တွၼ်ႈသီႇ
ငဝ်းတူဝ်ၵူၼ်းလမ်ၽိုတ်းလိုတ်း တူဝ်ၶိင်းသုင်ယွမ်သေး တႅမ်ႇလိူဝ်ၽၵ်းတူမွၵ်ႈသွင်ၼိဝ်ႉၼႆႉ မႃးႁႄႉပႅတ်ႈ သၢႆလႅင်းတီႈၽၵ်းတူၼၼ်ႉသေယဝ်ႉ ဢမ်ႇသူပ်းဢမ်ႇသဵင်သင်သေ ၵႂႃႇၼင်ႈႁိမ်းၶမ်းလၢဝ်ၼၼ်ႉယူႇ။ ၶမ်းလၢဝ်မိုၼ်းတႃမႃး လႆႈႁၼ်ၵူၼ်းၵေႃႉၼၼ်ႉ မီးၼႃႈတႃလီယၵ်ႉလီယဵမ်ႈ ၼႃႈလုပ်ႇၶၢဝ်ပွတ်ႇ၊ သီႇသူပ်းၶွင်သွင်ႁွင်၊ ၶူႈၼင်ၵူင်းပဵၼ်သၼ်၊ ၶူၼ်တႃလမ်ပဵၼ်တေး ႁၢင်ႈၽၢင်တူဝ်ၶိင်းၵႅပ်ႈလႅပ်ႈတႅတ်ႈၼႅတ်ႈမူတ်းသႂ် တူဝ်ၶိင်းယွမ်သေးၼႆသေတႃႉ ပဵၼ်ၵူၼ်းဢၼ်ၵႅၼ်ႇၶႅင်မီးႁႅင်းလီဝႆႉယူႇ ။
မိုဝ်းသဵမ်ႈသဵမ်ႈမေႃယႃၼၼ်ႉ ၵမ်းၼႃႈၽၢၵ်ႇၶမ်းလၢဝ် ဢၼ်လိူတ်ႇမႆႈၼၼ်ႉယဝ်ႉ ယိပ်းတူၺ်းပၢႆမိုဝ်းလၢင်ႈငၢၼ်းငၢၼ်းၼၼ်ႉလႄႈ ၸင်ႇဢဝ်ပတႃးတႅၵ်ႈလူမ်းၼၢဝ် ဢွၵ်ႇမႃး ႁႂ်ႈၶမ်းလၢဝ်ဢႃႈသူပ်းယဝ်ႉ။ ၶမ်းလၢဝ်ဢၼ်ႁၼ်ၼင်ႇၼၼ်ၵေႃႈ ၵမ်သူပ်းၵမ်ပၢၵ်ႇမၼ်းဝႆႉ ပေႃးၵႅၼ်ႇၵႅၵ်းၵႅၵ်း၊ သင်မၼ်းလၢတ်ႈၵႂၢမ်းႁိုဝ် ဢႃႈသူပ်းဢွၵ်ႇမႃးၸိုင် မေႃယႃတေဢဝ်ဢၼ်တႅၵ်ႈလူမ်းမႆႈၼၼ်ႉ သႂ်ႇသူပ်းမၼ်းယဝ်ႉ၊ မေႃယႃသမ်ႉၸႂ်ႉႁႂ်ႈမၼ်းဢႃႈသူပ်းယူႇတိၵ်းတိၵ်း မၼ်းၵေႃႈဢမ်ႇၽွမ်ႉ သမ်ႉဝႃႈၶႂ်ႈဢဝ်မိုဝ်းမႃးပိၵ်ႉယူႇသေတႃႉ ၵွပ်ႈၶႅၼ်ႁၵ်းလႄႈ လႆႈၶၢမ်ႇတၢင်းမႆႉၵွပ်ႈဝႆႉယူႇၼၼ်ႉ ပဵၼ်ဢၼ်ယုၵ်ႉယၢပ်ႇဝႆႉယဝ်ႉ။
ဢမ်ႇၸႂ်ႈဝႃႈမၼ်းဢမ်ႇၶႂ်ႈတႅၵ်ႈၼင်ႇၵဝ်ႇ ၵွပ်ႈပိူဝ်ႈ ပတႃးဢၼ်လဵဝ်ၼၼ်ႉ ဢမ်ႇႁူႉဢဝ်ၵႂႃႇတႅၵ်ႈပၼ်ၽႂ်လၢႆလၢႆ တေဢဝ်သႂ်ႇၵိင်ႇႁႄႉၽႂ်မႃး သႂ်ႇသူပ်းၽႂ်ယဝ်ႉ ဢမ်ႇလၢမ်းလႆႈ၊ သမ်ႉဝႃႈဢမ်ႇယူႇလီၼႆၵေႃႈ မိူဝ်ႈႁၼ်ပတႃးတႅၵ်ႈလူမ်းၼၢဝ် မႃးငႃၸူးမၼ်းယူႇၼၼ်ႉ ႁဵတ်းႁႂ်ႈမၼ်းဝူၼ်ႉႁၼ်ႁၢင်ႈၸိူဝ်းၼၼ်ႉမႃး ဢဝ်ဢမ်ႇၶႂ်ႈပၼ်မေႃယႃသႂ်ႇၼႂ်းသူပ်းမၼ်း ၼၼ်ႉယဝ်ႉ။
မေႃယႃၵေႃႈဢမ်ႇၸၢင်ႈႁဵတ်းႁိုဝ် ယွၼ်းႁႂ်ႈၼၢႆးၸွႆႈဢဝ် သႂ်ႇပၼ်တီႈၵိင်ႇႁႄႉၶမ်းလၢဝ်ၵႂႃႇယဝ်ႉ၊ ၶမ်းလၢဝ်ၸင်ႇတေလူမ်ၸႂ်မႃးယူႇ။
ၸူဝ်ႈၽွင်းၶမ်းလၢဝ်ဢမ်ႇယူႇလီၼၼ်ႉ ၵမ်ႉႁိူၼ်းႁွင်ႇႁိူၼ်းၸၢၼ်း ႁိူၼ်းတူၵ်းႁိူၼ်းဢွၵ်ႇ ဢွၼ်ၵၼ်မႃးလႄႇမႃးၸႂ်းမၼ်း ပေႃးဢမ်ႇထၢတ်ႇတေႉၼင်ႇၵဝ်ႇ၊ ဢမ်ႇႁူႉဝႃႈမႃးလႄႇမၼ်းတေႉႁိုဝ်၊ မႃးတူင်ႉမႃးတၵ်ႉၸူးမၼ်းသေၶေႃႈသွင်ၶေႃႈယဝ်ႉ လိူဝ်ၼၼ်ႉ ၵုမ်ႇပဵၼ်ၶဝ်ၼင်ႇၵၼ်ၵူၺ်း ဢၼ်ဢုပ်ႇၵၼ်ယူႇ၊ ၶမ်းလၢဝ်ၼၼ်ႉတႄႉၼွၼ်းႁေထွမ်ႇၵူၺ်း၊ ထွမ်ႇၸိူင်ႉႁိုဝ်ၵေႃႈ လွင်ႈဢၼ်ၶဝ်ဢုပ်ႇၵၼ်ၼၼ်ႉ ၶိူဝ်းပိူၼ်ႈလၢႆလၢႆယဝ်ႉ၊ ၵမ်ႉၵေႃႉပုၼ်ႉပဵၼ်ၼႆ ၵေႃႉၼၼ်ႉပဵၼ်ၼႆဝႃႇ ပၼ်ႇၵႂႃႇပၼ်ႇမႃး ၵူၼ်းၼႂ်းဝၢၼ်ႈၼၼ်ႉ သမ်ႉပေႃးၶႂ်ႈၸေးၵေႃႉမၼ်းယဝ်ႉႁိုဝ်ဢမ်ႇႁူႉယဝ်ႉၼႃႇ၊ တွၼ်းႁေဝႃႈၶမ်းလၢဝ်ၼၼ်ႉဢမ်ႇႁူႉၸၵ်းၵူၺ်းယဝ်ႉ။
လႅင်းမိူင်းသႂ်ဢၢၼ်းဝႃႈ တေၵႂႃႇလႄႇလဵၼ်ႈၸွမ်းဝၢၼ်ႈၼႆၼၼ်ႉၵေႃႈ ဢမ်ႇပဵၼ်ၵႂႃႇတၢင်းလႂ်လႆႈယဝ်ႉ၊ ဝၼ်းယဝ်ႉဝၼ်း ၵုမ်ႇပႂ်ႉတူၺ်းၶမ်းလၢဝ်ယူႇႁဵတ်းၼၼ်ၵူၺ်း။ ၶမ်းလၢဝ်ၼၼ်ႉၵေႃႈ ပဵၼ်မႃးသမ်ႉပေႃးၶႂ်ႈၸမ်လိူၼ်ယဝ်ႉ မိူၼ်တေလီမႃးၶိုၼ်းယူႇ၊ ဝၼ်းဢၼ်ၼၢႆးဢမ်ႇယူႇႁိူၼ်းၼၼ်ႉ ၶမ်းလၢဝ်ၵေႃႈ ၸွမ်းၼင်ႇၵၢင်ၸႂ်ဢၼ်တိတ်းႁွႆႈၶႂ်ႈမိူဝ်းႁိူၼ်းၼႃႇယဝ်ႉလႄႈ ၶေႃးဝွၼ်းႁႂ်ႈလႅင်းမိူင်းသႂ်မိူဝ်းသူင်ႇမၼ်းယူႇ။
“ဢၢႆႈၼွင်ႉ! မိူဝ်ႈၼႆႉလႅတ်ႇမႆႈယဝ်ႉ မိူဝ်ႈၽုၵ်ႈပေႃးလႅတ်ႇမႆႈထႅင်ႈ မိူဝ်းသူင်ႇပီႈၵႃႈဝဵင်းဢိတ်ႉၼိုင်ႈဢမ်ႇလႆႈႁႃႉ”
“ပီႈပဵၼ်ပေႃးတၢၼ်ႇၼႆႉယဝ်ႉ ယင်းတိုၵ်ႉၶႂ်ႈမိူဝ်းထႅင်ႈယူႇၵႃႈ”
“ဢိူဝ်ႈ..ၶႂ်ႈမိူဝ်းၽႅဝ်လေႃႇ ၽႂ်ႁိုဝ်ၶႂ်ႈယူႇမေႃႉဝၢၼ်ႈၼွၵ်ႈၸွၵ်ႉထိူၼ်ႇၸိူင်ႉၼႆ”
လႅင်းမိူင်းသႂ်ၼိမ်ယဵၼ်လူင်ၵႂႃႇသေ
“ပီႈၸွင်ႇတွၼ်ႉသုတ်ႇမႅၼ်ႈလူမ်းဢၼ်ၵတ်းယဵၼ်ယဵၼ်ၼႆႉႁိုဝ် မၼ်းၸိုၼ်ႈသႂ်တၢၼ်ႇလႂ်ၼႆ၊ တူၼ်ႈမႆႉတူင်ႉၼိုင်ၶွၼ်းယူႇၸွမ်းလူမ်းၼၼ်ႉ မၼ်းႁဵတ်းႁႂ်ႈၸႂ်သိူဝ်းၸွမ်းတၢၼ်ႇႁိုဝ်ၼႆ၊ သဵင်ၼူၵ်ႉသဵင်ၼႆႇၵွပ်ႈတႆႇၸွမ်းၵိင်ႇၵၢၼ်ႈ ၽူၺ်းမႆႉၸိူဝ်းၼၼ်ႉ တေမူၼ်ႈၵျေႃႇၵႃႈႁိုဝ် သၽႃႇဝတၢင်းႁၢင်ႈလီ ဝၢၼ်ႈၼွၵ်ႈဢွၼ်ႇၼႆႉ မၼ်းပၼ်တၢင်းဢုၼ်ႇၸႂ် ပၼ်လွင်ႈၵတ်းယဵၼ်ၸႂ်တၢၼ်ႇႁိုဝ်ၼႆ ပီႈဢမ်ႇႁူႉထိုင်မၼ်းလႆႈသေဢိတ်ႉၼိုင်ႈႁႃႉ”
ၶမ်းလၢဝ်ၼၼ်ႉၵေႃႈ ယၵ်ႉတူၺ်းလႅင်းမိူင်းသႂ် ဢၼ်ၸုၵ်းယူႇတီႈၵၢင်ၸၢၼ်းၼၼ်ႉသေ သုတ်ႇလူမ်းယဵၼ်ယဵၼ်ယူႇၼၼ်ႉလႄႈ
“ဢိုမ်ႈ! ဢမ်ႇႁၼ်မႅၼ်ႈ ဢမ်ႇႁူႉထိုင်လႆႈ! တူၺ်းၵႂႃႇတၢင်းလႂ်ၵေႃႈ ဢမ်ႇႁၼ်တၢင်းၶိုၼ်ႈယႂ်ႇသေဢိတ်း၊ ဢၢႆလူမ်းၶဝ်ႈမႃးၵေႃႈ လေႃးပႃးၶီႈဝူဝ်းၶီႈၵႂၢႆးလူင်သေ၊ ၵႂႃႇတၢင်းလႂ်ၵေႃႈပဵၼ်ၵူမ်ႇပဵၼ်ဢုင် ႁဵတ်းသင်ၵေႃႈ ဢမ်ႇထၢင်ႇႁၢင်ႈတူင်ႉၼိုင်သေဢိတ်း မၼ်းလီတီႈလႂ်လႃႇ”
“မၼ်းတေလီၵႃႈႁိုဝ် သင်ၵူၼ်းမီးၼမ်ႉၸႂ်သေၵေႃႉၼိုင်ႈ ၶႂ်ႈပူၵ်းပွင်ဝၢၼ်ႈၼႆႉ ႁႂ်ႈမၼ်းၶိုၼ်ႈယႂ်ႇမႃးၼႆ”
သမ်ႉပေႃးဢဝ်ၶမ်းလၢဝ်မိုင်ၵႂႃႇၵႅပ်ႉၼိုင်ႈသေယဝ်ႉ ၶုၼ်ႇၶူဝ်လူင်ဢွၵ်ႇမႃး “ႁႃး!ႁႃး…ႁႃး တေမီးယူႇႁႃႉၵူၼ်းၸိူင်ႉၼၼ် ၵၢပ်ႈပၢၼ်တေႃႈလဵဝ်ၼႆႉ မီးၵူၼ်းႁၼ်သုၼ်ႇတူဝ်လွၼ်ႉလွၼ်ႉၵူၺ်း ဢမ်ႇႁူႉၼႃ ပေႃးပဵၼ်ဢၢႆႈၼွင်ႉတႄႉ”
“ၶႂ်ႈဝႃႈ..ပီႈၵေႃႈပဵၼ်ၵူၼ်းၼႂ်းၸုမ်းၼၼ်ႉၶႃႈႁႃႉ”
ဢဝ်ၶမ်းလၢဝ်ၶုၼ်ႇၵိုတ်းမိုင်လူင်ၵႂႃႇ မုင်ႈၵႂႃႇတူၺ်းလင်ႁိူၼ်းမုင်းၶႃးၸိူဝ်းၼၼ်ႉသေယဝ်ႉ
“ၸႂ်ႈဢိူဝ်ႈ! ၽႂ်ၽႂ်ၵေႃႈၶႂ်ႈယူႇတီႈဢၼ်ယူႇငၢႆႈလူမ်ၸႂ်တွၼ်ႈတႃႇတူဝ်ၸဝ်ႈၵဝ်ႇ၊ ၶႂ်ႈယူႇလီၵိၼ်လီ၊ ၶႂ်ႈမၢၵ်ႈမီးလီပဵၼ်ဢမ်ႇၸႂ်ႈႁိုဝ်လႃႇ ပေႃးတူဝ်ၵဝ်ႇသၢၵ်ႈသႃႇလူမ်ၸႂ်ၵေႃႈ ပဵင်းပေႃးယဝ်ႉဢမ်ႇၸႂ်ႈႁိုဝ် ပဵၼ်သင်လႄႈတေၵႂႃႇသူၼ်ၸႂ် ဝူၼ်ႉၼမ်ၸွမ်း လွင်ႈဢၼ်တေႁဵတ်းႁႂ်ႈယၢပ်ႇၼၼ်ႉလႃႇ”
“ပေႃးဝႃႈၼၼ် ပီႈၵေႃႈဢမ်ႇထုၵ်ႇလီမႃးၸဵမ်မိူဝ်ႈတႄႇမၼ်းယဝ်ႉလူး ပီႈသမ်ႉမႃးႁဵတ်းသင်လႃႇ”
ၵႂၢမ်းၶေႃႈၼႆႉ တွၼ်ႈတႃႇၶမ်းလၢဝ်ၼၼ်ႉၵေႃႈ ယင်းတိုၵ်ႉပဵၼ်ၶေႃႈထၢမ် ဢၼ်ၶမ်ၸႂ်မၼ်းဝႆႉယူႇၼၼ်ႉယဝ်ႉ၊ ၵႂၢမ်းမၼ်ႈဢၼ်ပၼ်ဝႆႉတီႈဢူႈၶဝ်ၼၼ်ႉၵေႃႈ လႆႈၽုတ်းဢွၵ်ႇမႃးၼႂ်းႁူဝ်ၵမ်းလဵဝ်သေ ထူၺ်ႈၸႂ်လူင်မႃးယူႇ။
“ဢမ်ႇႁူႉလႄႈမႃးၼၼ်ႉၼႃႇ…ၵႂင်တၢင်းသေမႃးၵူၺ်းဢိူဝ်ႈ”
ၵွပ်ႈပဵၼ်ၶၢဝ်းၵၢင်ဝၼ်းၸၢႆႉၸိူၼ်းၸမ်ႁူင်ႈလူင်းလိၼ်ယဝ်ႉလႄႈ လႅင်းမိူင်းသႂ်ၸင်ႇၸူဝ်းၶမ်းလၢဝ်ၵႂႃႇပႆလဵၼ်ႈၸွမ်းၼႂ်းဝၢၼ်ႈၼၼ်ႉယူႇ။ ၶမ်းလၢဝ်ၼၼ်ႉၵေႃႈ ႁၼ်တၢင်းလိၼ်ဢၼ် မီးၼမ်ႉၸိုဝ်ႉၸႃႉယူႇၸိူဝ်းၼၼ်ႉ သမ်ႉပေႃးဢမ်ႇၶႂ်ႈလူင်းႁိူၼ်းသေဢိတ်းယဝ်ႉ။ လႅင်းမိူင်းသႂ်ၸင်ႇဝႃႈၸူးမၼ်း
“မႃးႁႃၵူဝ်ၵူမ်ႇယူႇ ဝူၼ်ႉထိုင်ဢၼ်ၵႂႃႇၼွၼ်းယူႇၼႂ်းၵူမ်ႇဝၼ်းၼၼ်ႉၽွင်ႈလႄႈ” လႅင်းမိူင်းသႂ် မႄးတဝ်ႉဢႅဝ်မၼ်းၼၼ်ႉသေ သိုပ်ႇလၢတ်ႈထႅင်ႈ “မွင်းလၢတ်ႈမႃးၵေႃႈ ၸွမ်းဢႅင်ႈၸွမ်းဢႅဝ်ၸွမ်းသၼ်လင်ၸိူဝ်းၼႆႉ သမ်ႉပေႃးၶိုၼ်ႈလူင်ၵႂႃႇမူတ်းယဝ်ႉ”
ၶမ်းလၢဝ်ၼၼ်ႉ ယၵ်ႉတူၺ်းၸူးမၼ်းၵႂႃႇ ဝူၼ်ႉႁၼ်ၶိုၼ်း ဝၼ်းဢၼ်မၼ်းၼွၼ်းယူႇၼႂ်းၵူမ်ႇၼၼ်ႉ တေလုၵ်ႉၵေႃႈဢမ်ႇၸၢင်ႈ ၸဵပ်းၵေႃႈၸဵပ်း လႆႈၶၢမ်ႇလူမ်းၶၢမ်ႇၽူၼ် ၼမ်ႉၵူမ်ႇၼမ်ႉလိၼ် လူၵ်ႈထွင်းၼွင်းသႂ်ႇတူဝ်မၼ်း ဝၼ်းၼၼ်ႉ မိူၼ်ဢၢပ်ႈတေၼွင်းလူင်ၵႂႃႇၸွမ်းၼမ်ႉလူးၵွၼ်ႇ မၼ်းသမ်ႉပေႃးလႆႈပွႆႇၸႂ်မၼ်း ႁႂ်ႈတၢႆၵႂႃႇသေလႃႈၼႆၵွၼ်ႇယဝ်ႉ၊ ဢမ်ႇထၢင်ႇဝႃႈ တေလႆႈငိၼ်းသဵင်ႁွင်ႉသႅၼ်ႇ ၼၢႆးလႄႈလႅင်းမိူင်းသႂ်ၼၼ်ႉ ႁွင်ႉမေႃးမႃး မိူၼ်သိုပ်ႇပၼ်သၢႆၸႂ် ႁႂ်ႈမၼ်းလုၵ်ႉတိုၼ်ႇၶိုၼ်ႈမႃးၶိုၼ်း ၼၼ်ႉယဝ်ႉ။
“ၵဝ်ၶႂ်ႈမီးသၢႆၸႂ်ယူႇ ယွၼ်ႉသင်လႃႇ!” လၢတ်ႈဢွၵ်ႇမႃးလွႆးလွႆးယူႇႁင်းၵူၺ်းယဝ်ႉ ၸင်ႇၶိုၼ်းလၢတ်ႈၸူးလႅင်းမိူင်းသႂ်
“ဢိူဝ်ႈ..ၵႂႃႇၵေႃႈၵႂႃႇလႄႈ…”
သွင်ၶႃၼၼ်ႉၵေႃႈ ယၢင်ႈႁၢင်ႇယၢင်ႈႁိင်ႇၶၢမ်ႈႁွင်ႈၶၢမ်ႈၼမ်ႉလူင်ၵႂႃႇ တေႃႇပေႃးႁွတ်ႈထိုင်တၢင်းတူၵ်းဝၢၼ်ႈ ဢၼ်မီးႁူင်းႁဵၼ်းယွၵ်းၽင်ႉယူႇလင်ၼိုင်ႈ တင်ႈယူႇတုၵ်းသုၵ်းႁင်းမၼ်း၊ မီးၶီႈဝူဝ်းၶီႈၵႂၢႆး ႁူၵ်ႉႁၢမ်း ပေႃးတဵမ်လူင်ဝႆႉၼၼ်ႉ။
“ဢွၼ်မႃးတၢင်းၼႆႉႁဵတ်းသင်လႃႇ ဢမ်ႇႁၼ်မီးသင်လူး”
“ပီႈဢမ်ႇၶႂ်ႈႁူႉႁႃႉ ႁိူၼ်းမုင်းလဵၵ်းဢၼ်မီးယူႇၼႂ်းဝၢင်းႁူဝ်ႉၼၼ်ႉပဵၼ်သင်ၼႆ”
“မၼ်းၵေႃႈပဵၼ်ႁိူၼ်းႁၢမ်းၵူၺ်းဢမ်ႇၸႂ်ႈႁိုဝ် ပဵၼ်သင်လႄႈၵႂႃႇႁဵတ်းၵႆပိူၼ်ႈထိုင်တၢၼ်ႇၼၼ်ႉလႃႇ”
“မၼ်းဢမ်ႇၸႂ်ႈႁိူၼ်းႁၢမ်းလေႃႇ မၼ်းပဵၼ်ႁူင်းႁဵၼ်းဢၼ်ႁၢမ်းဝႆႉၼၼ်ႉယဝ်ႉ”
ယၢမ်းၼၼ်ႉ ၸင်ႇမီးလုၵ်ႈဢွၼ်ႇသွင်သၢမ်ၵေႃႉ ၶီႇၵႂၢႆးသေပႆလဵပ်ႈမႃးႁိမ်းၼၼ်ႉလႄႈ သိုပ်ႇပႆၽႅတ်ႈလူင်ၵႂႃႇတၢင်းၼႃႈၶႃၸုၵ်းဝႆႉၼၼ်ႉ ၽုင်ဝူဝ်းၽုင်ၵႂၢႆးလူင်ၼၼ်ႉၵေႃႈ ပႆသိုင်ႉပႆသင်ႉလူင်ၵႂႃႇၸွမ်းၶဝ်၊ ၶမ်းလၢဝ်ၼၼ်ႉၵေႃႈ လႆႈယၵ်ႉမိူၼ်ႇမိုင်တူၺ်းၵႂႃႇၸွမ်းလုၵ်ႈဢွၼ်ႇဢၼ်ၶီႇၼိူဝ်လင်ၵႂၢႆးၼၼ်ႉယူႇယဝ်ႉ။
“ႁူၺ်ႉ!!ႁူၺ်ႉ..”
ၸင်ႇသမ်ႉငိၼ်းသဵင်မေႃးႁွင်ႉမႃး တၢင်းလင်ၽုင်ဝူဝ်းၽုင်ၵႂၢႆးၸိူဝ်းၼၼ်ႉထႅင်ႈ ႁၼ်လုၵ်ႈဢွၼ်ႇ သၢမ်သီႇၵေႃႉ ပႆလိုပ်ႈလမ်း ဝူဝ်းၶဝ်ၵႂၢႆးၶဝ်ၸွမ်းႁိမ်းႁူဝ်ႉႁူင်းႁဵၼ်းၸိူဝ်းၼၼ်ႉယူႇ။ ၶမ်းလၢဝ်ဢၼ်လႆႈႁၼ်ၼင်ႇၼၼ် သမ်ႉပေႃးၸိူဝ်ႈတႃမၼ်းတူၺ်းလူင်ၵႂႃႇ ပေႃးဢမ်ႇႁူႉဝႃႈၵႂၢႆးတေမႃးၽႃႇမၼ်း လႅင်းမိူင်းသႂ်သမ်ႉပေႃးလႆႈၸၼ်ၶႅၼ်မၼ်းသုတ်ႉဢွၵ်ႇပၢႆႈယဝ်ႉ။
ၸွမ်းၼင်ႇမၼ်းလႆႈႁဵၼ်းမႃးၼႂ်းပပ်ႉလိၵ်ႈတႆး ဢၼ်ဢူႈၶဝ် ၵႆႉၸႂ်ႉမၼ်းဢၢၼ်ႇမိူဝ်ႈလဵၵ်ႉလဵၵ်ႉၼၼ်ႉဝႃႈ “လုၵ်ႈဢွၼ်ႇလဵင်ႉဝူဝ်းၵႂၢႆး ၵူႈဝၼ်းငၢႆးၶဝ်ႈႁူၺ်ႈ၊ ၶူဝ်းယွၵ်းၵူဝ်ႈလိၼ်ၶွၼ်ႇ ၼုင်ႈၸဵမ်ၵွၼ်ႇမဵၼ်ၶႆး၊ တၢၵ်ႇလႅတ်ႇယဝ်ႉယမ်းၽူၼ် သိူဝ်ႈတင်းၵူၼ်ၵဝ်ႇသဝ်ႈ…” ၼႆၼၼ်ႉ မၼ်းၸင်ႇလႆႈမႃးႁူႉထိုင်လႆႈဝၼ်းမိူဝ်ႈၼႆႉၵူၺ်းလႄႈ ႁူင်းႁဵၼ်းလႄႈ ၽုင်ဝူဝ်းၽုင်ၵႂၢႆး လုၵ်ႈဢွၼ်ႇဢၼ်ၶီႇၼိူဝ်လင်ၵႂၢႆး လိုပ်ႈလမ်းၵႂၢႆးၽႅတ်ႈၵႂႃႇပႃႈၼႃႈမၼ်းယူႇၸိူင်ႉၼၼ်ၼၼ်ႉ ဢဝ်မၼ်းဢိုၵ်ႉၼိုၵ်ႉထိုင်ၸႂ်မႃး သမ်ႉပေႃးဢမ်ႇၸၢင်ႈလၢတ်ႈၵႂၢမ်းသင်လႆႈသေဢိတ်းယဝ်ႉ။
လႅင်းမိူင်းသႂ်ၵေႃႈ ႁႅၼ်မုင်ႈတူၺ်းၵႂႃႇတၢင်းလုၵ်ႈၵၢင်ဝၼ်း ဢၼ်လပ်ႉလိၼ်မိူင်းၵႂႃႇၼၼ်ႉယဝ်ႉသေ မိုင်ယၵ်ႉၸူးၶမ်းလၢဝ်ယဝ်ႉၵေႃႈ
“ပီႈၼၢင်း..ၵၢင်ဝၼ်းတူၵ်းၵႂႃႇယဝ်ႉ ၵႂႃႇလႄႈႁဝ်းမိူဝ်း”
ၶမ်းလၢဝ်မိူဝ်းႁွတ်ႈထိုင်ႁိူၼ်းယဝ်ႉ ပဵၼ်ႁိုဝ်မီးႁိုဝ်ၵေႃႈ သမ်ႉပေႃးဢမ်ႇသူပ်းဢမ်ႇသဵင်သင်သေဢိတ်း၊ မိူဝ်းၼွၼ်းၼိမ်ယဵၼ်ယူႇႁင်းမၼ်းၼႂ်းၽႃႈၼၼ်ႉၵႂႃႇယဝ်ႉ။ ၼၢႆးၸင်ႇတၵ်းၵွၼ်ႉဢဝ်ၶဝ်ႈၵႂႃႇပၼ်မၼ်းယူႇ လႆႈႁၼ်မၼ်းပိူင်ႈမႃးၸိူင်ႉၼၼ်ၵေႃႈ ၸင်ႇလႆႈထၢမ်လႅင်းမိူင်းသႂ်ၵႂႃႇ
“ၸၢႆး..ဢေးယိင်းမၼ်းပဵၼ်ႁင်ၵႂႃႇထႅင်ႈယဝ်ႉလႃႇ ႁွင်ႉၵႂႃႇထွင်းလူမ်းႁေ ယိုင်ႈၶႅၼ်းဢမ်ႇယူႇလီမႃးထႅင်ႈယူဝ်ႉ ႁၼ်မၼ်းငဝ်ငဝ်ဝႆႉ”
“မိူဝ်ႈႁႃးဢွၵ်ႇၵႂႃႇၼၼ်ႉတႄႉဢမ်ႇငဝ်ၼင်ႇၵဝ်ႇ ၽိူဝ်ႇမၼ်းၵႂႃႇႁၼ်ၽုင်ၵႂၢႆးယဝ်ႉၵေႃႈ ဢဝ်ပဵၼ်ၼၼ်မႃးၶႃႈဢေႃႈ မၼ်းတေၵူဝ်ၵႂၢႆးၶႃႈယူဝ်ႉၼၢႆးဝႃႈ”
မိူဝ်ႈၶႃၼၢႆးလၢၼ်တိုၵ်ႉဢုပ်ႇၵၼ်ယူႇၼၼ်ႉ ၸင်ႇသမ်ႉမီးၽူႈယိင်းၵေႃႉၼိုင်ႈ မႃးငွၵ်ႈသႂ်ႇတီႈၽၵ်းတူသွင်ႇၾႆးၼၼ်ႉသေယဝ်ႉ။
“ၼၢႆး…ၶႃႈဢဝ်ၶဝ်ႈၵၢပ်ႇတုင်မႃးပၼ်”
“ဢိူဝ်ႈ..ၸူမ်းယဝ်ႈ တမ်းဝႆႉၼိူဝ်ၽိူၼ်ၼႆႉလႄႈ”
ယိင်းၵေႃႉၼၼ်ႉၵေႃႈ ဢဝ်တမ်းသႂ်ႇၼိူဝ်ၽိူၼ်ၼၼ်ႉပၼ်ၶႃၵႂႃႇ။ ယိင်းၵေႃႉၼႆႉတႄႉၸိုဝ်ႈႁွင်ႉ သႅင်ၼူၼ်း ဢၼ်ယူႇတၢင်းၼႃႈႁိူၼ်းၼႆႉယဝ်ႉ။
“ၵိၼ်ၶဝ်ႈမႃးယဝ်ႉၶႃႈႁႃႉ” လႅင်းမိူင်းသႂ်ယၵ်ႉတူၺ်းၸူးယိင်းၵေႃႉၼၼ်ႉသေထၢမ်ယူႇ။
“ဢေႃႈပႆႇၵိၼ်ၶႃႈ တိုၵ်ႉၸွႆႈမႄႈႁဝ်းႁဵတ်းၶဝ်ႈၵၢပ်ႇႁေ ဢဝ်မႃးပၼ်ၼႆႉၵူၺ်းၶႃႈၼႃႇ”
“ႁဵတ်းၶႅၵ်ႇႁဝ်းၼႄႇ ၵိၼ်ၽၵ်းၵၢတ်ႇၸေႃးဝႃႇၼႆႉ”
“ၵိၼ်ဝၢၼ်ဝၢၼ်ၶႃႈ..” သႅင်ၼူၼ်းၵေႃႈ ဝၢႆႇသၢႆႉဝၢႆႇၶႂႃသေ တၵ်ႉထၢမ်ႁႃၶမ်းလၢဝ်ယူႇ
“ပီႈၶဝ်ၶႃႈလူးပဵၼ်ႁိုဝ်မႃးၶႃႈလႃႇ”
“မိူဝ်းတူၺ်းမၼ်းလႄႈ မီးယူႇၼႂ်းႁိူၼ်းၼၼ်ႉၼေႈ” ၼၢႆးၵေႃႈၸီႉၼႄသႅင်ၼူၼ်း ဢၼ်မီးၶမ်းလၢဝ်ယူႇၼႂ်းႁိူၼ်းၼၼ်ႉယဝ်ႉ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ
