ၵူၼ်းၵေႃႉဢၼ်ယၢမ်ႈတုၵ်ႉၶမႃး တေမီးလွင်ႈပွင်ႇၸႂ်လိူဝ်သေ ၵႂႃႇတႅပ်းတတ်း၊ ၶဝ်ပွင်ႇၸႂ်လီဝႃႈ ၽႂ်ၵေႃႈမီးလွင်ႈယၢပ်ႇၸႂ်ၵၼ်ၵူႈၵေႃႉယဝ်ႉ ဢမ်ႇမီးသင်ငႆၢႈသေလွင်ႈ။
တၢင်းႁိူဝ်ႉၼၼ်ႉ ႁဵတ်းႁႂ်ႈႁူဝ်ၸႂ်ဢူၼ်ႈၼူၼ်းမႃး၊ ၵူၼ်းၵေႃႉဢၼ်ဢမ်ႇယၢမ်ႈမီးသင်လႆႈမႃးငႆၢႈငႆၢႈၼၼ်ႉ တေမေႃႁၼ်ထိုင်ၵၢင်ၸႂ်ပိူၼ်ႈတႃႇသေႇ။
ၵူၼ်းၵေႃႉဢၼ်ၵႆႉလူမ်ႉၼၼ်ႉ ၶဝ်ႁူႉဝႃႈတေလႆႈလုၵ်ႉၸိူင်ႉႁိုဝ် လႄႈ တေဢမ်ႇၶူဝ်ၵူၼ်းၵေႃႉဢၼ်ၶီႈလိုတ်းယူႇ ယွၼ်ႉၶဝ်ယၢမ်ႈပဵၼ်ၵူၼ်းၵေႃႉၼၼ်ႉမႃး။
မိူဝ်ႈထူပ်းလွင်ႈဢမ်ႇလီမႃးၼမ် တေမေႃႁပ်ႉထွမ်ႇပိူၼ်ႈၼမ်မႃး လၢတ်ႈဢေႇမႃး၊ ထွမ်ႇႁႂ်ႈပွင်ႇၸႂ် ဢမ်ႇၸႂ်ႈတႃႇၶတ်း မၢင်ပွၵ်ႈၸႂ်ၵူၼ်းၵေႃႈလူဝ်ႇပိုၼ်ႉတီႈယူႇဢိူဝ်ႈ။
ၵူၼ်းၵေႃႉယၢမ်ႈယၢပ်ႇၽိုတ်ႇမႃးၼၼ်ႉ လွင်ႈလဵၵ်ႉဢွၼ်ႇၵူၺ်းၵေႃႈ ၶဝ်ႁၼ်ၵႃႈၶၼ်မၼ်းယဝ်ႉ၊ ၶဝ်ႈၽၵ်းဢုၼ်ႇဢုၼ်ႇ၊ ဢွင်ႈတီႈဢုၼ်ႇၸႂ်၊ တီႈလူမ်ၸႂ် လႄႈ ၶေႃႈၵႂၢမ်းဝႃႈ “ဢမ်ႇပဵၼ်သင်ၼႃ” ၼႆၵူၺ်းၵေႃႈမီးၵႃႈၶၼ်ၼႃႇယဝ်ႉ။
မိူဝ်ႈယၢမ်ႈတုၵ်ႉၶမႃး တၢင်းသိူဝ်းဢၼ်ဝႃႈၼၼ်ႉ ဢမ်ႇၸႂ်ႈလွင်ႈဢၼ်ယႂ်ႇလူင်ၶိုၵ်ႉၶမ်ႇၼႃႇ၊ ႁႂ်ႈပဵၼ်တၢင်းသိူဝ်းဢၼ်ၸႅတ်ႈၸၢင်ႇၵူၺ်းၵေႃႈလႆႈယဝ်ႉ၊ ဢမ်ႇလူဝ်ႇလႆႈတဵမ်ထူၼ်ႈၵူႈလွင်ႈ။
ၵူၼ်းၵေႃႉဢၼ်ၶၢမ်ႈပူၼ်ႉလွင်ႈႁႆၢႉမႃး တေမေႃႁၵ်ႉတဵမ်ၸႂ်၊ ယွၼ်ႉႁူႉလီဝႃႈ တႃႇတေမီးၽႂ်ယူႇႁိမ်းၶၢင်ႈၼၼ်ႉ ဢမ်ႇၸႂ်ႈလွင်ႈငႆၢႈ ၶဝ်သႂ်ႇၸႂ်ဝႆႉလမ်ႇလွင်ႈၼႃႇ။
ၵူၼ်းယၢမ်ႈၵိၼ်းၸႂ်ၼၼ်ႉ တေၵႆႉပၼ်ပိူၼ်ႈၼမ်လိူဝ်ဢၼ်ၸဝ်ႈၵဝ်ႇမီးဝႆႉ ဢမ်ႇၸႂ်ၵွပ်ႈမီးၼႃႇ ယွၼ်ႉပွင်ႇၸႂ်လီဝႃႈ ၵူၼ်းၵေႃႉဢမ်ႇလႆႈႁပ်ႉၼၼ်ႉမၼ်းပဵၼ်ၸိူင်ႉႁိုဝ်။
လွင်ႈႁိူဝ်ႉၼၼ်ႉ တေႁဵတ်းႁႂ်ႈၵႅၼ်ႇၶႅင်မႃးထႅင်ႈလႄႈ ဢူၼ်ႈၼူၼ်းတေႃႇတူဝ်ၵဝ်ႇမႃးထႅင်ႈ၊ ပွင်ႇၸႂ်လီဝႃႈၸႂ်ၵူၼ်းဢမ်ႇလႆႈၵႅၼ်ႇၶႅင်ယူႇတႃႇသေႇ။
ၵူၼ်းဢၼ်ယၢမ်ႈတုၵ်ႉၶ တေပွင်ႇၸႂ်ၸၢတ်ႈပၢၼ်လႆႈလီလိူဝ်သေပိူၵ်ႇၼွၵ်ႈ၊ ၸၢတ်ႈပၢၼ်ၼၼ်ႉဢမ်ႇလူဝ်ႇႁၢင်ႈလီယူႇတႃႇသေႇ သင်ဝႃႈသိုပ်ႇသူႈၵႂႃႇလႆႈထႅင်ႈဝၼ်းၼိုင်ႈၵူၺ်းၵေႃႈ ဢွင်ႇပေႉယဝ်ႉ။
ပိၼ်ႇ – ငဝ်မွင်မိုတ်းမူဝ်း
