တွၼ်ႈသိပ်း
ယၢမ်းၵၢင်ၼႂ်ၽူၼ်တူၵ်းယွႆးယွႆး မွၵ်ႇၵုမ်ႈသုမ်ႇတၼ် ဢမ်ႇႁၼ်လုၵ်ႈလႅတ်ႇတႃဝၼ်းသင်ယဝ်ႉ၊ ၶမ်းလၢဝ် ဢၼ်တိုၵ်ႉၼွၼ်းဢုၼ်ႇယူႇၼၼ်ႉၵေႃႈ သမ်ႉပေႃးဢမ်ႇၶႂ်ႈလုၵ်ႉၵႂႃႇတၢင်းလႂ်သေဢိတ်း ၼၼ်ႉယဝ်ႉ။ ဢမ်ႇၸၢင်ႈႁဵတ်းႁိုဝ် လႅင်းမိူင်းသႂ်လႄႈၼၢႆး ဢွၼ်ၵၼ်လၢၵ်ႈထူမၼ်းဢွၵ်ႇႁိူၼ်းမႃး မၼ်းၵေႃႈၵႃႈလႆႈလုၵ်ႉယူႇယဝ်ႉ။
ၵိၼ်ၶဝ်ႈၵိၼ်သင်ယဝ်ႉၵေႃႈ ဢွၼ်ၵၼ်ႁၢင်ႈႁႅၼ်းတူဝ်သေ တေဢၢင်ႈဢွၵ်ႇၵႂႃႇ ၵူၺ်းၵႃႈ ၸွင်ႈတီႈႁိူၼ်းသမ်ႉမီးလူင်ႇလဵဝ်ၵူၺ်းလႄႈ ဢမ်ႇၸၢင်ႈႁဵတ်းႁိုဝ် သွင်ၶႃၵေႃႈ ၵင်ႈၸွင်ႈလူင်ႇလဵဝ်ၵၼ်သေ လတ်းၽႃႇတၢင်းၵူမ်ႇပိူဝ်ႉဢုင်လူင်ၼၼ်ႉ ၵမ်းယၢင်ႈယၢင်ႈယဝ်ႉ။ သမ်ႉဝႃႈၵင်ႈၸွင်ႈၵႂႃႇၸွမ်းၵၼ်သေတႃႉ မိူၼ်ဝႃႈ လႅင်းမိူင်းသႂ်ၼၼ်ႉ ပဵၼ်ၵူၼ်းယိပ်းပၼ်ၶမ်းလၢဝ်ၵူၺ်း လင်မၼ်းသိူဝ်ႈမၼ်း သမ်ႉပေႃးယမ်းလူင်ၵႂႃႇမူတ်း။ ၵႂႃႇႁွတ်ႈထိုင်ၼႃႈႁိူၼ်းပႃႈထွၼ်း ဢၼ်မီးလုၵ်ႈဢွၼ်ႇ ၵႆႉမႃးလဵၼ်ႈယူႇတႃႇသေႇၼၼ်ႉ သွင်ၶႃၵေႃႈ ၸူဝ်းၵၼ်ၶဝ်ႈမိူဝ်းၵႂႃႇ
“မႂ်ႇသုင်ၶႃႈပႃႈ..” လႅင်းမိူင်းသႂ်တူင်ႉတၵ်ႉၸူး ၸွမ်းလွင်ႈယဵၼ်ႇငႄႈ။
“မႂ်ႇသုင်ၶႃႈ.. မေႃသွၼ်ၶဝ် တေဢွၼ်ၵၼ်ၵႂႃႇတၢင်းလႂ်ၶႃႈၼႆႉ” ပႃႈထွၼ်း ဢၼ်တိုၵ်ႉလၢင်ႉဝၢၼ်ႇယူႇတီႈၶဵင်ႇၼမ်ႉၼၼ်ႉ တူင်ႉတၵ်ႉၸူး။
“ဢေႃႈ..မိူဝ်ႈၼႆႉ ပဵၼ်ဝၼ်းၽုၺ်ႇႁူင်းႁဵၼ်းဝၼ်းဢွၼ်တၢင်းသုတ်းလႄႈ မႃးႁွင်ႉဢၢႆႈၼွင်ႉၶဝ်ၵႂႃႇႁူင်းႁဵၼ်းၼႆဢေႃႈ”
“ဝႃႈၼၼ်ႁႃႉ! ဢမ်ႇႁၼ်ၽႂ်မႃးလၢတ်ႈလႃႇဢေႉ.. ၶိင်းလဵၵ်ႉလႆႈငိၼ်းပိူၼ်ႈမႃးလၢတ်ႈယူႇႁႃႉ” ငွၵ်ႈၶေႃးႁွင်ႉသေႃႇႁႃ လုင်းလဵၵ်ႉ ၽူဝ်မၼ်း ဢၼ်ယူႇၼႂ်းႁိူၼ်းၼၼ်ႉယဝ်ႉ။
“ဢမ်ႇငိၼ်းဝႃႈႁိုဝ်မႃးလူင်ၼႆႉ..”
ၶမ်းလၢဝ်ၶႃလႅင်းမိူင်းသႂ်ၼၼ်ႉၵေႃႈ ဢွၼ်ယၵ်ႉတူၺ်းၼႃႈၵၼ်ယူႇ။ ၶမ်းလၢဝ်တႄႉ လူမ်းၸႂ်လမ်မၼ်းဢွၵ်ႇမႃးယဝ်ႉလႄႈ သမ်ႉပေႃးၶႂ်ႈမိူဝ်းလႅၼ်ႈလႃႇဝတ်ႉပၼ်ၶိင်းၵႄႇၼၼ်ႉၵမ်းလဵဝ်ယဝ်ႉ။
“ႁႅင်ႉလုင်းၵႄႇၼႆႉ..” လၢတ်ႈပႆႇသုတ်း လႅင်းမိူင်းသႂ် ဢဝ်မိုဝ်းမၼ်းဢိုတ်းသူပ်းၶမ်းလၢဝ်သေယဝ်ႉ
“ဢမ်ႇပဵၼ်သင်ၶႃႈ ပေႃးၼႆ ႁဝ်းတေမိူဝ်းထၢမ်လုင်းၵႄႇတူၺ်းၵွၼ်ႇၶႃႈၼႃ”
“ဢိူဝ်ႈဢိူဝ်ႈ! ပေႃးလုၵ်ႈဢွၼ်ႇၵိၼ်ၶဝ်ႈၵိၼ်သင်ယဝ်ႉ ၸင်ႇႁႂ်ႈၶဝ်ၵႂႃႇၶႃႈပေႃးၼႆ”
လႅင်းမိူင်းသႂ်မိုင်လူင်ၵႂႃႇၵႅပ်ႉၼိုင်ႈသေ ၸင်ႇၶိုၼ်းတွပ်ႇၸူး “မိူဝ်ႈၼႆႉတႄႉ ဝႆႉသေၵွၼ်ႇယဝ်ႉၶႃႈ ၽႂ်ၵေႃႈလႅပ်ႈတေဢမ်ႇႁူႉၵၼ် ႁူင်းႁဵၼ်းၵေႃႈလႅပ်ႈတေဢမ်ႇမီးလုၵ်ႈႁဵၼ်းၶႃႈ”
“ဢိူဝ်ႈဢိူဝ်ႈ..ပေႃးမီးၵေႃႈၶိုၼ်းလၢတ်ႈမႃးလႄႈၼႃႉ ဢၢႆႈလုၵ်ႈၶႃတႄႉၵေႃႈ ၶႂ်ႈၵႂႃႇၼႃႇယဝ်ႉဝႃႇၼၼ်ႉ”
“ဢေႃႈၶႃႈ ၸူမ်းၶႃႈ”
ၶမ်းလၢဝ်ၼၼ်ႉၵေႃႈ ပႆယၢင်ႈႁၢင်ႇယၢင်ႈႁိင်ႇလူင်ၵႂႃႇ တၢင်းႁိူၼ်းၶိင်းၵႄႇၶဝ်ၼၼ်ႉဝႆးဝႃႈဝႆးယဝ်ႉ၊ ၵွပ်ႈပိူဝ်ႈယၢမ်ႈၺႃးမႃးပွၵ်ႈၼိုင်ႈယဝ်ႉလႄႈ မိူၼ်ဝႃႈ တေႁဵတ်းမိူၼ်ၵဝ်ႇထႅင်ႈၵူၺ်းၼႆသေ ဢမ်ႇထၢမ်ၽႂ်ယဝ်ႉ ပႆလူင်ၵႂႃႇတိၵ်းတိၵ်း လႅင်းမိူင်းသႂ်လမ်းပေႃးဢမ်ႇၶိုတ်းလႆႈ။
“ပေႉၼႅတ်ႈႁဵတ်းႁင်လူင်လၢင်လႃႇ!.. ၵမ်ႉတေလူမ်ႉယဝ်ႈ”
ၶမ်းလၢဝ်ဢမ်ႇတၼ်းထွမ်ႇၽႂ်ယဝ်ႉ တေႃႇပေႃးႁွတ်ႈထိုင်ၵႂႃႇတီႈႁိူၼ်း ၶိင်းၵႄႇၶဝ်ၼၼ်ႉ၊ ၶိင်းၵႄႇယူႇတီႈၼိူဝ်ၸၢၼ်းႁိူၼ်းၶဝ်သေ လွမ်ငွၵ်ႈႁွင်ႉလၢတ်ႈၸူးၶမ်းလၢဝ်ၶႃ
“မီးလွင်ႈတၢင်းၸိူင်ႉႁိုဝ်သေမႃးလႃႇဢေႉ”
ၶမ်းလၢဝ်ပႆႇတၼ်းလၢတ်ႈ လႅင်းမိူင်းသႂ်ၵေႃႈ ဝၵ်ႉတၢဝ်းဢဝ်ၶႅၼ်ၶမ်းလၢဝ် သုတ်ႉႁူၼ်လင်ၶိုၼ်းမွၵ်ႈသွင်ယၢင်ႈၼႆႉသေ “ထူၺ်ႈၸႂ်ၶဝ်ႈလိုၵ်ႉလိုၵ်ႉ ဝႆႉၸႂ်ယဵၼ်ယဵၼ်” ၶမ်းလၢဝ်ၵေႃႈႁဵတ်းၸွမ်းၵႂႃႇ လူၺ်ႈဢမ်ႇတၼ်းၾၢင်ႉတူဝ် ၵူၺ်းၵႃႈ မိူၼ်ဝႃႈ ၸႂ်မၼ်းတေၼိမ်မႃးၶိုၼ်းယဝ်ႉ ယွမ်းလူမ်းၸႂ်လမ်ၵေႃႈ ယွမ်းသဵင်ၵႂၢမ်းလၢတ်ႈမၼ်းမႃးလႆႈဢိတ်ႉၼိုင်ႈယူႇ။
“မိူဝ်ႈၼႆႉပဵၼ်ဝၼ်းၽုၺ်ႇႁူင်းႁဵၼ်းဢေႃႈ မိူၼ်ၵူၼ်းဝၢၼ်ႈၶဝ် ဢမ်ႇလႆႈႁူႉလွင်ႈၼႆႉၶႃႈလႃႇ”
“ႁႃ! ဝႃႈၼၼ်ႁႃႉ.. ” ၶိင်းၵႄႇၼၼ်ႉၵေႃႈ မိုင်လူင်ၵႂႃႇၵႅပ်ႉၼိုင်ႈသေယဝ်ႉ ၸင်ႇၶိုၼ်းသိုပ်ႇလၢတ်ႈထႅင်ႈ “ဢိူဝ်ႈ!.. ၵူၼ်းထဝ်ႈၵေႃႈ မေႃလိုမ်းၸိူင်ႉၼႆယဝ်ႉ..”
ၶမ်းလၢဝ်ၵမ်တႃမိုဝ်းၵႅၼ်ႇၵႅၵ်း ယၵ်ႉတူၺ်းၼႃႈၶိင်းၵႄႇ ဢၼ်ၼင်ႈသူတ်ႉၼမ်ႉၼဵင်ႈယူႇၼႂ်းႁိူၼ်း တင်းလႅၼ်းယႃႈတွင်ပွတ်းဢွၼ်ႇ ဢမ်ႇပေႃးသူၼ်ၸႂ်သေၵႃႈႁိုဝ်ၼၼ်ႉ၊ သဵင်ထူၺ်ႈၸႂ်မၼ်းၵွႆႈယူႇၵွႆႈလင်မႃး ၵမ်သူပ်းၵမ်ပၢၵ်ႇမႃး မိူၼ်တေၶဝ်ႈထုပ်ႉပၼ်ၶိင်းၵႄႇၼၼ်ႉၵမ်းလဵဝ်ယူႇ၊ ၵတ်ႉၵႃႈယင်းမီးလႅင်းမိူင်းသႂ်လႃႈ
“ပေႃးၼၼ် လွင်ႈႁူင်းႁဵၼ်းၼႆႉ ႁဝ်းၶႃႈတေၸတ်းၵၢၼ်ၵႂႃႇႁင်းၵူၺ်းၵူၺ်းယဝ်ႉၶႃႈ”
လုင်းၵႄႇၼႅတ်ႈတွပ်ႇ “လီဢိူဝ်ႈ.. ႁဵတ်းၵႂႃႇႁင်းသူၵူၺ်းလႄႈ.. သင်ၽဵင်ႇၵဝ်တႄႉ ပေႃးတေမႃးသွၼ်ၸူဝ်ႈၵပ်ႉၸူဝ်ႈၵမ်းၵူၺ်းၼႆ ဢမ်ႇမႃးၵေႃႈလႆႈယဝ်ႉ လုၵ်ႈဢွၼ်ႇတမ်ႉဢမ်ႇတၼ်းမေႃသင် သုမ်းၶၢဝ်းယၢမ်းႁဵတ်းၵၢၼ်ၵူၺ်းဢိူဝ်ႈ သင်ၵႂႃႇႁဵတ်းၵၢၼ် ပေႃးတၼ်းယဝ်ႉပဵၼ်လၢႆမဵဝ်းယဝ်ႉႁိုဝ်”
“ပေႃးလုင်းၵႄႇႁဝ်း ဢမ်ႇၸွႆႈသင်လႆႈၵေႃႈ ဢမ်ႇမီးတၢင်းလိူၵ်ႈ ၵႃႈတေလႆႈၵႂႃႇတီႈလုင်းႁဵင်ႁဝ်းၵူၺ်းယဝ်ႉ” လႅင်းမိူင်းသႂ်လၢတ်ႈ။
လၢၵ်ႈၸၼ်ဢဝ်ၶမ်းလၢဝ်လူင်းႁိူၼ်းၵႂႃႇ လူၺ်ႈဢမ်ႇသူၼ်ၸႂ်ၽႂ်ၼၼ်ႉယဝ်ႉ၊ ၶိင်းၵႄႇၼၼ်ႉၵေႃႈ သမ်ႉပေႃးဢမ်ႇၸၢင်ႈတၵ်းသဵင်၊ ဢၼ်လႆႈပဵၼ်ၵႄႇၼႂ်းဝၢၼ်ႈမႃးၼႆႉၵေႃႈ ဢမ်ႇၸႂ်ႈဝႃႈပိူၼ်ႈယုၵ်ႉယွင်ႈမၼ်းၼႃႇလႄႈပဵၼ် ၵွပ်ႈပေႃႈပူႇမွၼ်ႇမၼ်း ပဵၼ်မႃးလႄႈ ၵွပ်ႈဢမ်ႇမီးၽႂ်ၶႂ်ႈႁဵတ်းလႄႈ ၸင်ႇလႆႈလိူၵ်ႈမၼ်းမႃးႁဵတ်းၼၼ်ႉယဝ်ႉ၊ ၵဝ်ဝႃႈဢိူဝ်ႈမႂ်းဝႃႈဢိူဝ်ႈ ဢဝ်သဵင်ၼမ်သေလိူၵ်ႈမႃးၵူၺ်းယူႇ။
“ၸိူင်ႉၼႆၵေႃႈဝႃႈ ပဵၼ်ၵႄႇပိူၼ်ႈ မၼ်းႁဵတ်းသင်ပၼ်ၵူၼ်းဝၢၼ်ႈၽွင်ႈလႃႇ ပွၵ်ႈၼိုင်ႈၵေႃႈဝႃႈလိုမ်း ပွၵ်ႈသွင်ၵေႃႈဝႃႈလိုမ်း သမ်ႉပၢႆဝႃႈႁဵတ်းႁင်းၵူၺ်းသူလႃႈၼႆထႅင်ႈႁေ မၼ်းၶႂ်ႈႁႂ်ႈလုၵ်ႈဝၢၼ်ႈမၼ်းၶိုၼ်ႈယႂ်ႇယူႇႁႃႉၼႆႉ လွင်ႈလီၼပ်ႉယမ်ပေႃးဢမ်ႇမီးသေဢိတ်း” ၶမ်းလၢဝ်တင်းပွင်ႉတင်းၸႂ်လမ်လူင်မိူဝ်းၵႂႃႇၸွမ်းတၢင်းယူႇ။
“မိူဝ်ႈလႂ်မိူဝ်ႈဢွၵ်ႇႁိူၼ်းယဝ်ႉ ႁဝ်းမိူဝ်းတၢင်းႁိူၼ်းလုင်းႁဵင်ၶဝ်ႁေယဝ်ႉၼႃႇ မိူဝ်ႈၼႆႉၵေႃႈ ဢမ်ႇၶိုၼ်ႈႁူင်းႁဵၼ်းယူႇယဝ်ႉလူး”
“မိူဝ်းၵေႃႈမိူဝ်းလႄႈ ပဵၼ်ႁိုဝ်ပဵၼ်ၵေႃႈ ဢမ်ႇလႆႈပိုင်ႈဢိင်ၶိင်းၵႄႇၼၼ်ႉယူႇယဝ်ႉလူး” တွပ်ႇၵႂႃႇပႃးလူမ်းၸႂ်လမ်ဢၼ်ဢမ်ႇပႆႇႁၢႆၼၼ်ႉယဝ်ႉ။
တင်းၽူၼ်ဢွႆဢွႆၼၼ်ႉသေ သွင်ၶႃၵေႃႈ ပႆတွၵ်ႉတွၵ်ႉၵႂႃႇၸွမ်းသဵၼ်ႈတၢင်း တၢင်းဢွၵ်ႇဝၢၼ်ႈၶဝ် မုင်ႈၼႃႈၵႂႃႇတၢင်းဝၢၼ်ႈၸိင်ၵမ်းလဵဝ်။ ၵွႆႈယူႇၽူၼ်ၵွႆႈတူၵ်းၼမ်မႃးတိၵ်းတိၵ်းယဝ်ႉလႄႈ ၸွင်ႇလူင်ႇလဵဝ်ဢွၼ်ႇသွင်ၶႃၼၼ်ႉၵေႃႈ ၵႃႈတေလႆႈၽိုတ်ႉၵၼ်သေၵႂႃႇၵူၺ်း ဢမ်ႇၸၢင်ႈႁဵတ်းႁိုဝ် လႅင်းမိူင်းသႂ်ၼၼ်ႉၵေႃႈ ၵွတ်ႇမႃႇၶမ်းလၢဝ်လူင်ၵႂႃႇ ၶမ်းလၢဝ်တူဝ်လဵၵ်ႉဝႆႉလႄႈ မိူၼ်တေလွတ်ႈၽူၼ်ယူႇ ၵွပ်ႈမီးလႅင်းမိူင်းသႂ်ဢၼ်တူဝ်သုင်ၼၼ်ႉ ႁူမ်ႇလူမ်ႈပၼ်ယဝ်ႉ။
မိူဝ်ႈပႆၵႂႃႇၵႆယူႇတၢၼ်ႇတၢၼ်ႇၼၼ်ႉ ႁွတ်ႈထိုင်ၵႂႃႇၸွမ်းလႅၼ်ႁႆႈလႅၼ်သူၼ်ပိူၼ်ႈသေ မုင်ႈႁၼ်ၵႂႃႇၼႂ်းဝၢၼ်ႈၸိင် မီးလင်ႁိူၼ်းတမ်းၶပ်ႉယႆၸႅၼ်ႇၵၼ်ပဵၼ်ထႅဝ်ပဵၼ်တႅဝ်း၊ ဝၢၼ်ႈၼႆႉၵႂၢင်ႈယႂ်ႇလိူဝ်သေၼႂ်းဝၢၼ်ႈဢုင်ၼၼ်ႉယဝ်ႉ။ မွၵ်ႇၵုမ်ႈၶႂ်ႈသုမ်ႇငုမ်းတၼ်ဝႆႉလႄႈ တေဢမ်ႇပေႃးႁၼ်လင်ႁိူၼ်းၵူၼ်းၸႅင်ႈလီ ၵူၺ်းၵႃႈ မၼ်းၵေႃႈႁၢင်ႈလီတႃဝႆႉယူႇ ဢၼ်မီးႁိူၼ်းၵူၼ်း ၶပ်ႉယႆၸႅၼ်ႇၵၼ်လူင်ၵႂႃႇၸွမ်းတေးတၢပ်ႈၵွင်းလွႆ ပႃႇမႆႉဢုမ်ႇၶဵဝ်ပဵၼ်တီႈပဵၼ်တီႈ ၼႂ်းဝၢင်းႁိူၼ်းၶဝ်၊ ဢၢႆၵူမ်ႇဢၢႆဢုင် ဢၢႆၶီႈဝူဝ်းၸွမ်းတၢင်းၶဝ်ႈဝၢၼ်ႈၼၼ်ႉၵေႃႈ သမ်ႉပေႃးမဵၼ်ၶိုၼ်ႇမဵၼ်ၶႆးလူင်ဝႆႉယဝ်ႉ၊ ဢမ်ႇၸၢင်ႈႁဵတ်းႁိုဝ် ၵႃႈလႆႈယဵပ်ႇယၢင်ႈၶဝ်ႈၵႂႃႇၵူၺ်း။ ဢမ်ႇႁိုင်ဢမ်ႇၼၢၼ်း သွင်ၶႃၵေႃႈ ၸွမ်းႁႃႁိူၼ်းလုင်းႁဵင်ၶဝ်သေ ၶဝ်ႈၼႂ်းဝၢင်းႁိူၼ်းၵႂႃႇယဝ်ႉ။
ႁိူၼ်းလုင်းႁဵင်ၼႆႉၵေႃႈ လႆႈဝႃႈၵႂၢင်ႈယႂ်ႇဝႆႉယူႇတေႉတေႉၼင်ႇဝႃႈ ပဵၼ်ႁိူၼ်းသွင်ထၢပ်ႈ ပွတ်းၼိူဝ်ၵင်ႈပႅၼ်ႈဝႆႉ ပွတ်းတႂ်ႈၵင်ႈဢုတ်ႇဝႆႉယူႇ၊ မိူၼ်တိုၵ်ႉၸင်ႇႁႃႁဵတ်းယဝ်ႉၵူၺ်း ဢုတ်ႇမၼ်းၼၼ်ႉယင်းတိုၵ်ႉႁၼ်မႂ်ႇယူႇ။ ၶမ်းလၢဝ်ၶႃၵေႃႈ သုၵ်ႈတိၼ်ၶႃလီလီငၢမ်းငၢမ်းယဝ်ႉ ပတ်ႉၶႃၵူၼ်လူင်းသေ ၶဝ်ႈမိူဝ်းၵႂႃႇၼႂ်းႁိူၼ်းလႄႈ ၸင်ႇသမ်ႉလႆႈႁၼ် မေႃယႃဢွၼ်တိုၼ်း တိုၵ်ႉႁၢင်ႈႁႅၼ်းၶူဝ်းမၼ်း မိူၼ်တေဢွၵ်ႇၵႂႃႇတၢင်းၼွၵ်ႈၼၼ်ႉယူႇ။
“မႂ်ႇသုင်ၶႃႈ ပီႈမေႃ” လႅင်းမိူင်းသႂ်တူင်ႉတၵ်ႉၸူး။
“မႂ်ႇသုင်ၶႃႈ ဢွၼ်ၵၼ်မႃးၸဵမ်ၸဝ်ႉလႃႇ မႃးႁႃဢူႈႁဝ်းႁႃႉ”
“ၸႂ်ႈယဝ်ႉၶႃႈ.. ပီႈမေႃတေၵႂႃႇတၢင်းလႂ်ၶႃႈလႃႇၼႆႉ”
မေႃယႃၵေႃႈ ၵူမ်ႈတူၺ်းထူင်ၶူဝ်းမၼ်းၸိူဝ်းၼၼ်ႉၵႅပ်ႉၼိုင်ႈသေ ၶိုၼ်းဝၢႆႇယၵ်ႉတူၺ်းလႅင်းမိူင်းသႂ်ၶႃသေယဝ်ႉ “တေၵႂႃႇႁူင်းယႃၼႆဝႃႇ” မိူၼ်တေႁၼ်ဝႃႈ ၶူဝ်းလႅင်းမိူင်းသႂ်ယမ်းဝႆႉယူႇလႄႈ “ဢွၼ်ၵၼ်သွၼ်းၽူၼ်လူင်မႃးဢိူဝ်ႈၼႆႉၼေႃႈ ” တမ်းဝႆႉၶူဝ်းမၼ်းသေ ၶဝ်ႈၵႂႃႇၼႂ်းႁွင်ႈ လႅပ်ႈပဵၼ်ႁွင်ႈၼွၼ်းမေႃယႃ၊ ယဝ်ႉၵေႃႈ ယိပ်းတင်းသိူဝ်ႈ ယိုၼ်ႈပၼ်လႅင်းမိူင်းသႂ်ၵႂႃႇ။
“သိူဝ်ႈၼွင်ႉယမ်းမူတ်းယဝ်ႉ ဢဝ်သိူဝ်ႈပီႈၼႆႉၼုင်ႈဝႆႉထႃႈလႄႈ”
လႅင်းမိူင်းသႂ်ၵေႃႈ ယိပ်းဢဝ်သေယဝ်ႉ “ၸူမ်းယဝ်ႉၶႃႈ”
“မိူဝ်းလၢႆႈၼႂ်းႁွင်ႈၵေႃႈလႆႈယူႇၵူၺ်းၼႃ”
ၶမ်းလၢဝ်ၵေႃႈ ယၵ်ႉတူၺ်းလႅင်းမိူင်းသႂ်ၵႂႃႇ “ဢမ်ႇလူဝ်ႇယူဝ်ႉ ပေႃးဢမ်ႇဢၢႆသၢဝ်ဢွၼ်ႇၸိူဝ်းၼႆႉတႄႉ ယူႇတီႈႁိူၼ်းၵေႃႈ ၵႆႉႁၼ်ထွတ်ႇသိူဝ်ႈယူႇလူး”
သၢႆတႃလႅင်းမိူင်းသႂ် ယၵ်ႉတူၺ်းၶမ်းလၢဝ်ဢမ်ႇႁၢၼ်ႉၸႂ်မႃးယဝ်ႉ “ပီႈလၵ်ႉတူၺ်းၶႃႈထွတ်ႇသိူဝ်ႈႁႃႉ!”
“လၵ်ႉတူၺ်းတီႈလႂ် ဢၢပ်ႇၼမ်ႉ သိူဝ်ႈၵေႃႈဢမ်ႇၼုင်ႈႁေ ၶိုၼ်ႈလူင်းၸွမ်းႁိူၼ်းၼၼ်ႉ တေလႆႈလၵ်ႉတူၺ်းယူႇၼႄႇ သႅင်ၼူၼ်းယူႇတီႈၽၵ်းတူၶဝ်ယၵ်ႉတူၺ်းၵူၺ်းပေႃးႁၼ်ယဝ်ႉ”
မေႃယႃၵေႃႈယၵ်ႉတူၺ်းၶႃသေယုမ်ႉယူႇၸုတ်းၵုတ်းၵူၺ်း။
မိူၼ်လုင်းႁဵင်တေငိၼ်းသဵင်ၶဝ်လႄႈ ၸင်ႇလုၵ်ႉၼိူဝ်ႁိူၼ်းၼၼ်ႉ လူင်းမႃးၸူးၶဝ်ယူႇ။
“ဢေႃႈ..ယူဝ်ဝႃႈၽႂ်ၼႃး မေႃသွၼ်ၶဝ်လူင်ၼႆႉ”
“မႂ်ႇသုင်ၶႃႈလုင်းႁဝ်း ယူႇလီၵိၼ်ဝၢၼ်ယူႇၶႃႈၼေႃႈ”
“ဢိူဝ်ႈ.. ယူႇလီယူႇ.. မီးလွင်ႈသင်လွင်ႈသိင်သေဢွၼ်ၵၼ်ႁွတ်ႈမႃးတၢင်းၼႆႉလႃႇ”
“မီးယူႇဢိတ်ႉၼိုင်ႈၶႃႈဢေႃႈ” ၶမ်းလၢဝ်ၵေႃႈ ၸွမ်းၼင်ႇလွင်ႈဢၼ်ၶႂ်ႈလၢတ်ႈၼႃႇၼၼ်ႉ ၸင်ႇၼႅတ်ႈလၢတ်ႈဢွၵ်ႇမႃးယဝ်ႉ။
မေႃယႃၵေႃႈ ဢွၵ်ႇၵႂႃႇႁဵတ်းၵၢၼ်မၼ်းသေ ပၼ်ႁႂ်ႈၶဝ်ဢုပ်ႇၵုမ်ၵၼ်ၵႂႃႇၼႂ်းႁိူၼ်းၼၼ်ႉယူႇယဝ်ႉ။
တွၼ်ႈသိပ်းသုတ်းၵႂႃႇယဝ်ႉ သိုပ်ႇလူၵႂႃႇထႅင်ႈတွၼ်ႈတေမႃးၶႃႈ။
