“ဢေးၶွင်ႇ မိူဝ်ႈမႂ်းဢမ်ႇယူႇၼၼ်ႉ မေးပီႈဢွင်ႇမႃးႁႃၵဝ်ဢိူဝ်ႈ မၼ်းဢဝ်ငိုၼ်းႁေမႃးပၼ်ၵင်သၢဝ်းသႅၼ်ၼႆႉၵႃႈ လၢတ်ႈႁႂ်ႈၵဝ်ပႅတ်ႈပီႈဢွင်ႇၼႆဝႃႇ ပေႃးလဵင်ႉလုၵ်ႈဢမ်ႇလႆႈၵေႃႈ မၼ်းတေဢဝ်မိူဝ်းလဵင်ႉၵူၺ်းၼႆဢိူဝ်ႈ”
“မႂ်းဢဝ်ႁငိုၼ်းမၼ်း”
“ဢမ်ႇဢဝ် ပေႃးပီႈဢွင်ႇဢမ်ႇပႅတ်ႇၵဝ်ၵေႃႈဢမ်ႇပႅတ်ႈၼႆဢိူဝ်ႈ”
“ဢေးၼၼ်ႉမၼ်းပဵၼ်ၽႂ် မၼ်းယူႇတီႈလႂ်လႃႇ ပေႃးၵဝ်ႁၼ်မၼ်း ၵဝ်တေယွၼ်းပၼ်ငိုၼ်းမၼ်းၼပ်ႉႁူဝ်မိုၼ်ႇႁူဝ်သႅၼ်လူး သၢဝ်းသႅၼ်ၸၢင်ႈပေႃးႁဵတ်းသင် ယွၼ်းပၼ်ႁႂ်ႈမၼ်းပေႃးၽၢၼ်ဢိူဝ်ႈလေႃႇ”
“မႂ်းၼႆႉၵေႃႈ”
“ဢီႈႁင်! မႂ်းလဵင်ႉလုၵ်ႈၽႂ်ၸွႆႈမႂ်း မႂ်းၵိူတ်ႇလုၵ်ႈပႃးတွင်ႉ ၸွင်ႇမၼ်းၸွႆႈသင်မႂ်း သမ်ႉပၼ်တၢင်းမႆႈၵၼ်ထႅင်ႈႁေ မႂ်းယင်းတိုၵ်ႉၶႂ်ႈလႆႈမၼ်းယူႇၵႃႈ ဢၢႆႈဢွင်ႇၼၼ်ႉ”
“မၼ်းၵေႃႈပဵၼ်ပေႃႈလုၵ်ႈၵဝ်ယူႇၼႃႇ”
“ၵဝ်တႄႉဢမ်ႇဝူၼ်ႉဝႃႈမီးပေႃႈၸိူင်ႉၼၼ်မၼ်းလီလေႃႇၼႃႈ မီးပေႃႈမႂ်ႇတင်းလီလိူဝ်ၼၼ်ႉယူႇ”
“ၵဝ်ၵေႃႈႁၵ်ႉမၼ်းလႄႈၸင်ႇဢဝ်လူး”
“ႁၵ်ႉဢိူဝ်ႈ တၢင်းႁၵ်ႉမၼ်းၵိၼ်လႆႈတီႈလႂ် မၼ်းႁဵတ်းႁႂ်ႈၼႃႈႁိူၼ်းမႂ်းဢုၼ်ႇၸႂ်တေႉယူႇႁ မၼ်းႁဵတ်းႁႂ်ႈမႂ်းဢမ်ႇလႆႈမႆႈၸႂ်တေႉယူႇႁ”
“မႂ်းဢမ်ႇမီး မႂ်းဢမ်ႇပွင်ႇၸႂ်လေႃႇ”
မိူၼ်မိတ်ႈမႃးၸူၵ်ႉတႅင်းတမ်ႁူဝ်ၸႂ်ယူႇပဵၼ်ၵမ်းယဝ်ႉၵႂၢမ်းၶေႃႈၼႆႉ။
သင်ၸိူဝ်ႉၵူၼ်းၵေႃႉၼၼ်ႉပဵၼ်ၸိူင်ႉၼႆလူး တေယွမ်းႁပ်ႉသေတိုၵ်ႉႁၵ်ႉမၼ်းယူႇႁႃႉ၊ သင်ဝႃႈမၼ်းႁဵတ်းႁႂ်ႈၵဝ်လႆႈၸဵပ်းလူး ၸွင်ႇၵဝ်တေၶႂၢင်းပၼ်မၼ်းလႆႈႁိုဝ်။
မၼ်းႁၢႆလူင်ၵႂႃႇသမ်ႉပေႃးၵႂႃႇႁွတ်ႈမိူင်းလႂ်ယဝ်ႉဢမ်ႇႁူႉ ၶႃႈသမ်ႉပေႃးၶႂ်ႈလိုမ်းဝွႆးဝွႆးယဝ်ႉ ပေႃးဢမ်ႇႁၼ်ၸွမ်ႇမိုဝ်းၼၼ်ႉ ၶေးတေလိုမ်းမၼ်းၵႂႃႇတေႉယဝ်ႉ။ တေတၢႆႁိုဝ်လိပ်းႁိုဝ် ဢမ်ႇႁူႉဢမ်ႇငိၼ်းၶၢဝ်ႇမၼ်းထႅင်ႈ သမ်ႉပေႃးၶွပ်ႈၶိင်ႇၶိုၼ်း ယၢမ်းဢၼ်မၼ်းလႆႈၽၢတ်ႇၵႂႃႇၼၼ်ႉယဝ်ႉၼႃႇ။
ဝၢႆးသေမၼ်းၵႂႃႇယဝ်ႉ ၶႃႈၵေႃႈလႆႈၶိုၼ်းႁဵတ်းၵၢၼ်တီႈႁူင်းယႃသေ ၵူၼ်းဢၼ်လႆႈဢွၵ်ႇၵႂႃႇၸွမ်းၵၼ်ၼၼ်ႉၵေႃႈ လႆႈမႃးၶိုၼ်းၵူႈၵေႃႉယဝ်ႉ။ ပီၼႆႉၵေႃႈ ဢသၢၵ်ႈလႆႈသၢဝ်းၵဝ်ႈယဝ်ႉလႄႈ ၵူၼ်းထဝ်ႈၵူၼ်းၵႄႇၶဝ်ၵေႃႈၶတ်းတႃ သဵင်ၶဝ်ၵေႃႈၶတ်းႁူမႃး တႃႇတႄႇၼႃႈႁိူၼ်းၼၼ်ႉ ဢမ်ႇလႆႈဝူၼ်ႉ ၼႆၵေႃႈ ၵူၼ်းႁိမ်းႁွမ်းသမ်ႉၶူၼ်ႉယူႇတိၵ်းတိၵ်း။
ၵုမ်ႇမိုင်ႉႁဵတ်းၵၢၼ်ၵူၺ်း ၶႃႈၵေႃႈသမ်ႉပေႃးလိုမ်းတူၺ်းတူဝ်ၵဝ်ႇဝႃႈ ဢသၢၵ်ႈၸမ်ၶဝ်ႈသၢမ်သိပ်းယဝ်ႉႁၼႆႉ၊ ဢမ်ႇတေႇၵေႃႈဢမ်ႇဝႃႈၼင်ႇၵွၼ်ႇ ၵူၺ်းၵႃႈတႃႇလႆႈၵေႃႉထုၵ်ႇၸႂ် ၵေႃႉတေၵူႈႁွမ်းပႆၵႂႃႇၸွမ်းၵၼ်ၼၼ်ႉ ၶႃႈဢမ်ႇတၼ်းတူၺ်းႁၼ် ဢမ်ႇၼၼ် ဢမ်ႇမီးၽႂ်ႁတ်းၵဝ်းယဝ်ႉႁိုဝ်၊ ၽိူဝ်လိူဝ်ဢမ်ႇႁၢင်ႈလီ သမ်ႉသူပ်းၽၢႆထႅင်ႈလူးၼေႃႈ၊
ၵူၺ်းမီးဢၢႆႈမၢၼ်ႈလုၵ်ႈၶိင်းပူဝ်ႇမူးပွၵ်ႉတူၵ်းၼၼ်ႉၵူၺ်းယဝ်ႉ ၸဵမ်မိူဝ်ႈမၼ်းမႃးမေႃးၼႂ်းႁူင်းယႃသေ ၶႃႈႁိုတ်းပၼ်မၼ်းပေႃးငႄႈလူင်ၵႂႃႇ တႄႇဢဝ်ၼၼ်ႉမႃးၵေႃႈ မႃးႁဵတ်းလီတေႃႇၶႃႈႁေ ၸွမ်းၵဝ်းၶႃႈမႃးၼႆႉ ၶႂ်ႈမီးၸမ်ၸမ်သၢမ်ပီယဝ်ႉယူဝ်ႉ ၶႃႈၵေႃႈဢမ်ႇသူၼ်ၸႂ်မၼ်း။
မၢင်ပွၵ်ႈၵေႃႈၶႂ်ႈၼေးမၼ်းမႃးယဝ်ႉ ပိူၼ်ႈထၢင်ႇမၼ်းပဵၼ်ၸူႉၶႃႈႁေ ပိူၼ်ႈဢမ်ႇႁတ်းၵဝ်းၶႃႈယဝ်ႉယူဝ်ႉၼႆ၊ “မၢင်ပွၵ်ႈမႃးၵေႃႈပေႃးမီးလွင်ႈဢမ်ႇမိူၼ်ၸႂ်မႃးၵေႃႈၶႂ်ႈၼႄးပိူၼ်ႈယဝ်ႉ” ဢေးၸိင်ႇၵႆႉဝႃႈႁင်းၶႃႈၼႃႇ။
ဢေးၸိင်ႇလႄႈတင်းပီႈဢွင်ႇၵေႃႈ လႆႈပႅတ်ႈၵၼ်ၵႂႃႇယဝ်ႉ ယွၼ်ႉပိူဝ်ႈမေးလူင်မၼ်းမႃးမေႃးယူႇတိၵ်းတိၵ်းလႄႈ မၼ်းသုၵ်ႉသၵ်ႉယဝ်ႉႁိုဝ်ဢမ်ႇႁူႉ မၼ်းၵေႃႈယွၼ်းပႅတ်ႈပီႈဢွင်ႇၵႂႃႇယဝ်ႉ၊ ပီႈဢွင်ႇၼၼ်ႉၵေႃႈ ဢမ်ႇပေႃးၶႂ်ႈပႅတ်ႈသေၵႃႈႁိုဝ်ၼႄႇ သမ်ႉဝႃႈပႅတ်ႈယဝ်ႉၼႆၵေႃႈ တင်းၵႆႉၵႆႉလၢတ်ႈတေႃႇမႃး ၵႆႉထၢမ်ႁႃလုၵ်ႈမၼ်းသေ ၵႆႉသူင်ႇငိုၼ်းပၼ်ဢေးၸိင်ႇ ၵႆႉလၢတ်ႈတေႃႇဢေးၸိင်ႇလိူဝ်သေမိူ ဝ်ႈမၼ်းတိုၵ်ႉၵိူတ်ႇလုၵ်ႈၼၼ်ႉၵွၼ်ႇယဝ်ႉ။
သူပ်းတႄႉဝႃႈပႅတ်ႈၵၼ်ယဝ်ႉ ၵူၺ်းၵႃႈတၢင်းႁဵတ်းသမ်ႉပဵၼ်ထႅင်ႈမဵဝ်းၼိုင်ႈ။
“တိုၵ်ႉလၢတ်ႈတေႃႇပီႈဢွင်ႇယူႇၵႃႈ”
“မၼ်းလၢတ်ႈတေႃႇမႃးၼႃႇ မၼ်းထၢမ်ႁႃလုၵ်ႈမၼ်းၵူၺ်း”
“လွင်ႈမႂ်းၵူၺ်းၵဝ်ႇလႂ် ၵဝ်ဢမ်ႇၶႂ်ႈသုၵ်ႉၸွမ်းယဝ်ႉ”
“ဢၢႆႈမၢၼ်ႈမႂ်းလူးႁမ်ႉ မိူဝ်ႈလႂ်လႃႇၶိူဝ်တေဢဝ်ၵၼ်”
“ၵဝ်ဝႃႈၵႃႈၵဝ်တေဢဝ်မၼ်း ၼႃႈဢူၼ်ႈၶီႈမႄႈပေႉၼၢၼ်ႉ”
“ဢမ်ႇႁူႉၼႃႇ မီးထႅင်ႈယူႇၵႃႈၵူၼ်းတေဢဝ်မႂ်း ၸိုင်ဝႃႈပီၼႆႉၶႂ်ႈတႄႇၼႃႈႁိူၼ်းယဝ်ႉၼႆ”
“မီးယူႇၵူၺ်းယူဝ်ႉ မၼ်းတေမႃးယူႇၵူၺ်းၵႃႈ”
“ၸဝ်ႈၶွင်ၸွမ်ႇမိုဝ်းၼၼ်ႉႁႃႉတေႃႈ မၼ်းမၢႆဝႆႉယဝ်ႉလူးၼေႃႈ”
“ၶေးတၢႆယဝ်ႉႁိုဝ်ဢမ်ႇႁူႉ ဢမ်ႇငိၼ်းၶၢဝ်ႇသင်သေဢိတ်း တီႈၵပ်းသိုပ်ႇၵူၺ်းတင်းဢမ်ႇမီး”
“ၵႆႉႁၼ်ၵၢင်ၶိုၼ်းမႂ်းထွမ်ႇတြႃးႁေလႃႇၽွင်းၼႆႉ”
“တြႃးဢီႈသင်လႃႇ ၸွင်ႇမၼ်းဢမ်ႇၸႂ်ႈမုၼ်ၸၢင်းမႂ်ႇၼင်ႈၵျွင်းႁွင်ႇၼၼ်ႉႁိုဝ် လၢတ်ႈသင်လၢတ်ႈသိင်မႃးဢမ်ႇႁူႉဝႃႈ ယၢဝ်းဝႃႈယၢဝ်း မၢင်ပွၵ်ႈၵဝ်ထွမ်ႇ
သမ်ႉပေႃးၼွၼ်းလပ်းပႅတ်ႈၵွၼ်ႇဢိူဝ်ႈ”
သဵင်ၶေႃႈၵႂၢမ်းလင်မႃး “ၼၼ်ႉလၢတ်ႈမႃးထႅင်ႈယဝ်ႉ ၵဝ်ပေႃးဢမ်ႇႁူႉတေလႆႈတွပ်ႇၸိူင်ႉႁိုဝ်ယဝ်ႉ”
“ၵဝ်ယူဝ်ဝႃႈမႂ်းတေၵႂႃႇၼုင်ႈၶၢဝ်ၼႆၵႃႈ ဢၵျွင်းဝႃႈတေဢဝ်မုၼ်ၸဝ်ႈထၢၵ်ႈလူင်းၵျွင်း”
“ၵဝ်ၵေႃႈဢမ်ႇႁူႉတေႁဵတ်းႁိုဝ်ယဝ်ႉ ၵူၼ်းလီလီႁေမႃးၵဝ်းၵဝ်ၼႆႉဢမ်ႇမီးႁေၵေႃႉဢေႉ ပေႃးဢမ်ႇၸႂ်ႈသိုၵ်းၵေႃႈ ပဵၼ်မၢၼ်ႈဝႃႇ၊ ဢမ်ႇၸႂ်ႈမၢၼ်ႈသမ်ႉပဵၼ်မုၼ်ၸဝ်ႈ မႂ်းဝူၼ်ႉတူၺ်းလူး”
“ၶဝ်ၵေႃႈပဵၼ်ၵူၼ်းလီလီယူႇလူး တိၼ်ပုတ်းမိုဝ်းႁၵ်းၵေႃႈဢမ်ႇၸႂ်ႈ ၵူၼ်းလီၼႆႉ ဢမ်ႇဝႃႈပဵၼ်သိုၵ်းႁိုဝ် မၢၼ်ႈႁိုဝ် မုၼ်ၸဝ်ႈၵေႃႈယဝ်ႉလႃႈ မၼ်းၵေႃႈပဵၼ်ၵူၼ်းလီလႆႈယူႇၵူၺ်း၊ မႂ်းၵူၺ်းၵူၺ်းဢိူဝ်ႈတႅပ်းတတ်းၶဝ်တီႈလႂ်လႃႇဝႃႈၶဝ်ဢမ်ႇလီၼႆ ၸိူဝ်ႉၶိူဝ်းႁ၊ ၸၼ်ႉထၢၼ်ႈႁ သမ်ႉဝႃႈၼႂ်းဝၢၼ်ႈၼႆႉ တေမီးမၢဝ်ႇၵႄႇဢၼ်လႅပ်ႈမႂ်းယူႇၵေႃႈ ပေႃးမႂ်းဢမ်ႇၵျိူၵ်ႈမႂ်းၵေႃႈဢမ်ႇၶႂ်ႈလႆႈ ပေႃးမၼ်းဢမ်ႇၶႂ်ႈလႆႈမႂ်း မၼ်းၵေႃႈတေဢမ်ႇဢဝ်မႂ်းယူႇယဝ်ႉ မၼ်းယူႇတီႈမႂ်းၵူၺ်း”
လၢတ်ႈဢဝ်ၶႃႈသမ်ႉပေႃးဢမ်ႇၸၢင်ႈတၵ်းသဵင်လႆႈယဝ်ႉ၊ ပႆႇတႄႇပေႃးဝူၼ်ႉၼမ်ၼႃႇယဝ်ႉ ပေႃးတႄႇမႃး မၼ်းတေဢမ်ႇလႆႈဝူၼ်ႉယၢဝ်းထႅင်ႈလိူဝ်ၼႆႉႁိုဝ်၊ ၶႃႈၶႂ်ႈတႄႇၼႃႇတႄႉၵေႃႈဢမ်ႇၸႂ်ႈၵွၼ်ႇ ဢမ်ႇတႄႇၵေႃႈဢမ်ႇပဵၼ်သင် ၵူၺ်းၵႃႈၼၢႆးႁဝ်းၼၼ်ႉၼႃႇယွၼ်းႁႂ်ႈၶႃႈတႄႇယူႇတိၵ်းတိၵ်း ပီၼႆႉမၼ်းၵေႃႈမွၼ်ႇၼႃႇယဝ်ႉ တွင်းၵေႃႈဢမ်ႇပေႃးၶႂ်ႈတွင်းၽႂ်ယဝ်ႉဝႃႈ မၢင်ပွၵ်ႈၵေႃႈတွင်းလိုမ်းတွင်းလိုမ်း သင်ဢမ်ႇသင်ႁႂ်ႈမၼ်းလႆႈႁၼ်ဝႃႈ လၢၼ်ယိင်းၵေႃႉၼႆႉ မီးၼႃႈႁိူၼ်းယဝ်ႉ တမ်းၸႂ်လႆႈယဝ်ႉဝႃႈၼႆ ႁဵတ်းပၼ်မၼ်းဢိတ်ႉၼိုင်ႈ။
လႄႈဝၼ်းၼၼ်ႉၵေႃႈမႃးထိုင် ဝၼ်းဢၼ်တိုၵ်ႉၶိုင်ႁၢင်ႈႁႅၼ်းတေမႃးထၢမ်ယူႇၼၼ်ႉ တေဢဝ်ၽူဝ်ၵူၺ်းၵေႃႈ ပေႉၵႅၼ်ႇသုၵ်ႉသၵ်ႉဢမ်ႇႁူႉယဝ်ႉ။
ပီႈၼွင်ႉၽၢႆႇႁဝ်းတႄႉၼင်ႈပႂ်ႉႁပ်ႉတွၼ်ႈၶႅၵ်ႇၵၼ်ယူႇလႄႈ လူတ်ႉၵႃးလူင်ၵေႃႈပေႉၵႅၼ်ႇမႃးၼမ် လုၵ်ႉတၢင်းဢွၵ်ႇ တၢင်းၸၢၼ်း လႆမႃး ၵူၼ်းတၢင်းလႂ်တၢင်းလီဢမ်ႇႁူႉဢွၼ်ၵၼ်မႃးၶွၼ်ႈယူႇတီႈႁိူၼ်း ၵူၼ်းပေႃးတူင်ႉယူႇသဵင်ႈၼႂ်းဝၢင်းႁိူၼ်း၊ သဵင်ၵူၼ်းဢူၼ်ဢၢၼ်မေႃးမႄးသမ်ႉပေႃးဢမ်ႇႁူႉၶေႃႈမၼ်းယဝ်ႉ၊ ၶႃႈတႄႉၵေႃႈပိူၼ်ႈပႆႇပၼ်ဢွၵ်ႇႁိူၼ်း ႁႂ်ႈပႂ်ႉယူႇၼႂ်းႁိူၼ်းၵူၺ်း။
ဢၢႆႈမၢၼ်ႈ ၶႃႈၵေႃႈဝႃႈမၼ်းၾိင်ႈထုင်းသူမီးၸိူင်ႉႁိုဝ်တႄႉဢမ်ႇႁူႉ ပေႃးမႂ်းတေဢဝ်ၵဝ်ၵေႃႈတေလႆႈၸွမ်းထုင်းၵဝ်ၼႆ မၼ်းၵေႃႈတေႁွင်ႉပီႈၼွင်ႉၸိူဝ်ႉၶိူဝ်းမၼ်းမႃးၵႃႈ ၶႃႈၵေႃႈဝႃႈမၼ်းထႅင်ႈ ပေႃးမႂ်းဢဝ်ၵဝ်မႂ်းတေလႆႈမႃးယူႇၸွမ်းၵဝ်ၵူၺ်း မၼ်းၵေႃႈၽွမ်ႉၸွမ်းႁေ ၶႃႈၵေႃႈဢဝ်မၼ်းၼၼ်ႉယဝ်ႉ။
သမ်ႉဝႃႈပေႃႈမၼ်းပဵၼ်မၢၼ်ႈသေတႃႉ မႄႈမၼ်းတႄႉၵေႃႈပဵၼ်တႆးယူႇ တေဝႃႈႁၵ်ႉသေဢဝ် ၶႃႈၵေႃႈဢမ်ႇလႆႈႁၵ်ႉၼႃ ၵူၺ်းၵႃႈ ၶႃႈဝူၼ်ႉဝႃႈ ဢမ်ႇၸႂ်ႈတၢင်းႁၵ်ႉၵေႃႈၶႃႈယူႇၸွမ်းမၼ်းလႆႈယူႇ ၸဵမ်မိူဝ်ႈႁူႉၸၵ်းမၼ်းမႃး မၼ်းပဵၼ်ၵူၼ်းသိုဝ်ႈလႂ်သိုဝ်ႈၼၼ်ႉၵူၺ်းလႄႈ ၶႃႈၵျိူၵ်ႈတီႈၼႆႈယဝ်ႉ၊ ပေႃးပႂ်ႉၵူၼ်းလီ ၵူၼ်းဢမ်ႇမီးတီႈသႄႉၼႄးသင် ၼၢႆးႁဝ်းၵေႃႈတေဢမ်ႇလႆႈႁၼ်ၶႃႈတေႇၼႃႈႁိူၼ်းယဝ်ႉ။
ပိူၼ်ႈၵေႃႈဝႃႈယူႇ ဢမ်ႇဢဝ်ၽူဝ်သိုၵ်း သမ်ႉတေဢဝ်ၽူဝ်မၢၼ်ႈၼႆဢိူဝ်ႈၼေႃႈ၊ ၶႃႈၵေႃႈဢဝ်ၶဝ်ႈႁူးသၢႆႉဢွၵ်ႇႁူးၶႂႃႇၵူၺ်းယဝ်ႉ။
