်ပီႈဢၢႆႈႁဝ်းၵူၺ်းလႄႈၼႃႈ သမ်ႉဝႃႈႁဝ်းဢမ်ႇၸႂ်ႈပီႈလူဝ်းၵေႃႈ သူၵေႃႈ..ယင်းတိုၵ်ႉတေပဵၼ်ပီႈဢၢႆႈႁဝ်းယူႇ”
“ဢိုမ်ႈ! တေဢဝ်ၸိူင်ႉၼၼ်ႁႃႉ..”
လိုၼ်းၼုမ်ႇၼၼ်ႉၵေႃႈ ႁိုဝ်ႈလဝ်ႈသႂ်ႇၵွၵ်းသေ
“ပွၵ်ႈၼႆႉပဵၼ်ပွၵ်ႈဢွၼ်တၢင်းသုတ်း ဢၼ်ႁဝ်းၵိၼ်လဝ်ႈ ပေႃးမဝ်းၵေႃႈ ၸွႆႈမိူဝ်းသူင်ႇၽွင်ႈ”
သမ်ႉပေႃးဢဝ်သၢႆလႅင်းၵႅၼ်ႉမႃးၵမ်းလဵဝ်။
ဝၢႆးသေဢိုၵ်ႉလဝ်ႈၵႂႃႇၵွၵ်းၼိုင်ႈယဝ်ႉ လၢတ်ႈဢွၵ်ႇၵႂႃႇ ၼင်ႇဢၼ်ၶႂ်ႈလၢတ်ႈၼၼ်ႉၼႄယူႇ။
“လႅင်းဢွၼ်ႇၼၼ်ႉ မိူဝ်ႈၶဝ်ၵေႃႉလဵၵ်ႉလဵၵ်ႉၼႃ ၶီႈႁႆႈတေႉယဝ်ႉ ၶႂ်ႈၵိၼ်ၵေႃႈႁႆႈ၊ တွင်ႉမႆႈၵေႃႈႁႆႈ၊ ၸဵပ်းၵေႃႈႁႆႈ၊ ၶႂ်ႈႁဵတ်းသင်ၵေႃႈႁႆႈ သဵင်ႁႆႈၶဝ်ၼၼ်ႉ ႁဵတ်းႁႂ်ႈႁဝ်းၶႂ်ႈပဵၼ်ၵူၼ်းယွင်ႇၵႂႃႇယဝ်ႉ ၶႂ်ႈၼွၼ်းၵေႃႈဢမ်ႇလႆႈၼွၼ်းလီလီ၊ ၶႆႈၵိၼ်ၵေႃႈဢမ်ႇလႆႈၵိၼ်လီလီ မၢင်ၵမ်းမႃးၵေႃႈဢမ်ႇၶႂ်ႈသူၼ်ၸႂ်မၼ်းႁေယဝ်ႉ ၵူၺ်းၵႃႈ ပေႃးၵႂႃႇႁွပ်ႇမၼ်းသမ်ႉ ယုမ်ႉတေႃႇပိူၼ်ႈႁေ ႁဝ်းၵေႃႈပွႆႇမၼ်းပႅတ်ႈဢမ်ႇလႆႈသေပွၵ်ႈ ႁဝ်းၶႂ်ႈႁွပ်ႇဢုမ်ႈမၼ်း၊ ၶႂ်ႈၵွတ်ႇမၼ်းဝႆႉ၊ ၶႂ်ႈယူႇၸွမ်းမၼ်း၊ ၶႂ်ႈၵႅတ်ႇၶႄၶဝ်ဝႆႉ၊ ၶႂ်ႈႁၼ်ၶဝ်ၵေႃႉယႂ်ႇပေႉတူဝ် ၸွင်ႇႁဝ်းတေႁဵတ်းလႆႈႁႃႉ..”
“မိူဝ်ႈၶဝ်လႆႈမွၵ်ႈၶူပ်ႇသွင်ၶူပ်ႇၼႆႉသမ်ႉ လူၼ်းဝႃႈလူၼ်းယဝ်ႉဝႃႈ ၵမ်ႉယိပ်းဢၼ် တၢဝ်းဢၼ်ၵႂႃႇၵူႈတီႈ ႁဝ်းလမ်းပေႃးဢမ်ႇတၼ်းၶိုတ်းယဝ်ႉ ထိုင်တီႈဢၢင်ႈဢဝ် ၽၢင်တၢတ်ႈၶူဝ်းတူၵ်းသႂ်ႇၺႃးမၼ်းယဝ်ႉ မိူဝ်ႈႁူႉဝႃႈၽၢင်တၢတ်ႈၶူဝ်း ဢမ်ႇလႆႈတူၵ်းသႂ်ႇတူဝ်မၼ်းၼၼ်ႉ ႁဝ်းငိၼ်းၸူမ်းတႄႉယဝ်ႉ သမ်ႉဝႃႈႁဝ်းၼၼ်ႉ တေထုၵ်ႇၽၢင်တၢတ်ႇၶူဝ်းတူၵ်းသႂ်ႇသေတႃႉၵေႃႈ မၼ်းယင်းတေဢမ်ႇၸဵပ်းတၢၼ်ႇ ဢၼ်ႁဝ်းတေလႆႈႁၼ်ၶဝ်ၸဵပ်းၼၼ်ႉလူးၵွၼ်ႇ လုမ်းလႃးၶဝ်ႁႂ်ႈယူႇလီ တူၺ်းထိုင်ၶဝ်ႁႂ်ႈၵႅၼ်ႇၶႅင်မီးႁႅင်း ၵႅတ်ႇၶႄပၼ်ၶဝ် ႁႂ်ႈလွတ်ႈၽေးၶဵၼ် ႁဝ်းထုၵ်ႇလီႁဵတ်းၸိူင်ႉၼၼ်ယဝ်ႉ ဢမ်ႇဝႃႈမၼ်းတေပဵၼ်သင်မႃးၵေႃႈယဝ်ႉ”
လႃႉၶေႃးသိူဝ်ႈ ၼႄႁူဝ်မႃႇၽၢႆႇသၢႆႉပွတ်းလင်မၼ်းၼၼ်ႉသေ “ၸွင်ႇႁၼ်ႁိုဝ် ႁွႆးၽၢင်တၢတ်ႈၶူဝ်းၼၼ်ႉတိုၵ်ႉမီးယူႇ”
သၢႆလႅင်းပေႃးလႆႈဝၢႆႇၼႃႈပႅတ်ႈသေယဝ်ႉ“ဢဝ်သိူဝ်ႈၶိုၼ်ႈလႆႈယဝ်ႉၶႃႈ” ထွတ်ႇဢဝ်သိူဝ်ႈမၼ်းႁူမ်ႇပၼ်လိုၼ်းၼုမ်ႇၵႂႃႇယူႇ။
လိုၼ်းၼုမ်ႇၼၼ်ႉၵေႃႈ တင်းၵိၼ်တင်းဢုပ်ႇ လဝ်ႈသမ်ႉပေႃးမူတ်းၵႂႃႇပဵၼ်တဝ်ႈယဝ်ႉ။ သၢႆလႅင်း ဢၼ်ၼင်ႈထွမ်ႇယူႇၼၼ်ႉ ႁၼ်မၼ်းလႅပ်ႈမဝ်းႁႅင်းၼႃႇယဝ်ႉလႄႈ ဢွၼ်ဢဝ်မိူဝ်းသူင်ႇတီႈႁိူၼ်းယူႇယဝ်ႉ။
ၸိုၼ်ႈၶိူဝ်းၼၼ်ႉၵေႃႈ ႁိုဝ်ပႃႈၶဝ်ႈၼွၼ်း ပႂ်ႉလိုၼ်းၼုမ်ႇယူႇတီႈၼႃႈႁိူၼ်းၼၼ်ႉ ပႆၵႂႃႇပႆမႃးယူႇတိၵ်းတိၵ်းၵူၺ်း၊ မိူဝ်ႈႁၼ်သၢႆလႅင်းမႃး ပႃးတင်းလိုၼ်းၼုမ်ႇဢၼ်မဝ်းလဝ်ႈၼၼ်ႉၵေႃႈ
“ပဵၼ်သင်လႄႈၶဝ်မဝ်းမႃးၸိူင်ႉၼႆလႃႇ”
“ၶဝ်ၵိၼ်လဝ်ႈမႃးၶႃႈ..မိူၼ်တေမီးလွင်ႈဢၼ်ႁဵတ်းႁႂ်ႈ ၸႂ်ၶဝ်သုၵ်ႉသၵ်ႉၼၼ်ႉၶႃႈယဝ်ႉ”
“ၸူမ်းယဝ်ႉၼႃႈ..”
ႁွပ်ႇဢုမ်ႈဢဝ်လိုၼ်းၼုမ်ႇၶဝ်ႈၵႂႃႇၼႂ်းႁွင်ႈသေယဝ်ႉ ဝၢင်းမၼ်းၼွၼ်းလူင်းၵႂႃႇသေ ၼင်ႈယၵ်ႉတူၺ်းလိုၼ်းၼုမ်ႇယူႇၸမ်ၸမ်ယဝ်ႉၵေႃႈ
“ပေႉမီးလွင်ႈၶမ်ၸႂ်သင်လႃႇ ပဵၼ်သင်လႄႈဢမ်ႇလၢတ်ႈၼႄၵၼ် ႁၼ်ႁဝ်းၼၼ်ႉ..ပဵၼ်ၵူၼ်းၸိူင်ႉႁိုဝ်ဝႆႉလႃႇ ႁဝ်းပဵၼ်ၸဝ်ႈၽူဝ်သူဢိူဝ်ႈ” လၢတ်ႈမိူၼ်ဢမ်ႇႁၢၼ်ႉၸႂ်လိုၼ်းၼုမ်ႇၼၼ်ႉမႃးယူႇယဝ်ႉ။
လိုၼ်းၼုမ်ႇၼၼ်ႉၵေႃႈ မိုၼ်းတႃမႃးဢိတ်ႉၼိုင်ႈယဝ်ႉ ႁၼ်ၸိုၼ်ႈၶိူဝ်းမီးယူႇၼႂ်းတႃမၼ်းၼၼ်ႉလႄႈ ယိပ်းတူၺ်းၼႃႈၸိုၼ်ႈၶိူဝ်းသေ မိပ်ႇၵႂႃႇမိပ်ႇမႃးယူႇ။
“ၼႃႈဢူၼ်ႈလီတေႉယဝ်ႉ” ၼႃႈလႅင်လႅင်ဢၼ်မဝ်းလဝ်ႈၼၼ်ႉလႄႈ ၶေႃႈၵႂၢမ်းလၢတ်ႈဢၼ်ဢမ်ႇပေႃးၶႂ်ႈပီႇလီၼၼ်ႉသေ သၢႆတႃၸိုၼ်ႈၶိူဝ်းဢၼ်ယၵ်ႉတူၺ်းၸူး သမ်ႉပေႃးဢဝ်ၼႃႈမၼ်းလႅင်မႃးၸွမ်းယဝ်ႉ။
လိုၼ်းၼုမ်ႇပွႆႇၼႃႈၸိုၼ်ႈၶိူဝ်းၵႂႃႇ မႄးၼွၼ်းလီလီသေ ဝၢႆႇၼႃႈၸူးၸိုၼ်ႈၶိူဝ်းယဝ်ႉလၢတ်ႈၸူး
“ႁဝ်းဢမ်ႇၸႂ်ႈမေးသူလေႃႇၼႃႈ ႁဝ်းႁဵတ်းၵႅင်ႈပဵၼ်ၵူၼ်းလိုမ်းလွင်ႈဝၼ်းလင်ၵူၺ်း ပေႃးသူႁူႉ သူၵေႃႈ..တေဢမ်ႇႁႂ်ႈႁဝ်းယူႇတီႈႁိူၼ်းၼႆႉယဝ်ႉ၊ ႁဝ်းယွၼ်းယူႇႁိူၼ်းၼႆႉထႅင်ႈဢိတ်ႉၼိုင်ႈၼႃ ႁႂ်ႈႁဝ်းယုမ်ႇၸႂ်လႆႈဝႃႈ လုၵ်ႈႁဝ်းၼၼ်ႉ တေယူႇလီလွတ်ႈၽေးယူႇၼႆ ထႅင်ႈဢိတ်ႉၼိုင်ႈၵူၺ်း ဝႆႉဝႃႈႁဝ်းယွၼ်းယဝ်ႉ”
ၸိုၼ်ႈၶိူဝ်းဢၢင်ႈတေလၢတ်ႈၸူး လိုၼ်းၼုမ်ႇသမ်ႉပေႃးလပ်းၵႂႃႇယဝ်ႉ။
“ႁဝ်းႁူႉယူႇယဝ်ႉ သူဢမ်ႇလူဝ်ႇဢွၵ်ႇၵႂႃႇၵေႃႈလႆႈ ဢမ်ႇဝႃႈတေပဵၼ်လိုၼ်းၼုမ်ႇႁိုဝ် ပဵၼ်မေးႁိုဝ် ႁဝ်းၵေႃႈ..ၶႂ်ႈႁႂ်ႈသူယူႇႁိမ်းၶၢင်ႈႁဝ်းတႃႇသေႇၼၼ်ႉယဝ်ႉ”
ၼင်ႈလုပ်ႈပၼ်ႁူဝ်လိုၼ်းၼုမ်ႇလွႆးလွႆးသေယဝ်ႉ မႄးႁူမ်ႇၽႃႈပၼ်ၵႂႃႇသေ ၸုပ်ႇၼႃႈၽၢၵ်ႇမၼ်းၵမ်းၼိုင်ႈယဝ်ႉ ၸင်ႇတေဢွၵ်ႇႁွင်ႈၵႂႃႇယူႇ။
တွၼ်ႈသၢဝ်းသွင်သုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈသၢဝ်းသၢမ်ၶႃႈ။
ႁပ်ႉထွမ်ႇပၼ်ႁႅင်းလူၺ်ႈသဵင်တၢင်း YouTube ၵေႃႈလႆႈၶႃႈ။
