“ဢေးၶွင်ႇ!..သုၵ်ႉသၵ်ႉယဝ်ႉမႂ်း”
“ႁဵတ်းႁင်လႃႇ..”
“ၵူၼ်းမႃးယွၼ်းမႂ်း မီးပဵၼ်သွင်ၵေႃႉလႃႇ မႂ်းလၢတ်ႈၽႂ်ဝႆႉထႅင်ႈ”
“ၵဝ်ၸၢင်ႈလၢတ်ႈၽႂ် လၢတ်ႈဢၢႆႈမၢၼ်ႈၵူၺ်းၼႃႇ”
“ထႅင်ႈၵေႃႉလူးႁမ်ႉလုၵ်ႉတၢင်းလႂ်မႃးလႃႇဢေႉ”
ၶႃႈၵေႃႈၽုၼ်ႇၽၢၼ်ႇလုၵ်ႉၵႂႃႇတူၺ်းယဝ်ႉ လႆႈႁၼ်ဢူႈမႄႈမေႃၼၼ်ႉမႃးမီးယူႇတေႃႇၼႃႈၵၼ်တင်း ဢူႈမႄႈဢၢႆႈမၢၼ်ၶဝ်ၼၼ်ႉယဝ်ႉၼႃႇ။
“ႁဵတ်းသင်လႄႈမႄႈပႃႈၶဝ်မႃး..”
“လုၵ်ႈၸၢႆးႁဝ်းဢမ်ႇလႆႈယူႇတီႈၼႆႈလႄႈ ႁဝ်းၵေႃႉတေမႃးယွၼ်းသူ ၸူဝ်ႈသူပႆႇၵႂႃႇပဵၼ်လုၵ်ႈပႂ်ႉပိူၼ်ႈပႅတ်ႈၼၼ်ႉဢိူဝ်ႈ ႁဝ်းႁဵတ်းပၼ်တွၼ်ႈတႃႇလုၵ်ႈၸၢႆးႁဝ်းဢိူဝ်ႈ”
ဝၢႆးသေၶဝ်ၵႂႃႇယဝ်ႉ ပဵၼ်ပွၵ်ႈဢွၼ်တၢင်းသုတ်းလႆႈငိၼ်းၶၢဝ်ႇၶဝ်၊ မၼ်းဢမ်ႇႁူႉႁႃႉ ၶႃႈမွင်းမၼ်းမႃးယူႇတႃႇသေႇ ၽိူဝ်ႇထိုင်ဝၼ်းဢၼ်ၶႃႈတေတတ်းမၼ်းပႅတ်ႈယဝ်ႉ မၼ်းၵေႃႈၶိုၼ်းမႃးတူင်ႉၼိုင်ယူႇၼႂ်းတႃ သၼ်ႇၶွၼ်းယူႇၼႂ်းၸႂ်။
“ပေႃးတေမႃးယွၵ်ႇၸႂ်ၵၼ်လၢႆလၢႆတႄႉ ပွၵ်ႈမိူဝ်း သေၶႃႈလႃႈ ၶၢဝ်းယၢမ်းပူၼ်ႉမႃးမၼ်းပဵၼ်ႁိုဝ်ယူႇ မၼ်းမီးယူႇလႂ် ၶႃႈၵေႃႈဢမ်ႇတွၼ်ႉႁူႉၸွမ်း လွင်ႈမၼ်း ဢမ်ႇႁူႉလွင်ႈသင်ၵဵဝ်ႇၵပ်းမၼ်း ၶႃႈဢမ်ႇၶႂ်ႈသုမ်းၶၢဝ်းယၢမ်းလႄႈဢမ်ႇၶႂ်ႈပႂ်ႉမၼ်းထႅင်ႈယဝ်ႉ”
“ႁဝ်းတေဢမ်ႇပၼ်ႁႂ်ႈသူလႆႈပႂ်ႉထႅင်ႈယဝ်ႉ”
တင်းသိူဝ်ႈၶူဝ်းသိုၵ်းမၼ်းၼၼ်ႉသေ တင်းၼူတ်ႇယုင်ႈယုင်ႈပေႃးတၢၼ်ႇၵူၼ်းထိူၼ်ႇယဝ်ႉ ဢမ်ႇႁူႉၵႂႃႇယူႇၼႂ်းယုမ်းတင်းလႂ်မႃး လႅၼ်ႈမႃးတင်းၶႃႈ ပိူၼ်ႈသမ်ႉပေႃးၶႂ်ႈၵူဝ်မၼ်းယဝ်ႉႁိုဝ်ဢမ်ႇႁူႉ မၼ်းသမ်ႉပႃးၵွင်ႈပွတ်းၼဵပ်းဢႅဝ်ဝႆႉယူႇၼၼ်ႉယဝ်ႉ၊ ဢၢႆႈမၢၼ်ႈသမ်ႉပေႃးသုတ်ႉႁူၼ်ၵႂႃႇပဵၼ်ၵမ်းယဝ်ႉ။
ၶိင်းမၢၼ်ႈၵေႃႈဢမ်ႇပေႃးၶႂ်ႈႁၢၼ်ႉၸႂ်ၵႃႈႁိုဝ်
“တေဝႃႈႁိုဝ် ပေႃးဢမ်ႇဢဝ်လုၵ်ႈၸၢႆးႁဝ်းၵေႃႈမိူဝ်းၶိုၼ်းၵူၺ်းဢိူဝ်ႈ”
ပေႃးဝႃႈတေႉ မၼ်းၵေႃႈဢမ်ႇၵျိူၵ်ႈၶႃႈၵႃႈႁိုဝ် လုၵ်ႈၸၢႆးမၼ်းၵျိူၵ်ႈၵူၺ်းလႄႈၵႃႈလႆႈမႃးၵူၺ်း။
ၶႃႈၵေႃႈယၵ်ႉတူၺ်းဢၢႆႈမၢၼ်ႈ ဢၼ်မိူၼ်တေႁွင်ႉႁႆႈယူႇၼၼ်ႉလႄႈ လၢတ်ႈၸူးမၼ်း
“သူၸွင်ႇတေပေႉလုင်းၼူတ်ႇၼႆႉလႆႈယူႇႁႃႉ”
တႃၵမ်ႇတႃလမ်မၼ်းႁႅၼ်တူၺ်း လုင်းၼူတ်ႇယဝ်ႉၵေႃႈ ယၢင်ႈၶဝ်ႈၸူးၸမ်သေဢိတ်းၼိုင်ႈ မေႃၼၼ်ႉၵေႃႈယၵ်ႉတူၺ်းၼႃႈမၼ်းသေ ဢၢႆႈမၢၼ်ႈတူၺ်းၵွင်ႈပွတ်းမၼ်းယဝ်ႉ ၵွင်လင်ၵႂႃႇၸူးပေႃႈၶဝ်ၶိုၼ်း ၼင်ႇဢမ်ႇႁၢၼ်ႉၸႂ်ယဝ်ႉ။ ယၵ်ႉတူၺ်းၼႃႈၶႃႈသေ
“ၸႂ်ႁၢႆႉလိူဝ်သေသူၼႆႉဢမ်ႇမီးၽႂ်ထႅင်ႈယဝ်ႉ…”
“ႁဝ်းယွမ်းၼွမ်းၼႃႈ”
ၶႃႈၸူမ်းထိုင်တီႈပေႃးလိုမ်းဝူၼ်ႉထိုင်ၵၢင်ၸႂ်ဢၢႆႈမၢၼ်ႈၵႂႃႇယဝ်ႉၼႃႇ၊ ၶႃႈလိူၵ်ႈမေႃၼၼ်ႉ လူၺ်ႈတီႈဢမ်ႇလႆႈဝူၼ်ႉၼႃႈဝူၼ်ႉလင် မိူဝ်ႈႁၼ်မၼ်းၵေႃႈ လွင်ႈၶွင်ႈၶမ်တင်းလၢႆမိူၼ်ႁၢႆပၢင်ႇမူတ်းသေ လူင်ႉလႅင်းၸႂ်မႃးတေႉယဝ်ႉ။
ၽႂ်ၵေႃႈဢမ်ႇထၢင်ႇလႄႈ ဢမ်ႇဝူၼ်ႉဝႃႈ ၶႃႈတေမႃးတေႇၼႃႈႁိူၼ်းၸွမ်းမေႃၼၼ်ႉ ယွၼ်ႉပိူဝ်ႈၽႂ်ၵေႃႈဢမ်ႇယၢမ်ႈႁူႉလွင်ႈမၼ်းလႄႈတင်းၶႃႈလူး မီးဢေးၸိင်ႇၵူၺ်း ႁူႉဝႃႈၵေႃႉပၼ်ၸွမ်ႇမိုဝ်း မၼ်းၵေႃႈတင်းဢမ်ႇယၢမ်ႈႁၼ်လႄႈ ဢၼ်ပိူၼ်ႈဢမ်ႇၶႂ်ႈယုမ်ႇၼၼ်ႉတႄႉ မေႃၼၼ်ႉသမ်ႉပဵၼ်သို
ၵ်းႁေၼၼ်ႉယဝ်ႉ တႅၼ်းတီႈတေလိူၵ်ႈဢၢႆႈမၢၼ်ႈ ၶႃႈၵေႃႈသမ်ႉလိူၵ်ႈသိုၵ်းၼႆၼၼ်ႉ ပၢင်ၶႅၵ်ႇၶႃႈၵေႃႈ ပဵၼ်တီႈၶႃႉၸိုဝ်ႈၶႃႈၼႄၵၼ်ၼၼ်ႉယဝ်ႉ။
ပၢင်ၶႅၵ်ႇပွၵ်ႈၼႆႉ ၶႃႈဝႃႈၶႃႈႁဵတ်းတွၼ်ႈတႃႇၼၢႆးႁဝ်းၼႆဢမ်ႇၸႂ်ႈလူင် ၶႃႈႁဵတ်းတွၼ်ႈတႃႇတူဝ်ၶႃႈၵူၺ်း၊ ၼၢႆးႁဝ်းၵေႃႈ သမ်ႉဝႃႈဢမ်ႇၵျိူၵ်ႈသိုၵ်းသေတႃႉ မိူဝ်ႈၶႃႈလိူၵ်ႈယဝ်ႉ မၼ်းၵေႃႈဢမ်ႇထဵင်သင်လႆႈ၊ ဝၢႆးသေၶႃႈႁဵတ်းၶႅၵ်ႇလႆႈ လိူၼ်ပၢႆၼႆႉၵူၺ်း မၼ်းၵေႃႈသဵင်ႈပႅတ်ႈသေယဝ်ႉ။ သမ်ႉဝႃႈပဵၼ်ဝၼ်းဢၼ်ၶႃႈမွင်ၸႂ် ပဵၼ်ဝၼ်းဢၼ်ၶႃႈၶႂ်ႈမီးၵူၼ်းယူႇႁိမ်းၶၢင်ႈၼႆသေတႃႉ ၶဝ်ၵေႃႈဢမ်ႇလႆႈယူႇၸွမ်းၶႃႈလႄႈ ၼႃႈၵၢၼ်ပုၼ်ႈၽွၼ်းၶဝ်ၼၼ်ႉ လမ်ႇလွင်ႈယူႇတႃႇသေႇယဝ်ႉ၊ မိူဝ်ႈယူႇတေႃႇၼႃႈတႄႉဢမ်ႇၵႂႃႇတၢင်းလႂ် ပေႃးဝႃႈလူဝ်ႇၵႂႃႇမႃးတႄႉ ဢမ်ႇလိူဝ်လႆႈၶေႃႈသင်ႇ။
ပေႃးၶႂ်ႈယူႇၸွမ်းၶဝ်ၵေႃႈ လူဝ်ႇဢဝ်ၶူဝ်းဢဝ်လဵင်းသေ ၵႂႃႇယူႇၸွမ်းၶဝ်ၵူၺ်းယဝ်ႉ။ ႁဝ်းၵေႃႈလူဝ်ႇႁဵတ်းၵၢၼ်ႁဝ်း ယူႇၸွမ်းၶဝ်ယဝ်ႉ ႁဝ်းဢမ်ႇၶၢမ်ႇတုၵ်ႉၶလႆႈၸွမ်းၶဝ် တေဝႃႈဢမ်ႇႁူႉၵေႃႈ ယၢမ်ႈယူႇမႃးယဝ်ႉလူး။
ၶဝ်ပွႆႇႁဝ်းဝႆႉၵေႃႈ ပွႆႇၶဝ်ၵႂႃႇသေ မိူၼ်ႁႃးယူႇၽႂ်ယူႇမၼ်းၵူၺ်းလႄႈ မိူၼ်ဝႃႈၶႃႈလႆႈၶိုၼ်းယူႇမိူၼ်ပဵၼ်
သၢဝ်ၼၼ်ႉၵူၺ်း ႁိုင်ၼႃႇၵေႃႈလိုမ်းတူဝ်ဝႃႈမီးၽူဝ်ၵွၼ်ႇယဝ်ႉ။
သမ်ႉဝႃႈဢဝ်ၵၼ်မႃးႁိုင်ယဝ်ႉၵေႃႈ ယင်းတိုၵ်ႉပဵၼ်ၵူၼ်းၵပ်းသိုပ်ႇယၢပ်ႇယူႇလႄႈ လွင်ႈသိူင်ႇသမ်းလူင်မၼ်းၼၼ်ႉၵေႃႈၼမ်ၼႃႇၽႅဝ်လႃႈ ဢမ်ႇပူၼ်ႉပီ ၶႃႈဝႃႈၶႃႈတေပႅတ်ႈယဝ်ႉ။
ၸိူင်ႉၼင်ႇဢၢႆႈၼွင်ႉၼုမ်ႇ ပၢႆႈၸွမ်းၽူႈယိင်းၵေႃႉၼၼ်ႉၵေႃႈ မိူၼ်ၶႃႈၶႂ်ႈပွင်ႇၸႂ်မႃးယဝ်ႉ။ မၢင်ပွၵ်ႈၵေႃႈၶႂ်ႈဝႃႈၼၼ်မိူၼ်ၵၼ်။
မၢင်ပွၵ်ႈၵႂႃႇပဵၼ်လိူၼ် မႃးယူႇႁိူၼ်းသၢမ်သီႇဝၼ်းၶိုၼ်းၵႂႃႇ၊ ပေႃးမႃးယူႇႁိူၼ်းႁိုင်ၵေႃႈလႆႈၵႂႃႇႁိုင်ယဝ်ႉ။
“ၵၢၼ်သူၼႆႉ ႁဵတ်းတီႈႁိူၼ်းၼႆႉဢမ်ႇလႆႈႁႃႉ”
“ပေႃးႁဵတ်းလႆႈႁဝ်းႁိုဝ်ၶႂ်ႈၵႂႃႇၼႄႇ”
“ပေႃးၵႂႃႇၼႆၵေႃႈၵပ်းသိုပ်ႇၵေႃႈဢမ်ႇလႆႈယဝ်ႉဝႃႈ ႁဝ်းႁၼ်ပိူၼ်ႈတင်းဢုပ်ႇတေႃႇလုၵ်ႈတေႃႇမေးပိူၼ်ႈယူႇဝႃႈ”
“ဢေႃႈၶႃႈ..ႁဝ်းတေႁႃလၢႆးမၼ်းၵူၺ်း”
“တေလႆႈၵႂႃႇထႅင်ႈမိူဝ်ႈလႂ်လႃႇ”
“မိူဝ်ႈႁဝ်းတိုၵ်ႉလႆႈယူႇၸွမ်းၵၼ်ယူႇၼႆႉ ဢမ်ႇလီလၢတ်ႈၶိူဝ်းတေယၢၼ်ၵၼ်ၼႃသူ”
“လၢတ်ႈၸိူင်ႉၼႆတႃႇသေယဝ်ႉဝႃႈ ပေႃးဝႃႈၵႂႃႇၼႆၵေႃႈ ပေႃးဢမ်ႇလၢတ်ႈၾၢင်ႉဝႆႉသေဢိတ်း ႁဝ်းဢမ်ႇၵျိူၵ်ႈၼႃ”
“ႁဝ်းႁူႉ သူဢမ်ႇၵျိူၵ်ႈသေလွင်ႈ”
“ႁူႉယဝ်ႉလႅၵ်ႈလၢႆႈဢမ်ႇလႆႈၼၼ်ႉယိင်ႈၶႅၼ်းဢမ်ႇၵျိူၵ်ႈယဝ်ႉ”
“ၵူၺ်းၵႃး တူဝ်ႁဝ်းတႄႉသူၵျိူၵ်ႈယူႇႁိုဝ်လႃႇ”
“ဢမ်ႇ..”
“ဢမ်ႇထဵင်ၶိုၼ်းၼႆ ႁဝ်းႁူႉယူႇၼႃႈ”
“ႁဝ်းဝႃႈႁဝ်းမီးဢေယဝ်ႉၼႃႈ”
“တေႉႁႃႉ..သူတေဢမ်ႇလႆႈယူႇၵေႃႉလဵဝ်ယဝ်ႉပေႃးၼၼ်”
“ၸွင်ႇတေမႃးလဵင်ႉၸွႆႈႁဝ်းလႆႈႁိုဝ် ပေႃးဢမ်ႇမႃးၸွႆႈၵေႃႈဢမ်ႇၸႂ်ႈလုၵ်ႈသူၵူၺ်ႉၼႃႈ”
“ဢမ်ႇလႆႈလေႃႇသူ ပႃးႁဝ်းယူႇလူး လၢႆလိူၼ်ယဝ်ႉလႃႇ”
“ၼပ်ႉဢဝ်ၵူၺ်းလႃႈ ၸဵမ်မိူဝ်ႈသူမႃးႁိူၼ်းၵမ်းပူၼ်ႉၼၼ်ႉၼႃႇ ႁဝ်းဝႃႈယဝ်ႉၵပ်းသိုပ်ႇႁႃၵူၼ်းတီႈႁိူၼ်းၽွင်ႈၼႆ ဢၢႆပိူၼ်ႈၼႃႇၵႃႈ ဢုပ်ႇမေးတေႃႇၼႃႈပိူၼ်ႈၼႆႉ”
“ဢမ်ႇဢၢႆ ႁဝ်းဢမ်ႇၸၢင်ႈႁဵတ်းၵူၺ်းဢိူဝ်ႈ”
“ယႃႇလႅၼ်ထၢင်ႇႁဝ်းဢမ်ႇႁူႉ ဝူင်ႈပူၼ်ႉသူသိုပ်ႇၾူၼ်းမႃးဝႃႈႁိုဝ်ႁင်းႁဝ်း”
“ႁဝ်းလၢတ်ႈဝႃႈၸႂ်ထိုင် ယဝ်ႉၵေႃႈႁၵ်ႉသူၼႃႇ ၼႆၵူၺ်းဢမ်ႇၸႂ်ႈႁိုဝ်”
“သူၵႂႃႇႁဵတ်းသင်မႃး ႁဝ်းႁူႉမူတ်းယဝ်ႉ သူၵေႃႉတေလၢတ်ႈၼႄႇ ႁႂ်ႈႁဝ်းလၢတ်ႈၼႄ”
“ႁဝ်းၵႂႃႇလႄႇၶေႇထီႇဝီႇ ၸွမ်းဢူၺ်းၵေႃႉ”
“ၵိၼ်သေယဝ်ႉ ၵႂႃႇၵႃႈၸွမ်းသၢဝ်”
“ဢေႃႈၶႃႈ မွၵ်ႈၼႆႉၵူၺ်း ဢမ်ႇလႆႈႁဵတ်းပူၼ်ႉလိူဝ်သေၼၼ်ႉ”
“ၶမ်ႈဝႃး သူၼွၼ်းၵႂင်သေ ႁွင်ႉၸိုဝ်ႈႁွမ်ႁွမ်ၼႆ ႁွမ်လႂ်လႃႇ”
“ႁွမ်သူၼၼ်ႉၼႃႇ”
“ဝူၼ်ႉယူႇယဝ်ႉဝႃႈသူတေလၢတ်ႈၸိူင်ႉၼႆ ၸွင်ႇသူႁူႉႁႃႉ ဢၢႆႈမၢၼ်ႈမၼ်းဝႃႈမၼ်းပႂ်ႉႁဝ်းယူႇၼႆဝႃႇ သမ်ႉဝႃႈႁဝ်းပဵၼ်မႄႈႁၢင်ႉႁိုဝ်ပဵၼ်မႄႈမၢႆႈၵေႃႈ မၼ်းတင်းတိုၵ်ႉတေဢဝ်ယူႇၼႆဝႃႇ”
“ႁဝ်းဢမ်ႇပၼ်မၼ်းႁႂ်ႈဢဝ်ၵႂႃႇလႆႈငၢႆႈငၢႆႈလေႃႇ”
“ႁဝ်းဝႃႈပေႃးႁဝ်းဢဝ်ဢၢႆႈမၢၼ်ႈၼႆ တင်းတေဢမ်ႇလႆႈမႃးႁဵတ်းၽူႈၸွပ်ႇယူႇၸိူင်ႉၼႆလႃႈ”
“သူတေႁဵတ်းႁိုဝ်ႁူႉ ၶေးမၼ်းႁဵတ်းၵႅင်ႈၵူၺ်းတ
င်းဢမ်ႇႁူႉ”
“ၵူၺ်းၵႃႈႁဝ်းႁူႉၸၵ်းမၼ်းႁိုင်လိူဝ်သေသူဢိူဝ်ႈၼႃႈ”
“ႁိုင်ၵေႃႈ ႁၼ်ၼႃႈဢမ်ႇႁၼ်ၸႂ်လူး”
“မိူၼ်ၸိူင်ႉသူၼႆႉၼႃႇၼႆ ႁၼ်ၼွၵ်ႈႁၼ်ၼႂ်းယူႇၵေႃႈတင်းဢမ်ႇႁၼ်ၸႂ်သူလႆႈႁိုဝ်လႃႇ”
“တေလႆႈၽႃႇၼႄဢဝ်ၼႄႇတေႃႈ”
ၶႃႈၵေႃႈလႆႈၵိူတ်ႇလုၵ်ႈယိင်းဢွၼ်ႇမႃးယဝ်ႉ မၼ်းၵေႃႈမိူၼ်ၼင်ႇဝႃႈၼၼ်ႉၵူၺ်း ၼႃႈၵၢၼ်မႃးဢွၼ်တၢင်း ၵၢၼ်ၼႃႈႁိူၼ်းမႃးၵမ်းလင်၊ ဝၼ်းၵိူတ်ႇလုၵ်ႈၵေႃႈ ၵႂႃႇမီးယူႇတၢင်းလႂ်ၵေႃႈဢမ်ႇႁူႉ ၵပ်းသိုပ်ႇၵေႃႈဢမ်ႇလႆႈ မီးမႄႈၶဝ်ၼၼ်ႉၵူၺ်း ဢၼ်မႃးယူႇပဵၼ်ၵေႃႉ။
တိုၵ်ႉယူႇၼႂ်းလိူၼ်ယူႇ မၼ်းသမ်ႉပဵၼ်တုၶိတ်ႉတလူင်မႃးႁိူၼ်း တင်းလုၵ်ႈဢွၼ်ႇႁေ တင်းၵူၼ်းလူင်ႁေ သမ်ႉပေႃးဢမ်ႇၸၢင်ႈလၢတ်ႈသင်ယဝ်ႉ။
“သူတေပၼ်ႁႂ်ႈႁဝ်းၵတ်းယဵၼ်ၸႂ်ၵွပ်ႈသူလႆႈၸိူင်ႉႁိုဝ်လႃႇ”
ၶႃႈယၵ်ႉတူၺ်းပီႈပၢင်ႇဢၼ်မႃးသူင်ႇမၼ်းၼၼ်ႉ
“ႁူဝ်ၼႃႈသူပဵၼ်ၵေႃႉ သူၵုမ်ႇႁဵတ်းသင်လႃႇ ပွႆႇႁႂ်ႈမၼ်းလႆႈမၢတ်ႇၸဵပ်းယူႇတႃႇသေႇ”
“မၼ်းပဵၼ်ႁူဝ်ၼႃႈႁဝ်းဢေႃႈ ႁဝ်းဢမ်ႇၸၢင်ႈႁၢမ်ႈမၼ်းၶႃႈလူး မီးပီႈလူဝ်းၵူၺ်းဢေႃႈတေႁၢမ်ႈလႆႈ”
ၶဝ်ၵေႃႈပွႆႇမၼ်းဝႆႉတီႈႁိူၼ်းႁေ မိူဝ်းၵႂႃႇပႅတ်ႈယဝ်ႉ
“မေႃၼႃႇၼေႃ ပၼ်တၢင်းမႆႈပိူၼ်ႈၼႆႉ”
တႃၽႅပ်ႉယုပ်းၽႅပ်ႉယုပ်းသေတူၺ်းၼႃႈၶႃႈယူႇ
“ဢမ်ႇမႆႈၸႂ်ၵၼ်သေဢိတ်းႁ ႁဝ်းမၢတ်ႇၸဵပ်းမႃးဢိူဝ်ႈ”
“ပေႃးႁူႉဝႃႈပိူၼ်ႈတေမႆႈၸႂ် တေႁႂ်ႈတူဝ်ၵဝ်ႇမၢတ်ႇၸဵပ်းႁဵတ်းသင်”
“ၸွႆႈတူၺ်းပၼ်ႁဝ်းၽွင်ႈလႄႈ”
“ဢဝ်ဢွၵ်ႇၵူၺ်းလႄႈ ၸွင်ႇၶႅၼ်းၸႂ်ႈတီႈပိူၼ်ႈလဵၼ်ႈၼႄႇ ပေႃးပဵၼ်ပေႃႈၵူၼ်းယဝ်ႉ တိုၵ်ႉႁဵတ်းလုၵ်ႈဢွၼ်ႇယူႇ”
“ပေႃးဢမ်ႇႁဵတ်းၸိူင်ႉၼႆ ႁဝ်းၵေႃႈဢမ်ႇလႆႈမႃးငၢႆႈငၢႆႈလေႃႇသူၵေႃႈ မီးလႂ်လႃႇလုၵ်ႈႁဝ်း”
“ၼွၼ်းလပ်းယဝ်ႉ”
မၼ်းၵေႃႈၶဝ်ႈမိူဝ်းတူၺ်းလုၵ်ႈမၼ်းသေ ၼမ်ႉတႃသမ်ႉပေႃးၸိုမ်းယဝ်ႉ။
“ပဵၼ်လုၵ်ႈႁဝ်းတေႉႁ တူဝ်လဵၵ်ႉလဵၵ်ႉဢွၼ်ႇၵူၺ်းၼေႃ ႁဝ်းဢုမ်ႈၸွင်ႇလႆႈႁိုဝ်”
“ပၼ်မၼ်းၼွၼ်းၵွၼ်ႇလႄႈ သူတေလႆႈဢုမ်ႈယူႇၵူၺ်း”
မၼ်းၵေႃႈမႃးၵွတ်ႇၶႃႈသေ
“သူတေႁိူဝ်ႉတေႉယဝ်ႉ ႁဝ်းယွမ်းၼွမ်းၼႃႈ ပၼ်ႁႂ်ႈသူလႆႈလဵင်ႉလုၵ်ႈယူႇၵေႃႉလဵဝ်”
“သူၵေႃႈမႃးလဵင်ႉၸွႆႈႁဝ်းၼၼ်ႉၼႃႇ”
ယူႇယူႇၵေႃႈသဵင်ယဵၼ်သေ ၵွတ်ႇၶႃႈဝႆႉသမ်ႉပေႃးမၼ်ႈတိုင်ႈတိုင်ႈယဝ်ႉ။
“သူပဵၼ်သင်ယဝ်ႉလႃႇ”
“ႁဝ်းၵူဝ်တေႉဢိူဝ်ႈသူ ႁဝ်းၵူဝ်တေလႆႈၽၢတ်ႇသူလႄႈတင်းလုၵ်ႈတေႉယဝ်ႉ”
“သူတေလႆႈၵႂႃႇတီႈမီးၽေးၶဵၼ်ၼမ်ထႅင်ႈယဝ်ႉၸွင်ႇၸႂ်ႈ”
“ဢိုမ်ႈ..”
“ဢမ်ႇပဵၼ်သင်ၼႃ ႁဝ်းယုမ်ႇဝႃႈသူတေပွၵ်ႈမႃးၶိုၼ်းယူႇ သူႁူႉဢမ်ႇၸႂ်ႈႁ ႁဝ်းလႄႈတင်းလုၵ်ႈပႂ်ႉသူယူႇၼႆ ဢမ်ႇဝႃႈပဵၼ်သင်မႃးၵေႃႈ သူတိုၼ်းတေလႆႈမႃးၶိုၼ်းႁႂ်ႈလႆႈဢိူဝ်ႈၼႃႈ ၼႆႉပဵၼ်ၵႂၢမ်းသင်ႇႁဝ်းၸွင်ႇႁတ်းၶတ်းႁိုဝ် ပေႃးသူဢမ်ႇမႃးၶိုၼ်း ႁဝ်းတေႁႃဢူႈမႂ်ႇပၼ်လုၵ်ႈႁဝ်းထႅင်ႈ”
လုၵ်ႈယိင်း ႁဝ်းၵေႃႈႁွင်ႉႁႆႈယဝ်ႉ
“လုၵ်ႈႁဝ်းဢမ်ႇၽွမ်ႉလေႃႇ ၼၼ်ႉႁၼ်ႁိုဝ်ႁႆႈယဝ်ႉ”
ဝၼ်းမိူဝ်ႈၼႆႉၶႃႈဢမ်ႇမီးဝၼ်းလိုမ်း ႁၼ်ႁၢင်ႈမၼ်းႁွပ်ႇလုၵ်ႈယိင်းဢွၼ်ႇမၼ်းၵႂႃႇၵႂႃႇမႃးမႃးယူႇ လႆႈႁၼ်တၢင်းယုမ်ႉၸႅတ်ႈၸၢင်ႇဢၼ်မီးတေႃႇလုၵ်ႈမၼ်းၼၼ်ႉ ၸိုၼ်ႈသႂ်လိူဝ်သေယုမ်ႉတေႃႇၶႃႈၵွၼ်ႇယဝ်ႉ။
မၼ်းၵေႃႈၼွၼ်းၶိုၼ်းသေ တိုၼ်ႇမႃးၵၢင်ၼႂ်ၵေႃႈ ဢမ်ႇလႆႈႁၼ်မၼ်းယဝ်ႉ ၵပ်းသိုပ်ႇၵေႃႈဢမ်ႇလႆႈ၊ ထၢမ်ၽႂ်ၽႂ်ၵေႃႈဢမ်ႇႁူႉ တေႃႈၼင်ႇၸၢႆးပၢင်ႇတင်းဢမ်ႇႁူႉတၢင်းၵႂႃႇမၼ်း။ မၼ်းၵႂႃႇမီးယူႇလႂ် တၢႆႁိုဝ်လိပ်းႁိုဝ်ၵေႃႈဢမ်ႇႁူႉ ၵၢၼ်ဢၼ်မၼ်းႁဵတ်းယူႇတေႉတေႉၼၼ်ႉသမ်ႉ ပဵၼ်ၵၢၼ်ၸိူင်ႉႁိုဝ်ၼႆ ၶႃႈၵေႃႈဢမ်ႇတွၼ်ႉထၢမ်မၼ်းလႄႈ မၼ်းၵေႃႈဢမ်ႇလၢတ်ႈ။
လုၵ်ႈယိင်းႁဝ်း ၵေႃႉယႂ်ႇမႃးၵူႈဝၼ်း မေႃၶွမ်ႈမေႃၵၢၼ်း မေႃလၢတ်ႈမေႃၸႃ မေႃႁွင်ႉႁႃမႄႈယဝ်ႉဢေႃႈ ၵူၺ်းၵႃႈတေႁွင်ႉၽႂ်ဝႃႈပေႃႈလႃႇ၊ ပေႃႈမီးယူႇလႂ် မိူဝ်ႈလုၵ်ႈယိင်းထၢမ်မႃး ႁဝ်းတေလႆႈတွပ်ႇၼႄၸိူင်ႉႁိုဝ်၊ ၼိုင်ႈၶူပ်ႇသွင်ပီ သၢမ်ၶူပ်ႇသီႇၶူပ်ႇယဝ်ႉၵေႃႈ ဢမ်ႇလႆႈႁၼ်ငဝ်းမၼ်း မၼ်းႁိုင်ထိုင်တီႈႁဝ်းတေလိုမ်းသူယဝ်ႉဢိူဝ်ႈၼႃႈ။
