တွၼ်ႈသိပ်းႁႃႈ
ဝၢႆးသေၵိၼ်ၶဝ်ႈယဝ်ႉသေ ထိုင်ၶၢဝ်းယၢမ်းၶဝ်ႈႁွင်ႈႁဵၼ်းမႃးၶိုၼ်းယဝ်ႉလႄႈ ၶမ်းလၢဝ်တင်းလႅင်းမိူင်းသႂ်ၵေႃႈ မႄးသိုပ်ႇလိုမ်ႉၶိုၼ်းၵႂႃႇထႅင်ႈ ၼႂ်းတွၼ်ႈၵၢင်ၼႂ်။ ၸွမ်းၼင်ႇမီးဝႃႈ ၼင်ပုမ်ယၢၼ်းၵေႃႈ ၼင်တႃယွၼ်ႇဢၼ်ဝႃႈၼၼ်ႉ ပႃးလုၵ်ႈႁဵၼ်းၶဝ်ယူႇၵူၺ်း ၵမ်ႈၽွင်ႈၵေႃႈ ငဝ်ငုၵ်းငဝ်ငၢၵ်း ၵမ်ႈၽွင်ႈၸိူဝ်းဢၼ်ယူႇတၢင်းလင်ၼၼ်ႉၵေႃႈ သွပ်ႉလပ်းၵႂႃႇယဝ်ႉ၊ မၢင်ၵေႃႉသမ်ႉပၢႆၼွၼ်းၵႃႉယွႆႉထႅင်ႈႁေၵွၼ်ႇ။ ၶမ်းလၢဝ်ၵေႃႈ ဢမ်ႇၸၢင်ႈႁဵတ်းႁိုဝ် ၸုၵ်းၸိူဝ်ႈမိုင်တူၺ်းၶဝ်ၸိူဝ်းၼၼ်ႉသေယဝ်ႉ ဝူၼ်ႉထိုင်ၶိုၼ်း မိူဝ်ႈ မၼ်းပဵၼ်လုၵ်ႈႁဵၼ်းၼၼ်ႉမႃးလႄႈ လၢတ်ႈယူႇၼႂ်းၸႂ်
“ယၢမ်ႈႁဵတ်းတီႈပိူၼ်ႈၸိူင်ႉႁိုဝ်ၵေႃႈ လႆႈႁပ်ႉၶိုၼ်းပဵၼ်သိပ်းပုၼ်ႈဢၼ်ဝႃႈၼၼ်ႉ ၺႃးၵမ်းၼႆႉယဝ်ႉ”
မၼ်းၵေႃႈၵိုတ်းၵၢၼ်သွၼ်မၼ်းၵႂႃႇသေ “ၸွင်ႇၶႂ်ႈၼွၼ်းႁႃႉ!”
“ဢေႃႈ!!” လုၵ်ႈႁဵၼ်းၶဝ်တွပ်ႇၽွမ်ႉၵၼ်။
“ၼွၼ်းလႄႈၶႂ်ႈၼွၼ်းၵေႃႈ ပေႃးမေႃသွၼ်ပေႃႉၶွၼ်ႉၼိူဝ်ပႅၼ်ႈပုၼ်း 3 ၵမ်းၵေႃႈ တေလႆႈတိုၼ်ႇၼႃႈ”
ၶၢဝ်းယၢမ်းၼႆႉ ပဵၼ်ၶၢဝ်းယၢမ်းၼႂ်းႁွင်ႈႁဵၼ်း တဵတ်ႇယဵၼ်လိူဝ်ပိူၼ်ႈၵေႃႈဝႃႈလႆႈ ယဝ်ႉ။
ၽၢႆႇတၢင်းၼွင်ႉလႅင်ၼၼ်ႉၵေႃႈ မိူၼ်တေငၢႆႈလိူဝ်ပိူၼ်ႈၼႂ်းဝၼ်းမိူဝ်ႈၼႆႉယူႇ၊ သမ်ႉဝႃႈ မီးလုၵ်ႈဢွၼ်ႇလဵၵ်ႉလၢႆလၢႆၵေႃႈ ၵွပ်ႈမၼ်းယၢမ်ႈလႆႈလဵၼ်ႈၵေႃႉၼွင်ႉမႃးတႃႇသေႇလႄႈ တႃႇႁပ်ႉမိုဝ်းၸွမ်း လုၵ်ႈဢွၼ်ႇၼၼ်ႉ မၼ်းၵေႃႈႁပ်ႉမိုဝ်းၵႂႃႇလႆႈ ယူႇယဝ်ႉ။
ထိုင်ယၢမ်းၵၢင်ဝၼ်းၸၢႆႉယဝ်ႉလႄႈ လႅင်းမိူင်းသႂ်ၵေႃႈ ၸူဝ်းႁွင်ႉဢဝ်လုၵ်ႈဢွၼ်ႇၶဝ်တင်းသဵင်ႈ ဢွၵ်ႇမႃးႁဵတ်းတူင်ႇဝူင်းၵႂၢင်ႈၵႂၢင်ႈမွၵ်ႈ သွင်ဝူင်းၼႆႉ တီႈၼႂ်းၵၢင်ပၢင်ႇႁူင်းႁဵၼ်းၶဝ် ၶႂ်ႈႁၢမ်ႉၵႂၢင်ႈယူႇတၢၼ်ႇတၢၼ်ႇၼၼ်ႉ ဢွၼ်ၶဝ်လဵၼ်ႈမီတႅပ်းမိုဝ်းၵၼ်ၼႆယူႇ၊ ဢွၼ်တၢင်းတေလဵၼ်ႈၵေႃႈ လႆႈသပ်းလႅင်းၼႄၵွၼ်ႇယဝ်ႉ။
မီတႅပ်းမိုဝ်း ပဵၼ်တၢင်းလဵၼ်ႈ ဢၼ်တေလႆႈလဵၼ်ႈပဵၼ်မူႇပဵၼ်ၸုမ်းလႄႈ ဢွၼ်တၢင်းသုတ်း ယိပ်းမိုဝ်းၵၼ်ႁဵတ်းပဵၼ်တူင်ႇမူၼ်း လိူၵ်ႈမီမၼ်းမႃးသွင်ၵေႃႉ၊ မီၼၼ်ႉ တေလႆႈလဵပ်ႈပၼ်ႇတူင်ႇမူၼ်းသေ ၵႂႃႇတႅပ်းသႂ်ႇမိုဝ်းၽႂ်ၵေႃႈလႆႈ၊ ၵူၼ်းသွင်ၵေႃႉ မိူဝ်ႈထုၵ်ႇမီတႅပ်းသႂ်ႇၼႂ်းၵၢင်ၼၼ်ႉ တေလႆႈၸၼ်မိုဝ်းၵၼ်လႅၼ်ႈ ဢမ်ႇလႆႈပွႆႇမိုဝ်းၵၼ်၊ တီႈၵူၼ်းလႅၼ်ႈဢွၵ်ႇၵႂႃႇၼၼ်ႉ တေလႆႈဝႆႉပဝ်ႇပၼ်၊ မီလႄႈၵူၼ်းလႅၼ်ႈၼၼ်ႉ တေမႃးႁိမ်ၵၼ်ယူႇတီႈယူႇပဝ်ႇသေ ၽႂ်ဢမ်ႇတၼ်းလႆႈၵေႃႈ တေလႆႈပဵၼ်မီၵႂႃႇထႅင်ႈ ႁဵတ်းၼၼ်တိၵ်းတိၵ်းယဝ်ႉ။ မိူဝ်ႈလၢတ်ႈၼႄလုၵ်ႈဢွၼ်ႇၶဝ် ပွင်ႇၸႂ်ၵၼ်လီယဝ်ႉၵေႃႈ ဢွၼ်ၵၼ်လဵၼ်ႈၵႂႃႇယဝ်ႉ။
ၶၢဝ်းယၢမ်းၶိုၼ်ႈႁဵၼ်းၶဝ်ၵေႃႈ သုတ်းသဵင်ႈၵႂႃႇထႅင်ႈဝၼ်းၼိုင်ႈယဝ်ႉလႄႈ ပူတ်းၸွမ်ပိဝ်ယဝ်ႉသေ ပွၵ်ႈမိူဝ်းႁႃႁိူၼ်းၵႂႃႇ တၢင်းၽႂ်ႁိူၼ်းမၼ်း ယူႇယဝ်ႉ။
ၶမ်းလၢဝ်ၼၼ်ႉတႄႉ သူပ်းၸဵပ်းၼႃႇယဝ်ႉ၊ မွင်းလူင်းႁူင်းႁဵၼ်းၵူၺ်း ၼႅတ်ႈမိူဝ်းၵႂႃႇၸွမ်းလုၵ်ႈႁဵၼ်းၶဝ် ဝၢၼ်ႈၸိင် ၵႂႃႇႁႃမေႃယႃတူၺ်းပၼ် ယူဝ်ၶေးတေၸၢင်ႈၸဵဝ်းၶႅၼ်းဢိတ်းၼိုင်ႈၼႆ ၼၼ်ႉယဝ်ႉ။
ၶမ်းလၢဝ်ႁွတ်ႈထိုင်တီႈႁူင်းယႃယဝ်ႉၼႆၵေႃႈ သဵင်သမ်ႉပေႃးယဵၼ်သီႇသီႇဝႆႉယူႇ။ လွမ်လွမ်ပႆၶဝ်ႈၵႂႃႇတူၺ်းလွႆးလွႆး ၼႂ်းႁွင်ႈယႃ ဢမ်ႇလႆႈႁၼ်ၽႂ် ၵူၺ်းသမ်ႉမီးၵူၼ်းမႃးငွၵ်ႈၸွမ်းတၢင်းလင်မၼ်းၼၼ်ႉလႄႈ သဵင်မေႃးယူႇႁိမ်းႁူမၼ်းဝႃႈ “တူၺ်းသင်ယူႇလႃႇ!”
“ႁိုၺ်ႉ!..” ဢဝ်ၶမ်းလၢဝ်သမ်ႉပေႃးၽႅတ်းလူင်ၵႂႃႇ “ယူဝ်ဝႃႈဢမ်ႇမီးၽႂ်ယဝ်ႉၼႆႉ”
“မႃးႁႃႁူင်းယႃတႄႉဢမ်ႇၸႂ်ႈယူဝ်ႉၼေႃႈ” မေႃယႃဢွၼ်တိုၼ်းလၢတ်ႈၸူး။
“တူၺ်းပၼ်သူပ်းၶႃႈၽွင်ႈ…”
မေႃယႃၵေႃႈယၵ်ႉတူၺ်းၸူးၵႂႃႇ သၢႆတႃသွင်ၶႃ ၶုၼ်ႇလေႃႇတုမ်ႉၺႃးၵၼ် ပၼ်ဢဝ်ၶမ်းလၢဝ် ၸၼ်သီႇသူပ်းမၼ်းဢွၵ်ႇမႃး ၼႄႁွႆးတုမ်ႇလူမ်းမႆႈ ဢၼ်တႅၵ်ႇၵႂႃႇသေ လွၵ်ႈလႅင်ဝႆႉယူႇၼႂ်းသူပ်းဢွၵ်ႇမႃးၼႄယဝ်ႉ လၢတ်ႈၸူးမေႃယႃ
“မၼ်းၸဵပ်းၼႃႇၶႃႈပီႈမေႃ သမ်ႉၵႆႉလႆႈလၢတ်ႈၼႃႇႁေ ပေႃးလၢတ်ႈၵေႃႈသမ်ႉပေႃးၸဵပ်းယဝ်ႉ မၢင်ၵမ်းမႃးၵေႃႈ ပေႃးၶႂ်ႈၵၼ်ႈႁႆႈလူင်ၵႂႃႇတေႉဢေႃႈ ပေႃးဢမ်ႇၶႅၼ်းလႆႈမိူဝ်ႈၼႆႉတႄႉ.. မိူဝ်ႈၽုၵ်ႈပေႃးၼႃႇလိူဝ်ၼႆႉတႄႉ ဢမ်ႇပဵၼ်ႁဵတ်းၵၢၼ်လႆႈယဝ်ႉ”
မေႃယႃၵေႃႈ ၶဝ်ႈၵႂႃႇၼႂ်းႁွင်ႈၼၼ်ႉသေ သိမ်းၶူဝ်းသိမ်းလဵင်းမၼ်း ပၼ်ႁႂ်ႈၶမ်းလၢဝ် မိူၼ်ႇၸိူဝ်ႈတူၺ်းမၼ်းၵႂႃႇယဝ်ႉ လၢတ်ႈၸူး “ပဵၼ်သင်လႄႈဝူၼ်ႉဝႃႈမၼ်းတေၼႃႇမႃးလိူဝ်သေၼႆႉလႃႇ ဝူၼ်ႉဝႃႈမၼ်းတေၶႅၼ်းမႃးလိူဝ်ၼႆႉယူႇၼႆလႄႈ မိူဝ်ႈၽုၵ်ႈၵေႃႈ သူဢမ်ႇပဵၼ်သင်ယဝ်ႉ”
“ႁဵတ်းႁိုဝ်လႄႈဝႃႈဢမ်ႇပဵၼ်သင် ၸဵပ်းပေႃးတၢၼ်ႇၼႆႉ”
“ႁဝ်းၵေႃႈဢမ်ႇၸၢင်ႈၸွႆႈသင်လႆႈၼင်ႇၵဝ်ႇၼႃ တီႈၼႆႈၵေႃႈ သမ်ႉဢမ်ႇမီးယႃႈယႃ တႃႇယူတ်းယႃလူမ်းမႆႈႁေၼေႈ ဢမ်ႇၸၢင်ႈႁဵတ်းႁိုဝ်”
“တေလႆႈပွႆႇမၼ်းၵႂႃႇၸိူင်ႉၼႆၵူၺ်းယဝ်ႉၵႃႈ”
“ဢိုမ်ႈ..မၼ်းပဵၼ်မႃးႁင်းၵူၺ်းၵေႃႈ တေၶႅၼ်းႁင်းၵူၺ်းၼၼ်ႉၼႃႇ”
“ပဵၼ်မေႃယႃမဵဝ်းႁိုဝ်လႃႇ လၢတ်ႈတီႈၵူၼ်းပဵၼ်ၸိူင်ႉၼႆၼႆႉ”
မေႃၵေႃႈ ဢွၵ်ႇႁွင်ႈယႃမႃးသေ ဢိုတ်းသေႃးၽၵ်းတူမၼ်းယဝ်ႉၵေႃႈ မႄးထတ်းတူၺ်းၸွမ်းႁွင်ႈၸိူဝ်းၼၼ်ႉ မိူၼ်တေပိၵ်ႉဢိုတ်းၶႅမ်ႉလႅပ်ႈလီယဝ်ႉၼႆလႄႈ ဢွၵ်ႇႁူင်းယႃမိူဝ်းၵႂႃႇယဝ်ႉ တင်းလၢတ်ႈတင်းပႆၵႂႃႇၸွမ်းၵၼ်။
“မၼ်းဢမ်ႇမီးသင် ယႃယဝ်ႉ တေၶႅၼ်းလႆႈၵမ်းလဵဝ်လေႃႇၼႃ ပေႃးၶႂ်ႈႁႂ်ႈမၼ်းၸဵဝ်းၶႅၼ်းၵေႃႈ ၵိၼ်ၼမ်ႉပၼ်ၼမ်ၼမ်၊ ယဝ်ႉၵေႃႈ မိူဝ်းဢဝ်ၼမ်ႉၵိူဝ်ပုၼ်ႈပၢၵ်ႇ ဝႆႉႁႂ်ႈမၼ်းဢုၼ်ႇဢုၼ်ႇၼႂ်းသူပ်းသေယဝ်ႉ ပုၼ်ႈဢွၵ်ႇ၊ ပေႃးမီးၼမ်ႉၽိုင်ႈၵေႃႈ ဢဝ်ၼမ်ႉၽိုင်ႈတႃးၸွမ်းႁိမ်းႁွမ်း ႁွႆးၸဵပ်းမၼ်းၼၼ်ႉၼႃ ႁိမ်းႁွမ်းမၼ်းၵူၺ်းၼႃႈ ၵႆႉၵႆႉတႃးပၼ်ၵေႃႈဢမ်ႇပဵၼ်သင်၊ ယဝ်ႉၵေႃႈ ပေႃးမၼ်းၸဵပ်းႁႅင်း သူယႃႇပေၵိၼ် တၢင်းၵိၼ်ဢၼ်ၽဵတ်းႁႅင်းၼႃႇ၊ ဢၼ်ၶူဝ်ႈဢၼ်မၼ်းဢၼ်သူမ်ႈၸိူဝ်းၼႆႉၵေႃႈ ယႃႇပေႃးၵိၼ်ၼႃႇၽႅဝ်။ ၵမ်ႈၼမ် ပေႃးၵူၼ်းဝၢၼ်ႈၶဝ်ပဵၼ်လူမ်းမႆႈၵၼ်တႄႉ တေဢမ်ႇမႃးႁူင်းယႃၵၼ် တေယူတ်းယႃၵႂႃႇၸွမ်းလွၵ်းလၢႆးၸိူဝ်းၼႆႉၵူၺ်းၵေႃႈ ၶႅၼ်းၵၼ်ၵႂႃႇယဝ်ႉ”
“တေၶႅၼ်းတေႉယူႇၶႃႈၼေႃႈ..”
“ၶႅၼ်းတေႉၵႃႈ..ပေႃးသူဢမ်ႇႁဵတ်းႁႂ်ႈမၼ်းပဵၼ်မႃးထႅင်ႈၵေႃႈ”
“ၶႃႈတေယုမ်ႇပီႈမေႃလႆႈယူႇႁႃႉၼႆႉ” တင်းသီၼႃႈၶမ်းလၢဝ်ဢၼ်ႁၼ်မေႃယႃယဝ်ႉ ဢမ်ႇၵတ်းယဵၼ်ၸႂ်သေၵႃႈႁိုဝ်ၼၼ်ႉ။
“ပေႃးဢမ်ႇတူၺ်းထိုင်တူဝ်ၵဝ်ႇၵေႃႈ ၵႆႉၸၢင်ႈပဵၼ်လႆႈယူႇၼႃႈ”
“သမ်ႉတေလႆႈႁဵတ်းႁိုဝ်ၶႃႈလႃႇ တေဢဝ်ၶၢဝ်းယၢမ်းသင်မႃးလုမ်းလႃးတူဝ်ၵဝ်ႇ တေႃႈၼင်ႇဢၢပ်ႇၼမ်ႉၵူၺ်းပေႃးဢမ်ႇမီးၶၢဝ်းယၢမ်းလႃႈ” တင်းသီၼႃႈ ဢၼ်ဢမ်ႇႁၢၼ်ႉၸႂ်ၼၼ်ႉသေလၢတ်ႈဢွၵ်ႇမႃး။
မေႃယႃၵေႃႈ ယၵ်ႉတူၺ်းၶမ်းလၢဝ်သေ ယုမ်ႉဢွၵ်ႇမႃးယူႇ“မိူၼ်ၽွင်းၼႆႉ သူတေႁဵတ်းၵၢၼ်ႁိူဝ်ႉၼႃႇပူၼ်ႉတီႈယဝ်ႉၼႃ ထုၵ်ႇလီလိုဝ်ႈႁိူဝ်ႉၼမ်ဢိတ်ႉၼိုင်ႈဢိူဝ်ႈၼႃႈ”
“ႁဵတ်းႁိုဝ်ႁူႉၶႃႈလႃႇ!!”
“ပေႃးၵႆႉၼွၼ်းလိုၵ်းၼႃႇၽႅဝ် ႁဵတ်းႁႂ်ႈပဵၼ်လူမ်းမႆႈငၢႆႈၼႃႇ ၵွပ်ႈၼၼ် ၼင်ႇႁိုဝ်တေဢမ်ႇပဵၼ်မႃးထႅင်ႈၼၼ်ႉ သူထုၵ်ႇလီၼွၼ်းပၼ်ဢိမ်ႇဢိမ်ႇ၊ လူတ်းယွမ်းလွင်ႈသုၵ်ႉၸႂ်ၽွင်ႈ၊ ၵႆႉလဵၼ်ႈဢဵၼ်ႁႅင်း တူင်ႉတူင်ႉၼိုင်ၼိုင်ၽွင်ႈၼၼ်ႉၼႃႇၼႃ”
သွင်ၶႃၵေႃႈ ဢုပ်ႇၵၼ်လူင်ၵႂႃႇၸွမ်းတၢင်း သမ်ႉပေႃးတၼ်းတူၵ်းၵႂႃႇၶိုင်ႈတၢင်း တၢင်းမိူဝ်းဝၢၼ်ႈၶမ်းလၢဝ်ၶဝ် ၼၼ်ႉယဝ်ႉ။
“ပီႈမေႃမႃးတၢင်းၼႆႉႁဵတ်းသင်ၶႃႈလႃႇ ဢမ်ႇမိူဝ်းတီႈႁိူၼ်းႁႃႉ”
“ဢေႃ..မီးၵၢၼ်တီႈဝၢၼ်ႈၼႆႉလႄႈမႃး”
ၶမ်းလဝ်ၵေႃႈ ဝိၼ်ႇဝၢႆႇမုင်ႈတူၺ်းၵႂႃႇတၢင်းဝၢၼ်ႈၸိင်ၼၼ်ႉယဝ်ႉ သိုပ်ႇလၢတ်ႈၸူးၵႂႃႇတီႈမေႃယႃ “ႁူင်းယႃလူင်ၵႂၢင်ႈပေႃးတၢၼ်ႇၼၼ်ႉ ဢမ်ႇႁပ်ႉဝႆႉၵူၼ်းပဵၼ်ၶႃႈႁႃႉ”
“ဢိုမ်ႈ..မိူဝ်ႈၵူႈပွၵ်ႈတႄႉယၢမ်ႈႁပ်ႉယူႇ ၵူၺ်းၵႃႈၸွမ်းလူၺ်ႈငဝ်းလၢႆး မေႃယႃမီးဢေႇၼႃႇလႄႈ မီးလွင်ႈယၢပ်ႇၸႂ် တေလႆႈပုတ်ႈၵၼ်ပႂ်ႉယၢမ်းၵၢင်ၶိုၼ်းၼၼ်ႉၼႃႇ သမ်ႉမီးၽူႈယိင်းၵူၺ်းႁေ ႁဝ်းၵေႃႈလႆႈတႅပ်းတတ်းဝႃႈ တေဢမ်ႇႁပ်ႉၵူၼ်းပဵၼ်မႃးၼွၼ်းတီႈႁူင်းယႃသေ တေယူတ်းယႃၵႂႃႇၸွမ်းၶၢဝ်းယၢမ်းၵူၺ်း၊ ပေႃးမီးလွင်ႈၸမ်ပဵၼ်မႃးတႄႉၵေႃႈ ႁပ်ႉဝႆႉယူႇၵူၺ်းၼင်ႇၵဝ်ႇ”
“ပဵၼ်သင်လႄႈ မႃးပဵၼ်မေႃယႃၶႃႈလႃႇ..”
“မိူဝ်ႈႁဝ်းယူတ်းယႃၵူၼ်းပဵၼ်ၶႅၼ်းၼၼ်ႉ မၼ်းႁဵတ်းႁႂ်ႈႁဝ်းသိူဝ်းၸႂ်ၸွမ်းမၼ်း၊ ႁဝ်းလႆႈၸႂ်ယူတ်းယႃၵူၼ်းလႄႈ ၸင်ႇလႆႈပဵၼ်မေႃယႃယူႇၼႆႉယူဝ်ႉ”
ၶမ်းလၢဝ်ၵေႃႈယၵ်ႉတူၺ်းၼႃႈမေႃယႃၵႂႃႇ ၵူၺ်းဢမ်ႇလႆႈတၵ်းသဵင်သင်
“ၵူၺ်းၵႃႈ ႁဝ်းၵေႃႈ ဢမ်ႇလႆႈၸႂ်မိူၼ်ၵၼ် ဢၼ်လႆႈပဵၼ်မေႃယႃယဝ်ႉ တေလႆႈႁၼ်ၵူၼ်းတၢႆ၊ မၼ်းႁဵတ်းႁႂ်ႈႁဝ်းတိူဝ်ႉၸႂ်လႄႈၶီငဝ်တေႉယဝ်ႉ ဢၼ်ႁဝ်းႁဵတ်းသင်ဢမ်ႇလႆႈ၊ လိူဝ်သေတေလႆႈလၢတ်ႈဝႃႈ မၼ်းပဵၼ်ပိူင်သၽႃႇဝၶူင်းၵၢင်ၼႆႉယဝ်ႉလူး ဢဝ်ၶေႃႈၼႆႉသေပၼ်ႁႅင်းၸႂ်တူဝ်ၵဝ်ႇၵႂႃႇၵူၺ်း”
မေႃယႃၵေႃႈ ႁႅၼ်မုင်ႈၵႂႃႇတၢင်းၼႃႈ ဢၼ်လႆႈမုင်ႈႁၼ်ဝၢၼ်ႈၶမ်းလၢဝ်ယူႇၼၼ်ႉလႄႈ သိုပ်ႇလၢတ်ႈထႅင်ႈဝႃႈ “ပွၵ်ႈဢွၼ်တၢင်းသုတ်း ႁဝ်းလႆႈႁၼ် ၵူၼ်းပဵၼ်ႁဝ်းတၢႆ မၼ်းႁဵတ်းႁႂ်ႈႁဝ်းတႅပ်းတတ်း ဢမ်ႇၶႂ်ႈႁဵတ်းမေႃယႃမႃးၵမ်းလဵဝ်ယဝ်ႉ၊ ထိုင်တီႈလႆႈပၢႆႈမႃးယူႇတီႈဝၢၼ်ႈၸိင်ၼႆႉၼၼ်ႉၼႃႇ”
“ပီႈမေႃဢမ်ႇၸႂ်ႈၵူၼ်းဝၢၼ်ႈၸိင်ၶႃႈႁႃႉ ၶႃႈယူဝ်ဝႃႈပဵၼ်လုၵ်ႈလုင်းႁဵင်ႁဝ်းၶႃႈဢေႃႈၼႆႉ”
“ဢမ်ႇၸႂ်ႈၼႃ..ႁဝ်းၵေႃႈပဵၼ်ၶႅၵ်ႇမိူၼ်သူၵူၺ်း ယူႇၸွမ်းၶဝ်မိူၼ်ၵူၼ်းၼႂ်းၼႃႈႁိူၼ်းလႄႈ မၢတ်ႈၶဝ်မိူၼ်ပဵၼ်ၵူၼ်းၼႃႈႁိူၼ်းလဵဝ်ၵၼ်ယဝ်ႉ”
“ယဝ်ႉ..ႁဵတ်းႁိုဝ်သေလႄႈ ပီႈမေႃသမ်ႉၶိုၼ်းမႃးပဵၼ်မေႃယႃၶိုၼ်းၶႃႈလႃႇ”
“ထိုင်ဝၢၼ်ႈယဝ်ႉ ႁဝ်းတေၵႂႃႇၵွၼ်ႇယဝ်ႉၼႃႈ မိူဝ်းလွႆးလွႆး”
“ၶႃႈယင်းတိုၵ်ႉၶႂ်ႈထွမ်ႇထႅင်ႈယူႇ”
“တၢင်ႇပွၵ်ႈၵွၼ်ႇလႄႈ..”
မေႃယႃၵေႃႈ လတ်းၽၢၼ်ႇၵႂႃႇတၢင်းဢွၵ်ႇဝၢၼ်ႈၼၼ်ႉသေ ၶမ်းလၢဝ်ၵေႃႈ မုင်ႈၼႃႈၵႂႃႇတၢင်းႁိူၼ်းၶဝ် တၢင်းတူၵ်းဝၢၼ်ႈၼၼ်ႉယဝ်ႉ။
