တွၼ်ႈသိပ်းသွင်
မေႃယႃယိင်းၶႃသွင်ၵေႃႉၼၼ်ႉၵေႃႈ ယၵ်ႉတူၺ်းၼႃႈၵၼ်သေယဝ်ႉ မေႃယႃၶမ်းဢွင်ႇၸင်ႇလၢတ်ႈ “ထိုင်ၶၢဝ်းယၢမ်းတေလႆႈႁၢင်ႈႁႅၼ်းတႃႇပၼ်ပိုၼ်ႉႁူႉ လွင်ႈတၢင်းပဵၼ်ၼၢဝ်ၼူၵ်ႉလႄႈတၢင်းပဵၼ်ၶႆႈလိူတ်ႈဢွၵ်ႇ တီႈၵူၼ်းၼႂ်းဝၢၼ်ႈၶဝ်ယဝ်ႉ”
“ၸၢင်ႈတေႁဵတ်းႁိုဝ်လႃႇ ပၼ်ယူႇၵူႈပီႊၵေႃႈ ၵူၼ်းပဵၼ်ၵေႃႈယင်းတိုၵ်ႉၼမ်ယူႇၵူႈပီႊၵူၺ်းၼင်ႇၵဝ်ႇ၊ သင်မီးယႃႈႁႄႉၵင်ႈမၼ်းပၼ်ၵူၺ်းဢိူဝ်ႈ ယူဝ်တေၶႅၼ်းမႃး” မေႃယႃၽူၺ်းႁွမ်ၶိုၼ်းလၢတ်ႈၸူး။
“ယွၼ်းၵေႃႈလႆႈတၢင်းယွၼ်းၵူၺ်း ဢမ်ႇႁၼ်ပၼ်ၶေႃႈတွပ်ႇဝႃႈမီးႁေပွၵ်ႈ ႁၼ်ဝႃႈ ယႃဢမ်ႇၵုမ်ႇထူၼ်ႈယူႇတႃႇသေႇ ဢၼ်ႁဝ်းႁဵတ်းလႆႈၵေႃႈ ႁဵတ်းၵႂႃႇၼၼ်ႉၼႃႇ ဢမ်ႇၼမ်ၵေႃႈဢေႇ မၼ်းၸွႆႈလႆႈယူႇၵူၺ်း ၶႅၼ်းလိူဝ်သေႁဝ်းဢမ်ႇႁဵတ်းသင်သေဢိတ်းၼၼ်ႉၼႃႇ”
“သူလၢတ်ႈမႃးၵေႃႈၸႂ်ႈယူႇ ပေႃးဢမ်ႇႁဵတ်း ယူဝ်ၶေးတေၸၢင်ႈပဵၼ်ၼမ်လိူဝ်ၼႆႉၵေႃႈပဵၼ်လႆႈ”
ၶမ်းလၢဝ်ၶႃလႅင်းမိူင်းသႂ်ၼၼ်ႉတႄႉၵေႃႈ ၼင်ႈၼိမ်ယဵၼ်ထွမ်ၶႃဢုပ်ႇၵၼ်ယူႇ။ တီႈႁူင်းယႃၼၼ်ႉ မိူၼ်ၵၢၼ်တေသုၵ်ႉမႃးယဝ်ႉသေ ၶမ်းလၢဝ်ၶႃၵေႃႈဢမ်ႇၸွမ်းသုၵ်ႉယဝ်ႉ ဢွၼ်ၵၼ်ပွၵ်ႈမိူဝ်းၵႂႃႇ သမ်ႉပေႃးဢမ်ႇတၼ်းသူင်ႇသင်ႇ မေႃယႃဢွၼ်တိုၼ်းသင်သေဢိတ်းယဝ်ႉ။
ၼႂ်းဝၼ်းပိုတ်ႇၽုၺ်ႇႁူင်းႁဵၼ်းၵေႃႈမႃးထိုင် မီးၵူၼ်းဝၢၼ်ႈလၢႆလၢႆဝၢၼ်ႈ ဢွၼ်ၵၼ်မႃးၶိုၼ်ႈႁွတ်ႈ၊ လႆႈဝႃႈ မီးၵူၼ်းၼမ်တႄႉတႄႉယူႇယဝ်ႉ။ ၵူၼ်းမၼ်းၼမ်ၼႃႇ သမ်ႉပေႃးလႆႈၼင်ႈပႃးတၢင်းၼွၵ်ႈႁူင်းႁဵၼ်းယူႇယဝ်ႉ။ ၼႂ်းပၢင်ၽုၺ်ႇႁူင်းႁဵၼ်းၼႆႉ မီးလႅင်းမိူင်းသႂ်ပဵၼ်ၽူႈၵႅဝ်ပၢင်ၵႂႃႇလႄႈ ၽိတ်ႈမွၵ်ႇလုင်းႁဵင် ပိုတ်ႇပၢင်ၵႂႃႇပဵၼ်ၵေႃႉဢွၼ်တၢင်းသုတ်းယဝ်ႉ။
“မႂ်ႇသုင်ၶႃႈ ၶႃႈႁဝ်းလုင်းႁဵင်လၢႆးႁိူင်း မိူဝ်ႈၼႆႉႁဝ်းၵေႃႈ ဢဝ်တၢင်းဝၼ်းလီဝၼ်းမျၢတ်ႈၼႆႉသေ ႁဵတ်းပဵၼ်ဝၼ်းပိုတ်ႇၽုၺ်ႇႁူင်းႁဵၼ်းၵႂႃႇ။ ႁူင်းႁဵၼ်းႁဝ်းၶႃႈၼႆႉၵေႃႈလႆႈပိၵ်ႉဢိုတ်းမႃးၶၢဝ်းတၢင်းလၢႆပီႊယဝ်ႉ ၵွပ်ႈဢမ်ႇမီးမေႃသွၼ်မၼ်း၊ ဢၼ်ႁဝ်းၶႃႈလႆႈမီးမႃးႁူင်းႁဵၼ်းၶိုၼ်းၼႆႉၵေႃႈ ၵဝ်ၶႃႈပဵၼ်ဢၼ်ယိၼ်းၸူမ်းတႄႉတႄႉ၊ ၵွပ်ႈပိူဝ်ႈ ပၢႆးပၺ်ႇၺႃႇၼႆႉ ပဵၼ်တႃႇပူၵ်းပွင်ပၼ် လုၵ်ႈဢွၼ်ႇႁဝ်း ႁႂ်ႈမီးတၢင်းႁူႉတၢင်းမေႃ ပူၵ်းပွင်ပၼ်ဝၢၼ်ႈႁဝ်းမိူင်းႁဝ်း ႁႂ်ႈပေႃးၶိုၼ်ႈယႂ်ႇၵႂႃႇဝၼ်းတႃမိူဝ်းၼႃႈၼၼ်ႉၶႃႈယဝ်ႈ။ ၵဝ်ၶႃႈ ဢၼ်ပဵၼ်ၶိင်းႁဵင်ၼႂ်းဢိူင်ႇၼႆႉ ၶႂ်ႈႁႂ်ႈၸိူဝ်းသူ ဢၼ်ပဵၼ်ပေႃႈမႄႈလုၵ်ႈဢွၼ်ႇၵူႈၵေႃႉၼၼ်ႉ ႁႂ်ႈလႆႈဢွၼ်ဢဝ်လုၵ်ႈဢွၼ်ႇ မႃးၶိုၼ်ႈႁဵၼ်းလိၵ်ႈတီႈႁူင်းႁဵၼ်းလင်ၼႆႉလႄႈ ႁႂ်ႈလႆႈၵမ်ႉထႅမ်ပၼ်ၵၢၼ်ႁဵၼ်းလိၵ်ႈႁဵၼ်းလၢႆးၼမ်ၼမ် မီးၵႃႈၼႆႉ မႂ်ႇသုင်ၶႃႈ”
ဝၢႆးလုင်းႁဵင်ၵႂႃႇယဝ်ႉ လႅင်းမိူင်းသႂ်ၵေႃႈ လႆႈၽိတ်ႈပၢင်းၸဝ်ႈသြႃႇဝႃႇလိင်ႇ ဢၼ်ၵွၼ်းဝတ်ႉတီႈဝၢၼ်ႈၸိင်သေ မီးဝႃႇတေႃႇယႂ်ႇလႄႈ ပဵၼ်တီႈၵူၼ်းၼႂ်းဝၢၼ်ႈၼႂ်းသူၼ် ဢွၼ်ၵၼ်ၼပ်ႉယမ်ဝႆႈသႃပႃးၼိုင်ႈ၊ ႁႂ်ႈလႆႈပၼ်ဢေႃးဝႃႇတ ၼႆသေ ၸဝ်ႈသြႃႇၵေႃႈ လႆႈယုၵ်ႉတူဝ်ယေႃးၶိင်း လုၵ်ႉၸုၵ်းသေယဝ်ႉ ယိပ်းဢဝ်မႅၵ်ႉ ဢၼ်ႁိမ်တီႈဝတ်ႉမႃးၼၼ်ႉ မွၵ်ႇလၢတ်ႈပၼ်ဢေႃးဝႃႇတၵႂႃႇ မၼ်းၶႂ်ႈယၢဝ်းဝႆႉလႄႈ ၶမ်းလၢဝ်သမ်ႉပေႃးငဝ်ၼွၼ်းလပ်းၵႂႃႇယဝ်ႉ။ ဝၢႆးသေၸဝ်ႈသြႃႇ ယဝ်ႉၵႂႃႇယဝ်ႉ ထိုင်ၵမ်းၶမ်းလၢဝ်တေလႆႈၵႂႃႇလၢတ်ႈလႄႈ ၶမ်းလၢဝ်ၵေႃႈ ၵွပ်ႈဢမ်ႇတွၼ်ႉယူႇပႃႈၼႃႈၵူၼ်းၼမ် သၢႆတႃၵူၼ်းယၵ်ႉတူၺ်းၸူးမၼ်းၵေႃႉလဵဝ်ၸိူင်ႉၼႆ ၸႂ်သၼ်ႇဢမ်ႇၵႃး တူဝ်ၵေႃႈသၼ်ႇပႃးယဝ်ႉ။
လွင်ႈဢၼ်မၼ်းဝႃႈ ယၢပ်ႇၼႃႇ၊ လွင်ႈဢၼ်မၼ်းဝႃႈ ၵူဝ်ၼႃႇၼၼ်ႉ ဢမ်ႇတၢၼ်ႇဢၼ်မၼ်းလႆႈႁူပ်ႉယူႇယၢမ်းၼႆႉယဝ်ႉ၊ တေလၢတ်ႈသင်ၵေႃႈ သမ်ႉပေႃးမိုင်ၵႂင်လူင်ၵႂႃႇမူတ်း ၶိုၼ်ႈၵႂႃႇယူႇတၢင်းၼႃႈၼၼ်ႉသေ မိုင်ယဵၼ်ၵႂႃႇတၢင်းႁိုင်ယူႇ မိူဝ်ႈႁႅၼ်မုင်ႈတူၺ်းၵႂႃႇတၢင်းၼွၵ်ႈႁူင်းႁဵၼ်းၼၼ်ႉ လႆႈႁၼ်မေႃယႃဢွၼ်တိုၼ်း ၸုၵ်းယူႇသေယဝ်ႉ ယၵ်ႉတူၺ်းၸူးမၼ်းမႃးလႄႈယုမ်ႉၸူးသေ ငွၵ်းၼႃႈၸူးၼင်ႇပၼ်ၾၢင်ႉမၼ်းၵႂႃႇ၊ မၼ်းၵေႃႈလႅပ်ႈတေလႆႈသတိမႃးယဝ်ႉလႄႈ ထူၺ်ႈၸႂ်ၶဝ်ႈလိုၵ်ႉလိုၵ်ႉသေယဝ်ႉ ယၵ်ႉတူၺ်းလႅင်းမိူင်းသႂ် ဢၼ်ၵမ်မိုဝ်းယုၵ်ႉၶႅၼ်ၶိုၼ်ႈၼင်ႇလၢတ်ႈၼႄဝႃႈ “ၶတ်းၸႂ် ပီႈႁဵတ်းလႆႈယူႇ” ၼႆၼၼ်ႉယဝ်ႉ။
“မႂ်ႇသုင်ၶႃႈ.. ၶႃႈၸိုဝ်ႈ ၶမ်းလၢဝ် ဢၼ်တေမႃးပဵၼ်မေႃသွၼ် တီႈႁူင်းႁဵၼ်းၼႆႉၶႃႈဢေႃႈ… ဢိူဝ်ႈ…ၵွပ်ႈဝႃႈ…” မႆႈၵေႃႈမႆႈ ႁိူဝ်ႇၵေႃႈယွႆႉမႃးယဝ်ႉ ၼႂ်းၸႂ်ၼႂ်းၶေႃးၼႆႉ ၼင်ႇႁၢင်ႈပေႃးသုၵ်ႉသိၵ်ႉသုၵ်ႉသၵ်ႉလူင်ၵႂႃႇမူတ်း၊ လႅင်းမိူင်းသႂ် ႁၼ်ၼင်ႇၼၼ်ၵေႃႈ ၸင်ႇဢဝ်ၶူတ်ႇၼမ်ႉတမ်းပၼ်သေ ဢဝ်တၢင်းၽိုၼ်ၸေႈဢၼ်ၼိုင်ႈ ယိုၼ်ႈပၼ်ၶမ်းလၢဝ်ၵႂႃႇ။ “ပီႈ..ဢမ်ႇပဵၼ်သင်ၼႃ မီးၶႃႈယူႇ”
သၢႆတႃယၵ်ႉတူၺ်းၸူးလႅင်းမိူင်းသႂ် ၼႄႁႂ်ႈႁၼ်ဝႃႈမၼ်းလူဝ်ႇတၢင်းၸွႆႈထႅမ်တေႉတေႉၼၼ်ႉယဝ်ႉ ၸင်ႇလႆႈယိပ်းဢဝ်ၸေႈၼၼ်ႉၶိုၼ်ႈမႃး ပဵၼ်ၸေႈဢၼ်လႅင်းမိူင်းသႂ် တႅမ်ႈဝႆႉလွင်ႈၽႅၼ်ၵၢၼ်၊ ယိူင်းဢၢၼ်း ဢၼ်ၶႃလႆႈဢုပ်ႇၵၼ်ဝႆႉၼၼ်ႉ ဢိၵ်ႇတင်း ၶေႃႈၵႂၢမ်းတႃႇၶမ်းလၢဝ်တေလၢတ်ႈတူင်ႉတၵ်ႉၸိူဝ်းၼႆႉယူႇယဝ်ႉ။
“ယူႇတီႈၶႃႈႁဝ်းၵေႃႈ ပဵၼ်ၵူၼ်းဢၼ်ဢမ်ႇလႆႈမီးတၢင်းႁူႉတဵမ်ထူၼ်ႈ ဢမ်ႇလႆႈၵတ်ႉၶႅၼ်ႇလူင်ႉလႅၼ်ႇ မီးၼမ်ႉၵတ်ႉပဵၼ်မေႃသွၼ်လႆႈၼႆသေတႃႉ ၵူၺ်းၵႃႈ တွၼ်ႈတႃႇႁႂ်ႈလုၵ်ႈဢွၼ်ႇ ဢၼ်ဢမ်ႇပႆႇမေႃပႆႇႁူႉလိၵ်ႈလၢႆးသင်သေ ႁႂ်ႈပေႃးမေႃမႃးၼၼ်ႉ တေၶတ်းၸႂ်ၸွမ်းၼင်ႇ ႁႅင်းတူဝ်ႁႅင်းၸႂ်မီး တေၶတ်းၸႂ်သႂ်ႇႁႅင်းပွင်သၢင်ႈပၼ်ယူႇဢေႃႈ။ သမ်ႉဝႃႈ ၶႃႈတေၶတ်းၸႂ်တၢၼ်ႇလႂ်ၵေႃႈ တေဢမ်ႇႁဵတ်းလႆႈလီတၢၼ်ႇ ၵေႃႉပဵၼ်ပေႃႈမႄႈလုၵ်ႈႁဵၼ်းၶဝ်လႆႈၼင်ႇၵဝ်ႇၶႃႈ၊ ၵွပ်ႈပိူဝ်ႈ ၵေႃႉသင်ႇသွၼ်မၢႆ 1 ၼၼ်ႉ ပဵၼ်ပေႃႈမႄႈၵူႈၵေႃႉၶႃႈဢေႃႈ ယွၼ်ႉၼၼ် ယူႇတီႈၶႃႈႁဝ်းၵေႃႈ ၶႂ်ႈယွၼ်းတၢင်းႁူမ်ႈမိုဝ်းၸွမ်း ပေႃႈမႄႈပီႈၼွင်ႉႁဝ်းၶဝ်ၵူႈၵေႃႉ ၸွႆႈၵမ်ႉထႅမ်ပၼ်ႁႅင်း လုၵ်ႈဢွၼ်ႇႁဝ်းၶဝ် ႁႂ်ႈလႆႈမႃးၶိုၼ်ႈႁူင်းႁဵၼ်းၵၼ်ၶႃႈဢေႃႈ၊ ၵွပ်ႈပိူဝ်ႈႁူင်းႁဵၼ်းႁဝ်းၶႃႈၼၼ်ႉ ဢမ်ႇလႆႈသွၼ်လိၵ်ႈမဵဝ်းလဵဝ်ၵူၺ်း ႁဝ်းယင်းတေ..”
ဢဝ်ၶမ်းလၢဝ်ၵိုတ်းမိုင်လူင်ၵႂႃႇသေယၵ်ႉတူၺ်းၼႃႈ လႅင်းမိူင်းသႂ်ယဝ်ႉ ထူၺ်ႈၸႂ်လူင်မႃးထႅင်ႈၵမ်းၼိုင်ႈ ၶိုၼ်းသိုပ်ႇဢၢၼ်ႇၵႂႃႇထႅင်ႈ “ႁဝ်းယင်းတေပူၵ်းပွင်ပၼ်ၼမ်ႉၵတ်ႉ ႁႂ်ႈမေႃပူၵ်းပွင်တူင်ႇဝူင်းလႄႈ ပူၵ်းပွင်ၼမ်ႉၵတ်ႉတူဝ်ၵဝ်ႇလႆႈၵွၼ်ႇဢေႃႈ၊ သမ်ႉဝႃႈၶႃႈဢမ်ႇလႆႈမီးၼမ်ႉၵတ်ႉၽၢႆႇၼႆႉသေတႃႉၵေႃႈ တေႁႃၵူၼ်းဢၼ်မီးၼမ်ႉၵတ်ႉ မႃးပူင်သွၼ်ပၼ်ၵႂႃႇယူႇ ဢမ်ႇၸၢင်ႈဝႃႈ ပေႃႈမႄႈပီႈၼွင်ႉႁဝ်းၶဝ် ဢၼ်ၼင်ႈယူႇၼႂ်းၼႆႉၼၼ်ႉ တေၸၢင်ႈပဵၼ်မေႃသွၼ်ပၼ် လုၵ်ႈႁဵၼ်းႁဝ်းၵေႃႈပဵၼ်လႆႈယူႇၶႃႈ”
ၶမ်းလၢဝ်ၵေႃႈ ဢမ်ႇဢဝ်ၸေႈဢၼ်လႅင်းမိူင်းသႂ်တႅမ်ႈပၼ်မၼ်းၼၼ်ႉယဝ်ႉလႄႈ ၶိုၼ်းလၢတ်ႈၵႂႃႇၸွမ်းၼင်ႇဢၼ်မၼ်းၶႂ်ႈလၢတ်ႈၼၼ်သေဝႃႈ
“ၸွမ်းၼင်ႇဢၼ်ႁူႉဢၼ်မေႃႁေ ဢမ်ႇမေႃႁေၼၼ်ႉ တေၶတ်းၸႂ်ႁဵတ်းၵႂႃႇ ၼင်ႇၵႃႈႁဵတ်းလႆႈ လီလိူဝ်သေဢမ်ႇလႆႈႁဵတ်းသင်ၶႃႈဢေႃႈ၊ ၵွပ်ႈၼၼ်လႄႈ ၼင်ႇဢၼ်ႁဝ်းၶႃႈပဵၼ်တႆးသေယဝ်ႉ ဢၼ်ႁဝ်းထုၵ်ႇလီႁႂ်ႈလုၵ်ႈဢွၼ်ႇႁဝ်း လႆႈႁူႉလႆႈမေႃၼၼ်ႉၵေႃႈ လိၵ်ႈတႆးၶႃႈယဝ်ႉ၊ လိၵ်ႈတႆး မေႃယဝ်ႉတေလႆႈဢဝ်ၸႂ်ႉတိုဝ်းတီႈလႂ်၊ ႁူႉယဝ်ႉဢမ်ႇၸၢင်ႈဢဝ်ၵႂႃႇႁဵတ်းသင်လႆႈ ၽႂ်ၵေႃႈတမ်ႉဢမ်ႇၸႂ်ႉလိၵ်ႈႁဝ်းၼင်ႇၵဝ်ႇ ၶႃႈယၢမ်ႈလၢတ်ႈတီႈဢူႈႁဝ်းၶဝ်ဢေႃႈ ၵူၺ်းၵႃႈ ၶဝ်တွပ်ႇဝႃႈႁိုဝ်ၼႆ ၸွင်ႇႁူႉၶႃႈႁိုဝ် ၶဝ်လၢတ်ႈဝႃႈ “ႁဵၼ်းႁႂ်ႈမေႃဢဝ်ၵႂႃႇၸႂ်ႉတိုဝ်းလႆႈ၊ ႁူႉယဝ်ႉႁႂ်ႈဢဝ်ၵႂႃႇႁဵတ်းသင်ၵေႃႈလႆႈ၊ လိၵ်ႈႁဝ်းၵႂၢမ်းႁဝ်း တေႁႂ်ႈၽႂ်မႃးၸႂ်ႉလႃႇ ပေႃးႁဝ်းဢမ်ႇၸႂ်ႉ၊ ပေႃးႁဝ်းဢမ်ႇႁဵတ်းႁႂ်ႈပိူၼ်ႈ ႁူႉၸၵ်း ၽႂ်သမ်ႉတေမႃးထၢမ်ႁႃ၊ မိူင်းၽႂ်မိူင်းမၼ်း ၶိူဝ်းၽႂ်ၶိူဝ်းမၼ်း ၶဝ်ၵေႃႈမီးလိၵ်ႈလၢႆးႁင်းၽႂ်ႁင်းမၼ်းယဝ်ႉ၊ ႁဝ်းၵေႃႈမီးလိၵ်ႈႁဝ်းယူႇယဝ်ႉ ၵွပ်ႈသင် သမ်ႉတေလႆႈၵႂႃႇဢဝ်လိၵ်ႈပိူၼ်ႈမႃးၸႂ်ႉတေႃႇၵၼ် ႁဝ်းၸႂ်ႉလိၵ်ႈလၢႆးႁဝ်းၵူၺ်း ဢမ်ႇလီႁိုဝ်” မၼ်းၵေႃႈလၢတ်ႈတီႈၶႃႈၸိူင်ႉၼႆၶႃႈဢေႃႈ၊ မၼ်းၵေႃႈလၢတ်ႈထႅင်ႈဝႃႈ “ဢမ်ႇၸႂ်ႈဝႃႈမေႃလႆႈလိၵ်ႈႁဝ်းမဵဝ်းလဵဝ်ၵူၺ်း လိၵ်ႈပိူၼ်ႈၵႂၢမ်းပိူၼ်ႈၵေႃႈ လီလႆႈမေႃယူႇ ယိုင်ႈႁဝ်းႁူႉမေႃၼမ်ယိုင်ႈႁဝ်းႁၼ်ၵႂၢင်ႈမႃးၼၼ်ႉယဝ်ႉ၊ ယႃႇလူင်လိုမ်းဝႃႈ လိၵ်ႈလၢႆးၼၼ်ႉ ဢွၼ်ႁဝ်းၶိုၼ်ႈယႂ်ႇၵႂႃႇလႆႈ၊ ဢွၼ်တူင်ႇဝူင်းႁဝ်းၶိုၼ်ႈယႂ်ႇမႂ်ႇသုင်လႆႈ၊ သွၼ်ႁႂ်ႈႁဝ်းမေႃႁႃလဵပ်ႈႁဵၼ်းၵူၺ်း ဢမ်ႇဝႃႈယူႇတီႈလႂ်ၵေႃႈ ယႃႇၵိုတ်းတႃႇတေလဵပ်ႈႁဵၼ်းၼႃႈ” မိူဝ်ႈၶႃႈတေမႃးတီႈၼႆႈ ၶဝ်ၵေႃႈလႆႈသင်ႇလၢတ်ႈၶႃႈၸိူင်ႉၼႆယဝ်ႉ”
မိူၼ်ဝႃႈၵူၼ်းယူႇၼွၵ်ႈႁူင်းႁဵၼ်းၼၼ်ႉ တေမႆႈမႃးယဝ်ႉလႄႈ ဢွၼ်ၵၼ်သေႃႉႁႃႁူမ်ႈယူႇႁင်းၽႂ်ႁင်းမၼ်းယဝ်ႉ ၶမ်းလၢဝ်ၵေႃႈ ၸင်ႇၶိုၼ်းလၢတ်ႈထႅင်ႈ “တွၼ်ႈတႃႇတေသွၼ်ပၼ်လုၵ်ႈႁဵၼ်းႁဝ်းၶဝ်ၼၼ်ႉ ယူႇတီႈၶႃႈၵေႃႈ ဝူၼ်ႉဝႃႈတေသွၼ်ပၼ်လိၵ်ႈတႆး ႁႂ်ႈပေႃးမေႃဢၢၼ်ႇ၊ မေႃတႅမ်ႈမႃးလႆႈ ၵွပ်ႈပိူဝ်ႈၶဝ်မေႃလၢတ်ႈယူႇယဝ်ႉၶႃႈလူး မၼ်းၵေႃႈတေဢမ်ႇယၢပ်ႇတွၼ်ႈတႃႇၶဝ် လိုၼ်းသုတ်းမႃးၵေႃႈ ၶႂ်ႈယွၼ်းတၢင်းႁူမ်ႈမိုဝ်း ပေႃႈမႄႈပီႈၼွင်ႉႁဝ်းၶဝ်ၵူႈၵေႃႉ ၵမ်ႉၸွႆႈပၼ်ႁႅင်းၵၢၼ်ႁဵၼ်းပၢႆးပၺ်ႇၺႃႇ သေၵမ်းၶႃႈဢေႃႈ ယိၼ်းၸူမ်းၶွပ်ႈၸႂ်ၶႃႈ”
သဵင်တူပ်းမိုဝ်း လင်ၼၼ်ႈတူဝ်ႈတင်းႁူင်းႁဵၼ်းယူႇယဝ်ႉ။ မိူၼ်ဝႃႈ ဢၼ်ယူႇပႃႈၼွၵ်ႈႁူင်းႁဵၼ်းၼၼ်ႉတႄႉ ဢမ်ႇလႅပ်ႈလႆႈငိၼ်းၵၼ်ၼင်ႇၵဝ်ႇ ႁၼ်ပိူၼ်ႈတၢင်းၼႂ်းတူပ်းလႄႈ တူပ်းၸွမ်းၵူၺ်း၊ ၸဵမ်မိူဝ်ႈၶဝ်ႈႁူင်းႁဵၼ်းမႃး ႁႃတီႈၼင်ႈလီလီငၢမ်းငၢမ်းသေ ႁႃဢုပ်ႇၵၼ်ယဝ်ႉၼႃႇ ပေႃးဢမ်ႇၸႂ်ႈဝၼ်းၸိူင်ႉၼႆၵေႃႈ ဢမ်ႇတေႃႇတေႃႇတေလႆႈမႃးၺႃးၵၼ်ၼင်ႇၵဝ်ႇလူး။
လႅင်းမိူင်းသႂ်ၵေႃႈ လၢတ်ႈၼႄပၵ်းပိူင်ႁူင်းႁဵၼ်းသေယဝ်ႉ ၶွတ်ႇယွတ်ႈပၢင်ၽုၺ်ႇႁူင်းႁဵၼ်း ပဵၼ်ဢၼ်ယဝ်ႉတူဝ်ႈၵႂႃႇယူႇယဝ်ႉ။ ဝၢႆးသေပၢင်ၽုၺ်ႇႁူင်းႁဵၼ်းယဝ်ႉၵႂႃႇ လုင်းႁဵင်ၶဝ်ၵေႃႈ တူင်ႉတၵ်ႉၸူးၶမ်းလၢဝ်သေ “ဝၼ်းမိူဝ်ႈၼႆႉ ႁဵတ်းလႆႈလီယဝ်ႉၼႃႈယိင်း.. ၶတ်းၸႂ်လႄႈၼႃႈ.. လူဝ်ႇတၢင်းၸွႆႈထႅမ်သင်ၵေႃႈလၢတ်ႈလႆႈယူႇၵူၺ်း ၶိူင်ႈၵမ်ႉၵႅမ်ၵၢၼ်ႁဵၼ်းၵၢၼ်သွၼ်ၸိူဝ်းၼႆႉတႄႉ လုင်းတေၶပ်းၶိုင်ပၼ်လႂ်”
“ယိၼ်းၸူမ်းယဝ်ႉၶႃႈ” လႅင်းမိူင်းသႂ်လၢတ်ႈတၢင်ၵႂႃႇ။
လုင်းႁဵင်ၵေႃႈပွၵ်ႈမိူဝ်း ၵူၼ်းဝၢၼ်ႈၶဝ်ၵေႃႈ ဢွၼ်ၵၼ်လႆမိူဝ်းလႆမိူဝ်းၵႂႃႇ ႁင်းၽႂ်ႁင်းမၼ်းယူႇယဝ်ႉ။
ၶမ်းလၢဝ်ၼၼ်ႉၵေႃႈ မိူဝ်ႈမၼ်းလၢတ်ႈၵႂႃႇယဝ်ႉၼၼ်ႉ လႆႈမႃးၼင်ႈငိူဝ်ႈယူႇႁိမ်း လႅင်းမိူင်းသႂ် သမ်ႉပေႃးဢမ်ႇတၵ်းသဵင်သင်သေဢိတ်းယူႇ။
“ပီႈပဵၼ်သင်ၵႂႃႇယဝ်ႉလႃႇ” ၶဝ်ႇၶွၼ်းႁူဝ်မႃႇၶမ်းလၢဝ်ယူႇ။
သႅင်ၼူၼ်းၼၼ်ႉၵေႃႈ မႃးယိပ်းဢဝ်မိုဝ်းၶမ်းလၢဝ်သေယဝ်ႉ “ပီႈလၢတ်ႈၶႅမ်ႉတေႉယဝ်ႉၶႃႈ ႁဵတ်းႁႂ်ႈၶႃႈသမ်ႉပေႃးၶႂ်ႈၶိုၼ်ႈႁူင်းႁဵၼ်းမႃးယဝ်ႉဢေႃႈၼႆႉ”
“ၸိူင်ႉၼၼ်ႁႃႉ…” ထူၺ်ႈၸႂ်လူင်မႃး ပႃးတင်းသီၼႃႈဢၼ်ဢမ်ႇလီသေၵႃႈႁိုဝ်ၼၼ်ႉယဝ်ႉ။
“ပီႈပဵၼ်သင်ၵႂႃႇယဝ်ႉလႃႇႁမ်ႉ” လႅင်းမိူင်းသႂ်ထၢမ်ၸူး။
ယၵ်ႉတူၺ်းၼႃႈလႅင်းမိူင်းသႂ်သေယဝ်ႉ “ပဵၼ်သင်လႄႈ ႁဵတ်းႁႂ်ႈၵဝ်လၢတ်ႈလႆႈလီလႃႇ ဢမ်ႇလီဢဝ်ၶေႃႈၵႂၢမ်းပေႃႈႁဝ်းမႃးလၢတ်ႈႁေဢိတ်း တေႁဵတ်းႁိုဝ်ယဝ်ႉလႃႇၵမ်းၼႆႉ”
“ၶႅမ်ႉပဵၼ်တၢၼ်ႇၼၼ်ႉ မၼ်းဢမ်ႇလီတီႈလႂ်”
“မိူဝ်ႈဝူၼ်ႉထိုင်ဢူႈႁဝ်းယဝ်ႉ ႁဵတ်းႁႂ်ႈၶုၵ်းၸႂ်လႆႈမႃးဝႃႈ ၵဝ်မႃးတီႈၼႆႈႁဵတ်းသင်”
“ဢမ်ႇၸႂ်ႈပီႈမႃးႁဵတ်းမေႃသွၼ်သွၼ်ႇၼႄႇ..”
“ၸႂ်ႈယူႇ ၵူၺ်းၵႃႈၵဝ်ဢမ်ႇၶႂ်ႈႁဵတ်း…” ဢဝ်မိုင်လူင်ၵႂႃႇသေယဝ်ႉ၊ မိူၼ်တေၶုၵ်းၶူၼ်ႉဝူၼ်ႉလႆႈသေလွင်ႈမႃးလႄႈ “ပဵၼ်သင်လႄႈ ၵဝ်တေလႆႈၶတ်းၸႂ်ႁဵတ်းပေႃးတၢၼ်ႇၼႆႉလႃႇ ယွမ်းယဵၼ်ႉၵၼ်ႈ ၶဝ်ႈႁႃၵူၼ်းဢမ်ႇလႆႈၸႂ်၊ ႁဵတ်းဢၼ်ဢမ်ႇၶႂ်ႈႁဵတ်း ၵဝ်ယွင်ႇၵႂႃႇယဝ်ႉႁႃႉၼႆႉ” လုၵ်ႉပႆဢွၵ်ႇၵႂႃႇယူႇယဝ်ႉ။
“မေႃသွၼ်ၶဝ်ပဵၼ်သင်ၵႂႃႇထႅင်ႈယဝ်ႉလႃႇပီႈ” သႅင်ၼူၼ်းႁၼ်ၶမ်းလၢဝ်ပဵၼ်ၸိူင်ႉၼၼ်ၵေႃႈ လႆႈထၢမ်ၸူးလႅင်းမိူင်းသႂ်ၵႂႃႇ။
“ဢမ်ႇႁူႉမိူၼ်ၵၼ်ယဝ်ႉ” ယၵ်ႉတူၺ်းသႅင်ၼူၼ်း လေႃးပႃးယုမ်ႉဝၢၼ်သေ လၢတ်ႈၸူး “ၸူမ်းယဝ်ႉၼႃႈ.. မႃးၸွႆႈထႅမ်ႁဝ်း..သူတေႁိူဝ်ႉတေႉယဝ်ႉ” ႁိုဝ်ႈၼမ်ႉယိုၼ်ႈပၼ်သႅင်ၼူၼ်းယူႇယဝ်ႉ။
သႅင်ၼူၼ်းၵေႃႈ ယၵ်ႉတူၺ်းၸူး ယုမ်ႉတွပ်ႇၵႂႃႇ “ဢမ်ႇပဵၼ်သင်ၶႃႈ..ယိၼ်းလီၸွႆႈထႅမ်ယူႇ” တင်းလၢတ်ႈတင်းယိပ်းဢဝ် ၵွၵ်းၼမ်ႉၼႂ်းမိုဝ်းလႅင်းမိူင်းသႂ်ၼၼ်ႉသေ မိုဝ်းသွင်ၶႃထိတိူဝ်ႉမႅၼ်ႈၵၼ် ပၼ်ႁႂ်ႈၸႂ်ဢုၼ်ႇ ၼႃႈလႅင်မႃး ဝိၼ်ႇႁူၵေႃႈမႆႈမႃးပႃးယဝ်ႉ။ လႅင်းမိူင်းသႂ်ၵေႃႈ ၼႅတ်ႈပွႆႇမိုဝ်းၵႂႃႇ သႅင်ၼူၼ်းၵေႃႈ ၼႅတ်ႈဢိုၵ်ႉၵိၼ်ၼမ်ႉၵမ်းလဵဝ်သေ ဝၢႆႇၵႂႃႇတၢင်းၽႂ်တၢင်းမၼ်းယူႇ။
သမ်ႉဝႃႈလႆႈၸႂ်ၵၼ်ယူႇသေတႃႉ ၵျိူၵ်ႈၵၼ်ယူႇၵေႃႈ ႁူႉယူႇဝႃႈႁၵ်ႉၵၼ် ၵူၺ်းတၢင်းႁၵ်ႉဢၼ်မီးၼိူဝ်ၵၼ်ၼၼ်ႉ ဢမ်ႇပႆႇႁၼ်ၽႂ်လၢတ်ႈၼႄဝႃႈ ပဵၼ်ၸူႉၵၼ်ၼႆ။ တေလၢတ်ႈမိူဝ်ႈလႂ် မိူၼ်ၸႂ်တေႁၢႆၵႂႃႇပဵၼ်ၵမ်းယဝ်ႉ ၵွပ်ႈဢဝ်ပေႉတၢင်းဢၢႆပႆႇလႆႈလႄႈ ၸင်ႇလႆႈယူႇဢမ်ႇၶွပ်ႇဢမ်ႇၵၢင်ၸိူင်ႉၼႆဝႆႉယူႇ။
တႄႇၸဵမ်မိူဝ်ႈၸဝ်ႉ သႅင်ၼူၼ်းၵေႃႈ ဢဝ်တင်းႁႅင်းတူဝ်ႁႅင်းၸႂ်သေ မႃးၸွႆႈႁဵတ်းတဵမ်တဵမ်ထူၼ်ႈထူၼ်ႈ ဢမ်ႇဝႃႈလွင်ႈႁပ်ႉၶႅၵ်ႇၸိူဝ်းၼႆႉ ဢမ်ႇလႆႈမႆႈၸႂ်သင်ၸွမ်းသေဢိတ်း၊ သမ်ႉဝႃႈပဵၼ်ၵူၼ်းဝၢၼ်ႈၼွၵ်ႈ ၸွၵ်ႉထိူၼ်ႇဢွၼ်ႇၵူၺ်းၵေႃႈ ပေႃးလွင်ႈယဵၼ်ႇငႄႈၼႆတႄႉ ဢမ်ႇယွမ်းၵၢၼ်ႉၽႂ် မေႃလၢတ်ႈၸႃဢူၼ်ႈဢွၼ်ႇ၊ မေႃၵႂႃႇမေႃပႆ၊ မေႃဝႆႉဝၢင်းတူဝ် ယဵၼ်ႇငႄႈဢူၼ်ႈဢွၼ်ႇ ၵိုင်ႇတၢင်းလႅင်းမိူင်းသႂ် ၸႂ်ပေႃးၸပ်းၵႂႃႇၸွမ်းယဝ်ႉ။
တွၼ်ႈၼႆႉသုတ်းၵႂႃႇယဝ်ႉ သိုပ်ႇလူၵႂႃႇထႅင်ႈတွၼ်ႈတေမႃးၶႃႈ။
