တွၼ်ႈၵဝ်ႈ
ႁူင်းႁဵၼ်းၵေႃႈ ႁဵတ်းယဝ်ႉမူတ်းယဝ်ႉ၊ လုၵ်ႈႁဵၼ်းၵေႃႈတူဝ်ႈတၼ်းယဝ်ႉ၊ ၵူၺ်းၵႃႈ ၶမ်းလၢဝ်တႄႉ ဢမ်ႇပႆႇၽွမ်ႉလႄႈ ပႆႇႁူႉဝႃႈ တေႁဵတ်းၸိူင်ႉႁိုဝ် တေတႄႇတီႈလႂ် ပႂ်ႉႁႂ်ႈဝၼ်းယဝ်ႉဝၼ်းပူၼ်ႉၵႂႃႇတိၵ်းတိၵ်း၊ လႅင်းမိူင်းသႂ် ဢမ်ႇႁၼ်ၶမ်းလၢဝ် တူင်ႉၼိုင်သင်ၼၼ်ႉၵေႃႈ ယဵၼ်ႉၸႂ်ဢမ်ႇလႆႈယဝ်ႉ၊ ၵႂႃႇယူႇႁိမ်း ၶမ်းလၢဝ် ၽွင်းတိုၵ်ႉမိုင်တူၺ်းၼႃႈသိူဝ်ႈပပ်ႉလိၵ်ႈ ဢၼ်ဢူႈၶဝ် ႁႅၼ်းသႂ်ႇၼႂ်းထူင်ၶူဝ်းမၼ်းမႃးပၼ်ၼၼ်ႉယူႇလႄႈ လႅင်းမိူင်းသႂ်ၸင်ႇလၢတ်ႈၸူး
“ပီႈႁဵတ်းၸိူင်ႉၼႆမႃး မီးပဵၼ်ဝူင်ႈယဝ်ႉၼႃ ပီႈတေၵႂႃႇသွၼ်လႆႈမိူဝ်ႈလႂ် ဢၼ်ပီႈလူဝ်ႇၼၼ်ႉၵေႃႈ ပိူၼ်ႈပေႃးႁႃမႃးႁဵတ်းမႃးပၼ်မူတ်းယဝ်ႉ ပီႈၶႂ်ႈလႆႈသင်ထႅင်ႈလႃႇ ၶၢဝ်းယၢမ်းမၼ်းတေတူၵ်းလိုၼ်းတိၵ်းတိၵ်းယဝ်ႉ!..”
ယူႇယူႇၶမ်းလၢဝ်ၼၼ်ႉၵေႃႈ ႁွင်ႉႁႆႈဢွၵ်ႇမႃးၼႂ်းၵၢင်ႁိူၼ်းၼၼ်ႉသေ ဢဝ်လႅင်းမိူင်းသႂ် ဢမ်ႇႁူႉဝႃႈတေလႆႈႁဵတ်းၸိူင်ႉႁိုဝ်ယဝ်ႉ။
“ပဵၼ်သင်ထႅင်ႈယဝ်ႉလႃႇ! လၢတ်ႈမွၵ်ႈၼႆႉၵူၺ်းတေႁႆႈယဝ်ႉၵႃႈ”
“ပေႃးမေႃၵေႃႈၵႂႃႇသွၼ်လႄႈ” တင်းလၢတ်ႈတင်းႁႆႈယူႇ။
“ပီႈမႃးႁဵတ်းမေႃသွၼ်ဢမ်ႇၸႂ်ႈႁႃႉ ပီႈဢိူဝ်ႈ..လူဝ်ႇလႆႈၵႂႃႇသွၼ်”
“ၵဝ်ၵေႃႈၶႂ်ႈသွၼ်ယူႇဢိူဝ်ႈ သမ်ႉဝႃႈ ဝူၼ်ႉမႃးပဵၼ်ဝူင်ႈယဝ်ႉၵေႃႈ ဝူၼ်ႉဢမ်ႇပွင်ႇ တေလႆႈႁဵတ်းႁိုဝ်၊ တေလႆႈတႄႇတီႈလႂ်၊ ၵဝ်ယင်းဢမ်ႇတွၼ်ႉဝူၼ်ႉဝႃႈ တေမႃးပဵၼ်မေႃသွၼ်လူး၊ ဢၼ်ဝူၼ်ႉဝႃႈ ဢမ်ႇဢၢၼ်းပဵၼ်သေ ဢမ်ႇသူၼ်ၸႂ်မၼ်းမႃးတႃႇသေႇၼၼ်ႉ သမ်ႉတေလႆႈမႃးႁဵတ်း ဢၼ်ဢမ်ႇၶႂ်ႈႁဵတ်း၊ ဢမ်ႇႁူႉဝႃႈတေႁဵတ်း ၸိူင်ႉၼႆ” တင်းလၢတ်ႈတင်းႁႆႈ ႁိုဝ်း..ႁိုဝ်း.. “မၼ်းတၼ်ၵႂႃႇမူတ်းယဝ်ႉဢိူဝ်ႈ”
လႅင်းမိူင်းသႂ်ၼၼ်ႉၵေႃႈ ယဵၼ်သေပႂ်ႉထွမ်ႇၵူၺ်း
“ၵဝ်ၵူဝ်ဢိူဝ်ႈ ၵူဝ်ဝႃႈတေဢမ်ႇႁဵတ်းပဵၼ်မႃးလႆႈ ဢမ်ႇႁဵတ်းလႆႈၼင်ႇဢၼ်ပိူၼ်ႈမုင်ႈမွင်းဝႆႉ ”
“ပီႈဝူၼ်ႉဝႃႈ ပီႈၶႂ်ႈႁႂ်ႈႁူင်းႁဵၼ်းပီႈ ပဵၼ်ႁူင်းႁဵၼ်းၸိူင်ႉႁိုဝ်လႃႇ သင်ဢမ်ႇသင် ပီႈလူဝ်ႇႁၼ်ဝႆႉၼႂ်းတႃဝႃႈ ႁူင်းႁဵၼ်းဢၼ်ပီႈပဵၼ်မေႃသွၼ်ၼၼ်ႉ မၼ်းပဵၼ်ၸိူင်ႉႁိုဝ်လၢႆလၢႆ၊ မီးၸိူင်ႉႁိုဝ်လၢႆလၢႆ၊ ဢမ်ႇၸႂ်ႈယၢမ်းလဵဝ် ၵူၺ်းၵႃႈ ဝူၼ်ႉႁၼ်တၢင်းၼႃႈဢၼ်တေမႃးထိုင်ၼၼ်ႉၼႃႇ”
“ဢမ်ႇယၢမ်ႈဝူၼ်ႉဝႃႈ..မၼ်းတေပဵၼ်ၸိူင်ႉႁိုဝ်”
လႅင်းမိူင်းသႂ်ၵေႃႈ မႃးၼင်ႈတေႃႇၼႃႈတင်းၶမ်းလၢဝ်လီလီသေယဝ်ႉ ဢဝ်ၸႄႈဢွၼ်ႇၽိုၼ်ၼိုင်ႈ တင်းၵမ်ဢွၵ်ႇမႃးသေ
“ပီႈဝူၼ်ႉဝႃႈ ႁူင်းႁဵၼ်းဢၼ်ပီႈၶႂ်ႈယူႇမိူဝ်ႈၵေႃႉလဵၵ်ႉၼၼ်ႉ ပဵၼ်ႁူင်းႁဵၼ်းၸိူင်ႉႁိုဝ်လႃႇ”
ၶမ်းလၢဝ်မိုင်ဝူၼ်ႉၵႂႃႇၵႅပ်ႉၼိုင်ႈ “တႄႇၸဵမ်မိူဝ်ႈၵေႃႉလဵၵ်ႉ ဝူၼ်ႉဝႃႈ ၵႂႃႇႁူင်းႁဵၼ်းၸွမ်းၼင်ႇဢၼ်ပေႃႈမႄႈၶႂ်ႈႁႂ်ႈၵႂႃႇၵူၺ်း ဢမ်ႇလႆႈသူၼ်ၸႂ်ႁဵၼ်းလိၵ်ႈသင်၊ ၵူၺ်းၵႃႈ မၼ်းၵေႃႈ ပဵၼ်ၶၢဝ်းယၢမ်းဢၼ်လႆႈၵျေႃႇၸွမ်းဢူၺ်းၵေႃႉ မၼ်းဢမ်ႇလီၶၢၼ်ႉ မိူၼ်မိူဝ်ႈယူႇႁိူၼ်း တေလႆႈတူၺ်းလိၵ်ႈတူၺ်းလၢႆးယူႇတႃႇသေႇ ႁႂ်ႈပဵၼ်ႁူင်းႁဵၼ်း ဢၼ်ဢမ်ႇလႆႈတူၺ်းလိၵ်ႈဢမ်ႇလီႁႃႉ”
သမ်ႉပေႃးဢဝ်လႅင်းမိူင်းသႂ်မိူၼ်ႇမိုင်လူင်ၵႂႃႇယူႇ ၵူၺ်းၵႃႈ မၼ်းၵေႃႈ မၢႆသႂ်ႇၼႂ်းၸႄႈၼၼ်ႉ ပၼ်တီႈၶမ်းလၢဝ်သေယဝ်ႉ ၶိုၼ်းထၢမ်ထႅင်ႈ
“ပီႈသမ်ႉၶႂ်ႈႁႂ်ႈလုၵ်ႈဢွၼ်ႇၶဝ် လႆႈသင်လႃႇ မိူဝ်ႈၶဝ်မႃးႁူင်းႁဵၼ်းၼၼ်ႉ”
“ဢမ်ႇႁူႉၼႃ ဢမ်ႇယၢမ်ႈဝူၼ်ႉလူင်”
“ဢမ်ႇယၢမ်ႈဝူၼ်ႉ ပီႈသမ်ႉဝႃႈၶႂ်ႈႁႂ်ႈလုၵ်ႈဢွၼ်ႇၶဝ် ၶိုၼ်ႈႁူင်းႁဵၼ်းႁဵတ်းသင်လႃႇ”
“ႁၼ်ၶဝ်ႁဵတ်းၵၢၼ်ၸိူင်ႉၼၼ်ယဝ်ႉ လီဢီးလူၼႃႇလႄႈဝူၼ်ႉဝႃႈ သင်ၶဝ်လႆႈၶိုၼ်ႈႁူင်းႁဵၼ်း ၶဝ်တေဢမ်ႇလႆႈႁဵတ်းၵၢၼ်ၸိူင်ႉၼၼ်”
“ပေႃးပီႈဢမ်ႇမီးသင်ပၼ်ၶဝ် သမ်ႉဝႃႈယူႇႁူင်းႁဵၼ်းႁိုဝ် ဢမ်ႇယူႇႁူင်းႁဵၼ်းၵေႃႈ ၶဝ်ၵေႃႈ တိုၵ်ႉတေပဵၼ်ၸိူင်ႉၼၼ်ၵူၺ်း မီးႁူင်းႁဵၼ်း မီးလုၵ်ႈႁဵၼ်း မီးမေႃသွၼ် ဢမ်ႇမီးသင်သွၼ် ၸွင်ႇသမ်ႉတေလႆႈသင်မႃးႁိုဝ်လႃႇ”
“ပေႃးလႃႈ ယိုင်ႈထၢမ်ယိုင်ႈတၼ်တိၵ်းတိၵ်းယဝ်ႉ ၵမ်ႉတေလၵ်ႉပၢႆႈမိူဝ်းႁေယဝ်ႉဝႃႈ”
တင်းပွင်ႉတင်းၶၢင်း ယၢႆးႁူဝ်မၼ်းပေႃးယုင်ႈလူင်ၵႂႃႇသဵင်ႈယူႇယဝ်ႉ။
“ၶႃႈဝႃႈ လွင်ႈဢၼ်ပီႈလၢတ်ႈမႃးၼၼ်ႉ မၼ်းၵေႃႈဢဝ်မႃးၸႂ်ႉလႆႈယူႇၵူၺ်းၼႃ”
“ၸိူင်ႉႁိုဝ်!” တင်ႈၼႃႈတင်ႈတႃသေထၢမ်ၼင်ႇၶႂ်ႈႁူႉတႄႉတႄႉၼၼ်ႉယဝ်ႉ။
“ႁဵတ်းႁႂ်ႈႁူင်းႁဵၼ်းပဵၼ်တီႈဢၼ်လုၵ်ႈႁဵၼ်းၶႂ်ႈယူႇ”
“မၼ်းၵဵဝ်ႇသင်တင်းဢၼ်လၢတ်ႈမႃးၼၼ်ႉလႃႇ တမ်ႉဢမ်ႇလၢတ်ႈပႃးလူးဝႃႈ ၶႂ်ႈယူႇႁူင်းႁဵၼ်းၼႆ”
“တိုၵ်ႉလၢတ်ႈၵူၺ်း ပေႃးလိုမ်းယဝ်ႉ ပီႈလၢတ်ႈဝႃႈ ပီႈယူႇႁူင်းႁဵၼ်း ၵျေႃႇလိူဝ်သေမိူဝ်းႁိူၼ်းၼႆဢမ်ႇၸႂ်ႈႁိုဝ်လႃႇ ပီႈၵေႃႈ ဢဝ်တီႈၼၼ်ႈ မႃးဝူၼ်ႉတူၺ်းလႄႈ ၸွင်ႇမီးၶၢဝ်းယၢမ်းလႂ်ႁိုဝ် ဢၼ်ႁဵတ်းႁႂ်ႈ ပီႈၶႂ်ႈႁဵၼ်းလိၵ်ႈလိူဝ်သေပိူၼ်ႈၼၼ်ႉ”
“ဢိူဝ်ႈ..ပေႃးလၢတ်ႈသိုဝ်ႈသိုဝ်ႈၵေႃႈ ၼႂ်းၶၢဝ်းတၢင်းၶိုၼ်ႈႁူင်းႁဵၼ်းၵူႈပီၼၼ်ႉ တူၺ်းလိၵ်ႈၵေႃႈ မိူဝ်ႈၸမ်တေတွပ်ႇလိၵ်ႈၼၼ်ႉၵူၺ်း၊ ၵူဝ်တူၵ်းၸၼ်ႉၵေႃႈပႃး ဢူၺ်းၵေႃႉဢၢၼ်ႇလိၵ်ႈႁေ ဢမ်ႇမီးၵေႃႉၵေႃႈပႃး”
“ပီႈသမ်ႉလႆႈၸႂ်ယူႇႁႃႉ ႁဵၼ်းလိၵ်ႈၸိူင်ႉၼၼ်”
“ဢမ်ႇၼႃ သမ်ႉဝႃႈတွပ်ႇလႆႈသေတႃႉၵေႃႈ ထိုင်မိူဝ်ႈၼႆႉ ဢဝ်မႃးၸႂ်ႉသင်တမ်ႉဢမ်ႇလႆႈသေဢမ်ႇၵႃး ဢမ်ႇတွင်းလႆႈယဝ်ႉဝႃႈ မၼ်းဝႃႈၸိူင်ႉႁိုဝ် တွင်းၵေႃႈတွင်းမိူဝ်ႈတွပ်ႇမၼ်းၼၼ်ႉၵူၺ်း၊ ဝၢႆးသေတွပ်ႇယဝ်ႉၵေႃႈ သမ်ႉပေႃးလိုမ်းယဝ်ႉ” မၼ်းၵေႃႈၼင်ႈၼိမ်ယဵၼ်ၵႂႃႇၵႅပ်ႉၼိုင်သေ လႅင်းမိူင်းသႂ်ၼၼ်ႉၵေႃႈ ဢမ်ႇပႆႇလၢတ်ႈသင်ၸွမ်း ပႂ်ႉထွမ်ႇမၼ်းတေလၢတ်ႈဢွၵ်ႇမႃးထႅင်ႈယူႇ။
“တေႉၼေႃ သင်ဝႃႈႁဝ်းမီးႁူင်းႁဵၼ်း ဢၼ်ႁဵၼ်းၵႂႃႇယဝ်ႉဢဝ်ၸႂ်ႉတိုဝ်းလႆႈ လႄႈ ႁူင်းႁဵၼ်းဢၼ်ဢမ်ႇမီးလွင်ႈတွပ်ႇလိၵ်ႈၼၼ်ႉ ၸွင်ႇတေလီႁႃႉဝႃႈ” ၼႃႈတႃမၼ်းသမ်ႉပေႃးၸိုၼ်ႈပၢင်ႇလူင်မႃးၵမ်းလဵဝ်ယူႇ။
“ပေႃးဢမ်ႇမီးလွင်ႈတွပ်ႇလိၵ်ႈ ပီႈသမ်ႉတေႁဵတ်းႁိုဝ်ႁူႉ ၼမ်ႉၵတ်ႉလုၵ်ႈႁဵၼ်းပီႈလႆႈလႃႇ…”
“ၼမ်ႉၵတ်ႉ မၢၵ်ႉလိၵ်ႈ ဢၼ်လႆႈဝႆႉၼႂ်းႁူင်းႁဵၼ်းၼၼ်ႉ ႁဵၼ်းသုတ်းၵႂႃႇယဝ်ႉ ဢဝ်ၵႂႃႇၸႂ်ႉသင်ဢမ်ႇလႆႈလူး တေႃႈၼင်ႇမၢင်ၵေႃႉ ႁပ်ႉၸုမ်ႈမႃးယဝ်ႉ တမ်ႉဢမ်ႇၸၢင်ႈဢဝ်မႃးႁဵတ်းသင်ဢမ်ႇၸႂ်ႈႁႃႉ ႁၼ်ၸုမ်ႈဢူႈႁဝ်းတင်းမႄႈႁဝ်း ႁွႆႈဝႆႉတီႈၽႃ ၽုၼ်ႇမုၵ်ႉၵူၺ်းယဝ်ႉ လႆႈၸႂ်ၼႃႇ.. လုၵ်ႈႁဵၼ်းၵေႃႉၼိုင်ႈလႄႈၵေႃႉၼိုင်ႈၼၼ်ႉ မီးၼမ်ႉၵတ်ႉပႅၵ်ႇပိူင်ႈၵၼ်ယူႇယဝ်ႉ၊ တေဢဝ်မႃးတႅၵ်ႈၼိူင်းၵၼ်ဝႃႈ ၵေႃႉၼႆႉၶႅၼ်ႇလိူဝ်ၵေႃႉၼႆႉၵေႃႈ ဢမ်ႇပဵၼ်လႆႈလေႃႇ မၼ်းတိုၼ်းမီး ၵူၼ်းဢၼ်ၵတ်ႉၶႅၼ်ႇၽၢႆႇလႂ်တၢင်းမၼ်း ဢမ်ႇၸႂ်ႈႁိုဝ်လႃႇ ဝူၼ်ႉဝႃႈ တေသွၼ်လုၵ်ႈႁဵၼ်း ႁႂ်ႈႁူႉၸၵ်းၼမ်ႉၵတ်ႉတူဝ်ၸဝ်ႈၵဝ်ႇလူၺ်ႈ ဢမ်ႇၸႂ်ႈၵၢၼ်တွပ်ႇလိၵ်ႈ”
“ပီႈသမ်ႉဝူၼ်ႉဝႃႈ ပီႈတေႁဵတ်းႁႂ်ႈႁူင်းႁဵၼ်းပီႈၼႆႉ ႁႂ်ႈမီးထိုင်ၸၼ်ႉလႂ်လႃႇ ပေႃးပီႈသွၼ်ယဝ်ႉ ပီႈသမ်ႉၶႂ်ႈႁႂ်ႈၶဝ် သိုပ်ႇၶိုၼ်ႈႁူင်းႁဵၼ်းတၢင်ႇတီႈလႆႈယူႇႁႃႉ”
“ၵူၼ်းၵေႃႉလဵဝ်ၵူၺ်း သမ်ႉတေႁဵတ်းလႆႈမွၵ်ႈၵႃႈႁိုဝ်လႃႇ”
“ပဵၼ်လႆႈႁိုဝ်ဢမ်ႇပဵၼ်လႆႈ ဝႆႉသေၵွၼ်ႇ ၵူၺ်းၵႃႈ ၶႂ်ႈႁႂ်ႈပီႈဝူၼ်ႉပႃးၼၼ်ႉၼႃႇ လွင်ႈဢၼ်ပီႈၶႂ်ႈပဵၼ်ၼၼ်ႉ ပီႈလီလႆႈမီးဝႆႉဢမ်ႇၸႂ်ႈႁႃႉ ၸွင်ႇႁဝ်းတေႁူႉလႆႈၵေႃႈဢမ်ႇၸႂ်ႈ မိူဝ်းၼႃႈမႃးတေပဵၼ်သင်ၼႆ”
“ၵဝ်ၵေႃႈဢမ်ႇႁူႉဝႃႈ လွင်ႈႁဵၼ်းသုင်သုင်ၼၼ်ႉ မၼ်းတေပဵၼ်ၸိူင်ႉႁိုဝ် ၸွမ်းၼင်ႇတူဝ်ထူပ်း ဢၼ်လႆႈၶိုၼ်ႈႁဵၼ်းမႃးၼၼ်ႉ ပဵၼ်ၵူၼ်းဢမ်ႇလႆႈၸႂ်ၵႂႃႇႁူင်းႁဵၼ်းသေဢမ်ႇၵႃး သမ်ႉပၢႆ..ႁဵၼ်းဢမ်ႇသုတ်းသေ လၢတ်ႈဢမ်ႇလႆႈဝႃႈ ၵၢၼ်ႁဵၼ်းသုင်သုင်ၼၼ်ႉ မၼ်းလီၸိူင်ႉႁိုဝ်၊ တေႃႇတေႃႈလဵဝ်ၵေႃႈ ယင်းဢမ်ႇႁူႉဝႃႈ ထုၵ်ႇလီသိုပ်ႇၶိုၼ်ႈႁဵၼ်းထႅင်ႈယူႇႁႃႉ၊ ၵွပ်ႈၼၼ် လွင်ႈၼႆႉပႆႇထႃႈဝူၼ်ႉထိုင်မၼ်းၵေႃႈလႆႈ မၼ်းယင်းပႆႇၸႂ်ႈ လွင်ႈဢၼ်ၶႂ်ႈပဵၼ်၊ ၵူၺ်းၵႃႈ ၵဝ်ၵေႃႈၶႂ်ႈႁႂ်ႈမၼ်းပဵၼ်ႁူင်းႁဵၼ်း ဢၼ်လႆႈႁဵၼ်းသွၼ်ၵႂႃႇယဝ်ႉ ဢဝ်ၵႂႃႇၸႂ်ႉတိုဝ်း ၼႂ်းၽဝၸၢတ်ႈပၢၼ်ၼၼ်ႉ လႆႈတေႉတေႉ တေႁဵၼ်းထိုင်ၸၼ်ႉလႂ်ႁိုဝ် ႁဵၼ်းလႆႈမွၵ်ႈႁိုဝ်ၼၼ်ႉတႄႉ ဢမ်ႇလႆႈယူႇတီႈမေႃသွၼ်မၼ်းၵေႃႉလဵဝ်ၵူၺ်း ယူႇတီႈလုၵ်ႈႁဵၼ်းမၼ်း ၸွင်ႇမီးၸႂ်ၶႂ်ႈႁဵၼ်းထႅင်ႈၼႆၼၼ်ႉယဝ်ႉ မိူဝ်ႈလႂ်မိူဝ်ႈမႂ်းႁဵၼ်းသုတ်းမႃးယဝ်ႉၵွၼ်ႇလႄႈ ၸင်ႇမႃးလၢတ်ႈၼႄၶိုၼ်းၵေႃႈ ပႆႇတူၵ်းလိုၼ်း”
“လႆႈၵႃႈ ပေႃးထိုင်မိူဝ်ႈၼၼ်ႉ ယုမ်ႇဝႃႈၶႃႈတေလႆႈႁူႉ ၶေႃႈတွပ်ႇတီႈပီႈယူႇၵူၺ်း”
“လႆႈၵႃႈ ၵဝ်ၵေႃႈတေပႂ်ႉမႂ်းယူႇ”
သွင်ၶႃၵေႃႈ မိုင်ယၵ်ႉတူၺ်းၼႃႈၵၼ်သေယဝ်ႉ ၶမ်းလၢဝ်ၸင်ႇၶိုၼ်းလၢတ်ႈၸူးလႅင်းမိူင်းသႂ်ၵႂႃႇ
“မိူဝ်ႈလႂ်ဝႃႈ..ၸွႆႈၵဝ်ယူႇယဝ်ႉၵေႃႈ ၸွႆႈထႅင်ႈႁေဢိတ်ႉၼိုင်ႈဢမ်ႇလႆႈႁႃႉ ဝူၼ်ႉထိုင်လုၵ်ႈဢွၼ်ႇတႃလမ်လမ်ၸိူဝ်းၼၼ်ႉၽွင်ႈလႄႈ”
လုၵ်ႈဢွၼ်ႇႁိုဝ်မၼ်းတႄႉဢမ်ႇႁူႉ တႃလမ်လမ်ၽႅပ်ႉယုပ်းတူၺ်းလႅင်းမိူင်းသႂ် ၼင်ႇဢမ်ႇယၢမ်ႈႁဵတ်းၼႄၽႂ်မႃးသေပွၵ်ႈၼၼ်ႉယူႇ။
“ပီႈယႃႇပေႁဵတ်းၼႆလႄႈ..မၼ်းမိူၼ်သင်ဢမ်ႇႁူႉယဝ်ႉ”
“မိူၼ်သင်ၵေႃႈယဝ်ႉလႄႈ ပေႃးဝႃႈမႂ်းတေၸွႆႈယူႇ..ၼႆၵေႃႈ..လႆႈယဝ်ႉ”
လႅင်းမိူင်းသႂ် မိုင်ယၵ်ႉတူၺ်းၶမ်းလၢဝ်ၵႅပ်ႉၼိုင်ႈယဝ်ႉ ၸင်ႇပၼ်ၶေႃႈတွပ်ႇၵႂႃႇ
“ၸွႆႈၵေႃႈလႆႈ..”
ၶမ်းလၢဝ်ၵေႃႈ ယိုၼ်ႈမိုဝ်း တႃႇယွၼ်းၸပ်းမိုဝ်းၵၼ်ၵႂႃႇ ႁႂ်ႈပဵၼ်တီႈၵိၼ်ၵႅၼ်ႇၸွမ်းၵၼ်ယဝ်ႉၼႆယူႇ။
“ဢွၼ်တၢင်းသုတ်း ပီႈၵေႃႈ တေလႆႈမီးၽႅၼ်ၵွၼ်ႇ”
“ၽႅၼ်သင်ထႅင်ႈယဝ်ႉ!!”
“ပီႈတေႁဵတ်းသင်လူၺ်ႈဢမ်ႇမီးၽႅၼ် ဢမ်ႇလႆႈလေႃႇ ဢွၼ်တၢင်းသုတ်းၵေႃႈ ၽႅၼ်ၵၢၼ်တႃႇပီႈတေသွၼ်လုၵ်ႈဢွၼ်ႇၶဝ် တေသွၼ်ၸိူင်ႉႁိုဝ်၊ ၽႃႇသႃႇသင် ၸိူဝ်းၼႆႉ ပီႈတေလႆႈဝူၼ်ႉယူႇယဝ်ႉ”
ၶမ်းလၢဝ်ၵေႃႈ မိုင်ဝူၼ်ႉယူႇၵႅပ်ႉၼိုင်ႈသေ ၸင်ႇလၢတ်ႈဢွၵ်ႇမႃးၸူး လႅင်းမိူင်းသႂ်
“မိူဝ်ႈယူႇႁူင်းႁဵၼ်း ႁဵၼ်းပဵၼ်လၢႆၽႃႇသႃႇ ဢၼ်ႁဵၼ်းမႃးၼႂ်းႁူင်းႁဵၼ်းၸိူဝ်းၼၼ်ႉ ဢွၵ်ႇႁူင်းႁဵၼ်းမႃးယဝ်ႉၵေႃႈ ဢမ်ႇတွင်းသေဢမ်ႇၵႃး ဢမ်ႇမီးတီႈၸႂ်ႉမၼ်းထႅင်ႈလူးၵွၼ်ႇ”
“ပီႈယႃႇပေဝူၼ်ႉယဝ်ႉလွင်ႈၼၼ်ႉ မၼ်းဢမ်ႇလႆႈယူႇတီႈပိူၼ်ႈသွၼ်ၸိူင်ႉႁိုဝ် မၼ်းယူႇတီႈပီႈၵူၺ်းယဝ်ႉ.. ၶႃႈဝႃႈယၢမ်းၼႆႉ သွၼ်လိၵ်ႈတႆးမဵဝ်းလဵဝ်ဝႆႉၵူၺ်းၵေႃႈလႆႈယဝ်ႉ လိၵ်ႈတႆးၵေႃႈ ဢမ်ႇလႆႈမီးမဵဝ်းလဵဝ်ၵူၺ်း ၽၢႆႇပၢႆးသၢႆႈ၊ ပၢႆးၼပ်ႉ၊ ပၢႆးပိုၼ်း ၸိူဝ်းၼႆႉ ႁႂ်ႈမၼ်းပဵၼ်လိၵ်ႈတႆးမူတ်းမူတ်း လႄႈ ႁူင်းႁဵၼ်းပီႈၵေႃႈ ႁႂ်ႈပဵၼ်ႁူင်းႁဵၼ်းတႆးၵူၺ်းၵေႃႈလႆႈ” သၢႆတႃလႅင်းမိူင်းသႂ် သမ်ႉပေႃးၸိုၼ်ႈပၢင်ႇလႅင်းလူင်မႃးၵမ်းလဵဝ်သေယဝ်ႉ ၶိုၼ်းသိုပ်ႇလၢတ်ႈထႅင်ႈ “မိူဝ်ႈလႂ်ပီႈသွၼ်မႃးလႆႈၸၼ်ႉယႂ်ႇယဝ်ႉ ၸင်ႇၵွႆႈသွၼ်တၢင်ႇၽႃႇသႃႇထႅင်ႈၵေႃႈလႆႈ မိူင်းႁဝ်းယၢမ်းလဵဝ် ဢမ်ႇလွတ်ႈလႆႈၵႂၢမ်းမၢၼ်ႈ၊ ဢၼ်ပိူၼ်ႈၸႂ်ႉတင်းၵမ်ႇၽႃႇၵေႃႈ ဢင်းၵိတ်ႉၼၼ်ႉၼႃႇ ပေႃးဝႃႈလုၵ်ႈႁဵၼ်းၶဝ် မေႃလၢႆၽႃႇသႃႇၵေႃႈ ၶဝ်တေၸၢင်ႈၵႂႃႇလႆႈၵႆဢမ်ႇၸႂ်ႈႁိုဝ်လႃႇ”
ၶမ်းလၢဝ်တင်းထွမ်ႇတင်းဝူၼ်ႉၸွမ်းသေ ၵွႆႈယူႇၵွႆႈၼႃႈတူႇမႃး ဢမ်ႇပေႃးၶႂ်ႈလီယဝ်ႉလႄႈ “ပေႃးလၢတ်ႈတႄႉငၢႆႈၵူႈလွင်ႈၼၼ်ႉယဝ်ႉ”
“လၢတ်ႈလႆႈၵေႃႈတိုၼ်းတေႁဵတ်းလႆႈယူႇယဝ်ႉ”
“ဢၢႆႈၼွင်ႉၵေႃႉပႂ်ႉမႃးႁဵတ်းလႄႈၼႃႈ ပီႈသူပႂ်ႉလႆႈယူႇယဝ်ႉ”
ၶမ်းလၢဝ်ၵေႃႈမၢႆဢဝ်လွင်ႈဢၼ် လႅင်းမိူင်းသႂ်ၶႂ်ႈပဵၼ်ၼၼ်ႉဝႆႉသေ “မၢႆဝႆႉပၼ်ယဝ်ႉ တေၵဵပ်းသိမ်းဝႆႉလီလီ”
“ယဝ်ႉပီႈလူး…”
“ဢၼ်လၢတ်ႈမႃး မၼ်းၵေႃႈပဵၼ်လွင်ႈလီယူႇၵူၺ်း ၵူၺ်းၵႃႈ ၵဝ်ၵေႃႈ တေႁဵတ်းၵႂႃႇတူၺ်း ၼင်ႇဢၼ်ၵဝ်ႁဵတ်းလႆႈ၊ ဢွၼ်တၢင်းသုတ်းၵေႃႈ တေသွၼ်ပၼ်ဢၼ်လမ်ႇလွင်ႈ တွၼ်ႈတႃႇၽဝၸၢတ်ႈပၢၼ်ၶဝ်ၵွၼ်ႇ မိူၼ်ၼင်ႇ လိၵ်ႈတႆး လုၵ်ႈႁဵၼ်းၵူႈၵေႃႉ တိုၼ်းလူဝ်ႇလႆႈမေႃ ၼႆႉပဵၼ်ယိူင်းမၢႆသုင်သုတ်း၊ ယဝ်ႉၵေႃႈ ယင်းတိုၵ်ႉတေလႆႈလဵပ်ႈႁဵၼ်းတူၺ်းထႅင်ႈၵွၼ်ႇ ၵွပ်ႈပိူဝ်ႈ ၵူႈလွင်ႈၼၼ်ႉ မၼ်းယူႇတီႈငဝ်းလၢႆးထႅင်ႈ ဢမ်ႇၸႂ်ႈႁိုဝ်လႃႇ”
“လႆႈၶေႃႈတွပ်ႇယဝ်ႉ ပေႃးၼၼ်ၵေႃႈ လူဝ်ႇႁႃဝၼ်းပိုတ်ႇႁူင်းႁဵၼ်းၵူၺ်းယဝ်ႉပေႃးၼႆ” လႅင်းမိူင်းသႂ်ၼၼ်ႉတႄႉ တိုၼ်ႇတဵၼ်ႈလိူဝ်သေၶမ်းလၢဝ်ၵႂႃႇယဝ်ႉ။
တွၼ်ႈၼႆႉသုတ်းၵႂႃႇယဝ်ႉ သိုပ်ႇလူၵႂႃႇထႅင်ႈၶႃႈ။
