တွၼ်ႈသၢဝ်း
ၶမ်းလၢဝ်ၼၼ်ႉၵေႃႈ ၼင်ႇၵႃႈပေႉလႆႈႁဵတ်းလႆႈလႄႈ တေငၢႆႈတွၼ်ႈတႃႇမၼ်းၼၼ်ႉ မႄးၸႅၵ်ႇၸၼ်ႉႁဵၼ်းၵႂႃႇပဵၼ်သွင်ၸၼ်ႉၵူၺ်းယဝ်ႉ၊ ၸၼ်ႉယႂ်ႇလႄႈၸၼ်ႉဢွၼ်ႇၼႆသေ၊ ၽႂ်ၶိုတ်းလိၵ်ႈလႆႈၵေႃႈယူႇၸၼ်ႉယႂ်ႇ ၽႂ်ဢမ်ႇၶိုတ်းလႆႈၵေႃႈယူႇၸၼ်ႉဢွၼ်ႇၵွၼ်ႇယဝ်ႉ။ ၵၢင်ၼႂ်ၵေႃႈသွၼ်လိၵ်ႈၵႂႃႇ၊ ၵၢင်ဝၼ်းမႃးၵေႃႈ ၸၼ်ႉလဵၵ်ႉပၼ်ႁႂ်ႈၼွၼ်းလိုဝ်ႈ ၸၼ်ႉယႂ်ႇၵေႃႈသိုပ်ႇသွၼ်လိၵ်ႈၵႂႃႇထႅင်ႈ၊ ပေႃးဝႃႈ လႃႈမႃးတၢၼ်ႇတၢၼ်ႇယဝ်ႉၵေႃႈ ဢွၼ်ဢွၵ်ႇလဵၼ်ႈၸွမ်းၵၼ် ၼႂ်းပၢင်ႇႁူင်းႁဵၼ်း တေႃႇပေႃးလူင်းႁူင်းႁဵၼ်းယဝ်ႉ။
မေႃသွၼ်ဢၼ်ဝႃႈၼၼ်ႉ မၼ်းမိူၼ်ႁိုဝ်ၼႆ ၶမ်းလၢဝ်လႆႈႁၼ်ပေႃႈႁၼ်မႄႈမၼ်းမႃး တင်းၸူဝ်ႈၸၢတ်ႈပၢၼ်မၼ်းၼၼ်ႉ မၼ်းၵူၺ်းႁၼ်ဝႃႈ ပေႃႈမႄႈၵႂႃႇႁူင်းႁဵၼ်းႁေ ၵႂႃႇသွၼ်လိၵ်ႈဢၼ်မီးယူႇၼႂ်းပပ်ႉၼၼ်ႉ ပၼ်လုၵ်ႈဢွၼ်ႇႁဵၼ်း ႁဵတ်းၼၼ်ၵူၺ်း မၼ်းဢမ်ႇတွၼ်ႉ သႂ်ႇၸႂ်ႁပ်ႉႁူႉထိုင်လႆႈလွၼ်ႉၵႅၼ်မၼ်း တေမိူၼ်ႁိုဝ်ၼႆလႃႈ။ မိူဝ်ႈတူဝ်ထူပ်းမႃးၸိူင်ႉၼႆ ႁဵတ်းႁႂ်ႈမၼ်းပွင်ႇၸႂ်မႃးယဝ်ႉ မေႃသွၼ် ဢမ်ႇလႆႈသွၼ်ပၼ်လိၵ်ႈၵူၺ်း တေလႆႈႁဵတ်းႁႂ်ႈလုၵ်ႈႁဵၼ်းၼၼ်ႉ ပွင်ႇၸႂ်လႄႈ ႁူႉမေႃဢၼ်မၼ်းသွၼ်ပၼ်ထႅင်ႈ၊ လုၵ်ႈႁဵၼ်းၵေႃႉၼိုင်ႈလႄႈၵေႃႉၼိုင်ႈၵေႃႈ ဢမ်ႇမိူၼ်ၵၼ် လိၵ်ႈလၢႆးၼၼ်ႉ သွၼ်မိူၼ်ၵၼ်သေတႃႉ တွၼ်ႈတႃႇၵူၼ်းၵေႃႉလႂ်ၵေႃႉၼိုင်ႈ ပေႃးတေပွင်ႇၸႂ်လႆႈၼၼ်ႉ ပႅၵ်ႇပိူင်ႈၵၼ်တႄႉတႄႉ၊ မၢင်ၵေႃႉၵေႃႈတွင်းငၢႆႈ မၢင်ၵေႃႉၵေႃႈ သွၼ်တၢၼ်ႇႁိုဝ်ၵေႃႈဢမ်ႇတွင်း ၼင်ႇႁိုဝ်လုၵ်ႈႁဵၼ်း ဢၼ်ဢမ်ႇႁူႉ ပေႃးတေႁူႉမေႃမႃးၼၼ်ႉ တေလႆႈဢဝ်ပုၼ်ႈၽွၼ်းသေ သွၼ်ပၼ်ၵႂႃႇႁႂ်ႈလႆႈ ၼၼ်ႉယဝ်ႉ။
မၢင်ၵမ်းမႃးၵေႃႈ ဢွၵ်ႇၸႂ်ၶၢၼ်ႉ ဢွၵ်ႇၸႂ်ႁိူဝ်ႉ ၶႂ်ႈပၢႆႈမႃးယဝ်ႉ ၵူၺ်းၵႃႈ မိူဝ်ႈလႆႈႁၼ် လုၵ်ႈဢွၼ်ႇတႃလမ်လမ်လိူမ်ႈလိူမ်ႈ ယၵ်ႉတူၺ်းၸူး လႆႈငိၼ်းသဵင်ဢၢၼ်ႇလိၵ်ႈပဵၼ်သိူင်းပဵၼ်သိူင်း၊ လုၵ်ႉတီႈ ၵ ၶ င သေ မေႃၵႂႃႇထိုင် ၸ သ ၺ ယဝ်ႉၼၼ်ႉ မၼ်းႁၼ်လွင်ႈၶိုပ်ႈၼႃႈမႃးယူႇလႄႈ ႁဵတ်းပဵၼ်ဢဵၼ်ႁႅင်း ပဵၼ်ႁႅင်းၸႂ်သေ ၶႂ်ႈသိုပ်ႇသွၼ်ၵႂႃႇထႅင်ႈယူႇယဝ်ႉ။
ဝၼ်းယဝ်ႉဝၼ်းပူၼ်ႉၵႂႃႇ မီးမၼ်းၵူၺ်းၵေႃႈ ႁဵတ်းလႆႈမႃးယဝ်ႉ၊ ၵူၺ်းၵႃႈ ၶူဝ်းၶွင်ဢၼ် မၼ်းလႆႈလၢတ်ႈဝႆႉၶိင်းႁဵင်ၶဝ်ဝၼ်းၼၼ်ႉၵေႃႈ လႆႈမႃး ၼိုင်ႈဝူင်ႈလႂ်ၼိုင်ႈမဵဝ်း၊ တေႃႇမၼ်းပေႃးၸေးမူတ်းၵေႃႈ သမ်ႉပေႃးမီးၵႂႃႇပဵၼ် သွင်လိူၼ်ၸိူဝ်းၼႆႉ။ မၢင်ဢၼ်မၢင်မဵဝ်းၵေႃႈ ၸႂ်ႉသဵင်ႈယဝ်ႉသေ ပေႃးလူဝ်ႇလႆႈယွၼ်းထႅင်ႈယဝ်ႉ။
လႆႈမႃးသွင်လိူၼ်ယဝ်ႉ လုၵ်ႈႁဵၼ်းၶမ်းလၢဝ်ၼၼ်ႉၵေႃႈ လႆႈဝႃႈ ယွမ်းၵႂႃႇၼမ်တႄႉတႄႉ၊ မၢင်ၵေႃႉႁၢႆၵႂႃႇၸဵမ်မိူဝ်ႈလိူၼ်ပူၼ်ႉလူးၵွၼ်ႇ၊ လုၵ်ႈႁဵၼ်းတင်းမူတ်းၼႆႉ ႁၢႆၵႂႃႇပဵၼ် ၼိုင်ႈပုၼ်ႈ သၢမ်ပုၼ်ႈၼၼ်ႉယဝ်ႉ၊ မၢင်ပွၵ်ႈ ႁၼ်လုၵ်ႈႁဵၼ်းဢေႇႁဵတ်းၼၼ်ၵေႃႈ ၼင်ႇႁၢင်ႈၸႂ်ၵေႃႈႁမ်ႉၶႂ်ႈတူၵ်းဝႆႉၼင်ႇၵဝ်ႇ၊ ၵူၺ်းၵႃႈ မိူဝ်ႈဝူၼ်ႉဝႃႈ လုၵ်ႈႁဵၼ်းဢေႇ ၶႅၼ်းလီယဝ်ႉ သွၼ်ငၢႆႈၼႆႁေ၊ သွၼ်ၵႂႃႇလူၺ်ႈဢမ်ႇသူၼ်ၸႂ်ဝႃႈ ပဵၼ်ယွၼ်ႉသင်လႄႈလုၵ်ႈဢွၼ်ႇၶဝ်ႁၢႆၵႂႃႇ၊ ၶဝ်ပဵၼ်ႁင်ၵႂႃႇၼႆ မၼ်းၵေႃႈဢမ်ႇတၼ်းဝူၼ်ႉလႄႈ ၵုမ်ႇသုၵ်ႉသၵ်ႉလွင်ႈသွၼ်လိၵ်ႈမၼ်းယူႇၵူၺ်း၊ ၵၢင်ၶမ်ႈၵေႃႈ မိူဝ်းၶမ်ႈ ၵၢင်ၶိုၼ်းၵေႃႈ ဝၢင်းၽႅၼ်ၵၢၼ်ႁဵၼ်းမၼ်းဝႆႉထႃႈ၊ ၵၢင်ၼႂ်ၵေႃႈ လႆႈလုၵ်ႉၸဝ်ႉမႃးထႃႈလုၵ်ႈႁဵၼ်းၶဝ် တင်းဝၼ်းတင်းဝၼ်း သမ်ႉပေႃးဢမ်ႇတၼ်းႁူႉဝၼ်းလႂ်ပဵၼ်ဝၼ်းလိုဝ်ႈလူးၵွၼ်ႇ။ ယူႇႁူင်းႁဵၼ်းယဝ်ႉ လိူဝ်သေသွၼ်လိၵ်ႈဢမ်ႇၵႃး လႆႈတူၺ်းပႃးလုၵ်ႈႁဵၼ်းထႅင်ႈ ဝၼ်းလိုဝ်ႈၼႆၼၼ်ႉ ပဵၼ်ဝၼ်းဢၼ်မၼ်းလႆႈၶိုၼ်ႈၼိူဝ်မိူင်းၽီၵႂႃႇ ယဝ်ႉ။
ဝၼ်းၼိုင်ႈ မိူဝ်ႈမၼ်းတိုၵ်ႉသွၼ်လိၵ်ႈယူႇလီလီၼၼ်ႉ ၸင်ႇသမ်ႉမီးလုၵ်ႈဢွၼ်ႇၵေႃႉၼိုင်ႈ ဢဝ်ၼႃႈၼွၼ်းငူပ်ႉၽိူၼ်ဝႆႉယူႇလႄႈ မၼ်းၵေႃႈ ၵႂႃႇႁွင်ႉတူၺ်းသေ ၵမ်းတူၺ်းၼိူဝ်ႉလုၵ်ႈဢွၼ်ႇၼၼ်ႉ ပေႃးမႆႈဝိုဝ်ႈဝိုဝ်ႈလူင်ဝႆႉယဝ်ႉ၊ ၸင်ႇၵိုင်ႉၵၢင်ႉတူၵ်းၸႂ်သေထၢမ် ၸၢႆးၼုမ်ႇဢၼ်ၼင်ႈယူႇႁိမ်းမၼ်းၼၼ်ႉ “ၸၢႆးၼုမ်ႇ! ၸၢႆးဝၼ်း ဢမ်ႇယူႇလီႁႃႉ”
“မၼ်းၶၢင်းႁူဝ်ၶႆႈၸဵမ်မိူဝ်ႈၵႆႈယဝ်ႉဢေႃႈ မိူဝ်ႈၵိၼ်ၶဝ်ႈယဝ်ႉၵေႃႈ ဢွၵ်ႇၵႂႃႇဢေႃႉႁေၶႃႈၼေႈ”
ၶမ်းလၢဝ်ၵေႃႈ ဢမ်ႇႁူႉတေလႆႈႁဵတ်းႁိုဝ်လီ ပေႃးဢမ်ႇဢဝ်ၵႂႃႇႁူင်းယႃ လုၵ်ႈဢွၼ်ႇၵေႃႈပဵၼ်ၼႃႇႁႅင်းယဝ်ႉလႄႈ ပေႃးမၼ်းၵႂႃႇ သမ်ႉဢမ်ႇမီးၽႂ်သွၼ်လိၵ်ႈယဝ်ႉႁေ ၸင်ႇထၢမ်တူၺ်းၵႂႃႇတီႈ ၸၢႆးဝၼ်း “ၸၢႆးဝၼ်းၸွင်ႇပႆလႆႈႁိုဝ် မေႃသွၼ်တေႁႂ်ႈၸၢႆးၼုမ်ႇၵႂႃႇသူင်ႇၼွင်ႉတီႈႁူင်းယႃ”
ၸၢႆးဝၼ်းၵေႃႈ ငွၵ်းႁူဝ်မၼ်းၼႄၵႂႃႇသေ ႁႂ်ႈၸၢႆးၼုမ်ႇ ၽႃၽိူဝ်းမၼ်းဢွၵ်ႇႁူင်းႁဵၼ်းမႃး ၽွင်းၼၼ်ႉ ၾူၼ်ၵေႃႈႁမ်ႉတူၵ်းလႄႈ သွင်ၶႃၵေႃႈႁူမ်ႇတင်းၽႃႈယၢင်သေ တိုဝ်းၵုပ်းယဝ်ႉ ပႆယၢင်ႈၽၢတ်ႇဢွၵ်ႇႁူင်းႁဵၼ်းၵႂႃႇလွႆးလွႆး၊ ၶမ်းလၢဝ် ႁႂ်ႈလုၵ်ႈဢွၼ်ႇၶဝ်ၵႂႃႇႁင်းၵူၺ်းၵေႃႈ သမ်ႉဢမ်ႇလိုမ်းၸႂ်လႆႈမိူၼ်ၵၼ် ၵမ်းၵမ်းၸွမ်းငွၵ်ႈတူၺ်းယူႇတိၵ်းတိၵ်း၊ ဢွၵ်ႇၵႂႃႇဢမ်ႇႁိုင် ၸၢႆးဝၼ်းၵေႃႈ လူမ်ႉလူင်းၵႂႃႇတီႈၼႂ်းၵၢင်တၢင်းၼၼ်ႉလႄႈ ၶမ်းလၢဝ်ၼႅတ်ႈ ၽႃႈပပ်ႉမၼ်းသေ
“တူၺ်းဝႆႉ.. ဢၼ်မေႃသွၼ်သွၼ်မႃးၼၼ်ႉၼႃႈ” ၼႅတ်ႈလႅၼ်ႈဢွၵ်ႇၵႂႃႇၸူး ၶႃသွင်ၵေႃႉ သမ်ႉပေႃးဢမ်ႇတၼ်းတိုဝ်းၵုပ်းၵင်ႈၸွင်ႈသင်ယဝ်ႉ။ ၸွမ်းလူၺ်ႈလွင်ႈမႆႈၸႂ်ၼၼ်ႉလႄႈ
“ၸွင်ႇပဵၼ်သင်ႁိုဝ်” ၸွႆႈဢဝ်ၸၢႆးဝၼ်းလုၵ်ႉၶိုၼ်ႈမႃးယဝ်ႉ
“ၸၢႆးၼုမ်ႇ ၵႂႃႇတီႈႁူင်းႁဵၼ်းၶိုၼ်းလႄႈၼႃႈ မေႃသွၼ်တေၵႂႃႇသူင်ႇၸၢႆးဝၼ်းၵူၺ်း”
ၶမ်းလၢဝ်ၼၼ်ႉၵေႃႈ မႅၵ်ႇဢဝ်ၸၢႆးဝၼ်း ၸေးလင်မၼ်းသေ ပႆလူင်မိူဝ်းၵႂႃႇတၢင်းဝၢၼ်ႈၸိင်ၼၼ်ႉလွႆးလွႆး၊ ၾူၼ်တူၵ်းတၢင်းၵေႃႈမိုၼ်ႈလႄႈ သင်ၾူၼ်ႁႃႇယႂ်ႇတႄႉတေဢမ်ႇပေႃးၵႃႈႁိုဝ် ၵူၺ်းၵႃႈ ၾူၼ်သိင်းၼၼ်ႉ ယိုင်ႈၶႅၼ်းႁဵတ်းႁႂ်ႈတၢင်းမိုၼ်ႈႁႅင်းယဝ်ႉ။
ၸေးၸၢႆးဝၼ်းၵူၺ်းပေႃးၼၵ်းၼႃႇယဝ်ႉ တၢင်းၵေႃႈမိုၼ်ႈထႅင်ႈသေ ယိုင်ႈၶႅၼ်းႁဵတ်းႁႂ်ႈၵႂႃႇယၢပ်ႇထႅင်ႈ၊ ႁဵတ်းၵႂႃႇႁဵတ်းမႃး ၶႅပ်းတိၼ်သမ်ႉၶၢတ်ႇႁေ မၼ်းၵေႃႈ ဢမ်ႇသူၼ်ၸႂ်ႁင်ယဝ်ႉ ထွတ်ႇပႅတ်ႈၶႅပ်းတိၼ်မၼ်းယဝ်ႉၵေႃႈ ၸေးဢဝ်ၸၢႆးဝၼ်းမုင်ႈၼႃႈၵႂႃႇ တၢင်းႁူင်းယႃၼၼ်ႉတိၵ်းတိၵ်း တေႃႇသမ်ႉပေႃးႁွတ်ႈယူႇ။
မေႃယႃလႆႈႁၼ်ၶမ်းလၢဝ် ဢဝ်လုၵ်ႈႁဵၼ်းမႃးၼႆၵေႃႈ ၼႅတ်ႈမႃးၸွႆႈယဝ်ႉ “ၸွႆႈဢိတ်ႉၼိုင်ႈၶႃႈမေႃယႃ” မေႃယႃဢွၼ်တိုၼ်းၼၼ်ႉၵေႃႈ ႁႂ်ႈမေႃယႃၶမ်းဢွင်ႇၶႃ ၵႂႃႇၸတ်းၵၢၼ်ပႂ်ႉထႃႈသေ မၼ်းၵေႃႈ ၵႂႃႇတၢင်းလႂ်ပႅတ်ႈဢမ်ႇႁူႉယဝ်ႉ။
ၶမ်းလၢဝ်ၼၼ်ႉ ၸွမ်းၵႂႃႇတူၺ်းတီႈမေႃယႃၶဝ်ၼၼ်ႉႁေထၢမ်ၸူး “ၶဝ်ပဵၼ်တၢင်းပဵၼ်ႁင်ၶႃႈလႃႇမေႃယႃ”
“မိူဝ်ႈလဵဝ်တႄႉပႆႇႁူႉၶႃႈ တေလႆႈၵူတ်ႇၸႅတ်ႈတူၺ်းၵွၼ်ႇဢေႃႈ” မေႃယႃ ၽူၺ်းႁွမ်လၢတ်ႈၸူး။
မၼ်းၵေႃႈထူၺ်ႈၸႂ်လူင်မႃးသေ “ယၢပ်ႇၸႂ်မေႃယႃၶဝ်ယဝ်ႉၶႃႈၼႃႈ.. ၶႃႈၵေႃႈ..တေလႆႈၽၢၵ်ႇမေႃယႃၶဝ်ဝႆႉၵူၺ်းယဝ်ႉ ဢမ်ႇၸၢင်ႈႁဵတ်းႁိုဝ်ယဝ်ႉၶႃႈ”
လၢတ်ႈယဝ်ႉၵေႃႈ ဢႅၼ်ႇလႅၼ်ႈၽႃႇၾူၼ်ၽႃႇလူမ်းလူင် မုင်ႈၼႃႈမိူဝ်းၵႂႃႇတၢင်းဝၢၼ်ႈၶဝ်ၶိုၼ်းၵမ်းလဵဝ်၊ မေႃယႃဢွၼ်တိုၼ်း ၸွမ်းႁွင်ႉပၼ်သွၵ်းတိၼ်ၵေႃႈ ဢမ်ႇတၼ်းၶိုတ်းယဝ်ႉ။ ႁွတ်ႈထိုင်ႁူင်းႁဵၼ်းၶိုၼ်းၵေႃႈ ဢဝ်မၼ်းတူၵ်းၸႂ်လူင်ၵႂႃႇယူႇ ယွၼ်ႉပိူဝ်ႈ ႁၼ်လုၵ်ႈဢွၼ်ႇၶဝ်တၢၵ်ႇၾူၼ်ႁေ ဢႅၼ်ႇလႅၼ်ႈလမ်းၵၼ်ယူႇၼႂ်းၵၢင်ပၢင်ႇၼၼ်ႉယဝ်ႉၼႃႇ၊ ဢမ်ႇၸၢင်ႈႁဵတ်းႁိုဝ် ၸုၵ်းၸိူဝ်ႈယူႇႁဵတ်းၼၼ်ၵူၺ်း တေလၢတ်ႈၵေႃႈ ဢမ်ႇတၼ်းၶိုတ်းယဝ်ႉလူး၊ ၵူၺ်းၵႃႈ သဵင်ႁွင်ႉသဵင်ၶူဝ် သဵင်သႅၼ်ႇလုၵ်ႈဢွၼ်ႇၶဝ် ဢၼ်ႁွင်ႉဢူၼ်မေႃပၼ်းယူႇၼၼ်ႉ ႁဵတ်းႁႂ်ႈမၼ်းလႆႈငိၼ်းသဵင်ၶူဝ် မိူဝ်ႈယင်းဢွၼ်ႇမေႃးမႃးၼႂ်းႁူ မိူဝ်ႈၽွင်းၾူၼ်တူၵ်းႁေ ဢႅၼ်ႇလႅၼ်ႈလမ်းၵၼ်ယူႇၼႂ်းၵၢင်တၢင်းၼၼ်ႉလႄႈ ထိပ်ႇၽၢင်ႈလဵၼ်ႈၼမ်ႉယိုင်ႈလႆယူႇၸွမ်းၸိူဝ်းၼၼ်ႉ ႁိမ်ၵၼ်တွင်ႈၼမ်ႉႁွင်ႇၸၢႆးၶႃး ဢၼ်မီးလိၼ်းယႂ်ႇလိၼ်းလူင် လႆလူင်းမႃးၼၼ်ႉယဝ်ႉ။ သင်ဢမ်ႇလႆႈမႃးႁၼ်လုၵ်ႈဢွၼ်ႇၸိူဝ်းၼႆႉၶိုၼ်း မၼ်းသမ်ႉပေႃးလိုမ်းၵႂႃႇယဝ်ႉ လွင်ႈတၢင်းသိူဝ်း မိူဝ်ႈလႆႈထူပ်းမႃးၸိူင်ႉၼၼ်။
လုၵ်ႈဢွၼ်ႇၶဝ် ႁၼ်ၶမ်းလၢဝ်မႃးယဝ်ႉၼႆၵေႃႈ ဢွၼ်ၵၼ်ၶဝ်ႈၼႂ်းႁူင်းႁဵၼ်းၶိုၼ်းသေ ႁၼ်လုၵ်ႈဢွၼ်ႇၵမ်ႈၽွင်ႈၵေႃႈၼင်ႈငဝ်၊ ၵမ်ႈၽွင်ႈၵေႃႈ ၼင်ႈၵတ်းသမ်ႉပေႃးသၼ်ႇတိုၼ်းတိုၼ်းယူႇယဝ်ႉလႄႈ ၶမ်းလၢဝ်ၵေႃႈ ၵတ်းၼႃႇယဝ်ႉမိူၼ်ၵၼ်၊ တင်းၶူးလႄႈလုၵ်ႈႁဵၼ်း ယၵ်ႉတူၺ်းၼႃႈၵၼ်ၵႂႃႇ ဢမ်ႇႁူႉဝႃႈတေႁဵတ်းသင်ယဝ်ႉ ၸင်ႇပွႆႇလုၵ်ႈဢွၼ်ႇၶဝ်မိူဝ်းၵႂႃႇႁေယဝ်ႉ။
ၶူဝ်ၶၢမ်ႈၼမ်ႉ ဝၢၼ်ႈၶၢႆးမူဝ်ၼၼ်ႉ ဝၢႆးသေလုၵ်ႈဢွၼ်ႇၶဝ်လွင်ႈၼမ်ႉဢမ်ႇႁိုင် ၵူၼ်းဝၢၼ်ႈၶဝ်ၵေႃႈ ဢွၼ်ၵၼ်မႃးမႄးၵႂႃႇယူႇ။
ၶမ်းလၢဝ်ၵေႃႈ မိူဝ်းဢၢပ်ႇၼမ်ႉလၢႆႈၶူဝ်းလၢႆႈလဵင်းသေ တိုဝ်းၵုပ်းၵၢပ်ႇဝႆၽႃႈယၢင်ယဝ်ႉ သုပ်းသႂ်ႇသွၵ်းတိၼ်ဢူတ်ႇၼၢႆးၶမ်းလႅင်ၼၼ်ႉလႄႈ ပႆလူင်ၵႂႃႇတၢင်းႁူင်းယႃၶိုၼ်း။ ႁွတ်ႈထိုင်ၼႂ်းႁွင်ႈဝႆႉၵူၼ်းပဵၼ်ၼၼ်ႉၵေႃႈ ႁၼ်ၸၢႆးဝၼ်းၼွၼ်းယဵၼ်ယူႇ မၼ်းၸင်ႇၵႂႃႇၸူးတီႈမေႃယႃၶဝ်သေ “ၸၢႆးဝၼ်းပဵၼ်သင်ၶႃႈမေႃယႃ”
မေႃယႃၶမ်းဢွင်ႇၵေႃႈ သီၼႃႈဢမ်ႇပေႃးယုမ်ႉလႆႈၵႃႈႁိုဝ်လႄႈ “တူၺ်းယဝ်ႉ ပဵၼ်ၶႆႈလိူတ်ႈဢွၵ်ႇၶႃႈဢေႃႈ တေလႆႈပႂ်ႉတူၺ်းငဝ်းလၢႆးမၼ်းထႅင်ႈဢိတ်ႉၼိုင်ႈဢေႃႈ ပေႃးဝႃႈမၼ်းဢမ်ႇႁၢႆႉႁႅင်းတႄႉၵေႃႈ မိူဝ်းႁိူၼ်းလႆႈယဝ်ႉၼင်ႇၵဝ်ႇၶႃႈ”
“ၶႂ်ႈဝႃႈမိူဝ်ႈၼႆႉတႄႉၵေႃႈ…”
“ဢမ်ႇပႆႇၸၢင်ႈမိူဝ်းၶႃႈ”
ၶမ်းလၢဝ်ယဵၼ်ၵႂႃႇႁေ “ပွင်ႇၸႂ်ယဝ်ႉၶႃႈ..” ယၵ်ႉတူၺ်းၸူးၸၢႆးဝၼ်းသေယဝ်ႉ “ယၢပ်ႇၸႂ်မေႃယႃၶဝ်ထႅင်ႈယဝ်ႉ..မိူၼ်ၶႃႈၵေႃႈတေလႆႈၵႂႃႇထႅင်ႈယဝ်ႉဢေႃႈ”
“မေႃသွၼ်တေၵႂႃႇလႂ်ထႅင်ႈ..”
“ၶဝ်ဢမ်ႇယူႇလီ ၵႃႈတေလႆႈမိူဝ်းလၢတ်ႈပၼ် ဢူႈမႄႈၶဝ်ဢေႃႈ” သုပ်းၽႃႈယၢင်တိုဝ်းၵုပ်းမၼ်းသေ ဢွၵ်ႇႁူင်းယႃၵႂႃႇယဝ်ႉ။
ယၢမ်းၼၼ်ႉ ၸင်ႇသမ်ႉငိၼ်းသဵင်လင်မေႃးမႃး “ပႂ်ႉႁဝ်းၽွင်ႈလႄႈ!!” ၼၼ်ႉတႄႉပဵၼ်သဵင်မေႃယႃၽူၺ်းႁွမ်ယဝ်ႉ “မေႃသွၼ်ႁၼ်တၢင်းမိူဝ်းယူႇၶႃႈႁႃႉ!”
ၶမ်းလၢဝ်ၸင်ႇတေၶုၵ်းၸႂ်လႆႈမႃးသေ “ဢေႃႈ..ဢမ်ႇႁူႉၶႃႈ”
“ဢမ်ႇႁူႉသမ်ႉပေႉတေႁိပ်ႈႁဵတ်းသင်လႃႇ ၶႂ်ႈၸဵဝ်းႁႂ်ႈၵၢၼ်း ၶႂ်ႈၼၢၼ်းႁႂ်ႈလႅၼ်ႈၼႆ ယိုင်ႈႁိပ်ႈယိုင်ႈထိူင်းၵူၺ်းဢေႃႈ”
ၶမ်းလၢဝ်လႄႈမေႃယႃၽူၺ်းႁွမ်ၼၼ်ႉၵေႃႈ မိူဝ်းၵႂႃႇတၢင်းဝၢၼ်ႈၶုမ်ႇၼၼ်ႉၵႂႃႇလွႆးလွႆးယဝ်ႉ၊ တၢင်းမိူဝ်းဝၢၼ်ႈၶုမ်ႇၼၼ်ႉၵေႃႈ ဢမ်ႇၸႂ်ႈဝႃႈၸမ်ၸမ်ၵူၺ်း လိူဝ်သေၼၼ်ႉ တၢင်းၵေႃႈပဵၼ်ၵူမ်ႇပဵၼ်ဢုင် မၢင်တီႈၵေႃႈလိၼ်ၵူၼ်ႇ တၢင်းၵႂႃႇၵူၺ်းပေႃးဢမ်ႇၶႂ်ႈမီးယဝ်ႉ၊ မၢင်တီႈၵေႃႈ ႁႂ်ႈၵႂႃႇငၢႆႈၼႆတေႃႉတႄႉမီးမႆႉပွတ်းမႆႉပႅတ်း တဵင်တၢင်ႇႁႂ်ႈယဵပ်ႇၵႂႃႇၼိူဝ်မၼ်းလႆႈၼၼ်ႉၵူၺ်း၊ မၢင်တီႈၵူမ်ႇဢုင်လိုၵ်ႉ သမ်ႉပေႃးၶႂ်ႈပဵင်းႁူဝ်ၶဝ်ႇယဝ်ႉ ၽိူဝ်လိူဝ်ၵႆ တၢင်းၵေႃႈယၢပ်ႇထႅင်ႈ။
ၶမ်းလၢဝ်ႁၼ်ၼင်ႇၼၼ်ၵေႃႈ မိူဝ်ႈမၼ်းတေပွင်ႉဝႃႈမၼ်းႁိူဝ်ႉၼႃႇ၊ ယၢပ်ႇၼႃႇၼႆၼၼ်ႉ ၸင်ႇလႆႈဝူၼ်ႉထိုင်လုၵ်ႈႁဵၼ်းမၼ်းမႃးယဝ်ႉ။ “ၶဝ်ၵႂႃႇၵႂႃႇမႃးမႃးတေယၢပ်ႇတၢၼ်ႇႁိုဝ် သမ်ႉလႆႈၵႂႃႇၵူႈဝၼ်းၵူႈဝၼ်းၵွၼ်ႇ ႁဝ်း မႃးပွၵ်ႈလဵဝ်ၵူၺ်းပေႃးႁိူဝ်ႉၼႃႇယဝ်ႈ”
“ၵႂႃႇၵႂႃႇမႃးမႃးတိၵ်းတိၵ်းၵေႃႈ ယၢမ်ႈၵႂႃႇႁင်းမၼ်းယဝ်ႉဢေႃႈ”
“မိူၼ်ၼႆ လုၵ်ႈဢွၼ်ႇဢမ်ႇၵႂႃႇႁူင်းႁဵၼ်းၵေႃႈ ဢမ်ႇၶႂ်ႈၼႄးၶဝ်ယဝ်ႉၼႆႉ”
မေႃယႃၽူၺ်းႁွမ်ၵေႃႈ ယုမ်ႉသေယၵ်ႉတူၺ်းၼႃႈၶမ်းလၢဝ်ယဝ်ႉ “မေႃသွၼ် ၸႂ်လီၼႃႇပူၼ်ႉယဝ်ႉ” ယဵၼ်သဵင်ၵႂႃႇၵႅပ်ႉၼိုင်ႈသေ “တၢင်းယၢပ်ႇမွၵ်ႈၼႆႉ တင်းဢမ်ႇယၢပ်ႇတၢၼ်ႇမေႃသွၼ် တႃႇတေမႃးသွၼ်ပၼ်လုၵ်ႈဢွၼ်ႇၶဝ်ၼၼ်ႉၵွၼ်ႇၶႃႈလႃႈ”
သမ်ႉပေႃးဢဝ်ၶမ်းလၢဝ်မိုင်ၵိုတ်းလူင်ၵႂႃႇၵႅပ်ႉၼိုင်ႈယဝ်ႉ “ႁဵတ်းသင်လႄႈဝႃႈၼၼ်ၶႃႈ..”
မေႃယႃၵေႃႈ ၵူမ်ႈၼႃႈမၼ်းၵႅပ်ႉၼိုင်ႈသေယဝ်ႉ ၶိုၼ်းဝၢႆႇၼႃႈယၵ်ႉတူၺ်းၸူးၶမ်းလၢဝ် ဢၼ်ပႆလူင်ၵႂႃႇၸွမ်းၵၼ်ၼၼ်ႉဝႃႈ “ဢေႃ..ဢမ်ႇမီးၽႂ်ယဵၼ်ႉယူႇလႆႈၶႃႈဢေႃႈ၊ မီးမေႃသွၼ်ၼႆႉၵူၺ်းၶႃႈယဝ်ႉ ဢၼ်ယူႇလႆႈႁိုင်လိူဝ်ပိူၼ်ႈ”
“တိုၵ်ႉမႃးႁဵတ်းလႆႈ သွင်သၢမ်လိူၼ်ၼႆႉၵူၺ်းၼႃ ႁိုင်လိူဝ်ပိူၼ်ႈယဝ်ႉၶႃႈႁႃႉ ပဵၼ်သင်လႄႈသမ်ႉပဵၼ်ၸိူင်ႉၼၼ်ၶႃႈ”
“တွင်းတွင်းလႆႈ မေႃသွၼ်ၵေႃႉဢွၼ်တၢင်းၼၼ်ႉ ဢမ်ႇမိုတ်ႈဢွင်ႈတီႈသေမိူဝ်းၵႂႃႇၶိုၼ်း၊ မေႃသွၼ် ဢၼ်မႃးထႅင်ႈပွၵ်ႈၵမ်းသွင်ၼၼ်ႉသမ်ႉ လုၵ်ႈႁဵၼ်းႁၢႆပႅတ်ႈၶႃႈဢေႃႈ”
ၶမ်းလၢဝ်ငိၼ်းၼင်ႇၼၼ်ၵေႃႈ “မီးလွင်ႈတၢင်းယူႇ..”
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ
