တွၼ်ႈသၢဝ်းသွင်
ၶိုၼ်ႈလွႆယဝ်ႉလူင်းႁူၺ်ႈ လတ်းပႃႇလတ်းၶိူဝ်းလူင်သေ မိူဝ်းႁွတ်ႈၵႂႃႇထိုင်တီႈ ဝၢၼ်ႈၶၢႆးမူဝ်ယဝ်ႉ တီႈႁိမ်းဝၢၼ်ႈၶဝ်ၼၼ်ႉ မီးၼွင်လူင်ၵႂၢင်ႈယႂ်ႇ ဝႂ်မူဝ်မူၼ်းတဵမ်ၼွင် ၵိုင်ႇတင်းၸိုဝ်ႈမၼ်းႁွင်ႉဝႃႈ ၶၢႆးမူဝ်ယူႇၵူၺ်း။ ၼၢႆးၵေႃႈ ဢွၼ်ဢဝ်ၶမ်းလၢဝ်ၶဝ်ႈမိူဝ်းၵႂႃႇ ၼႂ်းဝၢင်းႁိူၼ်းတုပ်ႈသွင်သွင်ႇဢွၼ်ႇလင်ၼိုင်ႈသေ
“လုင်းၸရေးႁဝ်းၸွင်ႇယူႇႁိူၼ်းၶႃႈ”
သဵင်ဢႆ ဢႁူၵ်ႉ! မေႃးယူႇၼႂ်းႁိူၼ်းၼၼ်ႉလႄႈ လွမ်ငွၵ်ႈၽၵ်းတူမႃးတူၺ်း “ႁိုဝ်… ၼၢႆးၶမ်းလႅင်ႁိုဝ်လႃႇ ၶဝ်ႈမႃးလႄႈ ၶဝ်ႈမႃးၼႂ်းႁိူၼ်းၵွၼ်ႇလႄႈ” ဢဝ်ၼမ်ႉၼဵင်ႈမႃးတမ်းပၼ်သေယဝ်ႉ “ယူႇလီၵိၼ်ဝၢၼ်ၵၼ်ယူႇၼေႃႈ”
“ဢေႃႈယူႇလီယူႇၶႃႈ လုင်းၸရေးႁဝ်းလူး”
“ဢိူဝ်ႈ! ယူႇလီယူႇ ဢွၵ်ႇၸႂ်ႁင်ႁေဢွၼ်ၵၼ်ႁွတ်ႈမႃးထိုင်တၢင်းၼႆႉလႃႇၼႆႉ”
“ဢေႃႈ… ဢဝ်မေႃသွၼ်ႁဝ်းမႃးလႄႇဢိတ်ႉၼိုင်ႈၶႃႈဢေႃႈ”
“လီယဝ်ႉမႃးသူႇမႃးၸႂ်းၵၼ်ၸိူင်ႉၼႆၵေႃႈ ၸူဝ်ႈၽွင်းၼႆႉ ၾူၼ်တူၵ်းၼႃႇဢမ်ႇပေႃးသူႈလႆႈၵႂႃႇတၢင်းလႂ်တေႉတေႉ လိူဝ်သေတီႈဝတ်ႉတီႈၵျွင်းၼၼ်ႉၵူၺ်းၶႃႈယဝ်ႈ”
ၶဝ်ၵေႃႈတူင်ႉတၵ်ႉယူႇလီၵိၼ်ဝၢၼ်ၵၼ်ၵႂႃႇ ၶမ်းလၢဝ်ဝၢႆႇငွၵ်ႈတူၺ်းၸွမ်းၼႂ်းႁိူၼ်းၼၼ်ႉ ႁၼ်ၽိုၼ်ၸေႈပဵၼ်သၢင်ႉပဵၼ်သၢင်ႉယူႇၼိူဝ်ႁၢၼ်ႉ ႁိမ်းၽိူၼ်တႅမ်ႈလိၵ်ႈလုင်းၸရေးၼၼ်ႉလႄႈ “လုင်းၸရေးႁဝ်း သိုဝ်ႉၸေႈတၢင်းလႂ်မႃးၶႃႈလႃႇ ၼမ်ဝႃႈၼမ်”
လုင်းၸရေးဝၢႆႇယၵ်ႉတူၺ်းၵႂႃႇ တီႈတမ်းၸေႈမၼ်းၼၼ်ႉသေ ဝၢႆႇငွၵ်ႈၵႂႃႇၼွၵ်ႈႁိူၼ်း တၢင်းသိုင်ႇယေးၶဝ်ႈမၼ်းၼၼ်ႉႁေယဝ်ႉ လၢတ်ႈၸူးၶမ်းလၢဝ်။
“ႁဵတ်းဢဝ်ၵူၺ်းဢိူဝ်ႈမေႃသွၼ်ဝႃႈ ပိူၼ်ႈဢမ်ႇပေႃးသူႈၸႂ်ႉၵၼ်ယဝ်ႉလႄႈ ၵူၼ်းၶၢႆၵေႃႈဢမ်ႇပေႃးမီး ပေႃးသိုဝ်ႉၵေႃႈၶၼ်သမ်ႉၵႃႈယႂ်ႇၼႃႇ ဢမ်ႇပေႉသိုဝ်ႉလႆႈလႄႈ ၵႃႈလႆႈႁဵတ်းဢဝ်ႁင်းၵူၺ်းၼၼ်ႉယိုင်”
“ၸွင်ႇမၼ်းယၢပ်ႇၶႃႈၸိူင်ႉၼႆ”
“ပေႃးမေႃတႄႉဢမ်ႇယၢပ်ႇၼင်ႇၵွၼ်ႇ မၼ်းလႆႈၸႂ်ႉၶၢဝ်းယၢမ်းၼႃႇၵူၺ်းဢိူဝ်ႈ”
ၼၢႆးၶမ်းလႅင်ၵေႃႈလၢတ်ႈၸူးၵႂႃႇ “မိူဝ်ႈလဵဝ်ၼႆႉ ၵူၼ်းမေႃႁဵတ်းမၼ်းပေႃးၶႂ်ႈႁၢႆၵႂႃႇယဝ်ႉၵွၼ်ႇယူဝ်ႉၼႆႉ”
“မႅၼ်ႈဢိူဝ်ႈၼၢႆးဝႃႈ လႅပ်ႈသုတ်းတီႈႁဝ်းၼႆႉၵူၺ်းယဝ်ႉယူဝ်ႉထၢင်ႇ ၵၢပ်ႈပၢၼ်ယၢမ်းလဵဝ်ၼႆႉ ၽႂ်ၵေႃႈဢမ်ႇပေႃးသူႈၸႂ်ႉယဝ်ႉလူးၼႆ သိုဝ်ႉၸႂ်ႉပပ်ႉဢၼ်ပိူၼ်ႈႁဵတ်းမႃးၼၼ်ႉငၢႆႈၼႃႇၼႃႇယဝ်ႉလူး”
“ႁဵတ်းၸိူင်ႉၼႆ တမ်ႉဢမ်ႇလႆႈသဵင်ႈငိုၼ်းဢမ်ႇၸႂ်ႈၶႃႈႁႃႉ”
“ႁိုဝ်ၵႂႃႇသဵင်ႈလႃႇ ဢဝ်ႁႅင်းႁဝ်းလွၼ်ႉလွၼ်ႉၵူၺ်းယဝ်ႈ”
ၶမ်းလၢဝ်ၵေႃႈမိုင်ၵႅပ်ႉၼိုင်ႈ ၼင်ႇဝူၼ်ႉသေလွင်ႈလွင်ႈမႃးလႆႈလႄႈ “ပေႃးၼၼ် သင်ယွၼ်းႁႂ်ႈလုင်းၸရေးႁဝ်း သွၼ်ပၼ်လၢႆးႁဵတ်းၸေႈသႃၸိူင်ႉၼႆ တီႈႁူင်းႁဵၼ်းႁဝ်းၸွင်ႇလႆႈၶႃႈႁိုဝ်”
လုင်းၸရေးၵေႃႈ မိုင်လူင်ၵႂႃႇၵႅပ်ႉၼိုင်ႈသေ မိူၼ်ႇယၵ်ႉတူၺ်းၼၢႆးၶမ်းလႅင်းၵႂႃႇယဝ်ႉ သိုပ်ႇတူၺ်းတီႈၶမ်းလၢဝ်သေ “ဢမ်ႇၸႂ်ႈဝႃႈဢမ်ႇၶႂ်ႈသွၼ်ၼင်ႇၵဝ်ႇ ၵူၺ်းၵႃႈ ႁဝ်းၵေႃႈဢမ်ႇႁူႉဝႃႈပိူၼ်ႈတေလႆႈသွၼ်ၸိူင်ႉႁိုဝ် ႁဝ်းၵေႃႈႁဵတ်းၸွမ်းပေႃႈႁဝ်းႁေ မေႃမႃးၵူၺ်းဢိူဝ်ႈၼၼ်ႉ”
ဢဝ်ၶမ်းလၢဝ်ပေႃးၼင်ႈမိူၼ်ႇတူၺ်းလုင်းၸရေး ဢၼ်မီးသီၼႃႈဢမ်ႇပေႃးလီသေၵႃႈႁိုဝ်လႄႈ ဢမ်ႇပေႃးတဵမ်ၸႂ်သေၵႃႈႁိုဝ်ၼၼ်ႉယူႇ။
ၼၢႆးၶမ်းလႅင်ၵေႃႈ ႁူႉထိုင်လႆႈမိူၼ်ၵၼ်လႄႈ ၸင်ႇလၢတ်ႈၸူးၵႂႃႇၶိုၼ်း “ၸႂ်ႈတေႉယဝ်ႉ.. ၼင်ႇႁိုဝ်လၢႆးႁဵတ်းမၼ်း ပေႃးတေဢမ်ႇႁၢႆလၢႆၵႂႃႇၼၼ်ႉ လီဢဝ်သွၼ်ပၼ်လုၵ်ႈပၼ်လၢၼ်ၶဝ်ႁႂ်ႈမေႃႁဵတ်းၶႃႈဢေႃႈ လုင်းၸရေးဢမ်ႇဝူၼ်ႉဝႃႈ ပဵၼ်လွင်ႈလီၶႃႈႁႃႉ မိူဝ်ႈမီးၵူၼ်းၶႂ်ႈမႃးႁဵၼ်းႁူႉလွင်ႈႁဵတ်းၸေႈသႃၸိူင်ႉၼႆ”
“ၸႂ်ႈဢေႃႈ လုင်းႁဝ်းၵေႃႈ တေဢမ်ႇလႆႈႁဵတ်းႁိူဝ်ႉၵေႃႉလဵဝ်ၼၼ်ႉၶႃႈၼႃႇ ပေႃးမီးၵူၼ်းႁဵတ်းၸွမ်းၼႆၵေႃႈ ယင်းတေႁဵတ်းလႆႈဝႆးလႄႈ တင်းလႅပ်ႈတေလႆႈၼမ်လိူဝ်သေၵဝ်ႇ ဢမ်ႇၸႂ်ႈၶႃႈႁိုဝ်”
“ဢိူဝ်ႈ..ၸေႈသႃမၼ်းသမ်ႉၶႂ်ႈႁႃယၢပ်ႇဝႆႉၼၼ်ႉၼႃႇ”
“ႁႃယၢပ်ႇတီႈလႂ်လုင်းၸရေး!… ၸွမ်းႁွင်ႈၼမ်ႉၽင်ႇၼမ်ႉ လုၵ်ႉတီႈဝၢၼ်ႈႁဝ်းမႃးႁွတ်ႈဝၢၼ်ႈၼႆႉ လိူင်ႇပေႃးၵႃႈႁိုဝ်ဢႃႈ ႁၼ်လုင်းၸေးႁဝ်းဢဝ်ယူႇၵူႈပီႊ”
“ဢိူဝ်ႈ!! ပေႃးၵူၼ်းဢဝ်မၼ်းၼမ်ၼႃႇ သမ်ႉၸဵဝ်းမူၺ်ႉၼၼ်ႉယိုင်ၼႃႇၼၢႆးဝႃႈ”
“တူၼ်ႈလူင်မၼ်းပိူဝ်ႇလိူဝ်ႉပိူဝ်ႇထိူဝ်ဢႃႈ ဢမ်ႇမူၺ်ႉလႆႈႁေၸၢတ်ႈ ႁိမ်းသူၼ်ဢေးဢီႇ တၢင်းၵႂႃႇဝၢၼ်ႈႁူၵ်းၼၼ်ႉ ပဵၼ်ပႃႇသႃလၢႆလၢႆ တႅပ်းပႅတ်ႈၵေႃႈ ဢမ်ႇတေႃႈတေသဵင်ႈလႆႈလႃႈၼၼ်ႉ ႁႂ်ႈလုင်းၸရေးႁဝ်းမိူဝ်းဢဝ် ယင်းဝႃႈဢမ်ႇပေႉဢဝ်လႆႈယဝ်ႉၼႆႁိုဝ်လႃႇ”
လၢတ်ႈဢဝ်လုင်းၸရေးပေႃးဢမ်ႇၸၢင်ႈတၵ်းသဵင်လႆႈၼၼ်ႉယဝ်ႉ ထူၺ်ႈၸႂ်လူင်မႃးႁေ “ဢိူဝ်ႈ..ဢိူဝ်ႈ.. ထဝ်ႈၵေႃႈထဝ်ႈယဝ်ႉ တၢႆၵႂႃႇၵေႃႈ ဢမ်ႇၸၢင်ႈပႃးၵႂႃႇလူးၼႆ ၵႃႈတေလႆႈသိုပ်ႇပုတ်ႈပၼ်လုၵ်ႈပၼ်လၢၼ်ၵူၺ်းယဝ်ႉဢိူဝ်ႈၼေႃႈ”
ၶမ်းလၢဝ်ယၵ်ႉတူၺ်းၼႃႈၼၢႆးသေယုမ်ႉယူႇ။
“ပေႃးလုင်းႁဝ်းႁဵတ်းၵေႃႈ ယႃႇလိုမ်းလၢတ်ႈႁဝ်းၶႃႈလႄႈ တေဢွၼ်လုၵ်ႈဢွၼ်ႇၶဝ်မႃးၸွႆႈ”
“ၶၢဝ်းၼႆႉတႄႉ ဢမ်ႇၸၢင်ႈႁဵတ်းၼင်ႇၵဝ်ႇ ပေႃးမွၵ်ႈ လိူၼ်ၵမ်လိူၼ်သၢမ်ပုၼ်ႉၵူၺ်းဢိူဝ်ႈ”
သွင်ၶႃၵေႃႈ ဢွၵ်ႇႁိူၼ်းလုင်းၸရေးမႃးသေ သိုပ်ႇၵႂႃႇထႅင်ႈတီႈႁိူၼ်း ၼၢႆးပၢင်ႇ ၶဝ်ယဝ်ႉ။ မွင်းၶဝ်ႈႁိူၼ်းမိူဝ်းၵူၺ်း မုင်ႈႁၼ်ၼၢႆးပၢင်ႇ ၼင်ႈသွႆၶူဝ်းယူႇတီႈတွပ်ႈႁိူၼ်းၶဝ်ၼၼ်ႉယဝ်ႉ၊ တႂ်ႈလၢင်ႈႁိူၼ်းၼၼ်ႉတႄႉ မီးႁုၵ်ႇထူင်ႇထူင်ႇထဵဝ်ႈထဵဝ်ႈဝႆႉယူႇလႄႈ ၼၢႆးပၢင်ႇဢၼ်မုင်ႈႁၼ်ၶႃၼၼ်ႉၵေႃႈ
“ၼၢႆးမႃးႁွတ်ႈတၢင်းၼႆႉႁေလႃႇမိူဝ်ႈၼႆႉ!..”
“ဢွၼ်မေႃသွၼ်ႁဝ်းမႃးလႄႇမႃးလၢဝ်းဢိၼ်ႉဢိူဝ်ႈၼၢႆးဝႃႈ”
“ဢိူဝ်ႈလီယဝ်ႉ..ၶိုၼ်ႈမႃးၼိူဝ်ႁိူၼ်းၼႆႉလႄႈ ၶိုၼ်ႈမႃးၶႃႈလႄႈမေႃသွၼ်ႁဝ်း”
“လုၵ်ႈဢွၼ်ႇၵႂႃႇတၢင်းလႂ်မူတ်းယဝ်ႉလႃႇ…”
“ၵႂႃႇၼႂ်းၼွင် ၵႂႃႇဢဝ်ၵၢၼ်ႈမူဝ်ဝႃႇ၊ ၼၢႆးၶႃၵိၼ်ၶဝ်ႈမႃးယဝ်ႉၼႄႇၼႆႉ”
“ၵိၼ်ယဝ်ႉဝႃႈ ႁဵတ်းၶႅၵ်ႇလုင်းၸရေးၶဝ်ႁေ ၸင်ႇမႃးတီႈၼႆႈၼႆႉယိုင်”
သွင်ၶႃၵေႃႈ မႃးဝႄႉဢဝ်ၽႅၼ်ႇၽႃႈတေႃးတီႈႁိူၼ်းၼၢႆးပၢင်ႇၼၼ်ႉသေ ဢွၼ်ၵၼ်ဝႄႉလႄႇၸွမ်းႁိူၼ်းလုၵ်ႈႁဵၼ်းၶမ်းလၢဝ်ၼၼ်ႉ ႁိူၼ်းၼိုင်ႈယဝ်ႉႁိူၼ်းၼိုင်ႈ တေႃႇၵၢင်ဝၼ်းသမ်ႉပေႃးၶမ်ႈၵႂႃႇယဝ်ႉ။ ၶဝ်ႈႁိူၼ်းလႂ်ၵေႃႈ မီးဢၼ်ၸပ်းတိၼ်ၸပ်းမိုဝ်းမႃးၵူႈႁိူၼ်းယဝ်ႉ မၢင်ႁိူၼ်းၵႂႃႇႁႃႁဵပ်းၵေႃႈ ပၼ်ႁဵပ်း၊ မၢင်ႁိူၼ်း သူၼ်တႅင်မၢၵ်ႇပူင်းၼႆၵေႃႈ ပၼ်တႅင်၊ မီးၼေႃႇၵေႃႈပၼ်ၼေႃႇ ၵေႃႉၸွၵ်းၵေႃႉၸႅၵ်း ၵေႃႉဢိတ်းၵေႃႈဢွတ်း တွတ်ႈထူင်တွတ်ႈသွင်း သမ်ႉပေႃးလႆႈသႂ်ႇၵၢၼ်းႁၢပ်ႇလူင်မိူဝ်းၵႂႃႇယဝ်ႉ။
မိူဝ်းႁွတ်ႈထိုင်ႁိူၼ်းၶိုၼ်း ပေႃးလပ်းသိင်ႇၼႃႇယဝ်ႉ၊ ၶမ်းလၢဝ်ၼၼ်ႉတႄႉ ဢၢပ်ႇၼမ်ႉယဝ်ႉၵေႃႈၼွၼ်းၵမ်းလဵဝ် ဢမ်ႇတၼ်းႁူႉတၼ်းႁၼ် ၵမ်ႉၵေႃႈ သဵင်ထူၺ်ႈၸႂ်မၼ်းပေႃးမေႃးယူႇၽေႃႈၽႃႈယဝ်ႉ။
ယၢမ်းၵၢင်ၼႂ်ၶမ်းလၢဝ်ၵေႃႈ လုၵ်ႉၸဵမ်ၸဝ်ႉသေ မႃးၵိၼ်ၶဝ်ႈၵိၼ်သင်ယဝ်ႉ ၵႂႃႇႁူင်းႁဵၼ်း၊ ၵႂႃႇပတ်းပတ်းၽဵဝ်ႈၽဵဝ်ႈယူႇၼႂ်းႁူင်းႁဵၼ်းၼၼ်ႉယဝ်ႉၵေႃႈ ဢဝ်ၵွၼ်ႈႁိၼ်ဢၼ်မၼ်းယိပ်းမႃးမိူဝ်ႈဝႃးၼၼ်ႉ ၵွင်သႂ်ႇၼိူဝ်ၽိူၼ်မၼ်းသေ တႅမ်ႈသႂ်ႇၼိူဝ်ပႅၼ်ႈပုၼ်းယဝ်ႉ ဢဝ်ၽႅၼ်ႇၸုပ်ႉၼမ်ႉတီႈႁွင်ႇၸၢႆးၶႃးၼၼ်ႉ မႃးၸဵတ်ႉၸၢမ်းတူၺ်း၊ တင်းတႅမ်ႈတင်းၸဵတ်ႉ ယုမ်ႉၸူမ်းသိူဝ်းဢွၵ်ႇမႃးယူႇႁင်းမၼ်းယဝ်ႉ။
လွင်ႈၼႆႉၵေႃႈ ႁဵတ်းႁႂ်ႈမၼ်းဝူၼ်ႉလႆႈဝႃႈ ပပ်ႉဢၼ်မၼ်းတႅမ်ႈမိူဝ်ႈၵေႃႉလဵၵ်ႉၼၼ်ႉ ၸႂ်ႉတိုဝ်းၵႂႃႇယဝ်ႉၵေႃႈ ဢမ်ႇတူၺ်းၶိုၼ်းလႄႈ လႆႈပႅတ်ႈၵႂႃႇၵူၺ်း၊ မၢင်ပွၵ်ႈႁၢႆၵႂႃႇတၢင်းလႂ်ၵေႃႈဢမ်ႇႁူႉထႅင်ႈ၊ မၢင်ပပ်ႉယင်းဢမ်ႇမီးတူဝ်လိၵ်ႈဢမ်ႇၵႃး ၼႂ်းပပ်ႉၼၼ်ႉ တႅမ်ႈပဵၼ်ႁၢင်ႈပေႃးလဵၼ်းလၢႆးလူင်ၵႂႃႇသဵင်ႈ၊ မိူဝ်ႈမၼ်းလႆႈၸႂ်ႉတေႉတေႉၵေႃႈ ၽွင်းဢၼ်မၼ်းတွင်းလႆႈတႅမ်ႈလႆႈ ႁူႉတူဝ်မၼ်းၼၼ်ႉၵူၺ်း ။
ၵွပ်ႈၼၼ် ၽွင်းဢၼ်မၼ်းယင်းဢမ်ႇပႆႇမီးၸေႈၼၼ်ႉ မၼ်းၵေႃႈ သွၼ်ဢၢၼ်ႇသွၼ်တွင်းဝႆႉၵွၼ်ႇ လႄႈ ႁႂ်ႈၶဝ်တႅမ်ႈတီႈၼႃႈပႅၼ်ႈပုၼ်းၼၼ်ႉ ၼမ်ၼမ်ဢဝ်၊ ယၢမ်ႈဢမ်ႇယၢမ်ႈ ၸႂ်ႈဢမ်ႇၸႂ်ႈ ၼင်ႇၵႃႈႁဵတ်းလႆႈပွင်ပဵၼ်လႆႈၼၼ်ႉ မၼ်းၵေႃႈၶတ်းၸႂ်ႁဵတ်းၵႂႃႇတဵမ်တီႈယူႇယဝ်ႉ။
မိူဝ်ႈၼႆႉၵေႃႈ လုၵ်ႈႁဵၼ်းၶဝ်ၶိုၼ်းမႃးႁူင်းႁဵၼ်းၵၼ် ၼမ်ဝႆႉလႄႈ ၶမ်းလၢဝ်ၵေႃႈ ၼင်ႇႁိုဝ်လွင်ႈမၼ်းပေႃးတေယဝ်ႉၵႂႃႇၼၼ်ႉ၊ ဝၢႆးလူင်းႁူင်းႁဵၼ်းယဝ်ႉ မုင်ႈၼႃႈၵႂႃႇတၢင်းဝၢၼ်ႈၸိင် မိူဝ်းထူပ်းၶိင်းႁဵင်ၵမ်းလဵဝ်ယူႇ။
ၶမ်းလၢဝ်ၶိုၼ်ႈၼိူဝ်ႁိူၼ်း မိူဝ်းလွမ်ငွၵ်ႈတူၺ်းတီႈၽၵ်းတူ ႁၼ်လုင်းႁဵင်ၼွၼ်းဢိင်မွၼ်ႁူဝ်ယူႇတီႈ တႂ်ႈၶဵင်ႇၽြႃးၶဝ် ပႃးတင်းလႅၼ်းယႃႈႁေ ၼွၼ်းၶႃၵၢႆႇၵွၼ်းယူႇလႄႈ
“ဢေႃ..လုင်းႁဵင်ႁဝ်းယူႇယူႇၶႃႈၼေႃႈ”
“ဢေႃႈ..မေႃသွၼ်ႁႃႉ ၶိုၼ်ႈမႃးၼင်ႈလႄႈ” မွတ်ႇလႅၼ်းယႃႈမၼ်း သႂ်ႇၼႂ်းၵွၵ်းလႅၼ်းယႃႈၼၼ်ႉသေ လုၵ်ႉၼင်ႈ ဢဝ်ၵွၵ်းၼမ်ႉၼဵင်ႈ မႃးႁိုဝ်ႈသႂ်ႇပၼ်ၶမ်းလၢဝ်ၵႂႃႇ “မႃးႁင်းၵူၺ်းၶႃႈႁႃႉၼႆႉ”
“ဢေႃႈ..ၸႂ်ႈယဝ်ႉၶႃႈ! ဢၢၼ်းမႃးဝႄႉလုင်းႁဝ်းႁေ တေၵႂႃႇတူၺ်းၸၢႆးဝၼ်းတီႈႁူင်းယႃဢိၼ်ႉဢေႃႈ”
“ႁဵတ်းၼၼ်ႁႃႉ မေႃသွၼ်မီးလွင်ႈသင်လႃႇ”
“ဢေႃႈ..ၶႂ်ႈမႃးလၢတ်ႈလွင်ႈသိုဝ်ႉၶိူင်ႈၵမ်ႉၵႅမ်ပၼ်လုၵ်ႈႁဵၼ်းၶဝ်ၼႆႉ ၶႃႈဝႃႈၶႃႈတေဢမ်ႇႁႂ်ႈလုင်းႁဵင်းႁဝ်းၸွႆႈယဝ်ႉၼႆၶႃႈဢေႃႈ၊ တေႁႂ်ႈၶဝ်သိုဝ်ႉႁင်းၶဝ်ၵူၺ်းယဝ်ႉ”
ၶိင်းႁဵင်ၼၼ်ႉၵေႃႈ လိူၵ်ႇတႃတူၺ်းၸူးၶမ်းလၢဝ်ၵႂႃႇသေ ၶိုၼ်ႈသဵင်လင်ၸူး “မေႃသွၼ်ၶႂ်ႈဝႃႈ ဢၼ်ႁဝ်းသိုဝ်ႉပၼ်ၼၼ်ႉ မၼ်းဢမ်ႇလီၼႆၶႃႈႁႃႉ”
“ဢမ်ႇၸႂ်ႈၸိူင်ႉၼၼ်ၶႃႈ လုၵ်ႈဢွၼ်ႇၶဝ် ဢမ်ႇၸမ်ပဵၼ်တေလႆႈၸႂ်ႉသေၵႃႈႁိုဝ်ၼႆဢေႃႈ”
“မိူဝ်ႈၼၼ်ႉသမ်ႉဝႃႈ လူဝ်ႇၼႃႇၼႆလႃႇ! ၵမ်းၼႆႉသမ်ႉဝႃႈဢမ်ႇဢဝ်ယဝ်ႉ မေႃသွၼ်ၶႂ်ႈႁဵတ်းႁိုဝ်တေႉတေႉလႃႇ”
“ဢမ်ႇဢဝ်ယဝ်ႉၶႃႈ!!”
“ဢမ်ႇဢဝ်ယဝ်ႉ..ၵဝ်သမ်ႉတေလႆႈၵႂႃႇလၢတ်ႈၸိူင်ႉႁိုဝ်တီႈပေႃႈမႄႈလုၵ်ႈႁဵၼ်းၶဝ်ၼၼ်ႉလႃႇ ႁဝ်းလၢတ်ႈဝႆႉဝႃႈ ႁဝ်းတေၸွႆႈထႅမ်လုၵ်ႈၶဝ်ၼႆ ၵမ်းၼႆႉသမ်ႉဝႃႈ ဢမ်ႇဢဝ်ၼႆႉ ၵဝ်ၵေႃႈဢမ်ႇမေႃႁဵတ်းယဝ်ႉမေႃသွၼ်ဢိူဝ်ႉ”
“ဢမ်ႇပဵၼ်သင်! ၶႃႈၵေႃႉတေလၢတ်ႈၵူၺ်း..”
ၶိင်းႁဵင်ၵေႃႈ ၼႅတ်ႈဢဝ်မိုဝ်းမၼ်းႁႄႉႁၢမ်ႈဝႆႉၵမ်းလဵဝ် “ဢမ်ႇ! ဢမ်ႇပဵၼ်သင် ၵဝ်ၵေႃႉတေလၢတ်ႈပၼ်ၵူၺ်း”
“ၶႃႈတေၵေႃႉလၢတ်ႈၵူၺ်း၊ တေလၢတ်ႈပၼ်တီႈလုၵ်ႈဢွၼ်ႇႁဵၼ်းၶဝ် ႁႂ်ႈၶဝ်မိူဝ်းလၢတ်ႈတီႈပေႃႈမႄႈၶဝ်ၶိုၼ်းၵူၺ်းၶႃႈ”
ၶမ်းလၢဝ်ၵေႃႈ ႁဵတ်းမိူၼ်ႁိပ်ႈႁိပ်ႈၼႅတ်ႈၼႅတ်ႈယဝ်ႉ လႅၼ်ႈလူင်းႁိူၼ်းၵႂႃႇ ၵူဝ်လုင်းႁဵင်တေထဵင်ၶိုၼ်းလႄႈ သူင်ႇသင်ႇၵႂႃႇဝႃႈ “ၶႃႈလူဝ်ႇၵႂႃႇတီႈႁူင်းယႃယဝ်ႉ ၵူဝ်လႆႈမိူဝ်းၶမ်ႈ” ၼႆသေ လႅၼ်ႈဢွၵ်ႇဝၢင်းႁူဝ်ႉၵႂႃႇယဝ်ႉ။
ပေႃးဝႃႈတေႉ ၶမ်းလၢဝ်ၵေႃႈလႆႈလၢတ်ႈၵႂႃႇတီႈလုၵ်ႈႁဵၼ်းမၼ်းမိူဝ်းယဝ်ႉ၊ လူဝ်ႇလႆႈလၢတ်ႈတီႈလုင်းႁဵင်ႁႂ်ႈႁူႉဝႆႉၵူၺ်း၊ သင်ဝႃႈ မၼ်းဢမ်ႇလၢတ်ႈ မၼ်းၵေႃႈ ဢမ်ႇယုမ်ႇၸႂ်လႆႈဝႃႈ လုင်းႁဵင်ၼၼ်ႉ ၸွင်ႇတေႁဵတ်းၸွမ်းၵႂၢမ်းမၼ်းယူႇႁိုဝ်၊ ဢမ်ႇၼၼ်ၵေႃႈ ၸၢင်ႈတေဢမ်ႇလၢတ်ႈသေ သိုပ်ႇၵဵပ်းငိုၼ်းၵူၼ်းဝၢၼ်ႈၶဝ်ၵႂႃႇထႅင်ႈတိၵ်းတိၵ်းၵေႃႈပဵၼ်လႆႈ ၼၼ်ႉယဝ်ႉ။
ၶမ်းလၢဝ်ၵေႃႈ သိုပ်ႇမုင်ႈၼႃႈၵႂႃႇတၢင်းႁူင်းယႃၼၼ်ႉထႅင်ႈယူႇ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ
