တွၼ်ႈသၢဝ်းပႅတ်ႇ
ၼင်ႇႁိုဝ်ၵူၼ်းဝၢၼ်ႈၶဝ်ပေႃးတေဢမ်ႇထၢင်ႇၽိတ်းၼၼ်ႉ ၶိင်းႁဵင်ၵေႃႈ ဝၢႆႇၼႃႈယၵ်ႉတူၺ်းၶမ်းလၢဝ်ယဝ်ႉ “မေႃသွၼ် ၸိုင်သမ်ႉပဵၼ်ၼႆ မီးတီႈပိုင်ႈဢိင်ယဝ်ႉၵေႃႈဝႃႈႁဝ်းဢမ်ႇပၼ်ငိုၼ်းမေႃသွၼ်ၸိူင်ႉၼႆၼႆႉ တေႁႂ်ႈၵူၼ်းဝၢၼ်ႈၶဝ် ဝူၼ်ႉၸိူင်ႉႁိုဝ်ၼိူဝ်ႁဝ်းလႃႇ၊ ဢၼ်ႁဝ်းၵဵပ်းမႃးၵေႃႈ တႃႇဢဝ်မႃးပဵၼ်ငိုၼ်းၵွင်ၵၢင် ၸွႆႈထႅမ်ၼႂ်းႁူင်းႁဵၼ်းၵူၺ်းလူး၊ သိုဝ်ႉပပ်ႉသိုဝ်ႉၵမ် ၶိူင်ႈၵမ်ႉၵႅမ်တႃႇၸႂ်ႉတိုဝ်းၼၼ်ႉ ငိုၼ်းဢၼ်လႆႈမႃး ၸွင်ႇမၼ်းပေႃးၵေႃႈဢမ်ႇၸႂ်ႈ၊ ၶွင်မေႃသွၼ်မႃးလၢတ်ႈဝႃႈ ဢမ်ႇဢဝ်ငိုၼ်းယဝ်ႉ ႁဝ်းၵေႃႈ ဝႃႈငိုၼ်းလိူၼ်မေႃသွၼ်ၵေႃႈတေဢမ်ႇဢဝ်ယဝ်ႉၼႆၵူၺ်းဢိူဝ်ႈ ပေႃးဝႃႈမေႃသွၼ်ဢမ်ႇဢဝ် ႁဝ်းၵေႃႈဢဝ်ငိုၼ်းၸိူဝ်းၼၼ်ႉ ႁဵတ်းပဵၼ်ငိုၼ်းပႂ်ႉသိုဝ်ႉပၼ်ၶိူင်ႈၵမ်ႉၵႅမ်တႃႇလုၵ်ႈဢွၼ်ႇၶဝ်ၼႆဢိူဝ်ႈ”
ၶမ်းလၢဝ်ၵေႃႈ ယဵၼ်ၵႅပ်ႉၼိုင်ယဝ်ႉ ယုမ်ႉဢွၵ်ႇမႃး ပႃးတၢင်းသဵင်ၶႅင်သေ လၢတ်ႈတွပ်ႇၵႂႃႇၶိုၼ်း “မိူဝ်ႈဝႃႈၶႃႈဢမ်ႇဢဝ်ယဝ်ႉ.. လုင်းႁဵင်ႁဝ်းၵေႃႈလီပွင်ႇၸႂ်ယူႇဝႃႈ ဢမ်ႇလူဝ်ႇလႆႈၵဵပ်းတီႈၵူၼ်းဝၢၼ်ႈၶဝ်ယဝ်ႉၼႆ၊ ၶႃႈၵေႃႈလၢတ်ႈယူႇၶႃႈလူး ၶိူင်ႈၵမ်ႉၵႅမ်လုၵ်ႈဢွၼ်ႇၶဝ် ၶႃႈၵေႃႈတေဢမ်ႇႁႂ်ႈၵဵပ်းငိုၼ်းၵၼ်သေသိုဝ်ႉပၼ်ယဝ်ႉ၊ ပဵၼ်သင်လႄႈ ယင်းတိုၵ်ႉၵဵပ်းငိုၼ်းၵၼ်ယူႇၶႃႈလႃႇ၊ ယဝ်ႉၵေႃႈ ဢၼ်ၵဵပ်းမႃးၼႂ်းၶၢဝ်းတၢင်းသွင်လိူၼ်ၼၼ်ႉ ဝူၼ်ႉဝႃႈတေဢမ်ႇပႆႇလႆႈဢဝ်ၸႂ်ႉတီႈလႂ်ၶႃႈၼေႃ၊ လုၵ်ႈႁဵၼ်းမီး 134 ၵေႃႉၼႆႉ ပေႃးၵဵပ်းတေႃႇၵေႃႉၵေႃႈ ၼိုင်ႈလိူၼ် ငိၼ်းဝႃႈလႆႈသႂ်ႇ သၢမ်ႁဵင်ဢမ်ႇၸႂ်ႈၶႃႈႁႃႉ ပေႃးဢဝ်ႁူဝ်ၼပ်ႉလုၵ်ႈႁဵၼ်းဝႃႈၵေႃႈ တေလႆႈယူႇသီႇသႅၼ်ပၢႆယဝ်ႉ၊ သွင်လိူၼ်ၵေႃႈ တေလႆႈယူႇမွၵ်ႈပႅတ်ႇသႅၼ်ၼႆႉယဝ်ႉ မိူဝ်ႈလႂ်မိူဝ်ႈဝူၼ်ႉဝႃႈ တေဢၢၼ်းၸွႆႈထႅမ်ၼႂ်းႁူင်းႁဵၼ်းၼႆၵေႃႈ ၸွမ်းလူၺ်ႈပဵၼ်မေႃသွၼ်ႁူင်းႁဵၼ်း ၶႃႈၵေႃႈတေႁပ်ႉဝႆႉႁေယဝ်ႉၶႃႈပေႃးၼႆ”
“လွင်ႈၼႆႉ..ပႂ်ႉဢုပ်ႇၵၼ်ထႅင်ႈၵမ်းလင်လႄႈမေႃသွၼ် ပေႃးလၢတ်ႈတိၵ်းတိၵ်းမၼ်းတေယၢဝ်းၼႃႇဢိူဝ်ႈ”
ၵူၼ်းဝၢၼ်ႈၶဝ် ဢၼ်ငိၼ်းႁူဝ်ၼပ်ႉငိုၼ်းၼၼ်ႉတႄႉၵေႃႈ သမ်ႉပေႃးၵူင်သူပ်းၵူင်ပၢၵ်ႇ ဢုပ်ႇၵၼ်ပေႃးပၼ်းၸွင်ႇၸွင်ႇ သဵင်ၵဝ်သဵင်မႂ်း ၵူၼ်းဢၼ်လၢတ်ႈယူႇၼၼ်ႉ သမ်ႉပေႃးဢမ်ႇလႆႈငိၼ်းသဵင်ယဝ်ႉ။
ၶမ်းလၢဝ်ၵေႃႈ ဢမ်ႇဝႆႉၸႂ်လုင်းႁဵင်လုင်းၵႄႇၶဝ်လႆႈယဝ်ႉလႄႈ “ပေႃးပႂ်ႉတၢင်ႇဝၼ်း ၶႃႈၵေႃႈတေၽုၺ်ႇႁူင်းႁဵၼ်းၶိုၼ်းယဝ်ႉ တေဢမ်ႇတၼ်း၊ ၵူၼ်းဝၢၼ်ႈၶဝ်ၵေႃႈ လႅပ်ႈတေဢမ်ႇတၼ်းမႃး ဢုပ်ႇၵၼ်မိူဝ်ႈၼႆႉႁႂ်ႈယဝ်ႉႁေယဝ်ႉၶႃႈၼႃႇ မၼ်းၵေႃႈဢမ်ႇၸႂ်ႈလွင်ႈယၢပ်ႇသင်ၶႃႈလူး..ၸွမ်းၼင်ႇသၢႆမၢႆမီးၼၼ်ႉ မီးၵႃႈႁိုဝ်ၵေႃႈ ဢၢပ်ႈပၼ်ႁေယဝ်ႉၵေႃႈ ၸွင်ႇမၼ်းဢမ်ႇယဝ်ႉယဝ်ႉၶႃႈႁိုဝ်လႃႇ!!”
“ပၼ်မေႃသွၼ်ၵႂႃႇယဝ်ႉ ႁဝ်းသမ်ႉတေႁဵတ်းႁိုဝ်ယုမ်ႇၸႂ်လႆႈ”
“ပေႃးလုင်းႁဵင်ဢမ်ႇယုမ်ႇၶႃႈၵေႃႈ ၸွမ်းၼင်ႇသၢႆမၢႆမီးဝႆႉၼၼ်ႉ ၶိုၼ်းဢၢပ်ႈပၼ်တီႈၵူၼ်းဝၢၼ်ႈၶဝ်ၶိုၼ်းသေယဝ်ႉၶႃႈၼႃႇ ႁဵတ်းၸိူင်ႉၼႆ ဢမ်ႇလီၶႃႈၼႄႇ တေဢမ်ႇလႆႈမီးလွင်ႈထၢင်ႇထိူမ်ၼိူဝ်ၵၼ်”
သီၼႃႈၶိင်းႁဵင်ၼၼ်ႉၵေႃႈ ဢမ်ႇပေႃးလီသေၵႃႈႁိုဝ် တင်းသဵင်ၵူၼ်းဝၢၼ်ႈၶဝ် ဢၼ်ႁၼ်လီၵမ်ႉထႅမ်ၸွမ်း ၶေႃႈၵႂၢမ်းၶမ်းလၢဝ် ႁႂ်ႈႁဵတ်းၸိူင်ႉၼၼ်ၼႆၵေႃႈ
ၶိင်းႁဵင်ၸင်ႇတွပ်ႇပၼ်ၵႂႃႇ “ဢိူဝ်ႈ!”
“ဝူၼ်ႉဝႃႈၵူၼ်းဝၢၼ်ႈၶဝ် တေလႆႈၸေးၵၼ်ယူႇၶႃႈၼေႃႈ!.. ပေႃးၼၼ် မိူဝ်ႈၽုၵ်ႈၼႆႉတႄႉၵေႃႈ တေလႆႈငိၼ်းၶၢဝ်ႇငၢဝ်းလီတွၼ်ႈတႃႇၵူၼ်းဝၢၼ်ႈၶဝ်ယူႇၵူၺ်းၶႃႈၼႆ”
“မိူဝ်ႈၽုၵ်ႈတႄႉၵေႃႈ..ဢၢႆႈသုမၼ်းဢမ်ႇတၼ်း”
“ပေႃးပီႈသုဢမ်ႇတၼ်း ပၼ်ႁေၶမ်ႈၼႆႉယဝ်ႉၶႃႈၼႃႇ ၵူၼ်းဝၢၼ်ႈၶဝ်တင်းတေဢမ်ႇလႆႈၵႂႃႇၵႂႃႇမႃးမႃးလၢႆပွၵ်ႈ”
ၶိင်းႁဵင်ၼၼ်ႉတႄႉ လုပ်ႈၼႃႈလုပ်ႈတႃမၼ်း ႁိူဝ်ႇသမ်ႉပေႃးၸိုမ်ႉလူင်ဝႆႉယဝ်ႉ။ ၶမ်းလၢဝ်ၵေႃႈ ၶဝ်ႈၵႂႃႇသွပ်ႉသႅပ်ႉၸမ်ၸမ်ႁေ “ဢမ်ႇၼၼ်ၵေႃႈ လုင်းႁဝ်းဢမ်ႇမီးငိုၼ်းတႃႇတေပၼ်ၶိုၼ်းယဝ်ႉ၊ သင်လၢတ်ႈဝႃႈ ပၼ်တီႈၶႃႈၸဵမ်မိူဝ်ႈတႄႇမၼ်း လုင်းႁဝ်းယင်းတေသဵတ်ႈၵႃႈသဵတ်ႈၶၼ်မၼ်းလႆႈယူႇ လုင်းႁဝ်းၵေႃႉဢိူဝ်ႈၵူၺ်းၶႃႈၼႃႇ တေၸၢင်ႈႁဵတ်းႁိုဝ်၊ ၵူၺ်းၵႃႈ သင်လုင်းႁဝ်းဝႃႈ တေပၼ်တီႈၶႃႈၼႆၵေႃႈ ၶႃႈတေၸွႆႈလၢတ်ႈပၼ်လႆႈယူႇၵူၺ်းၼင်ႇၵဝ်ႇ”
လုင်းႁဵင်ၼၼ်ႉၵေႃႈ ၵႃႈလႆႈယွမ်းပၼ်ၶမ်းလၢဝ်ယဝ်ႉ၊ ၶမ်းလၢဝ်ၼၼ်ႉမႄးတိုတ်ႉၼႃႈမၼ်းသေလၢတ်ႈ “ပေႃးဝႃႈတေႉ တီႈႁူင်းႁဵၼ်းၵေႃႈ လဵၵ်းမုင်းမၼ်းသိၵ်ႇမၼ်းပွင်ႇႁႅင်းၼႃႇ လီလၢႆႈယဝ်ႉၶႃႈဢေႃႈ၊ သင်ဝႃႈငိုၼ်းၼၼ်ႉ ႁဝ်းၶႃႈမႃးဢဝ်ၵႂႃႇသိုဝ်ႉလဵၵ်းမုင်းႁူင်းႁဵၼ်းႁဝ်းဢမ်ႇလီၶႃႈၼႄႇ ပေႃးၶိုၼ်းပၼ်ၶိုၼ်း မၼ်းၵေႃႈႁမ်ႉတေယၢပ်ႇႁေသုၵ်ႉသၵ်ႉမႃးထႅင်ႈႁေၵူၺ်း ႁဝ်းမႃးႁဵတ်းပၼ်ႁူင်းႁဵၼ်းႁဝ်း ႁႂ်ႈမၼ်းလီယူႇ လုၵ်ႈဢွၼ်ႇႁဝ်းၵေႃႈ ႁႂ်ႈပေႃးလႆႈယူႇလီလီဢိတ်ႉၼိုင်ႈၼႆ ၸွင်ႇတေလီၶႃႈႁိုဝ်”
“ဢိူဝ်ႈ! ၸိူင်ႉၼင်ႇမေႃသွၼ်လၢတ်ႈမႃးၼႆႉၵေႃႈ ႁမ်ႉလီယူႇၵူၺ်းၼႃသူဝႃႈ” ၶိင်းႁဵင်ၵမ်ႉထႅမ်ၵႂႃႇၸွမ်း။
“ပေႃးပေႃႈႁဵင်ႁဝ်းဝႃႈၼၼ်ၵေႃႈ ဝႃႈၼၼ်ႁေယဝ်ႉလႄႈၼႆ”
ၶဝ်ၵေႃႈလႆႈၶေႃႈတူၵ်းလူင်းၵၼ်ၵႂႃႇႁေ မိူဝ်းၵႂႃႇႁိူၼ်းၽႂ်တၢင်းမၼ်းယဝ်ႉ။
ဝၢႆးသေဝၼ်းၼၼ်ႉ ၶမ်းလၢဝ်လႄႈတင်းၶိင်းႁဵင်ၶဝ်ၵေႃႈ ဢမ်ႇပေႃးမႅၼ်ႈၵၼ်သေၵႃႈႁိုဝ်၊ ယွၼ်ႉပိူဝ်ႈၶမ်းလၢဝ် သၢၼ်ၶတ်းလွင်ႈၶိုၼ်ႈယႂ်ႇမၢၵ်ႈမီးၶဝ်လႄႈ ၶတ်းၸႂ်ႁဵတ်းႁႂ်ႈၶမ်းလၢဝ် ဢွၵ်ႇဝၢၼ်ႈၶဝ်ၵႂႃႇ ႁႂ်ႈၵူၼ်းဝၢၼ်ႈၶဝ် ပေႃးဢမ်ႇႁၼ်လီၸွမ်းလႄႈ လၢတ်ႈၵႂၢမ်းသႄႉသွမ်းၶမ်းလၢဝ် လၢတ်ႈလွင်ႈၶမ်းလၢဝ်ဢၼ်ယၢမ်ႈပဵၼ်ၵူၼ်းတူၵ်းၶွၵ်ႈလႄႈ ဢမ်ႇထုၵ်ႇလီဢဝ်မၼ်းမႃးႁဵတ်းပဵၼ်ၶူးၼႆသေ မိူဝ်ႈႁူႉငိၼ်းၼင်ႇၼၼ် ၵူၼ်းဝၢၼ်ႈၶဝ်ၵေႃႈ ဢွၼ်ၵၼ်သိုပ်ႇလၢတ်ႈၵၼ်လူင်ၵႂႃႇ ဢမ်ႇႁိုင်ဢမ်ႇၼၢၼ်း သဵင်ၶၢဝ်ႇၼၼ်ႉၵေႃႈ သမ်ႉပေႃးပၼ်းၸွတ်ႇတူဝ်ႈဢိူင်ႇၶဝ်ၼၼ်ႉယဝ်ႉ။
ၵမ်ႈၽွင်ႈၵေႃႈသၢၼ်ၶတ်း ဢမ်ႇပၼ်ႁႂ်ႈလုၵ်ႈဢွၼ်ႇၶဝ်မႃးၶိုၼ်ႈႁူင်းႁဵၼ်း၊ ၵမ်ႈၽွင်ႈၵေႃႈ ႁၼ်ၶမ်းလၢဝ်ယဝ်ႉ ႁဵတ်းၼႃႈၸင်းသႂ်ႇ၊ ၵမ်ႈၽွင်ႈၵေႃႈယၵ်ႉတူၺ်းသၢႆတႃဢၼ်ဢဵတ်ႇသဵတ်ႇ၊ ၵမ်ႈၽွင်ႈၵေႃႈၶႆႈလၢတ်ႈထိုင်ၸိုဝ်ႈလပ်ႉလင် ႁႂ်ႈၸဝ်ႈမၼ်းငိၼ်းၸိူဝ်းၼႆႉမႃးယဝ်ႉ။ ၽွင်းၼႆႉ လုၵ်ႈႁဵၼ်းဢၼ်မႃးၶိုၼ်ႈႁူင်းႁဵၼ်းၼၼ်ႉၵေႃႈ လႆႈဝႃႈဢေႇတႄႉတႄႉယဝ်ႉ။
ၼင်ႇၵႃႈပဵၼ်မေႃသွၼ်ၵေႃႉၼိုင်ႈၼၼ်ႉ လုၵ်ႈႁဵၼ်းမႃးလၢႆၵေႃႉၵေႃႈ သွၼ်ၵႂႃႇမွၵ်ႈၼၼ်ႉယဝ်ႉ။ သမ်ႉဝႃႈလုၵ်ႈႁဵၼ်းတေမီးဢေႇ သွၼ်ငၢႆႈသေတႃႉ ႁႅင်းဢီးႁိမ်းႁွမ်းၼၼ်ႉ မၼ်းၵပ်ႉၵိၼ်းလႄႈယူႇယၢပ်ႇဝႆႉတႄႉယဝ်ႉ။ ၶဝ်ႈဢွၵ်ႇၽႂ်ၵေႃႈယၢပ်ႇ ၽႂ်ၵေႃႈဢမ်ႇၶႂ်ႈလၢတ်ႈတေႃႇလႄႈ ပၢႆႈၼႃႈပၢႆႈတႃမၼ်းယူႇတႃႇသေႇ ၽႂ်ၵေႃႈဢမ်ႇပၼ်ၼႃႈလီမၼ်း၊ သမ်ႉဝႃႈမၼ်းၶတ်းၸႂ်လၢတ်ႈ ၶတ်းၸႂ်သပ်းလႅင်း လွင်ႈဢၼ်မၼ်းမႃးႁဵတ်းယူႇၼၼ်ႉ ပဵၼ်လွင်ႈလီၵူၺ်း၊ လွင်ႈဝၼ်းလင်ၼၼ်ႉ မၼ်းပဵၼ်လွင်ႈဢၼ်မၼ်းလႆႈႁဵတ်းၽိတ်းၵႂႃႇယဝ်ႉ၊ မၼ်းတေဢမ်ႇပဵၼ်မႃးထႅင်ႈယဝ်ႉၼႆၵေႃႈ ဢမ်ႇမီးၽႂ်ႁပ်ႉထွမ်ႇ၊ ဢမ်ႇမီးၽႂ်ပွင်ႇၸႂ်မၼ်းလႆႈ။ မိူဝ်ႈလႆႈယူႇမိူၼ်ၵူၼ်းထုၵ်ႇပွႆႇၽႃႈၸိူင်ႉၼႆ ဢမ်ႇမီးၽႂ်ယုမ်ႇယမ်ယဝ်ႉၼၼ်ႉ ႁႅင်းၸႂ်၊ ၼမ်ႉၸႂ် ၼၼ်ႉၵေႃႈ ထွတ်ႇထွႆဢွၵ်ႇၵႂႃႇလွႆးလွႆးယဝ်ႉ။
ယၢမ်းၶမ်ႈၶိုၼ်းလိုၵ်းယဵၼ် တႂ်ႈလုၵ်ႈလၢဝ်လႅင်းႁိူဝ်ႈပိူင်းထွင်ႇ သၢႆလူမ်းထူဝ်းထွင်းၽွင်းၶၢဝ်းၵတ်း၊ တၢၼ်ႇလီၼွၼ်းၶူတ်းၽႃႈဢုၼ်ႇဢုၼ်ႇသေလပ်းၵႂႃႇယဝ်ႉ ၵူၺ်းသမ်ႉၼွၼ်းႁဵတ်းႁိုဝ်ၵေႃႈဢမ်ႇလပ်းလႆႈလႄႈ ၸင်ႇႁွင်ႉၸူးၼၢႆးၶမ်းလႅင်ဢၼ်ၼွၼ်းလပ်းယူႇၼၼ်ႉ။
“ၼၢႆး..လပ်းယဝ်ႉႁႃႉ”
“ဢိုမ်ႈ..”
“လပ်းယဝ်ႉတိုၵ်ႉတွပ်ႇလႆႈယူႇလႃႇ”
“ႁူႉယူႇဝႃႈၵူၼ်းၼွၼ်း တိုၵ်ႉထၢမ်ယူႇလႃႇ…ၶႂ်ႈၼွၼ်းၵေႃႈၼွၼ်း ဢမ်ႇၶႂ်ႈၼွၼ်းၵေႃႈလုၵ်ႉႁေလႄႈ မၼ်းၸၢင်ႈယၢပ်ႇသင်”
“ၶႂ်ႈၼွၼ်းယူႇၵူၺ်း ၵူၺ်းၵႃႈၼွၼ်းဢမ်ႇလပ်းၼၼ်ႉယိုင်ၼႃႇ” ယဵၼ်ၵႂႃႇၵႅပ်ႉၼိုင်ႈသေ ၶိုၼ်းလၢတ်ႈထႅင်ႈ “ၶႃႈမိူဝ်းႁိူၼ်းၶိုၼ်းဢမ်ႇလီႁႃႉၼၢႆး”
ၼၢႆးတႄႉၵေႃႈဢမ်ႇတွပ်ႇသင်ၶိုၼ်း။
“ၶႃႈဝႃႈၶႃႈပဵၼ်ၶူးဢမ်ႇလႆႈယဝ်ႉ မၼ်းယၢပ်ႇတေႉယဝ်ႉ” သဵင်မၼ်းလႅၵ်ႈလၢႆႈၵႂႃႇ ၼမ်ႉတႃမၼ်းၵေႃႈလႆဢွၵ်ႇမႃး ၶူႈၼင်ၵေႃႈတၼ်မႃး သမ်ႉဝႃႈၼၢႆးဢမ်ႇလႆႈႁၼ်ၵေႃႈ ႁူႉငိၼ်းလႆႈယူႇ။
“ၶႂ်ႈႁႆႈၵေႃႈႁႆႈဢွၵ်ႇမႃးလႄႈ”
ၶမ်းလၢဝ်ၵေႃႈ ပွႆႇသဵင်ႁႆႈမၼ်းဢွၵ်ႇမႃးတေႃႇမၼ်းပေႃးယဵၼ်ၵႂႃႇ ၼၢႆးၸင်ႇၶိုၼ်းသိုပ်ႇလၢတ်ႈထႅင်ႈ
“လွင်ႈၶဵင်ႇတႃႉၼၼ်ႉ တႃႇႁႂ်ႈႁဝ်းဢဝ်ဢွင်ႇပေႉ ဢမ်ႇၸႂ်ႈတႃႇလႅၼ်ႈပၢႆႈလူး၊ ၸဵပ်းၽွင်ႈလူမ်ႉၽွင်ႈၵေႃႈ ဢမ်ႇပဵၼ်သင် မၼ်းႁူႉတိုၼ်းမီးယႃႈယႃတႃႇယူတ်းယႃႁႂ်ႈၶႅၼ်းမႃးၶိုၼ်းလႆႈယူႇလူး”
လၢတ်ႈဢဝ်ၶမ်းလၢဝ် သမ်ႉပေႃးဝူၼ်ႉႁၼ်ႁၢင်ႈမၼ်း ၼႂ်းဝၼ်းဢၼ်မၼ်းလူမ်ႉယူႇၼႂ်းၾူၼ်ဝၼ်းၼၼ်ႉသေ ၶိုၼ်းထၢမ်ၸူးၼၢႆးၵႂႃႇ။
“ၶႃႈသမ်ႉတေလႆႈႁဵတ်းႁိုဝ်..ၶႃႈဢမ်ႇႁူႉဝႃႈတေလႆႈႁဵတ်းသင်”
“ဢမ်ႇလူဝ်ႇဝူၼ်ႉသင်သေ လပ်းတႃယဝ်ႉ ၼွၼ်းၵႂႃႇလႄႈ”
သဵင်ၶႃသွင်ၵေႃႉၵေႃႈ တဵတ်ႇယဵၼ်ႁၢႆၵႂႃႇၼႂ်းလပ်းသိင်ႇၼၼ်ႉႁင်းၽႂ်ႁင်းမၼ်းယဝ်ႉ။
ဝၢႆးပၢင်ၵုမ်ယဝ်ႉၵႂႃႇ ဝူင်ႈၵေႃႈ တီႈႁူင်းႁဵၼ်းၼၼ်ႉ ဢမ်ႇလႆႈႁၼ်လဵၵ်းမုင်းသေၽႅၼ်ႇလႄႈ မိူဝ်ႈမၼ်းဝူၼ်ႉထိုင်လွင်ႈၼႆႉ ၸင်ႇတေပွင်ႇၸႂ်ဝႃႈ လွင်ႈဢၼ်မၼ်းလႆႈၶၢမ်ႇပိူၼ်ႈသႄႉသွမ်း ႁၼ်ၽိတ်းၼိူဝ်မၼ်းၼၼ်ႉ ပဵၼ်ၵွပ်ႈလွင်ႈၼႆႉၵူၺ်းယဝ်ႉၼႆသေ၊ မိူဝ်ႈပဵၼ်ၸိူင်ႉၼၼ် မၼ်းၵေႃႈဢမ်ႇယွမ်းသုမ်း သိုပ်ႇဢႅၼ်ႇလႅၼ်ႈၵႂႃႇတၢင်းႁိူၼ်းလုင်းႁဵင်ၶဝ်၊ မိူဝ်းႁွတ်ႈၵၢင်တၢင်းယဝ်ႉ မၼ်းၸင်ႇတေၶုၵ်းၸႂ်လႆႈ ၵူၼ်းၸိူင်ႉၼင်ႇလုင်းႁဵင်ၼၼ်ႉ ၵွမ်ႉၵႂႃႇလၢတ်ႈၵူၺ်း ဢမ်ႇႁဵတ်းသင်လႆႈၼႆ ဝိၼ်ႇဝၢႆႇပွၵ်ႈမႃးၶိုၼ်းသေ မႄးသေႃႇသူၼ်းယူင်းၵဝ်း ပွင်ႉၶၢင်းၵႂႃႇၸွမ်းၵူၼ်းဝၢၼ်ႈၸိူဝ်းၼၼ်ႉ လွင်ႈဢၼ်ဝႃႈ လုင်းႁဵင်ၼၼ်ႉ ၶႂ်ႈၵဵပ်းငိုၼ်းၼၼ်ႉဝႆႉႁင်းၵူၺ်းလႄႈ ဢမ်ႇၶႂ်ႈသိုဝ်ႉလဵၵ်းမုင်းၶႃးပၼ်ႁူင်းႁဵၼ်းသေ တင်ႈၸႂ်ႁႃတၢင်းၽိတ်း ႁႂ်ႈမၼ်းမိူဝ်းၼႆယူႇ။
မိူဝ်ႈမၼ်းလၢတ်ႈၸိူင်ႉၼႆ ၵူၼ်းၸိူဝ်းဢၼ်သေလၢႆငိုၼ်းၼၼ်ႉၵေႃႈ မီးလွင်ႈဢမ်ႇႁၢၼ်ႉၸႂ်မႃး မီးၵၢင်ၸႂ်ဢမ်ႇႁၼ်လီၶိင်းႁဵင်ၶဝ်မႃး၊ ၵမ်ႈၽွင်ႈၵေႃႈပွင်ႉ ၵမ်ႈၽွင်ႈၵေႃႈလႃႇ ၵမ်ႈၽွင်ႈၵေႃႈဝႃႈ ၶၢင်းၼေၵၼ်မႃးယူႇယဝ်ႉ။
လုၵ်ႈဢွၼ်ႇႁဵၼ်းၶဝ်ၵေႃႈ ဢူႈမႄႈၶဝ်ႁႂ်ႈမႃးၶိုၼ်ႈႁဵၼ်းမိူၼ်ၵဝ်ႇၶိုၼ်းယဝ်ႉ။
ၶမ်းလၢဝ်ၵေႃႈ ၸွမ်းၼင်ႇပၢင်သွၼ်ဢၼ်မၼ်းလႆႈၵႂႃႇၶိုၼ်ႈႁဵၼ်းမႃးၼၼ်ႉ လႆႈဢဝ်မႃးၸႂ်ႉတိုဝ်းတေႉၼင်ႇဝႃႈ၊ ဝၼ်းယဝ်ႉဝၼ်းသႂ်ႇၸႂ်သႂ်ႇႁႅင်း ပူင်သွၼ်လိၵ်ႈသွၼ်လၢႆးပၼ်တီႈလုၵ်ႈႁဵၼ်းၶဝ်ၵႂႃႇ ၼင်ႇငၢႆႈလူမ်လိူဝ်သေၵူႈပွၵ်ႈ၊ မၼ်းမေႃဝၢင်းၽႅၼ်မႃး ႁူႉလွၵ်းလၢႆးၵၢၼ်ၸတ်းၵၢၼ်ၶၢဝ်းယၢမ်း ၸတ်းၵၢၼ်လုၵ်ႈႁဵၼ်းၶဝ်မႃး မၼ်းၵေႃႈႁဵတ်းၵၢၼ်ငၢႆႈမႃး။
မိူဝ်ႈႁၼ်လုၵ်ႈႁဵၼ်းၶဝ် ႁွင်ႉလၢတ်ႈဢၢၼ်ႇသဵင်လင် သဵင်ၶဝ်ၼၼ်ႉၵေႃႈ ပဵၼ်သိူင်းပဵၼ်သိူင်း ယွၼ်ႈတွင်ႈထိုင်ႁူ ပေႉၵႅၼ်ႇလီသိူဝ်းၸွမ်း တၢၼ်ႇသဵင်ၵႂၢမ်းဝၢၼ်ႁူၼၼ်ႉယဝ်ႉ၊ လႆႈႁၼ်ၶဝ်ဢႅၼ်ႇလႅၼ်ႈလမ်းၵၼ် မၢင်ပွၵ်ႈတေသုၵ်ႉသၵ်ႉတႃယူႇသေတႃႉ သဵင်ၶူဝ်သဵင်ႁွင်ႉသႅၼ်ႇၶဝ်ၼၼ်ႉ ႁဵတ်းႁႂ်ႈႁူင်းႁဵၼ်းပေႃးလီလူလီတူၺ်းမႃးလိူဝ်ၵဝ်ႇ ၼၼ်ႉယဝ်ႉ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ
