တွၼ်ႈသၢဝ်းႁူၵ်း
ၵၢင်ၼႂ်ၸဵမ်ၸဝ်ႉ ၶမ်းလၢဝ်ၵေႃႈဢွၵ်ႇၶၢဝ်းတၢင်း ၽၢတ်ႇယၢၼ်မိူဝ်းၵႂႃႇဝၢၼ်ႈဢုင်ၼၼ်ႉလွႆးလွႆးယဝ်ႉ၊ သမ်ႉဝႃႈထူဝ်ႈၼၼ်ႉတေၵႂႃႇတၢင်းၼႃႈတိၵ်းတိၵ်းသေတႃႉ သၢႆတႃၶမ်းလၢဝ်ၼၼ်ႉတႄႉ ယင်းပႆႇၽၢတ်ႇဝၢၼ်ႈဢုင်ၼၼ်ႉလႆႈ ဝၢႆႇယၵ်ႉတူၺ်းၸွမ်းတေႃႇပေႃးလပ်ႉတႃမၼ်းၵႂႃႇယဝ်ႉ။
ပေႃးမႃးဝူၼ်ႉတူၺ်း ၶၢဝ်းတၢင်းဢွၼ်ႇလၢႆလိူၼ်ၼၼ်ႉ မၼ်းၵေႃႈ လႆႈႁဵတ်းလႆႈသၢင်ႈမႃးပဵၼ်လၢႆၸိူဝ်ႉလၢႆလွင်ႈ၊ လႆႈႁိူဝ်ႉၵွပ်ႈမၼ်းၵေႃႈဢမ်ႇဢေႇ လႆႈတုၵ်ႉၵွပ်ႈမၼ်းၵေႃႈ ၼမ်ဝႃႈၼမ်ယဝ်ႉ။ ဢွင်ႈတီႈၼၼ်ႈ မၼ်းပၼ်တူဝ်ထူပ်း တၢင်းႁူႉ၊ တၢင်းသိူဝ်း တွၼ်ႈတႃႇမၼ်း မိူၼ်ပဵၼ်ႁူင်းႁဵၼ်းလင်ႈၼိုင်ႈတွၼ်ႈတႃႇမၼ်း ဢၼ်မၼ်းတေၵႂႃႇႁႃႁဵၼ်းထႅင်ႈတၢင်ႇတီႈဢမ်ႇလႆႈ ၼၼ်ႉယဝ်ႉ။
“မွၼ်းမွၼ်းၼႃႈ…ႁူင်းႁဵၼ်းဢွၼ်ႇႁဝ်း”
သိုပ်ႇၶိုၼ်ႈႁူၺ်ႈၶိုၼ်ႈၵွင်းလူင်မိူဝ်းၵႂႃႇတိၵ်းတိၵ်းယဝ်ႉ၊ ၼင်ႇဝႃႈ ၵမ်းမိူဝ်းမၼ်းၼၼ်ႉတႄႉ တၢင်းၼၼ်ႉၵေႃႈပေႉမိူဝ်းငၢႆႈၼႃႇဢမ်ႇႁူႉ၊ ၵၢင်ဝၼ်းတဵင်ႈၵူၺ်းပေႃးထိုင်ႁိူၼ်းယဝ်ႉ။
မိူဝ်းထိုင်ႁိူၼ်းယဝ်ႉ တီႈႁိူၼ်းသမ်ႉႁပ်းၽၵ်းတူဝႆႉ ၵၢၵ်ႇသေႃးၵေႃႈဢမ်ႇမီး၊ ၶဝ်ႈၵေႃႈတွင်ႉမႆႈ ဢမ်ႇႁူႉတေၵႂႃႇတၢင်းလႂ် ပႆလူင်မိူဝ်းၵႂႃႇတၢင်းႁိူၼ်းဢူၺ်းၵေႃႉမၼ်း ၼၢင်းၸၢမ်ၶဝ်ၼၼ်ႉယဝ်ႉ။ ၼၢင်းၸၢမ်ဢၼ်တိုၵ်ႉဢဝ်လုၵ်ႈဢွၼ်ႇမၼ်း ၵိၼ်ၼူမ်းယူႇၼႂ်းတၵ်းၼၼ်ႉၵေႃႈ ႁၼ်မၼ်းၶဝ်ႈႁိူၼ်းမႃးၼႆ ၼႅတ်ႈတၵ်ႉမၼ်းၵမ်းလဵဝ်။
“ဢေးၶမ်းလၢဝ်!! မႂ်းႁၢႆၵႂႃႇလႂ်မႃးလႃႇ.. ဢေးၼုမ်ႇလိုၼ်းဝႃႈမႂ်းပွၵ်ႈမႃးႁိူၼ်းယဝ်ႉ ၵဝ်မိူဝ်းႁႃတီႈႁိူၼ်းၵေႃႈႁမ်ႉဢမ်ႇႁၼ်မႂ်း”
“ယွၼ်းၵိၼ်ၶဝ်ႈဢိၼ်ႉလူႉ…”
“ၵပ်းသိုပ်ႇၵေႃႈဢမ်ႇလႆႈ..ဢမ်ႇၸႂ်ႈဝႃႈၵႂႃႇၵိၼ်ၶဝ်ႈယူႇၼႂ်းၶွၵ်ႈၼၼ်ႉမႃးႁႃႉ”
“မီးၽၵ်းႁင်လႃႇ..” တၢင်းပႆတၢင်းၵႂႃႇၽုၺ်ႇတူၺ်းမေႃႈၶဝ်ႈမေႃႈၽၵ်းၶဝ် ၸိူင်ႉၼင်ႇမၼ်းၵႆႉႁဵတ်းယူႇတႃႇသေႇၼၼ်ႉယဝ်ႉ။
“ဢမ်ႇမီးၶဝ်ႈမီးၽၵ်းႁင်ယဝ်ႉယူဝ်ႉ ဢူႈဢေးလႅင်ၶဝ်မႃးၵိၼ်မူတ်းယဝ်ႉ ၵဝ်ၵေႃႈဢမ်ႇတၼ်းႁဵတ်းလူင်”
“ဢိူဝ်ႈ..”
ၶမ်းလၢဝ်ၵေႃႈ ဢဝ်ၶဝ်ႈတၵ်းသႂ်ႇမေႃႈပဝ်ႇၼၼ်ႉသေ သုၵ်ႈၶဝ်ႈမၼ်းယူႇသၢဝ်ႈသၢဝ်ႈယဝ်ႉ၊ ၸင်ႇၶိုၼ်းၶုၵ်းၸႂ်လႆႈ ပေႃးၵၢင်ၶမ်ႈလုၵ်ႉႁူင်းႁဵၼ်းပွၵ်ႈၶိုၼ်းႁိူၼ်းၼႆ လႆႈႁၼ်ၼၢႆးႁုင်ၶဝ်ႈယူႇတီႈၵၢင်ၸၢၼ်းၼၼ်ႉႁေ ႁွင်ႉလၢတ်ႈတေႃႇမၼ်းယူႇ၊ မၢင်ပွၵ်ႈၵေႃႈ ႁႂ်ႈမၼ်းၵေႃႉသုၵ်ႈႁေယဝ်ႉ ဢဝ်ၵႂႃႇတင်ႈၼိူဝ်ၾႆး၊ ပေႃးႁုင်ၶဝ်ႈယဝ်ႉၵေႃႈ လိူၵ်ႈၽၵ်းၵႂႃႇၸွမ်း၊ ၶဝ်ႈသုၵ်းယဝ်ႉၵေႃႈ သိုပ်ႇႁဵတ်းၽၵ်းထႅင်ႈ သမ်ႉဝႃႈမၼ်းဢမ်ႇမေႃႁဵတ်းၵေႃႈ ၼၢႆးတေလၢတ်ႈႁႂ်ႈမၼ်း ဢဝ်မေႃႈမႃးတင်ႈပၼ်ဢိတ်ႉၼိုင်ႈလူး၊ သႂ်ႇပၼ်ၼမ်ႉမၼ်းၽွင်ႈလူး၊ ဢဝ်ၽၵ်းမႃးသႂ်ႇလႄႈ၊ သႂ်ႇပၼ်ၵိူဝ်ဢိတ်ႉၼိုင်ႈ ယူႇၵႂႃႇယူႇမႃး ဢဝ်မၼ်းသမ်ႉပေႃး မေႃႁုင်ၶဝ်ႈႁဵတ်းၽၵ်းၵႂႃႇယဝ်ႉ။
ၼၢင်းၸၢမ်ႁၼ်ဢူၺ်းၵေႃႉမၼ်း ဢၼ်ဢမ်ႇတွၼ်ႉၶဝ်ႈသွင်ႇၾႆး ႁင်းၵူၺ်းမၼ်းႁေပွၵ်ႈၼၼ်ႉလႄႈ ယၢမ်ႈပဵၼ်ၵူၼ်းၵေႃႉၼင်ႈပႂ်ႉၵိၼ်ၵူၺ်းၼၼ်ႉ ပဵၼ်ဢၼ်လၢၵ်ႇလၢႆးတႃႇမၼ်းၼႃႇ ၼႅတ်ႈငွၵ်ႈၸွမ်းတူၺ်း မိူဝ်ႈၶမ်းလၢဝ်တိုၵ်ႉၶူဝ်ႈၽၵ်းယူႇၼၼ်ႉ
“မႂ်းႁဵတ်းႁင်ယူႇလႃႇ ဢဝ်သွင်ႇၾႆးၵဝ်ပဵၼ်ၽဝ်ႇတဝ်ႈႁေယဝ်ႉယူဝ်ႉၵမ်ႉမႃး”
ၶမ်းလၢဝ်ၵေႃႈ သဵင်ၶူဝ်ႈၽၵ်းမၼ်းလင်ၼႃႇလႄႈ ငိၼ်းသဵင်ယူႇဢမ်ႇႁူႉၶေႃႈမၼ်းလီသေ တွပ်ႇၵႂႃႇ “ဢိူဝ်ႈ”
ၶႅၼ်ၼၢင်းၸၢမ်ဢၼ်ႁွပ်ႇလုၵ်ႈဢွၼ်ႇမၼ်းဝႆႉယူႇၼၼ်ႉ ပေႃးဢူၼ်ႈလူင်ၵႂႃႇ “မႂ်းယႃႇႁဵတ်း!!..”
ၶမ်းလၢဝ်ၵေႃႈဢမ်ႇထွမ်ႇ သိုပ်ႇႁဵတ်းၵႂႃႇထႅင်ႈ ၵမ်ႉၵေႃႈ ၽၵ်းၵမ်ႇၸွၼ်း ဢၼ်မီးယူႇၼႂ်းသႃႉၼၼ်ႉ ပေႃးမႃးသုၵ်းတမ်းယူႇၼႂ်းဝၢၼ်ႇၼိူဝ်ၽိူၼ်ၼၼ်ႉယဝ်ႉ။ တွင်ႉမႆႈၼႃႇယဝ်ႉလႄႈ ၶဝ်ႈပႆႇသုၵ်း ၼင်ႈႁေၵိၼ်ၽၵ်းလဵၼ်ႈယူႇ ၼၢင်းၸၢမ်ၵေႃႈ မႃးၼင်ႈၸွမ်း “ၵိၼ်လႆႈယူႇႁႃႉၼၼ်ႉ”
“ၵိၼ်တူၺ်းလႄႈ” ၶမ်းလၢဝ်ၵေႃႈ ဢဝ်မိုဝ်းမၼ်းယိပ်းပွႆႇသႂ်ႇၼႂ်းသူပ်းၼၢင်းၸၢမ်ၵႂႃႇ ဢၢၼ်းထဵင်ၶိုၼ်းယူႇ ၵူၺ်းၵႃႈ မိူဝ်ႈဢႃႈသူပ်းၵေႃႈ ၽၵ်းၼၼ်ႉတူၵ်းလူင်းၵႂႃႇမီးယူႇၼႂ်းသူပ်းယဝ်ႉ။
“ဢိူဝ်ႈ..ႁမ်ႉဝၢၼ်ၵျႃႉၵဝ်ႇမႂ်း၊ တေႉၼႆႉ မႂ်းၵႂႃႇယူႇလႂ်မႃးလႃႇ မေႃႁုင်ၶဝ်ႈႁဵတ်းၽၵ်းႁေ၊ ပိူၼ်ႈသွၼ်မိူဝ်ႈယူႇၼႂ်းၶွၵ်ႈႁႃႉတေႃႈ”
“မႂ်းတူၺ်းၵဝ်ၼႆႉ လႅပ်ႈပဵၼ်ၶီႈၶွၵ်ႈဝႆႉႁႃႉ”
“ဢိူဝ်ႈ..ၶွင်ငိၼ်းဝႃႈၶမ်ႈမႂ်းမႃးၼၼ်ႉ ၵႂႃႇၽိတ်းႁူဝ်ပိူၼ်ႈႁေၺႃးၶွၵ်ႈၼႆၼႃႇ ဝၢႆးၼၼ်ႉၵေႃႈ ဢမ်ႇငိၼ်းၶၢဝ်ႇငၢဝ်းမႂ်းႁေပွၵ်ႈယဝ်ႉယိုင်”
“ထၢၼ်ႈဝႃႈၵဝ်တူၵ်းၶွၵ်ႈ မႂ်းတမ်ႉဢမ်ႇၵႂႃႇၸႂ်းလႃႇႁမ်ႉ”
“တင်းလုၵ်ႈဢွၼ်ႇႁေတေႁဵတ်းႁိုဝ်ၵႂႃႇ..”
“ၵဝ်ဢမ်ႇလႆႈၵႂႃႇယူႇၼႂ်းၶွၵ်ႈ ၵဝ်ၵႂႃႇယူႇတၢင်းဝၢၼ်ႈဢုင်ပုၼ်ႉၼေႈ”
“ဝၢၼ်ႈဢုင်!! တၢင်းလႂ်ပုၼ်ႉလႃႇ ႁၢင်ႈၵဝ်ဢမ်ႇယၢမ်ႈငိုၼ်းႁေပွၵ်ႈ”
“ဝၢၼ်ႈဢၼ် ၶီႇထူဝ်ႈပဵၼ်ႁၢင်ႈဝၼ်းၸွင်ႇၵွႆႈထိုင်၊ ဝၢၼ်ႈဢၼ်မီးၶီႈၵူမ်ႇၶီႈဢုင်၊ ဝၢၼ်ႈဢၼ်မီးတူၼ်ႈမႆႉပႃႇမႆႉၶဵဝ်ၸိဝ်းငိဝ်း၊ ဝၢၼ်ႈဢၼ်မီးၼႃးလွမ်ႉႁွပ်ႈဝႆႉ၊ ဝၢၼ်ႈဢၼ်မီးႁူင်းႁဵၼ်း ၵူၺ်းၵႃႈ ဢမ်ႇမီးမေႃသွၼ်၊ ဝၢၼ်ႈဢၼ်ၶိင်းၵႄႇၶီႈၶၢၼ်ႉ၊ ဝၢၼ်ႈဢၼ်ဢမ်ႇၶိုၼ်ႈယႂ်ႇ၊ ဝၢၼ်ႈဢၼ်မီးမႄႈထဝ်ႈ ၸႂ်လီ၊ ဝၢၼ်ႈဢၼ်မီးၼွင်ႉယိင်းၼႃႈလီႁၵ်ႉ၊ ဝၢၼ်ႈဢၼ်မီးမေႃယႃ ၵတ်ႉၶႅၼ်ႇ၊ ဝၢၼ်ႈဢၼ် ၵဝ်ဢမ်ႇဝူၼ်ႉဝႃႈတေထိုင်ၼၼ်ႉယဝ်ႉ” တင်းလၢတ်ႈ တင်းလုၵ်ႉၵႂႃႇၵွၼ်ႉၶဝ်ႈမၼ်း ဢၼ်ငိၼ်းသဵင်မေႃႈၶဝ်ႈလၼ်ႇမေႃးယူႇၼၼ်ႉယဝ်ႉ။
“မၼ်းပဵၼ်ဝၢၼ်ႈလႂ်တေႉလႃႇ..”
“ဝၢၼ်ႈဢၼ်မႂ်းဢမ်ႇႁူႉၸၵ်းၼၼ်ႉယဝ်ႉ..”
“မႂ်းၵႂႃႇႁဵတ်းႁင်လႃႇႁမ်ႉ..”
“ၵႂႃႇႁဵတ်းမေႃသွၼ်..”
“ဢီႈႁင်ၵေႃ!!… ဢမ်ႇၸႂ်ႈဝႃႈမႂ်းဢမ်ႇၶႂ်ႈႁဵတ်းၼႆဢမ်ႇၸႂ်ႈၼႄႇ ႁမ်ႉလိူၵ်ႈလိူၵ်ႈၵႂႃႇႁဵတ်းလႃႇဢေႉ”
“ၵဝ်ဝႃႈ မၼ်းၵေႃႈ ဢမ်ႇၸႂ်ႈလႄႈဝႃႈဢမ်ႇလီႁေၵႃႈႁိုဝ်ၼႃ”
မိူဝ်ႈလၢတ်ႈၸိူင်ႉၼၼ်ဢွၵ်ႇမႃး ႁဵတ်းႁႂ်ႈမၼ်းဝူၼ်ႉထိုင်လုၵ်ႈႁဵၼ်း၊ ဝူၼ်ႉထိုင်ႁူင်းႁဵၼ်း ဢၼ်မၼ်းၶႂ်ႈပဵၼ်ၼၼ်ႉမႃးလႄႈ ႁၢင်ႈၽၢင်ႁူင်းႁဵၼ်း ဢၼ်မၼ်းဝူၼ်ႉဝႆႉၼၼ်ႉ မႃးမီးယူႇၼႂ်းတႃမၼ်းယဝ်ႉ။
“ဢီႈႁင်မႃးႁဵတ်းႁႂ်ႈမႂ်းလႅၵ်ႈလၢႆႈလႆႈထိုင်တၢၼ်ႇၼႆႉ”
“မိူၼ်ဝႃႈ ၵဝ်ယင်းတိုၵ်ႉမီးလွင်ႈဢၼ်တေလႆႈႁဵတ်းတီႈၼၼ်ႈထႅင်ႈယူႇ၊ ၵဝ်ဝႃႈၵဝ်တေၵႂႃႇၶိုၼ်း” ယုမ်ႉဢွၵ်ႇမႃး ပႃးတင်းလွင်ႈတိုၼ်ႇတဵၼ်ႈသေ “ၸူမ်းယဝ်ႉၼႃႈ ဢေးၸၢမ်!!”
“ၸူမ်းၵဝ်ႁဵတ်းႁင်”
“ၸူမ်းၶေႃႈထၢမ်မႂ်း ႁဵတ်းႁႂ်ႈၵဝ်ဝူၼ်ႉလႆႈဝႃႈ ၵဝ်ၶႂ်ႈႁဵတ်းသင်၊ ႁဵတ်းႁႂ်ႈၵဝ်ပွင်ႇၸႂ်ဝႃႈ လိၵ်ႈဢၼ်ဢူႈႁဝ်းသူင်ႇပၼ်ၵဝ်ၼၼ်ႉ မၼ်းၶႂ်ႈဝႃႈသင် ၶဝ်ႁူႉဝႃႈ ၵဝ်တေပွၵ်ႈၵႂႃႇၶိုၼ်းလႄႈ ၸင်ႇလႆႈတႅမ်ႈဝႃႈ မႃးၸႂ်းႁိူၼ်းၼႆၵူၺ်း၊ ၶဝ်ဢမ်ႇႁႂ်ႈၵဝ်မႃးယူႇတီႈႁိူၼ်း မႃးႁဵတ်းၵၢၼ်ၸွမ်းၶဝ် ၵူၺ်းၵႃႈ ၶဝ်ႁႂ်ႈၵဝ် ႁဵတ်းၵၢၼ်ဢၼ်ၵဝ်ၶႂ်ႈႁဵတ်း.. ပွင်ႇၸႂ်ယဝ်ႉ”
“ၵဝ်ဝႃႈ မႂ်းဢမ်ႇၸႂ်ႈၶမ်းလၢဝ်ယဝ်ႉ…မႂ်းပဵၼ်ၽႂ် ပဵၼ်သင်လႄႈမႂ်းလႆႈလႅၵ်ႈလၢႆႈၵႂႃႇၸိူင်ႉၼႆ.. ၵဝ်ပေႃးၶႂ်ႈၵူဝ်မႂ်းယဝ်ႉဢိူဝ်ႈၼႆႉ”
သီၼႃႈၼၢင်းၸၢမ် တူၺ်းၶမ်းလၢဝ်ဢမ်ႇမိူၼ်ၵဝ်ႇယဝ်ႉလႄႈ ပေႃးဢမ်ႇၶႂ်ႈယုမ်ႇသေဢိတ်းယဝ်ႉ။
ဝၢႆးသေၶမ်းလၢဝ်ပွၵ်ႈမိူဝ်းၶိုၼ်းၼၼ်ႉ တီႈႁိူၼ်းၼၢႆးၶမ်းလႅင်ၵေႃႈ သမ်ႉပေႃးငႅဝ်လူင်ၵႂႃႇယဝ်ႉၼႃႇ။ ၼၢႆးၶမ်းလႅင်ၼၼ်ႉၵေႃႈ ယူႇႁင်းၵူၺ်းၵူၺ်းလႄႈ ဢမ်ႇပေႃးသူႈယူႇႁိူၼ်းသေၵႃႈႁိုဝ် ၵမ်ႉမိူဝ်းလႄႇလုၵ်ႈမၼ်း တၢင်းဝၢၼ်ႈႁူၵ်းၼၼ်ႉႁေ မၢင်ပွၵ်ႈၵေႃႈ မိူဝ်းႁဵတ်းၶႅၵ်ႇၼၢႆးပၢင်ႇၶဝ်တၢင်းဝၢၼ်ႈၶၢႆးမူဝ်ၼၼ်ႉႁေ၊ ပေႃးယူႇႁိူၼ်းၵေႃႈ ၵႂႃႇလႄႇႁိူၼ်းႁွင်ႇႁိူၼ်းၸၢၼ်း၊ မၢင်ပွၵ်ႈၵေႃႈ ၵႂႃႇတူၺ်းၸလၢၼ်း ၸိူင်းပိၼ်ႇသဵင်တႆး သၢမ်ပီႈၼွင်ႉ တၢင်းႁိူၼ်း ၼၢင်းႁွမ်ၶဝ်ၼၼ်ႉႁေယဝ်ႉၼႃႇ။
သႅင်ၼူၼ်းၼၼ်ႉၵေႃႈ ၵၢင်ဝၼ်းၵႂႃႇႁဵတ်းၵၢၼ်သေတႃႉ ၵၢင်ၶမ်ႈတႄႉၵေႃႈ မႃးၼင်ႈ ၽိုၵ်းလူ ၽိုၵ်းဢၢၼ်ႇ ၽိုၵ်းတႅမ်ႈ လိၵ်ႈတႆးမၼ်း တႂ်ႈငွႆးၾႆးဝွႆးဝွႆး ၼႂ်းႁိူၼ်းၶဝ်ၼၼ်ႉယူႇ။
မေႃယႃၼၼ်ႉတႄႉၵေႃႈ ၵုမ်ႇသုၵ်ႉသၵ်ႉၸွမ်းၵၢၼ်ၸွမ်းငၢၼ်းမၼ်းၵူၺ်း မၢင်ပွၵ်ႈသမ်ႉပေႃးလိုမ်းၵိၼ်ၶဝ်ႈယဝ်ႉ၊ တေႃႈၼင်ႇၶမ်းလၢဝ်ပွၵ်ႈမိူဝ်းၵႂႃႇယဝ်ႉ မၼ်းယင်းဢမ်ႇႁူႉလူးၵွၼ်ႇ၊ ပေႃးၽႅတ်ႈမႃးတၢင်းဝၢၼ်ႈဢုင်ၼႆၵေႃႈ ၵႆႉၵႆႉလွမ်လွမ်ငွၵ်ႈဝၢႆႇတူၺ်းၵႂႃႇတၢင်းႁိူၼ်းၼၢႆးၶမ်းလႅင်ၶဝ်ယူႇၵူၺ်းၼင်ႇၵဝ်ႇ။
ၸိူဝ်းပဵၼ်လုၵ်ႈဢွၼ်ႇၼုမ်ႇႁၢတ်ႈႁၢႆး ၸႃႉႁႃႁိၵ်ႈပဵၼ်မၢဝ်ႇပဵၼ်သၢဝ် ဢႃႇယုသိပ်းႁူၵ်းသိပ်းၸဵတ်းၵူၺ်းၼၼ်ႉၵေႃႈ ဢွၼ်ၵၼ်ႁႃၵူႈႁဵတ်းတွႆး ၵူပ်ႉၵူႈပဵၼ်ႁိူၼ်းၵၼ်ၵႂႃႇ လၢႆၵူႈလၢႆတွႆးယဝ်ႉ။
ဝၢႆးဢွၵ်ႇဝႃႇယဝ်ႉ ၾူၼ်ၵေႃႈၸမ်ၸၢႆး ၼၢႆးၵေႃႈၸမ်လူင်း ၶဝ်ႈၼႃးၵေႃႈၶွမ်ႈလိူင်သုၵ်းၶႂ်ႈလီပၢတ်ႇယဝ်ႉ၊ ပႆလဵပ်ႈၸွမ်းၽင်ႇတေးၼႃး ဢၢႆၶဝ်ႈသမ်ႉပေႃးႁွမ်သိင်ႈသိင်ႈ သုတ်ႇၼူမ်ၵမ်းလႂ်ၵေႃႈ ပေႉၵႅၼ်ႇမႃးႁွမ်ဝႃႈႁွမ်၊ ၼူၵ်ႉဢွၼ်ႇၼႆႇဢွၼ်ႇၶဝ်ၵေႃႈ လွမ်လွမ်မႃးတွမ်သဵတ်ႈၸမ်ႁိမ်း၊ သဵင်တၶၢပ်ႇတူပ်းတၢပ်ႇလင်ၼၼ်ႈ ၽုင်ၼူၵ်ႉဢွၼ်ႇမိၼ်ပၢႆႈၽႅတ်းတိုၼ်ႇ၊ မၢင်ၸိူဝ်းသမ်ႉ ၸွမ်းဢဝ်ၵၢင်ႇၵႃႉၵၢင်ႇၵွၼ် လဵတ်းတၢပ်ႇမၢင်သႂ်ႇထႅင်ႈၸွမ်းလင်။
သႅင်ၼူၼ်းၼၼ်ႉၵေႃႈ ၽွင်းၶၢဝ်းၵၢင်ဝၼ်းလႅတ်ႇထွင်ႇ ပႃးတင်းပပ်ႉလိၵ်ႈဢွၼ်ႇလႄႈ ၵမ်ဢွၼ်ႇသေ လႄႇလဵပ်ႈပၼ်ႇၸွမ်းတူင်ႈၼႃး ဢၼ်မီးဢူၺ်းၵေႃႉ ပဵၼ်ၽူႈပႂ်ႉၼႃးယွၵ်ႇၼူၵ်ႉၼၼ်ႉလႄႈ ပၼ်ႇၵႂႃႇပၼ်ႇမႃး ၼင်ႈလိုဝ်ႈယူႇတီႈၼႂ်းထဵင်ၼၼ်ႉယဝ်ႉ ႁႅၼ်မုင်ႈတူၺ်းထုင်ႉၼႃးၼၼ်ႉသေ ဢဝ်ၶေႃႈၵႂၢမ်းၼႂ်းၸႂ်မၼ်း တႅမ်ႈသႂ်ႇၼိူဝ်ၸေႈဢၼ်မီးယူႇၼႂ်းပပ်ႉၼၼ်ႉၵႂႃႇ။
မိူဝ်ႈလူမ်းထူဝ်းထွင်း ၽတ်ႉဢဝ်ဢၢႆႁွမ်ၶဝ်ႈမႃးၼႂ်းႁူးၶူႈၼင် ၸိုင်ပေႉမႃးႁွမ် တၢင်းႁွမ်မၼ်းၼၼ်ႉ သမ်ႉပေႃးၶိုၼ်းၶုၵ်းၸႂ်လႆႈ ဝၼ်းဢၼ်ပီႈလႄႈၼွင်ႉ လႆႈၽၢတ်ႇယၢၼ် ဝၼ်းၶဝ်ႈဝႃႇဢၼ်ၸၢႆးသင်ႇလၢတ်ႈၵႂၢမ်းဝၢၼ်ဝႃႈ တေၶိုၼ်းပွၵ်ႈမႃးၸူးၼွင်ႉၼၼ်ႉ ဢွၵ်ႇဝႃႇယဝ်ႉၵေႃႈပႆႇႁၼ် တေႁႂ်ႈၼွင်ႉလႆႈပႂ်ႉႁိုင်ၵႃႈႁိုဝ်ၼေႃ၊ သၢမ်လိူၼ်ၵေႃႈပႆႇပေႃးႁႃႉ သီႇလိူၼ်ၸမ်ၶဝ်ႈယဝ်ႉၼႃႈ ဢမ်ႇႁၼ်တူဝ်ၵေႃႈ ၼွင်ႉၶႂ်ႈႁူႉၶႂ်ႈငိၼ်းၶၢဝ်ႇၸၢႆးႁဝ်းၽွင်ႈဢေႃႈ.. သင်သဵင်ႁူဝ်ၸႂ်ၼႆႉ သူင်ႇထိုင်ႁႂ်ႈၸၢႆးႁူႉထိုင်လႆႈၼႆ တေလီၵႃႈႁိုဝ်ၼေႃ..ၼွင်ႉၸႂ်ထိုင်ၸၢႆးတေႉယဝ်ႉ ၸႂ်ထိုင်တေႉတေႉဢေႃႈ ႁၵ်ႉသူၼႃႈၸၢႆး…”
တႅမ်ႈယဝ်ႉႁႅၼ်တူၺ်းၵႂႃႇၼႂ်းတူင်ႈၼႃး ၽုင်ၼူၵ်ႉဢွၼ်ႇၸပ်းၸွမ်းတူၼ်ႈၶဝ်ႈ ပေႃးတူင်ႉၶွၼ်းလူင်ၵႂႃႇသဵင်ႈ မၼ်းၵေႃႈ ဢဝ်တၶၢပ်ႇမႃးတူပ်းသႂ်ႇႁေ ၼူၵ်ႉတူၵ်းၸႂ် ဝိၼ်ႇဝၢႆႇလႅၼ်ႈၵႂႃႇၶိုၼ်းဝႆးဝႆးယဝ်ႉ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ။
