တွၼ်ႈသိပ်းသၢမ်
ယၢမ်းၵၢင်ၼႂ် မွၵ်ႇၵုမ်ႈသုမ်ႇတၼ် ဢမ်ႇႁၼ်ၼႃႈၾႃႉၼႃႈမိူင်းသင်ၼၼ်ႉ လုၵ်ႈဢွၼ်ႇ ၸိူဝ်းယူႇ ဝၢၼ်ႈတူၵ်း ဝၢၼ်ႈႁွင်ႇ ဝၢၼ်ႈၸၢၼ်းၵေႃႈ ဢွၼ်ၵၼ်ပႆတွမ်ႉတႅမ်ႉတွမ်ႉတၢမ်ႉ မႃးႁူင်းႁဵၼ်းယဝ်ႉ၊ ၵမ်ႈၽွင်ႈၵေႃႈ မီးဢူႈမႄႈမႃးသူင်ႇ၊ ၵမ်ႈၽွင်ႈၵေႃႈပႆမႃးႁင်းၵူၺ်း။ လုၵ်ႈဢွၼ်ႇၸိူဝ်းမႃးႁူင်းႁဵၼ်းၵမ်ႈၼမ်တႄႉ ပဵၼ်လုၵ်ႈဢွၼ်ႇႁၢတ်ႈႁၢႆး ဢမ်ႇပႆႇပေႉၵၢၼ်ပေႉငၢၼ်းၼၼ်ႉၵူၺ်း၊ ပေႃးပဵၼ်လုၵ်ႈဢွၼ်ႇ မေႃႁဵတ်းၵၢၼ်ႁဵတ်းငၢၼ်းယဝ်ႉတႄႉ ဢူႈမႄႈၶဝ်ၵေႃႈ ႁႂ်ႈၵႂႃႇႁဵတ်းၵၢၼ်ၵူၺ်းယဝ်ႉ ဢမ်ႇၸၢင်ႈမႃးၶိုၼ်ႈႁူင်းႁဵၼ်းလႆႈ။
လႅင်းမိူင်းသႂ်ၵေႃႈ ၶတ်းၸႂ်ႁွင်ႉဢဝ်ၶမ်းလၢဝ်မႃးႁူင်းႁဵၼ်းၸဵမ်ၸဝ်ႉ တႃႇႁပ်ႉတွၼ်ႈလုၵ်ႈႁဵၼ်းၼႆယူႇ။ မိူဝ်ႈၶမ်းလၢဝ်လႆႈႁၼ်လုၵ်ႈႁဵၼ်းမၼ်းမႃးၼၼ်ႉ ၼင်ႇႁၢင်ႈဢမ်ႇပေႃးၵတ်းယဵၼ်ၸႂ်ၵႃႈႁိုဝ် ၵွပ်ႈပိူဝ်ႈပဵၼ်လုၵ်ႈဢွၼ်ႇ ဢၼ်မၼ်းဝူၼ်ႉႁၼ်ၼႂ်းတႃဝႆႉဝႃႈ တေထိင်းယၢပ်ႇတေႉတေႉၼၼ်ႉယဝ်ႉ၊ လုၵ်ႈဢွၼ်ႇ လဵၵ်ႉသုတ်းၵေႃႈ တေမီးယူႇမွၵ်ႈ 2 ၶူပ်ႇၼႆႉလႄႈ ယႂ်ႇသုတ်းၵေႃႈ မွၵ်ႈ 12 ၶူပ်ႇၼႆႉၵူၺ်း။
မိူဝ်ႈထိုင်ၶၢဝ်းယၢမ်းၶိုၼ်ႈႁူင်းႁဵၼ်း 8:30 မူင်း ယဝ်ႉၼႆၵေႃႈ၊ လႅင်းမိူင်းသႂ်တင်း ၶမ်းလၢဝ် ဢွၼ်ၵၼ်ၶဝ်ႈၼႂ်းႁွင်ႈႁဵၼ်းသေယဝ်ႉ ယၢမ်းၼၼ်ႉ… သဵင်ထူၺ်ႈၸႂ်လူင်ယူႇၼၼ်ႉၵေႃႈ ဢမ်ႇလႆႈငိၼ်းယဝ်ႉ ၵမ်ႈၽွင်ႈၵေႃႈႁႆႈ၊ ၵမ်ႈၽွင်ႈၵေႃႈလႅၼ်ႈလူၺ်းလမ်းၵၼ်၊ ၵမ်ႈၽွင်ႈၵေႃႈ ထဵင်ၵၼ်ၽိတ်းႁူဝ်ၵၼ်၊ ၵမ်ႈၽွင်ႈၵေႃႈ ႁိမ်ၶူဝ်းၶွင်ၵၼ်သေ ႁွင်ႉလၢတ်ႈမေႃသွၼ်၊ ၵမ်ႈၽွင်ႈၵေႃႈၶၢၼ်ႉငိၼ်းသေ ႁိုတ်းသႂ်ႇ သဵင်ဢူၼ်ဢၢၼ်မေႃးမႄး လင်ပၼ်းၼၼ်ႈလူင်ၵႂႃႇသဵင်ႈယဝ်ႉ။
လႅင်းမိူင်းသႂ်ၵေႃႈ ဝႆႉသဵင်ဢူၼ်ႈဢွၼ်ႇသေႁွင်ႉႁႂ်ႈၶဝ်တဵတ်ႇယဵၼ်ၼႆယူႇ၊ ၵူၺ်းၵႃႈ ၶမ်းလၢဝ်တႄႉ ၵမ်တႃမိုဝ်းသမ်ႉပေႃးၵႅၼ်ႇၵႅၵ်းၵႅၵ်း ၼႃႈၵေႃႈပေႃးလႅင်လႅတ်း လၢတ်ႈလီလီတႄႉဢမ်ႇလႅပ်ႈထွမ်ႇၵၼ်ယဝ်ႉ၊ လုၵ်ႈႁဵၼ်းၵေႃႈ သမ်ႉၶႂ်ႈၼမ်ဝႆႉ ပေႃးၼပ်ႉတူၺ်းလီလီ လၢမ်းတူၺ်းတႄႉမီးယူႇပၢၵ်ႇပၢႆၼႆႉ ၵွပ်ႈမီးလၢႆလၢႆဝၢၼ်ႈ မႃးႁူမ်ႈၵၼ်လႄႈ လႆႈမီးၼမ်ၸိူင်ႉၼႆယဝ်ႉ။
“ႁိုၺ်ႉ!!!…..” သဵင်သႅၼ်ႇႁွင်ႉၶမ်းလၢဝ် လင်ၵွင်ႈတွင်ႈၼႂ်းႁူင်းႁဵၼ်း မေႃးပၼ်းႁွတ်ႈထိုင်ၼႂ်းဝၢၼ်ႈၵႂႃႇယဝ်ႉႁိုဝ်ဢမ်ႇႁူႉ၊ လုၵ်ႈႁဵၼ်းၶဝ်ၼၼ်ႉၵေႃႈ ဢွၼ်ၵၼ်ယဵၼ်ၵႂႃႇတင်းမူတ်းယူႇ။ မိူဝ်ႈသဵင်ယဵၼ်ၸိူင်ႉၼၼ် မၼ်းၵေႃႈဢမ်ႇႁူႉဝႃႈတေတႄႇတီႈလႂ် ၵူၺ်းၵိုတ်းယဵၼ်ၵႂႃႇၸွမ်းႁဵတ်းၼၼ်သေ လႅင်းမိူင်းသႂ် ၸင်ႇတေႁွင်ႉလၢတ်ႈႁႂ်ႈလုၵ်ႈဢွၼ်ႇၶဝ် ၸႅၼ်ႇထႅဝ် ၸွမ်းဢႃႇယု ဢႃႈသၢၵ်ႈၸဝ်ႈၵဝ်ႇၼႆယူႇ။ ၵွပ်ႈပဵၼ်ဝၼ်းဢွၼ်တၢင်းသုတ်း ဢမ်ႇလၢတ်ႈလႆႈဝႃႈ လုၵ်ႈဢွၼ်ႇၶဝ်ၼၼ်ႉ တေမေႃႁိုဝ်ဢမ်ႇမေႃ၊ သင်ဝႃႈၸႅၵ်ႇဢႃႇယုၼႆ တေၸၢင်ႈသွၼ်ၵႂႃႇၸွမ်းဢႃႇယုဢႃႈသၢၵ်ႈၶဝ် ၼၼ်ႉၼႆယဝ်ႉ။
လုၵ်ႈဢွၼ်ႇၶဝ်ၵေႃႈ ဢွၼ်ၵၼ်ၶဝ်ႈထႅဝ် ၸွမ်းၼင်ႇ လႅင်းမိူင်းသႂ်တမ်းဝၢင်းဝႆႉပၼ် ၼၼ်ႉယဝ်ႉ။ ၼႂ်းႁူင်းႁဵၼ်းၶဝ်ၼၼ်ႉ တေႁဵတ်းပဵၼ် 3 ၸၼ်ႉ ၸၼ်ႉဢွၼ်ႇ၊ ၸၼ်ႉၵၢင်၊ ၸၼ်ႉယႂ်ႇ ၼႆသေ ၸၼ်ႉယႂ်ႇၼၼ်ႉၵေႃႈ ၵွပ်ႈပႃးၼွင်ႉမႃးလႄႈ ဢမ်ႇၸၢင်ႈၽႃႈလႆႈသေ ၵႃႈလႆႈႁွပ်ႇဢုမ်ႈၵႂႃႇၶဝ်ႈထႅဝ်ပႃး ယူႇယဝ်ႉ။
တႃႇတေၼပ်ႉၵူၼ်း ၶပ်ႉၵူၼ်းလႆႈၼၼ်ႉၵေႃႈလႆႈၸႂ်ႉၶၢဝ်းယၢမ်းတင်းႁိုင်ယူႇ၊ ၶပ်ႉၵူၼ်းလႆႈယဝ်ႉ ၸႅၵ်ႇပၼ်ႁွင်ႈသွၼ်လိၵ်ႈၵႂႃႇ၊ တေဝႃႈၸႅၵ်ႇပဵၼ်ႁွင်ႈၼႆၵေႃႈ ႁွင်ႈႁဵၼ်းသမ်ႉမီးႁွင်ႈလဵဝ်ၵူၺ်းလႄႈ ၵႃႈလႆႈၼပ်ႉသဝ်မၼ်းၸႅၵ်ႇပၼ်ဢဝ်ၵူၺ်း၊ ၸၼ်ႉလႂ်ၸၼ်ႉၼၼ်ႉ သဝ်လႂ်တေႃႇထိုင်သဝ်လႂ်ၼႆယဝ်ႉ။
မေႃသွၼ်မၼ်းၵေႃႈ လႆႈတႄႇၵဵပ်းသၢႆမၢႆလုၵ်ႈႁဵၼ်းၵႂႃႇ၊ ပွတ်းၼႂ်တင်းၼႂ်တႄႉ ဢမ်ႇပဵၼ်သွၼ်လိၵ်ႈလႆႈသေဢိတ်း။ လုၵ်ႈႁဵၼ်းၵေႃႈဢမ်ႇထွမ်ႇထႅင်ႈႁေ တေႃႇတေႃႇတေၵဵပ်းယဝ်ႉလႆႈ။
ဝၢႆးၵိၼ်ၶဝ်ႈၵိၼ်သင်ယဝ်ႉ သွင်ၶႃၸင်ႇမႃးတူၺ်းသၢႆမၢႆလုၵ်ႈႁဵၼ်းသေ ၶမ်းလၢဝ်မိူၼ်တေၶုၵ်းၸႂ်လႆႈသေလွင်ႈလွင်ႈလႄႈ
“ဢမ်ႇၸႂ်ႈဝႃႈ သၢႆမၢႆလုၵ်ႈႁဵၼ်းၼႆႉ ပေႃႈမႄႈတေလႆႈမႃးသႂ်ႇပၼ်ဢမ်ႇၸႂ်ႈႁိုဝ်”
လႅင်းမိူင်းသႂ်ၵေႃႈ ယၵ်ႉတူၺ်းၼႃႈၶမ်းလၢဝ်ၵႂႃႇ “တေႉဢိူဝ်ႈ!.. ပိူၼ်ႈတေလႆႈသႂ်ႇပႃး ၸိုဝ်ႈပေႃႈၸိုဝ်ႈမႄႈ တီႈယူႇၸိူဝ်းၼႆႉပႃးႁေဢမ်ႇၸႂ်ႈႁႃႉ တီႈတေႉပေႃးတၢၼ်ႇလီလႆႈသႂ်ႇ ၸဵမ်မိူဝ်ႈဝၼ်းၽုၺ်ႇႁူင်းႁဵၼ်းၼၼ်ႉယဝ်ႉဢမ်ႇၸႂ်ႈၼႄႇ”
ၶမ်းလၢဝ်ၵေႃႈ ၼင်ႈၼိမ်ယဵၼ်သေ “ၵေႃႈယဝ်ႉလႄႈ..ၸွင်ႇၶႅၼ်းႁဝ်းပဵၼ်ႁူင်းႁဵၼ်းလူင်ပွင်ၸိုင်ႈၵေႃႈဢမ်ႇၸႂ်ႈ.. ႁူႉၸိုဝ်ႈၶဝ်ၵူၺ်းၵေႃႈလႆႈယဝ်ႉၵႃႈ”
“ႁဝ်းဝႃႈ မီးဝႆႉၵေႃႈဢမ်ႇၽိတ်းၼႃ သၢႆမၢႆၶဝ် ပေႃးမီးလွင်ႈသင်မႃးၵေႃႈ တေၸၢင်ႈၵပ်းသိုပ်ႇဢူႈမႄႈၶဝ်လႆႈၼၼ်ႉၼႃႇ”
ၶမ်းလၢဝ်ၵေႃႈ မိူၼ်တေၼၵ်းၸႂ် လွင်ႈလုၵ်ႈဢွၼ်ႇလဵၵ်ႉၼၼ်ႉမႃးသေယဝ်ႉ
“ဝူၼ်ႉဝႃႈ တေႁဵတ်းႁိုဝ်လီလႃႇ လုၵ်ႈဢွၼ်ႇဢၼ်ပႃးၼွင်ႉမႃးၸိူဝ်းၼၼ်ႉ လၢတ်ႈသိုဝ်ႈသိုဝ်ႈၵေႃႈ လုၵ်ႈဢွၼ်ႇဢၼ်ယင်းတိုၵ်ႉလႆႈ မွၵ်ႈ ၶူပ်ႇသွင်ၶူပ်ႇၸိူဝ်းၼႆႉ ဢမ်ႇၸႂ်ႈဝႃႈမီးဢေႇဢေႇၵူၺ်းၼႃ မီးယူႇမွၵ်ႈ 10 ပၢႆၼႆႉယဝ်ႉ ပေႃးလၢတ်ႈငၢႆႈငၢႆႈၵေႃႈ ပဵၼ်ၸၼ်ႉႁဵၼ်းၼိုင်ႈဢၼ်လႆႈယဝ်ႉဝႃႈ၊ ႁဝ်းလၢတ်ႈတေႉဢိူဝ်ႈ တေႁႂ်ႈႁဝ်းတူၺ်းပႃးလုၵ်ႈဢွၼ်ႇတႄႉ ႁဝ်းဢမ်ႇဢဝ်ၼႃ”
“ၵမ်ႈၼမ် လုၵ်ႈဢွၼ်ႇလဵၵ်ႉဢၼ်မႃးၸိူဝ်းၼႆႉၵေႃႈ မႃးၸွမ်းပီႈဢၢႆႈပီႈၼၢင်းၶဝ်ၵူၺ်းၼင်ႇၵဝ်ႇ၊ ႁႂ်ႈၶဝ်လုမ်းလႃးတူၺ်းထိုင်ၵၼ်ၶိုၼ်းၵေႃႈလႆႈယူႇယူဝ်ႉ”
“ပေႃးႁႂ်ႈၶဝ်တူၺ်းၵၼ်ၶိုၼ်း ၸွင်ႇၶဝ်သမ်ႉတေၸၢင်ႈႁဵၼ်းလိၵ်ႈယူႇႁိုဝ်၊ မၼ်းဢမ်ႇပိူင်ႈသင်ၵၼ်တင်း ဢၼ်ၶဝ်ၼင်ႈယူႇတီႈႁိူၼ်းသေ လဵင်ႉၼွင်ႉၶဝ်ယူႇၼၼ်ႉၵူၺ်း၊ ပေႃးပဵၼ်ၸိူင်ႉၼႆ ဢမ်ႇလူဝ်ႇသုမ်းၶၢဝ်းယၢမ်းႁႂ်ႈၶဝ်မႃးၵေႃႈလႆႈယဝ်ႉ”
“ႁဝ်းဝႃႈ မၼ်းၸၢင်ႈႁဵၼ်းယူႇၵူၺ်း၊ တေႃႈၼင်ႇဢဝ်ၼွင်ႉၵေႃႈ ၶဝ်ယင်းႁဵတ်းၵၢၼ်ႁိူၼ်းပႃးလႆႈ ပဵၼ်သင်လႄႈႁဵၼ်းပႃးဢမ်ႇလႆႈလႃႇ၊ ယႃႇပေဢဝ်လွင်ႈတၢင်းဢၼ်ဝႃႈ မီးၼွင်ႉၼႆသေ ပၼ်ၶဝ်ႁၢမ်းသုၼ်ႇလႆႈႁဵၼ်းလႄႈၼႃႈ”
“မၼ်းတေထိင်းၵၼ်လႆႈၸိူင်ႉႁိုဝ်လႃႇ တူၺ်းလူးၼႂ်ၵႆႈ ႁၼ်ယူႇဢမ်ႇၸႂ်ႈႁႃႉ မၼ်းသုၵ်ႉသၵ်ႉၵႃႈႁိုဝ် သူၵေႃႈဝူၼ်ႉႁၼ်ပုၼ်ႈပိူၼ်ႈၵူၺ်း ဝူၼ်ႉထိုင်ႁဝ်းၽွင်ႈလႄႈ ပေႃးဢမ်ႇမီးသူယဝ်ႉ တေၵိုတ်းႁဝ်းၵေႃႉလဵဝ်ၵူၺ်းဢိူဝ်ႈ၊ တေလႆႈသွၼ်ၵူၼ်းပဵၼ်ပၢၵ်ႇ ပၢၵ်ႇပၢႆ ပေႃးပႃးလုၵ်ႈဢွၼ်ႇလဵၵ်ႉထႅင်ႈသေ ႁဝ်းဢဝ်ပုၼ်ႈၽွၼ်းဢမ်ႇလႆႈလေႃႇ ယွၼ်ႉပိူဝ်ႈတီႈႁူင်းႁဵၼ်းၼၼ်ႉ မိူဝ်ႈမီးပၼ်ႁႃမႃး ဢမ်ႇၸႂ်ႈပီႈဢၢႆႈပီႈၼၢင်းၶဝ်ၼႃ တေလႆႈဢဝ်ပုၼ်ႈၽွၼ်း မၼ်းပဵၼ်တီႈမေႃသွၼ်သွၼ်မၼ်းဢိူဝ်ႈ”
လႅင်းမိူင်းသႂ်ၵေႃႈ ၼိမ်ယဵၼ်လူင်ၵႂႃႇပႅတ်ႈၵမ်းလဵဝ်သေ ဢမ်ႇတၵ်းသဵင်သင်ၸွမ်းထႅင်ႈယဝ်ႉ။ ၶမ်းလၢဝ်ၵေႃႈ ဢမ်ႇႁူႉဝႃႈတေႁဵတ်းၸိူင်ႉႁိုဝ်မိူၼ်ၵၼ် ၸုၵ်းတဝ်ႉဢႅင်ႈပႆၵႂႃႇၵႂႃႇမႃးမႃးယဝ်ႉ ထူၺ်ႈၸႂ်လူင်ဢွၵ်ႇမႃးၵမ်းယဝ်ႉၵမ်းယူႇ။
“ထိုင်ၶၢဝ်းယၢမ်းၶိုၼ်ႈႁဵၼ်းၶိုၼ်းယဝ်ႉ.. ၵႂႃႇလႄႈ မၼ်းၵေႃႈတေမီးလၢႆးၵႄႈၶႆမၼ်းယူႇၵူၺ်း” လႅင်းမိူင်းသႂ် ဝႆႉၸႂ်ၼိမ်ယဵၼ်သေလၢတ်ႈၸူးၵႂႃႇ။
ဝၢႆးဝၼ်းမႃး ဢွၼ်ၵၼ်ၸႅၵ်ႇပၼ်ၶိူင်ႈၵမ်ႉၵႅမ်ၵၢၼ်ႁဵၼ်းၵႂႃႇ၊ ၵွပ်ႈပိူဝ်ႈ လုင်းႁဵင်ၶဝ်ၵေႃႈ လႆႈၵဵပ်းႁွမ်ငိုၼ်းတီႈၵူၼ်းဝၢၼ်ႈၶဝ်ယဝ်ႉ သိုဝ်ႉမႃးပၼ်ၶိူင်ႈၵမ်ႉၵႅမ်ၵၢၼ်ႁဵၼ်းသေ လႆႈမႃးမွပ်ႈဢၢပ်ႈဝႆႉပၼ်တီႈႁူင်းႁဵၼ်း ၼႂ်းဝၼ်းပိုတ်ႇၽူၺ်ႇႁူင်းႁဵၼ်းၼၼ်ႉယဝ်ႉ။ ၸႅၵ်ႇၶူဝ်းၸႅၵ်ႇၶွင်ယဝ်ႉၵေႃႈ ပၼ်ႁႂ်ႈလုၵ်ႈႁဵၼ်းၶဝ် လဵၼ်ႈယူႇၼႂ်းဝၢင်းႁူင်းႁဵၼ်းၼၼ်ႉၵူၺ်း၊ သမ်ႉဝႃႈလုၵ်ႈႁဵၼ်းမၼ်း လိုဝ်ႈလဵၼ်ႈယူႇသေတႃႉ ၵေႃႉပဵၼ်မေႃသွၼ်တႄႉ ဢမ်ႇတၼ်းလႆႈလိုဝ်ႈသေဢိတ်း၊ ၶႃၵေႃႈၸင်ႇၸူဝ်းႁွင်ႉဢဝ် ဢွၼ်ႇယိင်း ၸိူဝ်းပႃးၼွင်ႉလဵၵ်ႉမႃးၼၼ်ႉ ဢုပ်ႇၸူးၵႂႃႇယူႇ။
“မေႃသွၼ်ဝႃႈတႄႉ ၼွင်ႉၶဝ်ဢမ်ႇလူဝ်ႇ..” ၶမ်းလၢဝ်လၢတ်ႈပႆႇသုတ်း လႅင်းမိူင်းသႂ်တတ်းၵႂၢမ်းၵႂႃႇ
“ၼွင်ႉၶဝ်ယူႇတၢင်းဝၢၼ်ႈလႂ်ပုၼ်ႉလႃႇ…”
ၼွင်ႉလႅင် ဢၼ်မိူၼ်တေၵေႃႉယႂ်ႇလိူဝ်ပိူၼ်ႈၼႂ်းႁူင်းႁဵၼ်းၼႆႉၼၼ်ႉ လၢတ်ႈၸူးၵႂႃႇၶိုၼ်း “ၶႃႈၶဝ်..ယူႇတၢင်းဝၢၼ်ႈၶုမ်ႇပုၼ်ႉၼေႈ..”
“ၵႆယူႇႁႃႉ..”
“ဢမ်ႇပေႃးၵႆၶႃႈ ၶၢမ်ႈလွႆလုၵ်ႈၼႆႉၵႂႃႇၵေႃႈႁွတ်ႈယဝ်ႉၶႃႈ” ၸိၵႂႃႇတၢင်းတူၵ်းႁူင်းႁဵၼ်း တီႈမီးလွႆလုၵ်ႈၼိုင်ႈၼၼ်ႉၼႄယူႇ။ သွင်ၶႃ ယၵ်ႉတူၺ်းလွႆလုၵ်ႈၼၼ်ႉ ဢမ်ႇႁၼ်ဝႃႈ မၼ်းၵႂႃႇသုတ်းတီႈလႂ်လႄႈ ၶိုၼ်းယၵ်ႉဝၢႆႇတူၺ်း ၼွင်ႉလႅင်ၼၼ်ႉယဝ်ႉ။
“တၢင်းၸွင်ႇယၢပ်ႇႁိုဝ်” လႅင်းမိူင်းသႂ်ၶိုၼ်းသိုပ်ႇထၢမ်။
“ဢေႃႈ..ယၢပ်ႇယူႇ မိူဝ်ႈႁဝ်းမႃးၼၼ်ႉၵေႃႈ မီးမႆႉလူမ်ႉတဵင်တၢင်းႁေၵွၼ်ႇဢေႃႈ မၢင်တီႈၵေႃႈလိၼ်ၵူၼ်ႇႁေ ၶႅၼ်းယူႇ တီႈႁိမ်းဝၢၼ်ႈၼႆႉယင်းမီးၼမ်ႉႁွင်ႈ ႁဝ်းၵေႃႈလႆႈမႃးသုၵ်ႈတိၼ်သုၵ်ႈမိုဝ်းႁဝ်းႁေၼၼ်ႉၼႃႇ”
“ဢဝ်ၼွင်ႉမႃးပႃးႁေ ယိုင်ႈၶႅၼ်းမႃးယၢပ်ႇယဝ်ႉၵႃႈ”
“ပေႃးဢမ်ႇဢဝ်ၼွင်ႉမႃးပႃးၵေႃႈ ဢမ်ႇလႆႈမႃးႁဵၼ်းၶႃႈၼႃႇ ဢမ်ႇမီးၵူၼ်းတူၺ်းၼွင်ႉၶႃႈလူး တီႈႁိူၼ်းသမ်ႉမီးၼၢႆးၵူၺ်း ၼၢႆးသမ်ႉလူဝ်ႇႁဵတ်းၵၢၼ်ဢေႃႈ”
ၶမ်းလၢဝ်လႆႈငိၼ်းၼင်ႇၼၼ်ၵေႃႈ မိူၼ်ၸႂ်တေယဵၼ်မႃးသေ ထၢမ်ၸူးၵႂႃႇ “ၶႂ်ႈဝႃႈပေႃးဢမ်ႇဢဝ်ၼွင်ႉမႃးပႃးၵေႃႈ တေလႆႈယူႇႁိူၼ်းလဵၼ်ႈၵေႃႉၼွင်ႉၵူၺ်းၸိူင်ႉၼၼ်ၵႃႈ”
ဢွၼ်ႇယိင်းၸိူဝ်းၼၼ်ႉၵေႃႈ ဢွၼ်ၵၼ်ငွၵ်းႁူဝ်ၶဝ် ၼႄႁႂ်ႈႁၼ်ဝႃႈ “ၸႂ်ႈဢေႃႈ”ၼႆယူႇ။
“ပေႃးဢဝ်ၼွင်ႉႁေႁဵၼ်းပႃး ၸွင်ႇတေၸၢင်ႈႁဵၼ်းၸွမ်းပိူၼ်ႈလႆႈယူႇၼႄႇ” ၶမ်းလၢဝ်ၶိုၼ်းသိုပ်ႇလၢတ်ႈထႅင်ႈ။ ဢွၼ်ႇယိင်းၸိူဝ်းၼၼ်ႉၵေႃႈ ဢမ်ႇပႆႇၸၢင်ႈတွပ်ႇသင်လႆႈ ၵွပ်ႈပိူဝ်ႈဢမ်ႇပႆႇယၢမ်ႈႁဵၼ်းတူၺ်းလူး။
“ၼွင်ႉၶဝ်ၸိူဝ်းၼႆႉ ၸွင်ႇမီးၽႂ်ယၢမ်ႈၶိုၼ်ႈႁူင်းႁဵၼ်းမႃးႁႃႉ” လႅင်းမိူင်းသႂ်ၸင်ႇလႆႈထၢမ်ၸူးၵႂႃႇၶိုၼ်း၊
ဢွၼ်ႇယိင်းၶဝ်ၸိူဝ်းၼႆႉၵေႃႈ ၶႂ်ႈၵေႃႉယႂ်ႇတၢၼ်ႇတၢၼ်ႇၵၼ်ယဝ်ႉလႄႈ ႁူႉၵႂၢမ်းၵၼ်လီယဝ်ႉ၊ ၼွင်ႉလႅင်ၸင်ႇလၢတ်ႈၵႂႃႇ “မိူဝ်ႈပူၼ်ႉ ၶႃႈယၢမ်ႈမႃးၶိုၼ်ႈႁူင်းႁဵၼ်းတီႈၼႆႈယူႇ ၵူၺ်းၵႃႈဢမ်ႇတွင်းယဝ်ႉၶႃႈ”
“ၼွင်ႉၶဝ်ၸိူဝ်းၼႆႉလူး” ယၵ်ႉထၢမ်တူၺ်းၵႂႃႇ ဢွၼ်ႇယိင်းၸိူဝ်းဢၼ် ၼင်ႈဢဝ်ၼွင်ႉၶဝ်ယူႇၸိူဝ်းၼၼ်ႉယဝ်ႉ။
“ဢမ်ႇၶႃႈ” ၶွၼ်းႁူဝ်ဝႆဝုတ်းဝုတ်းၼႄၵႂႃႇယူႇ။
လႅင်းမိူင်းသႂ် ႁၼ်ၼင်ႇၼၼ်ၵေႃႈ မိုင်ယဵၼ်ၵႂႃႇ မိူၼ်တေဝူၼ်ႉသေလွင်ႈလွင်ႈယူႇ ၼၼ်ႉယဝ်ႉ။ ၶမ်းလၢဝ် လႆႈလၢတ်ႈၸိမ်ၵႂႃႇ မိူဝ်ႈလႅင်းမိူင်းသႂ်တိုၵ်ႉယဵၼ်ယူႇၼၼ်ႉ−
“ပေႃးဢဝ်ၼွင်ႉမႃးၵေႃႈ ၶႂ်ႈႁႂ်ႈတူၺ်းၵၼ်လီလီၼႃ သူၵေႃႈတေႁၼ်ယူႇ လုၵ်ႈႁဵၼ်းမၼ်းၼမ် မေႃသွၼ်တေဢမ်ႇတၼ်းတူၺ်းပၼ်လႆႈ”
ၶဝ်ၸိူဝ်းၼၼ်ႉၵေႃႈ ၵႃႈလႆႈငွၵ်းႁူဝ်ၵႂႃႇၵူၺ်း။
“ပေႃးၼၼ် ၼွင်ႉၶဝ်ပၼ်ႇပုတ်ႈၵၼ်တူၺ်းၼွင်ႉ မိူဝ်ႈၽွင်းႁဵၼ်းယူႇၼၼ်ႉ ၸွင်ႇတေလီႁိုဝ် ၼိုင်ႈၵေႃႉၼိုင်ႈဝၼ်း လုၵ်ႈဢွၼ်ႇလဵၵ်ႉၵေႃႈ ပဵၼ်ၼွင်ႉသူၶဝ်ၼႆႉၵူၺ်း”
“ပေႃးဢဝ်ၼွင်ႉ ႁဝ်းသမ်ႉဢမ်ႇလႆႈႁဵၼ်းႁေယဝ်ႉၶႃႈႁႃႉမေႃသွၼ်”
“ဢိူဝ်ႈ..လၢႆးလီလိူဝ်ပိူၼ်ႈယၢမ်းလဵဝ်ၼႆႉၵႃႈ ဢၼ်မေႃသွၼ်တေႁႂ်ႈသူႁဵၼ်းလႆႈလီလိူဝ်ပိူၼ်ႈ၊ ပေႃးသူၶဝ်တင်းႁဵၼ်းတင်းဢဝ်ၼွင်ႉၵႂႃႇႁင်းၽႂ်ႁင်းမၼ်း သူၵေႃႈ တေဢမ်ႇလႆႈႁဵၼ်းလီလီႁေဝၼ်းၼၼ်ႉၼႃႇ၊ ပေႃးသူဢဝ်ၼွင်ႉဝၼ်းၼိုင်ႈ သူၵေႃႈတေႁဵၼ်းတၢင်းလီ လႆႈလၢႆဝၼ်းၼၼ်ႉယိုင်”
လုၵ်ႈဢွၼ်ႇၶဝ်ၵေႃႈ ပေႃးဝႃႈမေႃသွၼ်ၶဝ်ဝႃႈလီ ၶဝ်ၵေႃႈဝႃႈလီၸွမ်းၵူၺ်း။ လွင်ႈဢဝ်လုၵ်ႈဢွၼ်ႇလဵၵ်ႉမႃးႁူင်းႁဵၼ်းၼႆႉ မိူၼ်တေၵႄႈၵႂႃႇလႆႈယဝ်ႉၼႆလႄႈ ၶမ်းလၢဝ်သမ်ႉပေႃးလူမ်ၸႂ်မႃးယူႇယဝ်ႉ။
သိုပ်ႇလူဢၢၼ်ႇထႅင်ႈတွၼ်ႈတေမႃးၶႃႈ။
