တွၼ်ႈသိပ်းႁူၵ်း
မေႃသွၼ်လႄႈလုၵ်ႈႁဵၼ်းၶဝ် လႆႈႁူပ်ႉၺႃးၵၼ် ဝၼ်းထူၼ်ႈသွင်ယဝ်ႉၵႂႃႇ ဝၼ်းထူၼ်ႈသၢမ်ထိုင်မႃး ၶမ်းလၢဝ်တင်းလႅင်းမိူင်းသႂ်ၵေႃႈ မိူဝ်ႈဝႃးလႄႈမိူဝ်ႈၼႆႉ ၽႅၼ်ၵၢၼ်ႁဵၼ်းၶႃၼၼ်ႉ လႆႈမီးလွင်ႈလႅၵ်ႈလၢႆႈမႃးယူႇ၊ ဢိင်လူၺ်ႈသွၼ်လိၵ်ႈတႆးမဵဝ်းလဵဝ်လႄႈ သမ်ႉလႆႈသွၼ်ၵႂႃႇတၢင်းဝၼ်းတၢင်းဝၼ်း တင်းၵူၼ်းသွၼ်မၼ်း၊ တင်းလုၵ်ႈႁဵၼ်းမၼ်းၵေႃႈ မိူၼ်ႁၢင်ႈလႅပ်ႈၶၢၼ်ႉၼႃႇၼႆသေ ပွတ်းဝၢႆးဝၼ်းၼၼ်ႉ ၶႃၵေႃႈ လႆႈသွၼ်ပၢႆးၼပ်ႉၵႂႃႇၸွမ်း ယူႇယဝ်ႉ။ လုၵ်ႈႁဵၼ်းလႄႈတင်းမေႃသွၼ် ၵုမ်ႇမိုင်ႉသွၼ်ႁဵၼ်းၵၼ်ၵႂႃႇၵူၺ်း ဢမ်ႇတၼ်းႁူႉသင် သမ်ႉပေႃးထိုင်ၶၢဝ်းယၢမ်းပွၵ်ႈ ယူႇယဝ်ႉ၊ ဝၼ်းမိူဝ်ႈၼႆႉၵေႃႈ လႆႈသုတ်းသဵင်ႈၵႂႃႇထႅင်ႈဝၼ်းၼိုင်ႈယူႇ။
ထိုင်မႃးထႅင်ႈဝၼ်းၼိုင်ႈ ယၢမ်းၵၢင်ၼႂ် ၾူၼ်သိင်းၼႃႇလႄႈ လုၵ်ႈႁဵၼ်းၶဝ် ဢွၼ်ၵၼ်ဢမ်ႇမႃးႁူင်းႁဵၼ်းၼမ်ဝႆႉ၊ မၢင်ၸိူဝ်းယူႇၵႆလႄႈ လႆႈမႃးတူၵ်းလိုၼ်းၵေႃႈမီး။ ၶႂ်ႈဝႃႈ လုၵ်ႈဢွၼ်ႇႁဵၼ်းၶဝ် ၶၢတ်ႇၵႂႃႇမွၵ်ႈ သီႇပုၼ်ႈၼိုင်ႈပုၼ်ႈၼႆႉယူႇ။
တီႈၼႂ်းႁူင်းႁဵၼ်းၼၼ်ႉ သမ်ႉဝႃႈတေပဵၼ်ႁူင်းႁဵၼ်းမႂ်ႇသေတႃႉ ပဵၼ်ႁူင်းႁဵၼ်းဢၼ်ၵိုၵ်းပိုၼ်ႉလိၼ် ဢမ်ႇမီးႁၢၼ်ႉသိူဝ်ႇ မီးၽိူၼ်မႆႉမွင် မီးတင်ႇၼင်ႈမႆႉမွင်ဢွၼ်ႇၵူၺ်းလႄႈ ၽႃမၼ်းၵေႃႈႁႄႉၵင်ႈလူၺ်ႈမႆႉမွင် ဢမ်ႇၸႂ်ႈၽႃသၢၼ် ၵူၺ်းပဵၼ်ၽႃၽၢၵ်ႈသေမႃးၵင်ႈၵူၺ်း၊ မိူဝ်ႈၽွင်းၾူၼ်သိင်းၼၼ်ႉ မၼ်းၵေႃႈလႆႈသိင်းၶဝ်ႈမႃးၼႂ်းႁူင်းႁဵၼ်းပႃးယဝ်ႉ၊ တီႈယူႇလုၵ်ႈႁဵၼ်း ဢၼ်ယူႇၸပ်းၽႃႁူင်းႁဵၼ်းၼၼ်ႉၵေႃႈ သမ်ႉပေႃးလႆႈၶၢႆႉတီႈၵႂႃႇ၊ လိူဝ်သေၾူၼ်သိင်းယဝ်ႉ ၼမ်ႉၾူၼ်လူင် ဢၼ်လႆဢမ်ႇထၢတ်ႇဢမ်ႇဝၢႆးၼၼ်ႉၵေႃႈ ၵွႆႈယူႇႁိုင် ႁွင်ႈၼမ်ႉဢၼ်လႆၸွမ်းႁွင်ႇၸၢႆးၶႃးၼၼ်ႉ ယိုင်ႈသုင်မႃးတိၵ်းတိၵ်းလႄႈ လူၼ်ႉဢိူင်းၶဝ်ႈၵႂႃႇၼႂ်းႁူင်းႁဵၼ်း ပေႃးယမ်းၵႂႃႇမူတ်းယဝ်ႉ၊ ၵူၼ်းၼမ်ၵူၼ်းလၢႆ ဢမ်ႇၸၢင်ႈႁဵတ်းႁိုဝ် ယူႇလႆႈၸိူင်ႉႁိုဝ်ၵေႃႈ ၵႃႈလႆႈယူႇၵႂႃႇၸိူင်ႉၼၼ်ၵူၺ်း။
ဝၢႆးဝၼ်းမႃး ၼႂ်းႁူင်းႁဵၼ်းၼၼ်ႉ ဢမ်ႇၸၢင်ႈယူႇသေဢိတ်းယဝ်ႉလႄႈ တေသိုပ်ႇသွၼ်လိၵ်ႈၼႆၵေႃႈ ဢမ်ႇၸၢင်ႈသွၼ်လႆႈလီလီယဝ်ႉ၊ ၶမ်းလၢဝ်ၶႃလႅင်းမိူင်းသႂ် လႆႈပွႆႇလုၵ်ႈႁဵၼ်းၶဝ်မိူဝ်းၵႂႃႇၸဵမ်ၸဝ်ႉ၊ သင်ၸိူဝ်ႉဝႃႈၾူၼ်တူၵ်းယူႇၸိူင်ႉၼႆတိၵ်းတိၵ်းတႄႉ တႃႇတေမႄးတီႈယူႇတီႈသဝ်း ၼႂ်းႁူင်းႁဵၼ်းၼႆၵေႃႈပဵၼ်ယၢပ်ႇလႄႈ တႃႇလုၵ်ႈႁဵၼ်းပေႃးတေလႆႈသွၼ်လိၵ်ႈလီလီၼၼ်ႉၵေႃႈ ယၢပ်ႇယူႇမိူၼ်ၵၼ်ၼႆသေ ပေႃးၾူၼ်တူၵ်းယူႇတႄႉၵေႃႈ ဢမ်ႇပၼ်ႁႂ်ႈလုၵ်ႈႁဵၼ်းမႃးႁူင်းႁဵၼ်းယဝ်ႉ လၢတ်ႈသင်ႇပၼ်လုၵ်ႈႁဵၼ်းၶႃၵႂႃႇယူႇ။
မိူဝ်ႈၾူၼ်တူၵ်းၸိူင်ႉၼႆ မႆႈၸႂ်လုၵ်ႈႁဵၼ်းၵေႃႈၸႂ်ႈ မေႃသွၼ်မၼ်းၵေႃႈ သမ်ႉၶၢၼ်ႉဢွၵ်ႇႁိူၼ်းၵေႃႈပႃး ၸင်ႇလႆႈပိၵ်ႉႁူင်းႁဵၼ်းၵႂႃႇၸူဝ်ႈၶၢဝ်းၼႆၼၼ်ႉၼႃႇ။
လုၵ်ႈဢွၼ်ႇၶဝ်ၵေႃႈ မိူဝ်ႈလႆႈပွၵ်ႈမိူဝ်းၸဝ်ႉၸိူင်ႉၼၼ် ၵမ်ႈၽွင်ႈၵေႃႈၸူမ်းၸူမ်းသိူဝ်းသိူဝ်း သမ်ႉပေႃးၶႂ်ႈႁႂ်ႈၾူၼ်တူၵ်းႁေလိူၼ်ယဝ်ႉ။ လုၵ်ႉတီႈဝၢၼ်ႈဢုင် မိူဝ်းၵႂႃႇတၢင်းဝၢၼ်ႈၶၢႆးမူဝ်ၼၼ်ႉ တေလႆႈလတ်းၶၢမ်ႈၶူဝ်ၼမ်ႉမႄႈၼိုင်ႈ ႁိမ်းဝၢၼ်ႈဢုင်ၼၼ်ႉယူႇ။
ၵူၺ်းၵႃႈ ၶူဝ်တီႈၼၼ်ႈသမ်ႉလႆႈၵွႆဝႆႉ ဢမ်ႇပႆႇလႆႈမႄး၊ ၵူႈပွၵ်ႈတႄႉပေႃးလူင်းႁူင်းႁဵၼ်းမိူဝ်းၼႆ ပေႃႈမႄႈၶဝ် တေမႃးႁပ်ႉယဝ်ႉ၊ ၵူၺ်းၵႃႈ ပွၵ်ႈၼႆႉ ၶဝ်သမ်ႉဢွၼ်ၵၼ်မိူဝ်းႁင်းၵူၺ်းလႄႈ ဢမ်ႇမီးၵူၼ်းလူင်ၸွမ်းမိူဝ်းသေၵေႃႉ တႃႇတေၶၢမ်ႈၼမ်ႉၼၼ်ႉၵေႃႈ သမ်ႉဢမ်ႇမီးၽႂ်ဢွၼ်၊ ၸွမ်းၼင်ႇဢၼ်ယၢမ်ႈၶၢမ်ႈမႃးတႃႇသေႇၼၼ်ႉ လႆႈဢွၼ်ၵၼ် လတ်းၶၢမ်ႈၵႂႃႇၸွမ်းၵၼ်လွႆးလွႆး ၵူၺ်းၵႃႈ မိူဝ်ႈၼႆႉၾူၼ်တူၵ်းႁႅင်းလႄႈ ၼမ်ႉၵေႃႈၶိုၼ်ႈသုင်ႁႅင်းဝႆႉယဝ်ႉ။
ၸၢႆးဢွၼ်ႇၵေႃႉၼိုင်ႈ လႆႈၶၢမ်ႈၵႂႃႇဢွၼ်တၢင်းပိူၼ်ႈသေ မိူဝ်ႈႁွတ်ႈထိုင်ၼႂ်းၵၢင်ၼမ်ႉၼၼ်ႉ ၼမ်ႉၵေႃႈသမ်ႉပေႃးပဵင်းၶေႃးမၼ်းၵႂႃႇယဝ်ႉ မိူဝ်ႈမၼ်းတိုၵ်ႉဝိၼ်ႇဝၢႆႇ ႁွင်ႉလၢတ်ႈၵူၼ်းတၢင်းလင်ၶဝ်ၵႂႃႇ “ၼမ်ႉလိုၵ်ႉၼႃႇဢိူဝ်ႈ!” ၼႆၵူၺ်း ႁႅင်းၼမ်ႉသမ်ႉပေႃးၽတ်ႉထွင်းမၼ်းလႆလွင်ႈလူင်းၵႂႃႇယူႇ။
ၸိူဝ်းပဵၼ်လုၵ်ႈဢွၼ်ႇ ယူႇပႃႈလင်သေႁၼ်ၼင်ႇၼၼ် ၵမ်ႈၽွင်ႈၵေႃႈႁွင်ႉၸွမ်း၊ ၵမ်ႈၽွင်ႈၵေႃႈႁွင်ႉႁႆႈ ၵမ်ႈၽွင်ႈၵေႃႈႁႂ်ႈၵၼ်မႃးလၢတ်ႈၼႄမေႃသွၼ်ယူႇ။ ၽွင်းၶမ်းလၢဝ်လႄႈလႅင်းမိူင်းသႂ် တေဢွၼ်ၵၼ်ပွၵ်ႈမိူဝ်းႁိူၼ်းၵႂႃႇၼၼ်ႉ ၸင်ႇမီးလုၵ်ႈႁဵၼ်းၵေႃႉၼိုင်ႈ မႃးႁွင်ႉၶႃတၢင်းၼႃႈႁူင်းႁဵၼ်း
“မေႃသွၼ်!!..ဢၢႆႈၸွမ်လွင်ႈၼမ်ႉ” တင်းသဵင်ႁႅင်ႈသဵင်ႁႅပ်ႇသေ သမ်ႉဢမ်ႇပေႃးငိၼ်းၶေႃႈမၼ်းလီလႄႈ ၶမ်းလၢဝ်လႆႈမႄးထၢမ်ၶိုၼ်း။
“ပဵၼ်ႁင်ၵေႃ!!”
“ဢၢႆႈၸွမ်လွင်ႈၼမ်ႉဢေႃႈ!!”
ၶမ်းလၢဝ်ၼၼ်ႉၵေႃႈ သမ်ႉပေႃးဢဝ်ထူင်မၼ်းတူၵ်းၵႂႃႇသေယဝ်ႉ ၼႅတ်ႈဢႅၼ်ႇလႅၼ်ႈၵႂႃႇၸွမ်းလုၵ်ႈဢွၼ်ႇၵေႃႉၼၼ်ႉၵမ်းလဵဝ်ယူႇ၊ လႅင်းမိူင်းသႂ်ၵေႃႈ ၼႅတ်ႈလမ်းၵႂႃႇၸွမ်းယဝ်ႉ။ တီႈၶူဝ်ၼၼ်ႉ ဢမ်ႇပေႃးၵႆႁူင်းႁဵၼ်းၵႃႈႁိုဝ် ပေႃးလႅၼ်ႈဢဝ်ၵေႃႈ တေမီးယူႇမွၵ်ႈ 7 မိၼိတ်ႉၼႆႉၵူၺ်း ယူႇယဝ်ႉ။
ၶမ်းလၢဝ် ႁွတ်ႈထိုင်ၵႂႃႇတီႈၼၼ်ႈၵေႃႈ ၸင်ႇတေႁူႉတူဝ်ဝႃႈ မၼ်းၼၼ်ႉ ဢမ်ႇမေႃလုၺ်းၼမ်ႉၼႆလႄႈ ဢမ်ႇၸၢင်ႈႁဵတ်းႁိုဝ် ၵႃႈလႆႈႁႂ်ႈလႅင်းမိူင်းသႂ်ၵေႃႉလူင်းယဝ်ႉ။ ပွတ်းတီႈၶၢမ်ႈၶူဝ်ၼၼ်ႉတႄႉ ၼမ်ႉဢမ်ႇပေႃးလိုၵ်ႉၵႃႈႁိုဝ် ၵူၺ်းၵႃႈလုၵ်ႈဢွၼ်ႇတႄႉ တေထူမ်ႈႁူဝ်ၶဝ်ယူႇ၊ ၼမ်ႉသမ်ႉၶႂ်ႈႁႅင်းဝႆႉၼၼ်ႉယဝ်ႉ၊ ပွတ်းၽၢႆႇတၢင်းတႂ်ႈမၼ်းၼၼ်ႉတႄႉ မၢင်တီႈၵေႃႈလိုၵ်ႉဝႆႉၵျႃႉၵျႃႉၼင်ႇၵဝ်ႇ။
ၶမ်းလၢဝ်ၵေႃႈ သမ်ႉဝႃႈဢမ်ႇမေႃလုၺ်းၼမ်ႉသေတႃႉ မၼ်းၼၼ်ႉတႄႉၵေႃႈ ၶတ်းၸႂ်ဢႅၼ်ႇလႅၼ်ႈၵႂႃႇၸွမ်းၽင်ႇႁွင်ႈၼမ်ႉၼၼ်ႉတိၵ်းတိၵ်းယူႇ။ မၢင်တီႈဢမ်ႇၸၢင်ႈၵႂႃႇ ပဵၼ်မၢၵ်ႇႁိၼ်မၢၵ်ႇၽႃၼႆၵေႃႈ ၶတ်းၸႂ်ၵွပ်ႈၸွမ်းၵႂႃႇ တိၼ်ပေႃးသၼ်ႇတိုၼ်းတိုၼ်းယဝ်ႉ ၵွပ်ႈမၼ်းမိုၼ်ႈၼႃႇ ၵူဝ်ပလၢတ်ႈတူၵ်းၼမ်ႉၵေႃႈပႃး။
တင်းသဵင်ၾူၼ်သဵင်ၼမ်ႉၼၼ်ႉႁေ သမ်ႉဝႃႈမၼ်းၶတ်းၸႂ်ႁွင်ႉယူႇသေတႃႉၵေႃႈ ဢမ်ႇမီးၽႂ်တွပ်ႇမၼ်းၶိုၼ်းလႄႈ ၽႂ်ၵေႃႈလႅပ်ႈတေဢမ်ႇငိၼ်းသဵင်မၼ်းမိူၼ်ၵၼ်။ မၼ်းၵေႃႈ ၵႃႈဢမ်ႇႁၼ်ၽႂ်ႁေၼၼ်ႉ ပႆလူင်လူင်းၵႂႃႇတိၵ်းတိၵ်းယူႇ သမ်ႉပေႃးဢမ်ႇတၼ်းႁူႉတၼ်းႁၼ်သင် ႁွတ်ႈၵႂႃႇတီႈႁူဝ်တၢတ်ႇ ဢၼ်ပဵၼ်လၢၼ်းၽႃယၢဝ်းယူႇမွၵ်ႈ သွင်ၸူဝ်ႈၵူၼ်းၼႆႉ ၼမ်ႉၵေႃႈလႅပ်ႈတေၶႂ်ႈလိုၵ်ႉဝႆႉ။ လုၵ်ႉတီႈၼၼ်ႈ မုင်ႈႁၼ်ၵႂႃႇၶူဝ်ၶၢမ်ႈၼမ်ႉ မိူဝ်းတၢင်းဝၢၼ်ႈၶုမ်ႇၼၼ်ႉယဝ်ႉ။
ၽွင်းၼၼ်ႉသမ်ႉ လႆႈႁၼ်ၵူၼ်းတႆႇၶိုၼ်ႈၶူဝ်မႃးသေ မၼ်းၵေႃႈသႅၼ်ႇႁွင်ႉၸူး
“ႁိူၺ်ႉ!!… ႁိူၺ်ႉ!!!” သမ်ႉဝႃႈႁွင်ႉလင်တၢၼ်ႇႁိုဝ်ၵေႃႈ ဢမ်ႇႁၼ်ဝႃႈတေလႆႈငိၼ်းသဵင်တုမ်ႉတွပ်ႇၶိုၼ်း ၵွပ်ႈပိူဝ်ႈသဵင်ၼမ်ႉလင်ႁႅင်းၼႃႇ။ မၼ်းၵေႃႈ ၵူဝ်ဢမ်ႇတၼ်းၶိုတ်းလႄႈ တင်းႁိပ်ႈတင်းႁွင်ႉလူင်ၵႂႃႇ သမ်ႉပေႃးပလၢတ်ႈသလုတ်ႈတူၵ်းတၢတ်ႇၸူမ်လူင်းၵႂႃႇၼႂ်းၼမ်ႉၼၼ်ႉယဝ်ႉ။
ၽၢႆႇတၢင်းလႅင်းမိူင်းသႂ်ၼၼ်ႉၵေႃႈ ၽွင်းတိုၵ်ႉၸွမ်းႁႃၸၢႆးၸွမ်လွင်ႈၼမ်ႉယူႇၼၼ်ႉ ၵေႃႉပဵၼ်ၸၢႆးၸွမ်ၵေႃႈ ပႆၶိုၼ်ႈၸွမ်းၽင်ႇၽၢႆႇပုၼ်ႉၼမ်ႉသေမႃးႁႃၶဝ်ၶိုၼ်းယဝ်ႉ။ သမ်ႉဝႃႈႁႅင်းၼမ်ႉထွင်းမၼ်းလူင်းႁႅင်းသေတႃႉ မၼ်းၵေႃႈ ၶတ်းၸႂ်လူၺ်းၶၢမ်ႈၽင်ႇၵႂႃႇ ႁႂ်ႈပေႃးပူၼ်ႉလႆႈသေ ၶိုၼ်းၵႂႃႇယူႇၽၢႆႇပုၼ်ႉၽင်ႇ ဢၼ်မုင်ႈႁၼ်ဢူၺ်းၵေႃႉမၼ်း ပႂ်ႉပေႃးသႅမ်းယူႇလႄႈ
“ႁိူၺ်ႉ!! ၵဝ်မီးတီႈၼႆႈဢိူဝ်ႈ!”
လုၵ်ႈဢွၼ်ႇၶဝ် ႁူမ်ႈပႃးလႅင်းမိူင်းသႂ် လႆႈႁၼ်ၼင်ႇၼၼ်ၵေႃႈ ဢွၼ်ၵၼ်ၸူမ်းသိူဝ်းမႃးၸွမ်းၵၼ် ယူႇယဝ်ႉ။ လုၵ်ႈဢွၼ်ႇၸိူဝ်းမေႃလုၺ်းၼမ်ႉၼႆၵေႃႈ ၵမ်ႈၽွင်ႈၵေႃႈလုၺ်းၶၢမ်ႈၵႂႃႇယဝ်ႉ၊ ၸိူဝ်းၵေႃႉလဵၵ်ႉႁႅင်းၼႃႇၼၼ်ႉ လႅင်းမိူင်းသႂ်ၵေႃႈ တဵင်ႇၶေႃးမၼ်းဢဝ်ၶၢမ်ႈၵႂႃႇ ပႂ်ႉတူၺ်းၶဝ်မိူဝ်းတေႃႇပေႃးပူၼ်ႉသၢႆတႃယူႇယဝ်ႉ။ တၢင်းမိူဝ်းဝၢၼ်ႈၶၢႆးမူဝ်ၼၼ်ႉ တေမီးတၢင်းၼမ်ႉ လႄႈ တၢင်းလွႆယဝ်ႉ၊ ပေႃးၶၢဝ်းႁိုဝ်ႉၶၢဝ်းၾူၼ်ၼႆ ၶဝ်ၵေႃႈ တေဢမ်ႇၵႂႃႇတၢင်းၼမ်ႉ တေဢွၼ်ၵၼ်ၵႂႃႇတၢင်းလွႆ။
သမ်ႉဝႃႈၼမ်ႉဢမ်ႇလိုၵ်ႉသေတႃႉ လႅင်းမိူင်းသႂ်ၵေႃႈၸွမ်းလူၺ်ႈလွင်ႈမႆႈၸႂ်သေ ဢွၼ်ဢဝ်လုၵ်ႈဢွၼ်ႇၶဝ် ၶီႇၶေႃးမၼ်းၶၢမ်ႈၵႂႃႇၵမ်းၵေႃႉၵမ်းၵေႃႉ မၢင်ၵေႃႉမေႃလုၺ်းၼမ်ႉၵေႃႈ ပၼ်ၶဝ်လူၺ်းၶၢမ်ႈၵႂႃႇသေ သူင်ႇၶဝ်မိူဝ်းၵႂႃႇတေႃႇပေႃးပူၼ်ႉၼမ်ႉမူတ်းယူႇ။ ၼမ်ႉႁႅင်းၼႃႇၸိူင်ႉၼႆ တွၼ်ႈတႃႇတေမိူဝ်းၸွမ်းသဵၼ်ႈတၢင်းၼမ်ႉၼၼ်ႉ ဢမ်ႇပေႃးလွတ်ႈၽေးလႄႈ လႅင်းမိူင်းသႂ်ၵေႃႈ ႁႂ်ႈၶဝ်ၶိုၼ်ႈမိူဝ်းၵႂႃႇၸွမ်းတၢင်းလွႆဢဝ်ယူႇယဝ်ႉ။ မိူဝ်ႈလုၵ်ႈဢွၼ်ႇၶဝ်ပွၵ်ႈမိူဝ်း မၼ်းၸင်ႇတေႁူႉဝႃႈ ၶမ်းလၢဝ်ၼၼ်ႉ ဢမ်ႇမီးတီႈၼၼ်ႈ ၼင်ႇဢၼ်မၼ်းတွင်းလႆႈ ႁၼ်ၶမ်းလၢဝ်လူင်းၸွမ်းႁွင်ႈၼမ်ႉၼႆလႄႈ မၼ်းၵေႃႈၼႅတ်ႈလႅၼ်ႈၸွမ်းၶႆႈၵႂႃႇယူႇ။
မိူဝ်ႈႁွတ်ႈထိုင်တီႈတၢတ်ႇ ၽၢႆႇတႂ်ႈတၢတ်ႇႁိမ်းႁွင်ႈၼမ်ႉၼၼ်ႉၵေႃႈ လႆႈႁၼ်ၶမ်းလၢဝ်ၼွၼ်းယူႇလႄႈ ၽူႈၸၢႆးၵေႃႉၼိုင်ႈၵူမ်ႈသႂ်ႇၼႃႈၶမ်းလၢဝ်ယူႇသေ ပဵၼ်ႁၢင်ႈဢၼ်ႁၼ်ယဝ်ႉ ဢမ်ႇထုၵ်ႇတႃၵႃႈႁိုဝ်
“ၼေႈ…ၼေႈ..ႁိုၺ်ႉ!!..ႁဵတ်းႁင်ၼၼ်ႉ!” တင်းႁွင်ႉတင်းပလၢတ်ႈတူၵ်းၼမ်ႉၵႂႃႇ မႅၼ်ႈၽွင်းသီႇသူပ်းၵူၼ်းၵေႃႉၼၼ်ႉ ပဝ်ႇသႂ်ႇသူပ်းၶမ်းလၢဝ်ၵႂႃႇယဝ်ႉ ၶမ်းလၢဝ်ၵေႃႈ ၵႅၼ်ႉၼမ်ႉဢွၵ်ႇမႃးသေ လႅင်းမိူင်းသႂ်ၵေႃႈ ၵၢၼ်းလူင်ၶိုၼ်ႈၽင်ႇၼမ်ႉမႃးၶိုၼ်းယူႇ။
“ႁိူၺ်ႉ!! ယူဝ်ဝႃႈပဵၼ်ၽႂ်…” လႅင်းမိူင်းသႂ်လၢတ်ႈ။
“မေႃယႃ တၼ်းမႃးမိူဝ်ႈလႂ်” ၶမ်းလၢဝ်ဢၼ်တိုၵ်ႉႁူႉတူဝ်မႃးၼၼ်ႉထၢမ်ၸူး ယူႇယဝ်ႉ။
“မႃးမိူဝ်ႈသူတူၵ်းလူင်းၵႂႃႇၼႂ်းၼမ်ႉၼၼ်ႉယဝ်ႉ!!”
“ယူဝ်ဝႃႈတေဢမ်ႇလွတ်ႈယဝ်ႉ… ဢၼ်ႁၼ်မိူဝ်ႈၵႆႈၼၼ်ႉ ပဵၼ်မေႃယႃႁႃႉ”
“ဢိုမ်ႈ!! မိူၼ်ငိၼ်းသဵင်ၵူၼ်းဝႆႉလႄႈ မုင်ႈမႃးၵေႃႈလႆႈႁၼ်သူပလၢတ်ႈတူၵ်းလူင်းၼမ်ႉၼၼ်ႉယိုင်”
ၶမ်းလၢဝ်ဝၢႆႇတူၺ်းလႅင်းမိူင်းသႂ်သေ “လုၵ်ႈဢွၼ်ႇၶဝ်လူး!!”
“ဢဝ်ၶၢမ်ႈၼမ်ႉမိူဝ်းယဝ်ႉ..” ယၵ်ႉတူၺ်းၼႃႈၶမ်းလၢဝ်သေ “ႁူႉယူႇဢမ်ႇမေႃလုၺ်းၼမ်ႉ ပဵၼ်သင်လႄႈမႃးႁင်းၵူၺ်းၸိူင်ႉၼႆ သင်ဢမ်ႇမီးပီႈမေႃမႃးၸွႆႈၶိုတ်း တေပဵၼ်ႁိုဝ်မႃးၼႆ ဢမ်ႇၶႂ်ႈဝူၼ်ႉယဝ်ႉ” တင်းလၢတ်ႈတင်းၸႂ်လမ်ပႃးယူႇ။
ၶဝ်သၢမ်ၵေႃႉၵေႃႈ ဢွၼ်ၵၼ်ပႆႁူမ်ႈၸွင်ႈလူင်ႇလဵဝ်ၵၼ်မိူဝ်းၵႂႃႇလွႆးလွႆး။ ပေႃးဝႃႈၾူၼ်မႃးၸိူင်ႉၼႆ သဵၼ်ႈတၢင်းၼႆႉႁုတိုၼ်းမိုၼ်ႈလႄႈ လႅင်းမိူင်းသႂ်ပလၢတ်ႉလူမ်ႉၵႂႃႇ ၶုၼ်ႇဝၵ်ႉတၢဝ်းႁၢဝ်ႉဢဝ်ၶႅၼ်သိူဝ်ႈၶမ်းလၢဝ် သမ်ႉပေႃးသိၵ်ႇသေ ၶမ်းလၢဝ်ဢမ်ႇတၼ်းလႆႈသတိၼၼ်ႉၵေႃႈ လႆႈပလၢတ်ႈလူမ်ႉၵႂႃႇၸွမ်း ၸင်ႇသမ်ႉၶုၼ်ႇတၢဝ်းဢဝ်ၶႅၼ်မေႃယႃ ၶဝ်ၵေႃႈပလၢတ်ႈလူမ်ႉထူၵၼ်လူင်ၵႂႃႇတင်းသၢမ်ၵေႃႉ ဢိူၵ်ႇၵူမ်ႇဢိူၵ်ႇဢုင်လူင်မိူဝ်းယူႇယဝ်ႉ၊ ၽိူဝ်လိူဝ်မီးၸွင်ႈလူင်ႇလဵဝ်ၵူၺ်းၼၼ်ႉၵေႃႈ သမ်ႉမႃးၵွႆထႅင်ႈႁေ ပၼ်ႁႂ်ႈၶဝ်ပေႃးလႆႈတၢၵ်ႇၾူၼ်မိူဝ်းၵႂႃႇယူႇ။
ၶမ်းလၢဝ်ၼၼ်ႉတႄႉ ဢမ်ႇႁၢၼ်ႉၸႂ် လႅင်းမိူင်းသႂ်တေႉတေႉ ဢၼ်ႁဵတ်းႁႂ်ႈမၼ်းလႆႈလူမ်ႉၸိူင်ႉၼၼ် လႅၼ်ႈလမ်းလူၺ်းၵၼ်လူင်မိူဝ်းၵႂႃႇ ႁွတ်ႈထိုင်ႁိူၼ်းမိူဝ်ႈလႂ်ပေႃးဢမ်ႇတၼ်းႁူႉယဝ်ႉ။
ၾူၼ်လူင်ၼၼ်ႉၵေႃႈ တူၵ်းပၼ်တၢင်းဝၼ်းတၢင်းၶိုၼ်း သမ်ႉပေႃးဢမ်ႇႁိူတ်ႇလႆႈႁေပွၵ်ႈ၊ သမ်ႉဝႃႈၾူၼ်ႁိူတ်ႇၵေႃႈ မွၵ်ႇၵုမ်ႈၼမ်ႉၼၢႆးယင်းတိုၵ်ႉမိုတ်းသိင်ႇတၼ်ဝႆႉယူႇ လုၵ်ႈလႅတ်ႇဢၼ်ဝႃႈၼၼ်ႉ ဢမ်ႇႁၼ်လႆႈယဝ်ႉၽွင်းၼၼ်ႉ။ ၶူဝ်းၼုင်ႈၶူဝ်းဝႆၵေႃႈ တၢၵ်ႇဝႆႉႁိုင်ဢၢႆသႃးပေႃးဢွၵ်ႇ ဢမ်ႇၸၢင်ႈႁဵတ်းႁိုဝ် ၵႃႈလႆႈဢဝ်ယၢင်ႈႁၢင်းၾႆးၵႂႃႇ တႃႇၼုင်ႈသုပ်းသႂ်ႇႁႂ်ႈပေႃးဢုၼ်ႇလီၼုင်ႈလီမႃးၼၼ်ႉ ဢၢႆၵႂၼ်းၾႆးၸပ်းၵေႃႈ ၶႅၼ်းလိူဝ်ဢၢႆသႃးမဵၼ်ယူႇၼၼ်ႉၼႃႇ။
ၶမ်းလၢဝ်ဢမ်ႇယၢမ်ႈမႃးႁဵတ်းၸိူင်ႉၼႆၵေႃႈ ဢမ်ႇဝႄႈလွတ်ႈလႆႈယဝ်ႉလူး ပေႃးဢမ်ႇႁဵတ်းၵေႃႈ ဢမ်ႇမီးၶူဝ်းၼုင်ႈယဝ်ႉလႄႈ မၼ်းလႄႈတင်းလႅင်းမိူင်းသႂ်ၼၼ်ႉ ဢွၼ်ၵၼ်ဢဝ်သိူဝ်ႈဢဝ်ၶူဝ်းၶႃ မႃးၼင်ႈႁၢင်းၾႆးၵၼ်ယူႇတီႈၽီးၾႆးၼၼ်ႈၵႂႃႇ
“လၢႆဝၼ်းယဝ်ႉၼႆႉ ၾူၼ်ၼႆႉၵေႃႈဢမ်ႇႁိူတ်ႇႁေပွၵ်ႈ!” ၶမ်းလၢဝ်ထၢမ်ၸူးလႅင်းမိူင်းသႂ်။
“မီးၵႂႃႇသိပ်းဝၼ်းမိူဝ်ႈၼႆႉယဝ်ႉ..”
“ပေႃးတၼ်းမီးၵႂႃႇမွၵ်ႈၼၼ်ႉယဝ်ႉႁႃႉ!!”
“ၼၼ်ႉယဝ်ႉ…ၾူၼ်တူၵ်းႁဵတ်းၼႆတိၵ်းတိၵ်း မိူဝ်ႈလႂ်လုၵ်ႈဢွၼ်ႇၶဝ် တေၸၢင်ႈလႆႈႁဵၼ်းလိၵ်ႈၵၼ်လီလီလႃႇၼႆႉ”
“ၾူၼ်တူၵ်းမိူၼ်ၼႆ သမ်ႉဝႃႈႁူင်းႁဵၼ်းပိုတ်ႇၵေႃႈ ဢမ်ႇၸၢင်ႈသွၼ်လီလီၼင်ႇၵဝ်ႇ ၾူၼ်ထိပ်ႇပၼ်ပေႃးတၢၼ်ႇၼၼ်ႉ ႁဵတ်းႁႂ်ႈၶဝ်ဢမ်ႇယူႇလီထႅင်ႈၵူၺ်းဢိူဝ်ႈ ယူႇႁိူၼ်းၼၼ်ႉလီလိူဝ်ပိူၼ်ႈယဝ်ႉ”
“ပီႈမႆႈၸႂ်လုၵ်ႈဢွၼ်ႇႁႃႉ…ပီႈၶၢၼ်ႉဢွၵ်ႇႁိူၼ်းတေႉလႃႇ”
ဢၢႆၶႅမ်ႈၶူဝ်းလႆႈၺိၼ်းၼႂ်းၶူႈၼင်မႃးသေ ၾႆးၵေႃႈလုၵ်ႉမႆႈမႃးတီႈသိူဝ်ႈၶမ်းလၢဝ်ၼၼ်ႉယဝ်ႉလႄႈ ဢဝ်မၼ်းတူၵ်းၸႂ်ယဝ်ႉ ဝိုတ်ႉသိူဝ်ႈမၼ်းၶဝ်ႈၵႂႃႇၼႂ်းၵွင်ၾႆးၵႂႃႇထႅင်ႈႁေယဝ်ႉ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ။
