တွၼ်ႈသၢမ်
ၶမ်းလၢဝ်ၵေႃႈ ယၢင်ႈဢွၵ်ႇၽၵ်းတူၵိူၼ်ႇၵႂႃႇသေယဝ်ႉ လွမ်ငွၵ်ႈၵႂႃႇႁိူၼ်းၼိုင်ႈယဝ်ႉႁိူၼ်းၼိုင်ႈ ထိုင်ၵႂႃႇႁိူၼ်းလင်ယႂ်ႇဢၼ်ၶၢႆသႅင်ႇၼႂ်းဝၢၼ်ႈၼၼ်ႉသေ လႆႈႁၼ်လူတ်ႉၶိူင်ႈၶဝ် တမ်းယူႇၼႂ်းသိုင်ႇႁူမ်ႈပႃးထူဝ်ႈလမ်းၼိုင်ႈလႄႈ မၼ်းၵေႃႈ ၶဝ်ႈၵႂႃႇၼႃႈသႅင်ႇၼၼ်ႉသေ ၸဝ်ႈသႅင်ႇၵေႃႈ တူင်ႉတၵ်ႉၸူးမၼ်းၵႂႃႇ
“မႃးၶႃႈလႄႈ ၶဝ်ႈမႃးၶႃႈ.. ၼွင်ႉၶႂ်ႈလႆႈသင်လႃႇ”
“မီးၵူႈမဵဝ်းယူႇၶႃႈႁႃႉ!”
ၸဝ်ႈသႅင်ႇၼၼ်ႉၵေႃႈယုမ်ႉသေယဝ်ႉ ယၵ်ႉတူၺ်းမၼ်းၵႂႃႇ
“မီးၵူႈမဵဝ်းၶႃႈ..” ၸွမ်းလွင်ႈၶႂ်ႈႁူႉၶႂ်ႈႁၼ်ၼၼ်ႉသေ “ဢေးၼွင်ႉပဵၼ်ၵူၼ်းဝၢၼ်ႈလႂ်လႃႇ! ႁၢင်ႈဢမ်ႇယၢမ်ႈႁၼ်သေပွၵ်ႈၼႆႉ”
“လုၵ်ႉဝဵင်းမႃးၶႃႈ!!”
“လုၵ်ႉဝဵင်းမႃးၼႆႁႃႉ ၸွင်ႇၸႂ်ႈမေႃသွၼ်ဢၼ်ၼၢႆးၶမ်းလႅင်ႁွင်ႉမႃးၼၼ်ႉၼႄႇၼႆႉပေႃးၼၼ်”
မိူဝ်ႈငိၼ်းၸိူင်ႉၼၼ်ၵေႃႈ ဢဝ်မၼ်းသမ်ႉပေႃးဢမ်ႇၶႂ်ႈႁတ်းတေႃႇၼႃႈၸဝ်ႈသႅင်ႇယဝ်ႉ
“ပေႃးၶႂ်ႈမိူဝ်းဝဵင်း ၸွင်ႇတေသူင်ႇပၼ်လႆႈႁိုဝ်!”
ၸဝ်ႈသႅင်ႇၼၼ်ႉၵေႃႈ မိူၼ်ႇတူၺ်းလူတ်ႉၶိူင်ႈၼႂ်းသိင်ႇၼၼ်ႉသေ “ဢေႃႈ…ဢိူဝ်ႈ..ၶႂ်ႈမိူဝ်းဝဵင်းႁႃႉ!”
“ႁဵတ်းၸိူင်ႉႁိုဝ်ၵေႃႈလႆႈယဝ်ႉၶႃႈ မိူဝ်းသူင်ႇၶႃႈၽွင်ႈ!!..”
“ၶႂ်ႈသူင်ႇတႄႉၶႂ်ႈသူင်ႇယူႇၼႃႈၼွင်ႉ..ပီႈသူၵေႃႈသမ်ႉဢမ်ႇမေႃႁေႃႈလူတ်ႉႁေ ၵူၼ်းႁေႃႈမၼ်းသမ်ႉဢမ်ႇယူႇၼၼ်ႉယိုင်!”
“ႁႂ်ႈၶႃႈယိမ်မိူဝ်းၶႃႈလႄႈပေႃးၼၼ်”
“ဢမ်ႇၸႂ်ႈဝႃႈဢမ်ႇၶႂ်ႈပၼ်ယိမ်ၼႃ လူတ်ႉလမ်းၼၼ်ႉ မၢၵ်ႇမၼ်းဢမ်ႇပေႉဢုင်လႆႈၼၼ်ႉယိုင်ၼႃႇ ဢမ်ႇသၢင်ႇထုၵ်ႇ ၸၢင်ႈၸဵပ်းၵွပ်ႈမၼ်းၵွၼ်ႇဢိူဝ်ႈပီႈဝႃႈ”
“ဢမ်ႇပဵၼ်သင်ပီႈၼၢင်း ၶႃႈမေႃႁေႃႈယူႇၵူၺ်း! ”
ၸဝ်ႈသႅင်ႇၼၼ်ႉၵေႃႈ ၵႂႃႇဢဝ်ၵၢၵ်ႇသေႃးမႃးပၼ်မၼ်းသေ သွၼ်ႇၵႃႈၶၼ်ပၼ်တီႈမၼ်းယူႇ၊ ဢၼ်မၼ်းမႃးၼႆႉၵေႃႈ ဢမ်ႇလႆႈငိုၼ်းသင်မႃးၼမ်ႁေၵႃႈႁိုဝ် မၼ်းၵေႃႈလႆႈပၼ်ၵႃႈလူတ်ႉၶိူင်ႈၼၼ်ႉၵႂႃႇ ၵွႆးၵိုတ်းၵႅၼ်ႇငိုၼ်းၼိုင်ႈႁဵင်ၵူၺ်းယဝ်ႉ၊ သမ်ႉဝႃႈႁူႉယူႇမၼ်းၵႃႈၼႆ ၵွပ်ႈၶႂ်ႈမိူဝ်းၼႃႇဢႃးလႃးလႄႈ ဢမ်ႇသူၼ်သင်ယဝ်ႉ ပၼ်ငိုၼ်းယဝ်ႉၵေႃႈ သွင်ႉမိူဝ်းၵမ်းလဵဝ်။
တိုၵ်ႉၸင်ႇႁေႃႈလူတ်ႉဢွၵ်ႇဝၢင်းႁိူၼ်းၵႂႃႇၵူၺ်း မၢၵ်ႇလူတ်ႉပေႃးပလၢတ်ႈပလိတ်ႈလူင်ၵႂႃႇယဝ်ႉၼႃႇ၊ တိၼ်မၼ်းၼၼ်ႉၵေႃႈ ယဵပ်ႇထူယဵပ်ႇထူလူင်ၵႂႃႇၸွမ်းတၢင်းၼၼ်ႉႁင်းမၼ်းလွႆးလွႆးယဝ်ႉ၊ တေႃႇတေႃႇမၼ်းတေပူၼ်ႉၵႂႃႇလႆႈၼႂ်းဝၢၼ်ႈၼၼ်ႉ ၶူဝ်းမၼ်းတႄႉၵေႃႈ သမ်ႉပေႃးၵူဝ်ႈၵူမ်ႇၼုၵ်းဢုင်လူင်ၵႂႃႇမူတ်းယဝ်ႉ။ ဢွၵ်ႇပူၼ်ႉဝၢၼ်ႈၵႂႃႇပႆႇႁိုင် မၢၵ်ႇလူတ်ႉၵေႃႈဢမ်ႇမီးလၢႆး တၢင်းၵေႃႈသမ်ႉဢုင်ထႅင်ႈသေဢမ်ႇၵႃး ၵုင်းပႃးလႄႈ မၼ်းၵေႃႈဢမ်ႇသူၼ်ၸႂ်သင် ၵိုင်ႉၵၢင်ႉလိမ်ႇႁႅင်းၼႃႇပူၼ်ႉတီႈသေ သမ်ႉပေႃးဢဝ်ႁူဝ်လူတ်ႉယုၵ်ႉပုင်ႈလူင်ၵႂႃႇ တင်းၵူၼ်းတင်းလူတ်ႉ လူမ်ႉတဵင်ၵၼ်ယူႇၼႂ်းၵၢင်တၢင်းၼၼ်ႉယဝ်ႉ။
သမ်ႉဝႃႈလူမ်ႉၵႂႃႇယဝ်ႉသေတႃႉ မိူဝ်ႈယင်းတိုၵ်ႉမီးႁႅင်းယူႇၼၼ်ႉ ၶတ်းၸႂ်ယုၵ်ႉလူတ်ႉၼၼ်ႉၶိုၼ်ႈမႃးသေ ၵၢၼ်ႉၵူၵ်ႉၵၢၼ်ႉၵၢၵ်ႉ လၢၵ်ႈၸၼ်ဢဝ်လူတ်ႉၼၼ်ႉ ၶိုၼ်ႈၵႂႃႇၵမ်းလွႆးလွႆးယူႇ၊ လိူၵ်ႈလိူၵ်ႈ ၽူၼ်သမ်ႉၵိုင်ႉၵၢင်ႉမႃးတူၵ်းသႂ်ႇထႅင်ႈ ယိုင်ႈႁဵတ်းႁႂ်ႈတၢင်းမိုၼ်ႈမႃးလိူဝ်ၵဝ်ႇ၊ မၼ်းၵေႃႈယင်းဢမ်ႇယွမ်းႁူၼ်ၶိုၼ်း ၶတ်းၸႂ်သိုပ်ႇၵႂႃႇထႅင်ႈ ဢီးလူတ်ႉမၼ်းၶိုၼ်ႈၵုင်းၵႂႃႇတိၵ်းတိၵ်း တေလူမ်ႉတေလုၵ်ႉလၢႆၵမ်းၵေႃႈ မၼ်းဢမ်ႇသူၼ်ယဝ်ႉ၊ မၢင်ၵမ်းၵူမ်ႇဢုင်ၶဝ်ႈသူပ်းၵေႃႈ မၼ်းတေႃႈဢမ်ႇပဵၼ်ႁိုဝ် မိူဝ်ႈမၼ်းမီးယိူင်းဢၢၼ်းဝႃႈ တေဢၢၼ်းမိူဝ်းႁိူၼ်းၼႆၼၼ်ႉ ၶတ်းၸႂ်လူင်ၵႂႃႇတိၵ်းတိၵ်း သမ်ႉပေႃးပူၼ်ႉၵုင်းဢွၼ်ႇဢိတ်း ႁိမ်းဝၢၼ်ႈၼၼ်ႉၵႂႃႇယူႇ။ မိူဝ်ႈႁွတ်ႈၵႂႃႇတီႈတၢင်းပဵင်းသမ်ႉ ပဵၼ်ဢုၵ်းလုၵ်းဢၢၵ်းလၢၵ်းလူင်ၵႂႃႇသဵင်ႈ၊ ပေႃးပဵၼ်တၢင်းၵုင်းသမ်ႉထူလူင်း ပေႃးတၢင်းလူင်းလွႆသမ်ႉသလုတ်ႈ တင်းၵူၼ်းတင်းလူတ်ႉ ထူလူင်လူင်းၵႂႃႇၸွမ်းၵၼ်ယဝ်ႉ။
မိူဝ်ႈဢၼ်ၵႂႃႇႁၢင်ႇၵႆဝၢၼ်ႈယူႇတၢၼ်ႇတၢၼ်ႇ သဵၼ်ႈတၢင်းၵေႃႈၵႅပ်ႈ ဢုင်ၵေႃႈဢုင် သမ်ႉလူင်းၵုင်းလႄႈ ၵုင်းမၼ်းၵေႃႈၶႂ်ႈယၢဝ်းဝႆႉသေ တင်းလူတ်ႉတင်းၵူၼ်း ထိင်းၵၼ်ဢမ်ႇလႆႈယဝ်ႉ ၶမ်းလၢဝ်ၵေႃႈႁွင်ႉသႅၼ်ႇလူင်လူင်းၵႂႃႇ ႁွတ်ႈတိၼ်ၵုင်းယဝ်ႉၵေႃႈ တင်းၵူၼ်းတင်းလူတ်ႉ ၼွၼ်းလူမ်ႉတဵင်ၵၼ်ယူႇၼွၵ်ႈတၢင်းၼၼ်ႉယဝ်ႉယိုင်၊ ၵူၼ်းၵေႃႈၼွၼ်းၼိမ်လူင်ယူႇလႄႈ လူတ်ႉၵေႃႈဢမ်ႇၸၢင်ႈတူင်ႉလႆႈယဝ်ႉ။
ၼၢႆးၶမ်းလႅင်ၼၼ်ႉၵေႃႈ သမ်ႉဝႃႈ ပွႆႇၶမ်းလၢဝ်မိူဝ်းၵႂႃႇသေတႃႉ မၼ်းၵေႃႈဢမ်ႇလိုမ်းၸႂ်မိူၼ်ၵၼ် ၸင်ႇၸွမ်းၶႆႈမိူဝ်းၵႂႃႇတၢင်းသႅင်ႇဢေးႁွမ်ၶဝ် ဢၼ်ၶမ်းလၢဝ်မႃးႁိမ်လူတ်ႉမိူဝ်းၵႂႃႇၼၼ်ႉယဝ်ႉ။ လိူဝ်သေၼၼ်ႉ ၽူၼ်သမ်ႉမႃးတူၵ်းထႅင်ႈလႄႈ မၼ်းယိုင်ႈၶႅၼ်းမႆႈၸႂ်မႃးထႅင်ႈသေ ၸူဝ်းႁွင်ႉဢဝ် လႅင်းမိူင်းသႂ် ၸွမ်းၶႆႈယူႇ။ ပႆမႃးတင်းႁိုင် ဢမ်ႇထူပ်းႁၼ်သေပွၵ်ႈ လႅင်းမိူင်းသႂ်ၵေႃႈ ၸင်ႇၸူးထၢမ်ၵႂႃႇတီႈ ၼၢႆးၵႂႃႇ။
“တေၸွမ်းၶႆႈႁဵတ်းသင်ၶႃႈလႃႇၼၢႆး ပီႈၶဝ်မိူဝ်းဝဵင်းယဝ်ႉဢမ်ႇၸႂ်ႈၶႃႈႁႃႉ”
“ၼႂ်းၸႂ်ၼၢႆးဢမ်ႇပေႃးလီၵႃႈႁိုဝ်ဢိူဝ်ႈ သင်မၼ်းမိူဝ်းႁွတ်ႈလႆႈတႄႉၵေႃႈလီယူႇ ၵူဝ်မၼ်းၵႂႃႇပဵၼ်သင်ၸွမ်းတၢင်းၼၼ်ႉၼႃႇ တင်းမိူဝ်းၵေႃႉလဵဝ်ၵူၺ်းႁေ လၢၼ်ၵေႃႈႁၼ်ယူႇတၢင်းမၼ်းမိူၼ်ၼႆဝႆႉ ဢမ်ႇႁူႉမၼ်းတေၵႂႃႇထိုင်တီႈလႂ်ၵူၺ်း တေၶိုတ်းယူႇၵူၺ်းၵႃႈတီႈဢမ်ႇတီႈ ၵႂႃႇတူၺ်းထႅင်ႈဢိတ်ႉၼိုင်ႈလႄႈ”
ၼၢႆးၶမ်းလႅင်ၼၼ်ႉ သမ်ႉဝႃႈပဵၼ်ၵူၼ်းထဝ်ႈသေတႃႉ မၼ်းၵေႃႈဢမ်ႇလႆႈထဝ်ႈႁႅင်းၼႃႇၽႅဝ် တိုၵ်ႉၵႂႃႇလႆႈပႆလႆႈလီလီယူႇ၊ ၵွပ်ႈၵႆႉတူင်ႉၵႆႉၼိုင် ၵႆႉၵႂႃႇၵႆႉပႆၼႃႇလႄႈ ၸင်ႇမီးႁႅင်းပႆလႆႈၵႆၼၼ်ႉယဝ်ႉ။ လႅင်းမိူင်းသႂ်ၵေႃႈ ယူႇတီႈႁူဝ်ၵုင်းၼၼ်ႉသေ မုင်ႈတူၺ်းတၢင်းယူႇၼၼ်ႉ ၸင်ႇသမ်ႉလႆႈႁၼ်လူတ်ႉၶိူင်ႈ ၼွၼ်းလူမ်ႉယူႇတီႈတိၼ်ၵုင်းၼၼ်ႉလႄႈ
“ၼၼ်ႉဢမ်ႇၸႂ်ႈလူတ်ႉၶိူင်ႈၶႃႈႁိုဝ်ၼၢႆး!!”
ဝၢႆႇတူၺ်းလီလီထႅင်ႈၵမ်းၼိုင်ႈ လႆႈႁၼ်ၶမ်းလၢဝ်ၼွၼ်းယူႇတႂ်ႈလူတ်ႉၶိုင်ႈၼၼ်ႉသေ
“ၼၼ်ႉ ႁၼ်ယဝ်ႉၼၢႆး ပီႈ!!..ပီႈၼၢင်း..” ဢမ်ႇတၼ်းထွမ်ႇသီႇထွမ်ႇႁႃႈသင်သေ မၼ်းၵေႃႈၼႅတ်ႈလႅၼ်ႈလူင်လူင်းၵႂႃႇ သမ်ႉပေႃးလူမ်ႉထူလူင်လူင်းၵႂႃႇတေႉၼင်ႇၵဝ်ႇယဝ်ႉ။ ၼၢႆးတႄႉၵေႃႈ တင်းတၢင်းမိုၼ်ႈလူင်ႁေ ဢိုင်ႇဢိင်ဢိုင်ႇဢၢင်လူင်းၵႂႃႇလွႆးလွႆးယဝ်ႉ။
လႅင်းမိူင်းသႂ်ၵေႃႈ ႁွတ်ႈထိုင်ၵႂႃႇတီႈၶမ်းလၢဝ်ယူႇၼၼ်ႉ ၵႂႃႇဢဝ်လူတ်ႉယုၵ်ႉၶိုၼ်ႈသေ ႁွင်ႉၶမ်းလၢဝ်ယူႇလၢႆၵမ်းၵေႃႈ ဢမ်ႇငိၼ်းသဵင်တုမ်ႉတွပ်ႇၶိုၼ်းလႄႈ ၸင်ႇဢဝ်ၼိဝ်ႉၸီႉမၼ်း ယိုၼ်းၵႂႃႇတီႈၶူႈၼင်ၶမ်းလၢဝ်သေ မိူၼ်တေဢမ်ႇထူၺ်ႈၸႂ်ယဝ်ႉ ၶုၼ်ႇပုင်ႈသုတ်ႉႁူင်လူင်ဢွၵ်ႇမႃး။
“ၶဝ်တၢႆယဝ်ႉ!!”
ၼၢႆးဢၼ်ၵူဝ်လူမ်ႉသေပႆလူင်မႃးလွႆးလွႆးၼၼ်ႉၵေႃႈ ၵိုင်ႉၵၢင်ႉတူၵ်းၸႂ်ယဝ်ႉ ပလၢတ်ႈသႂ်ႇႁွင်ႈၼၼ်ႉလႄႈဢဝ်ၼင်ႈထူလူင်လူင်းၸွမ်းႁွင်ႈ မႃးတဵင်သႂ်ႇၶႃၶမ်းလၢဝ် ဢၼ်လႅၼ်းၶႂၢင်ႁွင်ႈဝႆႉၼၼ်ႉသေ သမ်ႉပေႃးဢဝ်သဵင်ၶမ်းလၢဝ်ႁွင်ႉဢွၵ်ႇမႃး
“ဢႃႉ!!”
“ၸိုင်ဝႃႈတၢႆယဝ်ႉလႃႇ သဵင်ၽႂ်လႃႇႁမ်ႉ!”
“ၽဵတ်ႇမၼ်းၶႃႈယူဝ်ႉၼၢႆး!!” သီၼႃႈ လႅင်းမိူင်းသႂ်ၼၼ်ႉၵေႃႈ ၼင်ႇႁၢင်ႈတိုၼ်ႇၵူဝ်မႃးယဝ်ႉ။
“ၶႃႈဢမ်ႇပႆႇတၢႆ…သိုတ်ႈ….ၸဵပ်း…ၸဵပ်းတေႉယဝ်ႉ”
ၶႃသွင်ၵေႃႉၼၢႆးလၢၼ်ဢၼ်လႆႈငိၼ်းသဵင် ၶမ်းလၢဝ်ၸိူင်ႉၼၼ်ၵေႃႈ ၼင်ႇႁၢင်ႈၸႂ်ပေႃးလီလူင်မႃးယူႇ။
“လုၵ်ႉႁင်းၵူၺ်းလႆႈယူႇႁႃႉယိင်း!!”
ၶမ်းလၢဝ်ၵေႃႈ ၶတ်းၸႂ်လုၵ်ႉတူၺ်းယူႇ ၵူၺ်းၵႃႈတူဝ်မၼ်းၼၼ်ႉ ၼင်ႇဝႃႈဢမ်ႇတူင်ႉလႆႈသေဢိတ်းယဝ်ႉလႄႈ “တေႃႈၼင်ႇၶႅၼ်ၵေႃႈ..ယုၵ်ႉဢမ်ႇလႆႈသေဢိတ်း.. ၸဵပ်းတေႉယဝ်ႉ ၸဵပ်းၵႂႃႇတၢင်းတူဝ်ယဝ်ႉ”
မိူဝ်ႈပဵၼ်ၸိူင်ႉၼၼ် သမ်ႉပေႃးဢဝ်မၼ်းႁွင်ႉႁႆႈဢွၵ်ႇမႃးသေ
“ၶႃႈပဵၼ်တုၵ်ႉၶိတ်ႉတၵႂႃႇယဝ်ႉၸွင်ႇၸႂ်ႈ ၶႃႈတူင်ႉတူဝ်ဢမ်ႇလႆႈသေဢိတ်းၸိူင်ႉၼႆ ၶႃႈတေၵႂႃႇတၢင်းလႂ်ဢမ်ႇလႆႈယဝ်ႉၸွင်ႇၸႂ်ႈ တီႈဝၢၼ်ႈၼွၵ်ႈၼႆႉ ဢမ်ႇမီးႁူင်းယႃလူး ၶႃႈတေလႆႈတၢႆယူႇတီႈဝၢၼ်ႈၼွၵ်ႈၼႆႉၵူၺ်းယဝ်ႉႁႃႉ ႁိုဝ်း…ႁိုဝ်း…သိုတ်ႉ…သိုတ်ႉ…”
“မွၵ်ႈၼႆႉၵူၺ်း! ဢမ်ႇတၢႆလေႃႇၼႃႈ.. တေပွင်ႉတေႁွင်ႉတေႁႆႈႁဵတ်းႁင်တိၵ်းတိၵ်း ဢမ်ႇၸႂ်ႈဝႃႈၶႂ်ႈပဵၼ်သေ ႁႂ်ႈပိူၼ်ႈသူင်ႇမိူဝ်းဝဵင်းၼႆဢမ်ႇၸႂ်ႈႁိုဝ်”
“ၶႃႈတေလႆႈမိူဝ်းႁိူၼ်းယဝ်ႉၸွင်ႇၸႂ်ႈ! ” ၵိုင်ႉၵၢင်ႉၶုၼ်ႇလုၵ်ႉၼင်ႈလူင်မႃး ၼင်ႇဢမ်ႇႁူႉၸဵပ်းႁူႉသႅပ်ႇသင်သေဢိတ်း ၽိူဝ်ႇႁူႉတူဝ်မႃးၵေႃႈ သႅၼ်ႇႁွင်ႉဢွၵ်ႇမႃး
“ဢႃႉ!!..ၸဵပ်း!…” သဵင်ပေႃးပူၼ်ႉႁူၺ်ႈပူၼ်ႉလွႆၵႂႃႇ ၼၢႆးလႄႈလႅင်းမိူင်းသႂ်သမ်ႉပေႃးတူၵ်းၸႂ်ယဝ်ႉ။
ႁဵတ်းၵႂႃႇႁဵတ်းမႃး လႅင်းမိူင်းသႂ်လႆႈၸေးမၼ်းမႃးတေႃႇႁွတ်ႈႁိူၼ်းယူႇ၊ လႅင်းမိူင်းသႂ်ၼၼ်ႉတႄႉၵေႃႈ တင်းႁိူဝ်ႉတင်းၼၵ်း သမ်ႉပေႃးဢမ်ႇတၵ်းသဵင်လႆႈယဝ်ႉ၊ တေႃႇပေႃးသုတ်းတၢင်းၼႆႉ ပႆလူင်မိူဝ်း တၢင်းၵေႃႈယၢပ်ႇ ဝၢင်းၵေႃႈဢမ်ႇလႆႈ ပဵၼ်ဢၼ်ၼႃႇၸႂ်မၼ်းတႄႉတႄႉယူႇ။ ၶဝ်ဢွၼ်ၵၼ်ႁွတ်ႈႁိူၼ်းၶိုၼ်း ၵၢင်ဝၼ်းသမ်ႉပေႃးၶမ်ႈလပ်းသိင်ႇၼႃႇၼႃႇယဝ်ႉ။
သမ်ႉဝႃႈၶမ်ႈၼႃႇယဝ်ႉသေတႃႉ ၼၢႆးၵေႃႈၸင်ႇႁႂ်ႈၵူၼ်းၼႂ်းဝၢၼ်ႈ ၵႂႃႇႁွင်ႉမေႃယႃ ဢၼ်ယူႇတီႈဝၢၼ်ႈၸိင် တၢင်းဢွၵ်ႇဝၢၼ်ႈၶဝ်ၼၼ်ႉ မႃးတူၺ်းပၼ်ယူႇ။
ဝၢၼ်ႈၸိင်ၼႆႉ ပဵၼ်ဝၢၼ်ႈဢၼ်ယူႇပႃႈတၢင်းဢွၵ်ႇဝၢၼ်ႈဢုင်ၼၼ်ႉသေ လုၵ်ႉဝၢၼ်ႈဢုင်ပႆတိၼ်ၵႂႃႇ တေၸႂ်ႉၶၢဝ်းယၢမ်းယူႇမွၵ်ႈ 15 မိၼိတ်ႉၼႆႉယဝ်ႉ။ မေႃယႃၵေႃႈ မႃးတူၺ်းတၢင်းပဵၼ်မၼ်းသေ သမ်းၶဵမ်ပၼ်လႄႈ ထႅမ်ပၼ်ယႃမၼ်းယဝ်ႉၵေႃႈ ၶိုၼ်းပွၵ်ႈမိူဝ်းၵႂႃႇယူႇ။
ၶမ်းလၢဝ်ၼၼ်ႉတႄႉၵေႃႈ တင်းၸဵပ်းႁေ မိူၼ်တေဢမ်ႇပေႃးၶႂ်ႈယူႇလီပႃးလႄႈ ၼွၼ်းၶၢင်းမႃးယူႇယဝ်ႉ။ ၼၢႆးၶမ်းလႅင်ၼၼ်ႉတႄႉ ဢမ်ႇပဵၼ်လပ်းပဵၼ်ၼွၼ်းၵွပ်ႈမၼ်းယူႇ၊ လႅင်းမိူင်းသႂ်ၼၼ်ႉၵေႃႈ ႁိူဝ်ႉၼႃႇမိူၼ်ၵၼ် သမ်ႉပေႃးဢမ်ႇတၼ်းႁူႉတူဝ်ဝႃႈ လပ်းၵႂႃႇမိူဝ်ႈလႂ်။
ယၢမ်းၵၢင်ၼႂ်ၾႃႉပၢင်ႇမိူင်းသႂ်သိူင်ႁိူင် သၢႆလႅင်းလုၵ်ႈတႃဝၼ်း ထွင်ႇပိူင်းၶဝ်ႈမႃးၼႂ်းႁူးၽၵ်းတူ တွင်ႈသႂ်ႇပၼ်ၼႃႈၶမ်းလၢဝ် ဢၼ်တိုၵ်ႉၼွၼ်းလပ်းမွႆႈယူႇၼၼ်ႉ သမ်ႉပေႃးတိုၼ်ႇမိုၼ်းတႃမႃးသေယဝ်ႉ။
“တိုၼ်ႇယဝ်ႉႁႃႉယိင်း..ပဵၼ်ႁိုဝ်မႃးလႃႇ ၸွင်ႇၸဵပ်းတီႈလႂ်ႁိုဝ်”
ၶမ်းလၢဝ် ဢၼ်ၼႃႈတႃဢမ်ႇပေႃးၸိုၼ်ႈပၢင်ႇသေၵႃႈႁိုဝ်လႄႈ
“ႁူဝ်ၼၵ်းတေႉယဝ်ႉ…”
ၼၢႆးၵေႃႈၼႅတ်ႈဢဝ်မိုဝ်းမၼ်းၵမ်းၼႃႈၽၢၵ်ႇၶမ်းလၢဝ်ၼၼ်ႉသေ
“ၶႅၼ်းမႃးယူႇဢိတ်ႉၼိုင်ႈ”ၼၢႆးၸင်ႇယုမ်ႉၸူးမၼ်းသေ “ဢမ်ႇပဵၼ်သင်ယဝ်ႉၼႃႈ တေၶႅၼ်းယူႇၵူၺ်း”
ၶမ်းလၢဝ်ၼၼ်ႉၵေႃႈ လႆႈဝႃႈမၼ်းလူမ်ႉႁႅင်းဝႆႉလႄႈ မိူၼ်ဝႃႈ ၶႅၼ်ၵေႃႈႁၵ်း၊ ၶႃၵေႃႈတေႁၵ်းဝႆႉယဝ်ႉ ၸွမ်းၶႅၼ်ၸွမ်းၶႃမၼ်းၼၼ်ႉ လႆႈဢဝ်တင်းၽၢၵ်ႇမႆႉႁူမ်ႈလေႃးၽႅၼ်ႇသႂ်ႇယႃႈယႃၼၼ်ႉ မႃးၵုပ်းသႂ်ႇဝႆႉယူႇ။ မၼ်းဢမ်ႇပေႃးယူႇလီႁေ ဢမ်ႇပေႃးမီးႁႅင်းႁေ တင်းၸဵပ်းၼႃႇႁေ ပိူၼ်ႈဢဝ်သင်မႃးႁဵတ်းပၼ်မၼ်းၵေႃႈ မၼ်းဢမ်ႇသူၼ်ၸႂ်သင်ယဝ်ႉ သွၼ်ႇႁႂ်ႈမၼ်းတေၶႅၼ်းလီၵူၺ်း။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ။
