ၸိုၼ်ႇႁႅင်း တွၼ်ႈသၢဝ်းၵဝ်ႈ

တွၼ်ႈသၢဝ်းၵဝ်ႈ

လိူၼ်သိပ်းသွင်လွင်ႈ ၸမ်ထိုင်ပီႊမႂ်ႇတႆးမႃးယဝ်ႉ မႄႈႁိူၼ်းၼုမ်ႇၶဝ် သၢဝ်ၼုမ်ႇၶဝ်ၼၼ်ႉၵေႃႈ ၸူဝ်းႁွင်ႉၵၼ်ပဵၼ်မူႇပဵၼ်ၸုမ်း ဝၢၼ်ႈယဝ်ႉဝၢၼ်ႈ ဢွၼ်ၵၼ်ၽိုၵ်းၽွၼ်ႉၵျၢင်ႉၵႃႈၵၼ်ယူႇ၊ သဵင်ၵႂၢမ်းသမ်ႉပေႃးမေႃးလင်တဵမ်ဝၢၼ်ႈ၊ သဵင်ၵူၼ်းႁုၼ်ႉၶူဝ်မႃးပႂ်ႉတူၺ်း သမ်ႉပေႃးလီသိူဝ်းမူၼ်ႈၵျေႃႇ။ တႃႇတေဢဝ်ၵႂႃႇၶႄႉၵၼ်ၼႂ်းပွႆးၼၼ်ႉ ဝၢၼ်ႈၵဝ်ဝၢၼ်ႈမႂ်းၼႆၵေႃႈ ဢွၼ်ၵၼ်ၽိုၵ်းၽွၼ်ႉယူႇႁင်းၽႂ်ႁင်းမၼ်းတေႉၼင်ႇဝႃႈယဝ်ႉ။

ၶမ်းလၢဝ်ၵေႃႈ ၸူဝ်းဢဝ်လုၵ်ႈႁဵၼ်းမၼ်း ၽိုၵ်းတၢင်းၵႃႈယူႇၼႂ်းဝၢင်းႁူင်းႁဵၼ်းၼၼ်ႉယူႇႁင်းၶဝ်ထႅင်ႈၸုမ်းၼိုင်ႈ၊ တူဝ်မၼ်းတႄႉဢမ်ႇမေႃၵႃႈၼင်ႇၵဝ်ႇ ၵူၺ်းၵႃႈ လုၵ်ႈဢွၼ်ႇမၼ်းသမ်ႉပႃးၸႂ်ၶႂ်ႈၵႃႈၼႆလႄႈ ၼင်ႇၵႃႈမၼ်းတေၵမ်ႉထႅမ်ပၼ်ၶဝ်လႆႈၼၼ်ႉ လႆႈႁဵတ်းပၼ်ၶဝ်ၵႂႃႇယူႇယဝ်ႉ၊ ဢမ်ႇမေႃၵႃႈၵေႃႈ ၵႂႃႇႁႃၵူၼ်းမေႃၵႃႈၼၼ်ႉမႃးသွၼ်ပၼ်ၶဝ်ၵႂႃႇ ပေႃးလွင်ႈတၢင်းၵႃႈတၢင်းဝႅၼ်ၼႆႉတႄႉ သႅင်ၼူၼ်းၼၼ်ႉ ႁဵတ်းမေႃသွၼ်မၼ်းလႆႈၵမ်းလဵဝ်ယဝ်ႉ။

သဵင်ၵႂၢမ်း “မႂ်ႇသုင်ပီႊမႂ်ႇ” ဢၼ်ၼၢင်းမူဝ်မူဝ်ၶမ်းဢေးႁွင်ႉဝႆႉၼၼ်ႉ လင်ၼၼ်ႈပၼ်းဢူၼ်ယူႇၼႂ်းဝၢင်းႁူင်းႁဵၼ်း ၵမ်းယဝ်ႉၵမ်း ပၼ်ႇၵႂႃႇပၼ်ႇမႃးယူႇတိၵ်းတိၵ်းယဝ်ႉ။

လိူၼ်သိပ်းသွင်လပ်း ၵၢင်ဝၼ်းၸၢႆႉၸိူၼ်းလပ်ႉလွႆၵႂႃႇ သဵင်ၽဵင်းၵႂၢမ်း မေႃးလင်ၼႂ်းဢူတ်ႇ တွင်ႈယွၼ်ႈထိုင် တူဝ်ႈဝၢၼ်ႈၸိင်ဢမ်ႇၵႃး မေႃးလၢမ်းမႃးပႃးတၢင်းဝၢၼ်ႈဢုင်၊ ႁွတ်ႈထိုင်ၵႂႃႇဝၢၼ်ႈႁူၵ်းပုၼ်ႉယဝ်ႉ၊ လဵၵ်ႉယႂ်ႇၼုမ်ႇထဝ်ႈ ယိင်းၸၢႆး ဢွၼ်ၵၼ်လႆၵႂႃႇတၢင်းဝၢၼ်ႈၸိင် ပဵၼ်ယိုတ်ႈပဵၼ်သၢႆ ၵူၼ်းၼမ်လၢႆ ၶွၼ်ႈတုမ်ၵၼ် ၼႂ်းဝၢင်းၵျွင်းပၢင်ႇၵႂၢင်ႈလူင်ဝၢၼ်ႈၸိင်ၼၼ်ႉယဝ်ႉ။

ၸဝ်ႈထူဝ်ႇၽူးၶဝ်ႈသွႆး၊ ၸဝ်ႈၼမ်ႉလဝ်ႈသူႇရႃႇ ႁဵတ်းသုမ်ႉသွင်းတႃႇဝၢင်းၶူဝ်းဝၢင်းၶွင်ၶဝ် ၶၢႆယူႇၼွၵ်ႈဝၢင်းၵျွင်းၼၼ်ႉ ပဵၼ်တႅဝ်းပဵၼ်တႅဝ်း၊ လိူဝ်ၼၼ်ႉ ယင်းမီးထႅင်ႈပၢင်တေႃႇပၢင်လွင်း မၢၵ်ႇၵိင်ႈလွႆ၊ ၸၢမ်းၵၢမ်ႇၼႆထႅင်ႈ ၵူၼ်းၸိူဝ်းဢၼ်ၶႂ်ႈၵၢမ်ႇလီၼၼ်ႉၵေႃႈ ဢွၼ်ၵၼ်ၵႂႃႇငွၵ်ႈလွမ်ၸွမ်းသိုဝ်ႉတူၺ်းယဝ်ႉ။

ၶမ်းလၢဝ်လႄႈသႅင်ၼူၼ်း ဢွၼ်ၵၼ်ပႆၵႂႃႇၸွမ်းပိူၼ်ႈသေ ဝၼ်းမိူဝ်ႈၼႆႉ ၽႂ်ႁၼ်ၶမ်းလၢဝ်ၼႆၵေႃႈ သမ်ႉပေႃးလႄႇတၵ်ႉၸူးမၼ်း “ၸွင်ႇၸႂ်ႈမေႃသွၼ်ယူႇႁႃႉၼႆႉ!..” ၶမ်းလၢဝ် ႁၢင်ႈလီၽိတ်းသၽႃႇဝဝႆႉႁိုဝ် ဢမ်ႇယၢမ်ႈႁၼ် တၢင်းႁၢင်ႈလီၽူႈယိင်းၸိူင်ႉၼင်ႇၶမ်းလၢဝ်ၼၼ်ႉႁိုဝ်ဢမ်ႇႁူႉယဝ်ႉ။

တေဝႃႈႁိုဝ်ၵေႃႈ ၼႂ်းၸူဝ်ႈၸၢတ်ႈပၢၼ်မၼ်း ဢမ်ႇတွၼ်ႉသႂ်ႇၸႂ်တူဝ်ၵဝ်ႇႁေၵႃႈႁိုဝ် ၶႂ်ႈႁၢင်ႈလီႁိုဝ်ႁၢင်ႈၸႃႉၵေႃႈယဝ်ႉလႃႈ ပေႃးဝႃႈမၼ်းယူႇငၢႆႈလူမ်ၸႂ်ၵူၺ်းၵေႃႈလႆႈယဝ်ႉ၊ ၵူၺ်းၵႃႈ ပွၵ်ႈၼႆႉ လႆႈၶၢမ်ႇတၢင်း သႅင်ၼူၼ်း တဵၵ်းႁႂ်ႈမၼ်းႁဵတ်းယဝ်ႉ ဢဝ်လွင်ႈဢၼ်ဝႃႈ ပၼ်ႁႅင်းၸႂ်လုၵ်ႈႁဵၼ်းမၼ်းၼႆသေ ပေႃးဝႃႈလုၵ်ႈႁဵၼ်းၼႆ ၼင်ႇႁၢင်ႈပဵၼ်ၵၢၼ်ဢၼ်မၼ်းတေလႆႈႁဵတ်းၵႂႃႇယဝ်ႉ။

မိူဝ်ႈယဵပ်ႇယၢင်ႈၶဝ်ႈၵႂႃႇၼႂ်းပၢင်ပွႆးၼၼ်ႉ သၢႆတႃၵူၼ်းၸၢႆးၼမ်လၢႆ ဝိၼ်ႇဝၢႆႇယၵ်ႉတူၺ်းၸူးသွင်သၢဝ်လဝ်းဝၢၼ်ႈဢုင်ၶဝ် ႁၢင်ႈလီႁၢင်ႈငၢမ်း ၼုင်ႈတင်းသိူဝ်ႈၶူဝ်းတႆး သွမ်ႇတုၺ်ႇၵၼ်ဝႆႉ ၶဵၼ်းၶဵၼ်းႁူဝ်တႆးႁွပ်ႈႁူဝ် တိုဝ်းတင်းၶႅပ်းတိၼ်ၶတ်ႈတီႇပႃႇ သူၼ်ႈသုင်ၼၼ်ႉထႅင်ႈ၊ ၵေႃႉၼိုင်ႈတႄႉ မိူၼ်ႁၢင်ႈၶႂ်ႈတွင်းဢမ်ႇၶႂ်ႈတွင်းဝႆႉ တူဝ်ၶိင်းယွမ်းသေး ၵူၼ်ႈၶိတ်းဢႅဝ်ၶႅဝ်ႉဢူၵ်းဝၢတ်ႈ ယၵ်ႉႁၼ်ၼႃႈသဵမ်ႈၶၢဝ်ပွတ်ႇ မွႆတႃလမ်လမ် သီႇသူပ်းၶွင်ႇသွင်ႁွင် မိၼ်ႇႁူသွင်ၽၢႆႇ သႂ်ႇဝႆႉပီႇႁူၶမ်းလိူင်ၸိူင်းငိူၼ်းဢွၼ်ႇႁေ ပေႃးဢမ်ႇၵႆႉႁၼ်တႄႉ ၶေးတေဝႃႈသၢဝ်တၢင်းလႂ် တီႈတေႉၵေႃႈပဵၼ်မေႃသွၼ်ၶမ်းလၢဝ်ၵူၺ်းၼင်ႇၵဝ်ႇ။

ၶဝ်ၵေႃႈ ဢမ်ႇသူၼ်ၸႂ်ၽႂ်ႁေသိုပ်ႇပႆၵႂႃႇတၢင်းပၢင်မူၼ်ႈသိူဝ်း တီႈလုၵ်ႈဢွၼ်ႇၶဝ်ႁၢင်ႈႁႅၼ်းတူဝ်ႈတၼ်း တႃႇပႂ်ႉထႃႈၶၢဝ်းယၢမ်း ၶိုၼ်ႈၵႃႈၼိူဝ်ၶဵင်ႇၼၼ်ႉယဝ်ႉ။

မိူဝ်ႈမိူင်းလပ်းသိင်ႇမႃး ၽူႈၵႅဝ်ပၢင်မၼ်းၵေႃႈ ႁွင်ႉသေႃႇပိုၼ်ၽၢဝ်ႇ ၸုမ်းတၢင်းၵႃႈၶဝ် ၵူၼ်းႁွင်ႉၵႂၢမ်းၶဝ် ၶိုၼ်ႈၼိူဝ်ၶဵင်ႇသေ ႁွင်ႉၵႂၢမ်းၽုၺ်ႇပၢင်ပွႆးၵႂႃႇယဝ်ႉ ၸင်ႇမီးသဵင်ၵွင်သဵင်မွင်းၸွမ်းလင်မႃး ပႃးတင်းၼူၵ်ႉၽူႈၼူၵ်ႉမႄႈသွင်တူဝ် ၶိုၼ်ႈၵႃႈပၼ်ႈလဵပ်ႈၵၼ်ၵႂႃႇၵႂႃႇၶိုၼ်းၶိုၼ်း၊ ယဝ်ႉၵေႃႈတူဝ်းၽိူၵ်ႇတူဝ်းၶၢဝ်လူင်တူဝ်ၼိုင်ႈ ၶိုၼ်ႈၵႃႈတၢမ်းၵႂႃႇ၊ ၵႃႈၼူၵ်ႉတူဝ်းယဝ်ႉ ၸဝ်ႈလၢႆးမိုဝ်း လၢႆးၶွၼ်ႉ လၢႆးလႅဝ်း ၶဝ်ၵေႃႈ ႁၢင်ႈႁႅၼ်းတူဝ်တူဝ်ႈတၼ်းဝႆႉ ၽွမ်ႉတႃႇတေၼႄၵႂႃႇယူႇယဝ်ႉ။

ဝၢႆးသေၵႃႈၼူၵ်ႉၵႃႈတူဝ်းၵႃႈလၢႆးယဝ်ႉ တၢင်းၵႃႈလုၵ်ႈဢွၼ်ႇႁဵၼ်းၶဝ်ၵေႃႈ ထိုင်မႃးသေလႄႈ ၶမ်းလၢဝ်၊ သႅင်ၼူၼ်း ဢိၵ်ႇတင်းဢူႈမႄႈၶဝ် ဢွၼ်ၵၼ်ပႂ်ႉတူၺ်းပၼ်ႁႅင်းယူႇ ႁိမ်းၶဵင်ႇပၢင်မူၼ်ႈသိူဝ်းၼၼ်ႉယဝ်ႉ။ ပေႃးဝႃႈလုၵ်ႈဢွၼ်ႇၶဝ်ၶိုၼ်ႈၵႃႈၼႆၵေႃႈ ၵူၼ်းတူၺ်းပွႆးၶဝ် ဢွၼ်ၵၼ်လႆမႃးလႆမႃး ပႃးၵၼ်ၶိုၼ်ႈတွၼ်ႈငိုၼ်းၸၢႆႇ၊ သႂ်ႇၵွင်ႉၶေႃးပၼ် ပဵၼ်ပုၵ်ႉပဵၼ်ဝႃၸွမ်းၶေႃးလုၵ်ႈဢွၼ်ႇၶဝ်ၼၼ်ႉယဝ်ႉ။

သဵင်ၵႂၢမ်းသုတ်းၵႂႃႇ တၢင်းၵႃႈၵေႃႈယဝ်ႉသေ လုၵ်ႈဢွၼ်ႇလူင်းၶဵင်ႇ ၵူၼ်းလူင်ႁၢင်ႈႁႅၼ်းတူဝ်ႈတၼ်း ဢဝ်တီႈယူႇၽႂ်မၼ်းၶိုၼ်ႈၵႃႈထႅင်ႈ ဝၢၼ်ႈၼိုင်ႈယဝ်ႉဝၢၼ်ႈၼိုင်ႈ တေႃႇထိုင်ၵၢင်ၶိုၼ်းလိုၵ်း တၢင်းၵႃႈၶဝ်ၸင်ႇတေယဝ်ႉလႆႈ၊ ပေႃးတၢင်းၵႃႈယဝ်ႉၵႂႃႇ ၽူႈႁွင်ႉၵႂၢမ်းပၼ်မႂ်ႇၶဝ် ၶိုၼ်ႈၶဵင်ႇမႃးႁွင်ႉၵႂၢမ်းသေ ၵူၼ်းၵေႃႈႁၢင်ႇႁိင်ႇႁၢင်ႇႁၢႆး ယူႇၵေႃႉတီႈၵေႃႉတၢင်း ၵမ်ႈၽွင်ႈၵေႃႈ ၸုၵ်းဢုမ်ႇဢွမ်ႇၾႆးဢုပ်ႇၵၼ်ယူႇၼႂ်းပၢင်ႇၵႂၢင်ႈ တႃႇပႂ်ႉႁပ်ႉၸဵင်ၵႂႃႇၸွမ်းၵၼ်ယဝ်ႉ။

သိပ်းသွင်မွင်းၸမ်ထိုင် ၸုမ်းပၢႆးမွၼ်း ၸုမ်းတၢင်းၵႃႈၶဝ် ၶိုၼ်းၶိုၼ်ႈၶဵင်ႇႁွင်ႉၵႂၢမ်းထႅင်ႈသေ ႁပ်ႉၸဵင်ၵႂႃႇၸွမ်းၵၼ်၊ ၵမ်ႈၽွင်ႈၵေႃႈ ၸုတ်ႇႁူင်းၾႆးမိၼ်ၵႂႃႇၸွမ်းၵၼ် ပဵၼ်ၵူႈပဵၼ်တွႆး၊ ပဵၼ်ႁေႃပဵၼ်ႁိူၼ်းၸုတ်ႇၸွမ်းၵၼ်ၵေႃႈမီး။ မေႃယႃၵေႃႈသိုဝ်ႉမႃးဢၼ်ၼိုင်ႈ ၸူဝ်းၵၼ်တင်းၶမ်းလၢဝ်လႄႈသႅင်ၼူၼ်းၸုတ်ႇသေ ႁူင်းၾႆးမိၼ်ၶဝ်ၵေႃႈ ပိဝ်ၶိုၼ်ႈၵၢင်ႁၢဝ်ၵႂႃႇၸွမ်းလူမ်းလွႆးလွႆး ၵႂႃႇႁူမ်ႈၸွမ်းလုၵ်ႈပိူၼ်ႈၸိူဝ်းပွႆႇၶိုၼ်ႈ သီလိူင်လိူင် ႁိူဝ်ႈပိူင်းလႅင်းယူႇၼိူဝ်ၵၢင်ႁၢဝ် ပဵၼ်သၢႆပဵၼ်သၢႆ လီလူလီတူၺ်းတႄႉတႄႉယဝ်ႉ။

ၵႂၢမ်းသုတ်းၵေႃႈၵူၼ်းသုတ်ႈႁူၼ်ၵၼ်ပွၵ်ႈ ပွႆးတႄႉပႆႇဝၢႆးၵူၼ်းၶဝ်ႈပွႆးတႄႉၶႂ်ႈဝၢႆးၵႂႃႇၵမ်းလွႆးလွႆးယဝ်ႉ၊ ၶမ်းလၢဝ်လႄႈသႅင်ၼူၼ်းၼၼ်ႉၵေႃႈ ဢွၼ်ၵၼ်ပွၵ်ႈမိူဝ်းၵႂႃႇၸွမ်းပိူၼ်ႈတၢင်းဝၢၼ်ႈၶဝ်ၼၼ်ႉယူႇ။ မိူဝ်ႈၽွင်းမိူဝ်းၸွမ်းတၢင်းၼၼ်ႉ ပေႃးပဵၼ်ၼၢင်းသၢဝ်ၼႆတႄႉ တိုၼ်းမီးမၢဝ်ႇလမ်းၸွမ်းၵဝ်းၸွမ်းဢုပ်ႇယဝ်ႉၼႃႇ။

ၶမ်းလၢဝ်လႄႈသႅင်ၼူၼ်းၶႃၼၼ်ႉ သမ်ႉဝႃႈဢၢၼ်းပၢႆႈလႄႈ ပႆမိူဝ်းၸွမ်းမူႇၵူၼ်းၼမ်ယူႇသေတႃႉ ၵူၼ်းၸၢႆးမၢဝ်ႇၼုမ်ႇႁၢတ်ႈႁၢႆးၸိူဝ်းၼၼ်ႉၵေႃႈ ဢႅၼ်ႈလမ်းႁႄႉၵႅတ်ႇၼႃႈၶႃၵႂႃႇ၊ ပေႃးဢမ်ႇပၼ်ၸွမ်းမိူဝ်းသူင်ႇၵေႃႈ တေဢမ်ႇပၼ်ၶႃမိူဝ်းၼႆသေ ပၼ်ႁႂ်ႈပိူၼ်ႈသမ်ႉပေႃးပူၼ်ႉၶႃ ၵိုတ်းၽူႈယိင်းဢွၼ်ႇသွင်ၵေႃႉ တင်းမူႇၽုင်ၵူၼ်းၸၢႆးသၢမ်သီႇၵေႃႉၼၼ်ႉၵူၺ်း။ သႅင်ၼူၼ်းၼၼ်ႉတႄႉ ၵွပ်ႈၶႅၼ်ၶမ်းလၢဝ်ဝႆႉသမ်ႉပေႃးမၼ်ႈတဵင်ႈတဵင်ႈ ႁူႉလႆႈဝႃႈ မၼ်းၼၼ်ႉၵူဝ်ယူႇၼႆယဝ်ႉ။

ၶမ်းလၢဝ်တႄႉၵေႃႈဢမ်ႇသူၼ်ၸႂ်သင်ႁေ “တေမိူဝ်းယူႇႁႃႉဢမ်ႇမိူဝ်း ပေႃးဢမ်ႇမိူဝ်းၵေႃႈ ႁဝ်းၶႃႈတေမိူဝ်းၶႃႈဢေႃႈ မႃးႁႄႉတၢင်းၵၼ်ၸိူင်ႉၼႆၼႆႉ ဢမ်ႇၸႂ်ႈၶႂ်ႈႁႃတၢင်းၽိတ်းသႂ်ႇၵၼ်ယူႇႁိုဝ်” ၸႂ်ၵူၼ်းႁၢႆႉမၼ်းၶႂ်ႈဢွၵ်ႇမႃးယဝ်ႉ။

“ၼွင်ႉၵေႃႈ ပီႈၶဝ်ၶႂ်ႈမိူဝ်းၸွမ်းၵူၺ်း ဢမ်ႇႁႄႉၼင်ႇၵဝ်ႇလေႃႇ မိူဝ်ႈၸွမ်းၵၼ်ၵႂႃႈ”

လၢတ်ႈၵႂၢမ်းၼိုင်ႈၶေႃႈ ဢၢႆလဝ်ႈသိင်ႉႁိုၼ်ႇၶိုၼ်ႈမႃးၼႂ်းၵူင်ၶူႈၼင် ဢဝ်ၶမ်းလၢဝ်ႁူႇၼႃႈႁူႇတႃမၼ်းသေ “ဢေႃဢိူဝ်ႈ…မိူဝ်းၵေႃႈမိူဝ်းၶႃႈလႄႈ” ၶဝ်ၸင်ႇပၢၵ်ႈတၢင်းပၼ်ၶမ်းလၢဝ်ၶႃသႅင်ၼူၼ်းယဝ်ႉ။ မိူဝ်ႈပႆဢွၵ်ႇၵႂႃႇမွၵ်ႈယၢင်ႈသွင်ယၢင်ႈၼၼ်ႉ ၶမ်းလၢဝ်ၵေႃႈ ၸၼ်ၶႅၼ်သႅင်ၼူၼ်းလႅၼ်ႈ ၵူၺ်းၵႃႈ ၶဝ်ၼၼ်ႉသမ်ႉ ၵိုင်ႉၵၢင်ႉၸၼ်ဝႆႉၶႅၼ်သႅင်ၼူၼ်းလႄႈ ဢမ်ႇၸၢင်ႈလႅၼ်ႈလႆႈ။

“တေဢၢၼ်းလႅၼ်ႈပၢႆႈပႅတ်ႈၵၼ်ၵႂႃႈၼႆႉ ယႃႇႁဵတ်းၼႆတီႈၵၼ်လေႃႇဢေႉ” ယိပ်းသႂ်ႇၶႅၼ်ၶမ်းလၢဝ်ၵႂႃႇလႄႈ မိူဝ်ႈပဵၼ်ၸိူင်ႉၼၼ် လိူတ်ႈၵေႃႈမႆႈမႃးယဝ်ႉ ၶုၼ်ႇပတ်ႉလၢႆး ႁၵ်းၶေႃႈမိုဝ်းၵူၼ်းၵေႃႉၼၼ်ႉၵႂႃႇ ထွတ်ႇၶႅပ်းတိၼ် ထွတ်ႇသိၼ်ႈမၼ်းပႅတ်ႈ၊ သမ်ႉဝႃႈၼုင်ႈသိၼ်ႈၵေႃႈ သႂ်ႇၵူၼ်သွၼ်ႉၽွမ်ႉတႃႇထွတ်ႇပႅတ်ႈယူႇတႃႇသေႇယဝ်ႉ၊ ၶုၼ်ႇဢီးၽၢင်ႈၵူၼ်းၵေႃႉၼၼ်ႉလူမ်ႉလူင်းၵႂႃႇသေ သိုပ်ႇပုင်ႈဝႅၼ်သႂ်ႇၵူၼ်းၵေႃႉဢၼ်ၵမ်ၶေႃႈမိုဝ်းသႅင်ၼူၼ်းၼၼ်ႉ လူမ်ႉလူင်းၵႂႃႇၸွမ်းၵၼ်ထႅင်ႈ သွင်ၵေႃႉၼၼ်ႉၵေႃႈ ၼႅတ်ႈဢဝ်ဢူၺ်းၵေႃႉၶႃၵူၺ်းယဝ်ႉ၊ ၶမ်းလၢဝ်ၵေႃႈ မိူဝ်ႈၶဝ်ဢမ်ႇတုမ်ႉတွပ်ႇၶိုၼ်းၼၼ်ႉ ၸၼ်ဢဝ်ၶႅၼ်သႅင်ၼူၼ်းဢွၵ်ႇမႃး ႁွပ်ႇပႃးသိၼ်ႈသေလႅၼ်ႈလူင်မိူဝ်း တေႃႇပေႃးထိုင်ႁိူၼ်းၶႃ ၸင်ႇတေႁူႉဝႃႈမၼ်းလွတ်ႈၽေးယဝ်ႉၼႆၵေႃႈ ၼင်ႈယူႇတီႈတိၼ်ၶူဝ်လႆသေ ထူၺ်ႈၸႂ်လိုဝ်ႈႁိူဝ်ႉယူႇယဝ်ႉ။

လိူၼ်ၸဵင်ယဝ်ႉလိူၼ်ၵမ် လုင်းၸရေးၵေႃႈတႄႇႁႅၵ်ႈႁႃဢဝ်သႃမၼ်းယဝ်ႉ၊ ၶမ်းလၢဝ် ၸူဝ်းဢွၼ်ဢဝ်လုၵ်ႈဢွၼ်ႇႁဵၼ်းၸၼ်ႉယႂ်ႇမၼ်းၵႂႃႇၸွႆႈႁဵတ်းၸွမ်းယူႇ။ လုင်းၸရေးၼၼ်ႉၵေႃႈ သမ်ႉဝႃႈၶႂ်ႈသိူင်ႇပိင်ႇၺႃႇမၼ်းယူႇသေတႃႉ မိူဝ်ႈမီးၵူၼ်းမႃးၸွႆႈၼႆ ၵၢၼ်မၼ်းၵေႃႈယဝ်ႉၼမ်ယဝ်ႉဝႆးလႄႈ ဢမ်ႇၸၢင်ႈသိူင်ႇလႆႈယဝ်ႉ။ ပီႊၼႆႉ ၸေႈသႃမၼ်းၵေႃႈလႆႈၼမ်တႄႉတႄႉ ၼင်ႇၵႃႈမၼ်းတၢၼ်ႇပေႃးၸႂ်ႉၼၼ်ႉ ဢၼ်လိူဝ်မၼ်းၵေႃႈ ပၼ်တီႈၶမ်းလၢဝ်ၶဝ်ၵႂႃႇမူတ်းမူတ်း ပေႃးဝႃႈၶႂ်ႈၸႂ်ႉၶိူင်ႈမိုဝ်းမၼ်းၼႆၵေႃႈ လၢတ်ႈႁႂ်ႈဢွၼ်ၵၼ်မႃးႁဵတ်းတီႈႁိူၼ်းမၼ်းထႅင်ႈလႆႈယူႇၼႆႁေ သူင်ႇသင်ႇလၢတ်ႈၶမ်းလၢဝ်ၵႂႃႇ။

ၼႆႉၵေႃႈပဵၼ်လွင်ႈလီတွၼ်ႈတႃႇႁူင်းႁဵၼ်းမၼ်းတႄႉလႄႈ ၼင်ႇႁိုဝ်လုၵ်ႈႁဵၼ်းမၼ်း တေလႆႈမေႃပၺ်ႇၺႃႇသေဢမ်ႇၵႃး၊ တေလႆႈမီးၸေႈတႃႇၸႂ်ႉတိုဝ်းၼႂ်းႁူင်းႁဵၼ်းလႆႈ၊ ၼႂ်းၶၢဝ်းတၢင်းလိူၼ်ၵမ်တေႃႇလိူၼ်သၢမ်ၼႆႉ မၼ်းၵေႃႈၸူဝ်းဢွၼ်ဢဝ်လုၵ်ႈႁဵၼ်းမၼ်းႁဵတ်းၸေႈသႃၵႂႃႇ တႃႇၸႂ်ႉတိုဝ်းၼႂ်းႁူင်းႁဵၼ်းၶဝ်ၼၼ်ႉမႃးတိၵ်းတိၵ်း ယူႇယဝ်ႉ။

ၼႂ်းၽႃႇသႃႇၵၢၼ်ႁဵၼ်း ဢၼ်လုၵ်ႈႁဵၼ်ထုၵ်ႇလီႁူႉမေႃၼၼ်ႉ ဢမ်ႇၸႂ်ႈလိၵ်ႈလၢႆးမဵဝ်းလဵဝ်ၵူၺ်း၊ ၵၢၼ်မေႃတိၼ်မေႃမိုဝ်း ၵၢၼ်ႁႃလဵင်ႉတွင်ႉၼၼ်ႉ မၼ်းၵေႃႈလမ်ႇလွင်ႈပုၼ်ႈတႃႇၶဝ်တႄႉတႄႉလႄႈ ၸၢင်ႈဢဝ်မႃးသိုပ်ႇလဵင်ႉသၢႆၸႂ်ၶဝ်ၵႂႃႇလႆႈထႅင်ႈ၊ ပေႃးႁူႉလိၵ်ႈႁူႉလၢႆး မေႃၵၢၼ်မေႃငၢၼ်းၵႂႃႇၸွမ်းၵၼ်ၼႆ ၼႃႈၵၢၼ်တႃငၢၼ်းတၢင်းႁူႉၵေႃႈ တေႃႈတေၶိုၵ်ႉၶႅမ်ႉမႃးထႅင်ႈယူႇ မၼ်းဝူၼ်ႉႁၼ်ၼင်ႇၼၼ်သေ ၶတ်းၸႂ်ႁႃ ၽူႈၵူၼ်းဢၼ်ႁဵတ်းၵၢၼ်မေႃတိၼ်မေႃမိုဝ်း မႃးသွၼ်ပၼ် ဢမ်ႇၼၼ် ႁႂ်ႈလုၵ်ႈႁဵၼ်းၵႂႃႇၶိုၼ်ႈႁဵၼ်းသွၼ် ၼႆႉတႄႉ ပဵၼ်ပၢႆးဝူၼ်ႉၽႅၼ်ၵၢၼ်မၼ်းထႅင်ႈ ၼႂ်းပီႊၼႃႈၼၼ်ႉယဝ်ႉ။

လိူၼ်သၢမ်သုတ်းသဵင်ႈ လိူၼ်သီႇၶဝ်ႈထိုင်မႃး ဝၼ်းဢိုတ်းႁဵၼ်းၵေႃႈၶိုၼ်းထိုင် ၽိူဝ်မႆႉၼိုင်ၶွၼ်းလူမ်းထွင်းလေႃးပႃးၾုၼ်ႇမုၵ်ႉ ႁုၵ်ႉၸၼ်ဢဝ်ၸႂ်ပိဝ်ၸွမ်းၵႂႃႇ ပေႉမႃးၵႅၼ်ႇၶႂ်ႈၵႂႃႇတၢင်းလႂ်တၢင်းလီဢမ်ႇႁူႉယဝ်ႉ။ ၶမ်းလၢဝ်ၵေႃႈ ဢိုတ်းႁဵၼ်းယဝ်ႉၼႆ လႆႈပွၵ်ႈၶိုၼ်းမိူဝ်းတီႈႁိူၼ်းမၼ်းၵႂႃႇယဝ်ႉ။

သမ်ႉဝႃႈမိူဝ်းယူႇႁိူၼ်းသေတႃႉ ဢမ်ႇလႆႈယူႇႁိူၼ်းသေဢိတ်း၊ ပိူၼ်ႈတေႁဵတ်းပၢင်သွၼ်လိၵ်ႈတႆးၶၢဝ်းမႆႈၼႆလႄႈ ဢူႈၶဝ်ၵေႃႈ ႁႂ်ႈမၼ်းၵႂႃႇႁဵတ်းမေႃသွၼ်ၸွႆႈပိူၼ်ႈထႅင်ႈယူႇယဝ်ႉ၊ မၼ်းၵေႃႈ ယူႇႁိူၼ်းယဝ်ႉၶႂ်ႈၶၢၼ်ႉမႃးမိူၼ်ၵၼ် ဢမ်ႇပေႃးၶႂ်ႈမေႃယူႇယဝ်ႉၼႆသေ တႅပ်းတတ်းၵႂႃႇၸွမ်းပိူၼ်ႈယူႇ။

ၼႂ်းၽဝဢၼ်ဢမ်ႇယၢမ်ႈဝူၼ်ႉဝႃႈ တေပဵၼ်မႃးမေႃသွၼ်လႆႈၼၼ်ႉ ယၢမ်းလဵဝ်ၵေႃႈ ၶမ်းလၢဝ် လႆႈပဵၼ်မေႃသွၼ်ၵႂႃႇတဵမ်တူဝ်တဵမ်ၸႂ်ယဝ်ႉ။

သိုပ်ႇလူၵႂႃႇထႅင်ႈတွၼ်ႈတေမႃးၶႃႈ။