တွၼ်ႈသွင်
ပီႊၵၢၼ်ႁဵၼ်းလိုၼ်းသုတ်း ၽွင်းၶၢဝ်းဢိုတ်းႁဵၼ်းသေ ဢၢႆႈၸၢႆးမႃးလႄႇႁိူၼ်းၼၼ်ႉ ပႃးဢူၺ်းၵေႃႉမၼ်းသွင်ၵေႃႉ မႃးယူႇၸွမ်းယဝ်ႉ၊ သမ်ႉဝႃႈဢိုတ်းႁဵၼ်းၵေႃႈ ၶဝ်ယင်းတိုၵ်ႉလႆႈႁဵတ်းၵၢၼ်ယူႇလႄႈ ၶဝ်ၵေႃႈမႃးႁဵတ်းၵၢၼ်ၵႂႃႇၸွမ်းၵၼ် မီးပွၵ်ႈၼႆႉယဝ်ႉ ဢၼ်ၶႃႈဢမ်ႇလႆႈႁၼ်ဢၢႆႈၸၢႆးႁဝ်း မီးၶၢဝ်းယၢမ်းဢုပ်ႇသၢဝ်၊ ၵၢင်ၶမ်ႈၵၢင်ဝၼ်းၵေႃႈ ၼင်ႈႁေႁဵတ်းၵၢၼ်ၶဝ် မီးမိူဝ်ႈၵိၼ်ၶဝ်ႈၵူၺ်းယူဝ်ႉတူင်ႉတီႈ။
ဢၢႆႈၸၢႆးႁဝ်းၼၼ်ႉႁႃႉ ႁဵၼ်းဝႆႉၽၢႆႇ IT ၼႆဝႃႇ ၶႃႈၵေႃႈဢမ်ႇပေႃးႁူႉတေႉတေႉၼင်ႇၵွၼ်ႇ လွင်ႈၵၢၼ်ႁဵၼ်းၶဝ်ပဵၼ်ၸိူင်ႉႁိုဝ်တႄႉ၊ ပွၵ်ႈၼႆႉ ဢူၺ်းၵေႃႉမၼ်း ဢမ်ႇၸႂ်ႈၵူၼ်းဢၼ်ၵႆႉမႃးယူႇတႃႇသေႇၸိူဝ်းၼၼ်ႉ ပဵၼ်ၵူၼ်းဢၼ်ၶႃႈဢမ်ႇယၢမ်ႈႁူႉၸၵ်းႁေပွၵ်ႈၼၼ်ႉယဝ်ႉ၊ ၵေႃႉၼိုင်ႈတႄႉ ႁွင်ႉဝႃႈ ၼုမ်ႇလႅင်း ထႅင်ႈၵေႃႉၼိုင်ႈသမ်ႉ ၸိုၼ်ႈမိူင်း ၼႆဝႃႇ။
မႃးႁွတ်ႈတီႈၼႆႈယဝ်ႉ ၶႃႈပေႃးလိုမ်းလၢတ်ႈၸိုဝ်ႈၶႃႈယဝ်ႉၼႃႇ ပိူၼ်ႈတႄႉႁွင်ႉၶႃႈဢေးၼွင်ႉၼႆဢေႃႈ တၢင်းၵၢၼ်ၵေႃႈ ၼၢင်းၼွင်ႉၼႆၵူၺ်း၊ ၸိုဝ်ႈဢၢႆႈၸၢႆးႁဝ်းတႄႉႁွင်ႉဝႃႈ ၼေႃႇၶိူဝ်း ၼႆၶႃႈ။
ၶႃသွင်ၵေႃႉၼႆတႄႉ ပဵၼ်ၵူၼ်းလီၵျႃႉၼေႉ ပေႃးၵိၼ်ၶဝ်ႈယဝ်ႉၼႆၵေႃႈ ၸွႆႈၵဵပ်းၽဵဝ်ႈၵဵပ်းသိမ်းသေ မီးပၵ်းမီးပိူင်လီၼႃႇ၊ သင်မၼ်းမိူၼ်ၼႆတႃႇသေႇတႄႉ ၵႆႉႁွင်ႉမႃးၵေႃႈဢမ်ႇပဵၼ်သင်ၼင်ႇၵဝ်ႇလႂ်။
ပေႃးဢူၺ်းၵေႃႉဢၢႆႈၸၢႆးႁဝ်းမႃးၼႆ ၶဝ်ၵေႃႈယူႇႁင်းၶဝ် ၶႃႈၵေႃႈယူႇႁင်းၶႃႈၵူၺ်း၊ ၵိၼ်ၶဝ်ႈၵေႃႈၵိၼ်ယဝ်ႉၵႂႃႇႁင်းၶဝ် ၶႃႈၵေႃႉပဵၼ်ၵူၼ်းၵဵပ်းၽဵဝ်ႈၵဵပ်းလၢင်ႉတႃႇသေႇယဝ်ႉ၊ ဢမ်ႇၸႂ်ႈဝႃႈၶဝ်ဢမ်ႇၶႂ်ႈလၢင်ႉၼင်ႇၵဝ်ႇၼႃ မၢင်ပွၵ်ႈၼႆႉ မႄႈႁဝ်းၼၼ်ႉယဝ်ႉ ဢဝ်ဝႆႉလႄႈ ဢေးၼွင်ႉတေႁဵတ်းၵူၺ်း ဢမ်ႇပၼ်ၶဝ်လၢင်ႉတႃႇသေႇၼၼ်ႉယဝ်ႉ။ ပွၵ်ႈၼႆႉသမ်ႉ မီးၵူၼ်းဢၼ်ဢမ်ႇမေႃတူၺ်းလၢႆၵေႃႉၼိုင်ႈ မႃးၸွႆႈၶႃႈလၢင်ႉဝၢၼ်ႇသေ တူင်ႉတၵ်ႉဢုပ်ႇၸူးၶႃႈ လူၺ်ႈသဵင်ၵႂၢမ်းဝႃႈ
“ၼွင်ႉၸိုဝ်ႈသင်ၶႃႈ..”
ၼႂ်းၸႂ်ၵေႃႈလၢတ်ႈယူႇဝႃႈ “တေၶႂ်ႈႁူႉႁဵတ်းသင်” ၵူၺ်းၵႃႈသူပ်းတႄႉလၢတ်ႈဢွၵ်ႇယဝ်ႉ “ႁွင်ႉဢေးၼွင်ႉၵေႃႈလႆႈၶႃႈ”
“ၸိုဝ်ႈတေႉတေႉသူဢေႃႈ”
“ၼၼ်ႉယဝ်ႉ ၸိုဝ်ႈတေႉၶႃႈ”
“ပေႃးၼၼ်ႁဝ်းတေႁွင်ႉ ယိင်းၼွင်ႉ ၶႃႈၼႃႈ ႁဝ်းၸိုဝ်ႈႁွင်ႉၸိုၼ်ႈမိူင်းၶႃႈ”
ၵူၼ်းၸိူင်ႉၼင်ႇဢၢႆႈၸၢႆးၼႆႉ မီးဢူၺ်းၵေႃႉမေႃလၢတ်ႈၵႂၢမ်းယဵၼ်ႇငႄႈႁေႁႃႉ လၵ်ႉလၢတ်ႈယူႇၼႂ်းၸႂ် ၵူၺ်းၵႃႈ ၶႃႈၵေႃႈ လႅပ်ႈၸႂ်ဢူၼ်ႈၸွမ်းၶေႃႈၵႂၢမ်းယဵၼ်ႇငႄႈႁိုဝ်ဢမ်ႇႁူႉၼႃႇ “ဢေႃႈ..” ၼႆၵႂႃႇယဝ်ႉ။
ယွၼ်ႉလွင်ႈႁဵတ်းသၢင်ႈလႄႈ ၶေႃႈၵႂၢမ်းတူင်ႉတၵ်ႉၼႆႉၵူၺ်းၼၼ်ႉ မၼ်းၵေႃႈလႆႈႁဵတ်းႁႂ်ႈၶႃႈသူၼ်ၸႂ်ၶဝ်မႃးယဝ်ႉ၊ ၵူၼ်းၵေႃႉၼႆႉ ပေႉမႃးဢမ်ႇမိူၼ်ၽႂ်လႃႇ မၼ်းတေပဵၼ်ၵူၼ်းၸိူင်ႉႁိုဝ် ၸွင်ႇတေမိူၼ်ၵူၼ်းၸိူင်ႉၼင်ႇပီႈဢၢႆႈၶႃႈၼၼ်ႉယူႇႁိုဝ် ပႃးတၢင်းလွင်ႈထၢင်ႇပိူင်ႈလေႃးၸွမ်းယူႇ။
တႄႇၸဵမ်မိူဝ်ႈဝၼ်းၶဝ်မႃးယူႇ တေႃႇထိုင်ဝၼ်းၶဝ်ပွၵ်ႈမိူဝ်း ႁိုင်ယူႇသွင်ဝူင်ႈၼႆႉ ပီႈၶဝ်ၵေႃႈ တေၸွႆႈၶႃႈတႃႇသေႇ ဢမ်ႇဝႃႈႁၢင်ႈႁႅၼ်းၶဝ်ႈႁႅၼ်းၽၵ်း၊ ၽဵဝ်ႈသိမ်းလၢင်ႉဝၢၼ်ႇ မိူဝ်ႈမီးၵူၼ်းၸွႆႈၸိူင်ႉၼႆ ၼင်ႇႁၢင်ႈၵၢၼ်သမ်ႉပေႃးမဝ်လူင်မႃးယဝ်ႉ။ ဝၢႆးၶဝ်မိူဝ်းၵေႃႈ ဢဝ်ၶႃႈသမ်ႉပေႃးငဝ်လူင်ၵႂႃႇ ၵိုတ်းၵႅၼ်ႇဢၢႆးၸၢႆးႁဝ်းၼၼ်ႉၵူၺ်း ယင်းတိုၵ်ႉၵိုတ်းယူႇလႄႈ တိုၵ်ႉလႆႈၸွမ်းႁဵတ်းပၼ်ယူႇတိၵ်းတိၵ်း။
ဝၢႆးသေၶဝ်ပွၵ်ႈမိူဝ်းၵႂႃႇ မွၵ်ႈသွင်ဝၼ်းၼႆႉ ပီႈၶဝ်ၵေႃႈလႆႈပွၵ်ႈမႃးၶိုၼ်း ပွၵ်ႈၼႆႉတႄႉ မႃးၵေႃႉလဵဝ်ၵူၺ်း ဢမ်ႇပႃးပီႈၼုမ်ႇလႅင်း၊ မႃးၵႅပ်ႉၼိုင်ႈၵူၺ်း မိူၼ်တေလိုမ်းၶူဝ်းမၼ်းလႄႈ မႃးဢဝ်ႁေမိူဝ်းၶိုၼ်းယဝ်ႉ။ မိူဝ်ႈမၼ်းတေပွၵ်ႈမိူဝ်း ၶႃႈၵေႃႈၵႂႃႇပႂ်ႉဢိုတ်းၽၵ်းတူဝၢင်းပၼ်ယဝ်ႉ မၼ်းလၢတ်ႈတီႈၶႃႈဝႃႈ
“ပီႈၸႂ်ထိုင်ၼွင်ႉတေႉယဝ်ႉ”
ငိၼ်းၶေႃႈၵႂၢမ်းၼၼ်ႉ ၶႃႈသမ်ႉပေႃးဢမ်ႇႁတ်းယၵ်ႉတူၺ်းၼႃႈၶဝ်ၵႂႃႇၵမ်းလဵဝ်၊ ၼႃႈၶႃႈလိူတ်ႇလႅင်မႃး တူဝ်သမ်ႉပေႃးမႆႈလူင်ဝႆႉယဝ်ႉ၊ ၼင်ႇဝႃႈႁူဝ်ၸႂ်ၼၼ်ႉၵေႃႈ တွတ်ႇၵီႈၸွမ်းပႃးယူႇ ၶႃႈဢမ်ႇတွၼ်ႉယၢမ်ႈပဵၼ်ၸိူင်ႉၼႆသေပွၵ်ႈ ၵူၺ်းၵႃႈ ပဵၼ်သင်လႄႈ ယွၼ်ႉၵႂၢမ်းဢွၼ်ႇၶေႃႈၼႆႉၵူၺ်း ႁဵတ်းႁႂ်ႈၸႂ်ၶႃႈပေႃးသၼ်ႇၶွၼ်းဝႆၸွမ်းမၼ်းလႆႈ။
“ပီႈယွၼ်းတီႈၵပ်းသိုပ်ႇၽွင်ႈ..”
ၶႃႈၵေႃႈလႆႈပၼ်ၶဝ်ၵႂႃႇ လူၺ်ႈတဵမ်ၸႂ် ၶႃႈတိုၵ်ႉႁူႉတူဝ်ၵူၺ်းဝႃႈ ၶႃႈၵေႃႈ ပဵၼ်ၵူၼ်း “ဢိူဝ်ႈငၢႆႈ” မိူၼ်ၵၼ်ၼႆ။ ၶႃႈပၼ်ၵႂႃႇႁဵတ်းၼၼ်ၵူၺ်း ဢမ်ႇထၢင်ႇ ၶဝ်တေၵပ်းသိုပ်ႇမႃးလႄႈ တေလၢတ်ႈတေႃႇမႃး၊ ၶႃႈၵေႃႈတွပ်ႇၵႂႃႇလူၺ်ႈဢမ်ႇလႆႈဝူၼ်ႉၼမ်သင် ၵွပ်ႈမၼ်းၵေႃႈဢမ်ႇၸႂ်ႈၵႂၢမ်းႁၵ်ႉၵႂၢမ်းပႅင်း ပဵၼ်ၵႂၢမ်းယူႇလီၵိၼ်ဝၢၼ် ၵိၼ်ၶဝ်ႈယဝ်ႉႁႃႉ ၵိၼ်ၶဝ်ႈၽၵ်းသင် ၸိူဝ်းၼႆႉၵူၺ်း။ မိူဝ်ႈတႄႇမၼ်းတႄႉ ယူႇလီၵိၼ်ဝၢၼ်ယူႇ ၵူၺ်းၵႃႈ ၵွႆႈယူႇၵွႆႈၶႂ်ႈႁူႉၶႂ်ႈႁၼ်ၼမ်မႃး လေႃးၽၼမ်မႃး ထိုင်တီႈသမ်ႉပေႃးလိုမ်းတူဝ်ၵႂႃႇယဝ်ႉဝႃႈ ၶဝ်ပဵၼ်ဢူၺ်းၵေႃႉဢၢႆႈၸၢႆးၼႆ။
ႁဵတ်းႁႂ်ႈၶႃႈဢမ်ႇၵူဝ်ဝႃႈ မၼ်းတေပဵၼ်သင်မႃးလႄႈ ၶႂ်ႈၸၢမ်းတူၺ်းမႃးယဝ်ႉ တၢင်းႁၵ်ႉမၼ်းမိူၼ်ႁိုဝ်လႃႇ တူၺ်းၵူၼ်းၸိူင်ႉၼင်ႇဢၢႆႈၸၢႆးၶဝ်ၼၼ်ႉတႄႉ လႅပ်ႈငၢႆႈၼႃႇလူး၊ လီၵေႃႈဢဝ် ဢမ်ႇလီၵေႃႈပႅတ်ႈၵူၺ်းၼႃႇ ၸၢင်ႈယၢပ်ႇႁင်။
ၵူၺ်းၵႃႈ ယွၼ်ႉၶေႃႈၵႂၢမ်းဝႃႈၸၢမ်းၼႆၼၼ်ႉ ႁဵတ်းႁႂ်ႈၶႃႈသမ်ႉပေႃးလၢပ်ႇၵႂႃႇယဝ်ႉ မိူဝ်ႈၶႃႈလႆႈၵျိူၵ်ႈၶဝ်ၵႂႃႇတႄႉတႄႉယဝ်ႉ ႁၢမ်ႈဢမ်ႇလႆႈဢမ်ႇႁႂ်ႈၸႂ်ထိုင်ၶဝ် ဢမ်ႇလႆႈဢုပ်ႇလၢတ်ႈတေႃႇၶဝ်ၼိုင်ႈဝၼ်းၼၼ်ႉ မိူၼ်ထူၺ်ႈၸႂ်ဢမ်ႇဢိမ်ႇဝႆႉၼၼ်ႉယဝ်ႉ။
မိူဝ်ႈဝၼ်းမၼ်းႁိုင်မႃး ဢမ်ႇလႆႈႁူပ်ႉၵၼ်ႁိုင်မႃး ၵူႈလွင်ႈၵေႃႈ လႅၵ်ႈလၢႆႈယဵၼ်ႁၢႆၵႂႃႇၵမ်းဢိတ်းဢိတ်း ဢၼ်ၵႆႉလၢတ်ႈၵႆႉဢုပ်ႇၼၼ်ႉၵေႃႈ ဢမ်ႇမီးသင်တႃႇတေဢုပ်ႇလၢတ်ႈယဝ်ႉ၊ သဵင်လၢတ်ႈႁၢႆ ၶေႃႈၵႂၢမ်းၵေႃႈၸၢင် ယဵၼ်ၵႂႃႇတိၵ်းတိၵ်းယူႇယဝ်ႉ။
ၸူးၸႂ်ၶႃႈတႄႉ ၶႂ်ႈဢုပ်ႇၶႂ်ႈလၢတ်ႈတေႃႇၶဝ်တင်းဝၼ်းၵွၼ်ႇယဝ်ႉ ၵူၺ်းၵႃႈ လွင်ႈဢၼ်ၶႃႈလႆႈတွၼ်ႈသွၼ်တီႈဢၢႆႈၸၢႆးမႃးၼၼ်ႉ ၶဝ်ဢမ်ႇၵျိူၵ်ႈ ၽူႈယိင်းၶီႈၶႅၼ်ၼႃႇ၊ ဢမ်ႇၵျိူၵ်ႈ ၽူႈယိင်းလၢတ်ႈယွႆႈၼႃႇ၊ ဢမ်ႇၵျိူၵ်ႈ ၽူႈယိင်းဢၼ်ဢမ်ႇပၼ်ၶဝ်လွတ်ႈလႅဝ်း၊ ဢမ်ႇၵျိူၵ်ႈ ၽူႈယိင်းဢၼ်ႁၵ်ႉၶဝ်ၸွမ်းၸႂ်ၶဝ်ႁႅင်းၼႃႇ၊ မိူဝ်ႈလႂ်ၶဝ်ဢမ်ႇၵျိူၵ်ႈၸႂ် ၶဝ်ၵေႃႈတေပႅတ်ႈၵႂႃႇ ၼၼ်ႉယဝ်ႉ။
မိူဝ်ႈတူဝ်ၶႃႈလႆႈထူပ်း သမ်ႉပေႃးဢမ်ႇႁူႉဝႃႈတေႁဵတ်းႁိုဝ်ယဝ်ႉၼႃႇ၊ ၶဝ်တၵ်ႉမႃးၵေႃႈတွပ်ႇ ၶဝ်တွပ်ႇမႃးၵေႃႈထၢမ်၊ ၸႂ်ထိုင်ၵေႃႈတၵ်ႉႁႃ ပႂ်ႉၶေႃႈတွပ်ႇၶဝ် ဝၢၼ်ႈပေႃးႁၢမ်းၸင်ႇႁၼ်ၶေႃႈတွပ်ႇၵေႃႈ ၵႃႈလႆႈဝႆႉၸႂ်သေပႂ်ႉၵူၺ်း။
ဝၢႆးသေၶဝ်ၶိုၼ်ႈႁူင်းႁဵၼ်းယဝ်ႉ ၶဝ်ၵေႃႈၵႆႉၵႆႉယဵၼ်ႁၢႆၵႂႃႇ မိူၼ်ၵူၼ်းဢမ်ႇတၼ်း လိူဝ်သေႁဵၼ်းလႄႈႁဵတ်းၵၢၼ်ၵူၺ်း၊ ဢုပ်ႇလၢတ်ႈတေႃႇမိူဝ်ႈလႂ်ၵေႃႈဝႃႈ ဢမ်ႇတၼ်း သိုပ်ႇၾူၼ်းၸူးမိူဝ်ႈလႂ်ၵေႃႈဢမ်ႇႁပ်ႉလႆႈ မီးၵၢၼ်။
ၶႃႈလႆႈၶေႃႈတွပ်ႇယူႇယဝ်ႉလူး မၼ်းၸႅင်ႈလႅင်းၸဵမ်မိူဝ်ႈ ၶႃႈသိုပ်ႇၾူၼ်းၵႂႃႇလႄႈဢမ်ႇႁပ်ႉလႆႈၼၼ်ႉယဝ်ႉၼႃႇ၊ ယွၼ်ႉပဵၼ်လွၵ်းလၢႆး ဢၼ်ဢၢႆႈၸၢႆးႁဝ်း ၵႆႉၵႆႉႁဵတ်းတေႃႇသၢဝ်မၼ်းယူႇသေႇသေႇလူး၊ သူပ်းတႄႉမေႃလၢတ်ႈၼႃႇ ပေႃးလၢတ်ႈမႃးၼိုင်ႈပွၵ်ႈ ၶေႃႈထၢမ်ၶေႃႈထၢင်ႇထိူမ်ၼၼ်ႉၵေႃႈ သမ်ႉပေႃးၸၢင်ႁၢႆၵႂႃႇတေႉယဝ်ႉ၊ ၵူၺ်းၵႃႈ တေဝႃႈႁိုဝ်ၵေႃႈ တေႃႈၼင်ႇၵူၼ်းႁၼ်တူဝ်ၵၼ်ယူႇ တင်းဢမ်ႇႁၼ်ၸႂ်ၵၼ်လႆႈ၊ ယူႇၵႆၵၼ်ဢၼ်ဝႃႈၼၼ်ႉ ယိုင်ႈၶႅၼ်းလႅၼ်ၵၼ်ငၢႆႈယဝ်ႉလူး။
သင်ၶဝ်ပဵၼ်ၸိူင်ႉၼၼ်ၵေႃႈ ၶႃႈယင်းတိုၵ်ႉယုမ်ႇၶဝ်ယူႇ ယွၼ်ႉႁၵ်ႉလူၼ်ႉဢူၵ်းႁူဝ်ၸႂ်ၼႃႇသေ ဢမ်ႇဝႃႈၶဝ်တေလၢတ်ႈတေႉႁိုဝ်လၢတ်ႈလဵၼ်ႈၵေႃႈယဝ်ႉ ၶႃႈယင်းတိုၵ်ႉဝႆႉလွင်ႈယုမ်ႇယမ်ၼိူဝ်ၶဝ်ယူႇ။
မၼ်းႁဵတ်းႁႂ်ႈၶႃႈ ႁပ်ႉႁူႉထိုင် ၵၢင်ၽႂ်ၽူႈယိင်း ၸိူဝ်းပဵၼ်ၸူႉဢၢႆႈၸၢႆးႁဝ်းၼၼ်ႉမႃးယဝ်ႉ၊ ၶဝ်တေလႆႈတိူဝ်ႉၸႂ်တၢၼ်ႇႁိုဝ် မိူဝ်ႈလႆႈငိၼ်းၶေႃႈၵႂၢမ်းဢၼ်လၢတ်ႈဝႃႈ ႁဝ်းၽႄတၢင်းၵၼ်လႃႈ ၼႆၼၼ်ႉ၊ တေႃႈၼင်ႇၶႃႈ ယင်းဢမ်ႇပႆႇငိၼ်းၵႂၢမ်းၶေႃႈၼၼ်ႉ လွင်ႈႁဵတ်းသၢင်ႈၶဝ်ၵူၺ်း ၶႃႈသမ်ႉပေႃးၸဵပ်းထိုင်ၸႂ်ယဝ်ႉၼႃႇ။
ၵူၼ်းမီးတၢင်းႁၵ်ႉၼၼ်ႉ မိူၼ်ၵူၼ်းငိူဝ်ႈ ၶႃႈၵေႃႈပဵၼ်ၵူၼ်းငိူဝ်ႈၵႂႃႇယဝ်ႉ တိူၵ်ႈတီႈဝႃႈ ႁူႉယူႇမၼ်းဢမ်ႇလီယုမ်ႇ ၶႃႈၵေႃႈယင်းတိုၵ်ႉယုမ်ႇလႆႈ၊ ပဵၼ်သင်လႄႈၶႃႈတေလႆႈငိူဝ်ႈထိုင်တၢၼ်ႇၼႆႉ ၶႃႈထိင်းၸႂ်ႁႂ်ႈဢမ်ႇဝူၼ်ႉထိုင်ၶဝ်ဢမ်ႇလႆႈ မိူဝ်ႈလႂ် ဝၼ်းလႂ် ဢမ်ႇလႆႈႁူႉငိၼ်းလွင်ႈၶဝ်ၼႆ ၸႂ်ၼႆႉမၼ်းဢမ်ႇလီသဝ်းသေဢိတ်း ဢမ်ႇမီးသမ်ႇမထိၼိမ်မၼ်ႈလႆႈသေဢိတ်း။ လႆႈႁၼ်ၶေႃႈၵႂၢမ်းၶဝ် ဢိတ်ႉဢွၼ်ႇၼိုင်ႈၵူၺ်းၵေႃႈ ၸႂ်သမ်ႉပေႃးသိူဝ်းၵီႈလူင်မႃးယဝ်ႉလူး။
တၢင်းႁၵ်ႉၼၼ်ႉ မၼ်းပဵၼ်တၢင်းတုၵ်ႉလႄႈတၢင်းသိူဝ်းမႃးၸွမ်းၵၼ်ယဝ်ႉ မၼ်းဢမ်ႇလီၸၢမ်းလႄႈ ဢမ်ႇလီယၢမ်ႈသေဢိတ်း သင်ႁူၼ်ၶၢဝ်းယၢမ်းလႆႈ ၶႃႈၵေႃႈ တေၸၢင်ႈလိူၵ်ႈမိူၼ်ၵဝ်ႇယူႇၵူၺ်း။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ
