တွၼ်ႈသိပ်းသီႇ
လုၵ်ႈတႃဝၼ်းၸၢႆႉၸိူၼ်း ဝၼ်းဢွၼ်တၢင်းသုတ်း ဝၼ်းၶိုၼ်ႈႁဵၼ်းၼႆၵေႃႈသုတ်းသဵင်ႈၵႂႃႇ သဵင်ၵႂၢမ်းတၢင်ႇၸွမ်ပိဝ် မေႃးမႃး ဢၼ်လႆႈၵေႃႈမီး ဢၼ်ဢမ်ႇလႆႈၵေႃႈမီး ႁွင်ႉၵႂႃႇၵေႃႉဢိတ်းၵေႃႉဢွတ်းၵေႃႈ မီးသဵင်ဢွၵ်ႇပဵၼ်ၶေႃႈပဵၼ်ၵႂၢမ်းမႃးယူႇယဝ်ႉ။ တွၼ်ႈတႃႇၶမ်းလၢဝ်ၼႂ်းဝၼ်းမိူဝ်ႈၼႆႉတႄႉ ပဵၼ်ဢၼ်ႁိူဝ်ႉတေႉႁိူဝ်ႉဝႃႈယဝ်ႉ ပွၵ်ႈမိူဝ်းႁွတ်ႈႁိူၼ်းယဝ်ႉၵေႃႈ သမ်ႉပေႃးဢမ်ႇတၼ်းႁဵတ်းသင် ပွႆႇတူဝ်မၼ်းလူမ်ႉၼွၼ်းယူႇၼႂ်းၵၢင်ႁိူၼ်းၼၼ်ႉၵႂႃႇၵမ်းလဵဝ်။
ၶမ်းလၢဝ်ၼွၼ်းလပ်းမိင်းၵႂႃႇတင်းႁိုင် ဢမ်ႇႁူႉတူဝ်ႁူႉၶိင်းသင်သေဢိတ်းယဝ်ႉ၊ လႅင်းမိူင်းသႂ်လႆႈမႃးႁွင်ႉမၼ်းယူႇလၢႆၵမ်း ၸင်ႇတေတိုၼ်ႇ၊ လုၵ်ႉဢွၵ်ႇၽၵ်းတူမႃး ၼႃႈၾႃႉၼႃႈမိူင်းလပ်းသိင်ႇၸွမ်ႉႁွမ်ႉ မိူၼ်မိူင်းပႆႇပၢင်ႇယၢမ်းၵၢင်ၼႂ်ဝႆႉလႄႈ ပႆသိုင်ႉသၢင်ႉသိုင်ႉသိင်ႉလူင်လူင်းႁိူၼ်းၵႂႃႇ ႁူပ်ႉၺႃးသႅင်ၼူၼ်း ပႃးတင်းဝၢၼ်ႇၽၵ်းလူင်မႃးလႄႈ မၼ်းၸင်ႇတၵ်ႉၸူး။
“မႃးႁဵတ်းသင်ၸဵမ်ၸဝ်ႉလႃႇ တေၵႂႃႇၵၢၼ်ယဝ်ႉႁႃႉ!” သီႁူသီတႃမၼ်းတူၺ်းယူႇ။
“မိူဝ်ႈၼႆႉၵႂႃႇၼႃးမႃး လႆႈပႃမႃးလႄႈ ႁဵတ်းပႃဢႅပ်းမႃးလဵင်ႉပီႈႁဝ်းၶဝ်ၶႃႈဢေႃႈ တမ်ႉပႆႇၵိၼ်ၶဝ်ႈၵၼ်ႁိုဝ်လႃႇ”
“ႁႃ..ဢမ်ႇပႆႇၸႂ်ႈၵၢင်ၼႂ်ႁႃႉတေႃႈ”
“ပီႈၼွၼ်းတိုၵ်ႉလုၵ်ႉၵူၺ်းယူဝ်ႉၼႆႉထၢင်ႇ”
“ဢိုမ်ႈ! ထၢင်ႇဝႃႈၵၢင်ၼႂ်ယဝ်ႉၼႆႉ ဢၢင်ႈတေၵႂႃႇသုၵ်ႈၼႃႈႁေ ႁႅၼ်းၶူဝ်းၵႂႃႇႁူင်းႁဵၼ်းယဝ်ႉဢိူဝ်ႈ”
ၵွတ်ႇၵႆႇမၼ်းသေတူၺ်းတီႈဢၢပ်ႇၼမ်ႉၶဝ်ယဝ်ႉၵေႃႈ “ၵတ်းၼႃႇၼေႃ ႁိူဝ်ႇဢမ်ႇဢွၵ်ႇၵဝ်ႇ ဢမ်ႇဢၢပ်ႇၼမ်ႉယဝ်ႉ” ပႆၵႂႃႇဝၵ်ႉတၢဝ်းဢဝ်ၼမ်ႉမႃး သုၵ်ႈၶႅၼ်သုၵ်ႈၶႃမၼ်းယဝ်ႉ ပွတ်ႈၼႃႈမၼ်းဢိတ်းၼိုင်ႈသေ ဢဝ်ၽႅၼ်ႇၸဵတ်ႉၵွင်ႉၶေႃးမၼ်းၼၼ်ႉ ၸဵတ်ႉၸဵတ်ႉထူထူယဝ်ႉၵေႃႈ ၶိုၼ်းၶိုၼ်ႈမိူဝ်းၼိူဝ်ႁိူၼ်းၵႂႃႇ၊ မိူဝ်းႁွတ်ႈၼိူဝ်ႁိူၼ်းၵေႃႈ ႁၼ်ၽိူၼ်ၶဝ်ႈတမ်းပႂ်ႉထႃႈမၼ်းဝႆႉယူႇယဝ်ႉ။
“ပီႈၼႆႉ! ဢမ်ႇဢၢပ်ႇၼမ်ႉထႅင်ႈယဝ်ႉၸွင်ႇၸႂ်ႈ..”
“ၵတ်းၼႃႇလႄႇဢ!!..”
“ၵိၼ်ၶဝ်ႈႁေၵွၼ်ႇလႄႈ ယႃႇၵုမ်ႇမေႃးၵၼ်ယူႇယဝ်ႉသွင်ၶိူဝ်”
ၶမ်းလၢဝ်ၵေႃႈ ယၵ်ႉတူၺ်းၼၢႆးႁေ “ဢိူဝ်ႈ!..ၼၢႆး ၼၢႆးႁဝ်းၼႆႉႁဵတ်းၼႃးမိူၼ်ပိူၼ်ႈယူႇႁႃႉၼႆႉ”
“ႁဵတ်းၽႅဝ်လေႃႇ ပေႃးဢမ်ႇႁဵတ်းတေဢဝ်ႁင်ၵိၼ်လႃႇ..”
“ၼၢႆးဢမ်ႇမီးလုၵ်ႈလၢၼ်ႁႃႉ..ႁိူၼ်းၵႂၢင်ႈယႂ်ႇပေႃးတၢၼ်ႇၼႆႉ ၼၢႆးယူႇၵေႃႉလဵဝ်မႃးတႃႇသေႇၵႃႈ”
“မိူဝ်ႈလဵဝ်တႄႉ..မီးသူသွင်ၵေႃႉၼႆယိုင်”
“ဢမ်ႇၸႂ်ႈ..လုၵ်ႈလၢၼ်ဢွၵ်ႇဢွၵ်ႇဢႄႈ”
“မီးဢိူဝ်ႈ ဢၢႆႈလူင်ႁဝ်းၵေႃႈ ၶၢႆႉၵႂႃႇယူႇတၢင်းဝၢၼ်ႈႁူၵ်းပုၼ်ႉယဝ်ႉ၊ ဢၢႆႈယီႈသမ်ႉၵႂႃႇႁဵတ်းၵၢၼ်တၢင်းမိူင်းၶႄႇဝႃႈ၊ ဢေးလႅင်သမ်ႉ မိူဝ်းၶိုၼ်ႈပႂ်ႉပိူၼ်ႈတီႈၼႂ်းဝဵင်းယဝ်ႉ”
“ၼၢႆးသမ်ႉဢမ်ႇၵႂႃႇယူႇၸွမ်းၶဝ်ၶႃႈလႃႇ မိူဝ်းယူႇၸွမ်းလုၵ်ႈယိင်းတီႈၼႂ်းဝဵင်းၵေႃႈလႆႈယူႇလူး တင်းလီလိူဝ်သေ ယူႇၼႂ်းဝၢၼ်ႈႁင်းၵူၺ်းၸိူင်ႉၼႆၵွၼ်ႇ”
“ဢမ်ႇၶႂ်ႈယူႇယိင်းဢိူဝ်ႉ! ၼႂ်းဝဵင်းၼႆႉ သုၵ်ႉႁူသုၵ်ႉၸႂ်ၼႃႇ ဢမ်ႇမိူၼ်ယူႇတီႈဝၢၼ်ႈႁေဢိတ်း၊ ဢမ်ႇၶႂ်ႈပႅတ်ႈႁိူၼ်းပႅတ်ႈယေး သေလၢႆတိူၵ်ႇႁႆႈလွၵ်းၼႃး ယူႇတီႈဝၢၼ်ႈၸိူင်ႉၼႆ ၵတ်းၸိုၼ်ႈယဵၼ်ၸႂ်လီၼႃႇ ”
“ၶႃႈဝႃႈၼၢႆးႁဝ်းဢမ်ႇလီယူႇႁင်းၵူၺ်းၵေႃႉလဵဝ်ၸိူင်ႉၼႆ ပေႃးယူႇဢမ်ႇလီၵိၼ်ဢမ်ႇဝၢၼ်မႃး ၽႂ်ၵေႃႉတေမႃးတူၺ်းထိုင်ၼၢႆးႁဝ်းလႃႇ”
“မီးၼမ်ၼႃႇၽႅဝ်ၵႃႈ ၵူၼ်းဝၢၼ်ႈၸိူဝ်းၼႆႉၵေႃႈ မိူၼ်ပဵၼ်ပီႈဢွၵ်ႇၼွင်ႉၵၼ်ယဝ်ႉ၊ ယူႇၼႂ်းဝဵင်းမီးလုၵ်ႈလၢၼ်ၵူၺ်းဢၼ်တူၺ်းထိုင်ၵၼ်လႆႈ ယူႇတီႈဝၢၼ်ႈ မီးသင်ၵေႃႈၸွႆႈထႅမ်ၵၼ် ယိုၼ်ႈမႅင်ႇၵၼ် မိူၼ်ပဵၼ်ၵူၼ်းႁိူၼ်းလင်လဵဝ်ၵၼ် တူၺ်းလႄႈ ၶမ်ႈၼႆႉၼၢႆးတင်းဢမ်ႇလႆႈႁဵတ်းၽၵ်းၵွၼ်ႇ ၶဝ်ႁိူၼ်းႁွင်ႇပၼ်မႃး ၽၵ်းသူမ်ႈတင်ႈ၊ ႁိူၼ်းၸၢၼ်းပၼ်မႃး ပႃဢွင်ႇ၊ ဢေးၼူၼ်းသမ်ႉမႃးပၼ် ပႃဢႅပ်းထႅင်ႈႁေ ၸွင်ႇမၼ်းဢမ်ႇမီးပဵၼ်သၢမ်မီႇယဝ်ႉႁိုဝ်လႃႇၼႆႉ ထႅင်ႈဢၼ်ၵေႃႈ ဢၢႆႈလူင်ၶဝ် ၵႆႉမႃးၸႂ်းၼၢႆးယူႇတႃႇသေႇယဝ်ႈ”
ၶမ်းလၢဝ်ၼၼ်ႉၵေႃႈ ဢမ်ႇလၢတ်ႈသင်ထႅင်ႈသေ ၸေႃႉၵိၼ်ပႃဢွင်ႇၼၼ်ႉၵႂႃႇ ၼင်ႇႁၢင်ႈဝၢၼ်ႁၢင်ႈမၼ်းယဝ်ႉ။ လႅင်းမိူင်းသႂ်ၵေႃႈ တူၺ်းၶမ်းလၢဝ်ယဝ်ႉ ယုမ်ႉယူႇၸုတ်းၵုတ်း ၸင်ႇတၵ်းဢဝ်ပႃဢႅပ်းၼၼ်ႉၸေႃႉပၼ်သေ
“ၵိၼ်တူၺ်းၼႆႉလႄႈ”
ၶမ်းလၢဝ်ၵေႃႈယၵ်ႉတူၺ်းမၼ်းၵႂႃႇ ၼႂ်းငဝ်းလပ်းသိင်ႇ ၸွမ်းလူၺ်ႈသၢႆတႃဢၼ်ထၢင်ႇထိူမ်မႃးယူႇ။
“ပေႉၸႂ်လီလႃႇမိူဝ်ႈၼႆႉ” ၽိူဝ်ႇၶမ်းလၢဝ်ယၵ်ႉတူၺ်းၼႂ်းဝၢၼ်ႇၶဝ်ႈမၼ်းလီလီၼၼ်ႉ ပဵၼ်ႁူဝ်ပႃၵူၺ်းလႄႈ ၸေႃႉပၼ်ၵႂႃႇၶိုၼ်းသေ “ဢမ်ႇဢဝ်ယဝ်ႉ!”
“ၵိၼ်ပႃဢွၵ်းလႅတ်းၼႆၼႃႇ ပေႃးၵိၼ်ႁူဝ်ပႃမၼ်းယူဝ်ဢွၵ်းဢေႃပီႈတေဝႆးလိူဝ်ၵဝ်ႇၼႆၵႃႈ မိူဝ်ႈၼႆႉသဵင်ႈႁႅင်းမႃးၼမ်ၼႃႇယဝ်ႉလူး”
ၵၢင်ၶိုၼ်းလပ်းသိင်ႇၸွမ်ႉႁွမ်ႉ ၾႆးလႅင်းဝွႆးဝွႆးယူႇၼႂ်းႁိူၼ်းၼၼ်ႉလႄႈ ၶမ်းလၢဝ်ၵေႃႈ ၼင်ႈႁၢင်ႈႁႅၼ်းၵၢၼ်ႁဵၼ်းၵၢၼ်သွၼ်မၼ်းယူႇႁင်းၵူၺ်းယဵၼ်ယဵၼ် တႂ်ႈၶဵင်ႇၽြႃး၊ ၵွႆႈလိုၵ်းၵွႆႈငႅဝ် ၵွႆႈယူႇၵွႆႈယဵၼ် သဵင်လူမ်းၵေႃႈႁႅင်းမႃး မႃၵေႃႈႁွၼ်မေႃးပႃးသေ ၶူၼ်တုမ်ႇၼိူဝ်ႉၵီႈပိုဝ်းမႃး ယူႇယူႇၾႆးတဵၼ်းမွတ်ႇလပ်းၵႂႃႇ သဵင်လူမ်းထွင်းတႂ်ႈႁိူၼ်း သမ်ႉပေႃးဢဝ်ၶူဝ်းဢဝ်ၶွင်တူၵ်း ၵလွင်းၵလိင်းလူင်ၵႂႃႇသဵင်ႈ ဢမ်ႇႁၼ်ႁူႁၼ်တႃသင်ယဝ်ႉလႄႈ လၢမ်းလိမ်းလၢမ်းလၢမ်းလူင်ၵႂႃႇၽုၺ်ႇၽၵ်းတူၶဝ်ႈမိူဝ်းၼႂ်းႁိူၼ်း။
“ၼၢႆးထွင်ႇၾႆးပၼ်ၽွင်ႈ!” ၵူၺ်းသမ်ႉပဵၼ်လုၵ်းၼွၼ်းလႅင်းမိူင်းသႂ်လႄႈ လႅင်းမိူင်းသႂ်ၼၼ်ႉၵေႃႈ တင်းငိၼ်းႁေဢမ်ႇငိၼ်းႁေ မိုဝ်းမၼ်းၼၼ်ႉတႄႉ လၢမ်းလိမ်းတၢဝ်းဢဝ်ၾႆးသၢႆႁိမ်းႁူဝ်တီႈၼွၼ်းမၼ်းၼၼ်ႉယဝ်ႉၵေႃႈ ထွင်ႇၵႂႃႇ သမ်ႉထွင်ႇၺႃးၼႃႈၶမ်းလၢဝ်လီလီ ၶုၼ်ႇတူၵ်းၸႂ်သေ ႁွင်ႉသႅၼ်ႇ “ဢႃး!!!..” ၶမ်းလၢဝ်ၵေႃႈတူၵ်းၸႂ်လႄႈ ႁွင်ႉၸွမ်း “ဢႃး!!..ဢႃး!!” ႁွင်ႉဢဝ်ၼၢႆးသမ်ႉပေႃးတိုၼ်ႇမႃးယဝ်ႉ။
“ၶိူဝ်ႁွင်ႉႁဵတ်းသင်လႃႇ!..” သွင်ၶႃၸင်ႇလႆႈသတိမႃးသေ
“ပီႈမႃးႁဵတ်းသင်လႃႇႁွင်ႈၶႃႈၼႆႉ!”
“ၽႂ်တေႁဵတ်းႁိုဝ်ႁူႉ ထၢင်ႇဝႃႈႁွင်ႈၼွၼ်းႁဝ်းၵူၺ်းဢိူဝ်ႈ” ၶမ်းလၢဝ်ၵေႃႈၼႅတ်ႈဢွၵ်ႇၵႂႃႇၵမ်းလဵဝ်ယူႇ။
“ၵမ်ႉဢႄႈပီႈ” လႅင်းမိူင်းသႂ် ၽုၼ်ႇၽၢၼ်ႇလုၵ်ႉသေ ၵွပ်ႈၶႅၼ်ၶမ်းလၢဝ်ဝႆႉ “ၶႃႈဢမ်ႇႁတ်းၼွၼ်းၵူၺ်းယဝ်ႉ”
ၼႂ်းၶမ်ႈၶိုၼ်းၼႆႉ ၶဝ်သွင်ၵေႃႉၵေႃႈ ၸူဝ်းႁွင်ႉဢဝ်ၼၢႆး မႃးၼွၼ်းယူႇတီႈၼႃႈၶဵင်ႇၽြႃးၸွမ်းၵၼ် ယူႇယဝ်ႉ။
ၵၢင်ၼႂ်ၶမ်းလၢဝ်တိုၼ်ႇမႃး သီႁူသီတႃၸဵတ်ႉၵႃႉမၼ်းသေ ယူႇယူႇၵေႃႈၶၢင်းဢွၵ်ႇမႃး “ဢႃႉ!..ၸဵပ်း!!” ၼမ်ႉတႃသမ်ႉပေႃးယိုင်ႈလူင်မႃးယဝ်ႉ။
“ပဵၼ်ႁင်ထႅင်ႈယဝ်ႉလႃႇ..” လႅင်းမိူင်းသႂ်ဢၼ်လုၵ်ႉၸဵမ်ၸဝ်ႉသေ ၸွႆႈၼၢႆးႁဵတ်းၶဝ်ႈၽၵ်းယူႇၼႂ်းသွင်ႇၾႆးၼၼ်ႉႁွင်ႉလၢတ်ႈၸူး။
“သူပ်းၸဵပ်းဢိူဝ်ႈ..”
“ပဵၼ်လူမ်းမႆႈယဝ်ႉၵႃႈထၢင်ႇ!..” ၼၢႆးလၢတ်ႈၸူး။
“မိူၼ်ၼၼ်ဢိူဝ်ႈ ၶၢၼ်ႉဢၢပ်ႇၼမ်ႉၼႃႇလႄႇ..”
“ၵႂႃႇဢၢပ်ႇၼမ်ႉႁေလႄႈ လူမ်းမႆႈၽိဝ်ႇဢိူဝ်ႈ ပိူၼ်ႈၸင်ႇဝႃႈဢၢပ်ႇၼမ်ႉၵၢင်ၼႂ်လီၸႂ်တၢင်းဝၼ်းၼႆၼႃႇ”
“တေႉႁႃႉၼၢႆး..” မၼ်းၵေႃႈၵွပ်ႈၸဵပ်းၼႃႇလႄႈ ဢမ်ႇဝႃႈလၢႆးလႂ် ပေႃးမၼ်းတေလီ ၼႅတ်ႈႁဵတ်းၵႂႃႇၵမ်းလဵဝ်ယူႇ။
ယၢမ်းၵၢင်ၼႂ် 8.30 ယဝ်ႉၼႆလႄႈ ၾႃႉဢမ်ႇပၢင်ႇၽူၼ်ဢမ်ႇတူၵ်းၵေႃႈ မွၵ်ႇၵုမ်ႈသုမ်ႇၼၼ်ႉယိုင်၊ မိူဝ်ႈၽူၼ်ဢမ်ႇတူၵ်းၼႆ တင်းလုၵ်ႈႁဵၼ်းလႄႈမေႃသွၼ်ၵေႃႈ ဢွၼ်ၵၼ်ၶဝ်ႈထႅဝ်တၢင်ႇၸွမ်ပိဝ်ၵၼ်ၵႂႃႇသေယဝ်ႉ ၶဝ်ႈၼႂ်းႁွင်ႈၽႂ်ၸၼ်ႉမၼ်းၵႂႃႇယူႇ။
ၶမ်းလၢဝ်ၵေႃႈလႆႈသွၼ်ၸၼ်ႉယႂ်ႇ လႄႈၸၼ်ႉၵၢင်သွင်ၸၼ်ႉ လႅင်းမိူင်းသႂ်သမ်ႉ ၵေႃႉသွၼ်ၸၼ်ႉလဵၵ်ႉၼႆယူႇ။ ၼွင်ႉဢၼ်လုၵ်ႈႁဵၼ်းၶဝ်ႁွင်ႉမႃးၼၼ်ႉၵေႃႈ ၸွမ်းၼင်ႇလႆႈဢုပ်ႇၵၼ်မိူဝ်ႈဝႃးၼၼ်ႉ တႄႇႁဵတ်းၵႂႃႇတီႈ ၼွင်ႉလႅင်ၼၼ်ႉဢွၼ်တၢင်းယူႇယဝ်ႉ။ ၸွမ်းၼင်ႇၵၢၼ်သွၼ်ငဝ်ႈၶၢမ်ႇပိုၼ်ႉၼၼ်ႉ လႆႈတႄႇသွၼ် တူဝ်မႄႈလိၵ်ႈတႆး ၵ ထိုင် ဢ ဢွၼ်တၢင်း။
ၶမ်းလၢဝ် သွၼ်ပၼ်တီႈၸၼ်ႉယႂ်ႇယဝ်ႉ ႁႂ်ႈၶဝ်တႅမ်ႈပႂ်ႉသေ ၸင်ႇသမ်ႉမႃးသွၼ်ပၼ်တီႈၸၼ်ႉၵၢင်ၵႂႃႇ၊ ၸၼ်ႉၵၢင်ၼႆႉၵေႃႈ လႆႈဝႃႈ ၵူၼ်းၼမ်တႄႉတႄႉယူႇယဝ်ႉ၊ မိူဝ်ႈဢမ်ႇမီးမေႃသွၼ်ၼၼ်ႉ ၶဝ်သမ်ႉပေႃးလႄႇယဝ်ႉယွၵ်ႇၵၼ် ဢႅၼ်ႇလမ်းမင်ႁူဝ်ၵၼ် ၽိတ်းမေႃးၵၼ် ဢူၼ်ပၼ်းယူႇသဵင်ႈ၊ ၶမ်းလၢဝ်ၵေႃႈ တင်းၶွၼ်ႉမၼ်းၼၼ်ႉသေ တွႆႇသႂ်ႇၼိူဝ်ပႅၼ်ႈပုၼ်း ပေႃးလင်ယွၼ်ႈတင်းႁူင်းႁဵၼ်းယဝ်ႉ။
လုၵ်ႈဢွၼ်ႇၶဝ်မိုင်ယဵၼ်ၵႂႃႇ ၵႅပ်ႉဢွၼ်ႇၵမ်းၼိုင်ႈၵူၺ်း လုၵ်ႈဢွၼ်ၸိူဝ်းၼၼ်ႉၵေႃႈ သမ်ႉပေႃးဢူၼ်ပၼ်းၶိုၼ်းထႅင်ႈယဝ်ႉ၊ ၶမ်းလၢဝ်ၵေႃႈ ဢမ်ႇၶိုၼ်းတၵ်းသဵင်သင်ထႅင်ႈႁေ တႅမ်ႈ ၵ တေႃႇထိုင် ဢ ယဝ်ႉ သွၼ်ႁႂ်ႈၶဝ်ဢၢၼ်ႇ ၵ ဝႃႈၵႆႇ ၵွပ်ႈတႆႇမႆႉၼိူဝ်ၵွၼ်း… ၵႂႃႇယူႇယဝ်ႉ။ ၵူၺ်းၵႃႈ ၵူႈလွင်ႈၼၼ်ႉ ႁိုဝ်မိူၼ်ၼင်ႇ ဢၼ်ဢၢင်ႈဢၢၼ်းဝႆႉ ဢၼ်တင်ႈၸႂ်ယူႇၼၼ်ႉတႄႉ ပဵၼ်ၵူၼ်းယူႇၽၢႆႇၼႃႈၼၼ်ႉၵူၺ်း ၵူၼ်းယူႇၽၢႆႇလင်တႄႉၵေႃႈ ၵုမ်ႇယဝ်ႉယဝ်ႉယွၵ်ႇယွၵ်ႇၵၼ် သဵင်ပေႃးဢူၼ်ပၼ်းလူင်ၵႂႃႇမူတ်း။
“ႁိူၺ်ႉ!! ယဵၼ်ဢိတ်ႉၼိုင်ႈလႄႈ!!.. ၸႂ်လမ်ယဝ်ႉၼႃႈ” မိူၼ်တေၸႂ်လမ်တေႉတေႉယဝ်ႉ သမ်ႉပေႃးဢဝ်လုၵ်ႈႁဵၼ်းၶဝ် ႁူဝ်ႁူတ်းၼင်ႈငွမ်လူင်ၵႂႃႇၵေႃႉလႂ်ၵေႃႉၼၼ်ႉမႃး။
ပေႃးဝႃႈသွၼ်ၸၼ်ႉၵၢင် ၸၼ်ႉယႂ်ႇၵေႃႈဢုပ်ႇၵၼ်ပေႃးပၼ်းလူင်ၵႂႃႇသဵင်ႈယဝ်ႉ။ သွၼ်ၵ ဝႃႈၵႆႇ တေႃႇထိုင်ဢ ဢမ်ႇႁူႉပဵၼ်လၢႆပွၵ်ႈ သဵင်ၵေႃႈသမ်ႉပေႃးၶႂ်ႈႁႅင်ႈႁၢပ်ႇလူင်မႃးၵမ်းလဵဝ်ယူႇ။ သွၼ်ၶဝ်ယဝ်ႉၵေႃႈ ႁႂ်ႈၶဝ်တႅမ်ႈသႂ်ႇၼႂ်းပပ်ႉဝႆႉ၊ သိုပ်ႇၵႂႃႇတီႈၸၼ်ႉယႂ်ႇ ဢၼ်ၶဝ်တႅမ်ႈယဝ်ႉလႄႈဢုပ်ႇၵၼ်ယူႇၼၼ်ႉ။
“တႅမ်ႈယဝ်ႉယဝ်ႉႁႃႉ!!”
“ယဝ်ႉယဝ်ႉၶႃႈ”
“ၽႂ်မေႃဢၢၼ်ႇ ဢၢၼ်ႇၼႄႇတူၺ်း”
ၶဝ်ၵေႃႈ ၼင်ႈၼိမ်ယဵၼ်သေ ယၵ်ႉတူၺ်းၼႃႈၵၼ်ၵႂႃႇမႃး ၶွၼ်းႁူဝ်ၼႄၶမ်းလၢဝ်ၵႂႃႇ။ ၶမ်းလၢဝ်ၵေႃႈ ဢဝ်တင်းၶွၼ်ႉမႆႉမၼ်းၼၼ်ႉ ၸီႉဢၢၼ်ႇလၢတ်ႈၼႄၵႂႃႇၵမ်းတူဝ်ၵမ်းတူဝ် လုၵ်ႈႁဵၼ်းၶဝ်ၵေႃႈ ႁွင်ႉဢၢၼ်ႇၸွမ်းၵႂႃႇ ပဵၼ်သိူင်းပဵၼ်သိူင်းယူႇယဝ်ႉ။
လႅင်းမိူင်းသႂ်ၼၼ်ႉတႄႉၵေႃႈ ၼင်ႈလဵၼ်ႈၸွမ်းလုၵ်ႈဢွၼ်ႇ ၸၼ်ႉလဵၵ်ႉ ဢၼ်မီးဢႃႇယုမွၵ်ႈ 7 ၶူပ်ႇလူင်းတႂ်ႈၼႆႉလႄႈ တႄႇသွၼ် ၵ ဝႃႈၵႆႇ ၵွပ်ႈတႆႇမႆႈၼိူဝ်ၵွၼ်းၵႂႃႇ မိူၼ်ၵၼ်ယဝ်ႉ။
ၶမ်းလၢဝ်ၵေႃႈ သွၼ်ၸၼ်ႉယႂ်ႇယဝ်ႉ ၶိုၼ်းမႃးသိုပ်ႇသွၼ်ထႅင်ႈၸၼ်ႉၵၢင် ပုတ်ႈၵၼ်ၵႂႃႇၵႂႃႇမႃးမႃး မိူၼ်တေႁိူဝ်ႉယူႇတေႉတေႉယဝ်ႉ။ ယၢမ်းၵၢင်ဝၼ်း ၶၢဝ်းလိုဝ်ႈၵၼ်ၶဝ်ႈၼၼ်ႉ
“ႁဝ်းဝႃႈတႄႉ သွၼ်လိၵ်ႈႁဵတ်းၼႆတင်းဝၼ်းတင်းဝၼ်းတႄႉ ဢမ်ႇလီၵႃႈႁိုဝ်ၼႃ”
“ႁိူဝ်ႉၼႃႇယဝ်ႉၵႃႈ! တိုၵ်ႉႁႃၶိုင်ႈဝၼ်းၵူၺ်း”
“ႁိူဝ်ႉတေတၢႆယူႇယဝ်ႉဢိူဝ်ႈၼႆႉ ၽိူဝ်လိူဝ်သူပ်းၸဵပ်းသေ ၵမ်းၵမ်းလႆႈႁွင်ႉယူႇတိၵ်းတိၵ်း ဢမ်ႇမီးသဵင်ယဝ်ႉ” သဵင်မၼ်းၵေႃႈ သမ်ႉပေႃးႁၢပ်ႇဝႆႉတေႉၼင်ႇဝႃႈယဝ်ႉ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ။
