တွၼ်ႈသိပ်းၵဝ်ႈ
ၽုင်ဝူဝ်းၽုင်ၵႂၢႆး လတ်းၽၢၼ်ႇၽႅတ်ႈၼႃႈၶမ်းလၢဝ် မၼ်းသမ်ႉပေႃးဢမ်ႇၸၢင်ႈၶၢမ်ႈတၢင်းလႆႈယဝ်ႉ၊ ဢွၼ်ႇၸၢႆးၸိူဝ်းလိုပ်ႈၵႂၢႆးၶဝ် မႃးတၢင်းလင်ၽုင်ၵႂၢႆးၼၼ်ႉၵေႃႈ လႆႈတူင်ႉတၵ်ႉဢုပ်ႇလၢတ်ႈၸူးၶမ်းလၢဝ်ႁေ
“မေႃသွၼ်!! ပႆႇပွၵ်ႈႁိူၼ်းႁႃႉၶၢဝ်းၼႆႉ”
“ဢိုမ်ႈ! တေမိူဝ်းယဝ်ႉဝႃႈ..” ၶမ်းလၢဝ်ၵေႃႈ ပွၵ်ႈမိူဝ်းၵႂႃႇၸွမ်းၵၼ်တင်း ဢွၼ်ႇၸၢႆးၼၼ်ႉသေ ထၢမ်ၸူးၵႂႃႇ “ပေႉဢွၼ်ၵၼ်မႃးၶမ်ႈလႃႇ…”
“ၸႂ်ႈယဝ်ႈ..ၵႂႃႇၸွမ်းၵူၼ်ႈၶဝ်တိၵ်းတိၵ်းၼၼ်ႉၼႃႇ မေႃသွၼ်ဝႃႈ..”
ၶမ်းလၢဝ်ၵေႃႈသိုပ်ႇထၢမ်ထႅင်ႈ “သူဢမ်ႇၶႂ်ႈၶိုၼ်ႈႁူင်းႁဵၼ်းႁႃႉ…”
ဢွၼ်ႇၸၢႆးၼၼ်ႉၵေႃႈ ၵူမ်ႈႁူဝ်ယဵၼ်လူင်ၵႂႃႇသေ ယၢႆးႁူဝ်မၼ်းယဝ်ႉ ၶူဝ် ႁိုဝ်ႈ.ႁိုဝ်ႈ..ဢွၵ်ႇမႃးဝႃႈ “ဢမ်ႇ..ဢမ်ႇယဝ်ႉၶႃႈ..”
ဢဝ်ၶမ်းလၢဝ်သမ်ႉပေႃးဢမ်ႇၸၢင်ႈသိုပ်ႇၵႂၢမ်းထႅင်ႈယဝ်ႉလႄႈ ထိုင်တၢင်းၽႄယဝ်ႉ ဢွၼ်ၽႄတၢင်းၵၼ်ပွၵ်ႈမိူဝ်းၵႂႃႇ တၢင်းၽႂ်ႁိူၼ်းမၼ်းယဝ်ႉ။
တီႈႁိူၼ်းဢၼ်ဢမ်ႇမီးလႅင်းမိူင်းသႂ်ၼၼ်ႉ သမ်ႉပေႃးယဵၼ်သီႇသီႇလူင်ဝႆႉယဝ်ႉ၊ ဢမ်ႇမီးၵူၼ်းၵႆႉတၵ်ႉၵႆႉလၢတ်ႈယဝ်ႉလႄႈ ဢဝ်မၼ်းသမ်ႉပေႃးငဝ် ၶိုၼ်းၶုၵ်းၸႂ်လႆႈမႃးယူႇ။ ၶမ်ႈၶိုၼ်းၼႆႉ ၶမ်းလၢဝ်ၵေႃႈ ဢမ်ႇပဵၼ်လပ်းလႆႈ ၼင်ႈတဝ်ႉၽိူၼ်တႂ်ႈၾႆးတဵၼ်းလႅင်းဝွႆးဝွႆးယူႇၼၼ်ႉသေ ဝူၼ်ႉလွင်ႈၼိုင်ႈယဝ်ႉလွင်ႈၼိုင်ႈမႃး၊ ၼႂ်းတၢင်းဝူၼ်ႉမၼ်း လွင်ႈၶႂ်ႈႁဵတ်းၶႂ်ႈသၢင်ႈၼၼ်ႉၵေႃႈ တႅမ်ႈဝၢင်းလူင်းၵႂႃႇၼိူဝ်ၽိုၼ်ၸႄႈၼၼ်ႉ ၵမ်းၶေႃႈၵမ်းၶေႃႈ ၸွမ်းၼင်ႇ လႅင်းမိူင်းသႂ်ယၢမ်ႈႁဵတ်းၼႄမၼ်းမႃး ၼၼ်ႉယဝ်ႉ။
ၼႂ်းၶၢဝ်းတၢင်းလၢႆဝူင်ႈ ၵၢၼ်ႁဵၼ်းၵၢၼ်သွၼ် မၼ်းလႄႈတင်းလႅင်းမိူင်းသႂ် လႆႈႁဵတ်းႁူမ်ႈၵၼ်မႃးၼၼ်ႉ မိူၼ်တေၵႂႃႇလႆႈလီယဝ်ႉသေတႃႉ။ ၵူၺ်းၵႃႈ မီးမၼ်းၵေႃႉလဵဝ်ၵူၺ်းယဝ်ႉလႄႈ ၵူႈလွင်ႈၵေႃႈတေလႆႈၶိုၼ်းတႄႇမႂ်ႇယဝ်ႉ ဢမ်ႇဝႃႈ ၽႃႇသႃႇၵၢၼ်ႁဵၼ်း၊ လွၵ်းလၢႆးၵၢၼ်သွၼ်၊ ၸၼ်ႉလႂ်ၸၼ်ႉၼၼ်ႉ တေလႆႈသွၼ်ၸိူင်ႉႁိုဝ်၊ ၼွၵ်ႈၶၢဝ်းယၢမ်းႁဵၼ်းသမ်ႉ တေလႆႈႁဵတ်းသင်ၸိူဝ်းၼႆႉ မၼ်းလႆႈဝၢင်းၽႅၼ်မူတ်းမူတ်း။
ဝၼ်းမိူဝ်ႈၼႆႉလႅတ်ႇၵေႃႈမႆႈ ၾႃႉၵေႃႈပၢင်ႇႁိူဝ်ႈလီ လုၵ်ႈဢွၼ်ႇၶဝ်ၵေႃႈ မႃးႁူင်းႁဵၼ်းၼမ်လႄႈ လႆႈဢွၼ်ၵၼ်ၶဝ်ႈထႅဝ် ႁွင်ႉၵႂၢမ်းတၢင်ႇၸွမ်ပိဝ်ၵႂႃႇသေယဝ်ႉ၊ ဝၢႆးၼၼ်ႉ ၶမ်းလၢဝ်ၵေႃႈ မႃးယူႇပႃႈၼႃႈၶဝ်သေ မႃးလၢတ်ႈလွင်ႈ ၶၢဝ်းယၢမ်းၶိုၼ်ႈႁူင်းႁဵၼ်းတီႈၶဝ်ၵႂႃႇ၊ ၵူႈပွၵ်ႈ တေၶိုၼ်ႈႁူင်းႁဵၼ်း 8:00 မူင်း လူင်း 4:00 မူင်း လႄႈ ႁၼ်ဝႃႈလုၵ်ႈဢွၼ်ႇလႆႈလုၵ်ႉၸဝ်ႉၼႃႇ ဢၼ်ယူႇၵႆသမ်ႉ ႁွတ်ႈၶမ်ႈၼႆသေ မၼ်းၵေႃႈ လႅၵ်ႈလၢႆႈပဵၼ် ၶိုၼ်ႈႁူင်းႁဵၼ်း 9:00 မူင်း လူင်းပၼ်ၶဝ်ၵႂႃႇဝၢႆးဝၼ်း 3:00 မူင်း ၼႆယူႇ၊ ၼင်ႇႁိုဝ်လုၵ်ႈဢွၼ်ႇဢၼ်ယူႇၵႆ ပေႃးတေၸွႆႈထႅမ်တူၺ်းထိုင်ၵၼ်လႆႈၼၼ်ႉၵေႃႈ ႁႂ်ႈဢွၼ်ၵၼ် ၵႂႃႇၵႂႃႇမႃးမႃးၸွမ်းၵၼ်ပဵၼ်ၸုမ်းသေလႄႈ လၢတ်ႈယဝ်ႉၵေႃႈ ပၼ်ႁႂ်ႈၶဝ်ၸႅၵ်ႇၽႄၵၼ်ယူႇၵႂႃႇယဝ်ႉ။
ၼင်ႇၵႃႈႁဵတ်းလႆႈ မၼ်းၶတ်းၸႂ်ႁဵတ်းၵႂႃႇယူႇ သွၼ်ၸၼ်ႉယႂ်ႇယဝ်ႉသေ ႁႂ်ႈၶဝ်တႅမ်ႈ၊ ၶိုၼ်းသိုပ်ႇမႃးသွၼ်ပၼ်ထႅင်ႈၸၼ်ႉၵၢင် ႁႂ်ႈၶဝ်ႁဵတ်းသေ ၶိုၼ်းၵႂႃႇသွၼ်တီႈၸၼ်ႉဢွၼ်ႇယဝ်ႉ၊ ၸၼ်ႉဢွၼ်ႇၼၼ်ႉတႄႉ လႆႈၵႆႉၵႆႉတူၺ်းယူႇတႃႇသေႇ သမ်ႉပေႃးဢမ်ႇၶႂ်ႈပၼ်ႁႂ်ႈၽၢတ်ႇသၢႆတႃလႆႈယဝ်ႉ။ မၢင်ပွၵ်ႈဢမ်ႇတၼ်းတူၺ်းၼႆၵေႃႈ သဵင်ႁွင်ႉသဵင်ႁႆႈၶဝ် ပေႃးဢူၼ်လူင်ၵႂႃႇသဵင်ႈ၊ မၢင်ပွၵ်ႈၵေႃႈ လႅၼ်ႈလူင်မႃးၸူးမၼ်းသေ ႁွင်ႉမၼ်းၵႂႃႇတူၺ်းၶဝ်ႁေ ပဵၼ်ၵၢၼ်ပဵၼ်ငၢၼ်း ပေႃးဢမ်ႇလိုဝ်ႈလႆႈသေဢိတ်း။
ၵၢင်ၼႂ်တႄႉၵေႃႈ သွၼ်လိၵ်ႈပၼ်ၶဝ်တဵမ်တီႈတဵမ်ႁႅင်းယူႇယဝ်ႉ၊ ဝၢႆးဝၼ်းမႃးတႄႉ ၼင်ႇႁိုဝ်မၼ်းတေဢမ်ႇလႆႈႁိူဝ်ႉၼမ်ၼၼ်ႉ ၸင်ႇႁႃလွၵ်းလၢႆးမၼ်းမႃး၊ ဝၼ်းပူၼ်ႉၼၼ်ႉ မၼ်းလႆႈႁၼ်လုၵ်ႈဢွၼ်ႇၶဝ်ပႃးမၢၵ်ႇၶင်ႇမႃးလႄႈ ၸင်ႇလၢတ်ႈႁႂ်ႈလုၵ်ႈဢွၼ်ႇၶဝ် ဢဝ်မၢၵ်ႇၶင်ႇမႃးတေႃႇၵၼ်လဵၼ်ႈယူႇ။ မၢင်ၸိူဝ်းဢၼ်ဢမ်ႇမီးၵေႃႈ ႁႂ်ႈဢွၼ်ၵၼ်ႁဵတ်းသေ မႃးတေႃႇလဵၼ်ႈၸွမ်းၵၼ်ၼႆယဝ်ႉ။ ၸွမ်းၼင်ႇၽႅၼ်ၵၢၼ်မၼ်းဝၢင်းဝႆႉၼၼ်ႉ မၼ်းသမ်ႉပေႃးပႃးၽႃႉတီႈႁိူၼ်းၶဝ်ၵႂႃႇ ၸဵမ်မိူဝ်ႈၵၢင်ၼႂ်ၼၼ်ႉယဝ်ႉလူးၵွၼ်ႇ။ လုၵ်ႈဢွၼ်ႇၸိူဝ်းဢၼ်မေႃႁဵတ်းၵေႃႈႁဵတ်း၊ ဢမ်ႇမေႃၵေႃႈ ႁႂ်ႈၵူၼ်းမေႃမၼ်းႁဵတ်းပၼ်ၵႂႃႇသေ တေႃႇလဵၼ်ႈၸွမ်းၵၼ်ယဝ်ႉ။
မၼ်းၸတ်းၵၢၼ်တီႈလုၵ်ႈဢွၼ်ႇ ၸိူဝ်းသူၼ်ၸႂ်လဵၼ်ႈမၢၵ်ႇၶင်ႇယဝ်ႉ ၸင်ႇသမ်ႉၶိုၼ်းႁွင်ႉဢဝ်လုၵ်ႈဢွၼ်ႇ ဢၼ်ဢမ်ႇလဵၼ်ႈၼၼ်ႉ ၸူဝ်းဢွၼ်ၵၼ်လဵၼ်ႈမၢၵ်ႇၵဵပ်းတီႈၼႂ်းႁွင်ႈႁဵၼ်းၶဝ်ၼၼ်ႉ သမ်ႉပေႃးပဵၼ်ပၢင်ပဵၼ်ပၢင်ယူႇယဝ်ႉ။ တွၼ်ႈတႃႇလုၵ်ႈဢွၼ်ႇဢၼ်ဢမ်ႇပႆႇမေႃလဵၼ်ႈၸိူင်ႉပိူၼ်ႈၼၼ်ႉၵေႃႈ ပၼ်ႁႂ်ႈၶဝ်လဵၼ်ႈႁင်းၶဝ်သေ ႁႂ်ႈပီႈၶဝ်ပႂ်ႉတူၺ်းၸွမ်းၵႂႃႇ။
ပွတ်းၼႂ်သွၼ်လိၵ်ႈ ဝၢႆးဝၼ်းမႃးၵေႃႈ ပၼ်ႁႂ်ႈၶဝ်လႆႈလဵၼ်ႈတၢင်းလဵၼ်ႈ မၢၵ်ႇၶင်ႇမၢၵ်ႇၼိမ်း၊ ၼင်ယိုတ်ႈၼင်ဝႅၼ်ၼင်ၵျွၵ်း၊ တေႃႇၵိၵ်းၵွၵ်းၵွၼ်ႉလိၼ်ၵွၼ်ႉသၢႆးၵေႃႈ ပွႆႇၶဝ်ႈလဵၼ်ႈၵႂႃႇႁဵတ်းၼၼ် ၵူႈဝၼ်းၵူႈဝၼ်း ၶၢဝ်းယၢမ်းၵေႃႈသုတ်းသဵင်ႈၵႂႃႇၼိုင်ႈဝူင်ႈ သမ်ႉပေႃးဢမ်ႇတၼ်းႁူႉတၼ်းႁၼ်သင်ယဝ်ႉ။
ထိုင်ၼင်ႇဝၼ်းသဝ် “မေႃသွၼ်!! မေႃသွၼ်! ” ၶိင်းၵႄႇႁႂ်ႈဢၢႆႈၸွႆႉမႃးႁွင်ႉၶမ်းလၢဝ် မိူဝ်းထူပ်းၸဵမ်ၸဝ်ႉယူႇ။ ၶမ်းလၢဝ်ၵေႃႈ မိူဝ်ႈလႂ်မိူဝ်ႈပဵၼ်ဝၼ်းလိုဝ်ႈ ဢၢၼ်းလုၵ်ႉလႃႈလႃႈၼႆၵေႃႈ ၸင်ႇသမ်ႉမႃးငိၼ်းသဵင်ၵူၼ်းႁွင်ႉၸိုဝ်ႈမၼ်းၸဵမ်ၸဝ်ႉၼႆ ပဵၼ်ဢၼ်ဢမ်ႇႁၢၼ်ႉၸႂ်သေႁိုတ်းသႂ်ႇ ဢၢႆႈၸွႆႉၵႂႃႇ။
“တေႁွင်ႉႁဵတ်းႁင်ၸဵမ်ၸဝ်ႉၸဵမ်ၸဵဝ်း!! ႁွင်ႉယူႇတိၵ်းတိၵ်းၶၢၼ်ႉငိၼ်းၼႃႇယဝ်ႉ”
“ဢူႈႁဝ်းႁႂ်ႈမႃးႁွင်ႉ မိူဝ်းၸူးမၼ်းၼႆဢိူဝ်ႈ!!”
“ဢိူဝ်ႈ!! ၵမ်ႉတေမိူဝ်းလႂ်..”
ပႂ်ႉယူႇတၢင်းႁိုင် ၶိင်းၵႄႇၵေႃႈဢမ်ႇႁၼ်ၶမ်းလၢဝ်မႃးလႄႈ ႁႂ်ႈဢၢႆႈၸွႆႉမႃးႁွင်ႉထႅင်ႈ၊ ၶမ်းလၢဝ်ၵေႃႈ ဢမ်ႇလုၵ်ႉသေဢမ်ႇၵႃး သမ်ႉပၢႆလၢတ်ႈၵႂႃႇၸူးမၼ်းထႅင်ႈ “ပေႃးမၼ်းလူဝ်ႇၵဝ်ၵေႃႈ ႁႂ်ႈမၼ်းမႃးလေႃႇ ၵဝ်ဢမ်ႇလူဝ်ႇမၼ်းလူး!!”
ဢၢႆႈၸွႆႉသမ်ႉပေႃးဢမ်ႇၸၢင်ႈတၵ်းသဵင်လႄႈ ၵႃႈလႆႈမိူဝ်းလၢတ်ႈၶိုၼ်းတီႈၶိင်းၵႄႇၵႂႃႇၸိူင်ႉၼၼ်၊ မိူဝ်ႈၶိင်းၵႄႇလႆႈငိၼ်းၼင်ႇၼၼ်ယဝ်ႉၵေႃႈ ပဵၼ်ဢၼ်ဢမ်ႇႁၢၼ်ႉၸႂ်မႃးယဝ်ႉ၊ ၽိူဝ်လိူဝ်ပဵၼ်ၵူၼ်းႁူဝ်ၶႅင် ၸႂ်ပိတ်းၸႂ်ပွတ်းငၢႆႈယူႇယဝ်ႉ မိူဝ်ႈငိၼ်းၵႂၢမ်းၶေႃႈၼၼ်ႉၵူၺ်း “မၼ်းၶႂ်ႈဝႃႈႁိုဝ်လႃႇမႃႈ ႁွင်ႉမႃးဢမ်ႇမႃးၼႆႉ!!” ဝႅတ်ႉၵူၼ်တႆးယဝ်ႉ ပတ်ႉၶႃၵူၼ်မၼ်းၶိုၼ်ႈသေ ဢဝ်တင်းၶဵၼ်းႁူဝ်ပၢႆႉမႃႇ ယူင်ႇယၢင်ႇယူင်ႇယိင်ႇယဵပ်ႇယၢင်ႈ မႃးတၢင်းႁိူၼ်းၶမ်းလၢဝ်ၶဝ်ၼၼ်ႉယဝ်ႉ။
ၶိင်းၵႄႇၼၼ်ႉၵေႃႈ မိူဝ်းတဝ်ႉဢႅင်ႈယူႇၼႃႈႁိူၼ်းၶမ်းလၢဝ်ၼၼ်ႉႁေ ႁွင်ႉပၢဝ်ႇယူႇ “ႁေႉ!! မေႃသွၼ်..လူင်းမႃးဢိတ်ႉလူးၵဝ်ဝႃႈ..”
ၶမ်းလၢဝ်ၵေႃႈ ဝႂ်ၽႃႈဝႂ်မၼ်းၼၼ်ႉသေ မႃးငွၵ်ႈတီႈၽၵ်းတူယဝ်ႉ “ပေႉမႃးလူဝ်ႇဢီႈႁင်လႃႇ ၽိူဝ်လိူဝ်လႆႈလိုဝ်ႈဢဝ်ဝၼ်းသွင်ဝၼ်းၵူၺ်း”
“မႂ်းပေႉႁဵတ်းႁင်လႃႇ ႁွင်ႉမိူဝ်းၵေႃႈဢမ်ႇမိူဝ်း” ၵၢၼ်းလူင်ၶိုၼ်ႈႁိူၼ်းမႃးၼင်ႈၼိူဝ်ၸၢၼ်းၼၼ်ႉယဝ်ႉ။
“ၼွၼ်းဢေႃႈ!” ၶမ်းလၢဝ်ၵေႃႈ တင်းၽႃႈဝႆႁေ ၼင်ႈတေႃႇၼႃႈၶိင်းၵႄႇယူႇၼၼ်ႉယဝ်ႉ။
“ၶၢဝ်းလႂ်ယဝ်ႉတိုၵ်ႉႁႃၼွၼ်းလႆႈယူႇႁႃႉ.. ပဵၼ်မေႃသွၼ်ပိူၼ်ႈႁေ လီႁဵတ်းပိူင်တႅၵ်ႈၼႄလုၵ်ႈဢွၼ်ႇၶဝ်ဢိူဝ်ႈ ၼႆႉႁမ်ႉလႃႈပေႃးတၢၼ်ႇၼႆႉၵေႃႈ ယင်းတိုၵ်ႉၼွၼ်းလႆႈယူႇ ၼၢႆးၶမ်းလႅင်လူး ၵႂႃႇလႂ်ယဝ်ႉလႃႇ!!”
“တိုၼ်ႇမႃးယဝ်ႉၵေႃႈ ငိၼ်းသဵင်ပီႈၸွႆႉယဝ်ႉလူး..ၶႃႈၵေႃႈတေႁဵတ်းႁိုဝ်ႁူႉ” ၶမ်းလၢဝ်ၵေႃႈ မႄးႁၢဝ်ႁိူမ်ႉတေႃႇၼႃႈၶိင်းၵႄႇၼၼ်ႉသေ “မီးလွင်ႈႁင်ၵေႃႈလၢတ်ႈမႃးလႄႈ ၶႃႈတေလႆႈမိူဝ်းၼွၼ်း”
ၶိင်းၵႄႇၼႃႈႁူႇၼႃႈႁမ်း ယၵ်ႉတူၺ်းၶမ်းလၢဝ် “လုၵ်ႈဢွၼ်ႇယင်းဢမ်ႇၽၢတ်ႇၼူမ်းၵေႃႈ ဢဝ်မႃးႁဵတ်းမေႃသွၼ်ယဝ်ႉ ပဵၼ်မေႃသွၼ်ၵေႃႈ ပေႃးဢမ်ႇမီးတီႈလႂ်လီၼပ်ႉယမ်ႁေဢိတ်း”
“ၶႃႈဢမ်ႇႁႂ်ႈလုင်းၵႄႇႁဝ်းမႃးၼပ်ႉယမ်ၼင်ႇၵဝ်ႇ..”
“သင်ဢမ်ႇႁၼ်ထိုင်ၼၢႆးၶမ်းလႅင်ၶႃပူႇႁဵင်ႁဝ်းတႄႉ ၵဝ်ႁႂ်ႈမိူဝ်းယဝ်ႉ!!..”
“ႁမ်ႉဢမ်ႇႁႂ်ႈၶႃႈမိူဝ်းႁေ!!..”
ၶိင်းၵႄႇၵေႃႈဢမ်ႇတၵ်းသဵင်ယဝ်ႉ “ၵဝ်ၵေႃႈဢမ်ႇႁၼ်လီလေႃႇ ဢၼ်ဢဝ်ၵူၼ်းၸိူင်ႉၼင်ႇမႂ်းမႃးႁဵတ်းမေႃသွၼ်ၼၼ်ႉ၊ ဝၼ်းဝၼ်းၵုမ်ႇႁႂ်ႈလုၵ်ႈဢွၼ်ႇလဵၼ်ႈတိၵ်းတိၵ်းၵူၺ်း လိၵ်ႈလၢႆးၵေႃႈဢမ်ႇသွၼ်ၸိူင်ႉၼႆ ၵဝ်တေမိူဝ်းလၢတ်ႈပူႇႁဵင် ႁႂ်ႈမႂ်းမိူဝ်းၵူၺ်း ပေႃးမႂ်းၶႂ်ႈမိူဝ်း”
ပေႃးလၢတ်ႈၶိူဝ်းမိူဝ်းႁိူၼ်းၼႆ ၼႂ်းၸႂ်ၶမ်းလၢဝ်ၵေႃႈ ပဵၼ်သွင်သဵၼ်ႈမႃးယဝ်ႉ ဢဝ်မၼ်းၼင်ႈသေမိူၼ်ႇမိုင်လူင်ၵႂႃႇ ထၢမ်ၶိုၼ်းၶိင်းၵႄႇ “ၶႃႈတေလႆႈမိူဝ်းတႄႉယူႇႁႃႉ!!”
“ဢိူဝ်ႈ ပေႃးမႂ်းဢမ်ႇသွၼ်လိၵ်ႈ ပၼ်လုၵ်ႈဢွၼ်ႇၶဝ်လဵၼ်ႈယူႇႁဵတ်းၼႆ တင်းဝၼ်းတင်းဝၼ်းတႄႉ မႂ်းၶႂ်ႈယူႇၵေႃႈ ၵဝ်တေႁႂ်ႈမႂ်းမိူဝ်းၵမ်းလဵဝ်ၼၼ်ႉယဝ်ႉ”
ၶမ်းလၢဝ်ဢၼ်ၺႃးဝႃႈၸိူင်ႉၼၼ်ၵေႃႈ မၼ်းဢမ်ႇထုၵ်ႇၼႆလႄႈ ၼႅတ်ႈထဵင်ၵႂႃႇၵမ်းလဵဝ် “လုင်းၵႄႇႁဝ်းတေႁဵတ်းႁိုဝ်ႁူႉလႃႇ ၶႃႈသွၼ်လိၵ်ႈပၼ်ၶဝ်ယူႇ ဢၼ်ႁၼ်ၶဝ်လဵၼ်ႈယူႇၼၼ်ႉၵေႃႈပဵၼ်ၶၢဝ်းလိုဝ်ႈၶဝ်ၵူၺ်းဢိူဝ်ႈၼၼ်ႉ”
“ႁဵတ်းႁိုဝ်!! ၵဝ်တူၺ်းမႃးသွင်သၢမ်ဝၼ်းယဝ်ႉ ပေႃးၵိၼ်ၶဝ်ႈယဝ်ႉၵေႃႈ မႂ်းပေႃးဢမ်ႇသွၼ်လိၵ်ႈယဝ်ႉလူး၊ လိၵ်ႈၵေႃႈဢမ်ႇသွၼ်ႁေ ပၼ်လုၵ်ႈဢွၼ်ႇၶဝ်လဵၼ်ႈယူႇႁဵတ်းၼၼ် လုၵ်ႈဢွၼ်ႇၶဝ်တေလႆႈႁင်လႃႇ ႁႂ်ႈမႃးသွၼ်လိၵ်ႈ မႂ်းသမ်ႉပၼ်ၶဝ်လဵၼ်ႈ ပေႃႈမႄႈၶဝ်ၵူၺ်းဢိူဝ်ႈ လႆႈသႂ်ႇၶဝ်ႈသႂ်ႇငိုၼ်းသေမႃးပၼ်မႂ်း၊ မႃးႁဵတ်းမေႃသွၼ်ဝၢၼ်ႈၼွၵ်ႈ ၶဝ်ႈၽၵ်းၵေႃႈပိူၼ်ႈလဵင်ႉ ငိုၼ်းၵေႃႈပိူၼ်ႈပၼ်ႁေ ၶႂ်ႈၵိၼ်ၶွင်လၢႆလႄႈမႃးၵူၺ်းဢမ်ႇၸႂ်ႈႁိုဝ်လႃႇ”
ၶမ်းလၢဝ်ၵေႃႈလိူတ်ႈၶိုၼ်ႈမႃးယဝ်ႉလႄႈ ၵမ်တႃမိုဝ်းၵႅၼ်ႇၵႅၵ်းၵႅၵ်း ၶိုၼ်ႈသဵင်လၢတ်ႈၸူးၶိင်းၵႄႇၵႂႃႇ “ဝၢၼ်ႈၼွၵ်ႈၵူမ်ႇဢုင် မဵၼ်ၶီႈမဵၼ်သႃးၸိူင်ႉၼႆ ၶႂ်ႈလႆႈငိုၼ်းၶႂ်ႈၵိၼ်ၶွင်လၢႆႁေမႃးၼႆႁႃႉ ပေႃးတၢၼ်ႇဝႃႈၵဝ်ၶႂ်ႈမႃးၼႃႇယဝ်ႉ၊ ၵဝ်ႁဵတ်းမေႃသွၼ်မႃးမီးၵႃႈႁိုဝ်ယဝ်ႉ မီးလႂ်လႃႇငိုၼ်းသူ ၵဝ်တမ်ႉပႆႇလႆႈယိပ်းတူၺ်းႁေမဵတ်ႉႁေပျႃး မီးလႂ်လႃႇၶဝ်ႈသူ ၵဝ်တင်းဢမ်ႇပႆႇလႆႈတၵ်းၵိၼ်တူၺ်းသေဢိတ်း ႁမ်ႉပေႃးလၢတ်ႈဝႃႈ ၵဝ်ၶႂ်ႈလႆႈငိုၼ်းၼႃႇယဝ်ႉ၊ ၼႂ်းဢွၵ်းဢေႃသူၼၼ်ႉ ဢမ်ႇဝူၼ်ႉၶႂ်ႈႁႂ်ႈလုၵ်ႈဢွၼ်ႇသူ ၶိုၼ်ႈယႂ်ႇၸိူင်ႉပိူၼ်ႈၽွင်ႈၼႄႇ ”
မိူဝ်ႈၶမ်းလၢဝ်တဝ်ႉဢႅင်ႈတဝ်ႉဢႅဝ်ႁေ ထဵင်သႂ်ႇၶိင်းၵႄႇယူႇၼႃႈၽၵ်းတူႁိူၼ်းၼၼ်ႉ ၸင်ႇသမ်ႉမီး သၢင်ႇသု ၽူႈမၢႆၶိင်းႁဵင် ႁေႃႈလူတ်ႉၶိူင်ႈႁွတ်ႈမႃးသေ
“မေႃသွၼ်! ပေႃႈႁဵင်ႁဝ်းႁွင်ႉႁႂ်ႈမိူဝ်းၸူးတီႈႁိူၼ်းဝႃႇ”
ၶမ်းလၢဝ်ၵေႃႈ ဢဝ်ၽႃႈၵဵၼ်ၵဵၼ်ပိုဝ်ႈၶဝ်ႈၵႂႃႇတီႈၼွၼ်းမၼ်းၼၼ်ႉသေ မႃးဢဝ်ၼမ်ႉတီႈၸၢႆးၶႃးၼၼ်ႉ ၸုပ်ႉၸုပ်ႉၼႃႈမၼ်းယဝ်ႉၵေႃႈ လူင်းႁိူၼ်း ၶီႇလူတ်ႉၶိူင်ႈမိူဝ်းၵႂႃႇၸွမ်း သၢင်ႇသု ယဝ်ႉ။ ၶိင်းၵႄႇၼၼ်ႉၵေႃႈ ဢမ်ႇယွမ်းလႄႈ တေဢၢၼ်းဢဝ်လွင်ႈၶမ်းလၢဝ် မိူဝ်းလၢတ်ႈၼႄတီႈၶိင်းႁဵင်မိူၼ်ၵၼ်ၼႆသေ ၸွမ်းမိူဝ်းၵႂႃႇတၢင်းႁိူၼ်းၶိင်းႁဵင်ၶဝ်ၼၼ်ႉယူႇ။
ၶမ်းလၢဝ်မိူဝ်းထူပ်းတင်းၶိင်းႁဵင်ႁေ ၶိင်းႁဵင်ၼၼ်ႉၵေႃႈ လႆႈဢၢပ်ႈပၼ်ၶဝ်ႈသၢၼ် ၼိုင်ႈထူင်ၸၢၼ်ႈ မီႇၵီးၶဝ်ႈၽၵ်းၵိူဝ်ၽွင်ဝၢၼ်ၼမ်ႉမၼ်း ႁူမ်ႈၵၼ်ယဝ်ႉ မီးမွၵ်ႈ ၶိုင်ႈထူင်ၼႆႉလႄႈ ငိုၼ်းလိူၼ်မေႃသွၼ်ၵေႃႈမီးပႃးယဝ်ႉ။ ၶိင်းၵႄႇဢၼ်လႆႈႁၼ်ၶမ်းလၢဝ်ႁပ်ႉဢဝ်ငိုၼ်းၼင်ႇၼၼ်ၵေႃႈ သၢႆတႃယၵ်ႉတူၺ်းၸူးၶမ်းလၢဝ် ပႃးလူၺ်ႈလွင်ႈထၢင်ႇလဵၵ်ႉၸွမ်းယူႇ။
“ဢၼ်လၢတ်ႈမိူဝ်ႈၵႆႈၼၼ်ႉ ပေႃးတၢၼ်ႇဝႃႈတေဢမ်ႇဢဝ်ယဝ်ႉ.. ႁိုဝ်ႉ!”
ၶိင်းႁဵင်ၵေႃႈ ဝၢႆႇတူၺ်းၶိင်းၵႄႇသေယဝ်ႉ “ၶိင်းၵႄႇႁဝ်းမႃး မီးလွင်ႈသင်လႃႇဝႃႈ..”
“ႁိူၺ်ႉ..ဢမ်ႇၶႂ်ႈလၢတ်ႈၵေႃႈ ၵႃႈတေလႆႈလၢတ်ႈယဝ်ႉပေႃႈႁဵင်ႁဝ်းဝႃႈ ၶႃႈတူၺ်းမႃး ဝၢႆးသေဢၢႆႈၸၢႆးဢွၼ်ႇၼၼ်ႉမိူဝ်းယဝ်ႉ မေႃသွၼ်ႁဝ်းၵေႃႈ ဢမ်ႇပေႃးပႃးၸႂ်ပႃးၶေႃး သွၼ်လုၵ်ႈဢွၼ်ႇႁေၵႃႈႁိုဝ်ၶႃႈၼေႈ ဝၢႆးဝၼ်းမႃးၵေႃႈ ပၼ်ၶဝ်လဵၼ်ႈၸွမ်းပၢင်ႇႁူင်းႁဵၼ်းၼၼ်ႉယဝ်ႉၶႃႈၼႃႇ”
ၶိင်းႁဵင်ၼၼ်ႉၵေႃႈ ယၵ်ႉတူၺ်းၼႃႈၶမ်းလၢဝ်ႁေ “ႁႃ! ၸႂ်ႈတေႉယူႇႁႃႉမေႃသွၼ်”
ၶမ်းလၢဝ်ၼၼ်ႉၵေႃႈ သၢႆတႃယၵ်ႉတူၺ်းၸူးၶိင်းၵႄႇၼင်ႇဢမ်ႇႁၢၼ်ႉၸႂ်ႁေယဝ်ႉ “ဢမ်ႇၸႂ်ႈၶႃႈ..”
ၶိင်းၵႄႇဢမ်ႇဝူၼ်ႉဝႃႈ ၶမ်းလၢဝ်တေႁတ်းထဵင်မၼ်းသိုဝ်ႈၼႃႈသိုဝ်ႈတႃၸိူင်ႉၼၼ် “ဢၼ်ႁၼ်ယူႇၵူႈဝၼ်းၼၼ်ႉလူး!..”
“ၶႃႈၵေႃႈသွၼ်လုၵ်ႈဢွၼ်ႇယူႇၶႃႈၼႃႇ”
“ပွႆႇၶဝ်လဵၼ်ႈၸိူင်ႉၼၼ် ပိူၼ်ႈႁွင်ႉဝႃႈ သွၼ်လုၵ်ႈဢွၼ်ႇၼႆၵႃႈ”
“ၸႂ်ႈၶႃႈဢေႃႈ! ပေႃးထၢၼ်ႈဝႃႈလုင်းၵႄႇႁဝ်းတၼ်းတူၺ်းပေႃးတၢၼ်ႇၼၼ်ႉ ဢမ်ႇမႃးၸွႆႈၶႃႈသွၼ်ၽွင်ႈၶႃႈလႃႇ”
“ပေႃးၵဝ်မေႃ ၵဝ်ၵေႃႈဢမ်ႇႁႂ်ႈမႂ်းမႃးပဵၼ်မေႃသွၼ်ယဝ်ႉလေႃႇ”
“သင်ဢမ်ႇသင် လုၵ်ႈဢွၼ်ႇဢၼ်ၶႃႈသွၼ်မႃးၼၼ်ႉၵေႃႈ တင်းလႅပ်ႈတေမေႃလိူဝ်လုင်းၵႄႇႁဝ်းၵွၼ်ႇလႃႈ”
ၶိင်းႁဵင်ၼၼ်ႉၵေႃႈ ၼႅတ်ႈတတ်းၵႂၢမ်းၵႂႃႇပႅတ်ႈ “ႁဝ်းၵူၼ်းဝၢၼ်ႈၶဝ်ၵေႃႈ မုင်ႈမွင်းဝႃႈ လုၵ်ႈဢွၼ်ႇၶဝ်တေႁူႉမေႃလိၵ်ႈမေႃလၢႆးၵၼ်မႃးလႄႈ ၸင်ႇလႆႈႁူမ်ႈၵၼ်ႁေ ႁဵတ်းႁူင်းႁဵၼ်းမႃးၼၼ်ႉၶႃႈၼႃႇၼေႃႈ ဝူၼ်ႉဝႃႈမေႃသွၼ်ႁဝ်းၵေႃႈ တေပွင်ႇၸႂ်လီယူႇၶႃႈၼႆ”
ၶမ်းလၢဝ်ၶႃၶိင်းၵႄႇၼၼ်ႉၵေႃႈ ၵႃႈလႆႈဢဝ်သၢႆတႃၸင်းယၵ်ႉတူၺ်းၵၼ်ၵႂႃႇၵူၺ်း။
“မေႃသွၼ်ႁဝ်းၸွင်ႇမီးလွင်ႈလူဝ်ႇသင်ထႅင်ႈႁိုဝ်”
ၶမ်းလၢဝ်ၵေႃႈ ထူၵ်းဢွၵ်ႇမႃးသၢႆမၢႆဢၼ်မၼ်းၶႂ်ႈလႆႈၼၼ်ႉ ပၼ်တီႈၶိင်းႁဵင်ၵႂႃႇ “ပေႃႈႁဵင်ႁဝ်းၸွႆႈႁႃပၼ်ၶူဝ်းၶွင်ၸိူဝ်းၼႆႉၸွင်ႇတေလႆႈၶႃႈ”
ၼႂ်းၼၼ်ႉတႄႉ ပဵၼ်ၶိူင်ႈၵမ်ႉၵႅမ်ၵၢၼ်ႁဵၼ်းတွၼ်ႈတႃႇလုၵ်ႈဢွၼ်ႇၶဝ် မီးၸဵမ် ပပ်ႉလိၵ်ႈ၊ ၸေႈ၊ ၵမ်သီ၊ ၵမ်တႅမ်ႈ၊ ထုၼ်ၶၢဝ်၊ တၢင်းလဵၼ်ႈ မၢၵ်ႇၼင် ၸိူဝ်းၼႆႉယဝ်ႉ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ။
