ၵူၼ်းၸၢႆးဢၼ်မီးတၢင်းႁူႉ၊ မေႃဝူၼ်ႉၼၼ်ႉ ၶဝ်တေႁူႉဝႃႈ ထုၵ်ႇလီလိူၵ်ႈၽူႈယိင်းၸိူင်ႉႁိုဝ် ပဵၼ်မႄႈလုၵ်ႈဢွၼ်ႇၶဝ်။
ၽူႈယိင်း ႁဵတ်းႁၢင်ႈၶႅၼ်ႇ၊ ၵိၼ်လဝ်ႈၶႅၼ်ႇ၊ လေႇၶႅၼ်ႇ၊ ၸႂ်ႉငိုၼ်းၶႅၼ်ႇ၊ ၶႅၼ်ႇလွင်ႈႁွမ်းသွင် တေပဵၼ်လႆႈၵူႈၼွၼ်း ဢမ်ႇၼၼ် ပဵၼ်ၶိူင်ႈမိုဝ်းပူတ်းပွႆႇဢႃးလူမ်းၵူၺ်း။
ၽူႈယိင်းဢၼ်မေႃဝူၼ်ႉၼၼ်ႉ တေဢမ်ႇမီးဝၼ်းဢဝ်ၵူၼ်းၸၢႆးဢၼ်ဢမ်ႇလီ မႃးပဵၼ်ပေႃႈလုၵ်ႈဢွၼ်ႇၶဝ် မႃးပဵၼ်ပၼ်ႁႃၸၢတ်ႈပၢၼ်ၶဝ်မိူဝ်းၼႃႈလႆႈ။
ပဵၼ်ၵူၼ်းဢၼ်ယွၵ်ႇယဝ်ႉပိူၼ်ႈၸွမ်းၶၢင်ႈတၢင်း၊ လိမ်ႇတီႇပႃႇလူတ်ႉလင်ႁႅင်းႁႅင်း ပွႆႇၵႂၼ်းလမ်လမ်ဢွၵ်ႇမႃးလႆႈ ၼၼ်ႉ ၽူႈယိင်းလီလီ ယင်းတေဢမ်ႇဢဝ်တႃၸၢႆႉတူၺ်းလူးၵွၼ်ႇ။ တေမီးၵေႃႈၵူၼ်းမဵဝ်းလဵဝ်ၵၼ်ၵူၺ်း ဢၼ်တေယုၵ်ႉယွင်ႈၵၼ် ႁၢၼ်ႉၸႂ်ၸွမ်းလွင်ႈႁဵတ်းသၢင်ႈၸိူင်ႉၼၼ်လႆႈ။
ၵူၼ်းၸၢႆးဢၼ်ႁၢင်ႈၶိူင်ႈလဝ်းလဝ်း သိတ်းၼမ်ႉႁွမ်သေ မေႃလႄႇၵၢင်ၶိုၼ်းၶႅၼ်ႇ ၽူႈယိင်းလႅတ်းၼၼ်ႉတေဝူၼ်ႉလႆႈဝႃႈ ၵူၼ်းၸိူင်ႉၼႆသင်လႆႈမႃးပဵၼ်ၽူဝ် မၼ်းၵေႃႈတေမႃးၵွပ်ႈၵိၼ်မၼ်းၵူၺ်း။
ၽူႈၸၢႆးဢၼ်မေႃတေႃႇမေႃလွင်း၊ ၵိၼ်ယႃႈလဵၼ်ႈၾိၼ်ႇ ၽူႈယိင်းလီလီၼၼ်ႉ ယႃႇဝႃႈတေဢဝ်မႃးႁဵတ်းၽူဝ်လႃႈ တေႃႈၼင်ႇတၵ်ႉၶေႃႈၵႂၢမ်းမႃးၵဝ်းၵူၺ်း မၼ်းယင်းပလွၵ်ႉပႅတ်ႈၵွၼ်ႇ။
ၵူၼ်းၸၢႆးဢၼ်ဢမ်ႇလႆႈလွင်ႈ ဝၼ်းဝၼ်းဢမ်ႇဝူၼ်ႉႁႃႁဵတ်းၽွၼ်းလီသင် ဢမ်ႇမီးယိူင်းဢၢၼ်းသင် ထူၺ်ႈၸႂ်ပႅတ်ႈလၢႆၵႂႃႇတင်းဝၼ်းတင်းဝၼ်း ဢမ်ႇဢၢၼ်းလႅၵ်ႈလၢႆႈတူဝ်ၵဝ်ႇၼၼ်ႉ ၵူၼ်းယိင်းမေႃဝူၼ်ႉ ၶဝ်တေႁူႉၶိုတ်းဝႃႈ သင်ဢဝ်ၵူၼ်းၸိူင်ႉၼႆ ၸၢတ်ႈပၢၼ်မၼ်းတေတုၵ်ႉၶၶၢၼ်ၸႂ် ဢမ်ႇမီးယိူင်းဢၢၼ်းသင်။
ၵွပ်ႈၼၼ်ယႃႇထၢမ်ဝႃႈ ယွၼ်ႉသင်လႄႈဢမ်ႇထူပ်းၵေႃႉႁၵ်ႉလီလီသေပွၵ်ႈ မၢင်ပွၵ်ႈၵေႃႈ လူဝ်ႇတူၺ်းတူဝ်ၵဝ်ႇၽွင်ႈဝႃႈ ႁဝ်းလူးၸွင်ႇလီတေႉယူႇႁႃႉ?။
သင်ႁဝ်းလီတေႉယူႇ ၵူၼ်းလီလီမိူၼ်ၵၼ်ၵေႃႈ တေယွမ်းႁပ်ႉလႄႈၶဝ်ႈႁႃၵၼ်ၵူၺ်း။
သၽႃႇဝၵူၼ်းႁဝ်းၼၼ်ႉ ၶႂ်ႈလႆႈလွင်ႈမေႃပဵင်းပေႃး၊ တၢင်းသိူဝ်း၊ လွင်ႈလွတ်ႈၽေး၊ လွင်ႈမၼ်ႈၵိုမ်းၼႂ်းၸၢတ်ႈပၢၼ်ယဝ်ႉ။
မၢင်ၵေႃႉ လွင်ႈႁဵတ်းသၢင်ႈၶဝ်ၵူၺ်းၵေႃႈ ႁဵတ်းႁႂ်ႈမီးလွင်ႈထၢင်ႇၽိတ်းထၢင်ႇထိူမ် ယူႇယဝ်ႉ။
ၶႂ်ႈလႆႈၵူၼ်းလီ ႁဝ်းၵေႃႈတေလႆႈပဵၼ်ၵူၼ်းလီယဝ်ႉ။
ၶႂ်ႈမီးတူင်ႇဝူင်းလီ ႁဝ်းၵေႃႈတေလႆႈလီသေၵွၼ်ႇ။
ၶႂ်ႈမီးၸၢတ်ႈပၢၼ်လီ ႁဝ်းၵေႃႈတေလႆႈပဵၼ်ၵူၼ်းလီတေႉတေႉယဝ်ႉ။
ပိၼ်ႇ-ငဝ်မွင်မိုတ်းမူဝ်း