တွၼ်ႈသၢဝ်းဢဵတ်း
ၶမ်းလၢဝ်လႄႈ မေႃယႃႁွမ်ၽူၺ်းၵေႃႈ ႁွတ်ႈထိုင်တီႈဝၢၼ်ႈၶုမ်ႇ မိူင်းသမ်ႉပေႃးၸမ်ၶမ်ႈယဝ်ႉ၊ မေႃယႃၸင်ႇဢွၼ်မိူဝ်းၵႂႃႇတၢင်းႁိူၼ်းၸၢႆးဝၼ်းၶဝ်ၼၼ်ႉလႄႈ တီႈႁိူၼ်းၼၼ်ႉသမ်ႉ ပိၵ်ႉၽၵ်းတူဝႆႉဢမ်ႇမီးၽႂ်ယူႇႁိူၼ်း ၵွႆးမီးၽုင်ၵႆႇ ၶေႇသွၵ်ႈတဝ်ယူႇၼႂ်းဝၢင်းႁိူၼ်းၶဝ်ၼၼ်ႉၵူၺ်း။ ၶမ်းလၢဝ်ၶႃၵေႃႈ ၸင်ႇမိူဝ်းၵႂႃႇႁိမ်းႁိူၼ်းၸၢႆးဝၼ်းၶဝ်ၼၼ်ႉသေ ၽုၺ်ႇၽၵ်းတူၵိူၼ်ႇယဝ်ႉ၊ ၸဝ်ႈႁိူၼ်းၵေႃႈ ဢွၵ်ႇမႃးငွၵ်ႈတူၺ်း ၼၼ်ႉတႄႉပဵၼ် ၼွင်ႉလႅင်ၵူၺ်း။
“မႂ်ႇသုင်ၶႃႈ မေႃသွၼ် ပီႈၽူၺ်း ၶဝ်ႈမႃးၼႂ်းႁိူၼ်းၵွၼ်ႇၶႃႈလႄႈ”
သွင်ၶႃၵေႃႈ ၶဝ်ႈမိူဝ်းၵႂႃႇၼႂ်းႁိူၼ်းသုမ်ႇတွပ်းဢွၼ်ႇၶဝ်ၼၼ်ႉသေ ႁၼ်ၼၢႆးမွၼ်ႇထဝ်ႈဢွၼ်ႇၵေႃႉၼိုင်ႈ ၼင်ႈလဵၼ်ႈၵေႃႉလၢၼ်ဢွၼ်ႇမၼ်းၼၼ်ႉလႄႈ ႁၼ်ၶမ်းလၢဝ်ၶႃယဝ်ႉၵေႃႈ။
“ႁႃ..ဢမ်ႇၸႂ်ႈၼွင်ႉၽူၺ်းႁိုဝ်လႃႇၼႆႉ” ယၵ်ႉတူၺ်းၶမ်းလၢဝ်လီလီႁေ “ၼႆႉႁမ်ႉ”
“ဢေႃ..ၼႆႉပဵၼ်မေႃသွၼ်ၶႃႈဢေႃႈၼၢႆး..” ၼွင်ႉလႅင်ၼႄႉၼမ်းၼႄၵႂႃႇ။
ၶဝ်ၵေႃႈတူင်ႉတၵ်ႉဢုပ်ႇၵုမ်ၵၼ်ၵႂႃႇ၊ မေႃယႃမီးၵၢၼ်လူဝ်ႇႁဵတ်းၼႆလႄႈ သိုပ်ႇၵႂႃႇႁဵတ်းၵၢၼ်မၼ်းထႅင်ႈႁေ ပၼ်ႁႂ်ႈၶမ်းလၢဝ်ပႂ်ႉဝႆႉယူႇတီႈၼႂ်းႁိူၼ်းၼၼ်ႉယဝ်ႉ။
ၶမ်းလၢဝ်ဢမ်ႇလႆႈႁၼ် ၼွင်ႉလႅင်ၵႂႃႇႁူင်းႁဵၼ်းပဵၼ်လိူၼ်ယဝ်ႉၼၼ်ႉ ၸင်ႇလႆႈထၢမ်တူၺ်း “ပီႈဢမ်ႇလႆႈႁၼ်ၼွင်ႉၵႂႃႇႁူင်းႁဵၼ်းႁိုင်ယဝ်ႉ ၼွင်ႉဢမ်ႇယူႇလီႁႃႉ..”
ၼွင်ႉလႅင်ၵူမ်ႈၼႃႈၵူမ်ႈတႃ ယၵ်းမိုဝ်းလဵၼ်ႈယူႇ ၼင်ႇမီးလွင်ႈၼၵ်းၸႂ် ဢၼ်ဢမ်ႇႁတ်းလၢတ်ႈၼၼ်ႉယဝ်ႉ။
“ဢမ်ႇၸႂ်ႈၶႃႈ”
“ဢမ်ႇၸႂ်ႈ သမ်ႉပဵၼ်ယွၼ်ႉႁင်လႃႇ တၢင်းယၢပ်ႇၼႃႇႁႃႉ၊ ၾူၼ်တူၵ်းၼႃႇႁႃႉ ဢမ်ႇၼၼ်ၵေႃႈ ဢမ်ႇလႆႈၸႂ်ဢၼ်ပီႈသွၼ်ၼၼ်ႉႁႃႉ”
“ဢမ်ႇၸႂ်ႈႁေဢၼ်ၶႃႈ ၶႃႈၵျိူၵ်ႈၵႂႃႇႁူင်းႁဵၼ်းဢေႃႈ”
“ၵျိူၵ်ႈၵေႃႈၵႂႃႇၼၼ်ႉၼႃႇ ပီႈဢမ်ႇလႆႈဝႃႈယႃႇပေၵႂႃႇလူး”
ၼွင်ႉလႅင်ၼၼ်ႉၵေႃႈ မီႇၼႃႈမီႇတႃၼမ်ႉတႃၸိုမ်ႉယမ်းမႃးသေ “လုင်းၵႄႇၶဝ်မႃးလၢတ်ႈဝႃႈ ပေႃးဢမ်ႇသႂ်ႇငိုၼ်းၵေႃႈ တေဢမ်ႇလႆႈၵႂႃႇႁူင်းႁဵၼ်းၼႆၶႃႈဢေႃႈ”
ၶမ်းလၢဝ်လႆႈငိၼ်းၼင်ႇၼၼ်ၵေႃႈ ပဵၼ်ဢၼ်တူၵ်းၸႂ်မႃးယဝ်ႉ “ငိုၼ်း!! ငိုၼ်းႁင်လႃႇ ပီႈတမ်ႉဢမ်ႇႁူႉၵူၺ်ႉၼၼ်ႉ”
“ငိုၼ်းၵႃႈပပ်ႉၵႃႈၸႂ်ႉၸၢႆႇၶူဝ်းၸႂ်ႉၶူဝ်းတိုဝ်းၼႂ်းႁူင်းႁဵၼ်းၼႆဢေႃႈ”
ၼၢႆးမွၼ်ႇၵေႃႈလၢတ်ႈၸွမ်း “ပေႃးလၢတ်ႈလွင်ႈၼႆႉၵေႃႈ ၶႃႈၵေႃႈၶႂ်ႈထၢမ်မေႃသွၼ်ႁဝ်းဢိတ်ႉၼိုင်ႈဢေႃႈ ၸႂ်ႈမေႃသွၼ်ႁဝ်း ႁႂ်ႈမႃးယွၼ်းယူႇၶႃႈႁႃႉ ၶဝ်ဝႃႈမေႃသွၼ်လူဝ်ႇပပ်ႉလူဝ်ႇၵမ်ပၼ်လုၵ်ႈဢွၼ်ႇလႄႈ လႆႈမႃးၵဵပ်းငိုၼ်းတွၼ်ႈတႃႇသိုဝ်ႉပၼ်ၶဝ်ၼႆၶႃႈဢေႃႈ”
ဢဝ်ၶမ်းလၢဝ်ပေႃးဢမ်ႇၸၢင်ႈတၵ်းသဵင်လႆႈယဝ်ႉ တေဝႃႈၸႂ်ႈၵေႃႈႁမ်ႉၸႂ်ႈယူႇ ယွၼ်ႉပိူဝ်ႈမၼ်းၼၼ်ႉၵေႃႈ လႆႈၵႂႃႇယွၼ်းတီႈၶိင်းႁဵင်ယူႇတေႉ ၵူၺ်းၵႃႈ မၼ်းၵေႃႈဢမ်ႇထၢင်ႇဝႃႈ ၶဝ်တေၶိုၼ်းမႃးယွၼ်းတီႈပေႃႈမႄႈလုၵ်ႈႁဵၼ်းၸိူင်ႉၼႆ၊ မၼ်းၵေႃႈလိုမ်းဝူၼ်ႉပႅတ်ႈဝႃႈ ပေႃးဢမ်ႇယွၼ်းၶိုၼ်းၵူၼ်းၼႂ်းဝၢၼ်ႈ ၶဝ်ၵေႃႈဢမ်ႇၸၢင်ႈၵႂႃႇႁႃတီႈလႂ်။
“ၶဝ်မႃးယွၼ်းၼမ်ယူႇၶႃႈႁႃႉ!! ”
“ၸႂ်ႈဢေႃႈ မိူဝ်ႈလိူၼ်ဢွၼ်တၢင်းၼၼ်ႉတႄႉ ၶဝ်ၵေႃႈဝႃႈ တႃႇၸွႆႈငိုၼ်းလိူၼ်မေႃသွၼ်လႄႈ ၽႂ်မီးၶဝ်ႈၵေႃႈပၼ်ၶဝ်ႈ၊ ၽႂ်မီးၼမ်ႉမၼ်းၵေႃႈပၼ်ၼမ်ႉမၼ်းၼႆဢေႃႈ မၼ်းၵေႃႈဢမ်ႇလႆႈၼႃႇၸႂ်သင်၊ ၵူၺ်းၵႃႈ ဝၢႆးႁေၼၼ်ႉမႃး ၶဝ်ၵေႃႈမႃးၵဵပ်းၶႂ်ႈဝႃႈၵူႈဝူင်ႈၶႃႈယဝ်ႉ ၼိုင်ႈဝူင်ႈသွင်ႁဵင်သွင်ႁဵင်ၶႃႈဢေႃႈ ပေႃးဢမ်ႇပၼ်ၵေႃႈ ႁမ်ႉဝႃႈ ဢမ်ႇပၼ်ၶိုၼ်ႈႁူင်းႁဵၼ်းၼႆၼၼ်ႉၶႃႈၼႃႇ၊ မိူဝ်ႈပွၵ်ႈဢွၼ်တၢင်းၼၼ်ႉတႄႉၵေႃႈ ဢေးလႅင်မၼ်းၶႂ်ႈၶိုၼ်ႈၼႃႇလႄႈ ၶွၵ်းၶွၵ်းၶေႇၶေႇႁေ ႁႃမႃးၸၢႆႇပၼ်ဢေႃႈ”
ၼၢႆးမွၼ်ႇထူၺ်ႈၸႂ်လူင်ၵႅပ်ႉၼိုင်ႈသေ သိုပ်ႇလၢတ်ႈ “ဢမ်ႇၸၢင်ႈႁဵတ်းႁိုဝ် မေႃသွၼ်ဢိူဝ်ႉ ငိုၼ်းၼၼ်ႉ ၼႂ်းထူင်ၼႂ်းထွင်းႁဝ်း မၢင်ႁဵင်ၼၼ်ႉ ဢမ်ႇတွၼ်ႉတဵမ်မိုၼ်ႇႁေပွၵ်ႈၶႃႈလူး ဢၼ်လႆႈၵိၼ်ယူႇၼႆႉၵေႃႈ ဢဝ်မႃးၼႂ်းႁႆႈၼႂ်းသူၼ်လႄႈဢမ်ႇဢိုပ်းၵူၺ်းဢေႃႈ ပေႃးၵွမ်ႉငိုၼ်းတႄႉ မၼ်းၵိၼ်းဝႃႈၵိၼ်းတေႉယဝ်ႉ၊ တႃႇတေလႆႈမႃးႁဵင်သွင်ႁဵင်ၼၼ်ႉၵေႃႈ ဢမ်ႇတေႃႇတေႃႇ မၢင်ပွၵ်ႈၵႂႃႇၼင်ႈၶၢႆၽၵ်းတၢင်းဝၼ်းၸင်ႇတေလႆႈမႃးၶႃႈဢေႃႈ မေႃသွၼ်ႁဝ်းၵေႃႈ ဢီးလူမၼ်းႁေ ပၼ်မၼ်းၵႂႃႇၶိုၼ်ႈႁူင်းႁဵၼ်းဢိတ်ႉၼိုင်ႈၶႃႈလႃႈ”
ၶမ်းလၢဝ်ၵေႃႈ ၼင်ႈထူၺ်ႈၸႂ်လူင်ၵမ်းယဝ်ႉၵမ်း ၵမ်တႃမိုဝ်းသမ်ႉပေႃးမၼ်ႈတိုင်ႈတိုင်ႈယဝ်ႉ “ဢေႃႈၶႃႈ ၼွင်ႉလႅင်ၵႂႃႇႁူင်းႁဵၼ်းၶိုၼ်းလႄႈၼႃႈ လွင်ႈၼႆႉ ပီႈတေၸတ်းၵၢၼ်ၵူၺ်း” ယၵ်ႉတူၺ်းၼႃႈၼွင်ႉလႅင်ႁေ “ဢူၺ်းၵေႃႉ ဢၼ်ဢမ်ႇၵႂႃႇၸိူဝ်းၼၼ်ႉၵေႃႈ ႁွင်ႉၵႂႃႇပႃးလႄႈၼႃႈ ယႃႇမႆႈၸႂ်သင်”
ၼွင်ႉလႅင်ၼၼ်ႉၵေႃႈ ပဵၼ်ဢၼ်ၸူမ်းၸူမ်းသိူဝ်းသိူဝ်းတေႉတေႉဝႃႈဝႃႈယူႇယဝ်ႉ။ ၼွင်ႉလႅင် ဢမ်ႇလိူဝ်လႆႈၸႂ်ၶႂ်ႈႁဵၼ်းၼႃႇလႄႈ ၼၢႆးၶဝ်ၵေႃႈ ဢမ်ႇၸၢင်ႈႁဵတ်းႁိုဝ် ၵႃႈလႆႈၸွမ်းၸႂ်မၼ်းယဝ်ႉ၊ ဢူႈၶဝ်တႄႉၵေႃႈသဵင်ႈၵႂႃႇယဝ်ႉလႄႈ မႄႈၶဝ်ၵေႃႈ ဝၢႆးသေဢူႈၶဝ်ဢမ်ႇမီးယဝ်ႉ ပွႆႇၶႃပီႈၼွင်ႉဝႆႉၸွမ်းၼၢႆးသေ ဢွၵ်ႇၵႂႃႇႁဵတ်းၵၢၼ်မိူင်းထႆးၼႆၵေႃႈ ဢမ်ႇပွၵ်ႈမႃးၶိုၼ်း၊ၶၢဝ်ႇငၢဝ်းၵေႃႈ ဢမ်ႇလႆႈငိၼ်း မီးမွၵ်ႈသွင်ပီႊၼႆႉယဝ်ႉ။
ပေႃးဝႃႈ ပေႃႈမႄႈၸၢႆးဝၼ်း ပွၵ်ႈၶိုၼ်းႁိူၼ်းယဝ်ႉၼႆၵေႃႈ မႃယႃမႃးၸူဝ်းႁွင်ႉဢဝ် ၶမ်းလၢဝ်မိူဝ်းဢုပ်ႇတင်းၶဝ်ၵႂႃႇ။ ၵေႃႉဢၼ်ပဵၼ်မႄႈၸၢႆးဝၼ်းၶဝ်ၼၼ်ႉတႄႉ မိူဝ်ႈႁူႉဝႃႈလုၵ်ႈမၼ်းဢမ်ႇယူႇလီၼႆ ပဵၼ်သုၵ်ႉပဵၼ်သၵ်ႉဝႆႉ ဢမ်ႇပဵၼ်ၵိၼ်ပဵၼ်သဝ်းလႆႈယဝ်ႉလႄႈ ၼႅတ်ႈဢဝ်ၶူဝ်းဢဝ်လဵင်းမၼ်း ပွၵ်ႈမႃးၸွမ်းၶမ်းလၢဝ်ၶဝ်ၵမ်းလဵဝ်။
ယၢမ်းၵၢင်ၶိုၼ်းလိုၵ်း ၼႃႈၾႃႉၼႃႈမိူင်းဢမ်ႇပိုတ်ႇဢမ်ႇပၢင်ႇ လပ်းသိင်ႇၽိတ်းၽိတ်းၼၼ်ႉ ၶမ်းလၢဝ်ၵေႃႈ တေႃႈၸႂ်တေသုၵ်ႉသၵ်ႉ ၼွၼ်းဢမ်ႇလပ်းလႆႈလႄႈ လုၵ်ႉမႃးၼင်ႈႁေ တူၺ်းငွႆးၾႆးလႅင်းဝွႆးဝွႆးယူႇၼိူဝ်ၽိူၼ်ၼၼ်ႉႁင်းၵူၺ်းယဝ်ႉ။ ၼင်ႇႁၢင်ႈ ၼႂ်းၸႂ်ၼႂ်းၶေႃးၼၼ်ႉ ဝူၼ်ႉထိုင် လႅင်းမိူင်းသႂ်မႃးၵမ်းလဵဝ် မၢင်ၵမ်းၵေႃႈ မိူၼ်ႁၼ်ႁၢင်ႈၽၢမ်းတႃမႃးဝႃႈ “တႆႈၾႆးလႅင်းပေႃးတၢၼ်ႇၼၼ်ႉ တေၼွၼ်းလပ်းလႆႈၸိူင်ႉႁိုဝ်လႃႇ မွတ်ႇၾႆးလႄႈ ပေႃးၼွၼ်းၵေႃႈတေလပ်းၵူၺ်းဢိူဝ်ႈ”
“မၼ်းဢမ်ႇၵဵဝ်ႇၵၼ်တင်းၾႆးလေႃႇ မၼ်းပဵၼ်လွင်ႈၶမ်ၸႂ်ယူႇၼႆႉၵူၺ်းဢိူဝ်ႈ” ယဵၼ်သဵင်ၵႂႃႇၵႅပ်ႉၼိုင်ႈယဝ်ႉ မႄးၼွၼ်းဢဝ်မိုဝ်းတၢင်ႇၼႃႈၽၢၵ်ႇသေ “ဢၢႆႈၼွင်ႉ ၵဝ်ၸႂ်ထိုင်မႂ်းတေႉယဝ်ႉ ဢမ်ႇမီးမႂ်းယဝ်ႉ ႁဵတ်းႁႂ်ႈၵဝ်ငဝ်တေႉဢိူဝ်ႈ ၵဝ်ဢမ်ႇႁူႉဝႃႈၵဝ်တေလႆႈႁဵတ်းၸိူင်ႉႁိုဝ် ဢမ်ႇႁူႉဝႃႈ ဢၼ်ၵဝ်ႁဵတ်းယူႇၼၼ်ႉ မၼ်းၽိတ်းႁႃႉမၼ်းထုၵ်ႇ ၵဝ်ဢမ်ႇႁူႉ တေလႆႈၵႂႃႇထၢမ်ၽႂ် တေလႆႈၵႂႃႇလၢတ်ႈၼႄၽႂ် မႂ်းပွၵ်ႈမႃးၶိုၼ်းဢမ်ႇလႆႈႁႃႉ ၵဝ်မီးလွင်ႈၶမ်ၸႂ်ဢၼ်ၶႂ်ႈလၢတ်ႈၼႄမႂ်းတင်းၼမ်ၼၼ်ႉယဝ်ႉ”
မၼ်းၵေႃႈၼွၼ်းၽိုၼ်ႉတူဝ်မၼ်း ဝၢႆႇတူၺ်းၵွၵ်းၾႆးသေယဝ်ႉ လၢတ်ႈမိူၼ်လႅင်းမိူင်းသႂ်တိုၵ်ႉမီးယူႇၼၼ်ႉဝႃႈ “မိူဝ်ႈၼႆႉ ၵဝ်ၵႂႃႇတီႈဝၢၼ်ႈဝၢၼ်ႈၶုမ်ႇ လႆႈႁၼ်သဵၼ်ႈတၢင်းလုၵ်ႈဢွၼ်ႇႁဵၼ်းႁႃး ၵႂႃႇၵႂႃႇမႃးမႃးၵူႈဝၼ်းၼၼ်ႉ ၵဝ်လႆႈႁူႉဝႃႈ တၢင်းၶဝ်ၼၼ်ႉမၼ်းယၢပ်ႇတၢၼ်ႇႁိုဝ်၊ လႆႈႁူႉဝႃႈ တွၼ်ႈတႃႇၶဝ်ယဝ်ႉ တႃႇတေလႆႈႁဵၼ်းၼၼ်ႉ မၼ်းလႆႈၵႂႃႇၵႆတၢၼ်ႇႁိုဝ် ဢၼ်ဝႃႈၵဝ်ၶတ်းၸႂ်ယူႇၼႆႉ ယင်းဢမ်ႇၶတ်းၸႂ်တၢၼ်ႇၶဝ်ၵွၼ်ႇ ၵဝ်ဢဝ်ပေႉတၢင်းၶတ်းၸႂ်ၶဝ်ဢမ်ႇလႆႈလႄႈ ၵဝ်ထုၵ်ႇလီလႆႈၶတ်းၸႂ်ပၼ်ၶဝ်ထႅင်ႈလိူဝ်သေၼႆႉယဝ်ႉ မၼ်းႁဵတ်းႁႂ်ႈၵဝ်ဝူၼ်ႉၸိူင်ႉၼႆဢိူဝ်ႈ”
ၶမ်းလၢဝ်ၵေႃႈ သုတ်ႇၶီႈမုၵ်ႉမၼ်းသေ ၸဵတ်ႉၼမ်ႉတႃမၼ်းယဝ်ႉ “ၵူၺ်းၵႃႈ ၵဝ်ၵေႃႈပဵၼ်မေႃသွၼ်ဢမ်ႇလႆႈလွင်ႈလႄႈ ပဵၼ်မေႃသွၼ်ဢၼ်ဢမ်ႇလီၵေႃႉၼိုင်ႈယဝ်ႉ ၵဝ်ဢမ်ႇလႆႈႁဵတ်းသင်ပၼ်ၶဝ်သေဢမ်ႇၵႃး ႁဵတ်းႁႂ်ႈၶဝ်လႆႈလိူတ်ႇမႆႈထႅင်ႈၵွၼ်ႇ ၵဝ်တေလႆႈႁဵတ်းႁိုဝ်လီလႃႇ ပွၵ်ႈမိူဝ်းႁိူၼ်းၶိုၼ်းတေလီႁိုဝ်၊ ၵဝ်ဢမ်ႇယၢမ်ႈဝူၼ်ႉဝႃႈ ၵဝ်တေမႃးပဵၼ်မေႃသွၼ်လႄႈ တေလႆႈမႃးထူပ်းၸိူင်ႉၼႆ ၵဝ်တေႁဵတ်းႁိုဝ်လႃႇ ၸွႆႈလၢတ်ႈၵဝ်ၽွင်ႈ..”
သဵင်ၵႆႇၶၼ်ႁွင်ႉလင်မေႃး မိူင်းပႆႇလႅင်းၵေႃႈႁူႉဝႃႈပဵၼ်ၵၢင်ၼႂ်ယဝ်ႉ ၵူၼ်းထဝ်ႈၵူၼ်းၵႄႇၵူၼ်းလုၵ်ႉၸဝ်ႉၶဝ်ၵေႃႈ လုၵ်ႉဢွၵ်ႇမႃးႁႃႁုင်ၶဝ်ႈမိုဝ်ႉၽၵ်း တၢင်ႇသွမ်းဝႆႈၽြႃး ယူႇယဝ်ႉ။ ၵူၼ်းၼွၼ်းလိုၵ်းတႄႉဢမ်ႇႁူႉမိူင်းလႅင်း ၵႃႈၼွၼ်းဢမ်ႇဢိမ်ႇတိုၼ်းဢမ်ႇတိုၼ်ႇၼၼ်ႉယဝ်ႉ။
ၾႃႉပၢင်ႇမိူင်းလႅင်းယဝ်ႉသေတႃႉ ၾူၼ်တႄႉ ယင်းတိုၵ်ႉတူၵ်းတူၵ်းသိင်းသိင်းယူႇႁဵတ်းၼၼ် လုၵ်ႉမႃးၵေႃႈ ႁၼ်ၼၢႆးယၢင်ႈၶူဝ်းယူႇတီႈၽီးၾႆးၼၼ်ႉႁင်းမၼ်း။
ၼၢႆးၸင်ႇလၢတ်ႈၸူးၶမ်းလၢဝ် “လုၵ်ႉယဝ်ႉႁႃႉ မႃးၵိၼ်ၶဝ်ႈၵိၼ်ၼမ်ႉႁေဢိတ်ႉလႄႈယိင်း”
“ၼၢႆးဢမ်ႇၵႂႃႇလႂ်ၶႃႈႁႃႉမိူဝ်ႈၼႆႉ!!”
“ဢိူဝ်ႈ.. ၼၢႆးဢၢင်ႈၶႂ်ႈၵႂႃႇႁိူၼ်းလုင်းၸရေးဝႃႇလိင်ႇၶဝ်ႁေၵမ်ႉၼိုင်ႈဝႃႇၼႆႉ တၢင်းဝၢၼ်ႈၶၢႆးမူဝ်ပုၼ်ႉဢိူဝ်ႈ ယိင်းၸွင်ႇၶႂ်ႈၵႂႃႇၸွမ်းႁိုဝ်”
ၶမ်းလၢဝ်မိုင်ဝူၼ်ႉလူင်ၵႂႃႇၵႅပ်ႉၼိုင်ႈ “ဢေႃႈ..ၶႃႈတေၵႂႃႇၸွမ်း”
ၸဵမ်မိူဝ်ႈမၼ်းႁွတ်ႈမႃးထိုင်တီႈဝၢၼ်ႈၼႆႉ မီးၵႂႃႇသၢမ်လိူၼ်ပၢႆယဝ်ႉ ဝၢၼ်ႈဢၼ်လုၵ်ႈႁဵၼ်းမၼ်းယူႇၼၼ်ႉ ဢမ်ႇတွၼ်ႉလႄႇႁွတ်ႈၸွတ်ႇထိုင်လႆႈ လိူဝ်သေၼႂ်းဝၢၼ်ႈဢၼ်မၼ်းယူႇၼၼ်ႉလႄႈ ဝၢၼ်ႈၸိင်ၼၼ်ႉၵူၺ်း။
ၵိၼ်ၶဝ်ႈၵိၼ်သင်ယဝ်ႉ ယၢမ်းလႃႈယူႇတၢၼ်ႇတၢၼ်ႇ မွၵ်ႇၵုမ်ႈသုမ်ႇတၼ်တိင်းၼိင်း ၾူၼ်ဢွႆယွႆးသိင်းသိင်း ၶမ်းလၢဝ်လႄႈတင်းၼၢႆးၵေႃႈ တိုဝ်းၵုပ်းသုပ်းသွၵ်းဢူတ်ႇ ဝႆၽႃႈယၢင်သေ ပႃးထူင်ၽၵ်းပႅမ်းယဝ်ႉ ဢွၼ်ၵၼ်ၵႂႃႇတၢင်းဝၢၼ်ႈၶၢႆးမူဝ်ၼၼ်ႉယဝ်ႉ၊ တၢင်းၵႂႃႇဝၢၼ်ႈၶၢႆးမူဝ်ၼၼ်ႉၵေႃႈ မီးယူႇသွင်တၢင်း တၢင်းလွႆလႄႈ ၸွမ်းၽင်ႇၼမ်ႉ၊ ၶၢဝ်းၾူၼ် ၾူၼ်တူၵ်းႁႅင်းလႄႈၼမ်ႉၸၢင်ႈၼွင်း ဢမ်ႇလွတ်ႈၽေးၼႆသေ သွင်ၶႃၵေႃႈ ၶိုၼ်ႈၵႂႃႇၸွမ်းတၢပ်ႈၸွမ်းလွႆၼၼ်ႉတိၵ်းတိၵ်းယဝ်ႉ၊ မိူဝ်ႈၶိုၼ်ႈလွႆၵႂႃႇတိၵ်းတိၵ်း လွႆၵေႃႈသုင်ယၢဝ်းတိၵ်းတိၵ်း၊ တၢင်းမိုၼ်ႈဢၼ်ဝႃႈၼၼ်ႉတႄႉ မိုၼ်ႈပေႃးသုတ်းတၢင်းယဝ်ႉ မိူဝ်ႈၵႂႃႇတၢင်းတၢပ်ႈလွႆၶႂ်ႈသုင်တၢၼ်ႇတၢၼ်ႇၼၼ်ႉ ၵႂႃႇၺႃးလိၼ်ၵူၼ်ႇလႄႈ လိၼ်ၼၼ်ႉၵေႃႈ လေႃးပႃးမၢၵ်ႇႁိၼ်ၼဝ်ႈဝႆႉယူႇ။
ၼၢႆးၵေႃႈယိပ်းဢဝ်မၢၵ်ႇႁိၼ်ၼၼ်ႉသေ “ၼႆႉယိင်း!! မၢၵ်ႇႁိၼ်ၸိူဝ်းၼႆႉ ၸႂ်ႉတႅၼ်းထုၼ်ၶၢဝ်လႆႈယူႇဢိူဝ်ႈၼႆႉ”
ၶမ်းလၢဝ်ၵေႃႈယိပ်းတူၺ်းႁေ ၶိတ်ႇတီႈသိူဝ်ႈမၼ်းတူၺ်း ဢွၵ်ႇႁွႆးမႃးယူႇလႄႈ “ၸွင်ႇမၼ်းတေမွတ်ႇလႆႈယူႇၶႃႈႁႃႉၸိူင်ႉၼႆ”
“မွတ်ႇလႆႈၵႃႈ ဢဝ်ၽႅၼ်ႇၸုပ်ႉၼမ်ႉၵူၺ်းၵေႃႈ ၸဵတ်ႉလႆႈယဝ်ႉ”
ၶမ်းလၢဝ်ၵေႃႈ ၵဵပ်းသႂ်ႇပႅမ်းမၼ်းၵႂႃႇမွၵ်ႈႁေၵမ်ၼႆႉလႄႈ ဢွၼ်ၵၼ်သိုပ်ႇဢွၵ်ႇၶၢဝ်းတၢင်းၵႂႃႇထႅင်ႈ ယူႇယဝ်ႉ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ။
