တွၼ်ႈသိပ်းပႅတ်ႇ
ယၢမ်းၵၢင်ၼႂ်လိူၼ်ပႅတ်ႇမူၼ်းၼႆၵေႃႈ ၼၢႆးၶမ်းလႅင်တႄႉ လုၵ်ႉၸဵမ်ၸဝ်ႉၸဵမ်ၸဵဝ်း ႁႅၼ်းၶဝ်ႈသွမ်းၽြႃးယဝ်ႉ တၢင်ႇသွမ်းဝႆႈၽြႃး သဵင်လင်ထွမ်ႇၸႅင်ႈ ၶဝ်ႈႁူၵူၼ်းၼွၼ်းလူင်ပေႃးတိုၼ်ႇ။ ၶမ်းလၢဝ်လႆႈငိၼ်းၼင်ႇၼၼ်ၵေႃႈ ဢဝ်မၼ်းသမ်ႉပေႃးၶုၵ်းၸႂ်လႆႈတီႈႁိူၼ်းမႃး ပေႃးၵၢင်ၼႂ် ၼႆၸိုင် ၵူၼ်းဢၼ်ယူႇႁိမ်းႁိူၼ်းၶဝ်ၼၼ်ႉ မိူင်းပႆႇလႅင်း မႃးပိုတ်ႇၽုၺ်ႇ ပရိၵ်ႈလူင် 11 သုၵ်ႈ သဵင်လင်ပူၼ်ႉႁိူၼ်းပူၼ်ႉယေး ႁိူၼ်းၼၼ်ႉသမ်ႉ ယူႇတၢင်းႁူဝ်ၼွၼ်းမၼ်းလႄႈ ဢဝ်မၼ်းသမ်ႉပေႃးလႆႈႁွင်ႉသေႃႇလႃႇၸူးႁိူၼ်းလင်ၼၼ်ႉသေ ႁဵတ်းႁႂ်ႈမၼ်းလႄႈၵူၼ်းႁိူၼ်းလင်ၼၼ်ႉ ပေႃးဢမ်ႇမႅၼ်ႈၵၼ်ႁေပွၵ်ႈယဝ်ႉ။
ၵၢင်ၼႂ်မိူင်းလႅင်း ၸဵမ်ၼုမ်ႇၸဵမ်ထဝ်ႈ ဢွၼ်ၵၼ်ၵႂႃႇၶိုၼ်ႈၵျွင်းလွင်းမွၵ်ႇ ႁူမ်ႈလူႇႁူမ်ႈတၢၼ်းၸွမ်းၵၼ်ယဝ်ႉ၊ ၶမ်းလၢဝ်တႄႉၵေႃႈ တိုၵ်ႉၼွၼ်းဝၢၼ်ယူႇ။ လႅင်းမိူင်းသႂ်လႄႈတင်းသႅင်ၼူၼ်းတႄႉ ၵႂႃႇၸွမ်းၵၼ်သေ ပွၵ်ႈမႃးၸွမ်းၵၼ်ၶိုၼ်းယဝ်ႉ။
“ၼူၼ်း!…ပီႈမီးလွင်ႈတေၶႂ်ႈလၢတ်ႈၼူၼ်းဢိူဝ်ႈ”
“လွင်ႈသင်ၶႃႈပီႈ” ႁူၺ်ႇတႃလမ်လမ်ၼူၼ်းယၵ်ႉတူၺ်းၸူး မွင်းပႂ်ႉၵႂၢမ်းပီႈတေလၢတ်ႈၼႄၼွင်ႉယူႇဢေႃႈၼႆၼၼ်ႉယဝ်ႉ။
သွင်ၵေႃႉ ၸူဝ်းဢွၼ်ၵၼ်ၶၢႆႉပၢႆႈသဵၼ်ႈတၢင်းမိူဝ်းႁိူၼ်းၼၼ်ႉ လဵပ်ႈၵႂႃႇၸွမ်းတူင်ႈၼႃး ၽွင်းတိုၵ်ႉသွမ်ႈယဝ်ႉလႄႈ ၸုင်ယိပ်းမိုဝ်းၵၼ်ယၢင်ႈလွႆးလွႆးယဝ်ႉ။ သဵင်လူမ်းလႄႈသဵင်လႅင်းမိူင်းသႂ်ၵေႃႈ သွၼ်ႉမေႃးလေႃးပႃးလွင်ႈၶေႃးၶူမ်မႃး ပႃးတင်းလွင်ႈၶီၼၼ်ႉႁေဝႃႈ “ၼူၼ်း…”
တၢင်းယုမ်ႉၼူၼ်းတုမ်ႉတွပ်ႇလေႃးၵႂၢမ်းဢူၼ်ႈဢွၼ်ႇဝႃႈ “ဢေႃႈၶႃႈ..”
“ပီႈႁၵ်ႉၼူၼ်းဢေႃႈ”
သႅင်ၼူၼ်းဝႆႉၼႃႈဢၢႆဢၢႆသေဝိၼ်ႇဝၢႆႇပႅတ်ႈတၢင်ႇတၢင်းယဝ်ႉ “ပီႈဢမ်ႇလၢတ်ႈၵေႃႈ ၼူၼ်းႁူႉယူႇၼႃႈ”
“ပီႈၶႂ်ႈလၢတ်ႈႁႂ်ႈၼူၼ်းႁူႉဝႆႉၼၼ်ႉၼႃႇ ဢမ်ႇဝႃႈပီႈယူႇတီႈလႂ် ၼႂ်းၸႂ်ပီႈၼႆႉ တိုၼ်းတေမီးၼူၼ်းယူႇတႃႇသေႇဢိူဝ်ႈ”
သႅင်ၼူၼ်းဝိၼ်ႇၼႃႈယၵ်ႉတူၺ်းၸူးလႅင်းမိူင်းသႂ်သေ “ပီႈတေၵႂႃႇလႂ်ၶႃႈ..”
“ၶဝ်ႈဝႃႇယဝ်ႉ ပီႈတေလႆႈပွၵ်ႈမိူဝ်းၶိုၼ်းယဝ်ႉဢိူဝ်ႈၼူၼ်း”
သီၼႃႈသႅင်ၼူၼ်းၵေႃႈ ၵိုင်ႉၵၢင်ႉဢမ်ႇလီမႃးၵမ်းလဵဝ် “ပီႈတေ ပွၵ်ႈမိူဝ်းၶိုၼ်းတေႉယဝ်ႉႁႃႉ ၸူးၸႂ်ၼူၼ်းတႄႉဢမ်ႇၶႂ်ႈႁႂ်ႈပီႈမိူဝ်းၼႃ”
“ၸူးၸႂ်ပီႈၵေႃႈ ႁိုဝ်ၶႂ်ႈၽၢတ်ႇၼူၼ်းလႃႇ ၶႂ်ႈယူႇႁိမ်းၸမ်ၼူၼ်း ဢမ်ႇၶႂ်ႈၵႂႃႇတၢင်းလႂ်ၼၼ်ႉယဝ်ႉ” လႅင်းမိူင်းသႂ်ၵေႃႈ လုပ်ႈႁူဝ်ၼူၼ်းလွႆးလွႆးသေ “ပီႈတေၶတ်းၸႂ်ႁႂ်ႈလႆႈပွၵ်ႈမႃးႁႃၼူၼ်းၶိုၼ်းဝႆးဝႆးၼႃ”
“လႆႈဢေႃႈၼူၼ်းတေႉပႂ်ႉ ၼူၼ်းတေပႂ်ႉႁႂ်ႈပီႈပွၵ်ႈမႃးၶိုၼ်း”
လႅင်းမိူင်းသႂ်ၵေႃႈ သုတ်ႉတူဝ်ၸမ်ၼူၼ်းၵႂႃႇယဝ်ႉ ဢဝ်ၼႃႈမၼ်းၵူမ်ႈလူင်းၸုပ်ႇပၼ်ၼႃႈၽၢၵ်ႇၼူၼ်းလွႆးလွႆး “ပီႈမၢႆဝႆႉယဝ်ႉ ပၼ်ၵႂၢမ်းမၼ်ႈပီႈၸွင်ႇလႆႈႁိုဝ်ဝႃႈ ၼူၼ်းတေဢမ်ႇမီးၸႂ်ပၼ်ၽူႈၸၢႆးၵေႃႉလႂ်ထႅင်ႈလိူဝ်သေပီႈ”
“လႆႈဢေႃႈ ၼူၼ်းပၼ်ၶေႃႈမၼ်ႈၵႅၼ်ႇယူႇ ပီႈၵေႃႈတေလႆႈပၼ်ၵႂၢမ်းမၼ်ႈၼူၼ်းမိူၼ်ၵၼ်ၼႃဝႃႈ လိူဝ်သေၼူၼ်းယဝ်ႉ..” ၼူၼ်းလၢတ်ႈယင်းပႆႇသုတ်း သီႇသူပ်းၼူၼ်းၼၼ်ႉၵေႃႈ လႆႈၶၢမ်ႇတၢင်းသီႇသူပ်းလႅင်းမိူင်းသႂ်မႃးၸုပ်းသႂ်ႇယဝ်ႉ လၢတ်ႈလွႆးလွႆးႁိမ်းႁူၼူၼ်းၵႂႃႇ
“ဢိုမ်ႈ! ပီႈပၼ်ၵႂၢမ်းမၼ်ႈယူႇ”
လွင်ႈႁဵတ်းသၢင်ႈလႅင်းမိူင်းသႂ်ၼၼ်ႉ ဢဝ်ၼူၼ်းပေႃးဢမ်ႇႁူႉတေႁဵတ်းၸိူင်ႉႁိုဝ်ယဝ်ႉလႄႈ ဝႆႉၼႃႈဢၢႆဢၢႆသေ “ၾူၼ်ႁိူတ်ႇယဝ်ႉၵေႃႈ လူင်းၵျွင်းမႃး သမ်ႉပေႃးလိုမ်းဢဝ်ၸွင်ႈယဝ်ႉႁိုဝ်ၼႆႉ” လႅၼ်ႈပၢႆႈပႅတ်ႈယဝ်ႉ။
“ပႂ်ႉပီႈၽွင်ႈလႄႈၼူၼ်း..” လမ်းၵၼ်ပွၵ်ႈမိူဝ်းႁိူၼ်းၵႂႃႇယဝ်ႉ။
ယၢမ်းႁူဝ်ၶမ်ႈလပ်းသိင်ႇၸွမ်ႉႁွမ်ႉ တီႈၽိူၼ်မူႇၶဝ်ႈ ဢၼ်မီးၶမ်းလၢဝ်လႄႈ လႅင်းမိူင်းသႂ်ၵူၺ်းၼၼ်ႉ လႅင်းမိူင်းသႂ်ၵေႃႈ တင်းၶႂ်ႈလၢတ်ႈဢမ်ႇၶႂ်ႈလၢတ်ႈသေ ႁဵတ်းၵႅင်ႈထၢမ်ၸူး ၶမ်းလၢဝ်ၵႂႃႇ “ပီႈ ပေႃးမီးၵူၼ်းမိူဝ်းဝဵင်း ၸွင်ႇပီႈတေမိူဝ်းၸွမ်းယူႇႁႃႉ”
ဢဝ်ၶမ်းလၢဝ်ၵိုတ်းမိုင်လူင်ၵႂႃႇယူႇ “ႁႃ!! တေမီးၵူၼ်းမိူဝ်းဝဵင်းႁႃႉ ၽႂ်မိူဝ်း? မိူဝ်းမိူဝ်ႈလႂ်? တေလႆႈႁႅၼ်းၶူဝ်းဝႆႉဢိူဝ်ႈ”
ႁဵတ်းႁႂ်ႈလႅင်းမိူင်းသႂ် မီးလွင်ႈဢမ်ႇပေႃးၸႂ်မႃးယဝ်ႉ “ပီႈတေမိူဝ်းႁဵတ်းသင်! ဝူၼ်ႉထိုင်လုၵ်ႈဢွၼ်ႇၽွင်ႈလႄႈ.. ပီႈႁဵတ်းမႃးလႆႈထိုင်မွၵ်ႈၼႆႉယဝ်ႉ ၶႃႈဝူၼ်ႉဝႃႈ ပီႈတေလႅၵ်ႈလၢႆႈလႆႈ ၵူၺ်းၵႃႈ ၶႃႈဝူၼ်ႉၽိတ်းၵူၺ်း ”
“ၸႂ်ႈဢိူဝ်ႈ..ၵဝ်မၼ်းပဵၼ်ၸိူင်ႉၼႆယူႇယဝ်ႉလူး ၵဝ်ၵေႃႈ ပဵၼ်ၵူၼ်းႁၼ်သုၼ်ႇတူဝ်ၸိူင်ႉၼႆမႃးၸဵမ်လႂ်ယဝ်ႉ တေလႆႈမေႃဝူၼ်ႉထိုင်ၽႂ်လႆႈ” လုၵ်ႉၵႂႃႇပႅတ်ႈလႅင်းမိူင်းသႂ်သေ မိူဝ်းၼွၼ်းၶူတ်းၽႃႈယူႇၼႂ်းႁိူၼ်းၼၼ်ႉႁင်းမၼ်း။
ၼၢႆးၵႂႃႇၼွၼ်းၵျွင်းယဝ်ႉလႄႈ ဢမ်ႇမီးၽႂ်ပႂ်ႉၸွမ်းလၢတ်ႈၸွမ်းႁၢမ်ႈၶႃယဝ်ႉ။ လႅင်းမိူင်းသႂ်ၼၼ်ႉၵေႃႈ ပွင်ႉယူႇဢုမ်းဢုမ်းႁင်းၵူၺ်း “ၶႃႈတေမိူဝ်းယဝ်ႉဢိူဝ်ႈ ပဵၼ်သင်လႄႈ ပီႈယင်းတိုၵ်ႉပဵၼ်ၸိူင်ႉၼႆယူႇ ဢမ်ႇမီးၶႃႈယဝ်ႉ ပီႈတေပဵၼ်ၸိူင်ႉႁိုဝ်လႃႇ” ထူၺ်ႈၸႂ်လူင်သေ ၼွၼ်းဝူၼ်ႉၼွၼ်းမႆႈၸႂ်ယူႇႁင်းၵူၺ်းယဝ်ႉ။
ယၢမ်းၵၢင်ၼႂ် ဝၼ်းၶိုၼ်ႈႁူင်းႁဵၼ်းၶိုၼ်းယဝ်ႉလႄႈ ၶမ်းလၢဝ်ၵေႃႈ ႁၢင်ႈႁႅၼ်းဢဝ်ၶူဝ်းမၼ်းသေ ၵႂႃႇႁူင်းႁဵၼ်း၊ တင်းၸႂ်လမ်လႅင်းမိူင်းသႂ်သေ ဢမ်ႇႁွင်ႉဢမ်ႇသူၼ်ၸႂ်သင်ယဝ်ႉဢွၵ်ႇၵႂႃႇယူႇ။ သမ်ႉဝႃႈၸႂ်လမ်ယူႇသေတႃႉ မိူဝ်ႈဢမ်ႇႁၼ်လႅင်းမိူင်းသႂ်မႃးႁေပွၵ်ႈၼၼ်ႉၵေႃႈ လွမ်လွမ်မွင်းယူႇႁင်းမၼ်းယဝ်ႉ။ မိူဝ်ႈထိုင်ၶၢဝ်းတၢၼ်ႇမႃးဢမ်ႇမႃးၼၼ်ႉၵေႃႈ ႁဵတ်းႁႂ်ႈၸႂ်လမ်မႃးထႅင်ႈ၊ တင်းသွၼ်တင်းပွင်ႉယူႇဢုမ်းဢုမ်းႁင်းမၼ်း သွၼ်တၢၼ်ႇတၢၼ်ႇႁေ ပွႆႇလုၵ်ႈဢွၼ်ႇၶဝ်လိုဝ်ႈယဝ်ႉ မၼ်းၵေႃႈမႃးၸွမ်းၶႆႈလႅင်းမိူင်းသႂ်တီႈႁိူၼ်းယူႇ။ မိူဝ်ႈႁွတ်ႈထိုင်ႁိူၼ်းၶိုၼ်းၵေႃႈ လႆႈႁၼ်ၼၢႆးပတ်းႁိူၼ်းယူႇလႄႈ
“ၼၢႆးဢၢႆႈၼွင်ႉ!! မီးယူႇႁႃႉ..”
“ဢၢႆႈၼွင်ႉႁႃႉ..မၼ်းဢမ်ႇလႆႈလၢတ်ႈတီႈယိင်းၼႄႇ မၼ်းလၢတ်ႈၼၢႆးမိူဝ်ႈဝႃးတႄႉဝႃႈ မၼ်းတေမိူဝ်းမိူဝ်ႈၼႆႉၸဵမ်ၸဝ်ႉၼႆဢိူဝ်ႈ”
ၶမ်းလၢဝ်ၼၼ်ႉတႄႉ ၶႃသမ်ႉပေႃးဢူၼ်ႈဢွၼ်ႇလူင်ၵႂႃႇသဵင်ႈယဝ်ႉ.. တင်းၸႂ်လမ် ၸႂ်လဵၵ်ႉ ႁူမ်ႈလေႃးၵၼ် ၼမ်ႉတႃၵေႃႈလႆဢွၵ်ႇမႃး သဵင်ၵေႃႈလင်မႃး “ဢၢႆႈၼွင်ႉ!!!” ႁွင်ႉပေႃးပူၼ်ႉႁိူၼ်း ၼင်ႇလုၵ်ႈဢွၼ်ႇၸႂ်လမ်ၼၼ်ႉယဝ်ႉ။
ယၢမ်းၼၼ်ႉ သႅင်ၼူၼ်းၵေႃႈ မႃးၸူးမၼ်းသေ “ပီႈလႅင်း..မိူဝ်းၵႂႃႇယဝ်ႉဢေႃႈပီႈ” ပႃးလူၺ်ႈသီၼႃႈဢၼ်ဢမ်ႇလီသေဢိတ်းလႄႈ ဢဝ်ၽိုၼ်လိၵ်ႈဢၼ်လႅင်းမိူင်းသႂ်ၽၢၵ်ႇဝႆႉ ႁႂ်ႈမႃးပၼ်ၶမ်းလၢဝ်ၼၼ်ႉယိုၼ်ႈပၼ်ၵႂႃႇ
“ပီႈလႅင်းႁႂ်ႈၶႃႈဢဝ်မႃးပၼ်တီႈပီႈဢေႃႈ”
ၶမ်းလၢဝ်ၵေႃႈ ယိပ်းဢဝ်မႃးၽုၺ်ႇတူၺ်းယဝ်ႉ၊ လႅင်းမိူင်းသႂ် တႅမ်ႈဝႆႉဝႃႈ..
“ပီႈ.. ၶႃႈတေလႆႈပွၵ်ႈမိူဝ်းယဝ်ႉ ၵူၺ်းၵႃႈ ၶႃႈၵေႃႈလၢတ်ႈပီႈဢမ်ႇလႆႈ ၶႂၢင်းပၼ်ၶႃႈၼႃႈ၊ ၶႃႈႁူႉယူႇဝႃႈ ပီႈတေၸႂ်လမ်ၶႃႈၼႆ ၵူၺ်းၵႃႈ ၶႃႈၵေႃႈ တေလႆႈပွၵ်ႈမိူဝ်းၶိုၼ်းဢေႃႈ မိူဝ်ႈၶႃႈမီးတိုဝ်ႉတၢင်းႁဵၼ်းလႆႈယူႇၼႆႉ ၶႃႈၶႂ်ႈႁဵၼ်းႁႂ်ႈပေႃးသုတ်းသုတ်းသေၵွၼ်ႇဢေႃႈ၊ ပေႃးၶႃႈႁဵၼ်းသုတ်းယဝ်ႉ ၶႃႈတေပွၵ်ႈၶိုၼ်းမႃးၸူးပီႈလႄႈ တေဢဝ်တၢင်းႁူႉတၢင်းမေႃ ဢၼ်ၶႃႈလႆႈႁူႉလႆႈႁဵၼ်းမႃးၼၼ်ႉ မႃးသွၼ်ပၼ်လုၵ်ႈႁဵၼ်းႁဝ်း ႁႂ်ႈၶဝ်ပေႃးႁူႉမေႃၸွမ်း ယွၼ်ႉၼၼ် ၸူဝ်ႈၶႃႈပႆႇပွၵ်ႈမိူဝ်းလႆႈၼၼ်ႉ ၶႃႈၽၢၵ်ႇပီႈတူၺ်းထိုင်ဝႆႉၼႃႈ၊ ၶႃႈၵေႃႈလႆႈၸႂ်မိူၼ်ၵၼ် ႁူင်းႁဵၼ်းၼႂ်းၾၼ် ဢၼ်ပီႈၶႂ်ႈပဵၼ်ၼၼ်ႉ ၶႃႈဝူၼ်ႉဝႃႈ ပီႈတေႁဵတ်းပဵၼ်မႃးလႆႈယူႇၼႃ။
သမ်ႉဝႃႈဢမ်ႇမီးၶႃႈယဝ်ႉ ပီႈၵေႃႈ တေဢမ်ႇပဵၼ်သင်ၼႃ ၶႃႈႁူႉယူႇဝႃႈ ပီႈတိုၼ်းပဵၼ်ၵူၼ်းဢၼ်လႆႈႁဵတ်းသင်ယဝ်ႉ တေႁဵတ်းႁႂ်ႈမၼ်းလႆႈ ပေႃးဢမ်ႇလႆႈၵႃႈဢမ်ႇၸူးၼႆ ၶႃႈယုမ်ႇပီႈယူႇၼႃႈ” ၸင်ႇသမ်ႉမီးထႅဝ်လိၵ်ႈပွတ်းပွတ်းတိၼ်ထႅဝ်ၼၼ်ႉၵႂႃႇထႅင်ႈဝႃႈ “ၸွႆႈတူၺ်းထိုင်သႅင်ၼူၼ်းၽွင်ႈ”
ၶမ်းလၢဝ်လူသုတ်းယဝ်ႉ ၸႂ်လမ်ယင်းပႆႇႁၢႆ ၵမ်ၸေႈဝႆႉသမ်ႉပေႃးၵႅၼ်ႇၵႅၵ်းၵႅၵ်း ဢမ်ႇတၵ်းသဵင်သင်သေ ပႆယွၵ်းယွၵ်းၵႂႃႇတၢင်းႁူင်းႁဵၼ်းၼၼ်ႉၶိုၼ်းယဝ်ႉ။
မိူဝ်ႈၵႂႃႇႁၼ်လုၵ်ႈဢွၼ်ႇၶဝ် လႅၼ်ႈလူၺ်းလမ်းၵၼ်ယူႇၼႂ်းႁွင်ႈႁဵၼ်း သဵင်ဢူၼ်ဢၢၼ်မေႃးပၼ်းလူင်ၵႂႃႇသဵင်ႈၸိူင်ႉၼၼ် လူမ်းၸႂ်လမ်ၵေႃႈပႃးလႄႈ ႁိုတ်းသႅၼ်ႇႁွင်ႉပၼ်တီႈလုၵ်ႈဢွၼ်ႇၶဝ် သဵင်ပေႃးယဵၼ်လူင်ၵႂႃႇသဵင်ႈ မၢင်ၵေႃႉသမ်ႉပေႃးႁွင်ႉႁႆႈမႃးယဝ်ႉ၊ ပေႃးၵေႃႉၼိုင်ႈႁႆႈ ထႅင်ႈၵေႃႉၼိုင်ႈႁႆႈၸွမ်းသေ သဵင်သႅၼ်ႇႁွင်ႉလုၵ်ႈဢွၼ်ႇ ၼၼ်ႈဢူၼ်ပၼ်း မၼ်းၵေႃႈၼင်ႈသေ ႁွင်ႉႁႆႈၸွမ်းလုၵ်ႈဢွၼ်ႇၶဝ်ၵႂႃႇႁဵတ်းၼၼ်ယဝ်ႉၼႃႇ။
လုၵ်ႈဢွၼ်ႇဢၼ်ႁၼ်မေႃသွၼ်ၶဝ် ၼင်ႈႁႆႈၼင်ႇၼၼ်ၵေႃႈ တူၺ်းၼႃႈမေႃသွၼ်ၶဝ်သေ ႁွင်ႉႁႆႈၵႂႃႇၸွမ်းၵၼ်ထႅင်ႈ၊ ႁႆႈႁဵတ်းႁင်တႄႉဢမ်ႇႁူႉ ၵူၺ်းၵႃႈ မေႃသွၼ်မၼ်းႁႆႈလႄႈ လႆႈႁႆႈၵႂႃႇၸွမ်းၼၼ်ႉၵူၺ်း။ ၸိူဝ်းၵေႃႉယႂ်ႇယဝ်ႉ ႁူႉၵႂၢမ်းတၢၼ်ႇတၢၼ်ႇၼၼ်ႉၵေႃႈ ၼႅတ်ႈၵႂႃႇၶျေႃးဝွၼ်းၼွင်ႉၶဝ်ၸိူဝ်းၼၼ်ႉသေ မၢင်ၸိူဝ်းၵေႃႈမႃးၸူးမေႃသွၼ်သေ
“မေႃသွၼ်ႁႆႈႁႃႈ..မေႃသွၼ်ႁႆႈႁဵတ်းသင်” ယိပ်းဢဝ်မိုဝ်းမၼ်းယဝ်ႉ “မေႃသွၼ်ယႃႇပေႁႆႈၼႃ” သဵင်လႄႈမိုဝ်းလဵၵ်ႉလဵၵ်ႉဢွၼ်ႇၶဝ်ၼၼ်ႉ ပၼ်ႁႂ်ႈမၼ်းဢုၼ်ႇၸႂ်မႃးလႄႈ လႆႈသတိမႃးၶိုၼ်းယဝ်ႉ။ ၸဵတ်ႉၼမ်ႉတႃသေ ပၼ်ႁႂ်ႈလုၵ်ႈဢွၼ်ႇၶဝ်လိုဝ်ႈထႅင်ႈလႄႈ မၼ်းၼၼ်ႉၵေႃႈ ဢမ်ႇႁဵတ်းသင်ယဝ်ႉ ၼင်ႈတူၺ်းလုၵ်ႈဢွၼ်ႇၶဝ်လဵၼ်ႈယူႇႁဵတ်းၼၼ်ၵႂႃႇၵူၺ်း။
မိူဝ်ႈၼင်ႈလီလီႁေတူၺ်းလုၵ်ႈဢွၼ်ႇယူႇၼၼ်ႉ ႁၼ်ပဵၼ်ၸုမ်းပဵၼ်ၸုမ်းယဝ်ႉ၊ လုၵ်ႈဢွၼ်ႇႁၢမ်ႉၵေႃႉယႂ်ႇတၢၼ်ႇတၢၼ်ႇၼၼ်ႉၵေႃႈ ဢွၼ်ၵဵပ်းဢဝ်မၢၵ်ႇႁိၼ်သေ မႃးလဵၼ်ႈမၢၵ်ႇၵဵပ်း၊ ၵမ်ႈၽွင်ႈၵေႃႈ တေႃႇမၢၵ်ႇၶင်ႇ၊ မၢၵ်ႇၵႅဝ်ႈ၊ ၼင်ယိုတ်ႈၸိူဝ်းၼႆႉယူႇ၊ ပေႃးပဵၼ်လုၵ်ႈဢွၼ်ႇလဵၵ်ႉၸိူဝ်းၼႆႉႁမ်ႉ လဵၼ်ႈလိၼ်လဵၼ်ႈသၢႆး ယိပ်းတင်း ၵၢၼ်ႈမႆႉဝႂ်မႆႉ တူၼ်ႈမွၵ်ႇတွၼ်ႈမၢၵ်ႇ ႁဵတ်းၵူၼ်းႁေဢဝ်မႃးဢုပ်ႇၵၼ်၊ ႁဵတ်းတီႈယူႇႁိူၼ်းသဝ်း ႁိူၼ်းၵဝ်ႁိူၼ်းမႂ်း၊ ဢဝ်ဝႂ်မႆႉဝႂ်တွၵ်ႇမႃးသိုဝ်ႉမႃးၶၢႆၵၼ်လဵၼ်ႈ၊ ၵမ်ႈၽွင်ႈၵေႃႈ လႅၼ်ႈလူၺ်းတေႃႇမီၵၼ် ဢႅၼ်ႇလႅၼ်ႈသဵင်ဢူၼ်ပၼ်း ဢမ်ႇႁိူဝ်ႉဢမ်ႇလိုဝ်ႈ ၵျေႃႇသိူဝ်းမူၼ်ႈၵၼ် ႁဵတ်းႁႂ်ႈမၼ်းႁၼ် ၽဝမိူဝ်ႈယင်းတိုၵ်ႉၵေႃႉလဵၵ်ႉမႃးယဝ်ႉ။
ဢၼ်ႁဵတ်းႁႂ်ႈမၼ်းၶႂ်ႈၵႂႃႇႁူင်းႁဵၼ်းၼၼ်ႉ ဢမ်ႇၸႂ်ႈၶႂ်ႈၵႂႃႇႁဵၼ်းလိၵ်ႈလႄႈ ၵႂႃႇသွၼ်လိၵ်ႈသေၵႃႈႁိုဝ်၊ ပေႃးၵႂႃႇႁူင်းႁဵၼ်း လႆႈၵႂႃႇႁူပ်ႉဢူၺ်းၵေႃႉလႄႈ လႆႈၵႂႃႇလဵၼ်ႈၸွမ်းဢူၺ်းၵေႃႉၼၼ်ႉ ႁဵတ်းႁႂ်ႈမၼ်းၵျေႃႇၼႃႇယဝ်ႉ ပဵၼ်လွင်ႈမၢႆတွင်းလီလီ ဝူၼ်ႉထိုင်ယဝ်ႉၵေႃႈ ယင်းတိုၵ်ႉသိူဝ်းၸႂ်ယူႇ။ ၼႂ်းဝၼ်းၼၼ်ႉတၢင်းဝၼ်း မၼ်းဢမ်ႇသွၼ်လိၵ်ႈသေ ပၼ်ၶဝ်လဵၼ်ႈႁင်းၶဝ်ယူႇၼင်ႇၼၼ်ၵူၺ်း ထိုင်ၶၢဝ်းယၢမ်းလူင်းႁူင်းႁဵၼ်းၵေႃႈ ပွႆႇၶဝ်မိူဝ်းၵႂႃႇႁေယဝ်ႉ။
ၶမ်းလၢဝ်ပႂ်ႉတူၺ်းလုၵ်ႈႁဵၼ်းမၼ်း ပွၵ်ႈမိူဝ်းသဵင်ႈမူတ်းယဝ်ႉၵေႃႈ ႁူင်းႁဵၼ်းၼၼ်ႉ သမ်ႉပေႃးယဵၼ်လူင်ၵႂႃႇယူႇ။ မၼ်းၵေႃႈ လႄႇလဵပ်ႈတူၺ်းၸွမ်းၸိူဝ်းႁိမ်းႁွမ်းႁူင်းႁဵၼ်းၼၼ်ႉ လၢႆလၢႆႁွပ်ႈ တေႃႇထိုင်ၵၢင်ဝၼ်းပေႃးၸၢႆႉၸိူၼ်း ၸင်ႇဢဝ်ၶူဝ်းၶွင်မၼ်းဢွၵ်ႇႁူင်းႁဵၼ်းၵႂႃႇယဝ်ႉ။
မိူဝ်ႈမၼ်းဢွၵ်ႇဝၢင်းႁူင်းႁဵၼ်းမႃး လႆႈငိၼ်းသဵင်ႁိင်ႇႁွၵ်ႈဝူဝ်းႁွၵ်ႈၵႂၢႆး မေႃးတြွင်း.. တြွင်း.. တြႅင်း..တြႅင်း.. လူင်မႃးလႄႈ မၼ်းၸင်ႇမိုင်ၵိုတ်းတူၺ်းၵႂႃႇသေ ႁဵတ်းႁႂ်ႈမၼ်းဝူၼ်ႉထိုင်ၶိုၼ်း ဝၼ်းဢၼ်မၼ်းလႆႈမႃးႁၼ် ၸိူင်ႉၼႆပွၵ်ႈဢွၼ်တၢင်းသုတ်းၼၼ်ႉယဝ်ႉ။ လုၵ်ႈဢွၼ်ႇၼႂ်းဝၼ်းၼၼ်ႉ ဝၼ်းမိူဝ်ႈၼႆႉၵေႃႈ ဢမ်ႇႁၼ်မီးလွင်ႈလႅၵ်ႈလၢႆႈသင် ယင်းတိုၵ်ႉပဵၼ်လုၵ်ႈဢွၼ်ႇလဵင်ႉဝူဝ်းၵႂၢႆးယူႇၵူၺ်း၊ သမ်ႉဝႃႈတေမီးႁူင်းႁဵၼ်း မီးမေႃသွၼ် သွၼ်ယူႇသေတႃႉၵေႃႈ ဢမ်ႇၸွႆႈႁႂ်ႈၶဝ် လႆႈယူႇႁူင်းႁဵၼ်းလႄႈ ႁဵၼ်းလိၵ်ႈမိူၼ်ၼင်ႇပိူၼ်ႈလႆႈ သမ်ႉပေႃးဢဝ်မၼ်းထူၺ်ႈၸႂ်လူင်မႃးယဝ်ႉ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ။
