တွၼ်ႈသိပ်းၵဝ်ႈ
ၸိုၼ်ႈၶိူဝ်းဢၼ်ၶဝ်ႈၵႂႃႇတူၺ်းလႅင်းဢွၼ်ႇၼၼ်ႉၵေႃႈ လႆႈႁၼ်လႅင်းဢွၼ်ႇ ယင်းတိုၵ်ႉၼွၼ်းလပ်းဝႆႉယူႇလႄႈ ဢမ်ႇႁူႉဝႃႈတေႁဵတ်းႁိုဝ် ၼင်ႈႁေတူၺ်းလႅင်းဢွၼ်ႇၼွၼ်းယူႇႁဵတ်းၼၼ်ယဝ်ႉ။ လိုၼ်းၼုမ်ႇ ဢၼ်ဢမ်ႇႁၼ်ၸိုၼ်ႈၶိူဝ်းလူင်းႁိူၼ်းမႃးသေပွၵ်ႈၼၼ်ႉၵေႃႈ ပဵၼ်ဢၼ်မႆႈၸႂ်သေ ၸွမ်းၶႆႈထိုင်ၼႂ်းႁွင်ႈယဝ်ႉ လႆႈႁၼ်ၸိုၼ်ႈၶိူဝ်း တိုၵ်ႉၼင်ႈတူၺ်းလႅင်းဢွၼ်ႇ ဢၼ်ၼွၼ်းၵတ်းၵတ်းယဵၼ်ယဵၼ်ယူႇၼၼ်ႉလႄႈ
“သူၶိုၼ်ႈမႃးႁဵတ်းသင်လႃႇ..ၸဵမ်မိူဝ်ႈၵႆႈၼႆႉ!”
“သူႁႂ်ႈမႃးတူၺ်းၶဝ် ႁဝ်းၵေႃႈမႃးတူၺ်းၼၼ်ႉၼႃႇ”
လိုၼ်းၼုမ်ႇၼၼ်ႉၵေႃႈ ႁိပ်ႈၼႅတ်ႈပူၵ်းလႅင်းဢွၼ်ႇလုၵ်ႉမႃး ယူႇယဝ်ႉ။
“လႃႈၼႃႇယဝ်ႉ ၵမ်ႉတေတူၵ်းလိုၼ်းယဝ်ႉဝႃႈ”
ၼႅတ်ႈဢဝ်လႅင်းဢွၼ်ႇၵႂႃႇၶဝ်ႈႁွင်ႈၼမ်ႉသေ သုၵ်ႉၼႃႈလၢင်ႉတႃပၼ်ယဝ်ႉၵေႃႈ ႁႂ်ႈၸိုၼ်ႈၶိူဝ်းၼၼ်ႉ ႁၢင်ႈႁႅၼ်းပၼ်သိူဝ်ႈၶူဝ်းလႅင်းဢွၼ်ႇ ၼႆယူႇ။
လိုၼ်းၼုမ်ႇလႄႈလႅင်းဢွၼ်ႇ ဢွၵ်ႇႁွင်ႈၼမ်ႉမႃး ယင်းတိုၵ်ႉႁၼ်ၸိုၼ်ႈၶိူဝ်းၼၼ်ႉ ႁႃသိူဝ်ႈၶူဝ်းယူႇလႄႈ
“ႁႃပႆႇႁၼ်ၵွၼ်ႇႁႃႉ!!” လိုၼ်းၼုမ်ႇသမ်ႉပေႃးလႆႈမႃးႁႃဢဝ်ႁင်းၵူၺ်းယဝ်ႉ။
ၸိုၼ်ႈၶိူဝ်းၼၼ်ႉတႄႉ မိူဝ်ႈပဵၼ်ၸိူင်ႉၼၼ် ဢမ်ႇမေႃႁဵတ်းႁင်သေဢိတ်းယဝ်ႉ။ တႄႇၸဵမ်မိူဝ်ႈလႅင်းဢွၼ်ႇမႃးယူႇၸွမ်းမၼ်းၼၼ်ႉ ပႃႈဢွင်ႇ ၵေႃႉပဵၼ်ၵူၼ်းႁဵတ်းပၼ်ၵူႈလွင်ႈၵူၺ်းလူး၊ တေႃႈၼင်ႇၵႂႃႇသူင်ႇႁူင်းႁဵၼ်း ယင်းႁႂ်ႈသၢႆလႅင်းၵေႃႉၵႂႃႇသူင်ႇၵူၺ်း တူဝ်မၼ်းၼၼ်ႉ ယင်းဢမ်ႇပႆႇယၢမ်ႈႁဵတ်းသင်ပၼ်ၶဝ်တေႉတေႉလူးၵွၼ်ႇ ႁဵတ်းႁႂ်ႈမၼ်းမိုင်ဝူၼ်ႉထိုင်လွင်ႈၼႆႉမႃး ယူႇယဝ်ႉ။
လိုၼ်းၼုမ်ႇႁၢင်ႈႁႅၼ်းတူဝ်ပၼ်လႅင်းဢွၼ်ႇ ၶႅမ်ႉလႅပ်ႈလီယဝ်ႉၼႆၵေႃႈ ဢွၼ်ၵၼ်ၵႂႃႇၵိၼ်ၶဝ်ႈယူႇ။ သမ်ႉဝႃႈၸိုၼ်ႈၶိူဝ်းၼၼ်ႉ ဢမ်ႇၵိၼ်ၶဝ်ႈၼႂ်သေတႃႉ လိုၼ်းၼုမ်ႇၵေႃႉႁွင်ႉႁႂ်ႈၵိၼ်လႄႈ လႆႈၵိၼ်ၶဝ်ႈၸွမ်းၵၼ်ၵႂႃႇ။ တူၺ်းႁၼ်ပဵၼ်ၼႃႈႁိူၼ်းဢၼ်ဢုၼ်ႇၸႂ်လီတေႉတေႉယဝ်ႉ။
ပႃႈဢွင်ႇဢၼ်ႁၼ်ၸိူင်ႉၼၼ်ၵေႃႈ ဢမ်ႇပေႃးထုၵ်ႇတႃမၼ်းၵႃႈႁိုဝ် ယိုင်ႈႁၼ်ယိုင်ႈႁဵတ်းႁႂ်ႈမၼ်း ၶုၵ်းၶူၼ်ႉထိုင်ၶိုၼ်းမူၺ်ၶၢဝ်မႃးၼၼ်ႉယဝ်ႉ။
ဢွၼ်တၢင်းလႅင်းဢွၼ်ႇတေမႃးၼၼ်ႉ ပႃႈဢွင်ႇ တေမႃးႁိူၼ်းၸိုၼ်ႈၶိူဝ်း ၼိုင်ႈဝူင်ႈသွင်ပွၵ်ႈၵူၺ်း၊ ပေႃးမၼ်းၵႆႉၵေႃႈ တေမႃးမွၵ်ႈႁူဝ်ၶမ်ႈၸိူဝ်းၼႆႉ မႃးတူၺ်းလွင်ႈယူႇလွင်ႈၵိၼ်ၸိုၼ်ႈၶိူဝ်းၸိူဝ်းၼၼ်ႉယဝ်ႉ။ ၵူၺ်းၵႃႈ ၸူဝ်ႈမီးလႅင်းဢွၼ်ႇမႃးၼၼ်ႉ ဢမ်ႇမီးၵူၼ်းလုမ်းလႃးၼႆလႄႈ ၸိုၼ်ႈၶိူဝ်းၸင်ႇလႆႈယွၼ်းတၢင်းၸွႆႈထႅမ် တီႈပႃႈဢွင်ႇၵႂႃႇယူႇ။ ပႃႈဢွင်ႇၼၼ်ႉၵေႃႈ ဢမ်ႇဝႃႈတေပဵၼ်လွင်ႈသင်ၵေႃႈယဝ်ႉ သင်ဝႃႈၸိုၼ်ႈၶိူဝ်းယွၼ်းႁႂ်ႈၸွႆႈၼႆ မၼ်းၵေႃႈ တဵမ်ၸႂ်သေၸွႆႈၵႂႃႇယဝ်ႉ ပႃးတင်းလွင်ႈႁွင်ႈၼွၼ်းလိုၼ်းၼုမ်ႇ သမ်ႉဝႃႈမၼ်းဢမ်ႇလႆႈၸႂ်လိုၼ်းၼုမ်ႇၵႃႈႁိုဝ်ၵေႃႈယဝ်ႉ။
မၼ်းၵေႃႈ ၼင်ႇႁိုဝ်တေဢမ်ႇလႆႈႁၼ်ၼႃႈလိုၼ်းၼုမ်ႇယဝ်ႉ ၸႂ်ထိုင်မူၺ်ၶၢဝ်ၼၼ်ႉ ၸင်ႇသူင်ႇသင်ႇၸိုၼ်ႈၶိူဝ်းၶဝ်ၵႂႃႇ
“မိူဝ်ႈလႂ်.. လိုၼ်းၼုမ်ႇၵေႃႈမႃးယူႇတီႈႁိူၼ်းၼႆႉယဝ်ႉ မိူၼ်ဝႃႈၸၢႆးၵေႃႈ တေဢမ်ႇမီးလွင်ႈသင်လီမႆႈၸႂ်ယဝ်ႉ ပႃႈတေၶိုၼ်းမႃးႁဵတ်းၵၢၼ်မိူၼ်ၵဝ်ႇၵူၺ်း ယဝ်ႉၼႃႈ”
ပႆဢွၵ်ႇၵႂႃႇပႅတ်ႈသေ ၸိုၼ်ႈၶိူဝ်းၼၼ်ႉၵေႃႈ ၸွမ်းလၢတ်ႈၵႂႃႇ
“ယိၼ်းၸူမ်းယဝ်ႉၶႃႈပႃႈ”
သမ်ႉပေႃးဢဝ်ပႃႈဢွင်ႇၵိုတ်းမိုင်လူင်ၵႂႃႇၵႅပ်ႉၼိုင်ႈယဝ်ႉ။ ၸဵမ်မိူဝ်ႈလဵၵ်ႉတေႃႇယႂ်ႇ မၼ်းဢမ်ႇတွၼ်ႉယွၼ်းတၢင်းၸွႆႈထႅမ်တီႈပႃႈဢွင်ႇသေပွၵ်ႈ ၵူၺ်းၵႃႈ ပႃႈပဵၼ်ၵူၼ်းဢၼ်ႁဵတ်းပၼ်မၼ်းၵူႈလွင်ႈ လူၺ်ႈဢမ်ႇတွၼ်ႉမုင်ႈမွင်းသင် သမ်ႉဝႃႈပႃႈမိူၼ်မႄႈမၼ်းသေတႃႉၵေႃႈ မၼ်းၵေႃႈယင်းဢမ်ႇတွၼ်ႉလၢတ်ႈ ၶေႃႈၵႂၢမ်းယိၼ်းၸူမ်းတေႃႇပႃႈသေပွၵ်ႈၼၼ်ႉယဝ်ႉ။ ၼႂ်းၶၢဝ်းတၢင်းႁႃႈပီႊပူၼ်ႉမႃး မၼ်းလႄႈတင်းပႃႈ သမ်ႉဝႃႈႁူပ်ႉႁၼ်ၼႃႈၵၼ်ယူႇသေတႃႉ ဢမ်ႇပေႃးၵႆႉမီးၶၢဝ်းယၢမ်းဢုပ်ႇလၢတ်ႈတေႃႇၵၼ်လီလီ တေႃႇထိုင်လႅင်းဢွၼ်ႇမႃးသေ မၼ်းလႆႈမႃးယွၼ်းတၢင်းၸွႆႈထႅမ်တီႈပႃႈ ၼၼ်ႉယဝ်ႉ။
“ပေႃးမီးၵၢၼ်လမ်ႇလွင်ႈၵေႃႈ.. လၢတ်ႈပႃႈလႆႈယူႇၼႃႈ”
“ဢေႃႈၶႃႈ..မိူဝ်းလွႆးလွႆးၶႃႈ”
ပႃႈၵေႃႈပွၵ်ႈမိူဝ်းၵႂႃႇယူႇယဝ်ႉ။
ၸိုၼ်ႈၶိူဝ်း လႅင်းဢွၼ်ႇ လိုၼ်းၼုမ်ႇ ၶဝ်သၢမ်ၵေႃႉ ဢွၼ်ၵႂႃႇႁူင်းႁဵၼ်းၵၼ်ယူႇ။
တိုၼ်းႁၢၼ်ၼၼ်ႉၵေႃႈ ဝၢႆးသေလႆႈထူပ်းသႅင်ႁိူၼ်းၼုမ်ႇယဝ်ႉ ၵႆႉၵႆႉမိူဝ်းလႄႇသႅင်ႁိူၼ်းၼုမ်ႇယူႇတႃႇသေႇ သမ်ႉပေႃးမိုတ်ႈၵၼ်တင်း လုၵ်ႈယိင်းဢွၼ်ႇသႅင်ႁိူၼ်းၼုမ်ႇၼၼ်ႉယဝ်ႉ။ မၢင်ပွၵ်ႈ ထိုင်တီႈသႅင်ႁိူၼ်းၼုမ်ႇ ပေႃးလႆႈလိုပ်ႈမိူဝ်းၵႂႃႇယူႇ။ ၵူၺ်းၵႃႈ လွင်ႈၶတ်းၸႂ်မၼ်းၼၼ်ႉ ဢမ်ႇယွမ်းသုမ်း သမ်ႉဝႃႈလိုပ်ႈမိူဝ်ႈၼႆႉၵေႃႈ မိူဝ်ႈၽုၵ်ႈၵူၺ်းပေႃးမႃးထႅင်ႈယဝ်ႉ။
ၸိုၼ်ႈၶိူဝ်းၶႃလိုၼ်းၼုမ်ႇၵေႃႈ ၵႂႃႇၼင်ႈပႂ်ႉတူၺ်းလႅင်းဢွၼ်ႇ တီႈပၢင်လႅၼ်ႈၶေႉၵၼ်ၼၼ်ႉယူႇယဝ်ႉ။ ၵူၺ်းၵႃႈ လိူၵ်ႈလိူၵ်ႈ ပီႈလူဝ်းၸိုၼ်ႈၶိူဝ်းသမ်ႉ ႁၼ်မႅၼ်ႈၸိုၼ်ႈၶိူဝ်းသေ ပဵၼ်ဢၼ်ထၢင်ႇပိူင်ႈမႃးယဝ်ႉ လိူဝ်ၼၼ်ႉသမ်ႉ မႃးၸွမ်းၽူႈယိင်းထႅင်ႈလႄႈ ၼႅတ်ႈလၢႆးငၢၼ်းထိုင် ၽူဝ်မၼ်းၵမ်းလဵဝ်ယူႇ။
လိုၼ်းၼုမ်ႇလႄႈၸိုၼ်ႈၶိူဝ်းၼၼ်ႉ ၼင်ႈသေႁွင်ႉပၼ်ႁႅင်းလႅင်းဢွၼ်ႇလူင်ၵႂႃႇ ၼင်ႇမူၼ်ႈမူၼ်ႈသိူဝ်းသိူဝ်း။ လႅင်းဢွၼ်ႇၼၼ်ႉၵေႃႈ ၶတ်းၸႂ်သႂ်ႇႁႅင်းသေ လႅၼ်ႈတေႉလႅၼ်ႈဝႃႈ ထိုင်တီႈလႅၼ်ႈၵႂႃႇႁွတ်ႈယိူင်းမၢႆလႆႈမၢႆႁႃႈယူႇယဝ်ႉ။ လႅင်းဢွၼ်ႇ ဢၼ်ႁၼ်ပိူၼ်ႈလႆႈ မၢႆၼိုင်ႈမၢႆသွင်ၼၼ်ႉၵေႃႈ ပဵၼ်ဢၼ်ၸႂ်လဵၵ်ႉမႃးယူႇ ၵၢၼ်ႉလၢတ်ႈႁႂ်ႈပေႃႈတင်းမႄႈမႃးတူၺ်း မၼ်းၵူၺ်းလႆႈမၢႆႁႃႈၼႆ ၼၼ်ႉယဝ်ႉ။
မိူဝ်ႈပၢင်ၶႄႉၶဵင်ႇသုတ်းၵႂႃႇယဝ်ႉၵေႃႈ လႅင်းဢွၼ်ႇၼၼ်ႉ လႅၼ်ႈမႃးၸူးၶႃ မိူၼ်တေၶႂ်ႈႁႆႈဝႆႉလႄႈ လိုၼ်းၼုမ်ႇၸင်ႇ ၵွတ်ႇဢဝ်မၼ်းယဝ်ႉ လုပ်ႈပၼ်လင်မၼ်းၵႂႃႇလွႆးလွႆး။
“လုၵ်ႈႁဵတ်းလႆႈလီယဝ်ႉၼႃႈ..ႁဵတ်းလႆႈလီယဝ်ႉ ”
“ၵူၺ်းၵႃႈ..ၸၢႆးဢမ်ႇလႆႈမၢႆၼိုင်ႈလူး..ၸၢႆးၶႂ်ႈလႆႈမၢႆၼိုင်ႈဢေႃႈ”
လိုၼ်းၼုမ်ႇၼၼ်ႉၵေႃႈ ယၵ်ႉတူၺ်းၵႂႃႇတင်းလုၵ်ႈဢွၼ်ႇ ၵေႃႉဢၼ်လႆႈမၢႆၼိုင်ႈၼၼ်ႉသေယဝ်ႉ။
“မိူဝ်ႈၼႆႉ..မၢႆၼိုင်ႈ..ၸၢႆးတေဢမ်ႇလႆႈယဝ်ႉၼႃ”
လႅင်းဢွၼ်ႇၼၼ်ႉၵေႃႈ ပွႆႇၼမ်ႉတႃမၼ်းတူၵ်းမႃးယဝ်ႉ။ ၸိုၼ်ႈၶိူဝ်းဢၼ်ႁၼ်လႅင်းဢွၼ်ႇႁႆႈယူႇလႄႈ လိုၼ်းၼုမ်ႇလၢတ်ႈၸိူင်ႉၼၼ်ၵေႃႈ
“သူဢမ်ႇထုၵ်ႇလီလၢတ်ႈတီႈၶဝ်ၸိူင်ႉၼၼ်ၼႃ..”
ယိုင်ႈၶႅၼ်းႁဵတ်းႁႂ်ႈလႅင်းဢွၼ်ႇႁွင်ႉႁႆႈမႃးထႅင်ႈယူႇယဝ်ႉ။
“ၸၢႆးတေဢဝ်မၢႆၼိုင်ႈၵႂႃႇႁဵတ်းသင်လႃႇ” လိုၼ်းၼုမ်ႇမႄးထၢမ်မၼ်းၵႂႃႇလီလီ။
“ၸၢႆးၶႂ်ႈလႆႈဢၼ်ၼၼ်ႉ..” ၸီႉၵႂႃႇတီႈသူး ဢၼ်ပိူၼ်ႈပၼ်လုၵ်ႈဢွၼ်ႇ ၵေႃႉမၢႆၼိုင်ႈၼၼ်ႉယူႇ။
“လႆႈဢေႃႈ..ပေႃးၸၢႆးၶႂ်ႈလႆႈ ၸၢႆးၵေႃႈတေလႆႈလႅၼ်ႈႁႂ်ႈႁွတ်ႈသဵၼ်ႈၼၼ်ႉ..ဢွၼ်တၢင်းပိူၼ်ႈသုတ်းၼၼ်ႉၼႃႇ ၸွင်ႇၸၢႆးႁဵတ်းလႆႈႁိုဝ်”
ၸီႉၼႄလႅင်းဢွၼ်ႇၵႂႃႇတီႈၼႂ်းပၢင်ႇ ဢၼ်ၶဝ်ၶႄႉၶဵင်ႇၵၼ်မိူဝ်ႈၵႆႈၼၼ်ႉယဝ်ႉ။ လႅင်းဢွၼ်ႇၼၼ်ႉၵေႃႈ တဵတ်ႇသေယဝ်ႉ ၶွၼ်းႁူဝ်မၼ်းၼႄယူႇ။
“ပေႃးၸၢႆးၶႂ်ႈလႆႈမၢႆၼိုင်ႈ ၸၢႆးၵေႃႈတေလႆႈလႅၼ်ႈႁႂ်ႈဝႆးလိူဝ်ပိူၼ်ႈ ယဝ်ႉၵေႃႈ.. ၸၢႆးတေလႆႈၵႅၼ်ႇၶႅင် တေလႆႈမီးႁႅင်း တေလႆႈၵိၼ်ၶဝ်ႈၵူႈတႃႇ တေလႆႈၼွၼ်းဢိမ်ႇဢိမ်ႇ ၵႆႉလႅၼ်ႈတႃႇသေႇၼၼ်ႉၼႃႇ ၸွင်ႇၸၢႆးတေႁဵတ်းလႆႈႁႃႉ” လႅင်းဢွၼ်ႇၵေႃႈပႆႇတၵ်းသဵင် လိုၼ်းၼုမ်ႇၸင်ႇသိုပ်ႇလၢတ်ႈထႅင်ႈ “ပေႃးၸၢႆးႁဵတ်းလႆႈၵေႃႈ ၸၢႆးတေလႆႈၸိူင်ႉၼင်ႇၶဝ်ၼၼ်ႉၼႃႇ” ယၢမ်းၼၼ်ႉ လႅင်းဢွၼ်ႇၸင်ႇတေငွၵ်းႁူဝ်မၼ်းၼႄယူႇ။
“လူင်းႁူင်းႁဵၼ်းမိူဝ်းယဝ်ႉ ၸၢႆးတေလႆႈလႅၼ်ႈၸွမ်းမႄႈၵူႈၶမ်ႈယဝ်ႉၼႃ”
လၢတ်ႈဢဝ်ၸိုၼ်ႈၶိူဝ်းပေႃးယုမ်ႉဢွၵ်ႇမႃးၸွမ်းယဝ်ႉ။
“ဝူၼ်ႉဢွၵ်ႇမႃးလႆႈၸိူင်ႉႁိုဝ်လႃႇ ထၢင်ႇဝႃႈလၢတ်ႈယွၵ်ႇၵူၺ်း ႁဵတ်းတေႉႁႃႉၼႆႉ”
မိူဝ်ႈဢွၼ်ၵၼ်ပွၵ်ႈမိူဝ်းႁိူၼ်းယူႇၼၼ်ႉ မိူၼ်ဝႃႈပူႇၸိုၼ်ႈၶိူဝ်းၼၼ်ႉၵေႃႈ သိုပ်ႇၾူင်းမႃးသေ လၢတ်ႈဝႃႈ “မႃးမီးယူႇၼႃႈႁိူၼ်းယဝ်ႉ!..”
ၸိုၼ်ႈၶိူဝ်းၵေႃႈ ပဵၼ်ဢၼ်တူၵ်းၸႂ်ယူႇၵူၺ်းလေႃႇ မၼ်းၵေႃႈ သမ်ႉပေႃးမႃးမီးယူႇၼႃႈႁိူၼ်းၼၼ်ႉမိူၼ်ၵၼ်လႄႈ ႁၼ်ၵႃးလမ်လမ်လိူမ်ႈလိူမ်ႈ လမ်းၼိုင်ႈ မီးယူႇၼႃႈႁိူၼ်းၼၼ်ႉတေႉလူး။
ၼႂ်းႁွင်ႈႁပ်ႉၶႅၵ်ႇဢၼ်တဵတ်ႇယဵၼ်လူင်ၼၼ်ႉၵေႃႈ
“ယူႇယူႇ..ပဵၼ်သင်လႄႈပူႇမႃးတီႈႁိူၼ်းၼႆႉၶႃႈလႃႇ..”
“ပဵၼ်သင်လႄႈမႃးဢမ်ႇလႆႈ..ၶႂ်ႈမႃးႁၼ်ၼႃႈလၢၼ်ၸၢႆးၵူၺ်းၵေႃႈဢမ်ႇလႆႈၵႂႃႈ”
ယၵ်ႉတူၺ်းၸူးလိုၼ်းၼုမ်ႇလႄႈ လႅင်းဢွၼ်ႇၵႂႃႇယဝ်ႉ မိုင်ယဵၼ်ပႂ်ႉႁႂ်ႈၸိုၼ်ႈၶိူဝ်းလၢတ်ႈယူႇ။ ၸိုၼ်ႈၶိူဝ်းၼၼ်ႉၵေႃႈ ၼႅတ်ႈလၢတ်ႈၵႂႃႇၵမ်းလဵဝ်ယဝ်ႉ။
“ၼႆႉပဵၼ်မေးၶႃႈ..လႄႈလုၵ်ႈၶႃႈ”
ပူႇၵေႃႈယုမ်ႉၸူးသွင်ၶႃသေ “ဢိုမ်ႈ..ပေႃးၼၼ်..ပူႇမိူဝ်းၵွၼ်ႇယဝ်ႉၼႃႈ”
ၸိုၼ်ႈၶိူဝ်းၵေႃႈၸွႆႈပၢမ်ႉဢဝ်ပူႇလုၵ်ႉၶိုၼ်ႈ ဢၢၼ်းတေၵႂႃႇသူင်ႇၼႆယူႇ ၵူၺ်းၵႃႈ ပူႇသမ်ႉႁႂ်ႈ လိုၼ်းၼုမ်ႇၵႂႃႇသူင်ႇမၼ်းၵူၺ်း။ လိုၼ်းၼုမ်ႇၵေႃႈ ၸွႆႈႁွင်းဢဝ်ပူႇၸိုၼ်ႈၶိူဝ်းၼၼ်ႉ ပႆၵႂႃႇၸွမ်းၵၼ်လွႆးလွႆးသေ သူင်ႇၶိုၼ်ႈလူတ်ႉၵႂႃႇယဝ်ႉ။ မိူဝ်ႈတေဢွၵ်ႇလူတ်ႉမိူဝ်းၼၼ်ႉ ပူႇၵေႃႈ သင်ႇလၢတ်ႈတီႈလိုၼ်းၼုမ်ႇၵႂႃႇ
“သင်ဝၼ်းၼိုင်ႈႁိမ်းၶဝ်ၼၼ်ႉ..ဢမ်ႇမီးၽႂ်ယဝ်ႉ.. သင်ၶဝ်ငဝ်ဢမ်ႇမီးတီႈပိုင်ႈဢိင် ဢမ်ႇမီးတီႈႁဵတ်းႁႂ်ႈၵတ်းယဵၼ်ၸႂ်လႆႈၼႆ ယိင်းၸွႆႈပဵၼ်တီႈပိုင်ႈဢိင်တႃႇၶဝ် ၸွႆႈယူႇႁိမ်းၶၢင်ႈၶဝ်.. ၸွႆႈလုမ်းလႃးတူၺ်းထိုင်ၶဝ်တႅၼ်းတၢင်ပူႇၽွင်ႈၼႃႈ”
ႁႂ်ႈၵူၼ်းၶပ်းလူတ်ႉမၼ်း ႁေႃႈလူတ်ႉဢွၵ်ႇၵႂႃႇပႅတ်ႈသေ ပၼ်ႁႂ်ႈလိုၼ်းၼုမ်ႇ မိုင်တူၺ်းၵႂႃႇၸိူင်ႉၼၼ်ၵူၺ်း။ လိုၼ်းၼုမ်ႇၼၼ်ႉၵေႃႈ ဢမ်ႇပေႃးၵတ်းယဵၼ်ၸႂ် ၸွမ်းၶေႃႈၵႂၢမ်းၼၼ်ႉၵႃႈႁိုဝ်လႄႈ ဢဝ်မႃးၵဵပ်းဝူၼ်ႉယူႇ “ပဵၼ်သင်လႄႈပူႇလၢတ်ႈၸိူင်ႉၼၼ်လႃႇ လၢတ်ႈမိူၼ်ဝႃႈပူႇတေၵႂႃႇတၢင်းလႂ်ၼၼ်ႉယဝ်ႉ” ဝူၼ်ႉတူၺ်းလွင်ႈႁဵတ်းသၢင်ႈ ၼႃႈတႃပူႇၼၼ်ႉၵေႃႈ ဢမ်ႇပေႃးႁၼ်မိူၼ်တေလီၵႃႈႁိုဝ် “ဢမ်ႇၼၼ်ၵေႃႈ ပူႇၶဝ်တေဢမ်ႇယူႇလီႁိုဝ်..ဢမ်ႇၸႂ်ႈၼႃ…မၼ်းတေဢမ်ႇၸႂ်ႈ..” တင်းပႆတင်းဝူၼ်ႉလူင်ၶဝ်ႈႁိူၼ်းၵႂႃႇလွႆးလွႆး။ ယၢမ်းၼၼ်ႉ ၸိုၼ်ႈၶိူဝ်းၸင်ႇႁွင်ႉထၢမ်မၼ်း
“ပူႇမိူဝ်းယဝ်ႉႁႃႉ!!..”
“ဢေႃႈပွၵ်ႈမိူဝ်းယဝ်ႉၶႃႈ..”
“ပူႇလၢတ်ႈသင်တီႈသူလႃႇ တူၺ်းၼႃႈသူမိူၼ်ဢမ်ႇပေႃးၶႂ်ႈလီၵႃႈႁိုဝ်ၼၼ်ႉယဝ်ႉ”
“ၶဝ်လၢတ်ႈဝႃႈ ႁႂ်ႈတူၺ်းထိုင်လုမ်းလႃးသူလီလီ”
ၸိုၼ်ႈၶိူဝ်းၵေႃႈ ယုမ်ႉဢွၵ်ႇမႃးၼင်ႇယိၼ်းၸူမ်းသေယဝ်ႉ “ပူႇလၢတ်ႈၸိူင်ႉၼၼ်ႁႃႉ!”
“ဢိုမ်ႈ!”
လိုၼ်းၼုမ်ႇဢၼ်လႆႈႁၼ်ပူႇမႃးလႄႈ ဢမ်ႇလႆႈထၢမ်သင်ၼၼ်ႉၵေႃႈ ပဵၼ်ဢၼ်ပႅၵ်ႇပိူင်ႈဝႆႉယူႇ။ ပေႃးဝႃႈတေႉ ၵူၼ်းၼႂ်းၼႃႈႁိူၼ်းလဵဝ်ၵၼ်သေ ဢဝ်ၽူႈယိင်းမႃးယူႇၸွမ်းလူၺ်ႈဢမ်ႇႁူႉၼၼ်ႉ မၼ်းၵေႃႈတိုၼ်းတေထၢမ်ယူႇယဝ်ႉ ၵူၺ်းၵႃႈ ၼႆႉသမ်ႉၶဝ်ႈမႃးယဝ်ႉ ဢမ်ႇထၢမ်သင်သေ ဢွၵ်ႇၵႂႃႇၸိူင်ႉၼၼ် ႁဵတ်းႁႂ်ႈမၼ်းဝူၼ်ႉပေႃးဢမ်ႇပွင်ႇၸွမ်း ၼႃႈႁိူၼ်းၵူၼ်းၸိူင်ႉၼင်ႇၶဝ်ၼၼ်ႉယဝ်ႉ။
ယၢမ်းၼၼ်ႉ ၸင်ႇမီးသဵင်တဵၵ်းႁိင်ႇၽၵ်းတူမေႃးမႃးသေ လိုၼ်းၼုမ်ႇၼၼ်ႉၵေႃႈ ႁိပ်ႈၼႅတ်ႈၽုၺ်ႇၽၵ်းတူပၼ်ယဝ်ႉ ၸင်ႇသမ်ႉမီးၵူၼ်းသွင်ၵေႃႉ ပုင်ႈၶဝ်ႈၼႂ်းဝၢင်းႁိူၼ်းမႃး လူၺ်ႈလိုၼ်းၼုမ်ႇ ဢမ်ႇတၼ်းလႆႈလၢတ်ႈသင်လႄႈ ၸိုၼ်ႈၶိူဝ်းဢၼ်ႁၼ်ၵူၼ်းသွင်ၵေႃႉၼၼ်ႉၵေႃႈ
“သူပၼ်ႁႂ်ႈၶဝ်ၶဝ်ႈမႃးလႆႈၸိူင်ႉႁိုဝ်လႃႇ..”
“ၶဝ်ပဵၼ်ၽႂ်ၶႃႈ!..” လိုၼ်းၼုမ်ႇထၢမ်ၵႂႃႇၼင်ႇထၢင်ႇပိူင်ႈယူႇ။
“ႁဝ်းၵေႃႈပဵၼ်ပီႈလူဝ်းၶဝ်လႄႈပီႈဢၢႆႈၶဝ်ၼၼ်ႉၼႃႇ”
ၸိုၼ်ႈၶိူဝ်းဢၼ်လႆႈငိၼ်းၸိူင်ႉၼၼ်ၵေႃႈ “ႁဝ်းဢမ်ႇႁူႉၸၵ်းၶဝ်ၼႃ ထၢင်ႇတႄႉၶဝ်တေၶဝ်ႈၽိတ်းႁိူၼ်းမၼ်းယဝ်ႉ သူၸွႆႈလိုပ်ႈၶဝ်ဢွၵ်ႇၵႂႃႇႁေလႄႈ”
“ႁတ်းလၢတ်ႈတေႃႇပီႈဢၢႆႈၸိူင်ႉၼႆလႆႈၸိူင်ႉႁိုဝ်.. ဢမ်ႇလႆႈမႃးႁႃၼွင်ႉၸၢႆးႁိုင်ၼႃႇလႄႈ ၶႂ်ႈမႃးလႄႇၵူၺ်းၵေႃႈဢမ်ႇလႆႈႁႃႉ”
တူၺ်းသီၼႃႈၸိုၼ်ႈၶိူဝ်းၼၼ်ႉၵေႃႈ ဢမ်ႇပေႃးၶႂ်ႈတေႃႇၼႃႈပီႈၸၢႆးမၼ်းၼၼ်ႉၵႃႈႁိုဝ်လႄႈ လိုၼ်းၼုမ်ႇဢၼ်ယူႇၼႂ်းငဝ်းလၢႆးၼၼ်ႉ ၸင်ႇၶဝ်ႈၸိမ်ၸွမ်းၵႂႃႇ။
“ယွမ်းၼွမ်းယူႇၶႃႈ..ၶႅၼ်းတေႃႈပွၵ်ႈမိူဝ်းၵႂႃႇၶိုၼ်းသေၵမ်း”
ၵေႃႉပဵၼ်ပီႈလူဝ်းၸိုၼ်ႈၶိူဝ်းၼၼ်ႉၵေႃႈ ဢမ်ႇပေႃးၸႂ်ဢၼ်ထုၵ်ႇလိုပ်ႈဢွၵ်ႇၼႆလႄႈ
“သူပဵၼ်မေးၶဝ်ၸွင်ႇၸႂ်ႈ..သူထုၵ်ႇလီႁူႉယူႇဝႃႈႁဝ်းပဵၼ်ၽႂ်..တူၺ်းမိူၼ်သူလႅပ်ႈဢမ်ႇႁူႉၸၵ်းႁဝ်းဝႆႉလႃႇ”
“ၸႂ်ႈၶႃႈဢေႃႈ..ႁဝ်းပဵၼ်မေးၶဝ် ပေႃးပဵၼ်ပီႈၶဝ်ၵေႃႈ တေႁူႉယူႇဝႃႈ ၶဝ်ပဵၼ်ၵူၼ်းၸိူင်ႉႁိုဝ် ယွၼ်ႉၼၼ် ၶႅၼ်းတေႃႈပွၵ်ႈမိူဝ်းၶိုၼ်းသေၵမ်း ဢွၼ်တၢင်းၶဝ်တေႁဵတ်းႁႂ်ႈသူ ၸႂ်ဢမ်ႇလီမႃးထႅင်ႈလိူဝ်သေၼႆႉၶႃႈၼႃ”
“ၵေႃႈလႆႈ မိူဝ်းလႄႈႁႃးမိူဝ်း” ပီႈဢၢႆႈၸိုၼ်ႈၶိူဝ်းလၢတ်ႈ။ မေးမၼ်းၼၼ်ႉၵေႃႈ ဢမ်ႇပႆႇၶႂ်ႈယွမ်းၵႃႈႁိုဝ်လႄႈ သိုပ်ႇလၢတ်ႈထႅင်ႈ
“သူပဵၼ်မေးၶဝ်တေႉယူႇႁႃႉ ဢမ်ႇၸႂ်ႈဝႃႈပဵၼ်တီႈယႃၸႂ်ၶဝ်မွၵ်ႈၼၼ်ႉၵူၺ်း ၵူၼ်းၸိူင်ႉၼင်ႇၶဝ် ဢမ်ႇမီးဝၼ်းတေႁၵ်ႉသူလႆႈလေႃႇၼႃႈ ပေႃးထၢၼ်ႈဝႃႈပဵၼ်မေးၶဝ်တေႉတေႉ ထုၵ်ႇလီၵပ်းသိုပ်ႇပၼ်ႁႂ်ႈႁူႉၸၵ်းတင်း ပေႃႈမႄႈပီႈၼွင်ႉယူႇၼႃ ၵူၺ်းၵႃႈ မိူၼ်ဝႃႈ သူလႅပ်ႈတေဢမ်ႇႁူႉၸၵ်းၽႂ်ၼၼ်ႉယဝ်ႉ ပႃးၸဵမ်ပေႃႈမႄႈၶဝ်ၵေႃႈ..တေဢမ်ႇလႅပ်ႈႁူႉၸၵ်းလူးၵွၼ်ႇ” လၢတ်ႈယဝ်ႉ ဢွၼ်ၵၼ်ဢွၵ်ႇမိူဝ်းၵႂႃႇယူႇ။
လိုၼ်းၼုမ်ႇၼၼ်ႉတႄႉ မိုင်ဝူၼ်ႉၵႂႃႇၸွမ်းၶေႃႈၵႂၢမ်းၼၼ်ႉမႃးယူႇ။
“ႁဝ်းတေႁဵတ်းႁိုဝ်မီးသုၼ်ႇႁူႉၸၵ်းလႃႇ ဢမ်ႇၸႂ်ႈမေးတေႉတေႉၶဝ်လူး”
မၼ်းၵေႃႈဝၢႆႇယၵ်ႉတူၺ်းၵႂႃႇၼႂ်းႁိူၼ်း ဢၼ်လႆႈႁၼ်ၸိုၼ်ႈၶိူဝ်းဝႆႉၼၼ်ႉသေ ႁဵတ်းႁႂ်ႈမၼ်းလႆႈမိုင်တူၺ်းၶဝ်ယဝ်ႉ လၢတ်ႈယူႇႁင်းမၼ်း။
“မိူၼ်ၶဝ်တေမီးပၼ်ႁႃၼမ်တေႉၼၼ်ႉယဝ်ႉ.. ၸႂ်ႉၸၢတ်ႈပၢၼ်ယူႇႁင်းၵူၺ်း တေငဝ်တၢၼ်ႇႁိုဝ်လႃႇ”
မိူဝ်ႈတိုၵ်ႉမိူၼ်ႇမိုင်ယူႇၼၼ်ႉ သဵင်ၾူင်းမေႃးမႃးသေ မၼ်းၵေႃႈႁပ်ႉၵႂႃႇယဝ်ႉ ၼၼ်ႉတႄႉပဵၼ်ပိုၼ်းမိူင်းၼႆယူႇ။
သမ်ႉပေႃးလႃႈၼႃႇယဝ်ႉတွၼ်ႈတႃႇၶဝ်ႈဝၼ်းၼၼ်ႉ လိုၼ်းၼုမ်ႇၵေႃႈ ၸင်ႇၶုၵ်းၸႂ်လႆႈဝႃႈ လႅင်းဢွၼ်ႇယင်းပႆႇလႆႈၵိၼ်ၶဝ်ႈၼႆလႄႈ ၼႅတ်ႈၶဝ်ႈၵႂႃႇၼႂ်းသွင်ႇၾႆးယူႇ ၵူၺ်းသမ်ႉႁၼ်ၸိုၼ်ႈၶိူဝ်းမီးဝႆႉၼႂ်းၼၼ်ႉယဝ်ႉ။
“ႁဵတ်းသင်ယူႇၶႃႈ..”
“လႅင်းဢွၼ်ႇ..ၶဝ်လၢတ်ႈဝႃႈၶႂ်ႈၵိၼ်ၶဝ်ႈသွႆး ႁဝ်းၵေႃႈတေတူမ်ႈၶဝ်ႈသွႆးလဵင်ႉၶဝ်”
လိုၼ်းၼုမ်ႇၼၼ်ႉၵေႃႈ ႁၼ်ထူင်ၶဝ်ႈသွႆးဢေႃႇတေႃႇ မီးယူႇၼိူဝ်ၽိူၼ်ၼၼ်ႉသေ
“ယႃႇပေလၢတ်ႈၼႃဝႃႈ သူတေတူမ်ႈၶဝ်ႈသွႆးၼႆႉလဵင်ႉလုၵ်ႈ”
“ဢိုမ်ႈ! ၵူဝ်ဝႃႈႁဝ်းဢမ်ႇမေႃတူမ်ႈႁႃႉ ႁဝ်းတူမ်ႈလႆႈယူႇယဝ်ႉလေႃႇ”
လိုၼ်းၼုမ်ႇၵေႃႈ ဝူၼ်ႉဝႃႈ မၼ်းဢမ်ႇထုၵ်ႇလီၵိၼ်ၵႃႈႁိုဝ်လႄႈ ဢမ်ႇပၼ်ၽွၼ်းလီၼႆသေ ဢမ်ႇတွၼ်ႉႁဵတ်းလဵင်ႉလႅင်းဢွၼ်ႇသေပွၵ်ႈၼၼ်ႉယဝ်ႉ။ သင်လႅင်းဢွၼ်ႇၶႂ်ႈၵိၼ်ၼႆၵေႃႈ မၼ်းတေႁဵတ်းဢဝ်ႁင်းၵူၺ်းၵူၺ်း။ ယွၼ်ႉလႃႈၵေႃႈလႃႈၼႃႇယဝ်ႉလႄႈ ႁိုင်ႁိုင်ၼိုင်ႈပွၵ်ႈ ဢမ်ႇပဵၼ်သင်ၼႆၵေႃႈ
“တူမ်ႈပႃးႁဝ်းဢိတ်ႉၼိုင်ႈၶႃႈလႄႈ ႁဝ်းၵေႃႈတွင်ႉမႆႈယဝ်ႉ”
သၢႆတႃၸိုၼ်ႈၶိူဝ်းယၵ်ႉတူၺ်းၸူးလိုၼ်းၼုမ်ႇ ဢၼ်ဢမ်ႇတွၼ်ႉႁၼ်ၶဝ်လၢတ်ႈဢူၼ်ႈဢွၼ်ႇ တုၵ်းယွၼ်းတေႃႇမၼ်းၸိူင်ႉၼႆၼၼ်ႉၵေႃႈ ထဵင်ၶိုၼ်းပေႃးဢမ်ႇလႆႈၼၼ်ႉယဝ်ႉ။
“လႆႈဢေႃႈ…ၼင်ႈပႂ်ႉၵိၼ်လႆႈယူႇၶႃႈ”
လိုၼ်းၼုမ်ႇၵေႃႈ ႁၢင်ႈႁႅၼ်းၽိူၼ်ႁႅၼ်းဝၢၼ်ႇပၼ်ယဝ်ႉ တင်းလႅင်းဢွၼ်ႇသေ ဢွၼ်ၵၼ်ၼင်ႈပႂ်ႉတူၺ်းၸိုၼ်ႈၶိူဝ်းၵၼ်ယူႇ။ ၸိုၼ်ႈၶိူဝ်းၼၼ်ႉၵေႃႈ ႁုင်သုၵ်းယဝ်ႉသေ ဢဝ်မေႃႈမၼ်းမႃးတမ်းပၼ်ၼိူဝ်ၽိူၼ်ၼၼ်ႉလႄႈ တၵ်းပၼ်လႅင်းဢွၼ်ႇယဝ်ႉ တၵ်းသႂ်ႇပၼ်လိုၼ်းၼုမ်ႇၵႂႃႇ ၸင်ႇတၵ်းသႂ်ႇတႃႇမၼ်း၊ ၵိၼ်ၸွမ်းၵၼ်ၵႂႃႇ ဢုပ်ႇလၢတ်ႈယဝ်ႉယွၵ်ႇၵၼ် ဢမ်ႇတၼ်းႁူႉဝႃႈမူတ်းၵႂႃႇမိူဝ်ႈလႂ်ၼၼ်ႉယဝ်ႉ။
တွၼ်ႈသိပ်းၵဝ်ႈသုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈသၢဝ်းၶႃႈ။
ႁပ်ႉထွမ်ႇပၼ်ႁႅင်းလူၺ်ႈသဵင်တၢင်း YouTube ၵေႃႈလႆႈၶႃႈ။
