တွၼ်ႈၸဵတ်း
ႁူင်းႁဵၼ်းဢၼ်ႁူၵ်ႉႁၢမ်းလူင်ၼၼ်ႉ ၵူၼ်းႁႃႈႁူၵ်းၵေႃႉ ၸွႆႈၵၼ်ၵူၺ်းၵေႃႈ ပၢင်ႇၵႂႃႇၵမ်းလွႆးလွႆးယူႇယဝ်ႉ။ ၶမ်းလၢဝ်ၵေႃႈ ၸွမ်းၼင်ႇဢၼ်မၼ်းႁဵတ်းလႆႈ ၶတ်းၸႂ်ႁဵတ်းၵႂႃႇယူႇ၊ ၵူၺ်းၵႃႈ ၸွမ်းလူၺ်ႈလွင်ႈလိုင်ႉလၢင်ႉမၼ်းႁိုဝ် ဢမ်ႇယၢမ်ႈ ႁိုဝ်တႄႉဢမ်ႇႁူႉ ႁဵတ်းၵႂႃႇႁဵတ်းမႃး ဢဝ်ၽႃႉတိူဝ်ႉမၢတ်ႇသႂ်ႇမိုဝ်းမၼ်းၵႂႃႇ ႁၼ်လိူတ်ႈလႅင်ၸၢင်းႁၢင်းဢွၵ်ႇမႃးၼႆၵေႃႈ “ႁိူဝ်ႇ! ဢမ်ႇလိူတ်ႈယဝ်ႉႁိုဝ်လႃႇ..” ပႅတ်ႈၽႃႉမၼ်းသေ ၵမ်ဢဝ်ၼိဝ်ႉမိုဝ်းမၼ်းၼၼ်ႉၵမ်းလဵဝ်ယဝ်ႉ။ သႅင်ၼူၼ်းဢၼ်ႁၼ်ၼင်ႇၼၼ်ၵေႃႈ ၼႅတ်ႈဢဝ်ယႃႈမိူင်းႁၢမ်း ဢၼ်မီးယူႇႁိမ်းႁွမ်းၸိူဝ်းၼၼ်ႉ ၼူတ်ႈၼူတ်ႈသေ မႃးပႄႉသႂ်ႇပၼ်မၼ်းၵႂႃႇ။
“ႁဵတ်းသင်ယူႇလႃႇ!!” ၶမ်းလၢဝ်ဢၢၼ်းႁၢမ်ႈယူႇ ၵူၺ်းၵႃႈမိုဝ်းသႅင်ၼူၼ်းဝႆးလႄႈ သမ်ႉပေႃးတၼ်းဢဝ်မႃးပႄႉသႂ်ႇဝႆႉယဝ်ႉ။
“မၼ်းၸွႆႈႁၢမ်ႈလိူတ်ႈဢေႃႈ”
ယၢမ်းၼၼ်ႉမေႃယႃဢွၼ်တိုၼ်းၵေႃႈႁွတ်ႈမႃးသေ “ၽႃႉတိူဝ်ႉႁႃႉသဵမ်တိူဝ်ႉလႃႇ”
ယၵ်ႉတူၺ်းၶမ်းလၢဝ်ၼင်ႇႁူႉဝႃႈတေပဵၼ်ၸိူင်ႉၼၼ်တေႉယဝ်ႉ။
“ၵတ်ႉၵႃႈဢမ်ႇတိူဝ်ႉပႃးႁဝ်းၵွၼ်ႇဢေႃႈပီႈမေႃ..” လႅင်းမိူင်သႂ် ဢၼ်ၽဵဝ်ႈယူႇၼႂ်းႁူင်းႁဵၼ်းၼၼ်ႉ ႁွင်ႉလၢတ်ႈၸူး။
“မေႃယႃတူၺ်းလူး ဢေးၼွင်ႉဢဝ်ဢီႈသင်ဢမ်ႇႁူႉမႃးသႂ်ႇၼႆႉ ဝႃႈမၼ်းႁၢမ်ႈလိူတ်ႈလႆႈၼႆဝႃႇ ၸႂ်ႈယူႇႁႃႉၼၼ်ႉ”
မေႃယႃၵေႃႈ ယိပ်းဢဝ်မိုဝ်းၶမ်းလၢဝ်မႃးလၢင်ႉပၼ်ၸဵပ်းသေယဝ်ႉ လၢတ်ႈၸူး
“ဢိုမ်ႈ!… ၸႂ်ႉလႆႈယူႇၵူၺ်း မိူဝ်ႈဢမ်ႇမီးယႃသင် ဢမ်ႇမီးမေႃယႃၼၼ်ႉ” ယၵ်ႉတူၺ်းတီႈတိူၵ်ႈယႃႈယႃမၼ်းၼၼ်ႉသေ သိုပ်ႇလၢတ်ႈထႅင်ႈ “ၶဝ်ၵေႃႈၸႂ်ႉတိုဝ်းယႃႈထိူၼ်ႇယႃႈၶိူဝ်းသေ ယူတ်းယႃၵၼ်မႃးၵူၺ်း”
လႅတ်ႇၵေႃႈၼင်ႇႁၢင်ႈမႆႈမႃးယဝ်ႉလႄႈ ၸင်ႇဢွၼ်ၵၼ်လိုဝ်ႈႁိူဝ်ႉယူႇၼႂ်းႁူမ်ႈၼၼ်ႉယဝ်ႉ။ ၶမ်းလၢဝ်ၼၼ်ႉၵေႃႈ ဝၢႆႇယၵ်ႉတူၺ်းၵႂႃႇ ၼႂ်းႁူင်းႁဵၼ်းၼၼ်ႉ ၼင်ႇဝႃႈဢမ်ႇမီးဢၼ်လီသေမဵဝ်းယဝ်ႉ ၸဵမ်ၽိူၼ်တင်ႇၼင်ႈ ၵွႆးၵိုတ်းပႅၼ်ႈပုၼ်း ဢၼ်လမ်ၽိတ်းၽိတ်း သိၵ်ႇသိၵ်ႇၸွမ်းၶွပ်ႇမၼ်းၼၼ်ႉၵူၺ်း ယင်းတိုၵ်ႉၸႂ်ႉလႆႈယူႇဢိတ်းဢိတ်း၊ တေႃႈၼင်ႇၽႃႁူင်းႁဵၼ်းၵူၺ်း သမ်ႉပေႃးယွၵ်းၽင်ႉလူင်ၵႂႃႇမူတ်းယဝ်ႉ ၸွမ်းသဝ်ႁူင်းႁဵၼ်းၵေႃႈ ပွတ်းတႂ်ႈပူၵ်ႇလၢပ်ႈ ပွတ်းၼိူဝ်သမ်ႉပဵၼ်မွတ်ႈ မၢင်ဢၼ်ၵေႃႈသမ်ႉပေႃးၽင်ႉသဵင်ႈယဝ်ႉ၊ မၼ်းၸင်ႇ ထူၺ်ႈၸႂ်လူင်မႃးသေ “တေယူႇလႆႈယူႇတေႉႁႃႉမိူၼ်ၼႆ”
“တေႃႈၼင်ႇဢမ်ႇမီးၽႂ်ယူႇ မၼ်းတင်းယူႇမႃးလႆႈထိုင်ဝၼ်းမိူဝ်ႈၼႆႉလူး” လႅင်းမိူင်းသႂ်လၢတ်ႈ။
“တူၺ်းမိူၼ်ၵူၼ်းဝၢၼ်ႈၼႆႉ ၶဝ်ဢမ်ႇပေႃးသူၼ်ၸႂ်ၵၼ်သေၵႃႈႁိုဝ်ၶႃႈၼႃ မၢင်ၵမ်းၵေႃႈ ၶႃႈတင်းဝူၼ်ႉဝႃႈ တႃႇတေမႃးၶိုၼ်ႈႁူင်းႁဵၼ်းၵူၺ်းၵေႃႈ ဢမ်ႇမီးၽႂ်ယူဝ်ႉ”
မႄႈသၢင်ႇၼူႉၵေႃႈ ယၵ်ႉတူၺ်းၼႃႈၶမ်းလၢဝ်သေယဝ်ႉ ဝၢႆႇၼႃႈၸူးမေႃယႃဢွၼ်တိုၼ်းသေ “ပဵၼ်လွင်ႈလီၶႃႈဢေႃႈ ဢၼ်မိုတ်ႈၵၼ်တင်းမေႃယႃၸိူင်ႉၼႆ”
“မၼ်းၵႂႃႇၵဵဝ်ႇသင်တင်းမေႃယႃၶႃႈလႃႇပႃႈ..”
“မေႃယႃႁႃႉ ဢိုမ်ႈ.. လိူဝ်သေလုင်းႁဵင်ယဝ်ႉ မေႃယႃပဵၼ်တီႈဢၼ်ၵူၼ်းဝၢၼ်ႈၶဝ် ပၼ်လွင်ႈၼပ်ႉယမ်လိူဝ်ပိူၼ်ႈၼၼ်ႉယဝ်ႉ”
“တေႉၶႃႈႁႃႉ ပေႃးၶႂ်ႈလႆႈႁူင်းႁဵၼ်းမႂ်ႇၸွင်ႇတေလႆႈၶႃႈ”
“လွင်ႈၼႆႉတႄႉၵေႃႈ ဢမ်ႇလႆႈယူႇတီႈႁဝ်းၵေႃႉလဵဝ်ၼင်ႇၵဝ်ႇၶႃႈၼႃ” မေႃယႃလၢတ်ႈ။
“ဝူၼ်ႉယူႇယဝ်ႉ ဢမ်ႇလီမုင်ႈမွင်းသင်တီႈၽႂ်”
“မၼ်းၵေႃႈယူႇတီႈသူပႃးၽွင်ႈၶႃႈဢေႃႈ..”
“ပဵၼ်သင်လႄႈယူႇတီႈႁဝ်းလႃႇ ႁႂ်ႈႁဝ်းႁဵတ်းၵေႃႉလဵဝ်ႁဝ်းၵေႃႈဢမ်ႇမေႃႁဵတ်းလူး တေႃႈၼင်ႇတီႇယုမ်းၸိူဝ်းၼႆႉၵူၺ်း ၽႃႉပေႃးတိူဝ်ႉယဝ်ႉ တႃႉပႆမိူဝ်းၶိုၼ်းႁေလႃႈ တင်းငၢႆႈလိူဝ်ႁဵတ်းႁူင်းႁဵၼ်းၸိူင်ႉၼႆထႅင်ႈၵွၼ်ႇ”
“ပိူၼ်ႈလၢတ်ႈယင်းပႆႇသုတ်း သမ်ႉပေႃးၵူဝ်ဢမ်ႇလႆႈထဵင်ယဝ်ႉလႃႇ ပီႈၵေႃႈ” လႅင်းမိူင်းသႂ်ၸိမ်လၢတ်ႈၸွမ်း။
“ပေႃးဝႃႈသူပၼ်ၵႂၢမ်းမၼ်ႈလႆႈဝႃႈ တေႁပ်ႉလုၵ်ႈႁဵၼ်းတၢင်ႇဝၢၼ်ႈလႆႈထႅင်ႈတႄႉၵေႃႈ တေလႆႈယူႇ”
“မီးထႅင်ႈတၢင်ႇဝၢၼ်ႈၵွၼ်ႇႁႃႉ..”
“ၸႂ်ႈယဝ်ႉ မိူဝ်ႈၵူႈပွၵ်ႈၵေႃႈ ႁူင်းႁဵၼ်းလင်ၼႆႉပဵၼ်တီႈ လုၵ်ႈႁဵၼ်းလၢႆလၢႆဝၢၼ်ႈၶဝ်မႃးၶိုၼ်ႈၼၼ်ႉယဝ်ႉ၊ ဝၢႆးသေဢမ်ႇမီးမေႃသွၼ်ယဝ်ႉၵေႃႈ ႁူင်းႁဵၼ်းၼႆႉၵေႃႈလႆႈႁၢမ်းၵႂႃႇ လုၵ်ႈဢွၼ်ႇၵေႃႈဢမ်ႇလႆႈသွၼ်လိၵ်ႈႁဵၼ်းလၢႆးသင် လိူဝ်သေဝၢၼ်ႈၼႆႉယဝ်ႉ မီးထႅင်ႈလၢႆဝၢၼ်ႈဢိူဝ်ႈ” လုင်းသၢင်ႇမိူင်းလၢတ်ႈၼႄၶမ်းလၢဝ်ၵႂႃႇ။
ၶမ်းလၢဝ်ၵေႃႈ ယၵ်ႉတူၺ်းႁူင်းႁဵၼ်းလင်ၼႆႉလႄႈ တူၺ်းႁၼ်ၽဝလုၵ်ႈဢွၼ်ႇၸိူဝ်းၼၼ်ႉသေ တွပ်ႇၵႂႃႇလူၺ်ႈဢမ်ႇဝူၼ်ႉသင်ၼၼ်ႉယဝ်ႉ။
“လႆႈယူႇၶႃႈ!”
ၶဝ်ၸိူဝ်းၼၼ်ႉၵေႃႈ ဢွၼ်ၵၼ်ယုမ်ႉယုမ်ႉယၢႆႈယၢႆႈသေ ၼၢႆးၸင်ႇၶိုၼ်းလၢတ်ႈတီႈမေႃယႃၵႂႃႇ “ပေႃးၼၼ်ႁူင်းႁဵၼ်းလင်ၼႆႉ တေဢွၵ်ႇမႃးၸိူင်ႉႁိုဝ်ၵေႃႈ ၵႃႈတေလႆႈပိုင်ႈဢိင်မေႃယႃႁဝ်းၽွင်ႈယဝ်ႉၼႆ”
“တေၶတ်းၸႂ်ၼင်ႇၵႃႈပွင်ပဵၼ်လႆႈၶႃႈ”
မေႃယႃယူႇဢမ်ႇပေႃးႁိုင် လူဝ်ႇၵႂႃႇထႅင်ႈၼႆၵေႃႈ ဢွၵ်ႇၵႂႃႇပႅတ်ႈၶဝ်ယူႇယဝ်ႉ။ လႅင်းမိူင်းသႂ်ၵေႃႈ ၸႂ်လီၸႂ်ဝၢၼ်သေ တၵ်းၼမ်ႉယိုၼ်ႈပၼ်တီႈသႅင်ၼူၼ်းၵႂႃႇ လၢတ်ႈတင်းသဵင်လီသဵင်ဝၢၼ်
“ၵိၼ်ၼမ်ႉဢိတ်ႉၼိုင်ႈၶႃႈလႄႈ ၵတ်းယဵၼ်တူဝ်ယဵၼ်ၸႂ်လီဢေႃႈ”
“ၸူမ်းယဝ်ႉၶႃႈ” သႅင်ၼူၼ်းၵေႃႈယိပ်းဢဝ်ၵႂႃႇ မိုဝ်းသွင်ၶႃၶဝ်ႈတုမ်ႉလေႃႇၺႃးၵၼ် ပၼ်ဢဝ်ၶူၼ်တုမ်ႇၼိူဝ်ႉၵီႈပိုဝ်းမႃး သဵၼ်ႈလိူတ်ႈတုမ်ႉယွၼ်ႈတွတ်ႇၶွၼ်ႈႁူဝ်ၸႂ်သၼ်ႇဝႆႁႅင်း ၼႃႈသမ်ႉပေႃးလႅင်လူင်ၵႂႃႇ တင်းသွင်ၵေႃႉယဝ်ႉ။ သႅင်ၼူၼ်းၼၼ်ႉတႄႉ ဝိၼ်ႇဝၢႆႇပၢႆႈၼႃႈပႅတ်ႈသေ လႅင်းမိူင်းသႂ်ၼၼ်ႉၵေႃႈ ဝိၼ်ႇဝၢႆႇလင်ၵႂႃႇ ၵူၺ်းၶိုၼ်းဝၢႆႇၼႃႈယၵ်ႉတူၺ်း သႅင်ၼူၼ်းသေ ယုမ်ႉလူင်ယူႇယဝ်ႉ။ ၶမ်းလၢဝ်ဢၼ်ငိၼ်းဝႃႈၼမ်ႉၵတ်းၵတ်းၼႆၵေႃႈ ၼင်ႇႁၢင်ႈၶေႃးႁႅင်ႈမႃးသေ
“ဢၢႆႈၼွင်ႉယွၼ်းၵိၼ်ၼမ်ႉဢိၼ်ႉလူႉ!”
လႅင်းမိူင်းသႂ်ၵေႃႈ ဢဝ်ၶူတ်ႇၼမ်ႉပၼ်မၼ်းသေ ၶမ်းလၢဝ်ဢၼ်ႁၼ်ၼင်ႇၼၼ်
“ပေႃးတေႁႂ်ႈႁိုဝ်ႈၵူၺ်းၵေႃႈ ပၼ်ပႃးၵွၵ်းႁေလႄႈ”
လႅင်းမိူင်းသႂ် ဢဝ်ၵွၵ်းယိုၼ်ႈပၼ်သေ ၶမ်းလၢဝ်ႁိုဝ်ႈသေယဝ်ႉ ၵိၼ်တူၺ်း သမ်ႉပေႃးဢုၼ်ႇႁုၼ်ႁုၼ်ယူႇ၊ တၢၵ်ႇလႅတ်ႇႁိုင်လႄႈ ဢမ်ႇၸၢင်ႈၵတ်းယဝ်ႉ မၼ်းၵေႃႈ ယၵ်ႉတူၺ်းလႅင်းမိူင်းသႂ်ၼင်ႇ ဢမ်ႇႁၢၼ်ႉၸႂ်ယဝ်ႉလၢတ်ႈၸူး။
“ၸိူင်ႉၼႆၵႃႈၼမ်ႉၵတ်းၵတ်း”
“ၵတ်းဢေႃႈ..ၵတ်းယဵၼ်လီတႄႉယဝ်ႉၶႃႈ” သႅင်ၼူၼ်းတင်းၵိၼ်တင်းယုမ်ႉယူႇ။
ပေႃးသႅင်ၼူၼ်းလၢတ်ႈၸိူင်ႉၼႆ လႅင်းမိူင်းသႂ်ၵေႃႈ ႁိုဝ်သူၼ်ၽႂ် ယုမ်ႉၼင်ႇႁၢၼ်ႉၸႂ်ႁၢၼ်ႉၶေႃးသေယဝ်ႉ။
“ပီႈဢမ်ႇထိူၵ်ႈၵိၼ်လႄႈဝႃႈဢိူဝ်ႈၼၼ်ႉ”
လိုဝ်ႈႁိူဝ်ႉလိုဝ်ႈၸႂ်တၢၼ်ႇတၢၼ်ႇ ၶဝ်ၵေႃႈမႄးဢဝ်တင်းၵုပ်းသုပ်းႁူဝ်သေယဝ်ႉ သိုပ်ႇတီႇၸွၼ်ႉၽၵ်ႉယုမ်းၼၢမ်ယုမ်းႁူၵ်ႉႁိမ်းႁွမ်းႁူင်းႁဵၼ်းၸိူဝ်းၼၼ်ႉ သမ်ႉပေႃးပၢင်ႇလူင်ၵႂႃႇတိၵ်းတိၵ်း ယူႇယဝ်ႉ။
ၸွႆႈၵၼ်ႁဵတ်းၵႂႃႇ တၢင်းဝၼ်းၵေႃႈ ၼႂ်းဝၢင်းႁူင်းႁဵၼ်းၸိူဝ်းၼၼ်ႉ ပေႃးပၢင်ႇလိူမ်ႈလႆႇဝႆႉလီၼႃႇယဝ်ႉ၊ မၼ်းပၢင်ႇပူၼ်ႉၼႃႇ ထိုင်တီႈၵိုတ်းဢဝ်လင်ၶႃးႁူင်းႁဵၼ်း လႄႈ သဝ်ႁူင်းႁဵၼ်းမၼ်းၵူၺ်းယဝ်ႉ။ သမ်ႉဝႃႈၽဵဝ်ႈၵႂႃႇယဝ်ႉသေတႃႉ တွၼ်ႈတႃႇၶမ်းလၢဝ်တႄႉ ဢမ်ႇပႆႇလူမ်ၸႂ်လႆႈ ယင်းတိုၵ်ႉၸုၵ်းသေထူၺ်ႈၸႂ်လူင်ယူႇ ၽိုဝ်ႉ..ၽိုဝ်ႉ..။ လႅင်းမိူင်းသႂ် ဢၼ်ႁၼ်ၶမ်းလၢဝ်ပဵၼ်ၸိူင်ႉၼၼ်ၵေႃႈ
“မိူဝ်ႈလႆႈယဝ်ႉၼႃႈပီႈ.. တူၺ်းၵေႃႈဢမ်ႇႁဵတ်းသင်လႆႈၼင်ႇၵဝ်ႇ”
“ၸၢင်ႈတေႁဵတ်းသင်လႆႈ ဢမ်ႇမေႃႁဵတ်းသင်တေႉလူး”
“ပီႈယႃႇပေမႆႈၸႂ်ယဝ်ႉလွင်ႈၼႆႉ ဢမ်ႇမီးပီႈၵေႃႈမီးၵူၼ်းမေႃႁဵတ်းမၼ်းယူႇၵူၺ်း ၵူၺ်းၵႃႈ ပီႈလူဝ်ႇသႂ်ႇၸႂ်ဢၼ်ပီႈႁဵတ်းလႆႈလႄႈ ဢမ်ႇမီးၽႂ်ႁဵတ်းၼၼ်ႉၵူၺ်းယဝ်ႈ”
“ႁူင်းႁဵၼ်းမိူၼ်ၼႆ ဢမ်ႇမႆႈၸႂ်တေႁဵတ်းႁိုဝ်လႆႈ ဢမ်ႇမီးတီႈယူႇတီႈသဝ်းၵၼ် တေႁဵတ်းႁိုဝ်ႁဵၼ်းလႃႇ”
“ဢိူဝ်ႈ.. ပီႈဝူၼ်ႉဝႆႉယဝ်ႉႁႃႉ ပီႈတေသွၼ်ၸိူင်ႉႁိုဝ်”
“ဢမ်ႇပႆႇႁၼ်လုၵ်ႈႁဵၼ်း တေႁဵတ်းႁိုဝ်ႁူႉဝႃႈသွၼ်ၸိူင်ႉႁိုဝ်လႃႇ..”
ၵွပ်ႈပဵၼ်ၶၢဝ်းၵၢင်ဝၼ်းၸၢႆႉၸိူၼ်းၸမ်ႁူင်ႈလူင်းလွႆယဝ်ႉလႄႈ မႅၼ်ႈၽွင်းလုၵ်ႈဢွၼ်ႇၶဝ် ဢွၼ်ႁေႃႈဝူဝ်းႁေႃႈၵႂၢႆးၶဝ် မႃးႁႃႁိူၼ်းၼၼ်ႉယဝ်ႉ။ လႅင်းမိူင်းသႂ်ၵေႃႈ ဢဝ်သၢႆတႃယၵ်ႉတူၺ်းလုၵ်ႈဢွၼ်ႇဢၼ်ၸွမ်းၵူၼ်ႈၵႂၢႆးၼၼ်ႉသေ
“လုၵ်ႈဢွၼ်ႇၸိူဝ်းၼႆႉယဝ်ႉ ဢၼ်တေပဵၼ်လုၵ်ႈႁဵၼ်းပီႈ”
ယိုင်ႈၶႅၼ်းႁဵတ်းႁႂ်ႈ ၶမ်းလၢဝ်ထူၺ်ႈၸႂ်လူင်မႃးထႅင်ႈၵူၺ်း၊ ပေႃးမႃးထတ်းသၢင်ၶိုၼ်း မိူၼ်ဝႃႈမၼ်းၵေႃႈ ယင်းဢမ်ႇႁူႉတေတႄႇတီႈလႂ်လႄႈ တေႁဵတ်းၸိူင်ႉႁိုဝ်လူးၵွၼ်ႇ၊ သီၼႃႈမၼ်းၼၼ်ႉ လၢတ်ႈၼႄလႅင်းမိူင်းသႂ်ၵႂႃႇလူၺ်ႈဢမ်ႇႁူႉတူဝ်ယဝ်ႉ။
“မိူဝ်ႈၼႆႉတႄႉလိုဝ်ႈၵွၼ်ႇလႄႈ ၵၢၼ်ႁူင်းႁဵၼ်းၼႆႉ ဝႆႉပဵၼ်ၵၢၼ်မိူဝ်ႈၽုၵ်ႈၵူၺ်းယဝ်ႉလႃႈၼႃႈ ” လႅင်းမိူင်းသႂ်ၵေႃႈ ယိပ်းၸၼ်ဢဝ်ၶေႃႈၶႅၼ် ၶမ်းလၢဝ်သေလၢၵ်ႈလူင်မိူဝ်းၵႂႃႇယူႇယဝ်ႉ။
ၵွပ်ႈပိူဝ်ႈလႅတ်ႇမႆႈမႃးလၢႆဝၼ်းယဝ်ႉလႄႈ တၢင်းၵေႃႈႁႅင်ႈ ၼမ်ႉၵေႃႈသႂ် ၵူၼ်းဝၢၼ်ႈၶဝ်ၵေႃႈ ဢွၼ်ၵၼ်ၵႂႃႇဢၢပ်ႇၼမ်ႉတီႈၼမ်ႉႁွင်ႈ ဢၼ်မီးႁိမ်းဝၢၼ်ႈၼၼ်ႉယူႇ။ မိူင်းယင်းပႆႇလပ်းသိင်ႇ သႅင်ၼူၼ်းၸင်ႇၸူဝ်းႁွင်ႉဢဝ်ၶမ်းလၢဝ် ၵႂႃႇၸွမ်းၵၼ်ယဝ်ႉ။ မိူဝ်ႈမီးတိုဝ်ႉတၢင်းၸိူင်ႉၼႆ လႅင်းမိူင်းသႂ်ၵေႃႈ တေႃႈဢမ်ႇလွတ်ႈၵႂႃႇၸွမ်း။
ၼမ်ႉႁွင်ႈၵႂၢင်ႈယူႇတၢၼ်ႇတၢၼ်ႇ လႆလႅၼ်ႈလတ်းၽၢၼ်ႇလမ်းလူၺ်းၵၼ်လူင်လူင်းၵႂႃႇ၊ ၽူႈၸၢႆးဢၢပ်ႇပႃႈၼိူဝ် ၽူႈယိင်းဢၢပ်ႇပႃႈတႂ်ႈ သဵင်ဢုပ်ႇၵၼ်ပေႃးၼၼ်ႈဢူၼ်ပၼ်း၊ ၵမ်ႈၽွင်ႈသၵ်ႉၶူဝ်း၊ ၵမ်ႈၽွင်ႈသီၶႆး၊ ၵမ်ႈၽွင်ႈၵေႃႈဢၢပ်ႇယဝ်ႉပွၵ်ႈ၊ ၵမ်ႈၽွင်ႈၵေႃႈပွင်ႉလႃႇလုၵ်ႈဢွၼ်ႇ ဢၼ်လဵၼ်ႈလမ်းၵၼ်ၼႂ်းၼမ်ႉ တူဝ်သမ်ႉပေႃးသၼ်ႇတိုၼ်းတိုၼ်း တႃႈၼမ်ႉၶၢဝ်းၵၢင်ဝၼ်းတူၵ်းၸိူင်ႉၼႆ ၵူၼ်းႁၢင်ႈပေႃးၵိုၼ်းလူင်ဝႆႉယဝ်ႉ၊ ၶမ်းလၢဝ်ဢၼ်လႆႈမႃးႁၼ်ၼင်ႇၼႆ သမ်ႉပေႃးၶႂ်ႈႁူၼ်ပွၵ်ႈမိူဝ်း တၵ်းၼမ်ႉမေႃႇဢၢပ်ႇၵူၺ်းယူႇ။ ၵူၼ်းၼမ်ၵေႃႈပိူင်ၼိုင်ႈ၊ ၼမ်ႉႁွင်ႈလိုၵ်ႉၵေႃႈပိူင်ၼိုင်ႈ ဢမ်ႇမေႃလုၺ်းၼမ်ႉၵေႃႈပႃးလႄႈ ၼင်ႈပႂ်ႉတူၺ်းပိူၼ်ႈဢၢပ်ႇယူႇတၢင်းႁိုင် သမ်ႉဝႃႈသႅင်ၼူၼ်းႁွင်ႉယူႇၵေႃႈ ဢမ်ႇတူင်ႉဢမ်ႇၼိုင်သေဢိတ်းယဝ်ႉ။
“ပီႈလူင်းမႃးလႄႈ ႁိမ်းၽင်ႇမၼ်းဢမ်ႇလိုၵ်ႉ” ၼမ်ႉၼၼ်ႉၵေႃႈသႂ်သိူင်ႁိူင် တေႃႉတႄႉပဵင်းဢဝ်သိၼ်ႈတႃႉဢူၵ်းဢွၼ်ႇသႅင်ၼူၼ်းၼၼ်ႉၵူၺ်း။ သမ်ႉဝႃႈပဵၼ်ၸိူင်ႉၼၼ် ဢမ်ႇႁၼ်ဝႃႈမၼ်းတေမီးၸႂ်ၶႂ်ႈလူင်းသေဢိတ်း
“ဢၢပ်ႇႁဵတ်းတႄႉလႄႈႁဝ်းမိူဝ်း!” မၼ်းၵေႃႈ လုၵ်ႉၵႂႃႇပႂ်ႉသႅင်ၼူၼ်းယူႇတီႈတၢင်းၽႄၼၼ်ႉယဝ်ႉ။ သမ်ႉလႆႈႁၼ်လႅင်းမိူင်းသႂ်လႄႈ
“ပီႈတၼ်းဢၢပ်ႇယဝ်ႉယဝ်ႉႁႃႉ!” တူၺ်းၵႂႃႇတူၺ်းမႃး ႁၼ်ဝႃႈၶမ်းလၢဝ်လႅပ်ႈဢမ်ႇဢၢပ်ႇလႄႈ“ဢမ်ႇဢၢပ်ႇႁႃႉတေႃႈ”
“ဢိုမ်ႈ!”
“မႃးႁွတ်ႈတႃႈၼမ်ႉဢမ်ႇဢၢပ်ႇၼမ်ႉၼႆႉၼႃ” သွပ်ႉသႅပ်ႉလၢတ်ႈၵႂႃႇလွႆးလွႆးယူႇ။
“တေမႃးသူၼ်ၸႂ်ႁဵတ်းသင် မိူဝ်းဢၢပ်ႇတီႈႁိူၼ်းၵေႃႈလႆႈယူႇလူး ၵမ်ႉတေမိူဝ်းပႅတ်ႈယဝ်ႉ”
လၢတ်ႈဢဝ်လႅင်းမိူင်းသႂ်မိုင်လူင်ၵႂႃႇၵႅပ်ႉၼိုင်ႈ ယၵ်ႉတူၺ်းၼႃႈၶမ်းလၢဝ်သေယဝ်ႉ
“မိူဝ်းလႄႈပီႈ..ပေႃးတေမိူဝ်းဢၢပ်ႇၼမ်ႉတီႈႁိူၼ်းၵေႃႈ ၵမ်ႉတေလပ်းသိင်ႇႁႅင်းဢိူဝ်ႈ”
“သႅင်ၼူၼ်းႁႂ်ႈပႂ်ႉမၼ်းဢိူဝ်ႈ!”
“မိူဝ်းလႃႈ..ၶႃႈတေပႂ်ႉလႂ်ယႃႇမႆႈၸႂ်”
ၶမ်းလၢဝ်ၵေႃႈဝူဝုတ်းဝူဝၢတ်းလူင်မိူဝ်းၵႂႃႇလွႆးလွႆးယဝ်ႉ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ။
