ၼႃႈႁိူၼ်းလႄႈတၢင်းႁၵ်ႉ

ယွၼ်ႉႁၵ်ႉၵၼ်သေတႄႇၼႃႈႁိူၼ်းၸွမ်းၵၼ်ၵေႃႈမီးယူႇ ဢမ်ႇလႆႈႁၵ်ႉၵၼ်သေ လႆႈတႄႇၼႃႈႁိူၼ်းၸွမ်းၵၼ်ၵေႃႈ မီးတင်းၼမ်ယူႇ။

ၵမ်ႈၽွင်ႈၵေႃႈတေႇတီႈပဵၼ်ၵေႃႉႁၵ်ႉၵၼ်မႃးၶၢဝ်းႁိုင်သေ တေႃႇပေႃးလႆႈပဵၼ်ႁိူၼ်းႁူမ်ႈၵၼ်၊ ၵူၺ်းၵႃႈ ၵမ်ႈၽွင်ႈၵေႃႈဢိင်ၼိူဝ်ပေႃႈမႄႈပီႈၼွင်ႉလႆႈၸႂ်သေ ဢဝ်ဢၢပ်ႈပၼ်ၵၼ်ၵေႃႈမီးယူႇ၊ ဢၼ်ဢမ်ႇထၢင်ႇဢမ်ႇထိူမ်သေႁၵ်ႉၵေႃႈဢမ်ႇၸႂ်ႈ ၸင်းၵေႃႈဢမ်ႇပဵၼ် ယွၼ်ႉလႆႈၽုၵ်ႇၽၼ်း ႁူတ်းၼမ်ႉပၼ်လႄႈ ဢဝ်ဢွၵ်ႇမွၵ်ႇမၢၵ်ႇမႃးသေ လႆႈပဵၼ်ၼႃႈႁိူၼ်းၸွမ်းၵၼ်ၵႂႃႇၵေႃႈမီးယဝ်ႉ။

ၸိူင်ႉႁိုဝ်ၵေႃႈလီ ပိူင်လူင်မၼ်းယွၼ်ႉလႆႈပဵၼ်ၼႃႈႁိူၼ်းႁူမ်ႈၵၼ်ယဝ်ႉလႄႈ ထုၵ်ႇလီႁဵတ်းႁႂ်ႈၼႃႈႁိူၼ်းမၼ်ႈၵိုမ်းမူၼ်ႈသိူဝ်းၵႂႃႇၵူၺ်း။

မိူဝ်ႈပီ 2015 ၼၼ်ႉ မီးတႆးၵေႃႉၶႃႈႁဝ်းၵေႃႉၼိုင်ႈ ပဵၼ်ၼၢင်းယိင်း မၼ်းယၢမ်ႈလၢတ်ႈၼႄၶႃႈ လွင်ႈၵၢၼ်တႄႇၼႃႈႁိူၼ်း မၼ်းဝႃႈ –

“ဢၼ်ၵဝ်တႄႇၼႃႈႁိူၼ်းၸွမ်းၼႆႉ ဢမ်ႇလႆႈပဵၼ်ၸူႉၵၼ် ဢမ်ႇလႆႈႁၵ်ႉၵၼ် တူၺ်းႁၼ်ဝႃႈမၼ်းၵေႃႈပဵၼ်ၵူၼ်းလီသေ ဢဝ်ၵၼ်ၵူၺ်း၊ ဝၢႆးဢဝ်ၵၼ်ယဝ်ႉၵေႃႈ ၵေႃႉၼိုင်ႈလႄႈၵေႃႉၼိုင်ႈ မေႃဝူၼ်ႉသွၼ်ႇတေႃႇၵၼ် ပေႃးၵဝ်ႁဵတ်းၸိူင်ႉၼႆ မၼ်းတေဢမ်ႇလႆႈၸႂ်ႁဵတ်းၼႆသေ ယူႇၸွမ်းၵၼ်မႃး တေႃႇပေႃမီးလုၵ်ႈႁူမ်ႈၵၼ်ၼႆႉ ပႆႇၽိတ်းၵၼ်သေပွၵ်ႈ” ၼႆယဝ်ႉ။

ႁၵ်ႉၵၼ်သေပဵၼ်ၼႃႈႁိူၼ်းၸွမ်းၵၼ်ယဝ်ႉ သိုပ်ႇႁၵ်ႉၵၼ်ၶႅၼ်းလီ၊ မၢင်ၸိူဝ်းမိူဝ်ႈပဵၼ်ၸူႉၵၼ်တႄႉ ႁၵ်ႉၵၼ်ယူႇ ဝၢႆးတႄႇၼႃႈႁိူၼ်းယဝ်ႉ ပႆႇႁိုင်သမ်ႉပေႃးဝႃႈ ၽိတ်းၵၼ်သေ ပႅတ်ႈၵၼ်ယဝ်ႉၼႆ ဢမ်ႇထုၵ်ႇလီပဵၼ်။

ယွၼ်ႉၼၼ် ဢၼ်ၶႂ်ႈလၢတ်ႈတႄႉ ၵၢၼ်တႄႇၼႃႈႁိူၼ်းၼႆႉ ဢမ်ႇၵဵဝ်ႇတၢင်းႁၵ်ႉ မၼ်းယူႇတီႈ မေႃယိူၼ်ႉတေႃႇၵၼ် မေႃပွင်ႇၸႂ်ၵၼ် မေႃတူၺ်းထိုင်လုမ်းလႃးၵၼ် မေႃဝူၼ်ႉသွၼ်ႇတေႃႇၵၼ် ပေႃးၵေႃႉၼိုင်ႈဢမ်ႇလႆႈၸႂ်ၵေႃႈ ၵေႃႉၼိုင်ႈၵေႃႈ ဢမ်ႇႁဵတ်းသေ လၢတ်ႈၵၼ်လႆႈၼၼ်ႉ ပဵၼ်ငဝ်ႈႁၢၵ်ႈ လွင်ႈၼႃႈႁိူၼ်းမၼ်ႈၵိုမ်းယဝ်ႉ။

ၶႃႈႁဝ်းယၢမ်ႈဢၢၼ်ႇၺႃး ဢၼ်ၽူႈမီးတၢင်းႁူႉၶဝ် တႅမ်ႈဝႆႉ (ၽၢႆႇဢင်းၵိတ်ႉ) ၵမ်ႉၼမ် ဢၼ်မိူၼ်ၵၼ်ၼၼ်ႉတႄႉ

1. ၵေႃႉၼိုင်ႈလႄႈၵေႃႉၼိုင်ႈ ႁႂ်ႈမီးလွင်ႈၼပ်ႉယမ်ၵၼ် – ၼပ်ႉယမ်တီႈၼႆႈၼႆႉ မၼ်းမၢႆထိုင်ဝႃႈ ယႃႇပေထၢင်ႇလဵၵ်ႉၵၼ်၊ လႆႈႁၼ်ၵမ်ႈၼမ် သင်ဝႃႈယူႇၸွမ်းၵၼ်မႃးႁိုင်ယဝ်ႉၼႆ ယွၼ်ႉပိူဝ်ႈႁူႉၼွၵ်ႈႁၼ်ၼႂ်းၵၼ်ယဝ်ႉလႄႈ ၶႂ်ႈဝႃႈႁင်းၵၼ်ၸိူင်ႉႁိုဝ်ၵေႃႈဝႃႈ၊ ၶႂ်ႈလႃႇၵၼ်ၵေႃႈလႃႇၼၼ်ႉ ဢမ်ႇလီႁဵတ်းၼႆယဝ်ႉ။
2. ႁႂ်ႈမေႃယိူၼ်ႉတေႃႇၵၼ် – မၢင်ပွၵ်ႈမၢင်လႂ် မဵဝ်းယူႇၸွမ်းၵၼ်ႁိုင်ယဝ်ႉၵေႃႈ မၼ်းမိူၼ်လိၼ်ႉလႄႈၶဵဝ်ႈ မေႃႈလႄႈၵၢၵ်ႇ ၸၢင်ႈမေႃထၢၵ်ႇၺႃးၵၼ်ယူႇလႄႈ သင်ဝႃႈမႅၼ်ႈမိူဝ်ႈၵေႃႉၼိုင်ႈတိုၵ်ႉပဵၼ်ၾႆးယူႇၼၼ်ႉ ၵေႃႉၼိုင်ႈႁႂ်ႈမေႃယိူၼ်ႉသေ ပဵၼ်ၼမ်ႉပၼ်ၼႆယဝ်ႉ။
3. ႁႂ်ႈမေႃသႂ်ႇၸႂ်ၼိူဝ်ၵၼ် – ယိင်းၵေႃႈယဝ်ႉၸၢႆးၵေႃႈယႃႇ မၢင်ၵေႃႉဢမ်ႇမေႃဢဝ်ၸႂ်သႂ်ႇၼိူဝ်ၵၼ်၊ လွင်ႈလဵၵ်ႉလဵၵ်ႉၼွႆႉၼွႆႉ မိူၼ်ၼင်ႇဝီႁူဝ်ပၼ်မေး ၵႅတ်းၵၢပ်ႇၼဵပ်ႉပၼ်ၽူဝ် တႄႇၵႂႃႇလွင်ႈၸိူဝ်းၼႆႉ ၵမ်ႈၽွင်ႈၵေႃႈ တေဢမ်ႇမေႃႁူႉႁဵတ်းပၼ်ၵၼ်၊ တီႈတေႉမၼ်း ၵၢၼ်လဵၵ်ႉလဵၵ်ႉၼွႆႉၼႆႉၸိူဝ်းၼႆႉ မၼ်းပဵၼ်လွင်ႈၸၼ်ၸႂ်လႄႈ ႁဵတ်းႁႂ်ႈၼႃႈႁိူၼ်းမၼ်ႈၵိုမ်းၼႆယဝ်ႉ။
4. ယႃႇသိူင်ႇသိမ်းတေႃႇၵၼ်- သင်ဝႃႈတေပဵၼ်လွင်ႈဢၼ်တေတိူဝ်ႉၶိူၵ်ႈၼႃႈႁိူၼ်းၼႆ တေလႆႈလၢတ်ႈၼႄၵၼ် မိူၼ်ၼင်ႇ လွင်ႈငိုၼ်း၊ လွင်ႈၵၢၼ်၊ လွင်ႈတႆးၵေႃႉ ၸိူဝ်းၼႆႉ ထုၵ်ႇလီလၢတ်ႈၼႄၵၼ်၊ ၵပ်းသိုပ်ႇပၼ်ၵၼ်ယူႇ၊ ၵွပ်ႈပိူဝ်ႈၽူဝ်မေးၵၼ်ဢၼ်ဝႃႈၼႆႉ မိူၼ်တူဝ်ၵေႃႉလဵဝ်ၵၼ်ယဝ်ႉလႄႈ ၵွပ်ႈၼၼ် ဢမ်ႇလီသိူင်ႇသိမ်းၵၼ်ၼႆယဝ်ႉ။

ၵွပ်ႈၼၼ်ဢၼ်ၶႂ်ႈသင်ႇတႄႉ ပႅတ်ႈမေးၵေႃႈဢဝ်မေးထႅင်ႈ၊ ပႅတ်ႈၽူဝ်ၵေႃႈဢဝ်ၽူဝ်ထႅင်ႈၵူၺ်း ၼင်ႇႁိုဝ်တေဢမ်ႇလႆႈပဵၼ် ပေႃႈႁၢင်ႉမႄႈႁၢင်ႉၼၼ်ႉ ႁႂ်ႈမေႃလုမ်းလႃးၼႃႈႁိူၼ်းၽႂ်မၼ်းသေၵမ်း၊ သင်ဝႃႈယူႇၸွမ်းၵၼ်ဢမ်ႇလႆႈလႃးလႃးတႄႉၵေႃႈ ၵႃႈတေလႆႈဝႃႈ ၼမ်ႉယၢတ်ႇႁႅင်ႈပွတ်းတၢင်းၼႆၶႃႈယူဝ်ႉၼေႃႈ။

ၵမ်းလိုၼ်းယွၼ်းသူးပၼ် ၽူႈလူဢၢၼ်ႇႁဝ်းၶဝ် ၸိူဝ်းဢၼ်မီးၼႃႈႁိူၼ်းၵေႃႈ ႁႂ်ႈလႆႈသိုပ်ႇပဵၼ်ၼႃႈႁိူၼ်းမူၼ်း ၵူၼ်းၵိုၼ်း မီးငိုၼ်းၼမ်ၼမ်သေ၊ ၸိူဝ်းပႆႇလႆႈတႄႇၼႃႈႁိူၼ်းၵေႃႈ ႁႂ်ႈထူပ်းၺႃးၵူၼ်းလီလီ ဢၼ်တေႁဵတ်းႁႂ်ႈၼႃႈႁိူၼ်းမူၼ်းမၼ်ႈၵိုမ်းသေၵမ်း။

ၶွပ်ႈၸႂ်သေ

ၼုမ်ႇၸိုၼ်ႈၾႃႉ ထုင်ႉမေႃႇငိုၼ်း

17 March 2025 21:30