တွၼ်ႈသၢဝ်းၸဵတ်း
ႁူင်းႁဵၼ်းဢွၼ်ႇဝၢၼ်ႈဢုင်ၼၼ်ႉၵေႃႈ ၶိုၼ်းငဝ်ယဵၼ်ၵႂႃႇထႅင်ႈပွၵ်ႈၼိုင်ႈယဝ်ႉ၊ ဝၼ်းဢိုတ်းႁဵၼ်း 10 ဝၼ်းသုတ်းသဵင်ႈၵႂႃႇ ဝၼ်းၶိုၼ်ႈႁဵၼ်းႁွတ်ႈထိုင် မေႃသွၼ်ယင်းဢမ်ႇၶိုၼ်းမႃး ၽႂ်ၽႂ်ၵေႃႈ သမ်ႉပေႃးဝူၼ်ႉဝႃႈမၼ်းဢမ်ႇမႃးၶိုၼ်းယဝ်ႉ။
မိူဝ်ႈမိူဝ်းႁိူၼ်းၼၼ်ႉ ၶမ်းလၢဝ်သမ်ႉ မိူဝ်းၺႃးၽွင်းၶၢဝ်းပိူၼ်ႈပိုတ်ႇပၢင်သွၼ် ၽိူမ်ႉထႅမ်ၼမ်ႉၵတ်ႉမေႃသွၼ်ၼႆလႄႈ မၼ်းၵေႃႈသမ်ႉသူၼ်ၸႂ်ၼႆႁေ လႆႈၵႂႃႇၶိုၼ်ႈၸွမ်းယဝ်ႉ တၢင်းႁိုင်မၼ်းတႄႉ 10 ဝၼ်းၼႆႉၵူၺ်းၼင်ႇၵဝ်ႇ၊ ၵူၺ်းၵႃႈ ဢွၼ်တၢင်းမၼ်းတေၵႂႃႇၶိုၼ်ႈၼၼ်ႉ ဝၼ်းဢိုတ်းႁဵၼ်းလုၵ်ႈဢွၼ်ႇၶဝ် သမ်ႉပေႃးပူၼ်ႉၵႂႃႇ 5 ဝၼ်းၼႆႉယဝ်ႉလူး။ သမ်ႉပဵၼ်ပၢင်သွၼ်ယူႇၵႆ တၢင်းၵႂႃႇတၢင်းမႃး ၸႂ်ႉၶၢဝ်းယၢမ်းထႅင်ႈယူႇ 2 ဝၼ်းလႄႈ ပွၵ်ႈမႃးထိုင်ႁိူၼ်းသမ်ႉ လူဝ်ႇႁႅၼ်းၶူဝ်းၶွင် တႃႇၸႂ်ႉတႃႇသွႆၼႆထႅင်ႈႁေဝၼ်းၼိုင်ႈ ၼပ်ႉႁူမ်ႈႁူမ်ႈၵၼ် ၶႂ်ႈၸမ်ၸမ် 20 ဝၼ်းယဝ်ႉ ပႃးတင်းဝၼ်းဢၼ် မၼ်းလႆႈၶိုၼ်းႁွတ်ႈထိုင်တီႈဝၢၼ်ႈ။
လုၵ်ႈဢွၼ်ႇၶဝ် ဢမ်ႇႁူႉၼႆၵေႃႈ ဢွၼ်ၵၼ်မႃးႁူင်းႁဵၼ်းယူႇ ၵူၺ်းၵႃႈ မႃးယဝ်ႉမေႃသွၼ်ဢမ်ႇယူႇၼႆၵေႃႈ ၸင်ႇဢွၼ်ၵၼ်ဢမ်ႇၶိုၼ်းမႃးထႅင်ႈႁေဝၼ်း ၸင်ႇဝႃႈ ႁူင်းႁဵၼ်းပေႃးမွင်သေႃႇႁေႃႇယဝ်ႉၼႃႇ။ ၶမ်းလၢဝ် ဢၼ်ၶိုၼ်းလႆႈမႃးႁၼ်ႁူင်းႁဵၼ်းမၼ်း ပဵၼ်ၼၼ်ဝႆႉၵေႃႈ သမ်ႉပေႃးဢူၼ်ႈလူင်ၵႂႃႇယဝ်ႉ၊ မိူဝ်ႈႁူႉဝႃႈလုၵ်ႈႁဵၼ်းမၼ်းဢမ်ႇမႃးယဝ်ႉ ဢမ်ႇၸၢင်ႈႁဵတ်းႁိုဝ် ၵႃႈတေလႆႈၸွမ်းၶႆႈၸွမ်းႁႃၵူၺ်း။
ၶမ်းလၢဝ် ပႆလူင်ၵႂႃႇႁင်းၵူၺ်းမၼ်းလွႆးလွႆး တၢင်းဝၢၼ်ႈၶုမ်ႇၼၼ်ႉယဝ်ႉ၊ သုတ်းလူမ်းၵတ်းလူမ်းယဵၼ် တႂ်ႈႁူမ်ႈတူၼ်ႈမႆႉ ၽွင်းၶၢဝ်းလိူၼ်သိပ်းသွင်ၸိူင်ႉၼႆ ပႆတၢင်းၵေႃႈဢမ်ႇႁိူဝ်ႉဢမ်ႇမႆႈ လူမ်းၵေႃႈယဵၼ်လီ၊ သဵင်လူမ်းထူဝ်းထွင်း သဵင်ၼူၵ်ႉႁွင်ႉၶၢၼ်ပၢၵ်ႇမိၼ်ၽၢႆႈၸွမ်းၵၼ် တွင်ႉၾႃႉသွမ်ႇသွမ်ႇဢွၼ်ႇ လီယၵ်ႉလီယဵမ်ႈ တင်းသဵင်ၽဵင်းၵႂၢမ်းဝၢၼ်ဝၢၼ် ဢၼ်မေႃးလင်ယူႇၼႂ်းၽူင်းမၼ်းၼၼ်ႉႁေ ဢမ်ႇတၼ်းႁူႉတၼ်းႁၼ် သမ်ႉပေႃးႁွတ်ႈထိုင်ၵႂႃႇ ၼိူဝ်ၵွင်းလွႆသုင်ဢွၼ်ႇ တီႈယၵ်ႉယဵမ်ႈႁၼ် ဝၢၼ်ႈဢုင်ဢွၼ်ႇၶဝ် လႄႈထုင်ႉတူင်ႈၼႃးပၢင်ႇၵႂၢင်ႈ ပုမ်ႇၶဝ်ႈလႅမ်ၸလုတ်းၸလၢတ်း ပဵၼ်ယွမ်ႇပဵၼ်ယႅမ်ႇလူင်ဝႆႉ ပေႉၵႅၼ်ႇမႃးႁၢင်ႈလီဝႃႈႁၢင်ႈလီ တၢင်းႁၢင်ႈလီသၽႃႇဝၸိူင်ႉၼႆ ႁၼ်ယဝ်ႉၵေႃႈသိူဝ်းၸႂ်ၸွမ်းယဝ်ႉ။
မၼ်းၵေႃႈ ဢဝ်ၾူင်းမၼ်းထႆႇၵႂႃႇယဝ်ႉ သိုပ်ႇဢွၵ်ႇၶၢဝ်းတၢင်းၵႂႃႇထႅင်ႈ တေႃႇပေႃးႁွတ်ႈထိုင်ၼႂ်းဝၢၼ်ႈၶုမ်ႇၼၼ်ႉ။ ၶဝ်ႈၵႂႃႇၼႂ်းဝၢၼ်ႈ ဝၢၼ်ႈသမ်ႉပေႃးယဵၼ်သီႇသီႇ မီးသဵင်မႃႁဝ်ႇသွင်သၢမ်တူဝ်ၼၼ်ႉၵူၺ်း၊ ၶမ်းလၢဝ် ပႆလတ်းမိူဝ်းၵႂႃႇတၢင်းႁိူၼ်းၼွင်ႉလႅင်ၶဝ်ၼၼ်ႉယဝ်ႉ၊ ၵူၺ်းၵႃႈဢမ်ႇႁၼ်ၽႂ်၊ ပႆလဵပ်ႈတူၺ်းၵႂႃႇၸွမ်းၼႂ်းဝၢၼ်ႈ ႁႃတူၺ်းဝႃႈၽႂ်မီးႁိူၼ်းယူႇၼႆႁေ မၼ်းၵေႃႈ ငိၼ်းသဵင်ၶူၵ်ႉမွင်း မေႃးယူႇတလူၵ်ႈ တူၵ်ႈ တူၵ်ႈ တၢင်းႁိူၼ်းပူႇဢေႃး ၸဝ်ႈၶူၵ်ႉမွင်းၶဝ်ၼၼ်ႉလႄႈ ၶဝ်ႈမိူဝ်းဝႄႉတူၺ်းယူႇယဝ်ႉ။
ၽွင်းၶၢဝ်းပၢတ်ႇၶဝ်ႈပေႃႉၶဝ်ႈၸိူင်ႉၼႆ ၸဵမ်လုၵ်ႈဢွၼ်ႇၵူၼ်းလူင် ဢွၼ်ၵၼ်ၵႂႃႇႁႃပၢတ်ႇၶဝ်ႈ ဢဝ်ဝၼ်းၵၼ်ယဝ်ႉ ဢမ်ႇမီးၽႂ်တၼ်းယူႇႁိူၼ်း။
ၶမ်းလၢဝ် မိူဝ်းဝႄႉသင်ႇလၢတ်ႈဝႆႉတီႈပူႇဢေႃးသေ သိုပ်ႇဢွၵ်ႇၶၢဝ်းတၢင်းၵႂႃႇထႅင်ႈ ဝၢၼ်ႈၶၢႆးမူဝ်၊ လုၵ်ႉဝၢၼ်ႈၶုမ်ႇၵႂႃႇ ဝၢၼ်ႈၶၢႆးမူဝ် ၸမ်လိူဝ်သေ လုၵ်ႉဝၢၼ်ႈဢုင်ၵႂႃႇလႄႈ မၼ်းၵေႃႈ သိုပ်ႇၶိုၼ်ႈၵွင်းလွႆၸၼ်းႁိမ်းဝၢၼ်ႈၶုမ်ႇၼၼ်ႉသေ တၢင်းၼၼ်ႉတႄႉ ပဵၼ်တီႈႁဵတ်းႁႆႈၵူၼ်းဝၢၼ်ႈၶုမ်ႇၶဝ် ပေႃးတဵမ်လွႆလူင်ဝႆႉယဝ်ႉ၊ ပူၼ်ႉႁႆႈၶဝ်ၵႂႃႇယဝ်ႉ သမ်ႉလူင်းၵုင်းၵႂႃႇတိၵ်းတိၵ်း ႁွတ်ႈထိုင်တိၼ်လွႆယဝ်ႉၵေႃႈ သမ်ႉပဵၼ်ၼႃး ၵူၼ်းဝၢၼ်ႈၶၢႆးမူဝ်ၶဝ် ပဵၼ်တၢင်ႉပဵၼ်တၢင်ႉ ဢၢႆႁူင်းၶဝ်ႈလိူင်မၢၵ်ႈ ၸဝ်ႈမၼ်းပၢတ်ႇပႆႇၶိုတ်းၼၼ်ႉၵေႃႈ သမ်ႉပေႃးႁွမ်သိုင်ႈသိုင်ႈဝႆႉယဝ်ႉ ပႆလူင်လတ်းၽႃႇၵႂႃႇၼႂ်းတူင်ႈၼႃး လႆႈႁၼ်ၸဝ်ႈၼႃးၶဝ် ပၢတ်ႇၶဝ်ႈယူႇလႄႈ ၸင်ႇလႆႈၵႂႃႇၸူးၶဝ်ယဝ်ႉ။
သိုပ်ႇပႆၵႂႃႇၸွမ်းၼႂ်းထုင်ႉၼႃးၼၼ်ႉ ၵႂႃႇၺႃးပိူၼ်ႈပေႃႉၶဝ်ႈထႅင်ႈ လုၵ်ႈႁဵၼ်းမၼ်း ဢၼ်ၵမ်တင်းမတ်ႉၶဝ်ႈဢွၼ်ႇပေႃႉၸွႆႈပိူၼ်ႈယူႇၼၼ်ႉၵေႃႈ ငိၼ်းဢူႈၶဝ်ဝႃႈ “ဢေးၼွင်ႉဢမ်ႇၸႂ်ႈမေႃသွၼ်ႁိုဝ်လႃႇၼၼ်ႉ”
လုၵ်ႈဢွၼ်ႇသွင်သၢမ်ၵေႃႉ ယၵ်ႉတူၺ်းၶမ်းလၢဝ်ယဝ်ႉ လႅၼ်ႈၸူး “မေႃသွၼ်…”
“မႃးၸွႆႈမႄႈပေႃႉၶဝ်ႈၵႃႈ”
“ဢေႃႈ..” ၸုင်ဢဝ်မိုဝ်းၶမ်းလၢဝ်ၵေႃႉၽၢႆႇၽၢႆႇသေ ဢွၼ်ၵၼ်ၵႂႃႇတၢင်းပိူၼ်ႈပေႃႉၶဝ်ႈၼၼ်ႉယဝ်ႉ။ ၶမ်းလၢဝ်ၵေႃႈ ၸုၵ်းဢုပ်ႇၶဝ်ၵႂႃႇ တူင်ႉတၵ်ႉယူႇလီၵိၼ်ဝၢၼ်ၵၼ်သေ ဢုပ်ႇလၢတ်ႈသင်ႇၶဝ်ယဝ်ႉ လွင်ႈၶိုၼ်ႈႁူင်းႁဵၼ်းၼၼ်ႉလႄႈ မိူဝ်းဝႄႉၵႂႃႇတၢင်းႁိူၼ်း လုင်းၸရေးၶဝ် ၵူၺ်းသမ်ႉဢမ်ႇမီးၽႂ်ယူႇႁိူၼ်း ၸင်ႇဝႄႉၵႂႃႇတၢင်းႁိူၼ်းၼၢႆးပၢင်ႇၶဝ်ႁေယဝ်ႉ၊ ထိုင်ၵၢင်ဝၼ်းတဵင်ႈယဝ်ႉ ဝႄႉႁဵတ်းၶႅၵ်ႇၼၢႆးပၢင်ႇၵႂႃႇယူႇ။
ၵိၼ်ၶဝ်ႈဝၼ်းယဝ်ႉၵေႃႈ သိုပ်ႇဢွၵ်ႇၶၢဝ်းတၢင်းၵႂႃႇ တၢင်းဝၢၼ်ႈၸိင်ၼၼ်ႉထႅင်ႈႁင်းၵူၺ်းမၼ်းလွႆးလွႆး။ ပွၵ်ႈၼႆႉၵေႃႈ လႆႈဝႃႈ ပဵၼ်ပွၵ်ႈဢွၼ်တၢင်းသုတ်း ဢၼ်မၼ်းလႆႈလႄႇၸွမ်းဝၢၼ်ႈလုၵ်ႈဢွၼ်ႇႁဵၼ်းမၼ်း ႁင်းၵူၺ်းၵေႃႉလဵဝ်၊ လိူဝ်ၼၼ်ႉ သမ်ႉပဵၼ်သဵၼ်ႈတၢင်းမႂ်ႇလၢႆလၢႆ ၵွပ်ႈတၢင်းမၼ်းလိူမ်ႈလီလႄႈ ဢမ်ႇမီးလၢႆသဵၼ်ႈ မၼ်းၵေႃႈၵႂႃႇငၢႆႈမႃးလီယူႇတႄႉတႄႉ။ ၶၢဝ်းတၢင်းလုၵ်ႉဝၢၼ်ႈၶၢႆးမူဝ် ၵႂႃႇတၢင်းဝၢၼ်ႈၸိင်ၼၼ်ႉၵေႃႈ မွၵ်ႈၶိုင်ႈတၢင်းၼႆႉတႄႉ ပဵၼ်တူင်ႈၼႃးလၢႆလၢႆယဝ်ႉ၊ ၵူၺ်းမီးပႃႇထိူၼ်ႇလူင်ပွတ်းၼိုင်ႈ ၶႅၼ်ႈၵၢင်ဝႆႉလႄႈ မၼ်းၵေႃႈ ပႆပူၼ်ႉၵႂႃႇထိူၼ်ႇပႃႇၼၼ်ႉၵမ်ႉၼိုင်ႈသေ သမ်ႉပေႃးၺႃး ထုင်ႉၼႃးၵူၼ်းဝၢၼ်ႈၸိင်ၶဝ် ပဵၼ်တၢင်ႉပဵၼ်တၢင်ႉ ၶဝ်ႈၼႂ်းၼႃးတႄႉဢမ်ႇၵိုတ်းယဝ်ႉ ၵိုတ်းၵႅၼ်ႇပုမ်ႇၶဝ်ႈ ဢၼ်တင်ႈတုၵ်းသုၵ်းယူႇၼႂ်းၵၢင်တူင်ႈၼႃး ပဵၼ်ယွမ်ႇပဵၼ်ယွမ်ႇၼၼ်ႉၵူၺ်း။ ၼႂ်းတူင်ႈၼႃး တီႈၼမ်ႉႁွတ်ႈၼၼ်ႉၵေႃႈ လႆႈႁၼ်လွၵ်းတိူၵ်ႇၽၵ်းမီႇ ပဵၼ်လွၼ်ပဵၼ်လွၼ် မီးတင်းၽိူင်းႁူမ်ႇသိူဝ်ႇၼိူဝ်ဝႆႉ ၵူၼ်းသွမ်ႈမၼ်းၵေႃႈ တိုဝ်းၵုပ်းၵၢပ်ႇၼႃသေ ၼင်ႈၼဵပ်းၽၵ်းမီႇယူႇ ႁၢင်ႇႁၢင်ႇ ၵေႃႉသွင်ၵေႃႉ၊ တီႈၶဝ်လႄႈၶမ်းလၢဝ်ယူႇၼၼ်ႉ မၼ်းၵႆၵၼ်ၼႃႇ ၶမ်းလၢဝ်ၵေႃႈ ဢမ်ႇလႆႈၵႂႃႇဝႄႉ သိုပ်ႇၶဝ်ႈဝၢၼ်ႈမိူဝ်းၵႂႃႇယဝ်ႉ။
ႁိူၼ်းလုင်းႁဵင်ၶဝ်ၼၼ်ႉတႄႉ မၼ်းဢမ်ႇၵႂႃႇဝႄႉယဝ်ႉ မိူဝ်းဝႄႉၵႂႃႇတီႈႁိူၼ်းလုၵ်ႈႁဵၼ်းမၼ်း ၸၢႆးၵွၼ်ၼၼ်ႉသေ ႁႂ်ႈၸၢႆးၵွၼ်ဢွၼ်မၼ်းသိုပ်ႇဝႄႉလၢတ်ႈထႅင်ႈ လုၵ်ႈႁဵၼ်းဢၼ်ယူႇၼႂ်းဝၢၼ်ႈ ႁိူၼ်းလႂ်ႁိူၼ်းၼၼ်ႉ ၵမ်ႈၽွင်ႈၵေႃႈယူႇႁိူၼ်း၊ ၵမ်ႈၽွင်ႈၵေႃႈဢမ်ႇယူႇႁိူၼ်း မၼ်းၵေႃႈဝူၼ်ႉဝႃႈ ပေႃးၵေႃႉၼိုင်ႈႁူႉ တေႁူႉၵၼ်ယူႇၼႆလႄႈ မၼ်းၵေႃႈ ၽၢၵ်ႇလၢတ်ႈၸၢႆးၵွၼ်ဝႆႉ ႁႂ်ႈလၢတ်ႈပၼ်ၶဝ်ၼႆႁေယဝ်ႉ။
ၼႂ်းၸႂ်တႄႉဝူၼ်ႉဝႃႈ တေဢၢၼ်းမိူဝ်းဝႄႉတီႈႁူင်းယႃယူႇ ၵူၺ်းၵႃႈ… ဢမ်ႇႁူႉတေဝႄႉႁဵတ်းသင်ၼႆၵေႃႈ သိုပ်ႇပွၵ်ႈမိူဝ်းၵႂႃႇလွႆးလွႆးယဝ်ႉ၊ တၢင်းဝၢၼ်ႈႁူၵ်းတႄႉ ႁႂ်ႈၼၢႆးၶမ်းလႅင်ၸွႆႈမိူဝ်းလၢတ်ႈပၼ်ၵႂႃႇၵူၺ်း။
မိူဝ်ႈႁူႉဝႃႈမေႃသွၼ်ႁွတ်ႈမႃးယဝ်ႉ ၼင်ႇဝႃႈၶိင်းႁဵင်ၶဝ်ၼၼ်ႉၵေႃႈ မိူၼ်တေမီးၵၢၼ်လွင်ႈယႂ်ႇ တေလႆႈဢုပ်ႇၵုမ်ၵၼ်ၼႆလႄႈ ဢွၼ်ၵၼ်ႁွင်ႉပၢင်ၵုမ်ၵူၼ်းဝၢၼ်ႈၶဝ် မႃးတုမ်ၵၼ်တီႈႁိူၼ်းၶိင်းႁဵင် ၼိုင်ႈႁိူၼ်းၼိုင်ႈၵေႃႉၼႆယူႇ။
ၼႂ်းပၢင်ၵုမ်ၼၼ်ႉတႄႉၵေႃႈ ဢမ်ႇၶိုၵ်ႉဢမ်ႇၶၢႆးႁင်ၼင်ႇၵဝ်ႇ တေသိုပ်ႇၵဵပ်းၶိုၼ်းငိုၼ်းၸႂ်ႉၸၢႆႇ တႃႇမေႃသွၼ်ထႅင်ႈၼႆယူႇ၊ ပေႃးဝႃႈပဵၼ်လွင်ႈၼႆႉၼႆၵေႃႈ ၵူၼ်းၸိူဝ်းဢမ်ႇမီးလုၵ်ႈမီးလၢင်းၼၼ်ႉ ဢွၼ်ၵၼ်ဢမ်ႇႁၼ်လီၵမ်ႉထႅမ်လႄႈ ဢမ်ႇသႂ်ႇၸွမ်းယဝ်ႉ၊ ၵူၼ်းၸိူဝ်းဢၼ်မီးလုၵ်ႈမီးလၢင်း ဢၼ်မီးငိုၼ်းတႄႉၵေႃႈ “သႂ်ႇၵေႃႈသႂ်ႇလႄႈ” ၼႆၵူၺ်း၊ မၢင်ၸိူဝ်းဢၼ်ဢမ်ႇပေႉႁႅင်းလႆႈၼၼ်ႉတႄႉၵေႃႈ “ဢမ်ႇမီးငိုၼ်းၵေႃႈဢမ်ႇၶိုၼ်ႈၵူၺ်း ၸၢင်ႈတေပဵၼ်သင်” ၼႆသေ ၸႂ်ၶေႃးၵေႃႈဢမ်ႇလီမႃးယဝ်ႉ။
ၼႂ်းပၢင်ၵုမ်ၼၼ်ႉၵေႃႈ သမ်ႉမီးၼၢႆးၶမ်းလႅင်မႃးၶိုၼ်ႈၸွမ်းလႄႈ ၸင်ႇတေႁူႉဝႃႈ ၵူႈလိူၼ်လိူၼ်ပူၼ်ႉမႃးၼၼ်ႉ ၵူၼ်းဝၢၼ်ႈၶဝ်ၵေႃႈ လႆႈသႂ်ႇပၼ်ငိုၼ်းတႃႇမေႃသွၼ်ယူႇ၊ ၵူၺ်းၵႃႈ ၶမ်းလၢဝ်ၼၼ်ႉ ဢမ်ႇလႆႈႁပ်ႉသင်သေဢိတ်း ပဵၼ်ၶၢဝ်းတၢင်းလၢႆလိူၼ်ယဝ်ႉလႄႈ၊ လွင်ႈၼႆႉၵေႃႈ မိူၼ်ၶမ်းလၢဝ်တေဢမ်ႇႁူႉၸွမ်းၼႆသေ ၼႅတ်ႈလၵ်ႉလွမ်ႁႂ်ႈၵူၼ်းမိူဝ်းႁွင်ႉ ၶမ်းလၢဝ်မႃးယဝ်ႉ။
ၶမ်းလၢဝ်ဢၼ်တိုၵ်ႉဝၢင်းၽႅၼ်ၵၢၼ်ႁဵၼ်းမၼ်းယူႇၼႂ်းႁိူၼ်းၼၼ်ႉ လႆႈငိၼ်းသဵင်လူတ်ႉၶိူင်ႈမႃးၵိုတ်းသေ ႁွင်ႉၸူးမၼ်း “မေႃသွၼ်!..ၸွင်ႇယူႇႁႃႉ” သဵင်ၼၼ်ႉတႄႉ တွင်းလီယူႇဝႃႈ ပဵၼ်သဵင်မေႃယႃဢွၼ်တိုၼ်းယဝ်ႉ။
ၶမ်းလၢဝ်ၼႅတ်ႈလုၵ်ႉမႃးတူၺ်း “ပီႈမေႃၶႃႈႁႃႉ!!”
“လူင်းမႃးလႄႈ..လူဝ်ႇၼႅတ်ႈၵႂႃႇယဝ်ႉ”
“ၵႂႃႇလႂ်ၶႃႈ!!..”
“တေလၢတ်ႈၵႂႃႇၸွမ်းတၢင်း”
ၶမ်းလၢဝ်ၼၼ်ႉတႄႉ ၼႅတ်ႈလႅၼ်ႈလူင်လူင်းႁိူၼ်းၵႂႃႇၵမ်းလဵဝ် ၾႆးပေႃးဢမ်ႇတၼ်းမွတ်ႇယဝ်ႉ၊ ၵတ်ႉၵႃႈယင်းပဵၼ်ၾႆးသႅင်လႅတ်ႇ ဢၼ်မၼ်းသိုဝ်ႉပႃးမႃးပွၵ်ႈၼႆႉၼၼ်ႉလႃႈ။
“မီးလွင်ႈသင်ဢမ်ႇႁူႉၶႃႈ ပေႉႁိပ်ႈပေႉၼႅတ်ႈလႃႇ…”
“ပေႃႈႁဵင်ၶဝ်ႁဵတ်းပၢင်ၵုမ်! တေၵဵပ်းငိုၼ်းၵႃႈၸႂ်ႉၸၢႆႇတႃႇမေႃသွၼ်ၼႆၶႃႈဝႃႇ”
မွင်းလႆႈငိၼ်းၼင်ႇၼၼ် ၶမ်းလၢဝ်ၵေႃႈ ႁႂ်ႈမေႃယႃၼင်ႈတၢင်းလင်သေ မၼ်းၵေႃႉႁေႃႈလူတ်ႉမိူဝ်းၵႂႃႇယဝ်ႉ၊ မေႃယႃဢၼ်ဝႃႈႁိပ်ႈၼႅတ်ႈမႃး ႁေႃႈမႃးဝႆးၼႃႇၼၼ်ႉ ဢမ်ႇပႆႇၶိုတ်းၶမ်းလၢဝ် မေႃယႃသမ်ႉပေႃးၶႂ်ႈပိဝ်ယဝ်ႉၼႃႇ၊ ပေႃးဢမ်ႇတဝ်ႉႁူဝ်မႃၶမ်းလၢဝ်ဝႆႉတႄႉ ၶေးတေတူၵ်းလူတ်ႉၵႂႃႇယဝ်ႉဢမ်ႇႁူႉ၊ ၵမ်ႉၵေႃႈႁွတ်ႈယဝ်ႉလႄႈ ၼႅတ်ႈဢႅၼ်ႇလႅၼ်ႈ ၽႃႇၽုင်ၵူၼ်းလူင်ၸိူဝ်းၼၼ်ႉ ၶိုၼ်ႈမိူဝ်းၵႂႃႇပႃႈၼႃႈပိူၼ်ႈၼၼ်ႉႁေ
“ဢေႃႈ..ၶႃႈၼၢၼ်းႁူႉဝႃႈပိူၼ်ႈမီးပၢင်ၵုမ် မႃးတူၵ်းလိုၼ်းပႅတ်ႈဢိတ်ႉၼိုင်ႈၶႃႈဢေႃႈ ၵၼ်ႇတေႃးယႂ်ႇယႂ်ႇၼမ်ၼမ်ၶႃႈ”
သီၼႃႈၶိင်းႁဵင်ၶိင်းၵႄႇၶဝ်ၼၼ်ႉၵေႃႈ ဢမ်ႇပေႃးလီၵႃႈႁိုဝ်၊ “ဢေႃႈ..ၵူဝ်မေႃသွၼ်ၵၢၼ်သုၵ်ႉလႄႈဢမ်ႇလႆႈလၢတ်ႈပႃးၶႃႈဢေႃႈ” လုင်းႁဵင်တွပ်ႇပၼ်။
“ဢမ်ႇပဵၼ်ႁင်ၶႃႈၵၢၼ်ၸိူဝ်းၼၼ်ႉ ဝႆႉလႆႈယူႇ၊ ပၢင်ၵုမ်ၸိူင်ႉၼႆ ႁိုင်ႁိုင်ၼိုင်ႈပွၵ်ႈၵူၺ်းၶႃႈလူး”
လုင်းသႅင်ဢၼ်ယူႇတၢင်းလင်ၼၼ်ႉၵေႃႈ ႁွင်ႉလၢတ်ႈၸူး “ႁဝ်းၵေႃႈတိုၵ်ႉဢွၼ်ၵၼ် လၢတ်ႈလွင်ႈႁူင်းႁဵၼ်းယူႇၶႃႈဢေႃႈ မေႃသွၼ်မႃးၵေႃႈလီယဝ်ႉၶႃႈ”
“ပေႃးဝႃႈလွင်ႈႁူင်းႁဵၼ်းၵေႃႈ ၶႃႈမီးလွင်ႈၶႂ်ႈလၢတ်ႈယူႇၶႃႈဢေႃႈ ယွၼ်းလၢတ်ႈဢိတ်ႉၼိုင်ႈၶႃႈၼႃႈ”
“ပၢင်ၵုမ်ႁဝ်းယဝ်ႉယဝ်ႉ၊ ၵမ်ႈၽွင်ႈၵေႃႈမိူဝ်းၵၼ်ယဝ်ႉၶႃႈဢေႃႈမေႃသွၼ် တူၵ်းလိုၼ်းယဝ်ႉၶႃႈယူဝ်ႉ” ၶိင်းၵႄႇဝၢၼ်ႈၶုမ်ႇလၢတ်ႈ။
“မီးမွၵ်ႈၼႆႉၵေႃႈ လၢတ်ႈမွၵ်ႈၼႆႉၶႃႈယဝ်ႉ”
“ဢိူဝ်ႈ..မေႃသွၼ်မၼ်းၶႂ်ႈလၢတ်ႈသင်ၼႆၵေႃႈ ပၼ်မၼ်းလၢတ်ႈႁေလူႉဢႃႈ ႁဝ်းတေပႂ်ႉထွမ်ႇလႂ်” ၼၢႆးၸၢမ်ႇၵူၼ်ႈၼၵ်း ၵူၼ်းဝၢၼ်ႈႁူၵ်းၼၼ်ႉလၢတ်ႈၵႂႃႇ။
ၶမ်းလၢဝ်ၵေႃႈ မႄးတိုတ်ႉၼႃႈတိုတ်ႉတႃ ၸၼ်သဵင်မၼ်းသေယဝ်ႉ “တႄႇဢဝ်ၼႆႉၵႂႃႇ တီႈႁူင်းႁဵၼ်းႁဝ်း တေဢမ်ႇယွၼ်းၵႃႈၸႂ်ႉၸၢႆႇ တီႈပေႃႈမႄႈလုၵ်ႈႁဵၼ်းႁဝ်းၶဝ်ယဝ်ႉ ၵွပ်ႈပိူဝ်ႈမိူဝ်ႈၶႃႈမိူဝ်းပွၵ်ႈၼႆႉ လႆႈမႃးမူႇၸုမ်းဢၼ်ၸွႆႈထႅမ်ၵၢၼ်ႁဵၼ်းႁဝ်းၸုမ်းၼိုင်ႈ ဢမ်ႇဝႃႈၶိူင်ႈၵမ်ႉၵႅမ် ငိုၼ်းလိူၼ်ၶူး ၶဝ်တေၸွႆႈထႅမ်ပၼ်ၶႃႈယဝ်ႉ၊ ဢၼ်ၶႂ်ႈႁႂ်ႈပေႃႈမႄႈႁဝ်းၶဝ် ႁဵတ်းပၼ်တႄႉ လွင်ႈလုၵ်ႈဢွၼ်ႇၶဝ်ၶႃႈဢေႃႈ ႁႂ်ႈၶဝ်လႆႈမႃးၶိုၼ်ႈပၼ်ႁူင်းႁဵၼ်းၼၼ်ႉ တေလီတႄႉတႄႉၶႃႈ”
“ႁဵတ်းၼၼ်ႁႃႉ! ဢိူဝ်ႈလီဢိူဝ်ႈပေႃးဝႃႈၼၼ် ၵဝ်တိုၵ်ႉၶီၸႂ်ယူႇဢိူဝ်ႈၼႆႉ ဝႃႈတေဢဝ်တီႈလႂ်မႃးသႂ်ႇၼႆ”
ၶမ်းလၢဝ်မႄးယၵ်ႉတူၺ်းၼႃႈလုင်းၵႄႇလုင်းႁဵင်ၶဝ် ဢၼ်ဢမ်ႇႁၢၼ်ႉၸႂ်ၼၼ်ႉယဝ်ႉ “ပေႃးဝႃႈတႄႉ လွင်ႈၼႆႉ ၶႃႈၵေႃႈဝူၼ်ႉဝႃႈ မၼ်းတေယဝ်ႉၵႂႃႇမိူဝ်ႈသၢမ်လိူၼ်ပူၼ်ႉယဝ်ႉ ၵူၺ်းၵႃႈ ဢမ်ႇႁူႉဝႃႈလုင်းႁဵင်ၶဝ်ဝူၼ်ႉသင်ယူႇလႄႈ မႃးၵဵပ်းငိုၼ်းၶိုၼ်းၸိူင်ႉၼႆၶႃႈၼေႃ”
“ယဝ်ႉၵႂႃႇမိူဝ်ႈသၢမ်လိူၼ်ၼႆႁႃႉ! ႁၢင်ႈႁဝ်းလႆႈသႂ်ႇမႃးယူႇၵူႈလိူၼ်လႃႇၼၼ်ႉ”
“ၸႂ်ႈဢိူဝ်ႈ! ၸႂ်ႈဢိူဝ်ႈ…” ဢွၼ်ၵၼ်ဢုပ်ႇၵၼ် သဵင်ပေႃးဢူၼ်ဢၢၼ်မေႃးမႄးယူႇယဝ်ႉ။
“ၸႂ်ႈယူႇႁႃႉၶိင်းၵႄႇ ၵဵပ်းငိုၼ်းႁဝ်းမႃးၼႆႉ မေႃသွၼ်သမ်ႉဝႃႈမၼ်းယဝ်ႉၼႆ သူသမ်ႉဢဝ်ၵႂႃႇႁဵတ်းသင်လႃႇပေႃးၼၼ်ဢေႉ”
ၶိင်းၵႄႇၶဝ်ၸိူဝ်းၼၼ်ႉတႄႉဢမ်ႇၸၢင်ႈတၵ်းသဵင်သင်လႆႈယဝ်ႉ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ။
