ၶႃႈတႄႉႁဵတ်းၵၢၼ်မေႃယႃယဝ်ႉ ပေႃးဝႃႈၶဝ်ႈႁူင်းယႃၵႂႃႇယဝ်ႉၼႆတႄႉ ယႃႇထၢမ်ၶိူဝ်းလႆႈလိုဝ်ႈလႃႈ ယဝ်ႉၵေႃႈ ၵူၼ်းမၢတ်ႇၸဵပ်း ၵူၼ်းတိူဝ်ႉမၢၵ်ႇၵွင်ႈ ၵူၼ်းၺႃးမၢၵ်ႇၸိူဝ်းၼႆႉ ၼမ်ၼႃႇပေႃးတၢၼ်ႇဝႃႈပဵၼ်ႁူင်းယႃသိုၵ်းယဝ်ႉ။
ယၢမ်းၵၢင်ၶမ်ႈ ၶႃႈသမ်ႉလႆႈပႂ်ႉႁူင်းယႃလႄႈ မီးၵူၼ်းမၢတ်ႇၸဵပ်းႁွတ်ႈမႃး သမ်ႉမီးၵူၼ်းပူၵ်ႉၼႃႈပူၵ်ႉတႃ ယိပ်းၵွင်ႈပႃးၵွင်ႈသေဢဝ်ႁူမ်ႇလူမ်ႈပၼ်တၢင်းၼႃႈတၢင်းလင် ၵူၼ်းၵေႃႉၼၼ်ႉတႄႉ ၼွၼ်းဢမ်ႇတူင်ႉလႆႈသေဢိတ်း ပေႃးပဵၼ်လိူတ်ႈပဵၼ်ယၢင်ယူႇသဵင်ႈယဝ်ႉ။
မိူဝ်ႈပဵၼ်ၼၼ် မေႃယႃၼႂ်းႁူင်းယႃၵေႃႈ ဢွၼ်ၵၼ်တိုၼ်ႇၵူဝ်ၵႂႃႇမူတ်းယဝ်ႉ။ ၶႃႈတႄႉၵေႃႈ တိုၵ်ႉၽႃႇတတ်းယဝ်ႉသေဢွၵ်ႇႁွင်ႈၽႃႇတတ်းမႃးၵူၺ်း သမ်ႉမႃးသိူၵ်ႈသႂ်ႇၶဝ်ၸိူဝ်းၼၼ်ႉလႄႈ ၶဝ်ၵေႃႈငႃၵွင်ႈသႂ်ႇၶႃႈ ဢဝ်ၶႃႈသမ်ႉပေႃးယုၵ်ႉမိုဝ်းၶိုၼ်ႈဢမ်ႇ
တၼ်းၾၢင်ႉတူဝ်ယဝ်ႉ။
“သူပဵၼ်ပဵၼ်မေႃယႃလူင်ႁ”
ၶႃႈဢဝ်မိုဝ်းလူင်းယဝ်ႉ တူၺ်းတီႈၵူၼ်းပဵၼ်သေ
“ၶဝ်ပဵၼ်ႁင်မႃး!..” ၶႃႈၵေႃႈၶဝ်ႈၵႂႃႇတူၺ်းၵူၼ်းပဵၼ် ပေႃးဢမ်ႇၼႅတ်ႈယူတ်းယႃၶိုတ်းတၼ်းတႄႉ ၶဝ်လႅပ်ႈတေဢမ်ႇလွတ်ႈယဝ်ႉ။
“ပေႃးသူဢမ်ႇၸႂ်ႈမေႃယႃလူင်ၵေႃႈဢွၵ်ႇၵႂႃႇလႄႈ”
“မေႃယႃလူင်ဢမ်ႇယူႇ တေႃႇပႂ်ႉမေႃယႃလူင်မႃးထိုင်ၵေႃႈ ၶဝ်တေဢမ်ႇယူႇထိုင်မွၵ်ႈၼၼ်ႉလႆႈ တေပႂ်ႉမေႃယႃလူင်ႁႃႉ တေပွႆႇႁႂ်ႈၶဝ်တၢႆ!”
ၵွင်ႈၶဝ်ၼၼ်ႉၵေႃႈတင်းတိုၵ်ႉငႃသႂ်ႇၶႃႈယူႇ
“ပေႃးၶဝ်တၢႆ! သူၵေႃႈတေလႆႈတၢႆၸွမ်းၼၼ်ႉယဝ်ႉ”
ၶႃႈၵေႃႈၼႅတ်ႈလၢတ်ႈႁႂ်ႈမေႃယႃဢွၼ်ႇၶဝ် မႃးၸွႆႈဢဝ်ၵႂႃႇႁွင်ႈၽႃႇတတ်းၵမ်းလဵဝ်ယဝ်ႉ၊ မိူၼ်ဝႃႈမေႃယႃလူင်တေပဵၼ်မေႃယႃၸမ်တူဝ်ၵူၼ်းၵေႃႉၼႆႉႁိုဝ် ႁႂ်ႈမေႃယႃဢွၼ်ႇၶဝ်ၵပ်းသိုပ်ႇတီႈမေႃယႃလူင်သေ မေႃယႃလူင်ၵေႃႈဢမ်ႇလၢတ်ႈၼႄလွင်ႈၵူၼ်းပဵၼ်သင် ပၼ်ၶႂၢင်ႉႁႂ်ႈၶႃႈၽႃႇတတ်းပၼ်ၵမ်းလဵဝ်ၼႆၵူၺ်း မိူဝ်ႈၼၼ်ႉႁူႉဝႃႈလူဝ်ႇၸွႆႈၵူၼ်းပဵၼ်ၼႆၵူၺ်းလႄႈ ၶႃႈပေႃးလိုမ်းၵွၼ်ႇယဝ်ႉဝႃႈ ၶႃႈၸွင်ႇတေမီးသၢႆၸႂ်လွတ်ႈယူႇႁိုဝ်ၼႆ။
ၽႃႇတတ်းယဝ်ႉဢမ်ႇယဝ်ႉ ၶဝ်ၵေႃႈဢမ်ႇပၼ်ၶႃႈဢွၵ်ႇႁွင်ႈ ႁႂ်ႈပႂ်ႉမၼ်းႁူႉတူဝ်ၸင်ႇတေဢွၵ်ႇလႆႈၼႆဝႃႇ ဢဝ်ၵွင်ႈပွတ်းဢၼ်သိူင်ႇၼႂ်းသိူဝ်ႈၶဝ်ၼၼ်ႉၼႄၶႃႈၵႂႃႇယဝ်ႉ သိူဝ်ႈၶူဝ်းၶဝ်ၵေႃႈလၢႆႈပဵၼ်ၶူဝ်းၵူၼ်းမိူင်းၵႂႃႇသေ ၵေႃႉၼိုင်ႈၼင်ႈပႂ်ႉယူႇၽၢႆႇၼႂ်းႁွင်ႈ၊ ထႅင်ႈၵေႃႉၼင်ႈပွမ်တူဝ်လဵၼ်ႈပႂ်ႉယူႇၼွၵ်ႈႁွင်ႈ။ ၶႃႈဝႃႈ ဝၢၼ်ႈမိူင်းႁဝ်းၼႆႉ ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈသေဢိတ်း ၶႃႈထုၵ်ႇသိုၵ်းတဵၵ်းတဵင်ယူႇၸွင်ႇၸႂ်ႈႁိုဝ်။
မၼ်းၵႃႈၶႂ်ႈပဵၼ်ၵူၼ်းလူင်ယဝ်ႉ ပွႆႇမၼ်းႁူႉတူဝ်မႃးၵွၼ်ႇ ၶႃႈတေလႃႇပၼ်ႁႂ်ႈမၼ်းယႃႇၸၢင်ႈတၵ်းသဵင်လႆႈလူး။
တေဝႃႈႁိုဝ်ၵေႃႈ ၶႃႈၶိုၼ်ႈၸိုဝ်ႈပဵၼ်မေႃယႃၶီႈလႃႇၼႂ်းႁူင်းယႃယဝ်ႉ၊ တၢၼ်ႇတၢၼ်ႇၵူၼ်းပဵၼ်ပေႃးမႃးႁႃၶႃႈၼႆ ႁၢႆၵႂႃႇၵေႃႉလႂ်ၵေႃႉၼၼ်ႉ၊ တၢင်းပဵၼ်တႄႉႁၢႆဢမ်ႇႁၢႆဢမ်ႇႁူႉ ၵူၼ်းတႄႉႁၢႆၵႂႃႇတေႉ။ ပေႃးပဵၼ်ၵူၼ်းပဵၼ်ၸမ်ပဵၼ်တႄႉ မၢင်ပွၵ်ႈၵေႃႈမိူဝ်းႁွတ်ႈထိုင်ႁိူၼ်းသေ မၢင်ၵေႃႉၵေႃႈဝႃႈ ပေႃးႁၼ်ၼႃႈၶႃႈယဝ်ႉ သမ်ႉပေႃးဢမ်ႇႁတ်းပဵၼ်ႁင်ယဝ်ႉၼႆဝႃႇ။
ၶႃႈၵေႃႈဢမ်ႇၸၢင်ႈႁဵတ်းသင် တင်းဢမ်ႇလႆႈၼွၼ်းသေ ႁႃတီႈၼွၼ်းလီလီယဝ်ႉ ၼွၼ်းပႂ်ႉၵႂႃႇၸွမ်းမၼ်းၼၼ်ႉၵူၺ်းယဝ်ႉၼႃႇ။
ၸိုဝ်ႈမၼ်းၵေႃႈဢမ်ႇႁူႉၸၵ်း ပိုၼ်းတူဝ်ၵၢၼ်ယူတ်းယႃၵေႃႈဢမ်ႇမီး ၵူၺ်းႁူႉဝႃႈတေလႆႈယူတ်းယႃၸိူင်ႉႁိုဝ် ၼင်ႇၶေႃႈမုၼ်းဢၼ်မေႃယႃလူင်လၢတ်ႈၼႄၼၼ်ႉၵူၺ်း။
ၸွမ်းတူဝ်မၼ်းတႄႉပဵၼ်ႁွႆးမၢၵ်ႇၵွင်ႈယူႇသဵင်ႈ ၵွပ်ႈၼၼ်လႄႈၵူဝ်ပိူၼ်ႈႁူႉယူဝ်ႉ လႂ်ဝႃႈလူဝ်ႇမေႃယႃလူင်ၼႆ ပေႃးထၢၼ်ႈဝႃႈၵူဝ်ပိူၼ်ႈႁူႉႁမ်ႉ တေဢဝ်ႁူမ်ႇလူမ်ႈသေမႃးႁူင်းယႃႁဵတ်းႁင် သိုၵ်းၼႆႉၵေႃႈသုၵ်ႉသၵ်ႉၼႃႇ ပၼ်တၢင်းမႆႈပိူၼ်ႈၼႆၵေႃႈမေႃၼႃႇ။
သိုၵ်းဢဝ်ႁူမ်ႇလူမ်ႈၵူၼ်းမိူင်းၼႆၼၼ်ႉ ၶႃႈတင်းဢမ်ႇပေႃးလႃႈလီႈႁၼ်လႃႈ ပေႃးၵူၼ်းမိူင်းႁၼ်ၶဝ် သမ်ႉပေႃးလႆႈၵူဝ်ၶဝ် ဢၢၼ်းၼႃႇၶဝ် ယွမ်းပၼ်ၶဝ်ယူႇယဝ်ႉ၊ ပေႃးၶဝ်မႃးလိုဝ်ႈမႃးထင်ၸွမ်း
ဝၢၼ်ႈၸွမ်းသူၼ်ၵေႃႈ သမ်ႉပေႃးလႄႇလႆႈႁႃၶဝ်ႈႁႃၼမ်ႉပၼ်ယဝ်ႉ ၶဝ်တႄႉတေဝႃႈပိူၼ်ႈၸူမ်းႁပ်ႉတွၼ်ႈၶဝ် မိူဝ်ႈတႄႉၸႂ်ႈယူႇ ၵူၺ်းၵႃႈ ပေႃးၵႆႉမႃးၼႃႇၽႅဝ်ၵေႃႈ ပိူၼ်ႈၵိၼ်းၸႂ်ယူႇၼႆ။
မိူဝ်ႈတိုၵ်ႉလပ်းဝၢၼ်ယူႇၼၼ်ႉ ဢေးၸိင်ႇသိုပ်ႇၾူၼ်းမႃး ၶႃႈၵေႃႈယွၼ်းၵႂႃႇဢုပ်ႇၾူၼ်းတၢင်းၼွၵ်ႈႁွင်ႈၼႆသေ မၼ်းၵေႃႈပၼ်ၵႂႃႇလႄႈ ၵိုတ်းၵေႃႉၼိုင်ႈ တိုၵ်ႉၸွမ်းၶႃႈယူႇလႄႈ ၶႃႈၵေႃႈၵႂႃႇတၢင်းႁွင်ႈၼမ်ႉၽူႈယိင်းၼၼ်ႉသေ လၢတ်ႈႁႂ်ႈဢူၺ်းၵေႃႉဢဝ်ၶူဝ်းလၢႆႈမႃးပၼ်ယဝ်ႉ ၶႃႈၸင်ႇတေလွတ်ႈပူၼ်ႉသၢႆတႃမၼ်းလႄႈ လၵ်ႉဢွၵ်ႇမႃးလႆႈယဝ်ႉ။
ၵတ်ႉၵႃႈပဵၼ်ဝၼ်းလိုဝ်ႈၶႃႈလႃႈ မိူၼ်ၶဝ်တေသူင်ႇၵူၼ်းၶဝ်လမ်းႁႃၶႃႈယူႇ ၶႃႈတႄႉၵေႃႈဢမ်ႇႁတ်းဢွၵ်ႇႁိူၼ်းယဝ်ႉလေႃႇ ယူႇၼႂ်းႁိူၼ်းႁေ ႁႂ်ႈဢေးၸိင်ႇလွၵ်ႉပႅတ်ႈၽၵ်းတူယဝ်ႉ။ မၼ်းၵေႃႈယူႇတီႈႁိူၼ်းမၼ်းႁဵတ်းၼၼ် ၶဝ်ၼၼ်ႉတႄႉမိူဝ်းသွၵ်ႈတဝ်ပၼ်ႁိူၼ်းမၼ်းပေႇၸႂ်ၼႃႇယဝ်ႉဢိူဝ်ႈ။
တီႈႁိူၼ်းႁဝ်းၵေႃႈၶဝ်မႃးပၼ်ႇယူႇ လွၵ်ႉၽၵ်းတူဝႆႉလႄႈႁိုဝ်ဢမ်ႇႁူႉ ၶဝ်ၵေႃႈဢမ်ႇၶဝ်ႈႁိူၼ်းသေ
ပၼ်ႇလဵပ်ႈလႄႇၸွမ်းဝၢၼ်ႈၼၼ်ႉယူႇတင်းႁိုင်။
ၶႃႈၼွၼ်းလႆႈတိုၼ်ႇယဝ်ႉၵေႃႈ မီးၵႃးလူင်လမ်းၼိုင်ႈၵိုတ်းယူႇတီႈၼႃႈႁိူၼ်းယဝ်ႉၼႃႇ၊ ၵႃးလမ်းၼၼ်ႉတႄႉ ၶႂ်ႈမိူၼ်ၵႃးဢၼ်တေႃႉၵူၼ်းပဵၼ်လူင်းတီႈႁူင်းယႃၶမ်ႈၼၼ်ႉဝႆႉလႄႈ တေထွႆလင်ၶိုၼ်းၵေႃႈ မႄႈႁဝ်းမႃးမီးယူႇတီႈႁိူၼ်းယဝ်ႉသေ ႁၼ်ၶႃႈယဝ်ႉ။
“ၶမ်းၶွင်ႇ ပိူၼ်ႈမႃးႁႃလုၵ်ႈၼေႈ”
ပီႈၼႃႈတူႇ ၵူၼ်းၵေႃႉဢၼ်ဢဝ်ၵွင်ႈငႃၶႃႈမိူဝ်ႈဝႃးၼၼ်ႉၵေႃႈ ႁွင်ႉၸူးၶႃႈ
“တေႁႂ်ႈမိူဝ်းႁွင်ႉထိုင်ၼႂ်းႁိူၼ်းၶႃႈၼႄႇ”
ၶႃႈၵေႃႈၵႃႈလႆႈၶိုၼ်ႈၵႃးၵႂႃႇၸွမ်းၶဝ်ယဝ်ႉ။ ၶႃႈၸင်ႇတေလႆႈတူၺ်းၾူၼ်း မေႃယႃလူင် ႁႂ်ႈၶႃႈမိူဝ်းတူၺ်းထိုင်ၵူၼ်းပဵၼ်တီႈႁိူၼ်းၼႆဝႃႇ ၵွပ်ႈဝႃႈဢမ်ႇၶႂ်ႈဢဝ်ဝႆႉတီႈႁူင်းယႃၼႆယူႇ။
မေႃယႃမီးတင်းၼမ်တင်းလၢႆ ၵွပ်ႈသင်သမ်ႉပဵၼ်ၶႃႈ၊ မိူၼ်ဝႃႈတေပဵၼ်ႁိူၼ်းဢူႈမႄႈၶဝ်ဢမ်ႇႁူႉ ႁူမ်ႇလူမ်ႈဢၼ်ႁၼ်ပႂ်ႉယူႇပဵၼ်တီႈၼၼ်ႉၵေႃႈ ႁၢႆၵႂႃႇမူတ်းယဝ်ႉ၊ ၵိုတ်းၵႃးဢၼ်မိူဝ်းသူင်ႇၶႃႈလႄႈ ၵူၼ်းႁေႃႈၵႃးပီႈၼႃႈတူႇၼၼ်ႉၵူၺ်း။
