တီႈၼႂ်းဝၢၼ်ႈဢွၼ်ႇဢၼ်ႁဝ်းသဝ်းထင် လင်ႁိူၼ်းႁဝ်းဢမ်ႇၵႂၢင်ႈယႂ်ႇ ၵူၺ်းၵႃႈ ႁဝ်းပေႃႈမႄႈလုၵ်ႈ ယူႇႁူမ်ႈၵၼ်မႃး ႁိူၼ်းၶႃးသုမ်ႉတႅပ်းဢွၼ်ႇလင်ၼႆႉ ႁိုင်ၼႃႇယဝ်ႉ၊ ၶၢဝ်းၵတ်းၶၢဝ်းမႆႈၶၢဝ်းၽူၼ် ဢမ်ႇတွၼ်ႉႁဵတ်းႁႂ်ႈႁဝ်းလိူတ်ႇမႆႈႁိုဝ် ၵတ်းလၢင်ႈလႆႈ ယွၼ်ႉၼႃႈႁိူၼ်းႁဝ်း မၼ်းပၼ်လွင်ႈဢုၼ်ႇၸႂ်ၵၼ်ယူႇတႃႇသေႇ ၼၼ်ႉၼႃႇ။
ၽိူဝ်ႇထိုင်မႃးဝၼ်းၼိုင်ႈ လွင်ႈလိူတ်ႇမႆႈၼၼ်ႉၵေႃႈ မႃးထိုင်တီႈႁိူၼ်းႁဝ်း ၵွပ်ႈဝႃႈ ဢၢႆႈပီႈၶႃႈႁဝ်းၼၼ်ႉ တေလႆႈၽၢတ်ႇယၢၼ်ႁဝ်းသေ ၵႂႃႇႁဵတ်းသိုၵ်းတႆးၼႆလႄႈ ၸူးၸႂ်မၼ်းတႄႉၵေႃႈ ႁိုဝ်တေၶႂ်ႈၵႂႃႇလႃႇ ႁွင်ႉႁႆႈတေႃႇၶႃႈမႃးယဝ်ႉ၊ ပေႃးမၼ်းၵႂႃႇ ၵၢၼ်ၼႃႈႁိူၼ်းႁဝ်းၼၼ်ႉၵေႃႈ တေႃႈတေယူပ်ႈလူင်းယူႇယဝ်ႉ၊ ဢမ်ႇၸၢင်ႈႁဵတ်းႁိုဝ် ဢမ်ႇၵႂႃႇၵေႃႈသမ်ႉဢမ်ႇလႆႈယဝ်ႉလူး မၼ်းပဵၼ်ၶေႃႈသင်ႇယဝ်ႉၼႃႇ၊ ႁဝ်းပဵၼ်ၵူၼ်းမိူင်းၵေႃႈ ဢမ်ႇၽွင်းလိူဝ်လႆႈ ဢၼ်ပိူၼ်ႈမီးၵွင်ႈမႃးငႃသႂ်ႇႁဝ်းယူႇၼၼ်ႉလူး။
ဢွၼ်တၢင်းမၼ်းတေၵႂႃႇၼၼ်ႉၵေႃႈ လႆႈၵႂႃႇသူင်ႇသင်ႇဢေးၶမ်း ၸူႉမၼ်း ဢၼ်ယူႇတၢင်းႁူဝ်ဝၢၼ်ႈႁဝ်းၼၼ်ႉသေၵႂႃႇယဝ်ႉ၊ ဢေးၶမ်း ဢၼ်လႆႈငိၼ်းၼင်ႇၼၼ်ၵေႃႈ ပဵၼ်ဢၼ်ၶၢၼ်ၸႂ်ယူႇဢိူဝ်ႈလေႃႇ ၵႂႃႇႁဵတ်းသိုၵ်းၼႆ တႃႇတေၶိုၼ်းပွၵ်ႈမႃးႁိူၼ်းၼၼ်ႉ တေပဵၼ်မိူဝ်ႈလႂ်တမ်ႉဢမ်ႇႁူႉလူး၊ လိူဝ်သေၼၼ်ႉ ၶႃၵေႃႈဢၢၼ်းဝႃႈ ပေႃးဢွၵ်ႇဝႃႇ တေဢဝ်ၵၼ်ၼႆၼၼ်ႉသမ်ႉၵႂႃႇပႅတ်ႈၵၼ်ႁေ ပၼ်ႁႂ်ႈဢေးၶမ်းယူႇငဝ်ႁဵတ်းၼၼ်ၵူၺ်းယဝ်ႉၼႃႇ။
ဝၢႆးသေမၼ်းၵႂႃႇ ၼႃႈႁိူၼ်းႁဝ်းၵေႃႈ ပေႉငိၼ်းငႅဝ် ဢမ်ႇလႆႈငိၼ်းသဵင်မၼ်းဢုပ်ႇလၢတ်ႈယဝ်ႉ ပေႉၵႅၼ်ႇမႃးၸႂ်ထိုင်၊ ဢမ်ႇလႆႈႁၼ်မၼ်းယဝ်ႉ ပေႉၵႅၼ်ႇၶုၵ်းၸႂ်လႆႈ၊ ၸူဝ်ႈမၼ်းဢွၵ်ႇႁိူၼ်းၵႂႃႇ မၼ်းၵေႃႈ ဢမ်ႇၶိုၼ်းၵပ်းသိုပ်ႇမႃးသေပွၵ်ႈ သမ်ႉပေႃးမီးၵႂႃႇႁႃႈလိူၼ်ယဝ်ႉ မၼ်းဝႃႈတေဢၢၼ်းပွၵ်ႈမႃးၸႂ်းႁိူၼ်းၼႆဝႃႇ။
ၵူၺ်းၵႃႈ ၼႂ်းဝၼ်းဢၼ်မၼ်းလၢတ်ႈဝႃႈ တေမႃးၼၼ်ႉ ႁိမ်းဝၢၼ်ႈႁဝ်းၵေႃႈ သမ်ႉလႆႈငိၼ်းသဵင်မၢၵ်ႇတႅၵ်ႇ မေႃး ပလိုင်ႈ..ၵိုင်ႈၵိုင်ႈ.. တၢၵ်ႉ…တၢၵ်ႉတၢၵ်ႉ.. သဵင်ၵွင်ႈလၼ်ႇၼၼ်ႈယိုဝ်းၵၼ် ပေႃးဢူၼ်ဢၢၼ်လူင်ၵႂႃႇမူတ်း၊ ဢမ်ႇႁူႉဝႃႈပဵၼ်ၸုမ်းလႂ်ယဝ်ႉ ႁဝ်းမႄႈလုၵ်ႈဢၼ်တိုၵ်ႉၼင်ႈၵိၼ်ၶဝ်ႈၵၼ်ယူႇၼၼ်ႉၵေႃႈ ႁိုဝ်တေတၼ်းလႆႈၵိၼ်ယဝ်ႉလႃႇ လူဝ်ႇႁႅၼ်းၶူဝ်းၵၼ်သေ ဢႅၼ်ႇပၢႆႈၵူၺ်းႁိုဝ် မိူဝ်ႈပဵၼ်ၼင်ႇၼၼ်မႃးၵေႃႈ။
ၽွင်းႁဝ်းပၢႆႈလူင်မႃးၸွမ်းတၢင်းၼၼ်ႉ ငိၼ်းပိူၼ်ႈဢုပ်ႇၵၼ်ဝႃႈ သိုၵ်းတႆးၼင်ႇၵၼ်ယိုဝ်းၵၼ်ၶိုၼ်းၼႆၼႃႇ၊ မိူဝ်ႈႁူႉၸိူင်ႉၼၼ်ၵေႃႈ ၼင်ႇႁၢင်ႈၶႃၶႃႈၼၼ်ႉတႄႉ သမ်ႉပေႃးဢမ်ႇၶႂ်ႈမီးႁႅင်း သိုပ်ႇယၢင်ႈၵႂႃႇလႆႈသေဢိတ်းယဝ်ႉ၊ ၶဝ်တေယိုဝ်းၵၼ်ယွၼ်ႉသင်လႃႇ၊ ပဵၼ်လုၵ်ႈမႄႈတႆးၼင်ႇၵၼ် ၵိၼ်ၶဝ်ႈတႆးၼင်ႇၵၼ်၊ ယိုဝ်းၵၼ်ယဝ်ႉၶဝ်တေလႆႈသင်မႃးလႃႇ ဢမ်ႇဝူၼ်ႉထိုင်ပႃး ၵူၼ်းမိူင်းၸိူင်ႉႁဝ်းၸိူဝ်းၼႆႉၽွင်ႈႁိုဝ်၊ လႆႈႁွပ်ႇၶူဝ်းလဵင်းလႅၼ်ႈပၢႆႈ ဢၼ်ဢမ်ႇႁူႉဝႃႈတေၵႂႃႇတၢင်းလႂ်၊ ဢၼ်ဢမ်ႇႁၼ်ဝႃႈ ယူႇတီႈလႂ်ၵေႃႈတေလွတ်ႈၽေး၊ ဢမ်ႇႁူႉဝႃႈတေလႆႈပႆၵႂႃႇထႅင်ႈၵႃႈႁိုဝ်၊ တၢင်းႁၢပ်ႇၶူဝ်းဢၼ်တၢင်ႇမႃႇၼၵ်းၼႃႇၼႆႉ၊ ၶဝ်ၸွင်ႇပွင်ႇၸႂ်ၼႂ်းၵၢင်ၸႂ်ႁဝ်းၽွင်ႈႁိုဝ်၊ ၶႃႈမုင်ႈမွင်းဝႃႈ ၼၼ်ႉ မၼ်းတေဢမ်ႇပႃးဢၢႆႈပီႈႁဝ်းၼင်ႇၵဝ်ႇ။
ဝၢႆးႁဝ်းပၢႆႈမႃးယဝ်ႉ ၶႃႈၵေႃႈၵပ်းသိုပ်ႇဢၢႆႈပီႈႁဝ်းဢမ်ႇလႆႈထႅင်ႈသေပွၵ်ႈယဝ်ႉ၊ မၼ်းလၢတ်ႈဝႃႈမၼ်းတေမႃး ၵူဝ်ဝႃႈမၼ်းတေမႃးၺႃးမိူဝ်ႈၽွင်းႁဝ်းပၢႆႈၼၼ်ႉယဝ်ႉ၊ သမ်ႉပေႃးမီးၵႂႃႇပဵၼ် ဝူင်ႈယဝ်ႉၵေႃႈ ငဝ်းလၢႆးၸွမ်းဝၢၼ်ႈၼၼ်ႉ မိူၼ်တေယဵၼ်မႃးယူႇ၊ ၵူၺ်းၵႃႈ ၽႂ်ၵေႃႈပႆႇႁတ်းပွၵ်ႈ ၶႃႈၵေႃႈ ၸႂ်တိတ်းဢၢႆႈပီႈႁဝ်း ယူဝ်မၼ်းတေမႃးယူႇတီႈႁိူၼ်းဢမ်ႇႁၼ်ၽႂ်ၼႆၼႃႇ၊ ၸင်ႇလႆႈၸူဝ်းၵၼ်တင်းဢူႈႁဝ်း ပွၵ်ႈမိူဝ်းတူၺ်းတီႈႁိူၼ်းၼႆယူႇ၊ ၼႂ်းဝၢၼ်ႈႁဝ်းၼၼ်ႉ သဵင်သမ်ႉပေႃးယဵၼ်သီႇသီႇလူင်ဝႆႉ ဢမ်ႇမီးၽႂ်ယူႇႁိူၼ်းသေၵေႃႉယဝ်ႉၼႃႇ ၼႂ်းႁိူၼ်းၼႂ်းယေးၵေႃႈ ၼင်ႇႁၢင်ႈၽၵ်းတူပေႃးၽုၺ်ႇလူင်ၵႂႃႇၵူႈလင်၊ ငွၵ်ႈတူၺ်းၼႂ်းႁိူၼ်းပိူၼ်ႈ ၶူဝ်းႁိူၼ်းသမ်ႉပေႃးမၢၵ်ႇပေႃးမိူဝ်လူင်ၵႂႃႇမူတ်း ႁူမ်ႈပႃးတင်းႁိူၼ်းႁဝ်းယဝ်ႉ။
ၼႂ်းဝၼ်းၼၼ်ႉၵူၺ်း လႆႈႁၼ်ၵူၼ်းၼုင်ႈၶူဝ်းသိုၵ်းၵေႃႉၼိုင်ႈ မုင်ႈၼႃႈမႃးၸူးႁိူၼ်းႁဝ်းၼၼ်ႉသေ မိူၼ်တေပဵၼ်ၵေႃႉမႃးႁပ်ႉဢၢႆႈပီႈႁဝ်းၵႂႃႇ ၼၼ်ႉယဝ်ႉ။
“ယူဝ်ဝႃႈတေဢမ်ႇမီးၽႂ်ယူႇႁိူၼ်းယဝ်ႉ” တူၺ်းသီၼႃႈမၼ်းၼၼ်ႉၵေႃႈ ၼင်ႇႁၢင်ႈဢမ်ႇပေႃးလီၵႃႈႁိုဝ် မိူဝ်ႈႁၼ်ႁဝ်းၸိူင်ႉၼၼ်။
“မႃးၵေႃႉလဵဝ်ၵူၺ်းၶႃႈႁႃႉ ဢၢႆႈပီႈႁဝ်းလူး ၸွင်ႇမႃးၸွမ်းႁိုဝ်”
ၵူၼ်းၵေႃႉၼၼ်ႉၵေႃႈ ဢဝ်ၶူဝ်းၶွင်ဢၢႆႈပီႈႁဝ်းၼၼ်ႉ ဝၢင်းလူင်းပၼ်ပႃႈၼႃႈႁႃးဢူႈႁဝ်းၼၼ်ႉသေ လၢတ်ႈၸူး
“ၶဝ်တေဢမ်ႇၸၢင်ႈမႃးယဝ်ႉလႄႈ ဢမ်ႇမႃးလႆႈယဝ်ႉ”
မိူဝ်ႈငိၼ်းၼင်ႇၼၼ် ၶႃႈႁိုဝ်လၢတ်ႈၵႂၢမ်းသင်လႆႈယဝ်ႉ ၼမ်ႉတႃၶႃႈၼၼ်ႉၵေႃႈ လႆႈလႆယွႆႉယမ်းၸိုမ်းႁူၺ်ႇတႃမႃး ၼင်ႇဢမ်ႇတၼ်းႁူႉတူဝ်၊ သမ်ႉဝႃႈဢိုတ်ႇႁႆႈသႅၼ်ႇႁွင်ႉႁႃၶဝ်ၵေႃႈ ၶဝ်သမ်ႉပေႃးဢမ်ႇၶိုၼ်းမႃးယဝ်ႉ၊ ႁဵတ်းႁႂ်ႈၶႃႈယိုင်ႈၶႅၼ်းၶုၵ်းၸႂ်လႆႈၶဝ်မႃး ယိုင်ႈၸႂ်ထိုင်ယိုင်ႈၶႂ်ႈႁွင်ႉႁႆႈယဝ်ႉ။
“ပဵၼ်သင်လႄႈ ပီႈၶႃႈ တေလႆႈမႃးတၢႆယွၼ်ႉလွင်ႈယွင်ႇယွင်ႇဝႃႈဝႃႈၸိူင်ႉၼႆလႃႇ၊ ပီႈၶႃႈပဵၼ်ၵူၼ်းႁဵတ်းသင်ၽိတ်းလႃႇ ထိုင်တီႈလႆႈတၢႆၸိူင်ႉၼႆ၊ သင်ဝႃႈယိုဝ်းၽူႈၶဵၼ်သေတၢႆ ယင်းဝႃႈလူႇၼိူဝ်ႉလိူတ်ႈသၢႆၸႂ်ပၼ်ၸိူဝ်ႉၶိူဝ်းလႆႈယူႇ၊ ၼႆႉသမ်ႉတႆးၼင်ႇၵၼ်ယိုဝ်းၵၼ် တေလႆႈႁွင်ႉဝႃႈသင်လႃႇ၊ သၢႆၸႂ်ၵူၼ်းၼၼ်ႉ မၼ်းမိူၼ်ပဵၼ်တၢင်းလဵၼ်ႈၵူၺ်းႁိုဝ်၊ ဢမ်ႇဝူၼ်ႉၽွင်ႈႁႃႉ မၼ်းမီးၼႃႈႁိူၼ်းဢၼ်ပႂ်ႉမွင်းယူႇ၊ ဢမ်ႇႁူႉၽွင်ႈႁႃႉ သၢႆၸႂ်ၵူၼ်းၼၼ်ႉ မၼ်းမီးၵႃႈၶၼ်တၢၼ်ႇႁိုဝ်ၼႆ ပဵၼ်သင်လႄႈ တေလႆႈဢဝ်သၢႆၸႂ်ၵၼ်မႃးလႅၵ်ႈၸွမ်း လွင်ႈၸိူဝ်းၼႆႉလႃႇ”
ပွင်ႉထႃႉလႃႇၵေႃႈ ဢမ်ႇမီးသင်လီၶိုၼ်ႈမႃး၊ ႁွင်ႉႁႆႈၼႃႇၵေႃႈ တေဢမ်ႇၶိုၼ်းပဵၼ်၊ ၵူၺ်းၵႃႈ ၶႃႈၵေႃႈ ဢမ်ႇၵိုတ်းတႃႇတေႁွင်ႉႁႆႈလႆႈလူး၊ သဵင်ႁႆႈယဵၼ်ၵႂႃႇၵေႃႈ ၼႂ်းၸႂ်ၼၼ်ႉတႄႉ တိုၵ်ႉဢိုတ်ႇႁႆႈယူႇ ဢမ်ႇယဵၼ်လႆႈသေပွၵ်ႈ။
ၵူၼ်းၵေႃႉၼၼ်ႉၵေႃႈ ဢမ်ႇၸၢင်ႈႁဵတ်းႁိုဝ်ၼင်ႈႁေထွမ်ႇယူႇႁဵတ်းၼၼ်ၵူၺ်းယဝ်ႉ၊ ယၢမ်းၼင်ႇၼၼ် ဢူႈႁဝ်းသမ်ႉထူၵ်းတူၺ်းၼႂ်းထူင် ဢၢႆႈပီႈႁဝ်းၼၼ်ႉလႄႈ လႆႈႁၼ်ၵဵၼ်ၸေႈဢွၼ်ႇဢၼ်ၼိုင်ႈ ၼဵပ်းယူႇၼႂ်းထွင်းဢွၼ်ႇၼၼ်ႉသေ ဢူႈႁဝ်းၸင်ႇၵီႈတူၺ်းယဝ်ႉ။
“ဢေးၼွင်ႉ! မႂ်းလူတူၺ်းလူးၵဝ်ဝႃႈ”
ၶႃႈၸင်ႇလႆႈယိပ်းဢဝ်မႃးလူတူၺ်းယဝ်ႉ။
ထိုင်ဢူႈတင်းမႄႈလႄႈၼွင်ႉယိင်းၵဝ် မိူဝ်ႈလႆႈႁၼ်လိၵ်ႈၽိုၼ်ၼႆႉ ၸၢႆးၵေႃႈတေဢမ်ႇယူႇယဝ်ႉ၊ သမ်ႉဝႃႈတၢင်တူဝ်ၸၢႆးဢမ်ႇလႆႈသင်ႇလၢတ်ႈၵေႃႈ လိၵ်ႈၽိုၼ်ၼႆႉတေလႆႈႁၼ်ၵၼ်ယူႇၸွင်ႇၸႂ်ႈ၊ ၸၢႆးယွမ်းၼွမ်းယူႇၼႃႈ ဢမ်ႇလႆႈသူင်ႇသင်ႇတေႃႇၼႃႈၵၼ်၊ ၸၢႆးယွမ်းၼွမ်းယူႇၼႃႈ ဢၼ်လႆႈၽၢတ်ႇယၢၼ်ၵႂႃႇပႅတ်ႈဢွၼ်တၢင်း၊ ၸၢႆးတိူဝ်ႉၸႂ်ယူႇဢိူဝ်ႈဢၼ်လႆႈသူင်ႇသင်ႇၸိူင်ႉၼႆ၊ ၸၢႆးယိၼ်းၸူမ်းၵူႈလွင်ႈယဝ်ႉ လႆႈၵိူတ်ႇပဵၼ်လုၵ်ႈဢူႈတင်းမႄႈႁဝ်း။
ဢေးၼွင်ႉ ဢၼ်ၵဝ်ၵႂႃႇပႅတ်ႈႁဵတ်းၼႆ မႂ်းတေၸႂ်လမ်ၵဝ်ယူႇၸွင်ႇၸႂ်ႈႁိုဝ် ဢၼ်ႁဵတ်းၸွမ်းၵႂၢမ်းမၼ်ႈဢၼ်ပၼ်ဝႆႉဢမ်ႇလႆႈ ဢၼ်လႆႈပွႆႇၽႃႈမႂ်းၵႂႃႇ၊ ယႃႇၸႂ်လမ်ၵဝ်လႄႈၼႃႈ ၵဝ်ၵေႃႈၶႂ်ႈပွၵ်ႈမိူဝ်းယူႇၸွမ်းမႂ်းယူႇဢိူဝ်ႈ မီးၶၢဝ်းယၢမ်းၵႃႈႁိုဝ်ၵေႃႈ ၶႂ်ႈၵိၼ်ၶဝ်ႈၽၵ်းဢၼ်မႂ်းႁဵတ်းလဵင်ႉၼၼ်ႉယူႇတႃႇသေႇယဝ်ႉ၊ ၶႂ်ႈငိၼ်းသဵင်ပွင်ႉမႂ်းယူႇၵူၺ်း၊ ၶႂ်ႈပဵၼ်ၵူၼ်းသူင်ႇမႂ်းပဵၼ်ႁေႃပဵၼ်ႁိူၼ်းယူႇၵေႃႈ ဢဝ်ဢမ်ႇၸၢင်ႈႁဵတ်းယဝ်ႉ၊ ယွမ်းၼွမ်းယူႇၼႃႈၼွင်ႉယိင်းၵဝ် ၵဝ်ၽၢၵ်ႇဢူႈတင်းမႄႈႁဝ်း ႁႂ်ႈမႂ်းလုမ်းလႃးၶဝ်ၵႂႃႇၼႃႈ။
ၶႃႈၵေႃႈတင်းႁႆႈတင်းဢၢၼ်ႇၼၼ်ႉယဝ်ႉ ၽိုၼ်လိၵ်ႈၼၼ်ႉ ၼမ်ႉတႃၶႃႈသမ်ႉပေႃးယမ်းတဵမ်ၵႂႃႇမူတ်း။ တင်းၸေႈမၼ်းၼၼ်ႉၵေႃႈ ပေႃးၵဝ်ႇၼႃႇယဝ်ႉလူး။
လိူဝ်သေလိၵ်ႈသူင်ႇသင်ႇ ႁဝ်းယဝ်ႉ ယင်းမီးလိၵ်ႈသူင်ႇထိုင်ဢေးၶမ်းထႅင်ႈၽိုၼ်ၼိုင်ႈ ဢၼ်ၸပ်းမႃးၸွမ်းၵၼ်ၼၼ်ႉလႄႈ၊ ၶႃႈၵေႃႈလႆႈဢဝ်ၵႂႃႇပၼ် ဢေးၶမ်းယူႇ၊ ၵူၺ်းၵႃႈ မၼ်းသမ်ႉဢမ်ႇမေႃလူ ၶႃႈၸင်ႇလႆႈလူၼႄမၼ်းၵႂႃႇယဝ်ႉ။
ၵေႃႉႁၵ်ႉ ၵႂၢမ်းမၼ်ႈဢၼ်ႁဝ်းပၼ်သူဝႆႉဝၼ်းၼၼ်ႉ ႁဝ်းႁဵတ်းၸွမ်းဢမ်ႇလႆႈ၊ ၼႂ်းၵၢင်ၸႂ်တႄႉၶႂ်ႈၶိုၼ်းပွၵ်ႈမိူဝ်းႁႃသူ ၶႂ်ႈယူႇႁူမ်ႈပဵၼ်ႁိူၼ်းလဵဝ်တင်းသူ၊ ၶႂ်ႈတၢႆယူႇၼႂ်းဢွင်ႈဢူၵ်းသူ ဢၼ်ႁပ်ႉႁွင်းဝႆႉၼၼ်ႉယူႇဢိူဝ်ႈ၊ ၵူၺ်းၵႃႈ ႁဝ်းၵေႃႈႁဵတ်းဢမ်ႇလႆႈ ႁဵတ်းၸွမ်းၵႂၢမ်းမၼ်ႈဢၼ်ပၼ်သူဝႆႉဢမ်ႇလႆႈ၊ ႁဵတ်းႁႂ်ႈသူမီးၸၢတ်ႈပၢၼ်ႁႂ်ႈၵတ်းယဵၼ်ၸႂ်ဢမ်ႇလႆႈ၊ ၸူးၸႂ်တႄႉ ၶႂ်ႈႁႂ်ႈသူမီးတၢင်းသိူဝ်းတေႃႇၸူဝ်ႈလႄႈ ယူႇၸွမ်းသူၵႂႃႇႁႂ်ႈမီးတၢင်းသိူဝ်းဢိူဝ်ႈ ၵူၺ်းၵႃႈ ႁဝ်းၵေႃႈလႆႈတၢႆၽၢတ်ႇယၢၼ်သူၵႂႃႇပႅတ်ႈဢွၼ်တၢင်းယဝ်ႉ။ သမ်ႉဝႃႈဢမ်ႇမီးႁဝ်းယဝ်ႉၵေႃႈ ႁႃၵူၼ်းလီလီဢၼ်ၵိုင်ႇထိူၵ်ႈၵၼ်တင်းသူ ဢၼ်လုမ်းလႃးတူၺ်းထိုင်သူလီလီၼၼ်ႉလႄႈၼႃႈ ၵေႃႉႁၵ်ႉ”
ဢေးၶမ်းၼၼ်ႉၵေႃႈ ၼမ်ႉတႃမၼ်းပေႃးလႆဢွၵ်ႇမႃး၊ ႁႃးသွင်ၵေႃႉၵေႃႈ ၵွတ်ႇၵၼ်သေႁႆႈယူႇႁဵတ်းၼၼ်ထႅင်ႈယဝ်ႉ။
ၸၢတ်ႈပၢၼ်ဢွၼ်ႇၵူၼ်းၵေႃႉၼိုင်ႈၼၼ်ႉ သမ်ႉဝႃႈမၼ်းဢမ်ႇၸႂ်ႈၵူၼ်းလမ်ႇလွင်ႈ တႃႇၵူၼ်းတင်းၼမ်သေတႃႉၵေႃႈ မၼ်းပဵၼ်ၵူၼ်းလမ်ႇလွင်ႈ ဢၼ်ဢမ်ႇမီးတီႈတႅၵ်ႈလႆႈ တွၼ်ႈတႃႇၼႃႈႁိူၼ်းမၼ်းယဝ်ႉ၊ ပဵၼ်လုၵ်ႈ ဢၼ်မီးဢူႈမႄႈမုင်ႈမွင်းႁႂ်ႈမိူဝ်းႁႃယူႇ လႄႈ ပဵၼ်ပီႈဢၢႆႈဢိၵ်ႇၼွင်ႉၸၢႆး ၶွင်ၽႂ်သေၵေႃႉၼိုင်ႈ၊ ပဵၼ်ၵေႃႉႁၵ်ႉ ၵူၼ်းသေၵေႃႉၵေႃႉယူႇၼၼ်ႉယဝ်ႉ။ ၼႂ်းဢူၵ်းၼႂ်းၸႂ်ၶဝ် ဢၼ်လႆႈလူႉသုမ်း ၵူၼ်းၵေႃႉဢၼ်ပဵၼ် ၶႂၼ်ဢူၵ်းၶႂၼ်ၸႂ်ၶဝ်ၵႂႃႇၼၼ်ႉ မၼ်းပဵၼ်မၢႆတွင်းဢၼ် မွင်ၸႂ်တွၼ်ႈတႃႇၶဝ်ဝႆႉယူႇၼၼ်ႉယဝ်ႉ။
တႃႇတွင်း။ ။ ၸိူင်းႁူဝ်ၼႆႉ ပိူင်ပဵၼ်ငဝ်းလၢႆး ဝူၼ်ႉသၢင်ႈမႃးဢဝ်ၵူၺ်း။
သင်မီးတီႈၽိတ်းတီႈပိူင်ႈ တီႈဢမ်ႇထုၵ်ႇမႅၼ်ႈၼႆၵေႃႈ ၸွႆႈထတ်းထွင်မူၼ်ႉမႄးၶိုင်ပွင်ပၼ်သေၵမ်း၊ ဢမ်ႇၸႂ်ႈၽူႈႁူႉႁၼ်ၵႂၢင်ႈ ၽူႈလူင်ႉလႅၼ်ႇၶႅၼ်ႇမေႃ ဢမ်ႇလိူဝ်လႆႈတၢင်းသူင် ၽူႈတႅမ်ႈလိၵ်ႈသေ လႆႈတႅမ်ႈဢွၵ်ႇမႃးၼၼ်ႉယဝ်ႉ။
ၼပ်ႉယမ်ထိုင်ၽူႈလူလိၵ်ႈႁဝ်းယူႇဢေႃႈ
ပၢႆၵမ်−သႅၼ်ငဝ်း
06/08/2023
