တွၼ်ႈသၢဝ်းႁႃႈ
လိူဝ်သေသွၼ်လိၵ်ႈယဝ်ႉ တွၼ်ႈတႃႇလုၵ်ႈဢွၼ်ႇၶဝ် ပေႃးတေမီးယိူင်းဢၢၼ်းပဝ်ႉမၢႆ ႁႂ်ႈၶဝ်ထူပ်းလွင်ႈဢၼ်ၶဝ်သူၼ်ၸႂ်တေႉတေႉ ၶႂ်ႈႁဵတ်းတေႉတေႉၼၼ်ႉ၊ ပဵၼ်လွင်ႈဢၼ်မၼ်းတေလႆႈဝူၼ်ႉလႄႈ တေလႆႈၶိုင်ပွင်ႁဵတ်းသၢင်ႈပၼ်ၶဝ်ၵႂႃႇ ၸဵမ်မိူဝ်ႈၶဝ်ယင်းတိုၵ်ႉဢွၼ်ႇယူႇလႄႈ သမ်ႉတေႁဵတ်းႁိုဝ် ႁႂ်ႈၶဝ်ပေႃးၶဝ်ႈထိုင်လႆႈၼၼ်ႉ ပဵၼ်ဢၼ်ဝူၼ်ႉယၢပ်ႇဝႆႉယူႇတႄႉတႄႉယဝ်ႉ။
ဢၼ်ၶႂ်ႈႁဵတ်း၊ ဢၼ်ႁဵတ်းလႆႈၵေႃႈ သမ်ႉဢမ်ႇမႃးမႅၼ်ႈၵၼ်ထႅင်ႈ ၵွပ်ႈၼၼ် ၼင်ႇဢၼ်ႁဵတ်းလႆႈ ဢၼ်ၶႂ်ႈႁဵတ်း ႁႂ်ႈပေႃးတေမႃးၵိုင်ႇငၢမ်ႇၵၼ်ၼၼ်ႉၵေႃႈ မၼ်းၵေႃႈတေႃႈယင်းတေလႆႈသွၵ်ႈႁႃလၢႆးတၢင်းထႅင်ႈယူႇယဝ်ႉ။
တေႃႈၼင်ႇၵူႈဝၼ်းဝၼ်းၼႆႉ ပေႃးဝႃႈၵႂႃႇႁူင်းႁဵၼ်းယဝ်ႉ ၼင်ႈလိုဝ်ႈလႆႈၵေႃႈ မိူဝ်ႈၵိၼ်ၶဝ်ႈၵူၺ်း၊ ၵၢင်ၶမ်ႈၵေႃႈ ယင်းတိုၵ်ႉလႆႈထတ်းလိၵ်ႈပၼ်ထႅင်ႈ၊ ဝၢင်းၽႅၼ်ၵၢၼ်ႁဵၼ်းထႅင်ႈ၊ လုၵ်ႈႁဵၼ်းပၢၵ်ႇပၢႆ တွၼ်ႈတႃႇမၼ်း သမ်ႉဝႃႈတေၼမ်ၼႃႇသေတႃႉ မိူဝ်ႈၶၢဝ်းယၢမ်းႁိုင်မႃး မၼ်းၵေႃႈ ယၢမ်ႈၵႂႃႇယဝ်ႉလႄႈ ႁပ်ႉမိုဝ်းၵႂႃႇလႆႈယဝ်ႉ၊ တၢင်းႁိူဝ်ႉၵူႈဝၼ်းဝၼ်းၼၼ်ႉၵေႃႈ ပွႆႇႁႂ်ႈမၼ်းႁၢႆၵႂႃႇၸွမ်းတႃၼွၼ်းဢၼ်လပ်းမွႆႈၼၼ်ႉသေ ၵၢင်ၼႂ်မႃးၵေႃႈ ၸိုၼ်ႇၶႅၼ်းၶိုၼ်းယဝ်ႉ သိုပ်ႇႁဵတ်းၵႂႃႇၶိုၼ်းထႅင်ႈ ႁဵတ်းၼၼ်။
ၵၢင်ၶမ်ႈမႃးၼႆၵေႃႈ သႅင်ၼူၼ်းမႃးႁဵၼ်းလိၵ်ႈၸွမ်းမၼ်းႁေ လႆႈတူၺ်းပၼ်သႅင်ၼူၼ်းထႅင်ႈ၊ သမ်ႉဝႃႈႁိူဝ်ႉၼႃႇယဝ်ႉသေတႃႉ မိူဝ်ႈႁၼ်လုၵ်ႈႁဵၼ်းမၼ်း ၶတ်းၸႂ်ႁဵၼ်းၼႆၵေႃႈ ပဵၼ်ဢၼ်ၸူမ်းသိူဝ်းသေ သွၼ်ပၼ်ၵႂႃႇ ထၢၼ်ႈပေႃးလိုမ်းဝႃႈႁိူဝ်ႉယဝ်ႉလူးၵွၼ်ႇ။
ၶၢဝ်းယၢမ်းဝၼ်းၼိုင်ႈယဝ်ႉဝၼ်းၼိုင်ႈပူၼ်ႉၵႂႃႇ ဢမ်ႇတၼ်းႁူႉတၼ်းႁၼ် သမ်ႉပေႃးတၼ်းႁွတ်ႈထိုင် ဢွၵ်ႇဝႃႇၶိုၼ်းယဝ်ႉၼႃႇ၊ ၸွမ်းၼင်ႇပိူင်ႁူင်းႁဵၼ်းဢၼ်မၼ်းယၢမ်ႈၶိုၼ်ႈမႃးၼၼ်ႉတႄႉ ၼိုင်ႈပီႊ တွပ်ႇလိၵ်ႈသွင်ပွၵ်ႈလႄႈ တေပဵၼ်ၽွင်းၶၢဝ်းဢွၵ်ႇဝႃႇၼႆႉယဝ်ႉ၊ မၼ်းၵေႃႈဝူၼ်ႉယူႇဝႃႈ ၸွင်ႇတေလႆႈတွပ်ႇႁိုဝ် ဢမ်ႇၼၼ်ၵေႃႈ ဢမ်ႇတွပ်ႇ။ ၵွပ်ႈပိူဝ်ႈ မၼ်းပဵၼ်လုၵ်ႈႁဵၼ်းၵေႃႉၼိုင်ႈ ဢၼ်ဢမ်ႇၵျိူၵ်ႈပၢင်တွပ်ႇလိၵ်ႈလႄႈ ဢမ်ႇလႆႈၸႂ်တူၺ်းမၢၵ်ႉလိၵ်ႈဢၼ်ဢွၵ်ႇမႃးၼၼ်ႉသေဢိတ်း။ သင်ၸိူဝ်ႉဝႃႈမၼ်းတွပ်ႇလိၵ်ႈ မၼ်းသမ်ႉတေလႆႈထတ်းမၢၵ်ႉလိၵ်ႈၼမ်ၼႆထႅင်ႈ မၼ်းၵေႃႈၸူးငၢႆႈသေယဝ်ႉ ဢမ်ႇတွပ်ႇလိၵ်ႈႁေ ဢိုတ်းႁဵၼ်းပၼ်ၶဝ်ၵႂႃႇၵူၺ်းယူႇယဝ်ႉ။
တူၵ်းမႅၼ်ႈၼႂ်းဝၼ်းၽိတ်ႈၼႆၵေႃႈ ဝၢၼ်ႈၽႂ်ႁိူၼ်းမၼ်း ဢွၼ်ၵၼ်ႁဵတ်းၶဵင်ႇတၢင်ႇပုတ်ႈ တူၼ်ႈတဵၼ်း ၵၢၼ်ႈပႅၵ်ႇၵၼ်ယဝ်ႉ ဢွၵ်ႇဝႃႇပွၵ်ႈၼႆႉသမ်ႉ မႃးႁဵတ်းတီႈတၢင်းဝၢၼ်ႈဢုင် ၼႂ်းဝၢင်းၵျွင်မုၼ်ႈၸဝ်ႈ ဢၼ်ပၢင်ႇပဵင်းၵႂၢင်ႈလူင်ၼၼ်ႉလႄႈ မီးတၢင်းၶူင်ႇၵႃႈဝႅၼ်ႁွင်ႉၵႂၢမ်း တေဢၢၼ်းႁဵတ်းပွႆးတေႉပွႆးဝႃႈလူင်ၼင်ႇၵဝ်ႇယဝ်ႉ။
ၸဝ်ႈတၢင်းၶၢႆၶဝ်ၵေႃႈႁၢင်ႈလႅတ်းၼႃႇ မၢၵ်ႇမႆႉမၢၵ်ႇတွၵ်ႇ ဢၼ်ၶၢႆယူႇၼႂ်းဝဵင်းၼၼ်ႉ ပေႃးၸမ်ဢွၵ်ႇဝႃႇယဝ်ႉၼႆၵေႃႈ ၼႅတ်ႈမိူဝ်းတေႃႉဢဝ်မႃးယဝ်ႉ၊ လိူဝ်ၼၼ်ႉၵေႃႈယင်းမီးထႅင်ႈ မူၵ်ႇတႅၵ်ႇဝႃႇ၊ ႁူင်းၾႆးမိၼ်ဝႃႇ ပေႃးၵႂႃႇႁႃမႃးဝၢင်းၶၢႆၼႂ်းသႅင်ႇၶဝ်ပေႃးတဵမ်လူင်ဝႆႉ ၵွၵ်းၾႆးဝၢၼ်ႇၾႆးဢွၼ်ႇၸိူဝ်းၼႆႉၵေႃႈမီး။ မႄႈပႃႈၼႃႉဢႃၶဝ်ၼၼ်ႉၵေႃႈ ဢမ်ႇတၼ်းမိူဝ်းႁႃသိုဝ်ႉၼႂ်းဝဵင်းလႄႈ ဢွၼ်ၵၼ်ၶဝ်ႈၶဝ်ႈဢွၵ်ႇဢွၵ်ႇ သဵတ်ႈၵႃႈသဵတ်ႈၶၼ်မၼ်းယူႇတီႈ သႅင်ႇၼၢင်းႁွမ်ၶဝ်ၼၼ်ႉယဝ်ႉ။
ၶမ်းလၢဝ်ၵေႃႈ ႁၼ်မၢၵ်ႇၵႅမ်ႈၶွင်ႇ လႅင်ၶွင်ႇၸွင်းႁွင်းလီၼႃႇလႄႈ ၸဵမ်မိူဝ်ႈမၼ်းမႃးယူႇတီႈဝၢၼ်ႈၼႆႉ ဢမ်ႇတွၼ်ႉလႆႈၶိုၼ်းႁၼ်သေပွၵ်ႈ ၸင်ႇ လွမ်မိူဝ်းငွၵ်ႈတူၺ်းယူႇ၊ မိူဝ်ႈဢၢင်ႈတေသိုဝ်ႉၼၼ်ႉ မၼ်းၸင်ႇတေၶုၵ်းၸႂ်လႆႈဝႃႈ မၼ်းဢမ်ႇမီးငိုၼ်းယဝ်ႉ၊ ငိုၼ်းလိူၼ်ဢၼ်မၼ်းလႆႈမႃး လိူၼ်ဢွၼ်တၢင်းသုတ်းၼၼ်ႉၵေႃႈ ၸၢႆႇၵႂႃႇမူတ်းယဝ်ႉ၊ ဝၢႆးသေမၼ်းၵႂႃႇလၢတ်ႈဝႃႈ တေဢမ်ႇယွၼ်းတၢင်းၸွႆႈထႅမ် တီႈလုင်းႁဵင်ၶဝ်ထႅင်ႈၼၼ်ႉၼႆၵေႃႈ ငိုၼ်းလိူၼ်ၵေႃႈပိူၼ်ႈဢမ်ႇပၼ်မၼ်း၊ ၶဝ်ႈၼမ်ႉတၢင်းၵိၼ်ၵေႃႈ ၽႂ်ဢမ်ႇႁွင်ႉမၼ်းမိူဝ်းဢဝ်ယဝ်ႉ၊ ပိူၼ်ႈဢမ်ႇပၼ် မၼ်းၵေႃႈဢမ်ႇဢဝ် ယဝ်ႉၵႂႃႇၸွမ်းၼၢႆးၶမ်းလႅင်ၼၼ်ႉၵူၺ်း။ မၼ်းၵေႃႈ ယိပ်းတူၺ်းသေဝၢင်းလူင်းယဝ်ႉ။
“ႁဵတ်းၵၢၼ်ႁေဢမ်ႇမီးငိုၼ်းၼႆႉ သုတ်းတီႈၵဝ်ၼႆႉၵူၺ်းယဝ်ႉယူဝ်ႉ” ထူၺ်ႈၸႂ်လူင်သေ ထိပ်ႇလိၼ်လူင်မိူဝ်းၵႂႃႇယဝ်ႉ။ မိူဝ်ႈမိူဝ်းႁွတ်ႈထိုင်ၵႂႃႇတီႈႁိူၼ်းၼၼ်ႉၵေႃႈ လႆႈႁၼ်ၼွင်ႉလႅင်မႃးမီးယူႇတီႈႁိူၼ်းၼၼ်ႉသေ “ၼွင်ႉမႃးမိူဝ်ႈလႂ်လႃႇ!!”
“ဢေႃ..တိုၵ်ႉမႃးထိုင်ၵူၺ်းၶႃႈ” ၼွင်ႉလႅင်ၼၼ်ႉၵေႃႈ ဢဝ်ပဵတ်ႈမၼ်းၼႄၶမ်းလၢဝ်ၵႂႃႇယဝ်ႉ “ႁဝ်းဢဝ်ႁူဝ်မၼ်း လႄႈတင်း ထူဝ်ႇႁူဝ် မႃးတွၼ်ႈမေႃသွၼ်ဢေႃႈ” ။
“ၸူမ်းယဝ်ႉၼႃႈ” ယွင်ႈဢဝ်ပဵတ်ႈၼွင်ႉလႅင်ၼၼ်ႉ ၶိုၼ်ႈမိူဝ်းၼိူဝ်ႁိူၼ်း ဢဝ်လူင်ႈမႃးဝၢင်းဝႆႉသေထွၵ်ႇသႂ်ႇၼႂ်းလူင်ႈၼၼ်ႉႁေယဝ်ႉ ၸူဝ်းဢဝ်ၼွင်ႉလႅင် ၼင်ႈယူႇတီႈတွပ်ႈႁိူၼ်းၼၼ်ႉသေ ၵႂႃႇႁိုဝ်ႈၼမ်ႉမႃးပၼ်။
“ၵိၼ်ၶဝ်ႈမႃးယဝ်ႉၼႄႇ”
“ဢေႃႈ..ၵိၼ်မႃးယဝ်ႉၶႃႈ”
“ၼၢႆးႁဝ်းလူး ပဵၼ်ႁိုဝ်မႃးလႃႇ ဢမ်ႇယူႇလီဝၼ်းၼၼ်ႉၶႅၼ်းမႃးယူႇႁႃႉ”
“ဢေႃႈ..ၶႅၼ်းၶိုၼ်းယဝ်ႉၶႃႈ”
“မႃးၼွင်ႉၵူၺ်းႁႃႉ..”
“ၸႂ်ႈယဝ်ႉၶႃႈ လူဝ်ႇမႃးသိုဝ်ႉမၢၵ်ႇမႆႉမၢၵ်ႇတွၵ်ႇပႃးႁေၼၼ်ႉၶႃႈၼႃႇ”
“ၵႆပေႃးတၢၼ်ႇၼၼ်ႉ ႁတ်းၵႂႃႇႁတ်းမႃးႁင်းၵူၺ်းယူႇၵႃႈ”
ၼႂ်းသၢႆတႃၶမ်းလၢဝ် ႁၼ်လုၵ်ႈဢွၼ်ႇမွၵ်ႈသိပ်းသွင်ၼၼ်ႉ ယင်းတိုၵ်ႉၵေႃႉလဵၵ်ႉႁႅင်းၼႃႇလႄႈ မိူၼ်လႅပ်ႈတေဢမ်ႇပႆႇပေႉတူဝ်လႆႈလူးၵွၼ်ႇ၊ ၵူၺ်းၵႃႈ ၼွင်ႉလႅင်ၼၼ်ႉတႄႉ ဢမ်ႇလႆႈဝူၼ်ႉဝႃႈၸဝ်ႈၵဝ်ႇပဵၼ်လုၵ်ႈဢွၼ်ႇယဝ်ႉ မၼ်းၵေႃႉယႂ်ႇယဝ်ႉလႄႈ ႁဵတ်းၵၢၼ်လႆႈမိူၼ်ၼင်ႇၵူၼ်းလူင်ၶဝ်ယဝ်ႉ၊ ပေႃးမၼ်းဢမ်ႇၵေႃႉယႂ်ႇ ၼွင်ႉမၼ်းလႄႈ ၼၢႆးမၼ်းၵေႃႈ တေလႆႈႁိူဝ်ႉၼမ်ၼၼ်ႉယိုင်ၼႃႇ။
ၶမ်းလၢဝ်ၵေႃႈ လၢႆႈၵႂၢမ်းသေ “ၶမ်ႈၸူဝ်ႈ..မႃးလႄႇပွႆးယူႇႁႃႉ..”
ၼွင်ႉလႅင်ၵေႃႈၶွၼ်းႁူဝ်ၼႄႁေ “ဢမ်ႇမႃးၶႃႈ..”
“ႁဵတ်းႁင်လႃႇ..”
လုၵ်ႈဢွၼ်ႇတၢင်းဝၢၼ်ႈၼွင်ႉလႅင်ၶဝ် ဢၼ်ၵေႃႉယႂ်ႇပဵင်းမၼ်းၼၼ်ႉ ဢမ်ႇပေႃးမီး ၵမ်ႈၼမ်ၵေႃႈ ပဵၼ်လုၵ်ႈဢွၼ်ႇၸၢႆး၊ ၵူၺ်းမီးဢၼ်ၵေႃႉလဵၵ်ႉလိူဝ်မၼ်းလႄႈ ဢၼ်ၵေႃႉယႂ်ႇလိူဝ်မၼ်းသေ ပဵၼ်သၢဝ်သိၵ်းႁိၵ်းႁင်းၽႂ်ႁင်းမၼ်းယဝ်ႉ။ တေၵႂႃႇၸွမ်းလုၵ်ႈဢွၼ်ႇၵေႃႈ ႁမ်ႉၵေႃႉယႂ်ႇၼႃႇယဝ်ႉ တေၵႂႃႇၸွမ်းပၢၼ်ပီႈမၼ်းၵေႃႈ သမ်ႉပဵၼ်သၢဝ်ၵၼ်ယဝ်ႉလႄႈ မၼ်းၵေႃႈဢမ်ႇပေႃးမီးၵေႃႉၵႃႈႁိုဝ်။
ၶမ်းလၢဝ်ၵေႃႈ ၼင်ႈႁိမ်းမၼ်းသေ “ပေႃးၶႂ်ႈလႄႇၵေႃႈမႃးလႄႇၸွမ်းမေႃသွၼ်ၵေႃႈလႆႈယူႇ မႃးၼွၼ်းတီႈၼႆႈႁေၼၼ်ႉၼႃႇ”
“တေႉၶႃႈႁႃႉ!!” ႁူၺ်ႇတႃပေႃးမိုၼ်းၵႂၢင်ႈယၵ်ႉတူၺ်းၶမ်းလၢဝ်လူင်ၵႂႃႇၵမ်းလဵဝ်။
“တေႉၵႃႈ”
“ပေႃးၼၼ် ၶႃႈတေၸဵဝ်းမိူဝ်းၸဵဝ်းမႃးၶႃႈၼႃ” ၼႅတ်ႈဢႅၼ်ႇလူင်းႁိူၼ်းၵႂႃႇၵမ်းလဵဝ် ယူႇယဝ်ႉ။
ၶမ်းလၢဝ်ၵေႃႈယၵ်ႉတူၺ်းထူဝ်ႇႁူဝ်ၼၼ်ႉသေ ယိပ်းဢဝ်မႃးပွၵ်ႇပိူၵ်ႇသေယဝ်ႉ ငၢၼ်ႈၵိၼ်ၵႂႃႇ ၼမ်ႉလူင်မၼ်းၵေႃႈ ၼင်ႇႁၢင်ႈၵိုၼ်းဝႃႈၵိုၼ်း တင်းၵဵဝ်ႉတင်းလၢတ်ႈ “ဝၢၼ်လိူဝ်မၢၵ်ႇၵႅမ်ႈၶွင်ႇၵွၼ်ႇယဝ်ႉၼႆႉ”
ယၢမ်းၼၼ်ႉ ၼၢႆးၵေႃႈၵၢၼ်းလူင်ၶိုၼ်ႈႁိူၼ်းမႃး ပႃးတင်းသႃႉမၢၵ်ႇမႆႉမၢၵ်ႇတွၵ်ႇမၼ်းၼၼ်ႉယဝ်ႉ။
“ၼၢႆးၵေႃႈၵႂႃႇတီႈသႅင်ႇပီႈႁွမ်ၶဝ်ၵႃႈမိူဝ်ႈၵႆႈ ၶႃႈတင်းဢမ်ႇႁၼ်လႃႇ သင်ၼၼ်တႄႉ ၸွႆႈဢဝ်မႃးပၼ်ယဝ်ႉ”
“ႁိုဝ်တေႁၼ်ႁင် ၵုမ်ႇတူၺ်းမၢၵ်ႇၵႅမ်ႈၶွင်ႇၵူၺ်းလူႉ” တင်းလၢတ်ႈ တင်းယိပ်းဢဝ်ထူင်လိၵ်ႈဢၼ်ၼိုင်ႈ ယိုၼ်ႈပၼ်တီႈၶမ်းလၢဝ်ၵႂႃႇ “ဢူႈသူသူင်ႇမႃး”
ၶမ်းလၢဝ်ၵေႃႈၼႅတ်ႈၸၵ်ႉဢဝ်ယဝ်ႉ ၵႂႃႇသိၵ်ႇထူင်မၼ်းႁေတူၺ်းၵမ်းလဵဝ် ၼႂ်းၽိုၼ်လိၵ်ႈၼၼ်ႉတႄႉၵေႃႈ လၢတ်ႈမႃးဝႃႈ
ထိုင်/
လုၵ်ႈယိင်း ၶမ်းလၢဝ်
ဢမ်ႇလႆႈထူပ်းၵၼ်ႁိုင်ယဝ်ႉ ဢူႈလႄႈတင်းမႄႈၵေႃႈ ယိၼ်းၶုၵ်းၸႂ်လႆႈၶႆႈၸႂ်ထိုင်ယူႇ။
လိၵ်ႈၽိုၼ်ၼႆႉတႄႉ ၶႂ်ႈၽၢၵ်ႇႁႂ်ႈလုၵ်ႈယိင်းလႆႈႁူႉဝႃႈ သင်လုၵ်ႈၸႂ်ထိုင်ႁိူၼ်းၸိုင် ဢွၵ်ႇဝႃႇဢိုတ်းႁဵၼ်းယဝ်ႉၼႆၵေႃႈ ပွၵ်ႈမႃးလႄႇမႃးၸႂ်းၶိုၼ်းႁိူၼ်းလႆႈယူႇၼႃႈ ယဝ်ႉၵေႃႈ သင်တႅပ်းတတ်းလႆႈဝႃႈ လုၵ်ႈၶႂ်ႈႁဵတ်းၵၢၼ်သင်ၼႆၵေႃႈ ဢူႈလႄႈတင်းမႄႈ တေၵမ်ႉထႅမ်ပၼ်ၵူႈၸိူဝ်ႉၵူႈလွင်ႈယဝ်ႉ။
ဢူႈလႄႈတင်းမႄႈၵေႃႈယူႇလီၵိၼ်ဝၢၼ်ယူႇၵူၺ်း ၼွင်ႉၸၢႆးလုၵ်ႈၵေႃႈ ပီႊၼႆႉတႄႉ မၼ်းလႆႈၵႂႃႇၶိုၼ်ႈႁဵၼ်းၼွၵ်ႈမိူင်းယဝ်ႉ၊ လုၵ်ႈယိင်းၵေႃႈ ႁႂ်ႈယူႇလီၵိၼ်ဝၢၼ်သေၵမ်း။
ၵေႃႉပဵၼ်ဢူႈ
မေႃသွၼ် သႅင်ဝၼ်း
13/10/2016
ၶမ်းလၢဝ်လူသုတ်းၵႂႃႇယဝ်ႉၵေႃႈ ထူၺ်ႈၸႂ်လူင်မႃးသေ ၼင်ႈငဝ်ယူႇ။ ၼၢႆးႁၼ်မၼ်းပဵၼ်ၼၼ်မႃးၵေႃႈ
“ဢူႈသူဝႃႈႁင်မႃးလႃႇယိင်း..”
“ဢူႈႁဝ်းဝႃႈ..ၶႂ်ႈမိူဝ်းၵေႃႈမိူဝ်းလႆႈယဝ်ႉၼႆဝႃႇ”
“ယိင်းသမ်ႉၶႂ်ႈမိူဝ်းယူႇႁႃႉ”
သဵင်တီႈၼၼ်ႈၵေႃႈယဵၼ်သႅပ်းၵႂႃႇၵႅပ်ႉၼိုင်ႈ ၶမ်းလၢဝ်ၸင်ႇလၢတ်ႈဢွၵ်ႇမႃး “ဢိုမ်ႈ..”
“ပေႃးၶႂ်ႈမိူဝ်းၵေႃႈမိူဝ်းၼၼ်ႉၼႃႇ ဢူႈသူပေႃးဝႃႈၼၼ်မႃးယဝ်ႉလူး”
ယၢမ်းၵၢင်ၶမ်ႈ သၢႆလႅင်းၵၢၼ်ႈပႅၵ်ႇပိူင်းထွင်ႇၸွမ်းသၢႆသဵၼ်ႈတၢင်း ၼႃႈႁိူၼ်းၽႂ်ႁိူၼ်းမၼ်း ပိူင်းလႅင်ၸွင်းႁွင်းၸႅင်းႁႅင်းလူင်ၵႂႃႇသဵင်ႈ ၸွမ်းၵိဝ်ႇၸွမ်းသွႆးၵေႃႈ ႁိူဝ်ႈလႅင်းလႅင်လူင်ဝႆႉ ႁၢင်ႈလီလူလီတူၺ်းတႄႉတႄႉယဝ်ႉ၊ လိူဝ်ၼၼ်ႉ တီႈၼႂ်းဝၢင်းဝတ်ႉၵျွင်းၼၼ်ႉၵေႃႈ မီးတင်းတူၼ်ႈပႅၵ်ႇလူင်ယႂ်ႇယႂ်ႇ တႂ်ႈပိူင်းလႅင်းယူႇႁိမ်းၶဵင်ႇမူၼ်ႈသိူဝ်းၶဝ် ဢၼ်မီးသဵင်ၵွင်သဵင်မွင်း ၵႃႈၼူၵ်ႉၵႃႈတူဝ်း၊ ၵႃႈလၢႆးလႅဝ်းလၢႆးၶွၼ်ႉ သဵင်ႁုၼ်ႉသႅၼ်ႇလင်မေႃးပၼ်းဢူၼ်၊ ၶမ်းလၢဝ်၊ ၼွင်ႉလႅင် ထႅင်ႈတင်း သႅင်ၼူၼ်းၼၼ်ႉၵေႃႈ ပႆလႅပ်ႈလူင်ၵႂႃႇၸွမ်းပွႆး ငွၵ်ႈတူၺ်းၵႂႃႇၸွမ်းသႅင်ႇ ဢၢႆၶင်ႇပွင်းထူဝ်ႇၽူးၶူဝ်ႈၶဝ် သႅဝ်မၼ်းပေႃးသိင်ႉလူင်မႃးၼႂ်းၶူႈၼင်ၵေႃႈ လႆႈၸုၵ်းတူၺ်းသေ ပႆပူၼ်ႉၵႂႃႇၵူၺ်း၊ သႅဝ်ၶဝ်ႈသဵၼ်ႈၶဝ်ႈသွႆးၶဝ်ႁွမ်ယူႇၵေႃႈ လႆႈတၢင်းတွင်ႉႁွင်ႉၸွမ်းၵူၺ်းလႄႈ ၸင်ႇပႆလႅပ်ႈၵႂႃႇၸိူဝ်းပိူၼ်ႈတေႃႇမၢၵ်ႇၵိင်ႈလွႆၵၼ်ၼၼ်ႉသေ ႁၼ်ပိူၼ်ႈလႆႈ ၶႂ်ႈၸၢမ်းတူၺ်းယူႇၵေႃႈ သမ်ႉဢမ်ႇမီးငိုၼ်းသႂ်ႇမၼ်း၊ သိုပ်ႇပူၼ်ႉၵႂႃႇထႅင်ႈယဝ်ႉ ၶဝ်ႈၵႂႃႇၼႂ်းပၢင်မူၼ်ႈသိူဝ်း တီႈပိူၼ်ႈၵႃႈၼူၵ်ႉၵႃႈတူဝ်းၵၼ်ယူႇ မူင်းမူင်း မူင်းၶျၶျၢင်း ဝၢၼ်ႈယဝ်ႉဝၢၼ်ႈ ဢွၼ်ၵၼ်မႃးၵႃႈၶႄႉၵၼ်ယူႇၼႂ်းပၢင်ၼၼ်ႉယဝ်ႉ။
ၶဝ်ၵေႃႈ ဢမ်ႇႁူႉတေသိုပ်ႇၵႂႃႇတၢင်းလႂ်ယဝ်ႉလႄႈ ဢွၼ်ၵၼ်ၸုၵ်းတူၺ်းပိူၼ်ႈၵႃႈယူႇတီႈၼၼ်ႈသေ၊ ပေႃးဝႃႈၵႃႈၼူၵ်ႉၵႃႈတူဝ်းယဝ်ႉ ၸဝ်ႈၸၢတ်ႈၶဝ်ၼၼ်ႉ မႃးၶိုၼ်ႈၼိူဝ်ၶဵင်ႇ ဝတ်ႉၵႂၢမ်းပၢၼ်ၵဝ်ႇ ၵဝ်းၵၼ်ၵႂႃႇၵႂႃႇမႃးမႃးယူႇႁဵတ်းၼၼ်။ ၶမ်းလၢဝ်ၼၼ်ႉတႄႉ ဢမ်ႇယၢမ်ႈမႃးၸုၵ်း တူၺ်းပိူၼ်ႈႁွင်ႉၵႂၢမ်းဝၢၵ်ႇၵၼ်ၸိူင်ႉၼႆႁေပွၵ်ႈ ပွၵ်ႈၼႆႉပဵၼ်ပွၵ်ႈဢွၼ်တၢင်းသုတ်း ၼႂ်းၸၢတ်ႈပၢၼ်မၼ်းယဝ်ႉလႄႈ ႁၼ်ဝႃႈ ၼွင်ႉလႅင်တင်းသႅင်ၼူၼ်းၼၼ်ႉ ပဵၼ်ဢၼ်သူၼ်ၸႂ်ၶႂ်ႈတူၺ်းဝႆႉသေ တူၺ်းၵႂႃႇၸွမ်းၶႃၵူၺ်း။
ၸုၵ်းၵႂႃႇၸုၵ်းမႃး ၶႂ်ႈၵူၼ်ႉမႃးယဝ်ႉ သႅင်ၼူၼ်းၵေႃႈ ၵၢၼ်းၵႂႃႇတီႈၵူၼ်းၶႂ်ႈႁၢမ်ႉႁၢင်ႇဝႆႉတၢင်းၼႃႈပိူၼ်ႈၼၼ်ႉသေ ဢဝ်သၢတ်ႇမၼ်းၵႂႃႇသိူဝ်ႈယဝ်ႉၵေႃႈ ၶဝ်သၢမ်ၵေႃႈ ၼင်ႈႁေတူၺ်းၸွမ်းၵၼ်ၵႂႃႇထႅင်ႈ။
ပေႃးမႃးတူၺ်းၶဝ်ႁွင်ႉၵႂၢမ်းၸိူင်ႉၼၼ်ၵေႃႈ ၼင်ႇႁၢင်ႈမိူၼ်ပိူၼ်ႈတူၺ်းၸၢတ်ႈၸိူင်းဝႆႉလႄႈ ၵွႆႈတူၺ်းၵွႆႈလီတူၺ်းဝႆႉသေ ၼင်ႈတူၺ်းၵႂႃႇ ပေႃးလိုမ်းတူၺ်းၶၢဝ်းယၢမ်းဝႃႈမၼ်းလိုၵ်းၼႃႇယဝ်ႉ၊ ၼွင်ႉလႅင်တႄႉ လီတူၺ်းၼႃႇၵေႃႈ ဢမ်ႇပေႉတႃၼွၼ်းလႆႈယဝ်ႉလႄႈ ၼွၼ်းလပ်းဢိင်ၶႅၼ်းၶမ်းလၢဝ်ၵႂႃႇယဝ်ႉ။ ယၢမ်းၼၼ်ႉ ၶမ်းလၢဝ်ၸင်ႇတေၾၢင်ႉတူၺ်းႁိမ်းႁွမ်းမၼ်းၼၼ်ႉ ၵူၼ်းပေႃးႁၢင်ႇလူင်ၵႂႃႇသဵင်ႈယဝ်ႉ။ ၾႆးပႅၵ်ႇဢၼ်တႆႈလႅင်းလုၵ်ႉႁုၼ်ႈႁုၼ်ႈယူႇမိူဝ်ႈၵႆႈၼၼ်ႉၵေႃႈ ၵိုတ်းၵႅၼ်ႇတေႃမၼ်းၵူၺ်းသေ လၢတ်ႈၸူးသႅင်ၼူၼ်းၵႂႃႇ
“ၶဝ်တေယဝ်ႉလၢႆမွင်းလႃႇၼႆႉသႅင်ၼူၼ်း”
“တေႃႇမိူင်းလႅင်းယူႇၶႃႈဢေႃႈ..”
“ႁိူဝ်!..တေႃႇမိူင်းလႅင်းတႄႉ ဢမ်ႇပေႉတူၺ်းလႆႈယဝ်ႉဝႃႈ..ၶႂ်ႈၼွၼ်းၼႃႇယဝ်ႉ”
“တူၺ်းထႅင်ႈဢိတ်ႉၼိုင်ႈၶႃႈလႄႈ ၼိုင်ႈပီႊၸင်ႇၼိုင်ႈပွၵ်ႈၵူၺ်း၊ ၵူႈပွၵ်ႈ ၶႃႈလႄႈတင်းမႄႈ ပေႃးမႃးတူၺ်းၼႆ ၼင်ႈႁေတူၺ်းၸွမ်းၵၼ် တေႃႇမိူင်းသမ်ႉပေႃးလႅင်းယဝ်ႉ” မၢၵ်ႇတႃသႅင်ၼူၼ်းၼၼ်ႉတႄႉ တိုၵ်ႉတင်ႈတုၵ်းသုၵ်းယူႇ။
“ဢမ်ႇၶၢမ်ႇလႆႈယဝ်ႉ”
“ၼွၼ်းမွၼ်တၵ်းၶႃႈလႄႈ သၢတ်ႇၵႂၢင်ႈပေႃးတၢၼ်ႇသင် ၵူၼ်းၵေႃႈဢမ်ႇမီးယဝ်ႉ”
ၸူဝ်ႈႁူႉၸၵ်းသႅင်ၼူၼ်းမႃးၼၼ်ႉ ဢမ်ႇတွၼ်ႉႁၼ်မၼ်းတိုဝ်တၼ်လႆႈတၢၼ်ႇၼႆႉသေပွၵ်ႈ။ မိူၼ်ဝႃႈ မၼ်းၵေႃႈလႅပ်ႈတေလႆႈၸႂ်တူၺ်းပိူၼ်ႈၵႃႈၸၢတ်ႈၼႆႉတေႉယဝ်ႉ၊ ၶမ်းလၢဝ်ၵေႃႈ ၸူဝ်ႈတိုၵ်ႉမီးၶၢဝ်းယၢမ်းလႆႈယူႇၸွမ်းၵၼ်ယူႇၼၼ်ႉ ၸွမ်းၸႂ်သႅင်ၼူၼ်းသေ သွင်ၶႃၼွင်ႉလႅင်ၼၼ်ႉတႄႉ ၼွၼ်းမွၼ်တၵ်းသႅင်ၼူၼ်းၵႂႃႇ ၵေႃႉၽၢၵ်ႇၽၢၵ်ႇ တေႃႇမိူင်းပေႃးလႅင်းယဝ်ႉ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ။
