တွၼ်ႈသၢဝ်းသီႇ
“ထွမ်ႇထွမ်ႇ!! ထွမ်ႇတီႈၼႆႈၵွၼ်ႇ..”
ၶမ်းလၢဝ်တင်းတူပ်းမိုဝ်းတင်းႁွင်ႉလၢတ်ႈ လုၵ်ႈႁဵၼ်းၶဝ်ယဵၼ်ၵႂႃႇသေ ၶမ်းလၢဝ်သိုပ်ႇၶႆႈထႅင်ႈ
“ၶႃသွင်ၵေႃႉၵေႃႈ ယမ်းၾူၼ်လူင်ၵႂႃႇ ၵေႃႉပဵၼ်လုၵ်ႈဢွၼ်ႇ ဢၢႆႈလႅင်ၼၼ်ႉသမ်ႉ ပေႃးၾူၼ်တူၵ်းၼႆ မၼ်းၸူမ်းၼႃႇ တဝ်ၼမ်ႉႁေ လႅၼ်ႈလူင်ၵႂႃႇတၢင်းၼႃႈမႄႈၶဝ်ၼၼ်ႉတိၵ်းတိၵ်း၊ ၶႃၼၼ်ႉၵေႃႈ ႁႃႁဵပ်းတင်းႁိုင်ၵေႃႈဢမ်ႇၺႃး သမ်ႉဢွၼ်ၵၼ်ၵႂႃႇတိၵ်းတိၵ်း တေႃႇထိုင်ၵၢင်ဝၼ်းပေႃးလပ်းသိင်ႇယဝ်ႉ၊ ၶမ်ႈယဝ်ႉ ၾူၼ်ၵေႃႈႁိူတ်ႇသေ ၶႃမႄႈလုၵ်ႈၼၼ်ႉၵေႃႈ ဢွၼ်ၵၼ်ၼွၼ်းယူႇတီႈငဝ်ႈမႆႉႁုင်းလူင် ႁိမ်းၽင်ႇၼမ်ႉၼၼ်ႉယဝ်ႉ။
ၵတ်းၵေႃႈၵတ်းဝႃႈၵတ်း ၽႃႈၵေႃႈဢမ်ႇမီး ယုင်းၵေႃႈသမ်ႉလိူင်ႇထႅင်ႈ ၾႆးၵေႃႈဢမ်ႇၸၢင်ႈၸုတ်ႇ ယၢမ်းၼၼ်ႉ ၶုၼ်ၾီဢၼ်ယူႇၼိူဝ်မိူင်းၾီၼၼ်ႉ တူၺ်းလူင်းမႃး ႁၼ်ၶႃမႄႈလုၵ်ႈ ၼွၼ်းၵတ်းယူႇလႄႈ ၸင်ႇၽၢၼ်ႇႁဵတ်းမုၵ်ႉၾႆးပၼ်ၶႃၵႂႃႇ၊ ၵေႃႉပဵၼ်မႄႈဢၢႆႈလႅင် မိူဝ်ႈႁၼ်မုၵ်ႉၾႆးမီးယူႇႁိမ်းၶႃၼၼ်ႉၵေႃႈ ၸင်ႇလႆႈဢဝ်သိူဝ်ႈၶူဝ်းၶႃမႄႈလုၵ်ႈ မႃးယၢင်ႈၾႆးယူႇ၊ မိူဝ်ႈယၢင်ႈၾႆးယူႇၼၼ်ႉၵေႃႈ ယုင်းႁမ်ႉလိူင်ႇၼႃႇလႄႈ ၵမ်းၵမ်းလႆႈပၢပ်းယုင်းယူႇတိၵ်းတိၵ်း ၶူဝ်းသမ်ႉပေႃးဢမ်ႇႁႅင်ႈလႆႈႁေပွၵ်ႈ မၼ်းၵေႃႈႁႅၼ်ၶိုၼ်ႈၾႃႉႁေ ပွင်ႉၸူးၸဝ်ႈၶုၼ်ၾီဝႃႈ “ တႃႉၶႂ်ႈမီးသုတ်းၵူၺ်းယဝ်ႈဝႃႈ လုၵ်ႈၵဝ်တေဢမ်ႇလႆႈၼွၼ်းပၼ်ယုင်းၶူပ်းယူႇ” ၵမ်းၼၼ်ႉ ၶုၼ်ၽီၵေႃႈ တူၺ်းၵႂႃႇတီႈႁူင်းယႃၼၼ်ႉ ႁၼ်သုတ်းဝႆႉလႄႈ ၸင်ႇဢဝ်သုတ်းမႃးပၼ်ၶႃမႄႈလုၵ်ႈႁေ မႄႈမၼ်းၵေႃႈဢဝ်ၵင်ႈပၼ်လုၵ်ႈမၼ်းၵႂႃႇ ၶႃမႄႈလုၵ်ႈၵေႃႈ ၼွၼ်းလပ်းၵႂႃႇတီႈၼၼ်ႈႁေယဝ်ႉ”
“ၶုၼ်ၽီဢမ်ႇမေႃႁဵတ်းသုတ်းၶႃႈႁႃႉ ပဵၼ်သင်လႄႈတေလႆႈၵႂႃႇဢဝ်တီႈႁူင်းယႃၶႃႈ”
“မိူဝ်ႈၵွၼ်ႇၵွၼ်ႇၼၼ်ႉ မီးႁူင်းယႃႁေၶႃႈႁႃႉ”
ၸုမ်းမေႃယႃၶဝ်ၼၼ်ႉၵေႃႈ ယၵ်ႉတူၺ်းၶမ်းလၢဝ်သေယုမ်ႉယူႇႁင်းၽႂ်ႁင်းမၼ်း၊ တေဝႃႈႁိုဝ်ၵေႃႈ ဢမ်ႇၸႂ်ႈၵူၼ်းမေႃလႄႈ မၼ်းၵေႃႈ ၼင်ႇႁိုဝ်လုၵ်ႈဢွၼ်ႇၶဝ်ပေႃးတေၶဝ်ႈၸႂ်ၼၼ်ႉ ၶတ်းၸႂ်ႁဵတ်းပၼ်ၵူၺ်းၵေႃႈ လီၼႃႇယဝ်ႉၼင်ႇၵဝ်ႇ။
“ၶုၼ်ၽီၽၢၼ်ႇႁဵတ်းဝႆႉပၼ်ႁႂ်ႈမီးႁူင်းယႃ တႃႇယူတ်းယႃၵူၼ်းပဵၼ်ၼၼ်ႉၼႃႇ၊ မၼ်းဝႃႈတီႈႁူင်းယႃ မီးသုတ်းယူႇလႄႈ ၼင်ႇႁိုဝ်တေဢမ်ႇလႆႈႁဵတ်းသုတ်းၼၼ်ႉ မၼ်းၵေႃႈမႃးဢဝ်တီႈႁူင်းယႃၵႂႃႇပၼ်ၼၼ်ႉယိုင်”
“ယဝ်ႉၸွင်ႇၶႃတေမႃးႁွတ်ႈႁိူၼ်းၶိုၼ်းႁႃႉ”
“ပႂ်ႉထွမ်ႇလႄႈ…
ထိုင်ၼင်ႇၵၢင်ၼႂ်မႃး ဢၢႆႈလႅင်ၼၼ်ႉၵေႃႈ ၼိူဝ်ႉလိူတ်ႇၼိူဝ်ႉမႆႈမႃးၼႃႇယဝ်ႉလႄႈ ၵုမ်ႇႁႆႈယူႇတိၵ်းတိၵ်း မႄႈၶဝ်ၼၼ်ႉၵေႃႈ ၼႅတ်ႈၸေးဢဝ်မၼ်းသေ ပွၵ်ႈႁိူၼ်းၶိုၼ်းယဝ်ႉ၊ မႄႈမၼ်းၵေႃႈ လႅပ်ႈဢမ်ႇယူႇလီမႃးႁေ ၵမ်းၵမ်းဢႆတိၵ်းတိၵ်း၊ ႁူဝ်ၵေႃႈၶႆႈႁႅင်းၼႃႇ ၵႂႃႇၵႂႃႇၵေႃႈ ဢမ်ႇမီးႁႅင်းယဝ်ႉ လူမ်ႉၼွၼ်းယူႇၼႂ်းၵၢင်တၢင်း တီႈၼႂ်းၵၢင်ပႃႇထိူၼ်ႇၼၼ်ႉယဝ်ႉ၊ ဢၢႆႈလႅင်ၼၼ်ႉၵေႃႈ မိူဝ်ႈမႄႈမၼ်းလူမ်ႉၼွၼ်းၵႂႃႇႁဵတ်းၼၼ် ၵႂႃႇၶဝ်ႇၶဝ်ႇၶွၼ်းၶွၼ်း ႁွင်ႉႁွင်ႉႁႆႈႁႆႈယူႇႁဵတ်းၼၼ်သေ မၼ်းၵေႃႈ ၼင်ႈႁႆႈႁေယၢႆးတိၼ်မၼ်းယူႇတိၵ်းတိၵ်း ပေႃးၾူၼ်တူၵ်းယဝ်ႉ တဝ်ၼမ်ႉၼႆ တိၼ်မၼ်းသမ်ႉၵႆႉၶူမ်းၼႃႇလႄႈ ပေႃးလႅင်ပေႃးၶူမ်းလူင်ၵႂႃႇသဵင်ႈယဝ်ႉယိုင်”
ၶမ်းလၢဝ်ၵိုတ်းၵႂႃႇယဝ်ႉၶိုၼ်းထၢမ်လုၵ်ႈဢွၼ်ႇ
“မိူဝ်ႈလဵဝ်ၸွင်ႇမီးၽႂ်ပဵၼ်တိၼ်ၶူမ်းႁႃႉ ယုၵ်ႉမိုဝ်းတူၺ်းလူး”
လုၵ်ႈဢွၼ်ႇသွင်သၢမ်ၵေႃႉယုၵ်ႉမိုဝ်းၼႄ ၶမ်းလၢဝ်ထၢမ်ၸူးၶဝ်“ႁဵတ်းႁင်လႄႈဢၢႆႈလႅင်တိၼ်မၼ်းၶူမ်း”
“မၼ်းတဝ်ၼမ်ႉၾူၼ်..”
“ၸၢႆးၶဝ်လူး ၸွင်ႇတဝ်ၼမ်ႉႁိုဝ်”
ၸႃႉဢၼ်ယုၵ်ႉမိုဝ်းမိူဝ်ႈၵႆႈၼၼ်ႉ ဢွၼ်ၵၼ်ငွၵ်းႁူဝ်ၸွမ်း။
“ယဝ်ႉၵေႃႈ ၸွင်ႇမီးၽႂ်ၶႂ်ႈၼၢဝ်ယူႇႁႃႉ!!” ၶမ်းလၢဝ်သိုပ်ႇထၢမ်ထႅင်ႈ
“ဢမ်ႇၶႃႈ..” ဢွၼ်ၵၼ်တွပ်ႇၸူး
“ပေႃးဢမ်ႇယူႇလီၼႆႉ မၼ်းမိူၼ်ႁိုဝ်ၼႆ ၸၢႆးဝၼ်းလၢတ်ႈၼႄတူၺ်းလူး”
ၸၢႆးဝၼ်းၵေႃႈ တင်းသဵင်ဢႆၶူၵ်ႉၶူၵ်ႉၼၼ်ႉႁေ လုၵ်ႉၸုၵ်းယဝ်ႉ မိူၼ်တေလၢတ်ႈၵူၺ်းဢမ်ႇႁူႉဝႃႈတေလႆႈလၢတ်ႈၸိူင်ႉႁိုဝ်၊ “ၸွင်ႇမီးႁႅင်းႁႃႉ” ၶမ်းလၢဝ်ထၢမ်။
ၸၢႆးဝၼ်းတွပ်ႇ “ဢမ်ႇမီးၶႃႈ”
“ၸွင်ႇၶႂ်ႈၵိၼ်ၶဝ်ႈ”
“ဢမ်ႇၶႃႈ”
“ၸွင်ႇၸၢႆးဝၼ်းဢေႃႉႁၢၵ်ႈယူႇႁိုဝ်”
“ဢေႃႈ”
“ႁူဝ်ၸွင်ႇမဝ်း”
ၸၢႆးဝၼ်းငွၵ်းႁူဝ်ၼႄၵႂႃႇ
“ၸွင်ႇၶႂ်ႈပဵၼ်ထႅင်ႈ”
“ဢမ်ႇၶႃႈ”
ဢႁူၵ်ႉ!! ႁူၵ်ႉႁူၵ်ႉ.. မႄးဢႆၼႄထႅင်ႈၵမ်းၼိုင်ႈယဝ်ႉ ၼင်ႈၶိုၼ်းတီႈၼင်ႈမၼ်းၵႂႃႇ။
ၶမ်းလၢဝ်မႄးသိုပ်ႇလၢတ်ႈထႅင်ႈ “ပေႃးဢမ်ႇယူႇလီၼႆ သူဝူၼ်ႉဝႃႈၸွင်ႇမၼ်းၵျေႃႇႁိုဝ်”
“ဢမ်ႇၵျေႃႇၶႃႈ!!”
“ပေႃးၼၼ် ႁဝ်းတေလႆႈႁဵတ်းၸိူင်ႉႁိုဝ်လႃႇ” လုၵ်ႈဢွၼ်ႇၶဝ်ၵေႃႈဢမ်ႇႁူႉလႄႈ ၼင်ႈယဵၼ်လူင်ၵႂႃႇ ၶမ်းလၢဝ်ၸင်ႇၶိုၼ်းလၢတ်ႈထႅင်ႈ “ၸွင်ႇၶႂ်ႈႁူႉႁိုဝ် ႁဵတ်းသင်လႄႈ မႄႈဢၢႆႈလႅင် ၶဝ်ၼၼ်ႉ လႆႈၼွၼ်းလူမ်ႉၼႂ်းၵၢင်ထိူၼ်ႇၼၼ်ႉၼႆ”
“ၶႂ်ႈႁူႉဢေႃႈ!” တွပ်ႇၽွမ်ႉၵၼ်မႃး။
“ယွၼ်ႉပိူဝ်ႈ ၶဝ်တၢၵ်ႇၾူၼ် ဢမ်ႇပႃးၸွင်ႈသေယဝ်ႉ ႁမ်ႉပွႆႇႁႂ်ႈယုင်းၶူပ်းၵၢင်ၶမ်ႈၼၼ်ႉၼႃႇ၊ ပေႃးတၢၵ်ႇၾူၼ် ၶူဝ်းယၢမ်းၵေႃႈ ၵႆႉၸၢင်ႈပဵၼ်ဝတ်းပဵၼ်ဢၢၼ်၊ ပေႃးပွႆႇႁႂ်ႈယုင်းၶူပ်းၵေႃႈ ၵႆႉဢမ်ႇယူႇလီ၊ ပေႃးတဝ်ၼမ်ႉလဵၼ်ႈၼမ်ႉၼႃႇသမ်ႉ တိၼ်ၵႆႉၶူမ်းၼၼ်ႉၼႃႇ”
“မေႃသွၼ်!! ၶႃမႄႈလုၵ်ႈၼၼ်ႉ ၸွင်ႇတေမိူဝ်းႁိူၼ်းလႆႈႁိုဝ် ၶုၼ်ၽီဢမ်ႇၸွႆႈၶႃႁႃႉ”
“ပေႃးၼၼ် လၢတ်ႈၼႄမေႃသွၼ်တူၺ်းလူး ယွၼ်ႉသင်လႄႈ ၸၢႆးလႅင်ၶႃမႄႈလုၵ်ႈ ဢမ်ႇယူႇလီ ပဵၼ်လူမ်းတီႈၼႂ်းၵၢင်ပႃႇထိူၼ်ႇၼၼ်ႉၼႆ”
ဢွၼ်ၵၼ်ႁိမ်တွပ်ႇ၊ သဵင်သမ်ႉပေႃးဢူၼ်မေႃးပၼ်းလူင်ၵႂႃႇသဵင်ႈ ပေႃးဢမ်ႇငိၼ်းၶေႃႈမၼ်းယဝ်ႉ။ ၶမ်းလၢဝ်ၵေႃႈ မႄးၶႆႈၵႂႃႇထႅင်ႈ
ၶုၼ်ၽီႁၼ်ၶႃပဵၼ်ၼင်ႇၼၼ်ၵေႃႈ ဢီးလူၶႃၼႃႇႁေ လူင်းမႃးၸူးၶႃယဝ်ႉ လၢတ်ႈဝႃႈ− ပေႃးဝႃႈၶိူဝ်ဢမ်ႇထွမ်ႇၵႂၢမ်းၵဝ်တႄႉ ၵဝ်ၵေႃႈဢမ်ႇၸၢင်ႈၸွႆႈထႅမ်ၶိူဝ်လႆႈ သင်ၶိူဝ်ႁဵတ်းၸွမ်းၼင်ႇၵဝ်လၢတ်ႈတႄႉ ၶိူဝ်သွင်ၵေႃႉ တေၸိုၼ်ႈၶႅၼ်းၶိုၼ်းလႄႈ တေဢမ်ႇပဵၼ်ၸိူင်ႉၼႆမႃးထႅင်ႈ။
ၵေႃႉပဵၼ်မႄႈဢၢႆႈလႅင်ၼၼ်ႉၵေႃႈ ၶုပ်ႉၶဝ်ႇဝႆႈၶုၼ်ၽီႁေဝႃႈ−ၶႃႈတေလႆႈႁဵတ်းၸိူင်ႉႁိုဝ်ၶႃႈ ၶႃႈတေႁဵတ်းၸွမ်းၵူႈလွင်ႈၶႃႈယဝ်ႉ။
ၶုၼ်ၽီၸင်ႇလၢတ်ႈတီႈၶႃၵႂႃႇ− ပေႃးဝႃႈၶိူဝ်သွင်ၵေႃႉမႄႈလုၵ်ႈ တေၵႂႃႇတႃႈၵႂႃႇတၢင်းၼႆ ပႃးၽႃႈယၢင်၊ ပႃးၵုပ်း၊ ပႃးမၢၵ်ႇႁူဝ်၊ ပႃးၸွင်ႈယူႇတႃႇသေႇတႃႉ၊ လုၵ်ႈဢွၼ်ႇမႂ်းၼၼ်ႉၵေႃႈ ယႃႇပွႆႇႁႂ်ႈမၼ်းလဵၼ်ႈၼမ်ႉၵူမ်ႇၼမ်ႉဢုင်ၵူၺ်းၵေႃႈ ၶႃမၼ်းတေၸဵဝ်းၶႅၼ်းယူႇ၊ သုတ်းၵေႃႈ ၵဝ်ပၼ်ၶိူဝ်မႄႈလုၵ်ႈယဝ်ႉ ပေႃးၼွၼ်းၵၢင်ၶမ်ႈၵေႃႈ ၼွၼ်းၼႂ်းသုတ်းတႃႉ၊ သုတ်းၼၼ်ႉလုမ်းလႃးလီလီလႄႈ ယႃႇပၼ်ႁႂ်ႈမၼ်းပွင်ႇ ပၼ်ႁႂ်ႈယုင်းၶဝ်ႈၼႃႉ၊ ပေႃးၺႃးၵူမ်ႇၺႃးဢုင်ၼႆၵေႃႈ သုၵ်ႈသီပၼ်ႁႂ်ႈတူဝ်ၶိင်းပေႃးမူတ်းသႂ်ၼႃႈ ယႃႇပေယူႇဝူၺ်ႇယူႇႁင်ႈၼႃႇၽႅဝ် ဝႃႈၼႆတီႈၶႃမႄႈလုၵ်ႈႁေယဝ်ႉၵေႃႈ ႁၢႆလၢႆၵႂႃႇပႅတ်ႈယဝ်ႉ။
ၶႃသွင်ၵေႃႉမႄႈလုၵ်ႈၼၼ်ႉၵေႃႈ တိုၵ်ႉၵူမ်ႈလပ်းတႃဝႆႈၶုၼ်ၽီယူႇ ဢမ်ႇတၼ်းႁူႉ သမ်ႉပေႃးၵႂႃႇမီးယူႇတီႈႁူင်းယႃၼၼ်ႉယဝ်ႉလႄႈ မီးမေႃယႃၶဝ်မႃးယူတ်းယႃပၼ်ၵႂႃႇ။
ယွၼ်ႉပိူဝ်ႈၶႃဢမ်ႇႁူႉသေယဝ်ႉ လႆႈႁဵတ်းၽိတ်းၵႂႃႇ တၢင်းၽိတ်း ဢၼ်ဢမ်ႇလုမ်းလႃးတူဝ်ၸဝ်ႈၵဝ်ႇၼၼ်ႉၼႆသေ ၶုၼ်ၽီဢမ်ႇၸွႆႈသင်လႆႈ ၵူၺ်းၵႃႈ ၸွႆႈဢဝ်ၶႃၵႂႃႇတီႈႁူင်းယႃၵူၺ်း၊ ၵွပ်ႈၼၼ် ၸင်ႇႁဵတ်းႁႂ်ႈၶႃဢမ်ႇယူႇလီႁႅင်းၼႃႇ၊ ၼိူဝ်ႉလိူတ်ႇၼိူဝ်ႉမႆႈ၊ ႁူဝ်ၶႆႈႁူဝ်မဝ်း၊ တွင်ႉၶူၼ်ႉၶႆႈႁၢၵ်ႈ၊ တွင်ႉၵႂႃႇတွင်ႉႁေႈ ႁိူဝ်ႉဢူၼ်ႈဢမ်ႇမီးႁႅင်း ၼိုင်ႈဝၼ်းၵေႃႈပႆႇႁၢႆ သွင်ဝၼ်းၵေႃႈပႆႇၶႅၼ်း၊ သၢမ်ဝၼ်းသီႇဝၼ်း ႁႃႈဝၼ်း ႁူၵ်းဝၼ်း ၸဵတ်းဝၼ်း ၸင်ႇတေၶႅၼ်းမႃး၊ ၶႅၼ်းမႃး ယွၼ်ႉပိူဝ်ႈယႃႈယႃ တီႈႁူင်းယႃၼၼ်ႉ မၼ်းၶႂ်ႈၵတ်ႉဝႆႉလႄႈ ဢမ်ႇထိုင်ၼိုင်ႈလိူၼ် သွင်ၶႃၵေႃႈ ယူႇလီၶိုၼ်းမိူၼ်ၵဝ်ႇယူႇယဝ်ႉ၊ ဝၢႆးသေၶႃၶႅၼ်းယဝ်ႉၵေႃႈ ၸိူင်ႉၼင်ႇဢၼ်ၶုၼ်ၽီသင်ႇဝႆႉတီႈၶႃၼၼ်ႉ ၶႃမႄႈလုၵ်ႈၵေႃႈ ဢမ်ႇႁတ်းႁဵတ်းၽိတ်းထႅင်ႈႁေပွၵ်ႈ ယဝ်ႉလႄႈ တႄႇဢဝ်ၼၼ်ႉမႃး သွင်ၵေႃႉမႄႈလုၵ်ႈၵေႃႈ ယူႇလီပီးသၢၼ်းမႃးယူႇယဝ်ႉ။
ဢပုမ်ႇသုတ်းၵႂႃႇယဝ်ႉသေတႃႉ ၶၢဝ်းယၢမ်းတိုၵ်ႉမီးယူႇလႄႈ ၶမ်းလၢဝ်ၵေႃႈ ဢွၼ်ၶဝ်လဵၼ်ႈၸိူင်းယူႇ၊ ဢဝ်ဢပုမ်ႇဢၼ်မၼ်းၶႆႈၼႄမႃးၼႆႉ လိူၵ်ႈၵူၼ်းမႃး လဵၼ်ႈယဝ်ႉ ၽႂ်တေပဵၼ်တူၼ်ႈမႆႉ၊ ၽႂ်တေပဵၼ်ၶုၼ်ၽီ၊ ၽႂ်တေပဵၼ်လိင်း၊ ၽႂ်တေပဵၼ်မူ၊ ၽႂ်တေပဵၼ်သင်ၼႆၵေႃႈ ႁႂ်ႈၶဝ်လိူၵ်ႈသေ ၵေႃႉၼႆႉတေလႆႈႁဵတ်းၸိူင်ႉၼႆ ၵေႃႉၼၼ်ႉတေလႆႈႁဵတ်းၸိူင်ႉၼၼ် သဵင်ပေႃးဢူၼ်ဢၢၼ်မေႃးပၼ်းလူင်ၵႂႃႇသဵင်ႈ သမ်ႉပေႃးထိုင်ၶၢဝ်းယၢမ်းၵိၼ်ၶဝ်ႈယဝ်ႉ။
သမ်ႉဝႃႈလိုဝ်ႈၵိၼ်ၶဝ်ႈယဝ်ႉသေတႃႉ မေႃယႃၶဝ်တႄႉၵေႃႈ ဢမ်ႇတၼ်းလိုဝ်ႈ ၵူဝ်မၼ်းၼၢၼ်းယဝ်ႉလႄႈ လုၵ်ႈဢွၼ်ႇၵေႃႉပႆႇလႆႈၸႅတ်ႈ ၽႂ်ဢၼ်တၼ်းၼႆၵေႃႈ ႁွင်ႉၸႅတ်ႈတိၵ်းတိၵ်းယဝ်ႉ။
ဝၢႆးဝၼ်းယဝ်ႉ ၶမ်းလၢဝ်ၵေႃႈ ဢွၼ်လုၵ်ႈဢွၼ်ႇၶဝ်လဵၼ်ႈၸိူင်းၵၼ်ႁေ ၶၢဝ်းယၢမ်းၵေႃႈသုတ်းသဵင်ႈၵႂႃႇ၊ လုၵ်ႈဢွၼ်ႇၸိူဝ်းယူႇၵႆ ဢၼ်ၸႅတ်ႈဝႆႉတဵမ်ၸဝ်ႉၼၼ်ႉၵေႃႈ ပွၵ်ႈမိူဝ်းၵႂႃႇ၊ ၸိူဝ်းယူႇၸမ်ၵေႃႈ ၵမ်ႈၽွင်ႈမိူဝ်းႁိူၼ်းသေ လၢတ်ႈတေၶိုၼ်းမႃးလႄႈ မႃးၶိုၼ်းၵမ်းၵေႃႉသွင်ၵေႃႉယူႇ။
ဢမ်ႇပေႃးၵိုတ်းၵူၼ်းၼမ်ယဝ်ႉ မေႃယႃၶမ်းဢွင်ႇလႄႈမေႃၽူၺ်းႁွမ်ၼၼ်ႉၵေႃႈ ပွၵ်ႈမိူဝ်းၵႂႃႇထႃႈ၊ ၵိုတ်းၶမ်းလၢဝ်လႄႈမေႃယႃဢွၼ်တိုၼ်း သွင်ၵေႃႉပႂ်ႉဝႆႉ သမ်ႉပေႃးထိုင်ၵၢင်ဝၼ်းၶမ်ႈ ယူႇယဝ်ႉ။
ဝၼ်းမိူဝ်ႈၼႆႉ တွၼ်ႈတႃႇၶမ်းလၢဝ်ၼၼ်ႉ ပဵၼ်ဝၼ်းဢၼ်လီတေႉတေႉယဝ်ႉ၊ ႁဵတ်းႁႂ်ႈမၼ်းဝူၼ်ႉလႆႈဝႃႈ ႁူင်းႁဵၼ်းဢၼ်မၼ်းၶႂ်ႈသၢင်ႈၼၼ်ႉ ပဵၼ်လွင်ႈဢၼ်မၼ်းႁဵတ်းယူႇဝၼ်းမိူဝ်ႈၼႆႉလႄႈ လိၵ်ႈလၢႆးၼၼ်ႉ မၼ်းလမ်ႇလွင်ႈၼႃႇသေတႃႉ တၢင်းယိူင်းဢၢၼ်းလႄႈပဝ်ႉမၢႆ လွင်ႈၶႂ်ႈပဵၼ်လုၵ်ႈဢွၼ်ႇၼၼ်ႉၵေႃႈ လမ်ႇလွင်ႈမိူၼ်ၵၼ်၊ မၼ်းၵေႃႈႁၼ်ဝႃႈ လုၵ်ႈဢွၼ်ႇၶဝ်ၼၼ်ႉ ထုၵ်ႇလီမီးပဝ်ႉမၢႆလႄႈယိူင်းဢၢၼ်း ဢၼ်ၶဝ်ၶႂ်ႈႁဵတ်းၶႂ်ႈပဵၼ်ၼၼ်ႉၼႆလႄႈ လွင်ႈၼႆႉၵေႃႈ ပေႃႇၽုတ်းၶိုၼ်ႈမႃး မိူဝ်ႈၽွင်းမၼ်းႁႂ်ႈလုၵ်ႈဢွၼ်ႇၶဝ်လိူၵ်ႈဝႃႈ တေပဵၼ်ဢီႈသင်ၼႆၼၼ်ႉယဝ်ႉ။ မိူဝ်ႈၽွင်းတိုၵ်ႉသိမ်းၶူဝ်းလဵင်းယူႇၼၼ်ႉ ၶမ်းလၢဝ်ၸင်ႇထၢမ်ၸူးမေႃယႃၵႂႃႇ
“ပီႈမေႃ..ယိူင်းဢၢၼ်းႁဝ်း ၼႃႈၵၢၼ်ဢၼ်ႁဝ်းၶႂ်ႈႁဵတ်းၼၼ်ႉ လိူဝ်သေၵၢၼ်မေႃယႃ၊ ၵၢၼ်ၶူးယဝ်ႉ မီးသင်ထႅင်ႈၶႃႈ”
“မီးတင်းၼမ်ၼၼ်ႉယဝ်ႉ..” မေႃယႃယုမ်ႉသေ “ၵၢၼ်ႁဵတ်းႁႆႈသူၼ်ၼႃး၊ ၵၢၼ်ၼႃႈဝၢၼ်ႈၼႃႈႁိူၼ်း၊ ၵၢၼ်ၸိူဝ်ႉၸၢတ်ႈၸိူဝ်ႉၶိူဝ်း၊ ၵၢၼ်လုမ်းၵၢၼ်ၸၢႆး၊ ၵၢၼ်ၵေႃႇသၢင်ႈမႄးႁိူၼ်း၊ ၵၢၼ်ၵႃႉၵၢၼ်ၶၢႆ မီးထႅင်ႈတင်းၼမ်တင်းလၢႆယဝ်ႉ ၵၢၼ်ၵူႈမဵဝ်း ဢၼ်တိုၵ်ႉမီးၵူၼ်းႁဵတ်းယူႇၼၼ်ႉ မၼ်းမီးၵႃႈၶၼ်လႄႈမၼ်းလမ်ႇလွင်ႈမိူၼ်ၵၼ်”
ၶမ်းလၢဝ်ၵေႃႈ ထွမ်ႇသေဝူၼ်ႉၵႂႃႇၸွမ်း။
မေႃယႃၸင်ႇလၢတ်ႈထႅင်ႈ “ဢမ်ႇဝႃႈၵၢၼ်သင်ၵေႃႈယဝ်ႉ တႃႇတေႁူႉမေႃလူင်ႉလႅၼ်ႇပဵၼ်ၵၢၼ်ၵႂႃႇလႆႈ ႁဵတ်းလႆႈႁႂ်ႈမၼ်းၶိုၼ်ႈယႂ်ႇၵႂႃႇၼႃႈလႆႈၼၼ်ႉ ပၢႆးပိင်ႇၺႃႇၼၼ်ႉ လမ်ႇလွင်ႈၼႃႇ၊ ဢၼ်လမ်ႇလွင်ႈလိူဝ်ပိူၼ်ႈၵေႃႈ ၼမ်ႉၸႂ်ၵၢၼ်ပူၵ်းပွင်ၸွႆႈထႅမ်တူင်ႇဝူင်း ၼၼ်ႉယဝ်ႉ”
“ပဵၼ်သင်လႄႈမၼ်းလမ်ႇလွင်ႈလိူဝ်ပိူၼ်ႈၶႃႈလႃႇ”
“မၼ်းလမ်ႇလွင်ႈဢိူဝ်ႈ.. ႁဝ်းႁူႉႁဝ်းမေႃယဝ်ႉ သင်ဢမ်ႇမေႃဝူၼ်ႉသွၼ်ႇပုၼ်ႈၵူၼ်းၼမ်သေ ဢမ်ႇမီးၼမ်ႉၸႂ်ၶႂ်ႈၶိုၼ်းပူၵ်းပွင်တူင်ႇဝူင်းႁဝ်းၶိုၼ်းၵေႃႈ တူင်ႇဝူင်းႁဝ်းသမ်ႉ တေႁဵတ်းႁိုဝ်ၶိုၼ်ႈယႂ်ႇလႆႈ၊ တၢင်းၵတ်ႉၶႅၼ်ႇဢၼ်ႁဝ်းမီးယူႇၼၼ်ႉ ႁဝ်းၵေႃႈ တေႁူႉတေမေႃၵေႃႉလဵဝ်ၵူၺ်းၼၼ်ႉၼႃႇ၊ ပေႃးၶႂ်ႈႁႂ်ႈတူင်ႇဝူင်းႁဝ်းၶိုၼ်ႈယႂ်ႇ ႁဝ်းၵေႃႈတေလႆႈမီးၼမ်ႉၵတ်ႉ ၼမ်ႉၸႂ်မႃးပူၵ်းပွင်ပၼ်တူင်ႇဝူင်းႁဝ်းၼၼ်ႉယဝ်ႉ”
ၶမ်းလၢဝ်ၵေႃႈ ႁႅၼ်မုင်ႈတူၺ်းၵႂႃႇတၢင်းၼႃႈႁူင်းႁဵၼ်း ၽွင်းၶၢဝ်းၸမ်ၶမ်ႈလပ်းသိင်ႇၼၼ်ႉသေယဝ်ႉ၊ ထူၺ်ႈၸႂ်လူင်မႃး “ၶႃႈဢမ်ႇလႆႈမီးၼမ်ႉၵတ်ႉသင်လူး..ၶႃႈဝူၼ်ႉဝႃႈၶႃႈဢမ်ႇႁဵတ်းလႆႈ..”
မေႃယႃၵေႃႈ ယၵ်ႉတူၺ်းၼႃႈၶမ်းလၢဝ်သေယုမ်ႉၸူး “သူဢဝ်သင်မႃးယိုၼ်ယၼ်လႆႈဝႃႈသူၼၼ်ႉ ႁဵတ်းဢမ်ႇလႆႈ” လုၵ်ႉသေ လၢႆႈၵႂၢမ်းၵႂႃႇပႅတ်ႈ “မိူင်းၸမ်လပ်းသိင်ႇယဝ်ႉ ႁဝ်းဝႃႈ ဢမ်ႇမီးၽႂ်မႃးယဝ်ႉၼႃႈ”
“လႅပ်ႈတေဢမ်ႇမီးယဝ်ႉ..”
သွင်ၶႃၵေႃႈ ၽႄၵၼ်မိူဝ်းၵႂႃႇ တၢင်းၽႂ်တၢင်းမၼ်းယဝ်ႉ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ။
