တွၼ်ႈသိပ်းပႅတ်ႇ
လိုၼ်းၼုမ်ႇၼၼ်ႉ ၶဝ်ႈၵႂႃႇၼႂ်းႁွင်ႈႁဵတ်းၵၢၼ်ၸိုၼ်ႈၶိူဝ်းသေယဝ်ႉ ၸိုၼ်ႈၶိူဝ်းဢၼ်ႁၼ်မၼ်းၶဝ်ႈႁွင်ႈမႃးၼၼ်ႉၵေႃႈ
“သူ..မႃးယဝ်ႉႁႃႉ”
လိုၼ်းၼုမ်ႇဢၼ်လႆႈငိၼ်းၶဝ်လၢတ်ႈၸိူင်ႉၼၼ် ဢမ်ႇပေႃးထုၵ်ႇႁူၵႃႈႁိုဝ်လႄႈ ဝူၼ်ႉၶႆႈယူႇၼႂ်းၸႂ်
“ပဵၼ်သင်လႄႈတေလႆႈလၢတ်ႈၸိူင်ႉၼၼ်လႃႇ ထွမ်ႇယဝ်ႉၵေႃႈတွင်ႉပေႃးၶႂ်ႈၶူၼ်ႉယဝ်ႉ”
လိုၼ်းၼုမ်ႇၸင်ႇၵႂႃႇၼင်ႈတေႃႇၼႃႈမၼ်း လူၺ်ႈဢမ်ႇတၵ်းသဵင်သင်၊ သွင်ၶႃၼင်ႈယၵ်ႉၼႃႈၵၼ်ယူႇတၢင်းႁိုင် ၸိုၼ်ႈၶိူဝ်းၸင်ႇထၢမ်ၸူး
“သူ..ဢမ်ႇမီးလွင်ႈၶႂ်ႈထၢမ်သင်ႁႃႉ”
လိုၼ်းၼုမ်ႇဢၼ်ဢမ်ႇၶႂ်ႈႁူႉၼၼ်ႉၵေႃႈ
“ႁွင်ႉႁဝ်းမႃးဢမ်ႇၸႂ်ႈဝႃႈမီးလွင်ႈၶႂ်ႈလၢတ်ႈၶႃႈႁႃႉ”
“ဢမ်ႇၼႃ.. ႁဝ်းၶႂ်ႈႁၼ်ၼႃႈသူလႄႈႁွင်ႉမႃးၵူၺ်း ”
လၢတ်ႈဢဝ်ၶူၼ်တုမ်ႇၼိူဝ်ႉသမ်ႉပေႃးၵီႈလူင်မႃးယဝ်ႉ။
“ၶဝ်ပဵၼ်ၵူၼ်းၵေႃႉဢၼ်ႁဝ်းႁူႉၸၵ်းယူႇႁႃႉၼႆႉ ပေႃးတေႁဵတ်းၸိူင်ႉၼႆၵႂႃႇတိၵ်းတိၵ်းတႄႉ ဢမ်ႇၸႂ်ႈလၢႆးမၼ်းယဝ်ႉ”
ၶႆႈၸႂ်လၢတ်ႈယူႇႁင်းမၼ်း။ လိုၼ်းၼုမ်ႇၵေႃႈ ႁွမ်ဢဝ်တၢင်းႁတ်းမၼ်းသေ ယိုၼ်ႈၼႃႈၶဝ်ႈၸမ်ၸိုၼ်ႈၶိူဝ်းၵႂႃႇယဝ်ႉ လၢတ်ႈဝႃႈ
“ႁၼ်ယူႇၵူႈဝၼ်းပႆႇဢိမ်ႇၵွၼ်ႇၶႃႈႁႃႉ ပဵၼ်သင်လႄႈ..ၼႅတ်ႈဢွၵ်ႇမႃးပႅတ်ႈၵၼ်ၸဵမ်ၸဝ်ႉၶႃႈလႃႇ ယူဝ်ဝႃႈသူဢိမ်ႇၼႃႈႁဝ်းယဝ်ႉလူးၵွၼ်ႇ”
လၢတ်ႈၵႂႃႇမိူၼ်တေဢမ်ႇႁူႉတူဝ်၊ မိူဝ်ႈၼႃႈမၼ်းယိုၼ်ႈၶဝ်ႈၸမ်ၸိုၼ်ႈၶိူဝ်းၼၼ်ႉ ဝူၼ်ႉဝႆႉတႄႉၶဝ်လႅပ်ႈတေသုတ်ႉၼႃႈဢွၵ်ႇယူႇ ၵူၺ်းၵႃႈ ဢမ်ႇႁၼ်ၶဝ်ၶၢႆႉႁူၼ်သေဢိတ်း၊ မိူဝ်ႈႁူႉတူဝ်မႃးယဝ်ႉၵေႃႈ ၶူႈၼင်မၼ်းၼၼ်ႉ ပေႃးတေၵႂႃႇထိုဝ်ႉသႂ်ႇၼႃႈၶဝ်ယူႇယဝ်ႉ။ မိုင်တူၺ်းၼႃႈၵၼ်ၵႂႃႇၸမ်ၸမ် သၢႆတႃသွင်ၶႃဢၼ်ယၵ်ႉၸူးၵၼ် ၽႅပ်ႉယုပ်းၽႅပ်ႉယုပ်းယူႇၼၼ်ႉ ႁူဝ်ၸႂ်တဵၼ်ႈသၼ်ႇဝႆႁႅင်း ၼႃႈသမ်ႉပေႃးမႆႈႁွၼ်ႉလူင်မႃးယဝ်ႉ။
“ႁဵတ်းၸိူင်ႉၼႆၵႂႃႇတိၵ်းတိၵ်းတႄႉ..တေတူၵ်းလွၵ်းၶဝ်ၵူၺ်းယဝ်ႉ” လိုၼ်းၼုမ်ႇၵေႃႈ ဝူၼ်ႉၶႆႈၸႂ်ၸိူင်ႉၼႆသေ ၵိုင်ႉဢဝ်တူဝ်မၼ်းသုတ်ႉဢွၵ်ႇႁၢင်ႇၶဝ်ၵႂႃႇယဝ်ႉ။
ၸိုၼ်ႈၶိူဝ်းဢၼ်ႁၼ်လိုၼ်းၼုမ်ႇ ႁူၼ်ၵႂႃႇၸိူင်ႉၼၼ်ၵေႃႈ ၶုၼ်ႇႁၢဝ်ႉၸၼ်ဢဝ်လိုၼ်းၼုမ်ႇမႃးၶိုၼ်းယဝ်ႉ မိုဝ်းမၼ်းၶွၼ်ၼိုင်ႈၼၼ်ႉ ပၢၵ်ႈပၼ်ၶူၼ်ႁူဝ်လိုၼ်းၼုမ်ႇၵွင်ႉသႂ်ႇပၼ်တီႈႁူယဝ်ႉ သုတ်ႉၼႃႈၶဝ်ႈၸမ်ထႅင်ႈ လၢတ်ႈသဵင်ဢူၼ်ႈဢွၼ်ႇ ၸမ်ႁိမ်းႁူလိုၼ်းၼုမ်ႇၵႂႃႇ
“သူႁၢင်ႈလီပေႃးတၢၼ်ႇၼႆႉ.. တေႁႂ်ႈႁဝ်းဢိမ်ႇလႆႈၸိူင်ႉႁိုဝ် ယိုင်ႈလႆႈႁၼ်ၸမ် ယိုင်ႈၶႅၼ်းၶႂ်ႈယၵ်ႉတူၺ်းၸူးယဝ်ႉ”
လၢတ်ႈဢဝ်လိုၼ်းၼုမ်ႇသမ်ႉပေႃးမိုင်ၸိူဝ်ႈၵႂႃႇၵႅပ်ႉၼိုင်ႈယူႇ။ “ၵူၼ်းၵေႃႉၼႆႉဢဝ်လၢႆးလီဢမ်ႇလႆႈယဝ်ႉ” ဝူၼ်ႉၶႆႈၸႂ်ၸိူင်ႉၼႆသေ ၽုၼ်ႇၽၢၼ်ႇလုၵ်ႉၸုၵ်းၵႂႃႇယဝ်ႉ လၢတ်ႈဢွၵ်ႇၸူးၸိုၼ်ႈၶိူဝ်း မိူၼ်ၵူၼ်းဢမ်ႇမီးသတိသင်သေဢိတ်းၼၼ်ႉလႄႈ
“ဢမ်ႇလႆႈၶႃႈ!!.. ”
“ဢမ်ႇလႆႈလွင်ႈသင်လႃႇ..”
“မိူဝ်ႈလဵဝ်ႁဝ်းလိုမ်းလွင်ႈဝၼ်းလင်ဝႆႉယူႇ ႁဝ်းလႄႈတင်းသူၼၼ်ႉ ဢမ်ႇထုၵ်ႇလီယူႇၸမ်ၵၼ်..ပူၼ်ႉလိူဝ်ၼိုင်ႈဝႃး တေႃႇထိုင်ႁဝ်းပေႃးတေတွင်းလႆႈ..လွင်ႈဝၼ်းလင်ၶိုၼ်း”
“လႆႈၸိူင်ႉႁိုဝ်လႃႇ ႁဝ်းလႄႈတင်းသူၼၼ်ႉ ပဵၼ်ၽူဝ်မေးၵၼ်ယဝ်ႉၼႃ မီးလုၵ်ႈႁူမ်ႈၵၼ်ယဝ်ႉ”
“ၼႃႈသိုဝ်ႈတႃသႂ်လၢတ်ႈဢွၵ်ႇမႃးလႆႈၸိူင်ႉႁိုဝ်လႃႇ ပေႃးလိုမ်းလွင်ႈဝၼ်းလင်တေႉတႄႉတေယုမ်ႇၵႂႃႇယဝ်ႉ”
လိုၼ်းၼုမ်ႇၵေႃႈ ယၵ်ႉတူၺ်းၼႃႈၸိုၼ်ႈၶိူဝ်းၼၼ်ႉလီလီသေ
“ပဵၼ်သင်လႄႈ..ႁဝ်းမႃးပဵၼ်မေးသူၶႃႈ ႁဝ်းဝူၼ်ႉဢမ်ႇဢွၵ်ႇဝႃႈ..ယွၼ်ႉသင်လႄႈ ႁဝ်းမႃးလႆႈၸႂ်ၵူၼ်းၸိူင်ႉၼင်ႇသူ လွင်ႈၼႆႉ..မၼ်းႁဵတ်းႁႂ်ႈႁဝ်းဢမ်ႇၵတ်းယဵၼ်ၸႂ် ပဵၼ်ဢၼ်ၶမ်ၸႂ်ႁဝ်းဝႆႉယူႇ ဢမ်ႇဝႃႈသူတေလၢတ်ႈၸိူင်ႉႁိုဝ် ႁဝ်းၵေႃႈ..တေဢမ်ႇယုမ်ႇၼၼ်ႉယဝ်ႉ ယွၼ်ႉၼၼ် တေႃႇထိုင်ႁဝ်းပေႃးတေႁႃၶေႃႈတွပ်ႇလႆႈ တေႃႇထိုင်ႁဝ်းပေႃးတွင်းၶိုၼ်း လွင်ႈဝၼ်းလင်ၵွၼ်ႇၶႃႈလႄႈ ႁဝ်းၸင်ႇတေယုမ်ႇဢၼ်သူလၢတ်ႈ”
ၸိုၼ်ႈၶိူဝ်းယဵၼ်ၵႂႃႇၵႅပ်ႉၼိုင်ႈ မိူၼ်ဝူၼ်ႉသေလွင်ႈလွင်ႈမႃးလႄႈ
“ၵေႃႈလႆႈ..ဢဝ်ၵၢင်ၸႂ်သူဝႃႈလႄႈ”
“ဢမ်ႇငၢႆႈၼႃႇပူၼ်ႉတီႈႁႃႉ”
ၸိုၼ်ႈၶိူဝ်းယုမ်ႉၸူးၼင်ႇဢူၼ်ႈဢွၼ်ႇယဝ်ႉ
“တေႁႂ်ႈႁဝ်းႁဵတ်းၸိူင်ႉႁိုဝ်ထႅင်ႈ ႁဝ်းၵေႃႈ ႁဵတ်းၸွမ်းၼင်ႇၵၢင်ၸႂ်..မေးႁဝ်းၶႆႈပဵၼ်ယဝ်ႉဢမ်ႇၸႂ်ႈႁႃႉ”
“လႆႈၶေႃႈတူၵ်းလူင်းယဝ်ႉ ပေႃးၼၼ်..ႁဝ်းယွၼ်းၵႂႃႇၵွၼ်ႇ”
“တေၵႂႃႇလႂ်လႃႇ မီးတီႈလူဝ်ႇၵႂႃႇႁႃႉ ႁႂ်ႈႁဝ်းၵႂႃႇသူင်ႇၼႄႇ”
လိုၼ်းၼုမ်ႇၵိုတ်းမိုင်ၵႂႃႇယဝ်ႉ။
ဝၢႆးသေမီးလႅင်းဢွၼ်ႇမႃး မၼ်းၼၼ်ႉ ႁဵတ်းတွၼ်ႈတႃႇလႅင်းဢွၼ်ႇတႃႇသေႇ၊ ႁဵတ်းသင်ၵေႃႈ ဝူၼ်ႉထိုင်ၶဝ်ယူႇတႃႇသေႇ ၵူၺ်းၵႃႈ မိူဝ်ႈလဵဝ် လႅင်းဢွၼ်ႇၼၼ်ႉ မီးတင်းပေႃႈ မီးတင်းၼႃႈႁိူၼ်း မီးၵူႈလွင်ႈဢၼ်ပၼ်ၶဝ်လႆႈ လိူဝ်သေဢၼ်မၼ်းတေႁႃမႃးပၼ်လႆႈၼၼ်ႉလႄႈ ဢမ်ႇလႆႈမႆႈၸႂ်သင်ၸွမ်းၶဝ်ယဝ်ႉၼႆၵေႃႈ တွၼ်ႈတႃႇတူဝ်မၼ်းၼၼ်ႉသမ်ႉ ဢမ်ႇႁူႉဝႃႈ တေလႆႈႁဵတ်းသင် တေႁဵတ်းၸိူင်ႉႁိုဝ် မိူၼ်ဝႃႈ ဢမ်ႇမီးပဝ်ႉမၢႆသင်ယဝ်ႉ ဢမ်ႇႁူႉဝႃႈတေလႆႈၵႂႃႇတၢင်းလႂ်လူးၵွၼ်ႇ။
“မၼ်းၵေႃႈ..တိုၼ်းတေမီးယူႇယဝ်ႉ ဢၼ်ပဵၼ်တီႈႁဝ်းၶႂ်ႈၵႂႃႇၼၼ်ႉ ႁဝ်းတေၵႂႃႇႁင်းၵူၺ်းၵူၺ်းၶႃႈ”
လၢတ်ႈယဝ်ႉၵေႃႈ ဢွၵ်ႇႁွင်ႈပိၵ်ႉၽၵ်းတူၵႂႃႇယဝ်ႉ။
ၸိုၼ်ႈၶိူဝ်းၼၼ်ႉ ၼင်ႈထူၺ်ႈၸႂ်လူင်သေ တူၺ်းၸွမ်းလိုၼ်းၼုမ်ႇၵႂႃႇ။
“ဢမ်ႇဝႃႈတေၵႂႃႇတၢင်းလႂ်ၵေႃႈ ယႃႇၵႂႃႇတီႈဢၼ်ႁဝ်းႁႃဢမ်ႇထူပ်းၼၼ်ႉၵူၺ်းၵေႃႈပေႃးယဝ်ႉ”
ၼင်ႈသေဝူၼ်ႉၶႆႈၸႂ်ၵႂႃႇႁင်းမၼ်း “ ပေႃးသူႁူႉဝႃႈ ႁဝ်းၼၼ်ႉ..ႁူႉလွင်ႈသူဢမ်ႇလႆႈလိုမ်းလွင်ႈဝၼ်းလင်ၼႆ သူၵေႃႈတေပၢႆႈၵႂႃႇပႅတ်ႈၸွင်ႇၸႂ်ႈႁိုဝ် ႁဝ်းဢမ်ႇၶႂ်ႈႁႂ်ႈသူ..တွင်းလွင်ႈဝၼ်းလင်ၶိုၼ်းယဝ်ႉၼႃႈ လိုၼ်းၼုမ်ႇ..”
လိုၼ်းၼုမ်ႇၼၼ်ႉၵေႃႈ ဢမ်ႇႁူႉဝႃႈတေၵႂႃႇတၢင်းလႂ် တေႁဵတ်းသင်လႄႈ ပႆၸွမ်းၶၢင်ႈတၢင်းလူင်ၼၼ်ႉၵႂႃႇတိၵ်းတိၵ်းၵူၺ်း။ ပႆလူင်ၵႂႃႇဢမ်ႇတၼ်းႁူႉ သမ်ႉပေႃးႁွတ်ႈထိုင်တီႈႁိမ်းၶႅပ်ႇလႅၼ်ဝဵင်းလူင် ဢၼ်မီးၵၢင်ဝၼ်းၸၢႆႉၸိူၼ်းတူၵ်းလူင်း ၼၼ်ႉယဝ်ႉ။ ႁၼ်ထုင်ႉၼႃးၶဵဝ်းၸိဝ်းၼိဝ်း မၼ်းၵႂၢင်ႈယႂ်ႇၼႃႇ တူၺ်းပေႃးဢမ်ႇသုတ်းႁူသုတ်းတႃလႆႈ၊ မၼ်းၸင်ႇၵိုတ်းလိုဝ်ႈၵႂႃႇတီႈၼၼ်ႈသေ ၼင်ႈသုတ်ႇလူမ်းၵတ်းလူမ်းယဵၼ် တူၺ်းလုၵ်ႈၵၢင်ဝၼ်းတူၵ်းၼၼ်ႉ ယူႇႁင်းမၼ်း ။
ၸိုၼ်ႈၶိူဝ်းဢၼ်ပွၵ်ႈမိူဝ်းႁွတ်ႈႁိူၼ်းယဝ်ႉၵေႃႈ ဢမ်ႇလႆႈငိၼ်းသဵင် ဢမ်ႇလႆႈႁၼ်လိုၼ်းၼုမ်ႇလႄႈ ၵႂႃႇတူၺ်းၼႂ်းႁွင်ႈၼွၼ်းလႅင်းဢွၼ်ႇၵေႃႈဢမ်ႇႁၼ်၊ ထၢမ်ပႃႈဢွင်ႇၵေႃႈဢမ်ႇလႆႈႁၼ် ထၢမ်သၢႆလႅင်းၵေႃႈဝႃႈဢမ်ႇႁူႉၼႆယူႇ။
“ၶမ်ႈပေႃးတၢၼ်ႇၼႆႉယဝ်ႉ ၶဝ်တေၵႂႃႇတၢင်းလႂ်လႆႈ”
သိုပ်ႇၽူင်းႁႃသမ်ႉ လႆႈငိၼ်းသဵင်မၼ်းမေႃးယူႇၼႂ်းႁိူၼ်းၼၼ်ႉယဝ်ႉ။ မိူဝ်ႈပဵၼ်ၸိူင်ႉၼၼ် ၸွမ်းၼင်ႇဢၼ်ႁူႉဝႃႈ လိုၼ်းၼုမ်ႇလႅပ်ႈတေၵႂႃႇတၢင်းလႂ်ၼႆၼၼ်ႉ ၼႅတ်ႈၸွမ်းၶႆႈၵႂႃႇၵူႈတီႈယဝ်ႉ။ သမ်ႉဝႃႈ တီႈသႅင်ႁိူၼ်းၼုမ်ႇ၊ ႁိူၼ်းလိုၼ်းၼုမ်ႇ ပႃးတၢင်းတီႈလၢၼ်ႉၵေႃႈ ဢမ်ႇႁၼ်မၼ်းလႄႈ ၸိုၼ်ႈၶိူဝ်းၼၼ်ႉ သမ်ႉပေႃးဢမ်ႇႁူႉဝႃႈ တေႁဵတ်းႁိုဝ်ၸွမ်းႁႃမၼ်းယဝ်ႉ ၵၢင်ဝၼ်းၵေႃႈၸမ်ၶမ်ႈမႃးတိၵ်းတိၵ်းယဝ်ႉလူး။ မၼ်းၵေႃႈ လႆႈၶိုၼ်းၵႂႃႇတီႈလုမ်းမၼ်းသေ ဢဝ်ၶႅပ်းႁၢင်ႈလိုၼ်းၼုမ်ႇၼၼ်ႉ ထၢမ်ၵေႃႉၼိုင်ႈယဝ်ႉၵေႃႉၼိုင်ႈ ၶႆႈၸွမ်းႁွႆးမၼ်းၵႂႃႇတိၵ်းတိၵ်းယူႇ။
ၵၢင်ဝၼ်းၸူမ်ႁၢႆ သၢႆငဝ်းလပ်းသိင်ႇသုမ်ႇလမ်မႃး လုၵ်ႈလိူၼ်ဢွၼ်ႇပိူင်းဝွႆးဝွႆး လိုၼ်းၼုမ်ႇၼၼ်ႉၵေႃႈ ၼင်ႈဝူၼ်ႉၶႆႈၸႂ်လၢတ်ႈၵႂႃႇ−
“ၵၢင်ဝၼ်းပေႃးလပ်ႉလွႆၵႂႃႇယဝ်ႉၵေႃႈ ယင်းတိုၵ်ႉၶႂ်ႈသိုပ်ႇတူၺ်းထႅင်ႈယူႇ” ထူၺ်ႈၸႂ်လူင်မႃးယဝ်ႉ “လႆႈတူၺ်းၵၢင်ဝၼ်းတူၵ်း ဢၼ်ႁၢင်ႈလီလီ လပ်ႉလွႆၵႂႃႇၼၼ်ႉယဝ်ႉၵေႃႈ ႁူႉတေလႆႈႁူပ်ႉၸွမ်း လွင်ႈလပ်းသိင်ႇယူႇယဝ်ႉ”
ႁႅၼ်မုင်ႈတူၺ်းတွင်ႉၾႃႉ ဢၼ်လပ်းသိင်ႇလူင်ၼၼ်ႉယဝ်ႉ ႁၼ်လုၵ်ႈလၢဝ်ႁိူဝ်ႈလႅင်း ထၢၼ်ႈပေႃးသႅမ်းတဵမ်ၾႃႉၵႂႃႇသဵင်ႈ ယုမ်ႉဢွၵ်ႇမႃးဢိတ်ႉၼိုင်ႈသေ “သမ်ႉဝႃႈမၼ်းလပ်းသိင်ႇသေတႃႉ လုၵ်ႈလၢဝ်ၼိူဝ်တွင်ႉၾႃႉၼၼ်ႉ တူၺ်းႁၼ်ႁၢင်ႈလီတေႉတေႉယဝ်ႉ တေလႆႈၵိုတ်းတူၺ်းမၼ်းထႅင်ႈဢိတ်ႉၼိုင်ႈယဝ်ႉဝႃႈ”
ၼင်ႈႁႅၼ်မုင်ႈတူၺ်းလုၵ်ႈလၢဝ် လုၵ်ႈၼိုင်ႈယဝ်ႉလုၵ်ႈၼိုင်ႈ ပဵၼ်ဢၼ်မူၼ်ႈၸႂ်ယူႇႁင်းမၼ်း။ သမ်ႉဝႃႈၼႂ်းၵၢင်တၢင်းၼၼ်ႉ တေမီးလူတ်ႉလႅၼ်ႈၵႂႃႇလႅၼ်ႈမႃးယူႇသေတႃႉ ဢမ်ႇလႆႈသူၼ်ၸႂ်မၼ်းလႄႈ ဢမ်ႇလႆႈႁၼ်မၼ်းလူးၵွၼ်ႇယဝ်ႉ။ ၸင်ႇမီးလူတ်ႉလမ်းၼိုင်ႈ ၾႆးလူတ်ႉလူင်မၼ်းၼၼ်ႉ သမ်ႉပေႃးၶၢဝ်သွတ်ႇလွတ်ႇ ႁိူဝ်ႈထွင်ႇပိူင်းလႅင်းလူင်မႃးၼႂ်းၵၢင်တၢင်း ထၢၼ်ႈပေႃးလႅင်းထွင်ႇတူဝ်ႈတင်းထုင်ႉၼႃး မႃးၵိုတ်းသႂ်ႇတီႈႁိမ်းလိုၼ်းၼုမ်ႇယူႇၼၼ်ႉသေ ၵူၼ်းႁေႃႈလူတ်ႉၼၼ်ႉၵေႃႈ လူင်းလူတ်ႉမႃးယဝ်ႉ။
“မႃးယူႇတီႈၼႆႈလႆႈၸိူင်ႉႁိုဝ်!..ၸွမ်းႁႃပေႃးၸွတ်ႇ ဢမ်ႇႁူႉႁႃႉ!..ပိူၼ်ႈမႆႈၸႂ်တၢၼ်ႇႁိုဝ်ၼႆ”
ၶဝ်ႈၵွတ်ႇသႂ်ႇလိုၼ်းၼုမ်ႇ ဢၼ်လုၵ်ႉၸုၵ်းမိုင်တူၺ်းမၼ်းယူႇၼၼ်ႉ ၵွတ်ႇပၼ်သမ်ႉပေႃးမၼ်ႈတဵင်ႈတဵင်ႈ ထၢၼ်ႈပေႃးထူၺ်ႈၸႂ်ဢမ်ႇၶႂ်ႈလႆႈယဝ်ႉ။
“ႁဝ်း..ႁဝ်းထူၺ်ႈၸႂ်ဢမ်ႇလႆႈယဝ်ႉ”
ၸိုၼ်ႈၶိူဝ်းၵေႃႈပွႆႇမၼ်းသေ “ၶႂၢင်းပၼ်ႁဝ်းဢိတ်ႉၼိုင်ႈ..”
ယိပ်းဢဝ်ႁူဝ်မႃႇလိုၼ်းၼုမ်ႇယဝ်ႉ ၵူမ်ႈတူၺ်းလိုၼ်းၼုမ်ႇၵူႈၽၢႆႇၵူႈတၢင်းသေ “သူၸွင်ႇပဵၼ်သင်ႁိုဝ်”
“ဢမ်ႇၶႃႈ ႁဝ်းဢမ်ႇပဵၼ်သင်..သူ..မႃးႁပ်ႉႁဝ်းဢမ်ႇၸႂ်ႈႁႃႉ”
“ဢိုမ်ႈ! ႁဝ်းမႃးႁပ်ႉသူယဝ်ႉ..”
ဢွၼ်ၵၼ်ၶိုၼ်ႈလူတ်ႉၵႂႃႇသေ ၸိုၼ်ႈၶိူဝ်းၵေႃႈ ဝိၼ်ႇဝၢႆႇႁူဝ်လူတ်ႉမၼ်းပွၵ်ႈမိူဝ်းၵႂႃႇယူႇ။
လိုၼ်းၼုမ်ႇၼၼ်ႉ တႅၼ်းတီႈတေပႂ်ႉႁႂ်ႈၸိုၼ်ႈၶိူဝ်းထၢမ် မၼ်းၸင်ႇႁႅၼ်ႈမုင်ႈတူၺ်း သဵၼ်ႈတၢင်းၼၼ်ႉသေ
“ႁဝ်းမႃးတူၺ်းၵၢင်ဝၼ်းတူၵ်း..လႄႈတင်း.. ထုင်ႉၼႃးဢၼ်ၶဵဝ်ၶဵဝ်ၼၼ်ႉ မၼ်းႁၢင်ႈလီၶဝ်ႈၵၼ်ၼႃႇ လူမ်းၵေႃႈၸိုၼ်ႈသႂ် ပဵၼ်ဢၼ်ၵတ်းယဵၼ်ၸႂ်တေႉယဝ်ႉ မၼ်းႁၢင်ႈလီထိုင်တီႈႁဝ်းဢမ်ႇၶႂ်ႈပွၵ်ႈမိူဝ်းယဝ်ႉဝႃႈ ၵူၺ်းၵႃႈ ယိုင်ႈယူႇ မၼ်းၵေႃႈယိုင်ႈလပ်းသိင်ႇမႃးတိၵ်းတိၵ်း မိူဝ်ႈဝူၼ်ႉဝႃႈႁဝ်းထုၵ်ႇလီမိူဝ်းယဝ်ႉ ၵူၺ်းသမ်ႉလႆႈႁၼ်လၢဝ်ၼိူဝ်ၵၢင်ႁၢဝ်ၼၼ်ႉ ႁိူဝ်ႈလႅင်းၶပ်ႉၸႅၼ်ႇသႅမ်းၵၼ်လူင်ဝႆႉ ပဵၼ်ဢၼ်ႁၢင်ႈလီၼႃႇလႄႈ ႁဝ်းၵေႃႈလႆႈသိုပ်ႇတူၺ်းထႅင်ႈၼၼ်ႉၼႃႇ”
ၸိုၼ်ႈၶိူဝ်းၼၼ်ႉၵေႃႈ ယၵ်ႉတူၺ်းလိုၼ်းၼုမ်ႇသေ
“ပွၵ်ႈၼႃႈမႃး.. ပႂ်ႉမႃးတူၺ်းၸွမ်းၵၼ်ဢမ်ႇလီႁႃႉ..”
လိုၼ်းၼုမ်ႇ ယုမ်ႉၸူးမၼ်းယဝ်ႉ လၢတ်ႈၸူးၵႂႃႇၶိုၼ်း
“ၶႂၢင်းပၼ်ႁဝ်းၼႃႈ ဢၼ်မႃးလႄႈဢမ်ႇလႆႈလၢတ်ႈ”
“ဢိုမ်ႈ!..ပွၵ်ႈၼႃႈမႃးၵေႃႈ..လၢတ်ႈၵၼ်ၽွင်ႈလႄႈ ႁႂ်ႈႁဝ်းမႃးၸွမ်းၵေႃႈလႆႈ.. ယဝ်ႉၵေႃႈ ၾူင်းသူၼၼ်ႉ..ထုၵ်ႇလီပႃးၵိုၵ်းတူဝ်ဝႆႉတႃႇသေႇယဝ်ႉ တေလႆႈၵပ်းသိုပ်ႇၵၼ်ငၢႆႈ..”
ၸိုၼ်ႈၶိူဝ်းၵေႃႈ ဢွၼ်ဢဝ်လိုၼ်းၼုမ်ႇပွၵ်ႈမိူဝ်းႁိူၼ်းသေ မိူဝ်းထိုင်ႁိူၼ်းယဝ်ႉ လႅင်းဢွၼ်ႇဢၼ်လႆႈႁၼ်လိုၼ်းၼုမ်ႇ ပွၵ်ႈမႃးယဝ်ႉၼႆၵေႃႈ ၵိုင်ႉၵၢင်ႉၼႅတ်ႈလႅၼ်ႈဝႅၼ်ပုင်ႈၵွပ်ႈသႂ်ႇပၼ်မၼ်း ဢဝ်မၼ်းသမ်ႉပေႃးၶႂ်ႈဝူင်လူမ်ႉလူင်းၵႂႃႇယဝ်ႉ သင်ဢမ်ႇမီးၸိုၼ်ႈၶိူဝ်းဢဝ်ၶႅၼ်ႁွင်းဝႆႉလင်မၼ်းၼၼ်ႉတႄႉ။
ပႃႈဢွင်ႇဢၼ်လႆႈႁၼ် ၸိုၼ်ႈၶိူဝ်းၶႃလိုၼ်းၼုမ်ႇမႃးယဝ်ႉၼႆၵေႃႈ ယွၼ်းပွၵ်ႈမိူဝ်းၵႂႃႇယူႇ။ လိုၼ်းၼုမ်ႇ ဢၼ်လႆႈႁၼ်ပႃႈဢွင်ႇမိူဝ်းၵႂႃႇယဝ်ႉၼၼ်ႉ
“ပႃႈၶဝ် ဢမ်ႇၸႂ်ႈဝႃႈယူႇတီႈၼႆႈၶႃႈႁႃႉ”
“ဢမ်ႇၼႃ..ပႃႈၶဝ်ယူႇတီႈႁိူၼ်းၶဝ်သေမႃးၵူၺ်း”
“သူတမ်ႉဢမ်ႇၵိၼ်ၶဝ်ႈၼႂ်ဢမ်ႇၸႂ်ႈႁႃႉ..”
“ၵူၺ်းၵႃႈ..သူလႄႈလႅင်းဢွၼ်ႇၵိၼ်လူး”
ယၢမ်းၼၼ်ႉ လႅင်းဢွၼ်ႇၵေႃႈ ဢဝ်ထူင်လိၵ်ႈၽိုၼ်ၼိုင်ႈ ယိုၼ်ႈပၼ်တီႈလိုၼ်းၼုမ်ႇၵႂႃႇသေ
“ၶူးႁႂ်ႈၸၢႆးဢဝ်မႃးပၼ်ဢေႃႈ မိူဝ်ႈၽုၵ်ႈၸၢႆးတေလႆႈလႅၼ်ႈၶေႉပိူၼ်ႈ ၶူးလၢတ်ႈဝႃႈ ႁႂ်ႈပေႃႈတင်းမႄႈၸၢႆးၵႂႃႇပၼ်ႁႅင်းၼႆဝႃႇ”
လိုၼ်းၼုမ်ႇယၵ်ႉတူၺ်းၸိုၼ်ႈၶိူဝ်းၵႂႃႇယဝ်ႉ
“သူတၼ်းယူႇၸွင်ႇၸႂ်ႈမိူဝ်ႈၽုၵ်ႈ!..”
လႅင်းဢွၼ်ႇၼၼ်ႉၵေႃႈ ယိပ်းဢဝ်မိုဝ်းၸိုၼ်ႈၶိူဝ်း ၼင်ႇဢမ်ႇယၢမ်ႈယိပ်းသေပွၵ်ႈ လႄႈ ယၵ်ႉတူၺ်းၸူး မိူၼ်မွင်းၶေႃႈတွပ်ႇမၼ်းယူႇ ၼၼ်ႉယဝ်ႉ။
“ဢိူဝ်ႈ!…ႁဝ်းယွၼ်းတူၺ်းၽႅၼ်ၵၢၼ်ႁဝ်းၵွၼ်ႇ”
“လႆႈၶႃႈဢေႃႈ မႄႈလႄႈတင်းပေႃႈတေၵႂႃႇၵူၺ်း..”
လိုၼ်းၼုမ်ႇၵေႃႈ တွပ်ႇၸူးတီႈလႅင်းဢွၼ်ႇၵႂႃႇသေ လုပ်ႈႁူဝ်မၼ်းလွႆးလွႆးယဝ်ႉသိုပ်ႇလၢတ်ႈထႅင်ႈ
“လိုၵ်းၼႃႇယဝ်ႉၼႃ လုၵ်ႈၵေႃႈ ထုၵ်ႇလီမိူဝ်းၼွၼ်းလႆႈယဝ်ႉ ၸင်ႇတေမီးႁႅင်းလႅၼ်ႈၶေႉပိူၼ်ႈလႆႈၼၼ်ႉၼႃႇ”
“ၸၢႆးဢမ်ႇၶႂ်ႈၼွၼ်းၵေႃႉလဵဝ်ၼႃ”
ၼႄသၢႆတႃဢွၼ်ႈဝွၼ်း ႁႂ်ႈလိုၼ်းၼုမ်ႇၼွၼ်းၸွမ်းမၼ်းယူႇ။ လိုၼ်းၼုမ်ႇဢၼ်တိုၵ်ႉၶဝ်ႈႁိူၼ်းမႃး ၸွမ်းလူၺ်ႈပဵၼ်မေးၸိုၼ်ႈၶိူဝ်းၼၼ်ႉၼႆၵေႃႈ ၵူဝ်လႆႈယူႇၸွမ်းၶဝ်ၼႆလႄႈ ၼႅတ်ႈတွပ်ႇၸူးဝႆးဝႆးယဝ်ႉ။
“လႆႈဢေႃႈ.. ၸၢႆးမိူဝ်းပႂ်ႉမႄႈၵွၼ်ႇလႄႈၼႃႈ မႄႈတေဢုပ်ႇတင်းပေႃႈလုၵ်ႈၵႅပ်ႉၼိုင်ႈ”
ၸိုၼ်ႈၶိူဝ်းဢၼ်လႆႈႁၼ်လိုၼ်းၼုမ်ႇ လၢတ်ႈတေႃႇလႅင်းဢွၼ်ႇ လႄႈႁွင်ႉမၼ်းဝႃႈပေႃႈလုၵ်ႈၼႆၼၼ်ႉ ၼင်ႇႁၢင်ႈပေႉမႃးဢုၼ်ႇၸႂ် ၸိူင်ႉႁိုဝ်ဝႆႉၵေႃႈဢမ်ႇႁူႉယဝ်ႉ တူၺ်းၶႃသွင်ၵေႃႉဢုပ်ႇၵၼ်သေ ယုမ်ႉယူႇႁင်းမၼ်းယဝ်ႉ။
ဝၢႆးသေလႅင်းဢွၼ်ႇၵႂႃႇယဝ်ႉၵေႃႈ
“မိူဝ်ႈၽုၵ်ႈ..သူတၼ်းယူႇၸွင်ႇၸႂ်ႈၶႃႈ..သမ်ႉဝႃႈဢမ်ႇတၼ်းၵေႃႈ…”
“တၼ်းဢိူဝ်ႈ.. ႁဝ်းတၼ်းယူႇ” ၼႅတ်ႈတတ်းၵႂၢမ်းလိုၼ်းၼုမ်ႇၵႂႃႇယူႇယဝ်ႉ။
“လီယဝ်ႉၶႃႈ”
မိူၼ်ဝႃႈလိုၵ်းၼႃႇယဝ်ႉလႄႈ ၸိုၼ်ႈၶိူဝ်းၵေႃႈ
“သူၵေႃႈလိုဝ်ႈႁိူဝ်ႉလႆႈယဝ်ႉ.. ႁွင်ႈၼွၼ်းသူ.. ပဵၼ်ႁွင်ႈဢၼ်ယူႇၽၢႆႇၼႃႈႁွင်ႈလႅင်းဢွၼ်ႇၼၼ်ႉၼႃႈ ၼႂ်းႁွင်ႈၼၼ်ႉၵေႃႈ ပဵၼ်ၶူဝ်းၶွင်သူမူတ်းၼၼ်ႉယဝ်ႉ”
ယၵ်ႉတူၺ်းလိုၼ်းၼုမ်ႇယဝ်ႉ သုတ်ႉၶဝ်ႈၸမ်ၸမ်သေ ယိုၼ်ႈၼႃႈၶဝ်ႈၸူး
“ပေႃးဝႃႈတေႉ ၽူဝ်မေးၵၼ်ဢမ်ႇၸမ်ပဵၼ်တေလႆႈၸႅၵ်ႇႁွင်ႈၵၼ်ၼွၼ်းၼင်ႇၵဝ်ႇ” ယုမ်ႉၸူးလိုၼ်းၼုမ်ႇ မိူၼ်မီးၽႅၼ်ၵၢၼ်သင်သေလွင်ႈလွင်ႈဝႆႉၼၼ်ႉယဝ်ႉ။ “ႁၼ်ဝႃႈ..သူၼၼ်ႉတိုၵ်ႉပဵၼ်ၵူၼ်းပဵၼ်ယူႇ သမ်ႉဝႃႈတေပဵၼ်ၸဝ်ႈၽူဝ်သူၵေႃႈ ဢမ်ႇၶႂ်ႈႁဵတ်းပူၼ်ႉလိူဝ် တေႃႇၵူၼ်းဢၼ်ပၢႆးယူႇလီဢမ်ႇၶႅမ်ႉၼင်ႇၵဝ်ႇၼႃ”
ထွမ်ႇယဝ်ႉမိူၼ်ၵႂၢမ်းလႃႇ ၸိူင်ႉႁိုဝ်ၵေႃႈဢမ်ႇႁူႉ။
“လီမိူၼ်ၵၼ်ၶႃႈ..ႁဝ်းၵေႃႈဢမ်ႇယုမ်ႇသူလႆႈၵႃႈႁိုဝ်ၼင်ႇၵဝ်ႇ ဝႃႈသူၼၼ်ႉ ၸႂ်ႈၸဝ်ႈၽူဝ်ႁဝ်းတေႉတေႉယူႇႁႃႉ တေႃႇထိုင်လွင်ႈဝၼ်းလင်ႁဝ်းပေႃးတေၶိုၼ်းမႃး ႁဝ်းလႄႈတင်းသူၼၼ်ႉ ဢမ်ႇပေႃးလီယူႇၸမ်ၵၼ်ႁႅင်းၼႃႇၽႅဝ်ၶႃႈၼႃ”
သွင်ၶႃၵေႃႈႁူႉၽႂ်ႁူႉမၼ်းယူႇ ဢမ်ႇလၢတ်ႈၼႄၵၼ်လႆႈၼၼ်ႉၵူၺ်း။ လိုၼ်းၼုမ်ႇၶဝ်ႈၵႂႃႇၼႂ်းႁွင်ႈယဝ်ႉ လႆႈႁၼ်ႁၢင်ႈၶိူင်ႈဝႆႉၼႂ်းႁွင်ႈၼၼ်ႉ ၶႅမ်ႉလႅပ်ႈလီလႄႈ မီးတဵမ်ထူၼ်ႈ ၸဵမ်ၶွင်ၸႂ်ႉၶွင်တိုဝ်း ၶူဝ်းၼုင်ႈတၢင်းမႂ်ၸိူဝ်းၼႆႉ မိူၼ်ပဵၼ်ႁွင်ႈဢၼ်ၵူၼ်းယၢမ်ႈယူႇဝႆႉ ၼၼ်ႉယဝ်ႉ။
လိုၼ်းၼုမ်ႇၼၼ်ႉၵေႃႈ ဢၢပ်ႇၼမ်ႉလၢႆႈၶူဝ်းယဝ်ႉသေ ၶဝ်ႈၵႂႃႇၼွၼ်းပဵၼ်ၵေႃႉလႅင်းဢွၼ်ႇၼႆယူႇ ၶဝ်ႈၵႂႃႇႁွတ်ႈၼႂ်းႁွင်ႈ လႆႈႁၼ်လႅင်းဢွၼ်ႇသမ်ႉပေႃးၼွၼ်းလပ်း ယူႇယဝ်ႉ။ မၼ်းၵေႃႈ ၵႂႃႇၼင်ႈတူၺ်းၶဝ် ဢၼ်ၼွၼ်းလပ်းဝၢၼ် သဵင်ထူၺ်ႈမေႃးၽေႃႈၽေႃႈယူႇၼၼ်ႉသေ ဝူၼ်ႉၶႆႈၸႂ်ၸူး။
“ၶႂၢင်းပၼ်မႄႈၼႃႈ ဢၼ်ဢဝ်ၸၢႆးၽၢတ်ႇယၢၼ်တင်းၼႃႈႁိူၼ်းၸၢႆးၼၼ်ႉ မႃးပဵၼ်လၢႆပီႊ မႄႈတေၶတ်းၸႂ်သၢႆႈတႅၼ်းပၼ်ၸၢႆးၶိုၼ်းၵူၺ်းၼႃ ”
မိုဝ်းၼုမ်ႇဢွၼ်ႇ လႅင်းဢွၼ်ႇၼၼ်ႉၵေႃႈ ဝၵ်ႉတၢဝ်းဢဝ်မိုဝ်းမၼ်းယဝ်ႉ ႁွင်ႉမေႃးမႃး “မႄႈ!..မႄႈ..မႃးႁႃၸၢႆးလႄႈ..” ၼႆသေ ႁွင်ႉႁႆႈဢွၵ်ႇမႃးယူႇ။
“မႄႈမီးတီႈၼႆႈယဝ်ႉၼႃ!” လိုၼ်းၼုမ်ႇၼၼ်ႉၵေႃႈ ၼွၼ်းၵွတ်ႇဢဝ်လႅင်းဢွၼ်ႇဝႆႉ ၼႂ်းဢွင်ႈဢူၵ်းမၼ်းၼၼ်ႉယဝ်ႉ သဵင်လႅင်းဢွၼ်ႇၸင်ႇတေယဵၼ်ၵႂႃႇ။
မၼ်းၸင်ႇဝူၼ်ႉၶႆႈၸႂ်ယူႇႁင်းမၼ်း
“ၶဝ်ႈမႃးသုၵ်ႉယုင်ႈၸွမ်းၸၢတ်ႈပၢၼ်ၶဝ်ယဝ်ႉၵေႃႈ တေလႆႈႁပ်ႉဢဝ်ပုၼ်ႈၽွၼ်းၵႂႃႇယူႇယဝ်ႉ မၼ်းပဵၼ်လွင်ႈဢၼ်ႁဝ်းထုၵ်ႇလီႁဵတ်း လႄႈ ႁဝ်းၵေႃႈတေၶတ်းၸႂ်ႁဵတ်းႁႂ်ႈလီ တွၼ်ႈတႃႇၶဝ် တွၼ်ႈတႃႇသၢႆႈတႅၼ်းၶိုၼ်း လွင်ႈဢၼ်လႆႈႁဵတ်းတေႃႇၶဝ်ဝႆႉၼၼ်ႉ မၼ်းၸင်ႇတေသၢင်ႇထုၵ်ႇ”
ယၢမ်းၵၢင်ၼႂ် လိုၼ်းၼုမ်ႇ လုၵ်ႉၸဵမ်ၸဝ်ႉသေ ႁၢင်ႈႁႅၼ်းၶဝ်ႈၽၵ်းယူႇၼႂ်းႁွင်ႈမိုဝ်ႉလႄႈ မိူဝ်ႈပႃႈဢွၵ်ႇႁွတ်ႈမႃးၵေႃႈ လႆႈႁၼ်လိုၼ်းၼုမ်ႇမီးယူႇၼႂ်းသွင်ႇၾႆးယူႇယဝ်ႉ။
“ႁဵတ်းသင်ယူႇလႃႇ..”
“ဢေႃႈ..ႁဵတ်းၽၵ်းယူႇၶႃႈ”
“လွင်ႈၸိူဝ်းၼႆႉ..ႁႂ်ႈပႃႈႁဵတ်းၵေႃႈလႆႈယူႇၼႃႈ”
“ဢမ်ႇပဵၼ်သင်ၶႃႈ ၶႃႈၵေႃႈႁဵတ်းၸမ်ယဝ်ႉယဝ်ႉ”
ယၢမ်းၼၼ်ႉ ၸိုၼ်ႈၶိူဝ်းၵေႃႈ မႃးၸူးၶႃသေ
“လုၵ်ႉယဝ်ႉၶႃႈႁႃႉ..” လိုၼ်းၼုမ်ႇထၢမ်။
“ဢိုမ်ႈ!..သူႁဵတ်းသင်ယူႇလႃႇ”
“ႁဝ်းႁဵတ်းၶဝ်ႈၽၵ်း..ၸမ်ယဝ်ႉယဝ်ႉ..သူၸွႆႈၵႂႃႇတူၺ်းလႅင်းဢွၼ်ႇၽွင်ႈ..”
ပႃႈဢွင်ႇၼၼ်ႉၵေႃႈ ႁူႉဝႃႈၸိုၼ်ႈၶိူဝ်းၼၼ်ႉတေဢမ်ႇပေႃးမေႃတူၺ်းၵႃႈႁိုဝ်လႄႈ
“ႁႂ်ႈပႃႈၵႂႃႇတူၺ်းၵေႃႈလႆႈ..”
ၸိုၼ်ႈၶိူဝ်းဢၼ်ႁၼ်သၢႆတႃလိုၼ်းၼုမ်ႇ ယၵ်ႉတူၺ်းၸူး ပႃးတင်းၵၢၵ်ႇလူင်ၼၼ်ႉႁေ မိူၼ်တေဢဝ်မႃးၽၢတ်ႈသႂ်ႇမၼ်းဝႆႉလႄႈ
“ဢမ်ႇပဵၼ်သင်ၶႃႈပႃႈ ၶႃႈတေၵႂႃႇတူၺ်းၵူၺ်း” ႁိပ်ႈၼႅတ်ႈၵႂႃႇၵမ်းလဵဝ်ယူႇယဝ်ႉ။
ပႃႈဢွင်ႇဢၼ်လႆႈႁၼ်ၸိုၼ်ႈၶိူဝ်းႁဵတ်းၸွမ်းၸိူင်ႉၼၼ်ၵေႃႈ ပဵၼ်ဢၼ်လီဢၢမ်းလူင်ဝႆႉယူႇ ဢမ်ႇတွၼ်ႉယၢမ်ႈႁၼ်ၽႂ်လၢတ်ႈယဝ်ႉ မၼ်းတေႁဵတ်းၸွမ်းဢၼ်ပိူၼ်ႈလၢတ်ႈၼၼ်ႉသေပွၵ်ႈ မၼ်းၶႂ်ႈႁဵတ်းၵေႃႈမၼ်းတေႁဵတ်းၵႂႃႇ ပေႃးဢမ်ႇၶႂ်ႈႁဵတ်းၵေႃႈတေဢမ်ႇႁဵတ်းၼၼ်ႉၵူၺ်း လႆႈဝႃႈပဵၼ်ပွၵ်ႈဢွၼ်တၢင်းသုတ်း ဢၼ်မၼ်းယွမ်းႁဵတ်းၸွမ်း ၶေႃႈၵႂၢမ်းပိူၼ်ႈလၢတ်ႈ လိူဝ်သေမူၺ်ၶၢဝ်။
ပႃႈဢွင်ႇၵေႃႈဢမ်ႇပေႃးၸၢင်ႈလၢတ်ႈသင်ၸွမ်းယဝ်ႉလႄႈ ၸွႆႈလိုၼ်းၼုမ်ႇႁႅၼ်းၶဝ်ႈႁႅၼ်းၽၵ်းၵႂႃႇၵူၺ်းယူႇ။
တွၼ်ႈသိပ်းပႅတ်ႇသုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈသိပ်းၵဝ်ႈၶႃႈ။
ႁပ်ႉထွမ်ႇပၼ်ႁႅင်းလူၺ်ႈသဵင်တၢင်း YouTube ၵေႃႈလႆႈၶႃႈ။
