လိၵ်ႈမၢင်ႁူဝ် ၶေႃႈၵႂၢမ်းမၢင်ဢၼ်ၼၼ်ႉ ၸၢင်ႈပၼ်ၽွၼ်းယွၼ်ႈထိုင် ၽႂ်သေၵေႃႉၵေႃႉ မီးႁႅင်းလုၵ်ႉတိုၼ်ႇၶိုၼ်ႈမႃးလႆႈဢေႃႈ။
လိၵ်ႈလၢႆးၼၼ်ႉ ပၼ်ႁႅင်းၸႂ် တွၼ်ႈတႃႇၵေႃႉတူၵ်းသုမ်း၊ ပၼ်တၢင်းမူၼ်ႈသိူဝ်း ပုၼ်ႈတႃႇၵေႃႉၶီငဝ်၊ ပၼ်တၢင်းႁၵ်ႉတၢင်းဢုၼ်ႇၸႂ်လႆႈဢေႃႈ မၼ်းမီးႁူဝ်ၸႂ်ဢေႃႈ ၵွပ်ႈၽူႈတႅမ်ႈလိၵ်ႈၵေႃႈ သႂ်ႇၸႂ်သေတႅမ်ႈၼၼ်ႉယဝ်ႉ။
သင်ဝႃႈ မီးလွင်ႈသုၵ်ႉသၵ်ႉၸႂ်ၼႃႇၼႆ ၸၢမ်းႁဵတ်းၵေႃႉပပ်ႉလိၵ်ႈတူၺ်းၶႃႈလႄႈ ၸၢမ်းယူႇၸွမ်းလိၵ်ႈလၢႆးတူၺ်းၶႃႈလႄႈ တေလႆႈႁူႉၸၵ်း ပပ်ႉလိၵ်ႈဢၼ်မိူၼ် ၵူၼ်းၵေႃႉဢၼ်ႁဵတ်းႁႂ်ႈၵတ်းယဵၼ်ၸႂ်လိူဝ်ပိူၼ်ႈမႃးဢေႃႈ။
ယႃႇၵူဝ်ဝႃႈလိၵ်ႈဢၼ်တႅမ်ႈၼၼ်ႉ တေဢမ်ႇမီးၽႂ်လူ သင်ဢမ်ႇသင်ႁဝ်းၵေႃႉဢွၼ်တၢင်းသုတ်း လူၶိုၼ်းၵေႃႈဢမ်ႇပဵၼ်သင်ၼႃ သင်လႆႈႁပ်ႉတၢင်းႁၼ်ထိုင်ဢၼ်ဢမ်ႇလီမႃးၵေႃႈ ဢမ်ႇၸႂ်ႈလွင်ႈလီၼႅင် သင်ဢမ်ႇသင်ၶဝ်ၵေႃႈ လႆႈလူလိၵ်ႈဢၼ်ႁဝ်းတႅမ်ႈယူႇယဝ်ႉလူး။
ပေႃးၵူၼ်းၵျိူၵ်ႈၵေႃႈတေဝႃႈၶႅမ်ႉယဝ်ႉ ၵူၼ်းဢမ်ႇၵျိူၵ်ႈၵေႃႈ တေဝႃႈဢမ်ႇၶႅမ်ႉ မၼ်းပဵၼ်ၾိင်ႈၶူင်းၵၢင်ယဝ်ႉ တေၵႂႃႇၸွမ်းၸႂ်ပိူၼ်ႈၵေႃႈ တူဝ်ႁဝ်းဢမ်ႇပဵၼ်လႆႈ တၢင်းႁၼ်ထိုင်ၼၼ်ႉ ဝူၼ်ႉထတ်းသၢင်တူၺ်းလီလီသေ မႃးဝူၼ်ႉမႄးၶိုၼ်းၵေႃႈတေႃႈတေတိူဝ်းၽိူမ်ႉၼမ်ႉၵတ်ႉႁဝ်းမႃးယဝ်ႉ။
ဢမ်ႇၸႂ်ႈၵၢပ်ႈပၢၼ်ၵူၼ်းသူင်ၵျိူၵ်ႈလူလိၵ်ႈလူလၢႆးယဝ်ႉ ၵႆႉၵႆႉလႆႈငိၼ်းဢေႃႈ ၵူၺ်းၵႃႈ ၵူၼ်းၵေႃႉဢၼ်လၢတ်ႈၼၼ်ႉ ၶဝ်ပဵၼ်ၵူၼ်းဢၼ်ဢမ်ႇသူင်ၵျိူၵ်ႈလူလိၵ်ႈၵူၺ်း။ ၵူၼ်းၵႆႉလူလိၵ်ႈ မီးတင်းၼမ်ၼၼ်ႉၶႃႈယဝ်ႉ ပႃးတင်းၽူႈလူလိၵ်ႈႁဝ်းၶဝ်မိူဝ်ႈလဵဝ်ၼႆႉယူႇလူး။
မိူဝ်ႈလႂ်ၽူႈတႅမ်ႈလိၵ်ႈဢမ်ႇပႆႇႁၢႆ ၽူႈလူလိၵ်ႈၵေႃႈႁူႉတိုၼ်းမီးၶႃႈယဝ်ႉ။
“ဢမ်ႇမေႃ” ၼႆၼၼ်ႉ ပဵၼ်ၶေႃႈဢၢင်ႈ တႃႇဢမ်ႇၶႂ်ႈႁဵတ်းၵူၺ်း၊ လူင်းမိုဝ်းႁဵတ်းယဝ်ႉ ၸင်ႇၵွႆႈတႅပ်းတတ်းၵေႃႈ ဢမ်ႇသုမ်းၼႃ “ၸၢမ်းတူၺ်းလႄႈ” မၢင်ပွၵ်ႈ ပဵၼ်ႁႅင်းဢီး ႁႂ်ႈႁဝ်းလူင်းမိုဝ်းႁဵတ်းႁႂ်ႈလႆႈၼၼ်ႉယဝ်ႉ။
ၼပ်ႉယမ်ၽူႈလူလိၵ်ႈႁဝ်းၶဝ်ယူႇဢေႃႈ
တႅမ်ႈ-သႅၼ်ငဝ်း
16/12/2024
