တွၼ်ႈသိပ်းဢဵတ်း
ၶမ်းလၢဝ်လႄႈလႅင်းမိူင်းသႂ်ၵေႃႈ ဢုပ်ႇတီႈလုင်းႁဵင်ၵႂႃႇတင်းႁိုင် ထိုင်တီႈလႆႈၶေႃႈတူၵ်းလူင်းၵၼ်မႃး လွင်ႈမၵ်းမၼ်ႈဝၼ်းၶိုၼ်ႈႁူင်းႁဵၼ်းသေ၊ လုင်းႁဵင်ၵေႃႈ ၼႄႉၼမ်းလွင်ႈပၢင်ပိုတ်ႇၽုၺ်ႇႁူင်းႁဵၼ်း ဢိၵ်ႇတင်း ပၢင်ႁူပ်ႉထူပ်းပေႃႈမႄႈလုၵ်ႈႁဵၼ်းပႃး ၼႆယူႇ။ ပေႃးမႃးဝူၼ်ႉတူၺ်းၶိုၼ်းယဝ်ႉ ၵူႈတီႈတီႈၼၼ်ႉ တိုၼ်းမီးၵၢၼ်ႁူပ်ႉထူပ်းပေႃႈမႄႈလုၵ်ႈႁဵၼ်းယဝ်ႉ၊ ၵူၺ်းၵႃႈ ၶမ်းလၢဝ်ၼၼ်ႉတႄႉၵေႃႈ ဢမ်ႇႁူႉဝႃႈတေလႆႈႁူပ်ႉၸိူင်ႉႁိုဝ်လႄႈ တေႁဵတ်းသင်ၽွင်ႈ၊ မၼ်းဢမ်ႇတွၼ်ႉယၢမ်ႈလႆႈၶိုၼ်ႈ လႄႈ လႆႈထူပ်းသေပွၵ်ႈလူး ပဵၼ်လွင်ႈဢၼ်ၶဵင်ႇတႃႉတွၼ်ႈတႃႇမၼ်းယူႇ၊ ဢမ်ႇဝႃႈၸိူင်ႉႁိုဝ် မၼ်းၵေႃႈ ၵႃႈတေႁဵတ်းႁႂ်ႈလႆႈယူႇ ႁပ်ႉၵႂၢမ်းလုင်းႁဵင်ၶဝ်ဝႆႉယဝ်ႉလူး။
ဢွၵ်ႇႁိူၼ်းလုင်းႁဵင်ၶဝ်မႃး သီၼႃႈၶမ်းလၢဝ်ၼၼ်ႉၵေႃႈ ႁၢင်ႈဢမ်ႇပိုတ်ႇဢမ်ႇပၢင်ႇသေဢိတ်း၊ ပႆၼိုင်ႈယၢင်ႈၵေႃႈ ထူၺ်ႈၸႂ်လူင်ၼိုင်ႈၵမ်း။
“ပီႈပဵၼ်သင်ထႅင်ႈယဝ်ႉလႃႇ!”
“ဢမ်ႇႁဵတ်းႁေဢမ်ႇလီႁႃႉၼႆႉ ၶႂ်ႈယွင်ႇၼႃႇယဝ်ႉဝႃႈ တေမီးဢီႈသင်ပေႉမႃးသုၵ်ႉသၵ်ႉလူင်တၢၼ်ႇၼႆႉလႃႇ၊ ပဵၼ်မေႃသွၼ်ၵေႃႈ လူဝ်ႇလႆႈသွၼ်လိၵ်ႈၵူၺ်းဢမ်ႇၸႂ်ႈႁိုဝ် ပဵၼ်သင်လႄႈ တေလႆႈမႃးႁဵတ်း ဢၼ်ပုၼ်ႉဢၼ်ၼႆႉၸိူင်ႉၼႆ ၵမ်ႉတေမိူဝ်းၶိုၼ်းႁေယဝ်ႉဝႃႈ”
“ၸၢတ်ႈပၢၼ်ႁဝ်း မၼ်းမီးသင်ငၢႆႈလႃႇ ဢမ်ႇမီးသင်ဢၼ်ငၢႆႈသေလွင်ႈယဝ်ႉ လွင်ႈဢၼ်ယၢပ်ႇလိူဝ်ပိူၼ်ႈၵေႃႈ လွင်ႈဢၼ်ဢမ်ႇပႆႇႁဵတ်းတူၺ်း ၶႃႈယုမ်ႇဝႃႈပီႈႁဵတ်းလႆႈယူႇ”
“ယူဝ်ဝႃႈပိုတ်ႇႁူင်းႁဵၼ်းယဝ်ႉၵေႃႈ တေလႆႈသွၼ်လိၵ်ႈၵႂႃႇယဝ်ႉ ၼႆႉသမ်ႉ လူဝ်ႇပိုတ်ႇႁူင်းႁဵၼ်းၼႆထႅင်ႈၵွၼ်ႇ ပိုတ်ႇႁူင်းႁဵၼ်းၼႆၵေႃႈ သမ်ႉဝႃႈ တေလႆႈႁွင်ႉထူပ်းပေႃႈမႄႈလုၵ်ႈႁဵၼ်းပႃး တေလႆႈလၢတ်ႈၼႄပႃးဝႃႈ ၽႅၼ်ၵၢၼ်သွၼ်လိၵ်ႈၼၼ်ႉ ပဵၼ်ၸိူင်ႉႁိုဝ်ၼႆထႅင်ႈ ဢမ်ႇပႆႇႁၼ်လုၵ်ႈႁဵၼ်း ဢမ်ႇပႆႇႁူႉဝႃႈ ၶဝ်တေပဵၼ်ၸိူင်ႉႁိုဝ် သမ်ႉတေလႆႈလၢတ်ႈၸိူင်ႉႁိုဝ်လႃႇၼႆႉ ပေႃးၽႅၼ်မႃး ဢမ်ႇပဵၼ်ၸွမ်းၼင်ႇၽႅၼ်ၵေႃႈ သမ်ႉတေဝႃႈ လၢတ်ႈယဝ်ႉဢမ်ႇႁဵတ်းၸွမ်းၼႆထႅင်ႈ လုင်းႁဵင်ၼႆႉ မၼ်းပေႉၶႂ်ႈၸႂ်ႉလၢႆးၼမ်လႃႇ ဢမ်ႇဝႃႈၼၼ်ႁႃႉ”
“မၼ်းၵေႃႈ ဢမ်ႇလႆႈလၢႆးၼမ်သင်လေႃႇ ႁူင်းႁဵၼ်းပိူၼ်ႈၵေႃႈတိုၼ်းမီးၸိူင်ႉၼႆယူႇယဝ်ႉလူး၊ မၼ်းပဵၼ်ၵွပ်ႈ လုင်းႁဵင်လဵပ်ႈႁဵၼ်းႁူႉၼမ်ၵူၺ်းဢိူဝ်ႈ..” ၶမ်းလၢဝ်ယၵ်ႉတူၺ်းၼႃႈမၼ်းၵႂႃႇသေ လႅင်းမိူင်းသႂ်ၸင်ႇသိုပ်ႇၵႂၢမ်းၶိုၼ်း“ပီႈၵေႃႈမီးယူႇလူးၽႅၼ် ဢၼ်တိုၵ်ႉၸင်ႇႁႃဢုပ်ႇၵၼ်ဝၼ်းလႂ်ၵူၺ်းၼၼ်ႉ”
ဢဝ်ၶမ်းလၢဝ်မိူၼ်ႇမိုင်လူင်ၵႂႃႇသေ “ဝႃႈႁင်ဝႆႉၵေႃးၼၼ်ႉ”
“ပီႈဝႃႈ လိၵ်ႈတႆး ပီႈဝႆႉယိူင်းမၢႆသုင်သုတ်း တွၼ်ႈတႃႇလုၵ်ႈႁဵၼ်းပီႈၼႆၼႃႇ ၶႃႈတိုၵ်ႉတွင်းဝႆႉယူႇၼႂ်းဢွၵ်းၼႆႉ ၸႅင်ႈလႅင်းလီၼႃႇယဝ်ႉ”
“လၢတ်ႈၼႄၸိူင်ႉၼႆၵေႃႈလႆႈယဝ်ႉၼေႃႈပေႃးၼႆ”
“ယႃႇႁႅင်ႉၶၢၼ်ႉၼႃႇၽႅဝ်လေႃႇဢေႉ”
“မၼ်းဢမ်ႇမီးသင်လူး..”
“ၵႂႃႇလႄႈႁဝ်းၵႂႃႇ..”
“မိူဝ်းယဝ်ႉဢမ်ႇၸႂ်ႈႁႃႉ တေႁႂ်ႈၵႂႃႇလႂ်ထႅင်ႈ”
“ၵႂႃႇႁႃယွၼ်းတၢင်းဝူၼ်ႉတီႈပီႈမေႃၶဝ်ၽွင်ႈဢမ်ႇလီၼႄႇ”
“လီတေႉယဝ်ႉဢၢႆႈၼွင်ႉၸၢႆး!” ၶမ်းလၢဝ်ၵေႃႈ ၵျွၵ်းၵွတ်ႇၼၢဝ်ႉဢဝ်ၶေႃးလႅင်းမိူင်းသႂ် ပေႃးတၢၼ်ႇဝႃႈပဵၼ်ၼွင်ႉၸၢႆးမၼ်းယဝ်ႉ၊ ၼွင်ႉၸၢႆးမၼ်းတေႉတေႉတႄႉ ယင်းဢမ်ႇႁဵတ်းၸိူင်ႉၼႆလႆႈလူးၵွၼ်ႇ။ လႅင်းမိူင်းသႂ်ၼၼ်ႉ သမ်ႉပေႃးလႆႈၵူမ်ႈလူင်ၵႂႃႇလႄႈ မိူၼ်ဢၢပ်ႈၶၢၼ်ၸႂ်ၼႃႇသေ
“ပွႆႇၶႃႈလႆႈယဝ်ႉၼႃႈ!!”
“ဢေႃႈ..ဢိူဝ်ႈ” ၶမ်းလၢဝ်ၵေႃႈ ပွႆႇၶေႃးလႅင်းမိူင်းသႂ်သေယဝ်ႉ ဢွၼ်ၵၼ်မုင်ႈၼႃႈၵႂႃႇတၢင်းႁူင်းယႃ တီႈမေႃယႃဢွၼ်တိုၼ်း ၵႂႃႇႁဵတ်းၵၢၼ်ၼၼ်ႉယဝ်ႉ။
တီႈၼႂ်းႁူင်းယႃ ၵူၼ်းတင်းဢိူင်ႇမႃးပိုင်ႈဢိင်ယူႇၼႆႉၵေႃႈ ဢမ်ႇလႆႈလဵၵ်ႉလဵၵ်ႉၵူၺ်းၼင်ႇၵဝ်ႇ၊ မီးတင်းႁွင်ႈၵူၼ်းပဵၼ် ႁွင်ႈႁဵတ်းၵၢၼ် ႁွင်ႈယႃယႃ မီးယူႇလၢႆလၢႆႁွင်ႈယဝ်ႉ။ မေႃယႃတႄႉၵေႃႈ လိူဝ်သေမေႃယႃဢွၼ်တိုၼ်းယဝ်ႉ မီးမေႃယႃယိင်းၸွႆႈယူႇမွၵ်ႈသွင်ၵေႃႉၼႆႉၵူၺ်း တႃႇတူၺ်းထိုင်ၵူၼ်းပဵၼ်တင်းဢိူင်ႇၼၼ်ႉ ၶႂ်ႈဝႃႈ ပူၼ်ႉမႃႇပူၼ်ႉႁႅင်းဝႆႉယူႇတေႉယဝ်ႉ။
“လူမ်းသင်သေ ၽတ်ႉမႃးႁွတ်ႈထိုင်တၢင်းၼႆႉလႃႇ!!”
“လူမ်းယွင်ႇလႅင်းမိူင်းသႂ်ၼၼ်ႉယဝ်ႉ”
“ၵၢၼ်ၼမ်ယူႇႁႃႉပီႈမေႃ..” လႅင်းမိူင်းသႂ်ထၢမ် လူၺ်ႈဢမ်ႇႁၼ်မီးၵူၼ်းၼၼ်ႉယဝ်ႉ။
မေႃယႃၵေႃႈၼိမ်ယၵ်ႉတူၺ်းလႅင်းမိူင်းသႂ်သေ “တေမႃးၸွႆႈပီႈႁႃႉ!!”
“မႃးယွၼ်းတၢင်းၸွႆႈထႅမ်ၵူၺ်းဢေႃႈမိူဝ်ႈလဵဝ်..” ၶမ်းလၢဝ်လၢတ်ႈၸူး။
မေႃယႃၸင်ႇဝိၼ်ႇဝၢႆႇယၵ်ႉၸူးၶမ်းလၢဝ် ၼင်ႇဢၼ်ၶႂ်ႈႁူႉမႃးသေယဝ်ႉ“မီးလွင်ႈသင်ႁႂ်ႈပီႈၸွႆႈလႃႇထွမ်ႇဝႃႈ”
ၶမ်းလၢဝ်မိူၼ်တေလၢတ်ႈဢမ်ႇဢွၵ်ႇလႄႈ ထူၺ်ႈၸႂ်လူင်ယူႇ ၽိုဝ်ႉ…ၽိုဝ်ႉ…ၵူၺ်း။
“လႆႈႁူပ်ႉတင်းလုင်းႁဵင်ႁဝ်းမိူဝ်ႈၵႆႈၼၼ်ႉ လုင်းႁဵင်ဝႃႈ ႁႂ်ႈမီးပႃးပၢင်ၽုၺ်ႇႁူင်းႁဵၼ်းႁေလႄႈ တေလႆႈလၢတ်ႈၼႄပႃးၽႅၼ်ၵၢၼ် တႃႇတေသွၼ်လုၵ်ႈႁဵၼ်းၶဝ်ၼႆဝႃႇ” လႅင်းမိူင်းသႂ်လၢတ်ႈၼႄၵႂႃႇ။
မေႃယႃတႄႉၵေႃႈ ဢမ်ႇပႆႇလၢတ်ႈသင် ယၵ်ႉတူၺ်းၼႃႈၶမ်းလၢဝ်သေယုမ်ႉယူႇႁဵတ်းၼၼ်ၵူၺ်း၊ ဢမ်ႇႁူႉဝႃႈ ၶဵဝ်ႈငႃးတၢင်ႇၶၢဝ်ၶၢဝ်ဢွၼ်ႇၼၼ်ႉ တုမ်ႉယွၼ်ႈသႂ်ႇသၢႆတႃမေႃယႃယိင်းသွင်ၵေႃႉ ဢၼ်ၼင်ႈၸွမ်းၵၼ်ဢမ်ႇပေႃးၵႆၼၼ်ႉ သမ်ႉပေႃးလႆႈပၢႆႈသွပ်ႉသႅပ်ႉၵၼ်သေ ယုမ်ႉယူႇၸုတ်းၵုတ်းႁင်းၶႃယဝ်ႉ။ ၶမ်းလၢဝ်ၼၼ်ႉတႄႉ ဢမ်ႇတၼ်းတူၺ်းတၼ်းႁၼ်သင်သေ ၵုမ်ႇဝူၼ်ႉထိုင်လွင်ႈၶမ်ၸႂ် ဢၼ်မၼ်းဢမ်ႇၸၢင်ႈၵႄႈၶႆလႆႈၼၼ်ႉၵူၺ်း။
“ၶႃႈဢမ်ႇႁူႉဝႃႈတေႁဵတ်းၸိူင်ႉႁိုဝ်ယဝ်ႉ!..”
“မႃးထၢမ်ပီႈ ပေႃးဢမ်ႇလၢတ်ႈၼႄလွင်ႈတၢင်းမၼ်း ပီႈသမ်ႉတေႁူႉယူႇႁႃႉ ဝႃႈၼွင်ႉတေၶႂ်ႈႁဵတ်းၸိူင်ႉႁိုဝ်ၼႆ”
“မိူဝ်ႈလဵဝ်ဢၼ်ၶႃႈဝူၼ်ႉယူႇၵေႃႈ ၸွင်ႇတေမီးလူတ်ႉမိူဝ်းဝဵင်းႁိုဝ် ဢမ်ႇၼၼ်ၵေႃႈ တေပႆမိူဝ်းႁင်းၵူၺ်းဢဝ် ၼႆႉၵူၺ်းယဝ်ႉ”
“မၼ်းယၢပ်ႇၼႃႇၸွင်ႇၸႂ်ႈႁိုဝ် ယဝ်ႉၵေႃႈႁိူဝ်ႉၼႃႇဢမ်ႇၸႂ်ႈႁႃႉ”
“ၸႂ်ႈယဝ်ႉၶႃႈ ႁိူဝ်ႉတေႉယဝ်ႉ ၵၢၼ်ဢၼ်ၼိုင်ႈပႆႇယဝ်ႉ သမ်ႉပေႃးမႃးထႅင်ႈဢၼ်ယဝ်ႉ ဢမ်ႇႁူႉဝႃႈ မိူဝ်ႈလႂ်တေယဝ်ႉလႆႈ ပေႃးဝႃႈပဵၼ်ၸိူင်ႉၼႆ ဢမ်ႇႁဵတ်းႁေယဝ်ႉ တေလီယူႇႁိုဝ်”
“ၼွင်ႉသမ်ႉဝူၼ်ႉဝႃႈ မၼ်းလီၸိူင်ႉႁိုဝ်လႃႇ ပေႃးဝႃႈဢမ်ႇႁဵတ်း”
လၢတ်ႈဢဝ်ၶမ်းလၢဝ်သမ်ႉပေႃး မိူၼ်ႇမိုင်လူင်ၵႂႃႇတေႉယူႇ မၼ်းၵေႃႈဢမ်ႇတၼ်းဝူၼ်ႉမိူၼ်ၵၼ်ဝႃႈ ပေႃးဢမ်ႇႁဵတ်းမၼ်းလီမိူၼ်ႁိုဝ်ၼႆ၊ ဢၼ်မၼ်းဝူၼ်ႉယူႇၼၼ်ႉတႄႉ သင်ဝႃႈမၼ်းသိုပ်ႇႁဵတ်းၵႂႃႇ မၼ်းၵေႃႈတေႁဵတ်းႁႂ်ႈ လုၵ်ႈဢွၼ်ႇတႃလိူမ်ႈတႃလမ်ၸိူဝ်းၼၼ်ႉ ႁူႉမေႃလိၵ်ႈမေႃလၢႆး ၶဝ်ႈၼႂ်းသဵၼ်ႈတၢင်းၵၢၼ်လဵပ်ႈႁဵၼ်းမႃးလႆႈၼႆ ၼၼ်ႉယဝ်ႉ။ ၶမ်းလၢဝ်ပႆႇၸၢင်ႈလၢတ်ႈသင် မေႃယႃသိုပ်ႇလၢတ်ႈထႅင်ႈ
“ဢမ်ႇမီးသင် ဢၼ်ႁဵတ်းယဝ်ႉ ဢမ်ႇပဵၼ်မႃး ပီႈယုမ်ႇဝႃႈၼွင်ႉႁဵတ်းလႆႈယူႇၵူၺ်း ႁဵတ်းၽိတ်းၵေႃႈဢမ်ႇပဵၼ်သင် မၼ်းပၼ်တွၼ်ႈသွၼ်တႃႇႁႂ်ႈႁဝ်းၵႄႈၶႆယူႇယဝ်ႉ ႁဵတ်းထုၵ်ႇၵေႃႈသိုပ်ႇႁဵတ်းၵႂႃႇ ယႃႇလိုမ်းတူဝ်ၵူၺ်းၵေႃႈပေႃးယဝ်ႉၼႃႈ”
ၶမ်းလၢဝ်ၸင်ႇၶိုၼ်းပိုတ်ႇၵႂၢမ်းလၢတ်ႈထၢမ်ဢွၵ်ႇမႃး “ပီႈဝူၼ်ႉဝႃႈ ပီႈၶႂ်ႈႁႂ်ႈႁူင်းႁဵၼ်းပဵၼ်ႁူင်းႁဵၼ်းၸိူင်ႉႁိုဝ်လႃႇ”
“ဢိုမ်ႈ…ပဵၼ်ႁူင်းႁဵၼ်းဢၼ်မီးမေႃသွၼ် သွၼ်သိူဝ်ႇတၢင်းပၼ်ႁႂ်ႈမေႃလဵပ်ႈႁဵၼ်းႁူႉၵႂႃႇထႅင်ႈ၊ ၵၢၼ်ႁဵၼ်း ႁဵၼ်းတီႈႁူင်းႁဵၼ်း ႁဵၼ်းဢၼ်မေႃသွၼ်သွၼ် မၼ်းၵေႃႈတေယဝ်ႉၵႂႃႇၸွမ်းတီႈႁူင်းႁဵၼ်းၵူၺ်း ၵူၺ်းၵႃႈ ၵၢၼ်လဵပ်ႈႁဵၼ်း သမ်ႉဝႃႈဢမ်ႇမီးမေႃသွၼ် သွၼ်ၵေႃႈ မေႃႁႃလဵပ်ႈႁဵၼ်းႁူႉယူႇတႃႇသေႇ ၼၼ်ႉယဝ်ႉ”
“ၶႃႈဝႃႈ ၶႃႈႁဵတ်းဢမ်ႇလႆႈ ၵွပ်ႈၶႃႈဢမ်ႇမီးသင်သေလွင်ႈ ဢမ်ႇမီးၼမ်ႉၵတ်ႉ တႃႇတေပဵၼ်မေႃသွၼ်၊ သမ်ႉဝႃႈပေႃႈမႄႈၶႃႈ ပဵၼ်မေႃသွၼ်သေတႃႉ ၶႃႈသမ်ႉပဵၼ်ၵူၼ်းၶၢၼ်ႉႁဵၼ်းလိၵ်ႈၵူၺ်း မၼ်းတေပဵၼ်ၵႂႃႇလႆႈၸိူင်ႉႁိုဝ်”
“ဢမ်ႇမီးသင်ဢၼ်ပဵၼ်ၵႂႃႇဢမ်ႇလႆႈ ပေႃးဝႃႈသူလူင်းမိုဝ်းႁဵတ်းယူႇ၊ ဝူၼ်ႉၵႂႃႇလွႆးလွႆးၵေႃႈလႆႈ၊ ဢမ်ႇၸႂ်ႈဝႃႈ လွင်ႈဢၼ်ႁဝ်းလၢတ်ႈၼၼ်ႉ သူတေဢဝ်ၵႂႃႇမူတ်းမူတ်းၼႃ သူႁဵတ်းၵႂႃႇၸွမ်းၼင်ႇဢၼ်သူႁဵတ်းလႆႈလႄႈ ဢၼ်သူၶႂ်ႈႁဵတ်းၼၼ်ႉၵူၺ်းၵေႃႈလႆႈယဝ်ႉ တၢင်းႁၼ်ထိုင်ႁဝ်းၼၼ်ႉ ဝႆႉပဵၼ်ၶေႃႈဝူၼ်ႉသူၵူၺ်းၵေႃႈပေႃးယဝ်ႉ”
ယိုင်ႈလၢတ်ႈယိုင်ႈႁဵတ်းႁႂ်ႈ ၶမ်းလၢဝ်လႆႈဝူၼ်ႉၼမ်မႃးထႅင်ႈၵူၺ်းလႄႈ မၼ်းၵေႃႈ ၼင်ႈၼိမ်ယဵၼ်သေ “ပေႃးယဝ်ႉ..ႁိူၺ်ႉ…” ထူၺ်ႈၸႂ်လူင်ဢွၵ်ႇမႃး ပဵၼ်ဢၼ်ၼၵ်းၸႂ်တေႉတေႉၼၼ်ႉယဝ်ႉ။
ၵမ်းၼၼ်ႉ လႆႈငိၼ်းသဵင်ထူဝ်ႈလင်မေႃးလူင်မႃးသေ မေႃယႃယိင်းၶႃ ဢိၵ်ႇတင်း မေႃယႃဢွၼ်တိုၼ်း ၼႅတ်ႈလႅၼ်ႈဢွၵ်ႇၵႂႃႇတူၺ်းၵမ်းလဵဝ်။ ၶမ်းလၢဝ်ၼၼ်ႉၵေႃႈ မိုင်လူင်ၵႂႃႇတူၺ်းၸွမ်းၶဝ် ၼင်ႇဝႃႈပဵၼ်ဢၼ်သုၵ်ႉသိၵ်ႉသုၵ်ႉသၵ်ႉလူင်ၵႂႃႇမူတ်း။ ၶဝ်ၵေႃႈ ဢဝ်ၵူၼ်းပဵၼ်ဢၼ်ၼွၼ်းယူႇၼႂ်းထူဝ်ႈၼၼ်ႉ မႅၵ်ႇၵႂႃႇဝႆႉၼိူဝ်ၵူႇၼႂ်းႁူင်းယႃသေ မေႃယႃဢွၼ်တိုၼ်းၵေႃႈ ၼႅတ်ႈၸႅတ်ႈတူၺ်း ၽၢင်ႁၢင်ႈၵူၼ်းပဵၼ်ၼၼ်ႉမႃးၵမ်းလဵဝ် ၵူၼ်းၵေႃႉဢၼ်မႃးသူင်ႇၼၼ်ႉတႄႉ ပဵၼ်မေးၵူၼ်းပဵၼ်ၼၼ်ႉယဝ်ႉ။
“ပဵၼ်သင်မႃးၶႃႈလႃႇ!” မေႃယႃၶမ်းဢွင်ႇထၢမ်ၸူး ပႃႈၶွင်ႇမေးၵူၼ်းပဵၼ်လုင်းၺႃႇ။
“မၼ်းမဝ်းလူမ်ႉၼႂ်းၵၢင်ႁိူၼ်းၼၼ်ႉယိုင် ပႃႈၵေႃႈႁႂ်ႈလုင်းသူႉၶဝ်ၼႅတ်ႈဢဝ်မႃးသူင်ႇၼႆႉၼႃႇ”
“ဢွၼ်တၢင်းၼၼ်ႉ ၸွင်ႇၶဝ်ၶၢင်းဝႃႈႁူဝ်ၶႆႈႁူဝ်မဝ်းၸိူဝ်းၼႆႉယူႇၶႃႈႁႃႉ”
“ဢိူဝ်ႈ.. ၶမ်ႈဝႃးမၼ်းၵႂႃႇၼႃးမႃး မၼ်းၵေႃႈလၢတ်ႈယူႇဝႃႈႁိူဝ်ႉဢူၼ်ႈၼႃႇယဝ်ႉၼႆဝႃႇ မိူၼ်ႁူဝ်ၶႂ်ႈမဝ်းမဝ်းဝႆႉၼႆၼင်ႇၵဝ်ႇဢိူဝ်ႈ၊ ၶဝ်ႈၵေႃႈဢမ်ႇၵိၼ်သေယဝ်ႉ ၼွၼ်းၵမ်းလဵဝ်ႁေ၊ ၼႂ်ၼႆႉ ႁွင်ႉလုၵ်ႉၵေႃႈ တေႃႇတေႃႇတေလုၵ်ႉလႆႈ၊ ဝၢႆးသေမၼ်းၵိၼ်ၶဝ်ႈယဝ်ႉၵေႃႈ သမ်ႉပေႃးၼင်ႈဢေႃႉယဝ်ႉၼႃႇ။ ဢၢင်ႈႁႂ်ႈမၼ်းမႃးႁူင်းယႃၸဵမ်ၸဝ်ႉယဝ်ႉ မၼ်းသမ်ႉဝႃႈ လူဝ်ႇၵႂႃႇဢဝ်ဝၼ်းၼၢႆးမူၼ်းၶဝ်ၼႆလႄႈ မၼ်းဝႃႈဢမ်ႇပဵၼ်သင်ၼႆၼၼ်ႉယိုင် မွင်းမၼ်းလုၵ်ႉၶိုၼ်ႈမႃးၵူၺ်း သမ်ႉၵိုင်ႉၵၢင်ႉမဝ်းလူမ်ႉလူင်လူင်းၵႂႃႇၼၼ်ႉၼႃႇ”
မေႃယႃဢွၼ်တိုၼ်းၵေႃႈ မိူၼ်တေႁူႉလႆႈယဝ်ႉဝႃႈ လုင်းၺႃႇၼၼ်ႉ ပဵၼ်တၢင်းပဵၼ်ၶႆႈလိူတ်ႈဢွၵ်ႇၼႆလႄႈ သင်ႇႁႂ်ႈမေႃယႃၶဝ် ႁၢင်ႈႁႅၼ်းပၼ် တႃႇတေယူတ်းယႃလုင်းၺႃႇၼၼ်ႉၵမ်းလဵဝ် ယူႇယဝ်ႉ။
ၵွပ်ႈပဵၼ်ၶၢဝ်းႁိုဝ်ႉၶၢဝ်းၽူၼ်မႃးယဝ်ႉလႄႈ ယုင်းၵေႃႈလိူင်ႇ ၵူၼ်းႁဵတ်းၵိၼ်ႁႆႈသႆႉၵိၼ်ၼႃး ၵႂႃႇၸဝ်ႉမႃးၶမ်ႈ လမ်ထိူၼ်ႇလူမ်ႇဢုင်၊ ၸွမ်းႁိမ်းႁိူၼ်းၸွမ်းတၢင်း ၼမ်ႉဢွၵ်းလွၵ်းဢုၵ်းလုၵ်းလိူင်ႇၼမ်၊ ယူႇၸွမ်းတီႈငိုပ်းတၼ် ၸိူဝ်းဢၼ်ယုင်းၽႄႈငၢႆႈ တႃႇပဵၼ်တၢင်းပဵၼ်လႆႈၼၼ်ႉၵေႃႈ ငၢႆႈတွၼ်ႈတႃႇၸိူဝ်းၵူၼ်းဝၢၼ်ႈၶဝ်ၼၼ်ႉတႄႉတႄႉယဝ်ႉ။
တွၼ်ႈၼႆႉသုတ်းၵႂႃႇယဝ်ႉသိုပ်ႇလူၵႂႃႇထႅင်ႈတွၼ်ႈတေမႃးၶႃႈ။
