တွၼ်ႈသၢဝ်းသၢမ်
တီႈၼႂ်းႁူင်းယႃ ဢၼ်ယၢမ်ႈပိၵ်ႉဢိုတ်းဝႆႉၼၼ်ႉၵေႃႈ မိူဝ်ႈလဵဝ်ၼႆႉတႄႉ မိူၼ်ပိုတ်ႇၽုၺ်ႇဝႆႉယူႇတႃႇသေႇၼၼ်ႉယဝ်ႉ။ မေႃယႃၶဝ်ၵေႃႈ သုၵ်ႉသၵ်ႉယူႇႁင်းၽႂ်ႁင်းမၼ်း၊ မေႃယႃၶမ်းဢွင်ႇတေႁၼ်ၶမ်းလၢဝ်မႃးလႄႈ
“မေႃသွၼ်! မႃးႁႃၸၢႆးဝၼ်းၶႃႈႁႃႉ”
“ဢေႃႈ..”
“မေႃယႃလူင်ႁဝ်း ႁႂ်ႈၶဝ်မိူဝ်းတီႈႁိူၼ်းမိူဝ်ႈဝႃးၼႆႉယဝ်ႉဝႃႈ”
“ဢေႃ..ပေႃးၼၼ်ၵေႃႈတေမိူဝ်းၵွၼ်ႇၶႃႈၼႃႈ”
“ဢမ်ႇၵႂႃႇဝႄႉ မေႃယႃလူင်ႁဝ်းဢိတ်ႉၼိုင်ႈၶႃႈၼႄႇ မိူၼ်ဝႃႈၶဝ်ၵေႃႈ မီးလွင်ႈတေၶႂ်ႈထူပ်းမေႃသွၼ်ယူႇၶႃႈဢေႃႈ” သီၼႃႈယုမ်ႉယုမ်ႉ မေႃယႃၶမ်းဢွင်ႇမိူၼ်မီးသေလွင်ႈလွင်ႈ ဝူၼ်ႉႁင်းၵူၺ်းယူႇၼႂ်းၸႂ်ၼၼ်ႉယဝ်ႉ။
ၶမ်းလၢဝ်ၵေႃႈ ဢမ်ႇလႆႈဝူၼ်ႉၼမ်သင် ၵႂႃႇတူၺ်းမေႃယႃဢွၼ်တိုၼ်း ၼႂ်းႁွင်ႈဝႆႉၵူၼ်းပဵၼ်ၼၼ်ႉ လႅပ်ႈသုၵ်ႉသၵ်ႉဝႆႉလႄႈ ၼင်ႈပႂ်ႉဝႆႉယူႇတၢင်းႁိုင် ၵူၺ်းၵႃႈမိူၼ်ၵၢင်ဝၼ်းၸမ်လပ်းသိင်ႇယဝ်ႉၼႆသေ ဢမ်ႇသိုပ်ႇပႂ်ႉလႄႈပွၵ်ႈမိူဝ်းၵႂႃႇယဝ်ႉ။
ၶမ်းလၢဝ်ၵေႃႈ ဝူၼ်ႉဝႃႈၵူႈလွင်ႈၼၼ်ႉ တေလီမႃးယဝ်ႉၼႆလႄႈ ယုမ်ႉလူင်မိူဝ်းၵႂႃႇႁင်းမၼ်းလွႆးလွႆးယဝ်ႉ။ မိူဝ်းႁွတ်ႈၶိုၼ်းတီႈဝၢၼ်ႈ ႁူဝ်ၶမ်ႈလပ်းသိင်ႇယဝ်ႉ ၽုင်ဝူဝ်းၽုင်ၵႂၢႆးၶဝ် ဢွၼ်ၵၼ်ၶဝ်ႈႁႃၶွၵ်ႈၽႂ်တၢင်းမၼ်းယဝ်ႉလႄႈ လုၵ်ႈဢွၼ်ႇလဵင်ႉဝူဝ်းၵႂၢႆးၶဝ်ၵေႃႈ ၶဝ်ႈမိူဝ်းၵႂႃႇႁိူၼ်းၽႂ်ႁိူၼ်းမၼ်းယဝ်ႉ။
ၵၢင်ၶမ်ႈလပ်းသိင်ႇၸွမ်ႉႁွမ်ႉ သဵင်ယုင်းမေႃးႁွင်းႁွင်းႁႅင်းႁႅင်းၵႂႃႇသဵင်ႈ ၶမ်းလၢဝ်ၼင်ႈႁဵတ်းၵၢၼ်မၼ်းႁႃႉ ၼင်ႈတူပ်းယုင်းႁိုဝ်ဢမ်ႇႁူႉယဝ်ႉ သဵင်တူပ်းယုင်းမၼ်း ပေႃးလင်လူင်ၵႂႃႇသဵင်ႈယဝ်ႉ။ ၼၢႆးၵေႃႈ ဢဝ်တင်းတဵၼ်းႁွမ်ၼိူဝ်ၶဵင်ႇၽြႃးၼၼ်ႉ မႃးၸပ်းပၼ်ႁိမ်းမၼ်းၼၼ်ႉ သဵင်ၸင်ႇတေယဵၼ်လႆႈ။
ယူႇယူႇ ငိၼ်းသဵင်တိၼ်ၶိုၼ်ႈႁိူၼ်းမႃး “မေႃသွၼ်..” ၾႆးၶၢဝ်သွတ်ႇလွတ်ႇ ၶူၼ်ႁူဝ်လမ်ယၢဝ်းယၢဝ်း ၼႃႈၽိူၵ်ႇၽိူၵ်ႇငွၵ်ႈယူႇတီႈၽၵ်းတူ ၶမ်းလၢဝ်ဝၢႆႇယၵ်ႉတူၺ်း သမ်ႉပေႃးတူၵ်းၸႂ်လူင်ၵႂႃႇ“ၽဵတ်ႇလွၵ်ႇ!!!”
“ဢမ်ႇၸႂ်ႈ ၼွင်ႉၵူၺ်း”
“ဢေႃ သႅင်ၼူၼ်းႁႃႉ”
“ဢိုမ်ႈ!!..”
“မႃးပေႃးတၢၼ်ႇၽဵတ်ႇယဝ်ႉလႃႇႁမ်ႉ.. မီးလွင်ႈသင်လႃႇ တေမႃးၼွၼ်းႁဵတ်းၶႅၵ်ႇႁႃႉ”
“ဢမ်ႇ!! တေမႃးႁႂ်ႈပီႈ သွၼ်လိၵ်ႈပၼ်ၶႃႈဢိတ်ႉၼိုင်ႈ”
“ၼွင်ႉဢမ်ႇမေႃတႄႉဢမ်ႇၸႂ်ႈယူဝ်ႉ!”
“တႄႉဢေႃႈ ဢမ်ႇလႆႈႁဵၼ်းႁေပွၵ်ႈၶႃႈလူး”
“ၸိုင်ဝႃႈ ယၢမ်ႈမီးႁူင်းႁဵၼ်းယူႇဢမ်ႇၸႂ်ႈႁိုဝ်လႃႇ မိူဝ်ႈၼၼ်ႉ ၼွင်ႉဢမ်ႇတၼ်းလႆႈၶိုၼ်ႈႁႃႉ”
“ဢေႃႈ..ဢမ်ႇလႆႈၶိုၼ်ႈၶႃႈ မိူဝ်ႈၼၼ်ႉ ၶႃႈလႆႈၵႂႃႇလဵင်ႉဝူဝ်းၶႃႈဢေႃႈ ၶႃႈတႄႉၶႂ်ႈႁဵၼ်းပေႇၸႂ်ယဝ်ႉ ၵူၺ်းၵႃႈမႄႈႁဝ်းၵေႃႈဝႃႈ မေႃလိၵ်ႈဢမ်ႇမေႃလိၵ်ႈၵေႃႈ ႁဵတ်းႁႆႈႁဵတ်းၼႃး လဵင်ႉဝူဝ်းလဵင်ႉၵႂၢႆးမိူၼ်ၼႆၵူၺ်းမႂ်းႁူႉ တႃႉႁဵတ်းၵၢၼ်လႃႈ တင်းတေလႆႈၵိၼ်၊ မႂ်းၵေႃႈဢမ်ႇၸၢင်ႈဢဝ်ၵႂႃႇၸႂ်ႉတီႈလႂ်ၼင်ႇၵဝ်ႇ၊ မိူဝ်ႈၼၼ်ႉ ဢၼ်မႄႈၶႃႈလၢတ်ႈၼၼ်ႉ မၼ်းၵေႃႈႁမ်ႉၸႂ်ႈယူႇၼင်ႇၵဝ်ႇ ၶႃႈဝူၼ်ႉၸိူင်ႉၼႆဢေႃႈ ၵူၺ်းၵႃႈ မိူဝ်ႈလဵဝ် ၶႃႈမီးတီႈၸႂ်ႉမၼ်းယဝ်ႉ”
ၶမ်းလၢဝ်ၵေႃႈယဵၼ်ၵႂႃႇသေ သႅင်ၼူၼ်းသိုပ်ႇလၢတ်ႈထႅင်ႈ “ပီႈလႅင်းမိူင်း လၢတ်ႈတီႈၶႃႈဝႃႈ ပေႃးဝႃႈၶႃႈၸႂ်ထိုင် မီးၵႂၢမ်းၼႂ်းၸႂ်ၶႂ်ႈလၢတ်ႈၼႄမၼ်းၼႆ ႁႂ်ႈၶႃႈတႅမ်ႈမၢႆဝႆႉၼႂ်းပပ်ႉယဝ်ႉ မၼ်းတေမႃးဢၢၼ်ႇၼႆဢေႃႈ ၵူၺ်းၵႃႈ ၶႃႈၵေႃႈၶတ်းၸႂ်တႅမ်ႈယဝ်ႉ တႅမ်ႈဢမ်ႇလႆႈလႄႈ ၸင်ႇလႆႈမႃးႁႃပီႈၼႆႉယဝ်ႉ” မိုင်ဝူၼ်ႉၵႂႃႇၵႅပ်ႉၼိုင်ႈသေယဝ်ႉ “ၶႃႈၸႂ်ထိုင်ပီႈၶဝ်တေႉယဝ်ႉ မိူဝ်ႈလႂ်ၶဝ်တေလႆႈၶိုၼ်ႈမႃးဢမ်ႇႁူႉၼေႃ”
ၶမ်းလၢဝ်ၵေႃႈ ဢဝ်ပပ်ႉလိၵ်ႈတႆးၸၼ်ႉငဝ်ႈၼၼ်ႉဢွၵ်ႇမႃးသေ ပႆႇလႆႈသွၼ် ယၢမ်းၼၼ်ႉ မီးသဵင်တိၼ်ၶိုၼ်ႈႁိူၼ်းမႃးထႅင်ႈယဝ်ႉ မႃးႁွင်ႉယူႇတီႈၼႃႈၽၵ်းတူ ဢၼ်ႁပ်းဝႆႉၼၼ်ႉဝႃႈ “မေႃသွၼ်..ၸွင်ႇမီးယူႇႁိုဝ်”
သဵင်ၼၼ်ႉတႄႉ ပဵၼ်သဵင်မေႃယႃဢွၼ်တိုၼ်းယဝ်ႉ၊ ၶမ်းလၢဝ်ၵေႃႈ “ဢေႃႈ ပီႈမေႃႁႃႉ..” လုၵ်ႉမႃးၽုၺ်ႇၽၵ်းတူပၼ်ယဝ်ႉ။ သႅင်ၼူၼ်း ဢၼ်ႁၼ်မေႃယႃၶဝ်ႈႁိူၼ်းမႃးၼင်ႇၼၼ်ၵေႃႈ မိူၼ်ၶမ်းလၢဝ်တေဢမ်ႇတၼ်းယဝ်ႉလႄႈ လၵ်ႉဢွၵ်ႇမႃးပႅတ်ႈ ပၼ်ႁႂ်ႈၶႃၼင်ႈဢုပ်ႇၵၼ်ယူႇႁဵတ်း ၼၼ်ယဝ်ႉ။
“မီးလွင်ႈႁင်ႁေမႃးၶၢဝ်းၼႆႉၶႃႈလႃႇ..ၵၢၼ်ၼႅတ်ႈၶႃႈႁႃႉ”
မေႃယႃၵေႃႈ ယၵ်ႉတူၺ်းၶမ်းလၢဝ်ၵႂႃႇ ၼႂ်းလပ်းသိင်ႇၼၼ်ႉသေ “သူၵေႃႈၵၢၼ်သုၵ်ႉမိူၼ်ၵၼ်ၼႆႉၼေႃႈ..ငိၼ်းဝႃႈမိူဝ်ႈၼႆႉၵႂႃႇတီႈႁူင်းယႃ”
“ၸႂ်ႈဢေႃႈ..ၵႂႃႇတူၺ်းၸၢႆးဝၼ်း.. ၵူၺ်းၵႃႈဢမ်ႇၺႃးၶဝ် ၶႃႈၵေႃႈၶိုၼ်းမႃးႁေယဝ်ႉ”
သဵင်သွင်ၶႃတဵတ်ႇယဵၼ်ၵႂႃႇ ၵူၺ်းငိၼ်းသဵင်ၸၵ်းၶႆႇၼႃးႁွင်ႉမေႃးယူႇၼႂ်းသူၼ် ၸလိတ်း ၸလိတ်းၼၼ်ႉၵူၺ်းယဝ်ႉ၊ ၶမ်းလၢဝ်ၵေႃႈ မႄးသိမ်းၼိူဝ်ၽိူၼ်မၼ်းသေယဝ်ႉ “ဢမ်ႇၸႂ်ႈဝႃႈ တင်ႈၸႂ်မႃးႁွတ်ႈတီႈၼႆႈ မႃးထၢမ်ၶေႃႈၼႆႉၵူၺ်းၼင်ႇၵဝ်ႇၶႃႈယူဝ်ႉ”
“မိူၼ်တေၸႂ်ႈယူႇ” မေႃယႃယုမ်ႉၵႅပ်ႉၼိုင်ႈသေ သိုပ်ႇၵႂၢမ်းထႅင်ႈ “ႁဝ်းၶႂ်ႈမႃးၵူတ်ႇၸႅတ်ႈပၼ် ပၢႆးယူႇလီတီႈလုၵ်ႈဢွၼ်ႇၶဝ်ဢိတ်ႉၼိုင်ႈၶႃႈဢေႃႈ”
“လီယူႇၶႃႈ..”
“သူမီးၶၢဝ်းယၢမ်းပၼ်မိူဝ်ႈလႂ်ၶႃႈ..”
“ပီႈမေႃၶဝ်တၼ်းမႃးမိူဝ်ႈလႂ်ၵေႃႈ..မိူဝ်ႈၼၼ်ႉၵေႃႈလႆႈၶႃႈ”
“ပေႃးၼၼ် ဝၼ်းၸၼ်ဝူင်ႈၼႃႈၶႃႈၼႆ”
“လႆႈယူႇၶႃႈ..”
မေႃယႃၵေႃႈ လႆႈလၢတ်ႈၼႄၽႅၼ်ၵၢၼ်ဢၼ်တေမႃးႁဵတ်းၼၼ်ႉ မီးၶၵ်ႉတွၼ်ႈသင်ၽွင်ႈ၊ ၶမ်းလၢဝ်သမ်ႉတေလႆႈၸွႆႈၸိူင်ႉႁိုဝ် ၸိူဝ်းၼႆႉသေ လိုၵ်းယူႇတၢၼ်ႇတၢၼ်ႇ ဢုပ်ႇၵၼ်ယဝ်ႉၵေႃႈ မေႃယႃပွၵ်ႈမိူဝ်းၵႂႃႇယဝ်ႉ။
ပေႃးဢဝ်သဵင်ၼႂ်းႁူၼၢႆးၶမ်းလႅင် ဢၼ်ၼွၼ်းထွမ်ႇယူႇၼႂ်းႁိူၼ်းၼၼ်ႉတႄႉ မိူၼ်မၢဝ်ႇသၢဝ်ၶဝ်ဢုပ်ႇၵၼ် တူတီတူတီၼၼ်ႉယဝ်ႉ၊ ၵူၺ်းၵႃႈ တွၼ်ႈတႃႇၶမ်းလၢဝ်တႄႉၵေႃႈ မေႃယႃမႃးလွင်ႈၵၢၼ်ၵူၺ်းလႄႈ လၢတ်ႈယဝ်ႉၵေႃႈ မိူဝ်းၵႂႃႇယဝ်ႉ။ မေႃယႃၵေႃႈ ၵွပ်ႈပဵၼ်ၵၢၼ်ၼႅတ်ႈၼႃႇလႄႈ ၵၢင်ၶမ်ႈလပ်းသိင်ႇယဝ်ႉသေတႃႉ ၵႃႈလႆႈမႃးၼၼ်ႉယိုင်။
ဝၢႆးမေႃယႃမိူဝ်းၵႂႃႇယဝ်ႉ ၶမ်းလၢဝ်ၼၼ်ႉတႄႉၵေႃႈ ပႆႇၸၢင်ႈၼွၼ်းလႆႈ မိူၼ်ဝႃႈ မေႃယႃၼၼ်ႉ မႃးပၼ်ၵၢၼ်ႁႂ်ႈမၼ်းႁူဝ်ၶႆႈထႅင်ႈယဝ်ႉ။ လိူဝ်သေတေမႃးၸႅတ်ႈတူၺ်း တၢင်းပဵၼ်လုၵ်ႈဢွၼ်ႇၶဝ်ယဝ်ႉ ယင်းၶႂ်ႈပၼ်ပႃးပိုၼ်ႉႁူႉ ၵဵဝ်ႇလူၺ်ႈပၢႆးယူႇလီ ၽွင်းၶၢဝ်းၾူၼ်ၸိူဝ်းၼႆႉပႃးလႄႈ ၼင်ႇႁိုဝ်လုၵ်ႈဢွၼ်ႇၶဝ် ပေႃးတေပွင်ႇၸႂ်ငၢႆႈၼၼ်ႉ ယွၼ်းႁႂ်ႈၶမ်းလၢဝ်ၸွႆႈထႅမ် ယူႇယဝ်ႉ။
ၶေႃႈမုၼ်းဢၼ်ၶဝ်ပၼ်မႃးၼၼ်ႉသမ်ႉ လူတူၺ်းၵႂႃႇ ၵမ်ႈၼမ်ၵေႃႈ ၵူၼ်းလူင်တႄႉတေပွင်ႇၸႂ်လႆႈယူႇ ၵူၺ်းၵႃႈ သင်တေလၢတ်ႈၼႄလုၵ်ႈဢွၼ်ႇၵႂႃႇ ၸိူင်ႉၼင်ႇဢၼ်ၶဝ်ႁဵတ်းမႃးပၼ်ၼၼ်ႉ မၼ်းလိုၵ်ႉၼႃႇလႄႈ တႃႇတေပွင်ၸႂ်လႆႈတႄႉၼၼ်ႉယၢပ်ႇယူႇ မေႃယႃၵေႃႈ ဝူၼ်ႉႁၼ်ထိုင်လွင်ႈၼႆႉလႄႈ ၸင်ႇယွၼ်းႁႂ်ႈၶမ်းလၢဝ်ၸွႆႈၼၼ်ႉယဝ်ႉ။
ဢွၼ်တၢင်းတေမႃးတီႈႁူင်းႁဵၼ်းၼၼ်ႉ မေႃယႃၶဝ်ၵေႃႈ လူင်းပိုၼ်ႉတီႈ ၶဝ်ႈၸႅတ်ႈပၢႆးယူႇလီပၼ်ၵူၼ်းၸွမ်းဝၢၼ်ႈလႄႈ ပၼ်ပိုၼ်ႉႁူႉၵႂႃႇပႃး ဝၢၼ်ႈၼိုင်ႈယဝ်ႉဝၢၼ်ႈၼိုင်ႈယူႇယဝ်ႉ။
ယွၼ်ႉပိူဝ်ႈပဵၼ်ၼႂ်းၶၢဝ်းၾူၼ်ယဝ်ႉလႄႈ ယုင်းၵေႃႈလိူင်ႇၼႃႇ ၵူၼ်းၸပ်းတၢင်းပဵၼ် ဢၼ်မႃးၸွမ်းယုင်းၸိူဝ်းၼႆႉၵေႃႈမီးၼမ်၊ ၼင်ႇႁိုဝ်ပေႃးတေလူတ်းယွမ်းလႆႈၽွင်ႈလႄႈ ငိူင်ႉဝႄႈလႆႈၵႃႈႁိုဝ်လီၵႃႈၼၼ်ႉ ၶဝ်ၵေႃႈ ဢဝ်တၢင်းႁူဝ်ၶေႃႈ လွင်ႈမူတ်းသႂ် ၼႂ်းတူင်ႇဝူင်း လိူမ်ႈလႆႈၸွမ်းႁိူၼ်းၸွမ်းယေးႁႂ်ႈမူတ်းသႂ်၊ မွၵ်ႇမေႃႈၼမ်ႉ ဢုမ်ၼမ်ႉၵႆႉၵႆႉလၢႆႈပၼ်လႄႈ ယႃႇပၼ်ႁႂ်ႈၸွမ်းႁိူၼ်းၸွမ်းယေး မီးၼမ်ႉၶင်ႉၼမ်ႉဢုင်၊ ယႃႇပွႆႇႁႂ်ႈၼမ်ႉပေႃးမီးၼွၼ်လဵတ်း ပၼ်ႁႂ်ႈယုင်းပေႃးလႆႈမႃးၶီႈသႂ်ႇလႄႈ ယုင်းၼၼ်ႉၵေႃႈ ပဵၼ်တူဝ်ဢၼ်တေႃႉဢဝ်တၢင်းပဵၼ်မႃးၸူးၵူၼ်းလႆႈ ဢမ်ႇဝႃႈတေပဵၼ်တၢင်းပဵၼ် ၼၢဝ်ၼူၵ်ႉ၊ ၶႆႈလိူတ်ႈဢွၵ်ႇ၊ ၶႆႈဝတ်းၸၢင်ႉ ၸိူဝ်းၼႆႉ။
သမ်ႉဝႃႈဢမ်ႇၸၢင်ႈႁႃယႃႁႄႉၵင်ႈပၼ်လႆႈၼႆသေတႃႉ ၼင်ႇၵႃႈႁဵတ်းလႆႈႁႃလႆႈမႃးၼၼ်ႉ မေႃယႃၶဝ်ၵေႃႈ လႆႈဢဝ်သုတ်းၸႅၵ်ႇပၼ်ၵႂႃႇ ၼိုင်ႈႁိူၼ်းလႂ်ၼိုင်ႈဢၼ်၊ ပေႃးၵူၼ်းၼမ်ၵေႃႈ သွင်ဢၼ်သေ ၸႅၵ်ႇပၼ်ၵႂႃႇၵူႈႁိူၼ်းၵူႈႁိူၼ်းယဝ်ႉ။
လိူဝ်သေတၢင်းပဵၼ်ဢၼ်မႃးၸွမ်းယုင်းယဝ်ႉ ၶၢဝ်းႁိုဝ်ႉၶၢဝ်းၾူၼ်ၸိူဝ်းၼႆႉၵေႃႈ တေၵႆႉၵႆႉၸၢင်ႈပဵၼ်လႆႈထႅင်ႈ မိူၼ်ၼင်ႇ ပဵၼ်ၶူမ်း၊ ပဵၼ်ႁေႃ၊ ပဵၼ်ဝတ်းပဵၼ်ဢၢၼ်၊ ပဵၼ်တွင်ႉ၊ တၢင်းပဵၼ်ယဵဝ်ႈၼူ ၸိူဝ်းၼႆႉလႄႈ ပေႃးတေၵႂႃႇၵႂႃႇတႃႈပႆတၢင်းၵေႃႈ ႁႂ်ႈသုပ်းတိုဝ်းသႂ်ႇသွၵ်းတိၼ်ဢူတ်ႇ၊ ဢမ်ႇလီပၼ်ႁႂ်ႈတိၼ်ယမ်းၼမ်ႉႁိုင်ႁိုင်၊ လွင်ႈၵိၼ်လွင်ႈယႅမ်ႉၵေႃႈ လီလႆႈသုၵ်ႉသီႁႂ်ႈၶမ်ႉၶႅမ်ႉ ၵိၼ်ဢၼ်ႁုင်သုၵ်းၵမ်းလဵဝ်လႄႈ ဢမ်ႇလီဝႆႉၶၢမ်ႈၶိုၼ်း။ ယဝ်ႉၵေႃႈ လီလႆႈႁဵတ်းႁႂ်ႈတူဝ်ဢုၼ်ႇယူႇတႃႇသေႇ၊ သိူဝ်ႈၶူဝ်းၸိူဝ်းၼႆႉၵေႃႈ ဢမ်ႇထုၵ်ႇလီၼုင်ႈဢၼ်မိုၵ်းယမ်း သင်မီးလႅတ်ႇၵေႃႈတၢၵ်ႇလႅတ်ႇ ပေႃးဢမ်ႇမီးလႅတ်ႇၵေႃႈ ယၢင်ႈၾႆးႁႂ်ႈမၼ်းႁႅင်ႈလီလီယဝ်ႉ ၸင်ႇၼုင်ႈၼၼ်ႉ တၵ်းတေသၢင်ႇထုၵ်ႇယဝ်ႉ။
ဝၼ်းယဝ်ႉဝၼ်း မေႃယႃၶဝ်ၵေႃႈ ဢွၼ်ၵၼ်သိုပ်ႇႁဵတ်းၵၢၼ်ၶဝ်ၵႂႃႇ သမ်ႉပေႃးတၼ်းႁွတ်ႈထိုင်မႃးဝၼ်းၸၼ်ယဝ်ႉ။ ၶမ်းလၢဝ်ၼၼ်ႉၵေႃႈ ၼင်ႇၵႃႈပွင်ပဵၼ်လႆႈ ၸင်ႇႁဵတ်းၽႅၼ်ဝႆႉပၼ်တီႈမေႃယႃၶဝ်ယဝ်ႉ။ တွၼ်ႈတႃႇလုၵ်ႈဢွၼ်ႇၼၼ်ႉ လၢတ်ႈၵႂႃႇလိုၵ်ႉၼႃႇၵေႃႈဢမ်ႇပွင်ႇၸႂ်၊ ပဵၼ်တၢင်းၵၢၼ်ၼႃႇၵေႃႈ ဢမ်ႇသူၼ်ၸႂ် မၼ်းၵေႃႈ ၸူၵ်းဢဝ် ဢၼ်ၶဝ်တေႁဵတ်းၸွမ်းလႆႈလႄႈ တေပွင်ႇၸႂ်လႆႈၼၼ်ႉၵူၺ်း။
ၽွင်းမေႃယႃၶဝ်ၵူတ်ႇၸႅတ်ႈပၼ်တၢင်းပဵၼ်တီႈလုၵ်ႈဢွၼ်ႇၶဝ်ယူႇၼၼ်ႉ ၶမ်းလၢဝ်ၵေႃႈ ဢွၼ်လုၵ်ႈဢွၼ်ႇၶဝ် ႁဵတ်းလွင်ႈတူင်ႉၼိုင်ၵႂႃႇ၊ ယဝ်ႉၵေႃႈဢဝ်လွင်ႈပၢႆးယူႇလီၼၼ်ႉ တႅမ်ႈပဵၼ်ဢပုမ်ႇသေယဝ်ႉ ၶႆႈၼႄလုၵ်ႈဢွၼ်ႇၶဝ်ၵႂႃႇယူႇ။
“မိူဝ်ႈၵွၼ်ႇၵွၼ်ႇ တီႈၼႂ်းထိူၼ်ႇၾႃႉသၢမ်ႁဵင်ၼၼ်ႉ ပဵၼ်ထိူၼ်ႇဢၼ်ၵႂၢင်ႈယႂ်ႇ ဢမ်ႇသုတ်းတိူၵ်ႈလႆႈလႄႈ တီႈၼႂ်းထိူၼ်ႇၼၼ်ႉ မီးသတ်းၵူႈမဵဝ်းမဵဝ်းယဝ်ႉ”
“ၸွင်ႇမီးသိူဝ်ၶႃႈ၊” ႁိမ်ၵၼ်ထၢမ် “လိင်းလူးၸွင်ႇမီး” “သၢင်ႇသီႈၸွင်ႇမီး”
“မီးၵူႈမဵဝ်းယဝ်ႉ မီးၸဵမ်သၢင်ႇသီႈ၊ သိူဝ်၊ ၸၢင်ႉလူင်၊ ၵႂၢင်၊ ၽၢၼ်း၊ ယိူင်း၊ မီ သတ်းဢၼ်သူႁူႉၸၵ်းၼၼ်ႉမီးၵူႈမဵဝ်းယဝ်ႉ ၼူၵေႃႈမီး၊ ငူးၵေႃႈမီး၊ ယုင်းၵေႃႈမီး”
“ၵူၼ်းလူးၸွင်ႇမီးၶႃႈ”
“ၵူၼ်းႁႃႉ..ၵူၼ်းၵေႃႈတေမီးမႃးယဝ်ႉ ၸင်ႇသမ်ႉမီးသွင်ၵေႃႉမႄႈလုၵ်ႈ ၵႂႃႇႁႃႁဵပ်းၼႂ်းထိူၼ်ႇၼႆသေ လႆႈၶဝ်ႈၵႂႃႇၼႂ်းထိူၼ်ႇၾႃႉသၢမ်ႁဵင်ၼႆႉယဝ်ႉ၊ တီႈၼႂ်းထိူၼ်ႇၼၼ်ႉသမ်ႉ ၾူၼ်ၵႆႉတူၵ်းၼႃႇ ၵႂႃႇတၢင်းလႂ်ၵေႃႈၾူၼ်တူၵ်းတိၵ်းတိၵ်း ၶႃသွင်ၵေႃႉၼၼ်ႉသမ်ႉ ဢမ်ႇပႃးၸွင်ႈပႃးၵုပ်းသင်လႄႈ ၶူဝ်းၵေႃႈယမ်းၵတ်းၵေႃႈၵတ်း ဢမ်ႇၸၢင်ႈႁဵတ်းႁိုဝ် ၸင်ႇၵႂႃႇဢဝ်ဝႂ်ၵူၺ်ႈမႃးႁူမ်ႇႁူဝ်ၶႃသေ သိုပ်ႇၵႂႃႇထႅင်ႈတိၵ်းတိၵ်းယဝ်ႉ”
လုၵ်ႈဢွၼ်ႇၶဝ်ၵေႃႈ ၼင်ႈၼိမ်ယဵၼ်သေပႂ်ႉထွမ်ႇယူႇ ၶမ်းလၢဝ်ၶိုၼ်းထၢမ် “ပေႃးၾူၼ်တူၵ်း ၸွင်ႇသူႁၼ်ၼမ်ႉလႆၸွမ်းတၢင်းႁႃႉ”
“ႁၼ်ဢေႃႈ!!” ဢွၼ်ၵၼ်တွပ်ႇ။
“ၼႂ်းဝၢင်းႁိူၼ်းႁဝ်းၵေႃႈမီးဢေႃႈ!”
ၵဝ်လၢတ်ႈတၢင်းၼိုင်ႈ မႂ်းလၢတ်ႈတၢင်းၼိုင်ႈ သဵင်ပေႃးဢူၼ်ဢၢၼ်မေႃးပၼ်းလူင်ၵႂႃႇသဵင်ယဝ်ႉ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ။
