တေႃႇမၼ်းပေႃးၶႅၼ်းၼႆႉ ဢမ်ႇပၼ်ၶႃႈၵႂႃႇတၢင်းလႂ်ဝႃႇ လိူဝ်သေတူၺ်းပၼ်တၢင်းပဵၼ်ယဝ်ႉ သမ်ႉပၢႆလႆႈပွၼ်ႈၶဝ်ႈပွၼ်ႈၼမ်ႉပၼ်ထႅင်ႈ။ ၶႅၼ်းယူႇဢူႈမႄႈၶဝ်တင်းၸႂ်လီ ၶႂ်ႈၵိၼ်သင်ၶႂ်ႈႁဵတ်းသင်ၼႆၵေႃႈ ပၼ်ယူႇလွတ်ႈလႅဝ်းၼႃႇ ၵႆႉဝႃႈ ဝႆႉမိူၼ်ႁိူၼ်းသူလႄႈၼႆတႃႇသေႇ ၶႃႈဢမ်ႇလႆႈၶူဝ်းမႃးၼႆၵေႃႈ မႄႈၶဝ်ၵေႃႈဢဝ်ၶူဝ်းမၼ်းမႃးပၼ်ၶႃႈသႂ်ႇသေ ၶဝ်ဢမ်ႇပၼ်ၶႃႈဢွၵ်ႇၵႂႃႇၼႆၵေႃႈ ၵႂႃႇသိုဝ်ႉမႃးပၼ်ၶႃႈႁေဢိူဝ်ႈ။
ၸဵမ်မိူဝ်ႈၶႃႈမႃးယူႇ မေႃၼၼ်ႉၵေႃႈ တင်းဢမ်ႇလၢတ်ႈတေႃႇၶႃႈသေပွၵ်ႈ ပဵၼ်ၵူၼ်းဢႁ မၢင်ပွၵ်ႈၵေႃႈၶႂ်ႈလၢတ်ႈၼၼ်ယဝ်ႉ။ ၵူၺ်းၵႃႈဢူႈမႄႈၶဝ်တႄႉမေႃဢုပ်ႇမေႃလၢတ်ႈၼႃႇၽႅဝ်လႃႈ။
ၶၢဝ်းတၢင်းႁႃႈဝၼ်းၵေႃႈ ပူၼ်ႉလိူဝ်ၶၢဝ်းယၢမ်းၼႃႇၽႅဝ်ယဝ်ႉလႄႈ မေႃၼၼ်ႉၵေႃႈဢမ်ႇမီးလွင်ႈမႆႈၸႂ်ယဝ်ႉသေ လၢတ်ႈႁႂ်ႈၶဝ်ပွႆႇၶႃႈမိူဝ်းၵႂႃႇယူႇ။ ပဵၼ်ပွၵ်ႈဢွၼ်တၢင်းသုတ်းဢၼ်မၼ်းလၢတ်ႈတေႃႇၶႃႈ
“ပေႃးၼၼ်ၵေႃႈ ယူႇၵိၼ်ၶဝ်ႈၶမ်ႈၵုမ်းၵၼ်ယဝ်ႉၸွင်ႇၵွႆႈမိူဝ်းၶႃႈလႄႈ တေလၢတ်ႈႁႂ်ႈၶဝ်မိူဝ်းသူင်ႇၵူၺ်း”
“လႆႈဢေႃႈ ဢမ်ႇဢဝ်ၵႃးလူင်ၶႃႈၼ လူတ်ႉၶိူင်ႈၵူၺ်းၵေႃႈလႆႈယဝ်ႉၶႃႈ”
“ပဵၼ်သင်ၶႃႈ”
“ၵူဝ်ဢႃႇယုပွတ်းဢေႃႈ”
ၵူၼ်းၵေႃႉၼၼ်ႉၵေႃႈယုမ်ႉဢွၵ်ႇမႃးယဝ်ႉ။
ၼင်ႇႁူဝ်ၶမ်ႈမႃး မႄႈၶဝ်ၵေႃႈႁဵတ်းၶဝ်ႈၽၵ်းႁၢင်ႈလီႁၢင်ႈဝၢၼ် သမ်ႉပေႃးတဵမ်ၽိူၼ်ၵိၼ်ၶဝ်ႈဝႆႉယူႇ။ ၵိၼ်ၶဝ်ႈယူႇလီလီ
“မေႃယႃတႄႇၼႃႈႁိူၼ်းယဝ်ႉၶႃႈႁ”
“ပႆႇတႄႇၶႃႈ”
“ဢသၢၵ်ႈၵႃႈႁိုဝ်ယဝ်ႉၶႃႈၼႆႉ”
“သၢဝ်းပႅတ်ႇဢေႃႈ”
“ၸၢႆးႁဝ်းၵေႃႈ 36 ယဝ်ႉၵဝ်ႇဝႃႈ မၼ်းသဵတ်ႈၼႃႇ ဢမ်ႇႁူႉတေႁဵတ်းႁိုဝ်ႁႃပၼ်ၼၼ်ႉ ပေႃးသူၼ်ၸႂ်ၵေႃႈမႃးဢဝ်မိူဝ်းသေလႄႈၼႃႈ”
“ၵဵင်ၸႂ်ၼႃႇၶႃႈမႄႈပႃႈ ၶႃႈၵေႃႈသဵတ်ႈမိူၼ်ၵၼ်ၵွၼ်ႇဢေႃႈ”
“မႄႈတႄႉၵျိူၵ်ႈမေႃယႃၼႆႉၵူၺ်းယဝ်ႉ” ယၵ်ႉတူၺ်းၼႃႈလုၵ်ႈၸၢႆးမၼ်းယူႇ။
ၸိုဝ်ႈမၼ်းတႄႉဝႃႈ ဢွၼ်ၶိူဝ်းၼႆဝႃႇ၊ လုၵ်ႈၼွင်ႉမၼ်းတႄႉႁၢမ်ႈဢမ်ႇပၼ်ၶႃႈလၢတ်ႈထိုင်ၸိုဝ်ႈမၼ်းလႄႈ ဢမ်ႇပၼ်ၽႂ်ႁူႉၸွမ်း။ မိူဝ်းၵႂႃႇတီႈႁူင်းယႃ မေႃယႃဢၼ်ပႂ်ႉၸွမ်းၶႃႈၶမ်ႈၼၼ်ႉၵေႃႈ လႆႈၶၢႆႉၵၢၼ်ၵၼ်ၵႂႃႇၵေႃႉတီႈၵေႃႉတၢင်းယဝ်ႉ။ မေႃယႃၵမ်ၽွင်ႈၵေႃႈဝႃႈႁင်းၶႃႈ ဝႃႈၶႃႈၸႂ်ႉသဵၼ်ႈၸႂ်ႉသၢႆသေ ႁႂ်ႈၶဝ်ဢွၵ်ႇၵႂႃႇၼႆယူႇ။
ယူႇယူႇၵေႃႈ မေႃယႃလူင်ႁွင်ႉထူပ်းသေ ႁႂ်ႈၶႃႈလိုဝ်ႈၵၢၼ်ဝႆႉလႄႈ ပႂ်ႉႁဵတ်းၵၢၼ်မိူဝ်ႈပိူၼ်ႈလူဝ်ႇ မိူဝ်ႈပိူၼ်ႈမႃးႁွင်ႉၵူၺ်းၼႆသေ ၶႃႈၵၼ်ႉၸူမ်း။ ၵူၺ်းၵႃႈ ၶႂ်ႈၼႃႇလိူဝ်ၵႂႃႇႁဵတ်းၵၢၼ်တီႈႁူင်းယႃယဝ်ႉ။ ၸုမ်းမေႃၼၼ်ႉၶဝ်ယဝ်ႉ ၵႆႉမႃးႁွင်ႉၼႃႇ ၵမ်ႉႁွင်ႉမိူဝ်းတီႈႁိူၼ်းမေႃၼၼ်ႉႁေ ၵမ်ႉႁွင်ႉၵႂႃႇတီႈဝၢၼ်ႈႁေ ၵမ်ႉႁွင်ႉၵႂႃႇတီႈပၢင်ၶဝ်ႁေ သမ်ႉပေႃးဢမ်ႇမီးဝၼ်းလိုဝ်ႈယဝ်ႉ။
ၶမ်ႈၼိုင်ႈမိူဝ်ႈၽွင်းဢၢႆႈၸၢႆးတိုၵ်ႉႁႆႈယဝ်ႉသေ တေၼွၼ်းလီလီယူႇၼႆၵေႃႈ သဵင်ဢၼ်လိုၼ်ႈႁူ
“မေႃယႃ!!..မေႃယႃ..”
ၶႃႈၵေႃႈလုၵ်ႉမႃးတူၺ်း ႁၼ်ပီႈၼႃႈတူႇလႄႈ
“တေဢမ်ႇပၼ်ၵၼ်လႆႈလပ်းလႆႈၼွၼ်းယဝ်ႉႁၼႆႉမႃႈ ၵမ်ႉလုၵ်ႈဢွၼ်ႇဝႃႇ ၵမ်ႉၵူၼ်းလူင်ဝႃႇ ဢမ်ႇမီးၵၢၼ်ႁင်ႁ ႁွင်ႉၵၼ်တိၵ်းတိၵ်း”
“မႃးၸွမ်းႁဝ်းၽွင်ႈၶႃႈ မီးၵၢၼ်လွင်ႈယႂ်ႇ”
ၶႃႈၵေႃႈသုပ်းသိူဝ်ႈသွၼ်ႉသေ ၶဝ်ၵေႃႈမႃးယိပ်းဢဝ်တိူၵ်ႈယႃၶႃႈၵႂႃႇၸွမ်းၶဝ်ယဝ်ႉ။
“ၽႂ်ပဵၼ်ႁင်ထႅင်ႈယဝ်ႉလႃႇ မေႃၼၼ်ႉႁ”
မၢၵ်ႇတႃလူင်မၼ်းၼၼ်ႉၵေႃႈတူၺ်းပေႃးတၢၼ်ႇတေၵိၼ်ၼိူဝ်ႉၶႃႈယဝ်ႉ ႁွင်ႉႁူဝ်ၼႃႈၶဝ်ဝႃႈမေႃၼၼ်ႉၼႆၵူၺ်းၵေႃႈ။
“ဢမ်ႇပၼ်ႁႂ်ႈလၢတ်ႈထိုင်ၸိုဝ်ႈၶဝ်ၵေႃႈ ၵႃႈလႆႈႁွင်ႉမေႃၼၼ်ႉၼႆၵူၺ်းဢိူဝ်ႈလေႃႇ”
“ဢမ်ႇၸႂ်ႈ”
“ပီႈၼႃႈတူႇ ၸိုဝ်ႈႁွင်ႉသင်လႃႇ ပေႃးဢမ်ႇၶႂ်ႈၵၼ်ႁွင်ႉပီႈၼႃႈတူႇၵေႃႈ”
“ၸၢႆးပၢင်ႇ”
“ဢေႃ..ၸၢႆးပၢင်ႇ”
“ၸၢႆးပၢင်ႇတေဢဝ်ႁဝ်းၵႂႃႇတၢင်းလႂ်ထႅင်ႈယဝ်ႉပွၵ်ႈၼႆႉ”
“ပေႃးႁွတ်ႈၵေႃႈတေႁူႉၵူၺ်း”
မၼ်းၵေႃႈႁေႃႈၵႃးၶဝ်ႈၵႂႃႇၼႂ်းထိူၼ်ႇ ဢၼ်ဢမ်ႇႁူႉဝႃႈပဵၼ်တီႈလႂ် ႁူႉဝႃႈမၼ်းပဵၼ်ထိူၼ်ႇၵူၺ်း ၵွႆႈၵႂႃႇၵွႆႈၸႂ်ႁၢႆတိၵ်းတိၵ်းယဝ်ႉ၊ ၵွႆႈၵႂႃႇၵွႆႈယိၼ်းသဵင်မၢၵ်ႇသဵင်ၵွင်ႈလင်မႃး ၸႂ်ၵေႃႈဢမ်ႇလီယဝ်ႉလႄႈ
“တေပႃးၵၼ်မႃးတၢႆႁၼႆႉ”
“ဢမ်ႇပၼ်ႁႂ်ႈသူတၢႆလႆႈလေႃႇ သဵင်မၼ်းမေႃးမွၵ်ႈၼႆႉ တိုၵ်ႉၵႆယူႇ”
“ပေႃးၵႂႃႇထႅင်ႈၵေႃႈၸမ်ယူႇဢိူဝ်ႈလေႃႇ”
တႄႇၸဵမ်မိူဝ်ႈၸွႆႈသၢႆၸႂ်မေႃၼၼ်ႉမႃး ၸၢတ်ႈပၢၼ်ၶႃႈၵေႃႈ ဢမ်ႇလႆႈထူပ်းလွင်ႈယဵၼ်ႁူယဵၼ်ၸႂ်သေပွၵ်ႈ ပေႃးလူဝ်ႇမိူဝ်ႈလႂ်ၵေႃႈႁွင်ႉတႃႇသေႇ ၶႃႈႁဵတ်းၵၢၼ်တီႈႁူင်းယႃဝႃႈၼၵ်းၼႃၼႃႇယဝ်ႉ မႃးႁူႉၸၵ်းၸုမ်းၶဝ်ၼႆႉၶႅၼ်းၼႃႇလိူဝ်ၵဝ်ႇထႅင်ႈ ၶၢဝ်းၼွၼ်းဢမ်ႇလႆႈၼွၼ်း ဢမ်ႇၵႂႃႇဢမ်ႇလႆႈ ဢမ်ႇႁဵတ်းဢမ်ႇလႆႈ သင်ႁူႉၼၼ် ပွႆႇႁႂ်ႈမေႃၼၼ်ႉတၢႆႁေယဝ်ႉလႃႈဝၼ်းၼၼ်ႉ။
ပေႃးဝႃႈႁၼ်ၵူၼ်းပဵၼ်မႃးၼႆၵေႃႈသမ်ႉ ဢမ်ႇတၼ်းဝူၼ်ႉသင် ႁူႉဝႃႈလူဝ်ႇၸွႆႈၵူၺ်း ၼင်ႇႁိုဝ်ၵူၼ်းမၢတ်ႇၸဵပ်းလႆႈၸဵပ်းဢေႇလူင်း ၵူၼ်းတၢႆ တၢႆယွမ်းလူင်း။ မိူဝ်ႈႁွတ်ႈထိုင်ယဝ်ႉ ၶႃႈၵေႃႈလႆႈႁူႉဝႃႈ ၶႃႈမႃးမီးယူႇၼႂ်းၼႃႈသိုၵ်းယဝ်ႉလႄႈ မီးၵူၼ်းသိုၵ်းလႆႈမၢတ်ႇၸဵပ်းၶဝ်ႈမႃးၼႂ်းသုမ်ႉတွပ်းဢွၼ်ႇၼၼ်ႉ ၵေႃႉယဝ်ႉၵေႃႉ၊ မၢင်ၵေႃႉၵေႃႈလႆႈႁၢမ်မႃး မၢင်ၵေႃႉႁၼ်ယူႇၵေႃႈဢမ်ႇၸၢင်ႈၸွႆႈသင်လႆႈ ၵႃႈလႆႈပွႆႇႁႂ်ႈလူမ်းထူၺ်ႈၸႂ်ၼၼ်ႉသဵင်ႈသုတ်းၵႂႃႇၵူၺ်း။ မၢင်ၵေႃႉတၢၼ်ႇယႃလႆႈၶိုတ်းတၼ်းၼႆၵေႃႈ သူင်ႇၵႂႃႇႁူင်းယႃၵေႃႈမီးယဝ်ႉ။
ၶမ်ႈၼၼ်ႉ တင်းၶိုၼ်း သဵင်ၵွင်ႈယဵၼ်ယဝ်ႉသေတႃႉ သဵင်တွတ်ႇတဵၼ်ႈႁူဝ်ၸႂ် ဢၼ်ယွၼ်းသိုပ်ႇသၢႆၸႂ်ယူႇၼၼ်ႉ ၼင်ႇႁၢင်ႈလင်ၵွင်ႈမေႃးယူႇၼႂ်းႁူဝ်ၸႂ်ၼႆႉ ဢမ်ႇတၼ်းလႆႈတူၺ်းၼႃႈၾႃႉၼႃႈမိူင်း ၶႃႈလႄႈတင်းမေႃယႃတီႈၶဝ်ၼၼ်ႉၵေႃႈ ၸွႆႈၵၼ်မိူင်းသမ်ႉပေႃးပၢင်ႇသိူင်ႁိုင်ယဝ်ႉၼႃႇ။
ၵေႃႉဢၼ်လူႉသဵင်ႈသၢႆၸႂ်ၵႂႃႇၼၼ်ႉၵေႃႈ လႆႈၸုတ်ႇၽဝ်ပူၼ်ႉပႅတ်ႈၵႂႃႇယူႇၼႂ်းၵၢင်ပၢင်ႇၵႂၢင်ႈၼၼ်ႉယဝ်ႉ။
သမ်ႉဝႃႈၵႆႉႁၼ်ၵူၼ်းတၢႆၼႃႇသေတႃႉၵေႃႈ ပွၵ်ႈၼႆႉပေႉၵႅၼ်ႇဢိုၵ်ႉၼိုၵ်ႉထိုင်ၸႂ်ၼႃႇ၊ ၶႃႈတိူဝ်ႉၸႂ်တေႉယဝ်ႉဢၼ်ၶႃႈၸွႆႈသၢႆၸႂ်ၶဝ်ဢမ်ႇလႆႈ ၵူၺ်းၵႃႈ မၼ်းတေလီၵႃႈႁိုဝ်သင်ပၢင်တိုၵ်းၼၼ်ႉမၼ်းဢမ်ႇၵိူတ်ႇမႃး၊ ပေႃႈမႄႈပီႈၼွင်ႉၶဝ်လူးတေတိူဝ်ႉၸႂ်တၢၼ်ႇႁိုဝ် တေႃႈၼင်ႇၵမ်းလိုၼ်းသုတ်းလုၵ်ႈၸၢႆးၶဝ်ၵူၺ်းတင်းဢမ်ႇလႆႈႁၼ်။
မေႃယႃယူတ်းယႃၵူၼ်းလႆႈၵူၺ်း ႁၢမ်ႈယႃႇႁႂ်ႈၵူၼ်းတၢႆတင်းဢမ်ႇလႆႈလူး၊ ၵူၼ်းႁဵတ်းၵၢၼ်မိူင်းၶဝ် ၵူၼ်းႁဵတ်းၵၢၼ်သိုၵ်းၶဝ်ၼၼ်ႉတႄႉ ႁဵတ်းႁႂ်ႈဢမ်ႇမီးၵူၼ်းမၢတ်ႇၸဵပ်းလူႉတၢႆ ဢမ်ႇမီးပၢင်တိုၵ်းၸိူင်ႉၼႆလႆႈယဝ်ႉ၊ ၸွင်ႇသမ်ႉတေမီးႁိုဝ် ၵူၼ်းၵေႃႉဢၼ်ႁဵတ်းႁႂ်ႈဝၢၼ်ႈမိူင်းႁဝ်း ႁၢမ်းလွင်ႈပၢင်တိုၵ်းၸိူင်ႉၼႆလႆႈ၊ ၵူၼ်းသိုၵ်းႁိုဝ်ၵူၼ်းမိူင်းႁိုဝ် ၽူႈၶဵၼ်ႁိုဝ် ၼႂ်းၵၢင်ၸႂ်မေႃယႃၵေႃႉၼိုင်ႈတႄႉ ဢမ်ႇဝႃႈၽၢႆႇလႂ်မၢတ်ႇၸဵပ်းၵေႃႈ ပဵၼ်ၵူၼ်းပဵၼ်မိူၼ်ၵၼ်မူတ်းယဝ်ႉ။
မိူဝ်ႈၶႃႈၼင်ႈသေမိူၼ်ႇယူႇၼၼ်ႉ မေႃၼၼ်ႉၵေႃႈဢဝ်ၽႅၼ်ႇၸဵတ်ႉဢွၼ်ႇဢၼ်ၼိုင်ႈ
ယိုၼ်ႈပၼ်ၶႃႈသေ
“ဢမ်ႇႁူႉတေလႆႈလၢတ်ႈ ယွမ်းၼွမ်းႁ တေလႆႈယိၼ်းၸူမ်းသူလီႁိုဝ်”
“တဵၵ်းတဵင်ၵၼ်မႃး တီႈဢၼ်မီးၽေးၶဵၼ်ၸိူင်ႉၼႆ ႁဝ်းၵေႃႈယိၼ်းလီမႃးၼႃႇၶႃႈ”
“ႁဝ်းဢမ်ႇပၼ်ႁႂ်ႈသူပဵၼ်သင်ငၢႆႈငၢႆႈၶႃႈ”
“ႁဵတ်းႁိုဝ်ႁူႉဝႃႈႁဝ်းဢမ်ႇပဵၼ် မိူဝ်လဵဝ်ၵေႃႈပဵၼ်ယူႇၼႆႉ”
“ယွမ်းၼွမ်းသူတေႉဢိူဝ်ႈၼႃႈ ႁဝ်းၵေႃႈဢမ်ႇႁူႉဝႃႈတေလႆႈၵႂႃႇပိုင်ႈဢိင်ၽႂ်လိူဝ်သေသူ”
“မေႃယႃလူင်ႁဝ်းၵေႃႈမီးယူႇလူး မိူဝ်ႈဢွၼ်တၢင်းၵေႃႈႁွင်ႉမႃးယူႇဢမ်ႇႁိုဝ်လႃႇ”
“မၼ်းဝႃႈဝႆႉ ပေႃးလူဝ်ႇႁႂ်ႈႁွင်ႉသူမႃးၼႆဢိူဝ်ႈ”
“လုင်းမေႃယႃလူင်ၼႆႉၵေႃႈ..”
“သူလႆႈၵိၼ်သင်ယဝ်ႉလႃႇ ႁိူဝ်ႉမႃးတင်းၶိုၼ်းယဝ်ႉ”
“ႁဝ်းၶႂ်ႈၼွၼ်းၵူၺ်းယဝ်ႉ”
“ၵႂႃႇၼွၼ်းတီႈၼွၼ်းႁဝ်းလႆႈယူႇၼႃႈ”
“ပေႃးၼွၼ်းသေ ယူႇယူႇ…”
မေႃၼၼ်ႉၵေႃႈ ဢဝ်မိုဝ်းမႃးႁႄႉသူပ်းၶႃႈသေ မိူၼ်တေႁၢမ်ႈယႃႇႁႂ်ႈၶႃႈလၢတ်ႈသင်ၼၼ်ႉယဝ်ႉ။
“ဢမ်ႇပဵၼ်သင်လေႃႇၼႃႈ တမ်းၸႂ်လႆႈယူႇၵူၺ်း”
ယၢမ်းၼၼ်ႉ သဵင်မၢၵ်ႇတႅၵ်ႇလင်ပၼ်းဢူၼ် ၶႃႈတူၵ်းၸႂ်သမ်ႉပေႃးၵျွၵ်းၵွပ်ႈသႂ်ႇပၼ်မၼ်းၵႂႃႇယဝ်ႉ။ ႁူႉတူဝ်ၸင်ႇတေပွႆႇတူဝ်ဢွၵ်ႇႁၢင်ႇသေ
“ႁဵတ်းႁိုဝ်လႄႈဝႃႈဢမ်ႇပဵၼ်သင် ပၼ်ႁဝ်းမိူဝ်းၵႂႃႇလႄႈၼႃႈ”
“ႁဝ်းဝႃႈတႄႉ သူမိူဝ်းဢမ်ႇလႆႈယဝ်ႉ”
“ႁဵတ်းသင် လႄႈ မိူဝ်းဢမ်ႇလႆႈ”
“တၢင်းဢၼ်သူမႃးၼၼ်ႉ မီးပၢင်တိုၵ်းဝႆႉယူႇ”
“ၵူၼ်းပဵၼ်ဢၼ်ဢဝ်မိူဝ်းဝဵင်းၼၼ်ႉလူး”
“တၼ်းပူၼ်ႉယူႇ..”
ၶႃႈၵႂႃႇၸုၵ်းၽၢႆႇၼႃႈမၼ်းသေ မၼ်းၵေႃႈဢမ်ႇတူၺ်းၶႃႈလႄႈ
“သူလႅၼ်ႁဝ်းယူႇ..”
“ႁဝ်းတေလႅၼ်သူႁဵတ်းသင်..”
“တူၺ်းၼႃႈႁဝ်းႁေလၢတ်ႈလႄႈ..တၢင်းႁဝ်းမႃးၼၼ်ႉ ၵႆၵၼ်တင်းပၢင်တိုၵ်းလႄႈ ပဵၼ်ၽင်ႇသူၵူၺ်း ဢမ်ႇၸမ်ၵၼ်တင်းၽၢႆႇပုၼ်ႉသေဢိတ်းလႃႈ”
မၼ်းၵေႃႈသုတ်ႉမႃးၸမ်ၶႃႈ ထိုင်တီႈတူဝ်ၶႃႈသမ်ႉပေႃးလႆႈသုတ်ႉႁူၼ်ၵႂႃႇယဝ်ႉ။
“သူႁဵတ်းႁိုဝ်ႁူႉ ယိင်ႈႁူႉၼမ်ယိင်ႈဢွၵ်ႇတီႈၼႆႈဢမ်ႇလႆႈၼၼ်ႉယဝ်ႉ”
ၶႃႈၵေႃႈ သိုပ်ႇယိုၼ်ႈၼႃႈယဵတ်ႇတူဝ်ယဵပ်ႇၵႂႃႇတၢင်းၼႃႈ ဢဝ်မၼ်းသုတ်ႉၵႂႃႇတၢင်းလင်ၶိုၼ်းယၢင်ႈၼိုင်ႈလႄႈ
“ပေႃးထၢၼ်ႈဝႃႈဢမ်ႇဝႆႉၸႂ်ၵၼ် တေႁွင်ႉမႃးႁဵတ်းႁင်ၸဵမ်မိူဝ်ႈတႄႇမၼ်း၊ သူၵေႃႈထုၵ်ႇလီႁူႉဝႃႈႁဝ်းဢမ်ႇၵျိူၵ်ႈသူၼႆ ဢမ်ႇဝူၼ်ႉဝႃႈႁဝ်းတေဢဝ်ၶေႃႈမုၼ်းၵႂႃႇပၼ်ၽူႈၶဵၼ်သူၽွင်ႈၼႄႇ”
“လၢတ်ႈၸိူင်ႉၼႆတင်းပႆႇၶႂ်ႈမိူဝ်းၸွင်ႇၸႂ်ႈ”
မၼ်းၵေႃႈယုမ်ႉယုမ်ႉသေ ပႆၵႂႃႇၸူးလုၵ်ႈၼွင်ႉမၼ်းၼၼ်ႉယဝ်ႉ။ ဝူၼ်ႉၵႂႃႇဝူၼ်ႉမႃး ၶႃႈႁမ်ႉတေလၢတ်ႈႁဵတ်းႁင် သင်ႁဵတ်းၵႅင်ႈဢမ်ႇႁူႉႁေတိုဝ်တၼ်မိူဝ်းၵႂႃႇ ပေႃးလႆႈမိူဝ်းယဝ်ႉ၊ ႁူႉၼႃႇၵေႃႈဢမ်ႇလီတေႉ။
